Wok Yet Long Laikim Planti Brata Moa

“Yupela i mas wokabaut long pasin bilong laikim tru ol arapela, olsem Krais i bin laikim yumi tru.”​—EF. 5:2.

 1. Jisas i tok wanem samting bai makim ol disaipel tru bilong em?

WOK bilong autim gutnius bilong Kingdom Bilong God long ol haus, dispela em mak bilong ol Witnes Bilong Jehova. Tasol Krais Jisas i kolim narapela samting bilong lotu Kristen na dispela i stap olsem mak bilong ol disaipel tru bilong em. Em i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”​—Jo. 13:​34, 35.

2, 3. Pasin bilong yumi long laikim tru ol brata i mekim wanem long ol man i kam long ol miting Kristen bilong yumi?

² I no gat narapela lain i gat kain pasin laikim olsem lain brata Kristen tru. Olsem magnet i save pulim ain i kam, pasin laikim i mekim na ol wokboi bilong Jehova i stap wanbel na dispela pasin i pulim ol man i gat gutpela bel i kam long lotu i tru. Tingim Marcelino, em wanpela man long Kamarun. Wanpela eksiden i kamap long ples wok na em i kamap aipas. Bihain long eksiden, wanpela tok win i raun olsem em i bin kamap aipas, long wanem, em i wanpela sanguma. Pasto na ol arapela wanlotu bilong em i no mekim gut bel bilong em, nogat, ol i rausim em long lotu. Taim wanpela Witnes Bilong Jehova i singautim Marcelino long kam long miting, em i gat tupela tingting. Em i no laik bai ol man i sakim em gen.

³ Marcelino i kirap nogut long samting i kamap long Haus Kingdom. Ol bratasista i tok amamas long em, na ol tok bilong Baibel em i harim i mekim gut bel bilong em. Em i kirap long kam long olgeta miting bilong kongrigesen, strong long stadi long Baibel, na em i kisim baptais long 2006. Nau em i save autim tok i tru long famili na ol neiba bilong em na em i bin kirapim sampela Baibel stadi. Marcelino i laik bai ol dispela man em i stadi long Baibel wantaim ol, ol tu i ken pilim wankain pasin laikim em i pilim insait long lain bilong God.

 4. Bilong wanem yumi mas bihainim tok bilong Pol long “wokabaut long pasin bilong laikim tru ol arapela”?

⁴ Dispela pasin bilong laikim tru ol brata i gutpela samting tru, na yumi olgeta i mas mekim sampela samting na bai dispela pasin i stap yet. Tingim paia ol man i laitim long nait na ol man i kam klostu long en bilong hatim skin. Ol i mas wok yet long putim paiawut na bai paia i no ken i dai. Na olsem tasol, olgeta wan wan Kristen i mas wok long strongim pasin laikim na bai dispela gutpela pasin laikim insait long kongrigesen i no ken i dai. Olsem wanem yumi ken mekim olsem? Aposel Pol i bekim dispela askim: “Yupela i mas wokabaut long pasin bilong laikim tru ol arapela, olsem Krais i bin laikim yumi tru na givim laip bilong em yet bilong helpim yumi. Em i givim laip bilong en long God olsem ofa i gat gutpela switpela smel.” (Ef. 5:2) Gutpela sapos yumi skelim dispela askim: Long wanem ol rot mi ken wokabaut yet long pasin bilong laikim tru ol arapela?

“Givim Bel Bilong Yupela”

5, 6. Bilong wanem Pol i tokim ol Kristen long Korin long ‘givim bel bilong ol olgeta’ long kamapim pasin laikim?

⁵ Aposel Pol i raitim pas long ol Korin bilong bipo na em i tok: “Yupela Korin, mipela i tokaut ples klia long yupela. Mipela i givim bel bilong mipela moa yet long yupela. Mipela i no pasim bel bilong mipela. Nogat. Mipela i laikim tumas yupela. Tasol yupela yet i pasim bel bilong yupela, na yumi no stap wanbel tru. Nau mi tokim yupela olsem papa i tokim ol pikinini bilong en. Yupela i mas mekim wankain pasin olsem mipela i mekim long yupela. Yupela tu i mas givim bel bilong yupela olgeta long mipela.” (2 Ko. 6:​11-13) Bilong wanem Pol i tokim ol Korin long givim bel long kamapim pasin laikim?

⁶ Tingim olsem wanem kongrigesen long Korin bilong bipo i bin kirap. Pol i bin kam long Korin long Oktoba samting bilong yia 50 C.E. Maski sampela man i birua long em taim em i kirap autim tok, dispela aposel i no givap. Bihain liklik, planti man long dispela taun i bilip long gutnius. Inap “wan yia na 6 mun,” Pol i givim olgeta strong bilong em long skulim na strongim nupela kongrigesen. Dispela i kamapim klia olsem em i laikim tumas ol Kristen long Korin. (Ap. 18:​5, 6, 9-11) Olsem na i gat as tru na ol i laikim tru Pol na soim rispek long em. Tasol sampela long kongrigesen i no laik stap klostu long em. Ating sampela i no laikim pasin bilong em long givim tok kaunsel. (1 Ko. 5:​1-5; 6:​1-10) Na ating sampela i bin putim yau long ol tok em “ol smatpela aposel” i mekim bilong bagarapim gutnem bilong Pol. (2 Ko. 11:​5, 6, NW) Pol i laik bai olgeta brata na sista i laikim em. Olsem na em i tokim ol long ‘givim bel bilong ol olgeta’ na i go klostu long em na long ol arapela wanbilip.

 7. Olsem wanem yumi ken ‘givim bel olgeta’ long laikim planti brata moa?

⁷ Olsem wanem long yumi? Olsem wanem yumi inap ‘givim bel olgeta’ long laikim planti brata moa? Ating ol lain i gat wankain krismas o ol lain bilong wankain ples, em i isi long ol long laikim tru narapela narapela. Na ol lain em ol i gat laik long painim wankain amamas, ol i save lusim bikpela hap taim bilong stap wantaim. Tasol sapos ol samting yumi laik mekim wantaim sampela Kristen i pasim yumi long pas gut wantaim sampela narapela, orait yumi mas ‘givim bel olgeta’ long laikim planti brata moa. Yumi mas askim yumi yet olsem: ‘Wan wan taim tasol mi save autim tok na bung wantaim ol brata na sista husat i no insait long lain pren bilong mi? Long Haus Kingdom, wan wan taim tasol mi save toktok wantaim ol nupela lain, long wanem, mi ting ol i mas kamapim klia pastaim olsem ol i gutpela inap long mi ken prenim ol? Mi save tok gude long ol lapun na ol yangpela insait long kongrigesen?’

8, 9. Olsem wanem tok bilong Pol long Rom 15:7 inap helpim yumi long tok gude long pasin i helpim yumi long laikim moa yet ol brata?

⁸ Long sait bilong tok gude long narapela narapela, tok bilong Pol long ol Rom inap helpim yumi long kisim stretpela tingting long ol wanbilip bilong yumi. (Ritim Rom 15:7.) Tok Grik ol i tanim olsem ‘amamas long kisim ol arapela i kam,’ dispela i makim olsem “long gutpela pasin kisim narapela o mekim gut long em, kamap pren bilong em.” Long taim bilong ol man i bin raitim Baibel, taim wanpela man i singautim ol pren i kam long haus bilong em, em i save tokim ol olsem em i amamas tru long lukim ol. Krais i bin amamas long kisim yumi i kam insait long kongrigesen Kristen, na yumi mas bihainim pasin bilong em na amamas long kisim ol wanbilip bilong yumi.

⁹ Taim yumi tok gude long ol brata bilong yumi long Haus Kingdom na long ol narapela ples, yumi ken tingim ol brata yumi no bin lukim o toktok wantaim ol inap sampela hap taim. Gutpela sapos yumi lusim sampela minit bilong toktok wantaim ol. Long narapela miting, yumi ken mekim wankain long sampela narapela. Long dispela rot, insait long sotpela hap taim yumi bai toktok wantaim planti brata na sista bilong yumi. Yumi no ken tingting planti sapos yumi no inap toktok wantaim olgeta long wanpela de. Na i no stret long sampela i bel hevi sapos yumi no inap tok gude long ol long olgeta wan wan miting.

10. Wanem gutpela rot i op i stap long olgeta insait long kongrigesen? Olsem wanem yumi ken mekim tru dispela pasin?

¹⁰ Long pasin bilong kisim ol narapela, namba wan samting yumi mas mekim em yumi mas tok gude. Dispela pasin inap opim rot long yumi ken toktok gut wantaim narapela na kamap gutpela pren bilong em. Olsem, taim ol bratasista i go long ol kibung na kolim nem bilong ol long ol narapela na ol i kirap long toktok, orait bihain ol i save wet long bungim gen ol dispela lain long narapela kibung. Ol volantia bilong sanapim ol Haus Kingdom na ol lain i insait long wok bilong helpim ol lain i bin kisim bagarap long bikpela win na ren samting, ol i save kamap gutpela pren, long wanem, ol i kisim save long ol gutpela pasin bilong narapela taim ol i wok wantaim. Insait long oganaisesen bilong Jehova i gat planti rot long kisim ol gutpela pren. Sapos yumi ‘givim bel olgeta’ long laikim planti brata, planti moa bai kamap pren bilong yumi, na dispela bai strongim pasin laikim we i save mekim yumi i stap wanbel long lotu i tru.

Givim Taim Bilong Yu Long Ol Arapela

11. Olsem Mak 10:​13-16 i kamapim, Jisas i stap gutpela piksa long wanem samting?

¹¹ Olsem Jisas, olgeta Kristen inap wok strong long stap olsem man em ol narapela i amamas long kam na toktok long ol. Tingim tok Jisas i bin mekim taim ol disaipel bilong em i laik pasim ol papamama long bringim ol pikinini bilong ol i kam long em. Em i tok: “Yupela larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini.” Na “em i holim ol pikinini long han bilong en, na i putim han antap long ol, na em i askim God long mekim gut long ol.” (Mk. 10:​13-16) Piksaim long tingting bikpela amamas bilong ol dispela pikinini taim Bikpela Tisa i tingim tru ol!

12. Wanem samting inap pasim yumi long toktok wantaim ol narapela?

¹² Olgeta wan wan Kristen i mas askim em yet, ‘Mi redi long givim taim bilong mi long ol narapela o planti taim i luk olsem mi bisi tumas?’ Sampela taim, ol pasin i no gat rong long mekim, ol inap pasim rot bilong toktok. Olsem: Sapos planti taim yumi yusim mobail fon o yaufon bilong harim musik samting taim yumi stap wantaim ol narapela, yumi inap kirapim ol long kisim tingting olsem yumi no amamas long stap wantaim ol. Sapos ol narapela i lukim yumi bisi long pilaim vidio gem samting, ol inap ting olsem yumi les long toktok wantaim ol. Tru, i gat “taim bilong pasim maus.” Tasol taim yumi stap wantaim ol arapela, planti taim em “taim bilong toktok.” (Sav. 3:7) Sampela inap tok, “Mi laik stap mi yet” o “Mi les long toktok long moningtaim.” Tasol pasin bilong toktok gut wantaim narapela maski yumi no gat bikpela laik long mekim olsem, dispela i kamapim klia olsem yumi ‘no save tingting tumas long yumi yet.’​—1 Ko. 13:5.

13. Pol i kirapim Timoti long kisim wanem tingting long ol brata na sista Kristen?

¹³ Pol i strongim yangpela Timoti long rispektim olgeta bratasista bilong kongrigesen. (Ritim 1 Timoti 5:​1, 2.) Yumi tu i mas mekim wankain pasin long ol lapun Kristen olsem yumi save mekim long ol papa na mama bilong yumi, na long ol yangpela olsem yumi save mekim long ol brata na susa tru bilong yumi. Taim yumi gat dispela kain tingting, ol gutpela brata na sista bilong yumi bai pilim olsem ol inap pas gut wantaim yumi.

14. Wanem sampela gutpela samting inap kamap taim yumi toktok long ol gutpela samting wantaim ol narapela?

¹⁴ Taim yumi toktok long ol gutpela samting wantaim ol narapela, yumi helpim ol long kamap strong long ol samting bilong spirit na stap gut long bel na tingting. Wanpela brata husat i wok long wanpela brens ofis, em i tingim sampela lapun bratasista long Betel husat i bin lusim hap taim bilong toktok wantaim em taim em i kam nupela long Betel. Ol gutpela tok bilong ol i mekim na em i pilim olsem famili Betel i amamas long em. Nau em i traim long bihainim pasin bilong ol na toktok wantaim ol arapela brata na sista i wok long Betel.

Pasin Daun i Helpim Yumi Long Kamap Wanbel

15. Wanem samting i soim olsem sampela taim hevi inap kamap namel long yumi?

¹⁵ Yuodia na Sintike, tupela sista Kristen i stap long Filipai bilong bipo, ol i hatwok long stretim hevi i stap namel long tupela. (Fl. 4:​2, 3) Bikpela kros i kamap namel long Pol na Barnabas, olsem na tupela i bruk na ol i no wok moa wantaim, na ol narapela tu i save long dispela kros. (Ap. 15:​37-39) Ol dispela stori i soim olsem ol man i stap insait long lotu i tru, sampela taim hevi inap kamap namel long ol. Jehova i helpim yumi long stretim ol hevi na kamap wanbel gen. Tasol em i laik bai yumi yet i mas mekim sampela samting.

16, 17. (a) Pasin daun i bikpela samting olsem wanem bilong stretim kros? (b) Olsem wanem stori bilong pasin Jekop i mekim long Iso i kamapim klia olsem pasin daun i gutpela samting?

¹⁶ Piksaim long tingting olsem yu na wanpela pren i laik go raun long ka. Paslain long yupela i kirapim raun bilong yupela, yu mas yusim ki bilong kirapim ensin bilong ka. Na olsem tasol, yumi mas yusim wanpela kain ki bilong stretim kros yumi gat wantaim narapela. Dispela ki em pasin daun. (Ritim Jems 4:10.) Olsem stori bilong Baibel i stap long paragraf 17 bai kamapim, dispela ki i helpim ol lain i gat kros namel long ol yet long kirap bihainim ol stiatok bilong Baibel.

¹⁷ Inap 20 yia Iso i bin bel nogut long brata bilong em Jekop, long wanem, Jekop i kisim namba bilong em olsem namba wan pikinini, olsem na Iso i laik kilim Jekop i dai. Tupela twins i laik bung bihain long ol dispela yia, “na [Jekop] i pret moa yet, na em i bel hevi na tingting planti.” Em i pilim olsem Iso inap long mekim nogut long em. Tasol long taim ol i bung, Jekop i mekim samting em Iso i no ting em bai mekim. Taim em i wok long kam klostu long brata bilong em, Jekop i “brukim skru na putim pes i go daun long graun.” Wanem samting i kamap? “Iso i ran i kam na i holimpas brata bilong em na i givim kis long en. Na tupela wantaim i krai.” Dispela i mekim na pait i no kamap. Pasin daun bilong Jekop i helpim Iso long daunim bel nogut bilong em.​—Stt. 27:41; 32:​3-8; 33:​3, 4.

18, 19. (a) Taim kros i kamap, bilong wanem em i bikpela samting long yumi go pas long bihainim ol skultok bilong Baibel? (b) Bilong wanem yumi no ken givap sapos narapela i no laik stretim kros hariap?

¹⁸ Baibel i gat ol gutpela skultok long pasin bilong stretim ol kros. (Mt. 5:​23, 24; 18:​15-17; Ef. 4:​26, 27)a Tasol sapos yumi no bihainim dispela skultok, em bai hatwok long kamap wanbel gen wantaim brata. Sapos yumi wetim narapela long mekim pasin daun, dispela i no stretim hevi, long wanem, yumi tu inap i go pas na mekim pasin daun na stretim hevi.

¹⁹ Sapos pasin wanbel i no kamap long namba wan taim yumi traim long stretim kros, yumi no ken givap. Ating narapela i mas kisim sampela hap taim moa bilong skelim ol tingting i stap long bel bilong em. Ol brata bilong Josep i no bin stap gut long em. Longpela hap taim i lus na bihain ol i bungim em taim em i stap praim minista bilong Isip. Na nau ol i tanim bel na askim Josep long lusim rong bilong ol. Josep i mekim olsem, na ol pikinini man bilong Jekop i kamap wanpela bikpela lain i holim nem bilong Jehova. (Stt. 50:​15-21) Long rot bilong stap wanbel wantaim ol brata na sista bilong yumi, yumi kamapim pasin wanbel na amamas insait long kongrigesen.​—Ritim Kolosi 3:​12-14.

‘Givim Bel Tru Long Ol na Mekim Gutpela Pasin’

20, 21. Stori bilong Jisas i wasim lek bilong ol aposel bilong em inap skulim yumi long wanem samting?

²⁰ Paslain liklik long dai bilong em, Jisas i tokim ol aposel bilong em: “Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jo. 13:15) Em i mekim dispela tok taim em i bin wasim lek bilong 12-pela aposel bilong em. Jisas i no bihainim tasol wanpela kastam o mekim gutpela pasin tasol. Nogat. Paslain long Jon i raitim stori bilong Jisas i wasim lek bilong ol aposel, em i tok: “[Jisas] i laikim tumas ol manmeri bilong en i stap long dispela graun, na em i laikim ol moa yet i go inap long taim em i dai.” (Jo. 13:1) Pasin bilong Jisas long laikim tru ol disaipel bilong em i kirapim em long mekim wanpela wok em ol wokboi nating i save mekim. Nau ol i mas daunim ol yet na mekim gutpela pasin long narapela narapela. Yes, pasin bilong laikim tru ol brata i mas kirapim yumi long mekim gut na tingim tru olgeta brata na sista bilong yumi.

²¹ Aposel Pita, em Pikinini Bilong God i bin wasim lek bilong em, em i kliagut long mining bilong dispela samting em Jisas i mekim. Em i tok: “Yupela i bin bihainim tok i tru, na long dispela pasin yupela i bin mekim yupela yet i kamap klin long ai bilong God. Na yupela i save laikim tru ol arapela manmeri bilong God. Orait nau yupela i mas wok strong moa long laikim ol na givim bel bilong yupela olgeta long ol.” (1 Pi. 1:22) Aposel Jon, em Bikpela i bin wasim lek bilong em tu, em i tok: “Ol liklik pikinini bilong mi, yumi no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.” (1 Jo. 3:18) Gutpela sapos bel bilong yumi i kirapim yumi long mekim ol samting i kamapim klia pasin bilong yumi long laikim tru ol brata.

[Futnot]

Yu Tingim Yet?

• Long wanem ol rot yumi ken ‘givim bel olgeta’ long laikim planti brata moa?

• Wanem samting bai helpim yumi long givim taim bilong yumi long ol narapela?

• Olsem wanem pasin daun i helpim yumi long kamap wanbel wantaim brata?

• Wanem samting i mas kirapim yumi long mekim gut long ol wanbilip?

[Piksa long pes 21]

Amamas long ol wanbilip

[Piksa long pes 23]

Givim taim bilong yu long ol narapela