Sapta 19
Yu Mas Ting Olsem Wanem Long Lo Bilong Moses?
LONG taim bilong aposel Pol bikpela tok pait i kamap long wanpela samting, olsem: Ol Kristen bilong ol narapela lain ol i mas bihainim Lo bilong Moses o nogat? Tru, long yia 36 C.E. spirit holi i kam daun long sampela man bilong ol narapela lain, em ol i no katim skin. Tasol sampela Kristen bilong lain Juda ol i gat strongpela tingting olsem ol Kristen bilong ol narapela lain ol i mas katim skin na lain long bihainim Lo bilong Moses. Olsem wanem? Ol i mas bihainim dispela Lo o sampela hap tok bilong en, o nogat? Long 49 C.E. samting ol i kisim dispela askim i go long Jerusalem long lain bilong bosim ol Kristen.—Ap. 10:44-48; 15:1, 2, 5.
2 Yumi mas tingim gut ol tok dispela lain i mekim bilong stretim dispela askim, long wanem sampela man long nau ol i tok, ol Kristen i mas bihainim sampela hap bilong Lo bilong Moses, olsem lo bilong Sabat. Na tu Baibel i tok, “lo yet em i holi. Na olgeta tok bilong lo em tu i holi, na stret, na gutpela.” (Rom 7:12) Ol i kolim dispela Lo olsem Lo bilong Moses, long wanem Moses em i namelman bilong en. Tasol God Jehova yet i As bilong dispela Lo.—Eks. 24:3, 8.
BILONG WANEM LO I KAMAP?
3 Yumi mas save bilong wanem Jehova i givim dispela Lo long ol Isrel na bai yumi kisim stretpela tingting long en long nau. Baibel i tok: “Orait, bilong wanem lo i stap? Em i olsem: God i laik bai as bilong sin em i kamap ples klia, olsem na em i skruim lo [long promis em i bin mekim long Ebraham] i kam bihain. . . . lo em i bilong i stap inap long dispela pikinini bai i kamap, bipo God i givim promis long em. . . . Lo em i olsem waspapa bilong yumi, bilong bringim yumi i kam long Krais bai yumi ken bilip long gutnius na God i ken kolim yumi stretpela man.” (Ga. 3:19, 24) Lo i mekim dispela wok olsem wanem?
4 Lo i makim stret ol samting ol Juda i mas mekim na i kamapim ples klia olsem ol i sinman. Maski ol i laik tru long bihainim dispela Lo na ol i wok strong long mekim, tasol ol i no inap. Ol Juda i olsem piksa na long rot bilong ol dispela sinman Lo i makim yumi olgeta yumi gat sin na i stret God i ken givim strafe long yumi. (Rom 3:19, 20) Lo i kamapim ples klia olsem i mas i gat wanpela man bilong kisim bek yumi. Lo i bringim ol bilipman i kam long Krais, em dispela Man bilong kisim bek yumi. Lo i mekim dispela wok olsem wanem? Lo i soim yumi Krais tasol inap bihainim tru olgeta tok bilong Lo, na long dispela graun em wanpela tasol i no gat sin. Lo i tok ol i mas kilim sampela animal olsem ofa na ol dispela ofa i helpim ol liklik. Tasol Jisas i gutpela man olgeta, olsem na em inap givim skin o laip bilong em olsem ofa bilong tekewe sin na bai olgeta man i bilip long em ol i ken kisim laip i stap oltaim.—Jon 1:29; 3:16; 1 Pi. 1:18, 19.
5 Orait, yu kisim save pinis long ol dispela samting na nau bai yu bekim ol dispela askim olsem wanem?
Olsem wanem? Lo bilong Moses em bilong olgeta lain i mas bihainim? (Sam 147:19, 20; Eks. 31:12, 13)
Jehova i bin tokim ol Isrel dispela Lo bai pinis bihain o nogat? (Jer. 31:31-33; Hi. 8:13)
Taim Lo i pinis, orait Tenpela Lo wantaim lo bilong Sabat tu i pinis? (Kl. 2:13, 14, 16; 2 Ko. 3:7-11 [tok bilong Eksodas 34:28-30 i kamapim gut insait bilong dispela tok]; Rom 7:6, 7)
Long wanem rot Jehova i pinisim Lo bilong Moses? (Kl. 2:13-17; Mt. 5:17, 18; Rom 10:4)
6 Orait, sapos ol man i tok Lo i no pinis, i olsem ol i mekim wanem? I olsem ol i no bilip long Krais Jisas. Long wanem sapos ol i tok Lo i no pinis, orait ol i no bilip olsem Krais em inapim dispela Lo na opim rot bilong God i ken pinisim. Sampela long bipo ol i tok ol i Kristen, tasol ol i laik bihainim yet Lo bilong Moses. Aposel Pol i tok strong long ol, olsem: “Sapos yupela i laik bihainim lo, na long dispela yupela i laik bai God i kolim yupela stretpela man, orait yupela i lusim Krais pinis. Yupela i lusim pinis marimari bilong God.”—Ga. 5:4; lukim tu Rom 10:2-4.
7 Ol man i tok sampela hap bilong Lo i no pinis, ol i no pilim tru olsem man i mas bilip long ofa bilong Krais bambai God i ken kolim em stretpela man, na God i no ken kolim em stretpela man long rot bilong bihainim Lo. (Ga. 3:11, 12) Ol i ting man inap bihainim Lo na kamap stretpela man—tasol i no inap tru long ol sinman i mekim olsem. Bikpela samting em olsem: Yumi mas bihainim ol lo God na Krais i putim long ol Kristen. (Jems 2:15-17; Mt. 28:19, 20) Sapos yumi bihainim ol dispela lo, ol dispela wok yumi mekim i kamapim ples klia olsem yumi laikim tumas God na yumi bilip long Krais. Na sapos yumi no mekim ol dispela wok, i olsem bilip bilong yumi i dai pinis. Tasol maski yumi mekim bikpela wok na yumi wok strong, i no olsem God i mas givim pe long yumi. Nogat. Laip i stap oltaim em i presen God i givim nating long yumi long rot bilong Krais. God i no baim yumi long ol wok yumi mekim. Nogat. Em i marimari long yumi na givim dispela presen long yumi.—Ef. 2:8, 9; Rom 3:23, 24; 6:23.
8 Tok bilong lain bilong bosim ol Kristen bilong pastaim i stret wantaim ol dispela samting, em ol i tok ol Kristen bilong ol narapela lain ol i no gat wok long bihainim Lo bilong Moses. Ol i save, Jehova i no laik bai ol narapela lain i mas bihainim Lo bilong Moses bambai ol i ken kisim spirit holi. Nogat. Dispela lain long Jerusalem i makim sampela tambu ol Kristen i mas bihainim na ol dispela tambu i stret wantaim Lo. Tasol ol i tingim sampela samting i bin kamap paslain long Lo, em Baibel i stori long en, na ol dispela samting i as bilong ol dispela tambu. Olsem na ol i no tok ol Kristen bilong ol narapela lain i mas bihainim Lo bilong Moses o sampela hap tok bilong en. Nogat. Ol i kolim gen sampela lo lain bilong God i bin bihainim paslain long taim bilong Moses.—Ap. 15:28, 29; lukim tu Jenesis 9:3, 4; 34:2-7; 35:2-5.
9 Bihain long Pentikos, 33 C.E., ol Juda i no aninit moa long Lo bilong Moses. Na ol Juda i bilip ol i amamas long dispela samting. Bilong wanem? Long wanem, ol manmeri bilong ol narapela lain ol tu i sinman na ol i save dai, tasol ol Juda i stap moa nogut, long wanem ol i brukim dispela Lo na long ai bilong God ol i kamap man bilong lus. Dai bilong Jisas—em i dai long pos olsem man nogut—dispela kain dai bilong em i helpim ol. Em i kamap senis bilong ol Juda ol bai bilip long em. Ol i bin brukim Lo na ol i mas i dai, tasol ol samting Jisas i bin mekim i helpim ol na i tekewe dispela pe nogut ol i mas kisim long rong bilong ol. (Ga. 3:10-13) Em i wokim rot bambai sin bilong ol i ken tekewe. Lo bilong Moses i no inap tekewe sin bilong ol olsem.—Ap. 13:38, 39.
10 Lo i olsem banis i stap namel long ol Juda na ol manmeri bilong ol narapela lain. Ol Juda i mas bihainim sampela lo ol narapela lain i no aninit long en. Na ol narapela lain i no katim skin ol i no inap insait olgeta long lotu bilong ol Juda. (Lukim Eksodas 12:48; Aposel 10:28.) Tasol taim Lo inapim pinis wok bilong en na God i pinisim, orait nau long rot bilong Krais ol Juda na ol narapela lain i no katim skin ol inap bung wantaim na lotuim dispela wanpela God em i God tru.—Ef. 2:11-18.
Yumi Save Long Lo na Dispela Inap Helpim Yumi
11 Long nau yumi no aninit long Lo bilong Moses, tasol sapos yumi save long en, dispela inap helpim gut yumi olgeta wan wan. Em inap helpim yumi olsem wanem? Mama bilong Jisas em i bilong lain Juda, olsem na Jisas i kamap aninit long Lo. Yumi mas save gut long ol samting dispela Lo i tok ol i mas mekim na bai yumi inap save long as bilong sampela samting Jisas i bin mekim. (Ga. 4:4; lukim Luk 22:7, 8.) Na Jisas i autim tok long ol manmeri i stap aninit long dispela Lo, olsem na ol tok bilong dispela Lo i as bilong planti tok em i lainim ol man long en.—Skelim Matyu 5:23, 24.
12 Taim Jisas i kirap bek em i tokim ol disaipel, ol samting em i bin mekim long graun na ol samting i bin painim em, dispela i truim tok ol i bin raitim long em long Lo bilong Moses na long buk bilong ol profet na long ol Sam. (Luk 24:44) Na Pol i stori long sampela samting bilong dispela Lo na em i tok, dispela i olsem “piksa” bilong samting bilong heven. Na em i tok, “Long lo yumi lukim tewel tasol bilong ol gutpela samting i laik kamap bihain.” (Hi. 8:4, 5; 10:1) Wok pris na ofa bilong Krais i truim planti samting Lo bilong Moses i kolim, na yumi kirap nogut long dispela samting. Sapos yumi save gut long ol dispela samting bai yumi inap pilim tru ol samting Krais i mekim bilong helpim yumi. Na ol samting bilong Lo i makim Jisas, dispela i soim rot long yumi long ol samting yumi mas mekim bilong lotu tru long God long haus lotu spirit bilong em. Taim yumi wok long kisim save long ol dispela samting, yumi save gut long dispela lain em spirit holi i makim ol na yumi pilim tru gutpela wok ol i mekim aninit long Krais bilong helpim lotu bilong yumi.
13 Lo bilong Moses i insait long tok bilong Baibel na spirit bilong God yet i as bilong olgeta tok bilong Baibel. Olsem na olgeta dispela tok i gutpela bilong “givim save long yumi, na soim yumi sin bilong yumi, na stretim wokabaut bilong yumi.” (2 Ti. 3:16) Ol tok bilong stiaim tingting bilong yumi i as bilong Lo na ol dispela tok i bilong i stap oltaim. Sapos yumi wok long kisim save long ol dispela tok bilong stiaim tingting bilong yumi na yumi tingim gut, bai bel bilong yumi i kirap tru long mekim ol pasin God i laikim. Sapos yumi pilim gutpela tingting Lo i laik givim long ol man na yumi bihainim dispela gutpela tingting, dispela bai helpim tru yumi!
14 Taim Jisas i mekim bikpela tok bilong em long maunten, em i kamapim gut dispela samting. Em i givim tok long ol man i stap aninit long Lo, na em i tokim ol, Lo i tok ol i no ken kilim man i dai, tasol ol i mas lusim tu pasin bilong belhat na ol i mas mekim gutpela wok long maus bilong ol; ol i no ken toknogutim brata bilong ol. Sapos ol i no pamuk o bagarapim marit, ol i no ken ting dispela tasol inap; nogat; ol i no ken aigris tu long ol meri. Yumi tu, yumi mas mekim gutpela wok long olgeta hap skin bilong yumi na bihainim stretpela pasin bilong Jehova. (Mt. 5:21, 22, 27-30; lukim tu Rom 13:8-10.) Sapos yumi mekim olsem bai yumi kamapim ples klia olsem yumi save long as bilong nambawan bikpela tok bilong Lo, em olsem: “[Jehova] em i God bilong yu. Na yu mas laikim em long bel bilong yu olgeta na long [laip] bilong yu olgeta na long tingting bilong yu olgeta.” (Mt. 22:36, 37) Olsem bai yumi pas moa yet long Jehova. Tru, yumi no aninit moa long Lo bilong Moses, tasol sapos yumi save long as bilong ol tok bilong dispela Lo na yumi save long ol samting bilong Lo i makim Jisas, dispela inap helpim yumi.
Stori Gen Long Ol Dispela Tok
● Ol man i strong long tok yumi mas bihainim Lo bilong Moses, olsem wanem ol i sakim Krais?
● Sapos yumi save long Lo bilong Moses, olsem wanem dispela inap helpim yumi long save long ol wok God i givim long Jisas bilong kamapim laik bilong God?
● Yumi no aninit long dispela Lo, tasol sapos yumi kisim save long en, yumi inap pilim wanem ol bikpela samting?
[Askim Bilong Stadi]
1. (a) Kirap long yia 36 C.E., wanem samting i kamap na yumi ken save, Jehova i orait long ol man bilong ol narapela lain, em ol i no katim skin, ol i ken kamap Kristen? (b) Tasol sampela Kristen bilong pastaim i gat strongpela tingting long wanem askim?
2. Bilong wanem yumi mas tingim dispela askim?
3. Bilong wanem God i givim Lo long ol Isrel?
4. (a) Olsem wanem Lo i mekim “sin em i kamap ples klia”? (b) Olsem wanem Lo i bringim ol bilipman i kam long Krais?
5. Lukim ol skripsa na bekim ol askim i stap long dispela paragraf.
6. Sapos ol man i tok Lo bilong Moses i no pinis, i olsem ol i mekim wanem?
7. (a) Ol man i tok sampela hap bilong Lo i no pinis, ol i no pilim tru wanem samting? (b) Ol wok Kristen i bikpela samting o nogat? Sapos yumi laik kisim laip oltaim, olsem wanem long ol dispela wok Kristen?
8. Lain bilong bosim ol Kristen bilong pastaim ol i tok wanem long dispela askim long ol Kristen bilong narapela lain na Lo bilong Moses?
9. (a) Ol Juda i mas aninit yet long Lo bilong Moses? (b) Dispela kain dai bilong Jisas i mekim wanem bikpela samting bilong helpim ol Juda?
10. Taim Lo i tekewe, olsem wanem dispela i helpim ol lain long bung wantaim na lotuim God?
11. Sapos yumi save long Lo, olsem wanem dispela i helpim yumi long save long ol tok Krais i lainim ol man long en?
12. (a) Jisas i tok wanem long ol samting em i mekim na Lo bilong Moses? (b) Pol i tok wanem na em i soim yumi, sapos yumi save long Lo, dispela inap helpim yumi? (c) Sapos yumi save long ol samting bilong spirit dispela Lo i makim, bai yumi pilim tru wanem samting?
13. Bilong wanem i gutpela sapos yumi tingim ol gutpela tok bilong stiaim tingting bilong yumi em ol i stap insait long dispela Lo?
14. (a) Jisas i tok wanem na yumi save, sapos yumi kisim gutpela tingting ol tok bilong dispela Lo i kamapim, dispela bai helpim yumi? (b) Stori long sampela as tok moa bilong Lo olsem i stap long pes 152. (c) Sapos yumi save gut long ol dispela samting, olsem wanem dispela inap helpim yumi long mekim moa yet pasin God i laikim?
[Blok long pes 152]
Sampela As Tok Bilong Lo Bilong Moses
Ol Wok Bilong God Ol i Mas Mekim
Lotuim Jehova wanpela tasol Eks. 20:3; 22:20
Mekim gut nem bilong Em Eks. 20:7; Lev. 24:16
Laikim tumas Em na givim bel olgeta Diu. 6:5; 10:12;
long mekim wok bilong Em 30:16
Pret long sakim tok bilong Em, Diu. 5:29; 6:24
aninit long Em
Lotuim em long pasin em i laikim Lev. 1:1-5; Nam. 16:
1-50; Diu. 12:5-14
Givim ol gutpela samting tru bilong Eks. 23:19; 34:26
yu long Em; em i bin givim long yu pastaim
Ol man i laik lotuim Em ol i mas i Eks. 19:10, 11; 30:20
stap klin long skin
Tingim wok bilong lotu i nambawan, Eks. 20:8-10; 34:21;
wok bilong skin i nambatu Nam. 15:32-36
Ol Tambu Bilong Lotu
No ken lotuim god giaman o piksa Eks. 20:4-6; Diu. 7:25
bilong wanpela samting
No ken bung wantaim ol narapela lotu Eks. 23:13; 34:12-15;
No ken wokim posin, papait, marila samting Eks. 22:18; Lev. 20:27;
Marit na Famili
No ken bagarapim marit Eks. 20:14; Lev. 20:10
Mas maritim tasol man o meri i lotuim Jehova Diu. 7:1-4
No ken mekim maritpasin wantaim Lev. 18:6-16; 20:11
wanblut tru
Klia long olgeta pasin i gat sem Lev. 18:23; 20:13
Tingim gut laip bilong pikinini i Eks. 21:22, 23
stap yet long bel bilong mama
Bihainim tok bilong papamama Eks. 20:12; 21:15, 17;
Skulim ol pikinini long ol pasin Diu. 6:4-9; 11:18-21
bilong Jehova
Wok Bilong Helpim Narapela Man
Tingim gut laip bilong man Eks. 20:13; Nam. 35:9-34
Sori long ol narapela man; no ken Lev. 19:17, 18
bel nogut long ol
Tingim gut ol lapun Lev. 19:32
Sori long ol rabisman, ol pikinini i Lev. 25:35-37; Diu. 15:
no gat papamama, ol meri man bilong ol 7-11; 24:19-21
i dai pinis
No ken mekim nogut long aipas o yaupas Lev. 19:14; Diu. 27:18
No ken mekim pasin giaman long wok bisnis Lev. 19:35, 36; 25:14
Tingim gut ol samting bilong ol Eks. 20:15; 22:1, 6;
narapela man 23:4; Diu. 22:1-3
No ken mangalim samting bilong Eks. 20:17
narapela man
No ken haitim rong bilong man i Lev. 5:1; Diu. 13:6-11
mekim bikpela rong
Mekim tok i tru tasol; no ken mekim Eks. 20:16; 23:1, 2
tok giaman long kot
No ken helpim tasol man i gat Eks. 23:3, 6; Lev. 19:15