Ol Kristen Bilong Pastaim na Lo Bilong Moses
“Lo i stap olsem waspapa bilong yumi, bilong bringim yumi i kam long Krais.”—GALESIA 3:24.
1, 2. Taim ol Israel i bihainim gut Lo Bilong Moses, dispela i helpim ol olsem wanem?
LONG 1513 B.C.E., Jehova i givim ol lo long ol Israel. Em i tokim ol, sapos ol i bihainim tok bilong em, em bai mekim gut long ol na ol bai stap amamas na belgut.—Kisim Bek 19:5, 6.
2 Ol dispela lo, ol i kolim Lo Bilong Moses, o “Lo,” “i stretpela na i gutpela.” (Rom 7:12) Lo i kirapim ol Juda long bihainim ol gutpela pasin, olsem mekim gut long narapela, bihainim stretpela pasin, helpim man i sindaun klostu, na bihainim stretpela pasin bilong marit. (Kisim Bek 23:4, 5; Wok Pris 19:14; Lo 15:13-15; 22:10, 22) Na tu, Lo i kirapim ol Juda long laikim ol narapela. (Wok Pris 19:18) Na narapela samting, ol i no ken bung wantaim ol man bilong ol narapela lain i no stap aninit long Lo o maritim ol meri bilong ol. (Lo 7:3, 4) Lo Bilong Moses i olsem wanpela “banis” i stap namel long ol Juda na ol man bilong ol narapela lain—nogut tingting na pasin bilong ol haiden i mekim na lain bilong God i kamap doti long ai bilong Em.—Efesus 2:14, 15; Jon 18:28.
3. I no gat wanpela man inap bihainim tru Lo, olsem na Lo i bin mekim wanem wok?
3 Tasol i no gat wanpela bilong ol Juda inap winim mak bilong bihainim tru Lo bilong God. Yu ting dispela mak Jehova i putim em i antap tumas? Nogat. Wanpela as na em i givim Lo long ol Israel, i olsem: Em i laik “bai as bilong sin em i ken kamap ples klia.” (Galesia 3:19) Lo i helpim ol Juda i gat gutpela bel long save i mas i gat wanpela Man bilong kisim bek ol. Taim dispela Man i kamap pinis, ol gutpela Juda i amamas. Klostu em bai kisim bek ol long sin na dai!—Jon 1:29.
4. Olsem wanem Lo i stap olsem ‘waspapa bilong bringim ol man i kam long Krais’?
4 Lo Bilong Moses i bilong sotpela taim tasol. Taim aposel Pol i raitim pas long ol wanlain Kristen, em i tok Lo i stap olsem ‘waspapa bilong bringim ol man i kam long Krais.’ (Galesia 3:24) Long bipo, man i mekim wok olsem waspapa em i save bringim ol pikinini i go i kam long skul. Em i no tisa bilong ol; em i man bilong bringim ol i go long tisa na em tasol. Na olsem tasol, Lo Bilong Moses i bilong bringim ol gutpela Juda i go long Krais. Jisas i bin tok promis olsem em bai stap wantaim ol disaipel bilong em long “olgeta de, i go inap long dispela taim i pinis.” (Matyu 28:20) Taim kongrigesen Kristen i kamap pinis, dispela “waspapa”—olsem Lo—i no gat wok moa. (Rom 10:4; Galesia 3:25) Tasol sampela Kristen Juda ol i no kisim kwik dispela bikpela tok i tru. Olsem na ol i bihainim yet sampela tok bilong Lo, maski Jisas i kirap bek pinis. Tasol ol narapela i stretim tingting bilong ol. Long dispela samting ol i stap gutpela piksa bilong yumi long nau i ken bihainim. Orait nau yumi ken stori long dispela.
Nupela Save Ol i Kisim Long Bilip Kristen
5. Long samting olsem driman, wanpela maus i tokim Pita long mekim wanem? Bilong wanem em i kirap nogut tru?
5 Long 36 C.E., aposel Kristen Pita i lukim samting olsem driman. Em i harim wanpela maus long heven i tokim em long kilim na kaikai ol pisin na abus em Lo i tok i no klin. Pita i kirap nogut tru! I no gat wanpela taim em i bin “kaikai wanpela samting i no klin long ai bilong [God] na i tambu long [ol] i kaikai.” Tasol dispela maus i tokim em: “Samting God i bin mekim i kamap klin, dispela yu no ken kolim i no klin.” (Aposel 10:9-15) Pita i stretim tingting bilong em, em i no strong strong long bihainim yet Lo, nogat. Dispela i helpim em long kisim save long wanpela bikpela samting God bai mekim.
6, 7. Wanem samting i bin helpim Pita long save olsem nau em inap autim tok long ol man bilong ol narapela lain? Wanem sampela samting moa em i luksave long en?
6 Samting i kamap i olsem: Tripela man i go long haus em Pita i stap long en na ol i askim em long go wantaim ol long haus bilong wanpela man bilong ol narapela lain i no bin katim skin, nem bilong em Kornilius. Dispela man i save pret long God. Pita i singautim ol i go insait long haus na em i lukautim ol. Pita i bin kisim gut mining bilong dispela driman, olsem na long de bihain, em i go wantaim ol long haus bilong Kornilius. Hia long dispela haus, Pita i autim gut tok bilong Jisas Krais. Na em i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Kornilius na ol wanblut na ol pren tru bilong em ol i bilip long Jisas na “Holi Spirit i kam daun long olgeta manmeri i stap harim tok bilong God.” Pita i luksave olsem Jehova i bin stiaim ol dispela samting, olsem na em i tokim ol long “kisim baptais long nem bilong Jisas Krais.”—Aposel 10:17-48.
7 Wanem samting i bin helpim Pita long save olsem ol man bilong ol narapela lain i no stap aninit long Lo Bilong Moses, nau ol inap kamap disaipel bilong Jisas Krais? Pasin bilong skelim gut ol samting bilong spirit i bin helpim em. God i bin kapsaitim spirit bilong em long ol man bilong ol narapela lain ol i no bin katim skin na long dispela rot em i bin kamapim klia olsem em i orait long ol, olsem na Pita i luksave ol i ken kisim baptais. Tasol Pita i luksave tu olsem God i no bin tokim ol Kristen bilong ol narapela lain long ol i mas bihainim Lo Bilong Moses bambai ol i ken kisim baptais. Sapos yu bin i stap long dispela taim, bai yu redi long stretim tingting bilong yu olsem Pita i bin mekim?
Sampela i Bihainim Yet “Waspapa”
8. Sampela Kristen long Jerusalem ol i kamapim wanem tingting long pasin bilong katim skin na i narapela kain long tingting bilong Pita long dispela samting? Bilong wanem ol i gat dispela tingting?
8 Taim Pita i lusim haus bilong Kornilius, em i go long Jerusalem. Kongrigesen long dispela hap i bin harim tok olsem ol man bilong ol narapela lain i no bin katim skin ol i “kisim pinis tok bilong God,” na sampela disaipel Juda ol i kros long dispela. (Aposel 11:1-3) “Ol lain disaipel i strong long bihainim pasin bilong katim skin” ol i save pinis ol man bilong ol narapela lain ol inap kamap disaipel bilong Jisas, tasol ol i strong long tok, bilong God i ken kisim bek ol, ol i mas bihainim Lo Bilong Moses. Tasol long ol hap i gat planti man bilong ol narapela lain na i no gat planti Juda Kristen, pasin bilong katim skin i no samting ol i tok pait long en. Dispela tupela tingting i stap inap 13 yia. (1 Korin 1:10) Dispela i traim bilip bilong ol dispela Kristen bilong pastaim—na moa yet ol man bilong ol narapela lain ol i sindaun long ol hap we i gat planti Juda i stap!
9. I gat wanem as na ol i mas stretim bikpela tok i bin kamap long pasin bilong katim skin?
9 Tok bilong dispela samting i kamap bikpela tru long 49 C.E. taim ol Kristen long Jerusalem i kam long Antiok bilong Siria, we Pol i autim tok. Ol i skulim ol Kristen olsem ol man bilong ol narapela lain i kamap Kristen ol i mas katim skin olsem Lo i tok. Bikpela tok pait i kamap namel long ol wantaim Pol tupela Barnabas na ol i paitim tok i go i kam! Sapos ol i no stretim gut dispela tok, sampela Kristen, maski ol i bilong lain Juda o bilong ol narapela lain, ol bai pundaun long bilip. Olsem na ol i stretim rot bilong Pol na sampela moa ol i ken i go long Jerusalem na askim lain hetman bilong bosim ol Kristen, long stretim tru dispela askim.—Aposel 15:1, 2, 24.
Tok Pait Pinis—Orait Nau, Wanbel!
10. Bilong stretim dispela tok bilong ol man bilong ol narapela lain i mas katim skin o nogat, wanem sampela samting lain hetman i bin tingim pastaim?
10 Long wanpela miting i kamap, sampela i tok ol Kristen bilong ol narapela lain ol i mas katim skin, tasol sampela i tok i no gat wok long ol i mekim olsem. Tasol ol i no larim samting ol i pilim long bel tasol i stretim dispela tok, nogat. Taim ol i mekim planti toktok pinis, aposel Pita na Pol i stori long ol mirakel Jehova i bin wokim namel long ol man i no bin katim skin. Ol i tok God i bin kapsaitim spirit holi long ol man bilong ol narapela lain i no bin katim skin. I olsem ol i askim: ‘Yu ting i stret long kongrigesen Kristen i ken sakim ol man em God yet i bin orait long ol?’ Orait nau disaipel Jems i ritim wanpela tok bilong Baibel na dispela i helpim olgeta i kam bung long ol i ken save long laik bilong Jehova long dispela samting.—Aposel 15:4-17.
11. Wanem samting i no bin stiaim dispela toktok bilong katim skin? Wanem samting i soim olsem blesing bilong Jehova i bin stap long dispela tok ol i pasim?
11 Nau olgeta i lukluk i go long lain hetman. Ol i bilong lain Juda, olsem na yu ting dispela bai stiaim ol na ol bai tok ol man bilong ol narapela lain i mas katim skin? Nogat. Ol dispela gutpela man i gat strongpela tingting long bihainim tok bilong Baibel na long larim spirit holi bilong God i stiaim ol. Taim ol i harim pinis ol bikpela tok ol narapela i mekim, lain hetman i wanbel long tok olsem i no gat wok long ol Kristen bilong ol narapela lain i mas katim skin na kam aninit long Lo Bilong Moses. Taim ol brata i harim pinis dispela tok ol i bin pasim, ol i amamas tru, na ol kongrigesen “i go bikpela moa long olgeta de.” Ol dispela Kristen i daun long tok bilong God ol i kisim gutpela bekim em Baibel i as bilong en! (Aposel 15:19-23, 28, 29; 16:1-5) Tasol wanpela bikpela askim i stap yet.
Olsem Wanem Long Ol Juda Kristen?
12. Ol i no bin stretim wanem askim?
12 Lain hetman i bin kamapim klia, i no gat wok long ol Kristen bilong ol narapela lain i mas katim skin. Tasol olsem wanem long ol Kristen bilong lain Juda? Samting lain hetman i bin pasim tok pinis long en, em i no bin stretim dispela askim.
13. I gat wanem as na i no stret long sampela i bin tok olsem ol man i mas bihainim Lo Bilong Moses bambai God i ken kisim bek ol?
13 Sampela Kristen Juda em ol i “strong moa long bihainim lo bilong Moses” ol i wok yet long katim skin bilong ol pikinini bilong ol na long bihainim sampela tok bilong Lo. (Aposel 21:20) Tasol sampela i tok, ol Kristen Juda i mas bihainim Lo bambai God i ken kisim bek ol. Tasol long dispela samting, ol i popaia stret. Tingim: Olsem wanem wanpela Kristen i ken mekim ofa long animal bilong tekewe sin? Ofa bilong Krais i bin mekim na kain ofa olsem i no gat strong moa. Na olsem wanem long tok bilong Lo i tok ol Juda i no ken bung wantaim ol man bilong ol narapela lain? Ol Kristen i givim bel long autim tok bai ol i hatwok tru long bihainim dispela tambu na mekim tu wok bilong lainim ol man bilong ol narapela lain long bihainim ol tok bilong Jisas. (Matyu 28:19, 20; Aposel 1:8; 10:28)a I no gat wanpela samting i soim olsem ol i bin stretim tok bilong dispela samting long wanpela miting bilong lain hetman. Tasol i no olsem kongrigesen i no gat samting bilong helpim ol, nogat.
14. Pas bilong Pol i bin kamapim wanem ol tok bilong stiaim ol Kristen long ol samting bilong Lo?
14 Samting bilong stiaim ol i bin kam long rot bilong sampela pas ol aposel i raitim—i no long wanpela pas lain hetman i salim long ol, nogat. Olsem: Aposel Pol i salim tok long ol man bilong lain Juda na ol narapela lain ol i stap long Rom, na dispela tok i gat strong. Long pas em i salim long ol, em i tok: “Man i stap Juda long bel na tingting bilong en, em i Juda tru. Na pasin tru bilong katim skin, em tu i mas kamap insait long bel na tingting bilong man.” (Rom 2:28, 29) Long dispela pas, Pol i mekim wanpela tok piksa bilong kamapim klia olsem ol Kristen i no i stap aninit moa long Lo. Em i tok wanpela meri i no ken marit long tupela man long wankain taim. Tasol sapos man bilong em i dai pinis, orait em i ken maritim narapela man. Orait nau Pol i mekim wok long dispela tok piksa bilong soim olsem, ol Kristen God i bin makim ol i no ken aninit long Lo Bilong Moses na stap lain bilong Krais long wankain taim. Bilong kamap lain bilong Krais, ol i mas i “dai pinis” long Lo.—Rom 7:1-5.
Ol i No Kisim Kwik
15, 16. Bilong wanem sampela Kristen Juda ol i no kisim gut dispela tok olsem ol i no i stap aninit moa long Lo? Olsem wanem dispela i kamapim klia olsem yumi mas was i stap long ol samting bilong spirit?
15 Pol i kamapim klia tru olsem ol Kristen Juda ol i no i stap aninit moa long Lo. Orait olsem wanem na sampela Kristen Juda ol i no kisim gut dispela tok? Wanpela samting i olsem: Ol i no gat pasin bilong skelim gut ol samting bilong spirit. Ol i slek long kisim ol strongpela kaikai bilong spirit. (Hibru 5:11-14) Na ol i no save go oltaim long ol miting Kristen. (Hibru 10:23-25) Narapela samting na sampela i no kisim gut dispela tok, em dispela Lo yet. Ol samting bilong Lo, olsem tempel na lain pris, em ol samting tru tru ol inap lukim na holim. Man i no strong tumas long ol samting bilong spirit, ating em bai bihainim Lo, long wanem, dispela i isi moa long mekim, winim pasin bilong kisim ol strongpela tok bilong lotu Kristen, em as bilong ol dispela tok em ol samting man i no inap lukim long ai.—2 Korin 4:18.
16 Long pas Pol i salim long ol Galesia em i kamapim narapela as na sampela man i tok ol i Kristen ol i strong long bihainim Lo. Pol i tok ol dispela man i laik bai ol narapela i ken orait long ol na ting ol i bilong wanpela lotu em planti man i bihainim. Ol i no redi long i stap narapela kain, olsem na ol i redi long kalapim sampela bilip bilong ol na bai ol i ken stap wankain olsem ol narapela. Ol i laik bai ol man i laikim ol, winim God i laikim ol.—Galesia 6:12.
17. Stretpela tingting long pasin bilong bihainim Lo i bin kamap klia long wanem taim?
17 Ol Kristen i gat pasin bilong skelim gut ol samting, taim ol i stadi gut long ol tok bilong Pol na ol narapela, ol i kisim gut stretpela tingting long Lo. Tasol long yia 70 C.E., stretpela tingting long Lo Bilong Moses i kamap ples klia long olgeta Kristen Juda. Dispela samting i bin kamap taim God i larim Jerusalem, na tempel bilong en, na ol lista i gat nem bilong ol pris, i bagarap. Dispela i mekim na i no gat rot moa long bihainim olgeta samting bilong Lo.
Bihainim Dispela Tok Long Nau
18, 19. (a) Bilong stap strong long ol samting bilong spirit, yumi mas kisim wanem kain tingting? Na sakim wanem kain tingting? (b) Pasin bilong Pol i lainim yumi olsem wanem long pasin bilong larim ol brata i gat namba long stiaim yumi? (Lukim blok long pes 24.)
18 Yumi stori pinis long ol dispela samting i bin kamap bipo, na ating yu laik save: ‘Sapos mi bin stap long dispela taim we isi isi laik bilong God i wok long kamap ples klia, bai mi mekim wanem? Bai mi strong long bihainim yet tingting bilong ol Juda long Lo? O bai mi stap isi na wet long stretpela save long Lo i ken kamap klia? Na taim dispela nupela save i kamap klia pinis, bai mi stretim tingting bilong mi na wanbel long en?’
19 Tru, yumi no save bai yumi mekim wanem sapos yumi bin stap long dispela taim bipo. Tasol yumi ken askim yumi yet: ‘Mi save mekim wanem taim sampela tok bilong Baibel i kamap klia moa long nau? (Matyu 24:45) Taim mi kisim ol tok bilong Baibel bilong soim rot long mi, mi save wok long bihainim, na bihainim tu ol gutpela tingting ol dispela tok i laik givim long mi—nogut mi strong tumas long bihainim olgeta liklik liklik hap tok bilong en na em tasol? (1 Korin 14:20) Mi save stap isi na wet long Jehova taim mi no kisim kwik bekim bilong sampela askim?’ Em i bikpela samting long yumi mas mekim gutpela wok long ol kaikai bilong spirit yumi inap kisim long nau, na bai yumi no “slek long bihainim dispela tok na yumi lusim olgeta.” (Hibru 2:1) Taim Jehova i givim tok bilong stiaim yumi, em long rot bilong Baibel, na spirit bilong em, na oganaisesen bilong em long graun, yumi mas putim gut yau. Sapos yumi mekim olsem, Jehova bai givim laip i stap oltaim long yumi na yumi bai stap amamas na belgut.
[Futnot]
a Taim Pita i go long Antiok bilong Siria, em i bung na poroman gut wantaim ol bilipman bilong ol narapela lain. Tasol taim ol Kristen Juda bilong Jerusalem i kamap, Pita “i pret long dispela lain Kristen i save strong long pasin bilong katim skin. Olsem na em i stap longwe long ol man bilong ol arapela lain, na em i no poroman moa wantaim ol.” Yumi ken tingim bikpela bel hevi bilong ol dispela bilipman bilong ol narapela lain, taim dispela aposel i gat nem em i no laik tru long kaikai wantaim ol.—Galesia 2:11-13.
Bai Yu Bekim Olsem Wanem?
• Olsem wanem Lo Bilong Moses i kain olsem wanpela ‘waspapa bilong bringim ol man i kam long Krais’?
• Bai yu tok wanem long as na Pita na “ol lain disaipel i strong long bihainim pasin bilong katim skin” ol i gat narapela narapela tingting long ol nupela save ol i kisim long tok i tru?
• Olsem yu lainim pinis, Jehova i save kamapim ol tok i tru olsem wanem long nau?
[Blok/Piksa long pes 24]
Pol i Mekim Pasin Daun na Stap Gut Long God Taim Traim i Painim Em
Pol i mekim pinis wanpela raun bilong autim gutnius, na long yia 56 C.E. em i kamap long Jerusalem. Long dispela hap, wanpela traim i wetim em. Kongrigesen i bin harim tok olsem Pol i bin lainim ol man olsem strong bilong Lo i pinis. Ol hetman i pret, nogut ol strongpela tok Pol i mekim long Lo i pundaunim ol nupela Kristen Juda na ol i kirap na ting olsem ol Kristen i no save daun long ol samting Jehova i putim. Long kongrigesen, i gat 4-pela Kristen Juda i bin mekim wanpela promis long God—ating ol i bin tok promis long givim ol yet long God inap sampela taim. Ol i mas go long tempel bambai ol i ken truim dispela promis.
Ol hetman i askim Pol long kisim dispela 4-pela i go long tempel na baim ol ofa ol i mas mekim. Pol i bin raitim tupela pas i kamapim klia olsem pasin bilong bihainim Lo i no wanpela samting ol man i mas mekim bambai God i ken kisim bek ol. Tasol em i save tingim maus bilong bel bilong ol man. Bipo em i bin raitim tok olsem: “Long ai bilong ol man i stap aninit long lo, mi save stap olsem man i stap aninit long lo, bilong mi ken kisim ol man i stap aninit long lo.” (1 Korin 9:20-23) Pol i no save sakim ol stiatok bilong Baibel, tasol long dispela samting ol hetman i askim em long mekim, em i pilim olsem em inap mekim. (Aposel 21:15-26) I no gat rong long em i mekim olsem. Dispela pasin bilong mekim tok promis long Jehova, dispela i no pait wantaim tok bilong Baibel, na tempel i bin i stap olsem ples bilong lotuim trupela God—ol god giaman, nogat. Pol i no laik pundaunim ol man, olsem na em i mekim olsem ol i askim em. (1 Korin 8:13) Bilong mekim olsem, Pol i mas bihainim pasin daun, na dispela samting i kirapim yumi long rispek moa long em.
[Piksa long pes 22, 23]
Inap sampela yia, narapela narapela tingting long Lo Bilong Moses i bin i stap namel long ol Kristen