‘Yu Mas Daunim Belhat’
“Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man . . . em i mas daunim belhat.”—2 TIMOTI 2:24.
1. Taim yumi mekim wok Kristen, bilong wanem yumi save bungim ol man i mekim ol hatpela tok?
YU SAVE mekim wanem taim yu bungim ol man i sakim yu o sakim tok yu autim? Long tok bilong aposel Pol long ol samting bai kamap long las de, em i tok profet olsem ol man bai “tok kros na tok nogut long ol arapela, . . . ol bai i no bosim laik bilong bodi bilong ol, na ol bai i pait na bagarapim ol man nabaut.” (2 Timoti 3:1-5, 12) Yu inap bungim ol kain man olsem long wok autim tok o long ol narapela taim.
2. Wanem ol skripsa inap helpim yumi long bihainim gutpela tingting taim ol man i mekim hatpela tok long yumi?
2 Maski man i mekim ol hatpela tok dispela i no makim olsem em i no gat laik liklik long stretpela pasin, nogat. Ating ol bikpela hevi o ol samting i mekim ol i tingting planti na dispela i kirapim ol long kros long ol narapela man. (Saveman 7:7) Planti man i mekim dispela pasin, long wanem, ol i stap na mekim wok namel long ol man bilong mekim ol tok nogut. Dispela i no makim olsem i stret long yumi ol Kristen i mekim ol kain tok olsem, nogat, tasol em i helpim yumi long kliagut long as na ol narapela man i save mekim olsem. Yumi mas mekim wanem taim ol man i mekim hatpela tok long yumi? Sindaun 19:11 i tok: “Man i gat gutpela tingting, em i no inap kros kwik.” Na Rom 12:17, 18 i tokim yumi: “Sapos ol i mekim pasin nogut long yupela, orait yupela i no ken bekim pasin nogut long ol. . . . Oltaim yupela i mas painim rot bilong i stap wanbel [“bel isi,” NW ] wantaim olgeta man.”
3. Olsem wanem pasin bilong bel isi i insait long ol tok yumi autim?
3 Sapos tru tru yumi gat pasin bilong i stap bel isi, dispela bai kamap ples klia long ol samting yumi mekim. Ol tok na pasin bilong yumi, na ating pes bilong yumi na krai bilong nek tu bai kamapim klia olsem yumi man bilong bel isi. (Sindaun 17:27) Taim Jisas i salim ol disaipel i go bilong autim tok, em i tokim ol: “Sapos yupela i go insait long wanpela haus, orait yupela i mas tokim ol manmeri bilong haus olsem, ‘God i ken mekim gut long yupela.’ Na sapos ol manmeri bilong dispela haus i amamas long kisim yupela, orait gutpela tok bilong yupela i ken i stap long ol. Tasol sapos ol i no amamas long kisim yupela, orait yupela i ken kisim bek gutpela tok bilong yupela.” (Matyu 10:12, 13) Tok yumi autim em i gutpela tok. Baibel i kolim dispela tok olsem “gutnius bilong God i laik wanbel wantaim ol manmeri,” “gutnius bilong marimari bilong God,” na “gutnius bilong kingdom.” (Efesus 6:15; Aposel 20:24; Matyu 24:14) Yumi no laik daunim ol bilip bilong man o tok pait wantaim em, nogat, yumi laik tokim em long gutpela tok i stap long Baibel.
4. Yu ken tok wanem sapos man i tok “Mi no laik harim,” taim yu no tokim em yet long as na yu go lukim em?
4 Ating wanpela man bilong haus bai i no putim gut yau na kwiktaim em i tok, “Mi no laik harim.” Ating planti taim yumi inap tok, “Mi bin tingting long ritim dispela sotpela hap tok bilong Baibel.” Ating em bai orait long dispela. O ating sampela taim i gutpela long tok: “Mi bin tingting long tokim yu long wanpela taim bai kamap na ol manmeri bai mekim stretpela pasin tasol na ol bai lain long laikim tru narapela narapela.” Sapos dispela i no kirapim laik bilong man long harim sampela tok moa, orait yu ken tok: “Tasol i luk olsem nau em i no gutpela taim bilong yumi stori.” Maski sapos man bilong haus i tromoi sampela hatpela tok, yu ting i stret yumi kisim tingting olsem em i no gat gutpela bel? Maski ol man i mekim wanem pasin, tingim tok bilong Baibel long “mekim gutpela pasin long olgeta man . . . mas daunim belhat.”—2 Timoti 2:24.
Hambak Long Wanem Em i No Kisim Stretpela Save
5, 6. Sol i mekim wanem pasin long ol disaipel bilong Jisas? Bilong wanem em i mekim ol dispela pasin?
5 Long taim bilong ol aposel, wanpela man nem bilong em Sol em i gat nem long mekim ol tok nogut, na mekim nogut tu long ol man. Baibel i tok em i “strong yet long bagarapim ol disaipel bilong Bikpela na kilim ol i dai.” (Aposel 9:1, 2) Bihain em i tokaut olsem “tru, bipo mi bin tok bilas long nem bilong [Jisas], na mi birua long em na mi bin tok nogut long em.” (1 Timoti 1:13) Ating sampela wanblut bilong em i kamap Kristen pinis, tasol em i tok long tingting bilong em long ol disaipel bilong Jisas olsem: “Mi belhat nogut tru long ol, na mi bin i go painim ol long ol taun i stap longwe tu, bai mi ken mekim save long ol.” (Aposel 23:16; 26:11; Rom 16:7, 11) I no gat wanpela samting i kamapim klia olsem ol disaipel i bin traim long tok pait wantaim Sol long ai bilong ol man taim em i wok long mekim dispela pasin.
6 Bilong wanem Sol i mekim dispela pasin? Planti yia bihain em i tok: “Mi no bin save gut long em na mi no bilip long em.” (1 Timoti 1:13) Em i wanpela Farisi, na em i bin skul “gut tru long olgeta lo bilong ol tumbuna.” (Aposel 22:3) Tru, tisa bilong em, Gamaliel, em i no tingting nogut long ol disaipel bilong Jisas, tasol hetpris Kaiafas, em Sol i bung wantaim em, em i gat tingting nogut long ol. Kaiafas i bin i go pas long samting nogut ol i mekim long kilim i dai Jisas Krais. (Matyu 26:3, 4, 63-66; Aposel 5:34-39) Bihain long dispela, Kaiafas i stiaim ol samting na bai ol i wipim ol aposel bilong Jisas, na em i tok strong long ol i no ken autim tok moa long nem bilong Jisas. Kaiafas i bin bosim kaunsil long taim ol i kisim Stiven i go bilong stonim em. (Aposel 5:27, 28, 40; 7:1-60) Sol i lukluk i stap taim ol i stonim Stiven, na Kaiafas i makim em long mekim ol narapela samting bilong pasim ol disaipel bilong Jisas long rot bilong kalabusim ol long Damaskus. (Aposel 8:1; 9:1, 2) Kaiafas i orait long pasin Sol i mekim, so Sol i ting dispela i kamapim klia olsem em i givim bel tru long God, tasol tru tru em i no gat trupela bilip. (Aposel 22:3-5) Olsem na Sol i no luksave olsem Jisas em i Mesaia tru. Tasol Sol i kisim stretpela tingting taim Jisas, em i kirap bek pinis, i toktok long em long rot bilong wanpela mirakel long rot i go long Damaskus.—Aposel 9:3-6.
7. Sol i bungim Jisas long rot i go long Damaskus na dispela i mekim wanem long Sol?
7 Bihain liklik long dispela, Jisas i salim disaipel Ananaias i go bilong autim tok long Sol. Olsem wanem? Sapos em yu, bai yu amamas long i go lukim Sol? Ananaias i pret liklik, tasol long gutpela pasin em i toktok long Sol. Tingting bilong Sol i senis, long wanem, long rot bilong wanpela mirakel, em i bungim Jisas long rot i go long Damaskus. (Aposel 9:10-22) Bihain em i kisim nem olsem aposel Pol, na em i givim bel tru long mekim wok misineri olsem wanpela Kristen.
Em i Mekim Pasin Isi Tasol Em i Gat Strongpela Bel
8. Olsem wanem Jisas i bin kamapim tingting olsem bilong Papa bilong em, long ol man i bin mekim ol pasin nogut?
8 Jisas i bin givim bel tru long autim tok bilong Kingdom na taim em i mekim ol samting long ol man em i save mekim long pasin isi wantaim strongpela bel. (Matyu 11:29) Em i kamapim pasin bilong Papa bilong em long heven husat i save kirapim ol man nogut long lusim pasin nogut bilong ol. (Aisaia 55:6, 7) Jisas i save luksave long ol samting ol sinman i mekim bilong senisim pasin bilong ol, na em i save lukim gut ol samting i makim olsem man inap senisim pasin, na em i save strongim ol kain man olsem. (Luk 7:37-50; 19:2-10) Jisas i no save lukim skin bilong ol man na skelim ol, nogat, em i bihainim pasin bilong Papa bilong em long mekim gutpela pasin, wetim man, na i no bekim kwik pe nogut, na long dispela rot em i laik helpim man long tanim bel. (Rom 2:4) Em laik bilong Jehova long olgeta kain man i mas tanim bel na bai God i ken kisim bek ol.—1 Timoti 2:3, 4.
9. Yumi inap lainim wanem samting long pasin Jisas i mekim long truim tok bilong Aisaia 42:1-4?
9 Matyu, man bilong raitim Gutnius, em i kamapim tingting em Jehova i gat long Jisas Krais na em i kolim dispela tok profet: “Dispela em i wokman bilong mi. Mi yet mi bin makim em. Mi laikim em tumas, na bel bilong mi em i amamas moa yet long em. Bai mi putim Spirit bilong mi long em, na em bai i autim tok bilong stretpela pasin long olgeta lain manmeri bilong graun. Em bai i no mekim tok kros na singaut bikmaus. Ol manmeri bai i no harim em i toktok long ol rot. Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut. Em bai i wok i stap, inap em i mekim stretpela pasin i win tru. Na ol manmeri bilong ol arapela lain bai ol i bilip long em na wetim em i helpim ol.” (Matyu 12:17-21; Aisaia 42:1-4) Jisas i inapim dispela tok profet na em i no insait long ol tok pait. Long taim bilong hevi tu em i kamapim tok i tru long pasin i pulim tingting bilong ol man i gat gutpela bel.—Jon 7:32, 40, 45, 46.
10, 11. (a) Maski ol Farisi i save birua tru long Jisas, bilong wanem em i autim tok long sampela bilong ol? (b) Sampela taim Jisas i save bekim wanem tok long ol birua bilong em? Tasol em i no save mekim wanem?
10 Long taim em i autim tok, Jisas i bin toktok wantaim planti Farisi. Maski sampela bilong ol i laik painim rong long toktok bilong em, Jisas i no kisim tingting olsem olgeta bilong ol i gat tingting nogut, nogat. Saimon, wanpela Farisi husat i gat pasin bilong sutim tok, em i laik save gut long Jisas na em i singautim Jisas i kam long wanpela kaikai. Jisas i orait long i go na em i autim tok long ol man i bung. (Luk 7:36-50) Long narapela taim, wanpela Farisi i gat biknem, em Nikodemus, em i kam long nait bilong lukim Jisas. Jisas i no kros long em i wet inap tudak na em i kam, nogat. Em i autim tok long Nikodemus long pasin laikim bilong God long salim Pikinini bilong em i kam bilong opim rot long God i ken kisim bek ol man i bilip. Long gutpela pasin Jisas i kamapim olsem em i bikpela samting long man i mas daun long ol pasin God i bin putim. (Jon 3:1-21) Bihain Nikodemus i mekim tok bilong helpim Jisas taim ol narapela Farisi i daunim wanpela gutpela samting Jisas i bin mekim.—Jon 7:46-51.
11 I no olsem Jisas i no save long ol tok giaman bilong ol man i laik painim rong long em, nogat. Em i no larim ol birua i pulim em long insait long ol tok pait i no gat as bilong en. Tasol long taim i stret long mekim, em i save mekim ol sotpela bekim long rot bilong kamapim wanpela stiatok, mekim tok piksa, o kolim tok bilong wanpela skripsa. (Matyu 12:38-42; 15:1-9; 16:1-4) Long sampela narapela taim, Jisas i no save bekim tok taim em i luksave olsem dispela i no inap kamapim gutpela samting.—Mak 15:2-5; Luk 22:67-70.
12. Maski taim ol i bikmaus long Jisas, olsem wanem Jisas i helpim ol man?
12 Sampela taim ol manmeri em ol spirit nogut i bosim ol, ol i save bikmaus long Jisas. Taim dispela samting i kamap, em i save bosim bel na em i save mekim wok tu long strong God i bin givim em bilong rausim ol spirit nogut. (Mak 1:23-28; 5:2-8, 15) Sapos sampela man i kros na bikmaus long yumi taim yumi autim tok, yumi tu i mas bosim bel, na stretim dispela samting long gutpela pasin isi.—Kolosi 4:6.
Insait Long Famili
13. Bilong wanem na sampela taim ol narapela long famili i save birua long man i kirap stadi long Baibel wantaim ol Witnes Bilong Jehova?
13 Em i bikpela samting moa yet long ol disaipel bilong Jisas i mas bosim gut bel insait long famili. Man i pilim tru tok i tru bilong Baibel em bai i gat laik long famili bilong em tu i mekim olsem. Tasol olsem Jisas i bin tok, sampela long famili inap mekim pasin birua. (Matyu 10:32-37; Jon 15:20, 21) I gat kain kain samting inap kirapim ol long mekim olsem. Olsem: Tok bilong Baibel inap helpim yumi long mekim tok tru, bihainim tok, na tingim gut ol narapela, tasol Baibel i skulim yumi tu olsem maski wanem samting i kamap, yumi gat wok long bihainim tok bilong Man Bilong Wokim yumi. (Saveman 12:1, 13; Aposel 5:29) Ating wanpela long famili inap bel nogut long yumi sapos em i pilim olsem pasin bilong yumi long stap gut long Jehova i daunim namba em i holim insait long famili. Bilong stretim kain hevi olsem, em i bikpela samting long yumi mas bihainim pasin bilong Jisas long bosim bel!—1 Pita 2:21-23; 3:1, 2.
14-16. Wanem samting i kirapim sampela, em pastaim ol i birua long famili bilong ol, long senisim tingting bilong ol?
14 Planti manmeri em ol i mekim wok bilong Jehova long nau, poroman marit o narapela wanblut i bin birua long ol senis ol i mekim taim ol i kirap stadi long Baibel. Ating ol dispela lain i birua ol i bin harim sampela tok kranki long ol Witnes Bilong Jehova, na ating ol i pret olsem nogut dispela bai nogutim famili bilong ol. Wanem samting i bin kirapim ol long senisim tingting? Planti taim, gutpela pasin bilong dispela man o meri i stadi long Baibel i bin kirapim ol long senisim tingting. Pasin bilong dispela man o meri long sanap strong long bihainim tok bilong Baibel—go oltaim long ol miting Kristen na autim tok na mekim tu wok bilong lukautim famili na bosim bel taim ol narapela i mekim ol hatpela tok—sampela taim dispela i save daunim pasin birua insait long famili.—1 Pita 2:12.
15 Ating pasin antap o pasin bilong tingting nogut long narapela inap mekim na man i birua em i no laik long putim yau long tok bilong Baibel. Dispela samting i bin kamap long wanpela man long Amerika husat i tok em i givim bel tru long kantri bilong em. Wanpela taim meri bilong em i stap long wanpela kibung na dispela man i kisim olgeta klos bilong em yet na em i lusim haus. Long narapela taim, em i kisim wanpela gan na lusim haus na em i tok long kilim em yet i dai. Em i tok lotu bilong meri bilong em i gat asua long olgeta pasin kranki em i mekim. Tasol meri bilong em i wok strong yet long bihainim ol tok bilong Baibel. Meri i kamap wanpela Witnes Bilong Jehova, na inap 20 yia bihain, man bilong em tu i kamap wanpela Witnes. Long Albenia wanpela meri i kros nogut tru, long wanem, pikinini meri bilong em i stadi long Baibel wantaim ol Witnes Bilong Jehova na i kisim baptais. Inap 12-pela taim dispela mama i bagarapim Baibel bilong pikinini meri. Orait wanpela taim em i opim nupela Baibel em pikinini meri i bin lusim long tebol. Mama i opim nating Baibel i go long Matyu 10:36, na em i luksave olsem tok bilong dispela skripsa i stret long em. Tasol maski i olsem, em i tingting planti long pikinini meri, olsem na taim pikinini i laik kisim sip wantaim ol narapela Witnes bilong i go long wanpela kibung long Itali, mama i go lusim em long ples bilong kisim sip. Taim mama i lukim pasin bilong ol long laikim na holimpas narapela narapela na smail na lap wantaim, tingting bilong em i kirap long senis. Bihain liklik long dispela, em i orait long stadi long Baibel. Long nau em i wok strong long helpim ol narapela husat i mekim pasin birua.
16 Wanpela taim, wanpela man i holim naip, em i sutim tok long meri bilong em taim meri i go long Haus Kingdom. Meri i bekim tok long pasin isi: “Kam insait long Haus Kingdom, na yu yet i ken lukim.” Em i mekim olsem, na bihain em i kamap wanpela elda Kristen.
17. Sapos sampela taim hevi i kamap insait long famili Kristen, wanem ol tok bilong Baibel inap helpim famili?
17 Maski sapos olgeta long famili bilong yu ol i Kristen, sin i stap long skin bilong ol man, olsem na ating sampela taim hevi inap kamap na sampela inap mekim ol hatpela tok. Yumi mas tingim olsem ol Kristen long Efesus bilong bipo ol i bin kisim tok olsem: “Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut.” (Efesus 4:31) Dispela i soim olsem sin i stap long skin, na ating olpela pasin bilong ol yet, na pasin bilong ol narapela manmeri long Efesus i bin pulim ol. Wanem samting bai helpim ol long senis? “Tingting bilong [ol] i mas kamap nupela.” (Efesus 4:23) Taim ol i stadi long Tok Bilong God, skelim skelim long bel olsem wanem dispela tok inap stiaim laip bilong ol, bung wantaim ol arapela Kristen, na givim bel long beten, ol gutpela pasin em holi spirit i as bilong en bai kamap ples klia long i stap bilong ol. Ol bai lain long ‘mekim gutpela pasin long ol arapela Kristen, givim bel bilong ol long ol, lusim sin bilong ol olsem God i lusim sin bilong ol long nem bilong Krais.’ (Efesus 4:32) Maski ol narapela i mekim wanem, yumi mas bosim bel, mekim gutpela pasin, mekim pasin sori, na lusim rong bilong ol. Tru tumas, “sapos ol i mekim pasin nogut long [yumi], orait [yumi] no ken bekim pasin nogut long ol.” (Rom 12:17, 18) Long olgeta taim em i stretpela pasin long bihainim pasin bilong God na laikim tru ol arapela.—1 Jon 4:8.
Tok Bilong Helpim Olgeta Kristen
18. Bilong wanem dispela tok long 2 Timoti 2:24 i stret long elda i stap long Efesus bilong bipo? Olsem wanem dispela tok inap helpim olgeta Kristen?
18 Dispela tok long “daunim belhat” em i stret long olgeta Kristen i mas bihainim. (2 Timoti 2:24) Tasol pastaim dispela tok i bin i go long Timoti taim em i mekim wok elda long Efesus. Sampela long kongrigesen ol i strong long kamapim tingting bilong ol na ol i wok long skulim ol man long ol bilip kranki. Ol i no pilim gut wok bilong Lo Bilong Moses, olsem na ol i no kliagut olsem em i bikpela samting long man i mas i gat bilip, mas laikim narapela, na i no ken i gat asua long ai bilong God. Pasin antap i kirapim kros pait na ol i tok pait long ol toktok nating, na ol i no tingim olsem em i bikpela samting long ol i mas givim bel bilong ol long God, na ol i no kliagut long ol bikpela samting Krais i bin skulim ol man long en. Bilong stretim dispela hevi, Timoti i mas strong long bihainim tok bilong Baibel tasol em i mas mekim pasin isi long ol brata. Olsem ol elda long nau, em i save olsem ol manmeri ol i no bilong em, na pasin em i mekim long ol arapela i mas strongim pasin laikim na pasin wanbel.—Efesus 4:1-3; 1 Timoti 1:3-11; 5:1, 2; 6:3-5.
19. Bilong wanem em i bikpela samting long yumi olgeta i mas “daunim” yumi yet?
19 God i tokim ol manmeri bilong em long “daunim” ol yet. (Sefanaia 2:3) Tok Hibru ol i kisim dispela tok “daunim” long en i makim pasin bilong stap isi na karim pen, na i no bel kaskas na bekim pasin nogut. I gutpela yumi strong long askim Jehova long helpim yumi na bai yumi ken bosim bel na stap gutpela wokman bilong em maski ol bikpela hevi i kamap.
Yu Lainim Wanem Samting?
• Taim ol man i mekim ol hatpela tok long yu, wanem ol skripsa inap helpim yu?
• Bilong wanem Sol i mekim hatpela pasin?
• Olsem wanem pasin bilong Jisas i helpim yumi long mekim pasin i stret long olgeta kain man?
• Wanem ol gutpela samting inap kamap taim yumi bosim toktok bilong yumi long haus?
[Piksa long pes 26]
Maski Sol i bin mekim ol pasin nogut, Ananaias i mekim gutpela pasin long em
[Piksa long pes 29]
Taim Kristen i mekim gut ol wok bilong em, dispela inap daunim pasin birua bilong famili
[Piksa long pes 30]
Ol Kristen i save strongim pasin laikim na pasin wanbel