Ol Ensel na Ol Spirit Nogut​—Ol Samting Ol i Mekim Long Yumi

 1. Bilong wanem yumi laik kisim save long ol ensel?

TAIM yumi kisim save long wanpela man, yumi kisim save tu long sampela samting long famili bilong em. Na olsem tasol, bilong kisim save long God Jehova, yumi mas kisim sampela save moa long ol ensel, em famili bilong Jehova long heven. Baibel i kolim ol ensel olsem “ol pikinini man bilong God.” (Stat 6:2) Olsem na ol i gat wanem wok long mekim bilong helpim ol samting God bai kamapim? Ol i bin insait long ol samting ol man i bin mekim long graun? Ol ensel i save mekim sampela samting long i stap bilong yu? Sapos ol i mekim, orait ol i save mekim wanem?

 2. Ol ensel i kam long we? I gat hamas i stap?

² Baibel i save stori long ol ensel planti handet taim. Nau yumi ken skelim sampela stori bilong kisim sampela save moa long ol ensel. Ol ensel i kam long we? Kolosi 1:16 i tok: “Long han bilong dispela Pikinini [Jisas Krais], God i bin wokim olgeta samting long heven na long graun.” Olsem na God Jehova i bin wokim olgeta wan wan ensel long rot bilong namba wan Pikinini bilong em. I gat hamas ensel i stap? Baibel i tok God i bin wokim planti milion ensel, na olgeta i gat bikpela strong.​—Song 103:20.a

 3. Jop 38:​4-7 i tok wanem long ol ensel?

³ Baibel i tok taim God i wokim graun, “ol ensel i amamas na singaut.” (Jop 38:​4-7) Olsem na ol ensel i bin stap paslain tru long God i wokim ol man, na paslain tu long God i wokim graun. Dispela hap bilong Baibel i soim tu olsem ol ensel i pilim ol samting long bel, em i tok ol i “amamas na singim song.” Long dispela taim, olgeta ensel i insait long wanpela famili i wanbel long mekim wok bilong God Jehova.

 4. Olsem wanem Baibel i soim olsem ol ensel i stap gut long God ol i tingim tru ol samting ol man i mekim?

⁴ Kirap long taim God i wokim namba wan man na meri, ol gutpela ensel i save tingim tru ol lain manmeri i wok long i go bikpela na ol samting God i tingting pinis long mekim. (Sindaun 8:​30, 31; 1 Pita 1:​11, 12) Tasol bihain, ol ensel i luksave olsem planti man i no mekim moa wok bilong Man Bilong Wokim ol. Ol ensel i stap gut long God ol i bel hevi long dispela. Tasol taim wanpela man i kam bek long Jehova, “amamas i save kamap namel long ol ensel.” (Luk 15:10) Ol ensel i save tingim tru i stap bilong ol man i mekim wok bilong God, olsem na yumi no kirap nogut long Jehova i save yusim ol ensel bilong strongim na lukautim ol gutpela wokman bilong em long graun. (Hibru 1:​7, 14) Tingim sampela stori olsem.

 5. Baibel i gat wanem ol stori long ol ensel i bin helpim ol man?

⁵ Tupela ensel i helpim stretpela man Lot na tupela pikinini meri bilong em long abrusim bagarap na bringim ol i go ausait long taun taim tupela taun nogut, Sodom na Gomora, i bagarap. (Stat 19:​15, 16) Planti yia bihain, ol birua i bin tromoi profet Daniel i go daun long hul bilong ol laion, tasol em i no kisim bagarap na em i tok: “God i bin salim ensel bilong en i kam na i pasim maus bilong ol laion.” (Daniel 6:22) Long taim bilong ol aposel, wanpela ensel i bin helpim aposel Pita long lusim kalabus. (Aposel 12:​6-11) Na tu, ol ensel i bin helpim Jisas taim em i kirap mekim wok bilong em long graun. (Mak 1:13) Na paslain liklik long Jisas i dai, wanpela ensel i kam long Jisas na “i strongim em.” (Luk 22:43) Dispela i mas mekim gut bel bilong Jisas taim em i bin mekim ol dispela bikpela samting!

 6. (a) Olsem wanem ol ensel i save lukautim lain bilong God long nau? (b) Nau bai yumi skelim wanem ol askim?

⁶ Long nau, ol ensel i no save kamap ples klia long lain bilong God i stap long graun. Maski yumi ol man i no inap lukim ol, ol strongpela ensel bilong God i lukautim yet lain bilong em, na ol i lukautim ol moa yet long ol samting bilong spirit. Baibel i tok: “Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.” (Song 34:7) Bilong wanem ol dispela tok i mas mekim gut bel bilong yumi? Long wanem, i gat ol spirit nogut i stap em ol i laik bagarapim yumi! Ol i husat? Ol i kam long we? Ol i laik mekim wanem bilong bagarapim yumi? Bilong save long bekim bilong ol dispela askim, yumi ken skelim wanpela samting i bin kamap taim God i wokim namba wan man na meri.

 7. Satan i bin pulim hamas manmeri na ol i lusim God?

⁷ Olsem yumi lainim long Sapta 3 bilong dispela buk, wanpela ensel i kisim laik long bosim ol narapela na i givim baksait long God. Bihain ol i kolim dispela ensel olsem Satan. (KTH 12:9) Insait long 1,600 yia bihain long em i bin giamanim Iv, Satan i bin pulim klostu olgeta man na ol i lusim God. Sampela tasol i stap gut long God, olsem Abel, Enok, na Noa.​—Hibru 11:​4, 5, 7.

 8. (a) Olsem wanem sampela ensel i kamap spirit nogut? (b) Bilong abrusim bagarap long Bikpela Tait i bin kamap long taim bilong Noa, ol spirit nogut i mas mekim wanem?

⁸ Long taim bilong Noa, sampela arapela ensel i bikhet long Jehova. Ol i lusim ples bilong ol insait long famili bilong God long heven, na ol i kam daun long graun na tanim i kamap man. Bilong wanem ol i mekim olsem? Stat 6:2 i tok: “Ol pikinini man bilong God i lukim ol dispela meri i naispela tumas. Na ol i kisim ol meri long laik bilong ol yet na maritim ol.” Tasol God Jehova i no larim pasin ol dispela ensel i mekim na pasin nogut bilong ol manmeri i stap longpela taim. Em i kamapim wanpela bikpela tait long olgeta hap em dispela tait i bagarapim olgeta man nogut, tasol ol gutpela wokman bilong em i abrusim bagarap. (Stat 7:​17, 23) Olsem na ol bikhet ensel, o spirit nogut, ol i mas tanim i kamap spirit gen na go bek long heven. Ol i sapotim sait bilong Satan, olsem na em i kamap “hetman bilong ol spirit nogut.”​—Matyu 9:34.

 9. (a) Wanem samting i painim ol spirit nogut taim ol i go bek long heven? (b) Nau bai yumi skelim wanem samting bilong ol spirit nogut?

⁹ Taim ol dispela bikhet ensel i go bek long heven, ol lain long heven i givim baksait long ol, olsem ol i mekim long bos bilong ol, Satan. (Jut 6) Maski ol i no inap tanim i kamap man moa, ol i save pulim yet ol man long mekim pasin nogut tru. Long rot bilong ol dispela spirit nogut, Satan i save “giamanim olgeta manmeri bilong graun.” (KTH 12:9; 1 Jon 5:19) Em i mekim olsem wanem? Ol spirit nogut i save yusim ol samting i save giamanim ol manmeri. (2 Korin 2:11) Nau yumi ken skelim sampela bilong ol dispela samting.

10. Ol spirit nogut i save mekim wanem?

¹⁰ Ol spirit nogut i save yusim kain kain samting bilong giamanim ol man. Ol man i insait long ol dispela samting ol i wok wantaim ol spirit nogut, ol yet i save toktok wantaim ol o ol i toktok long rot bilong narapela man. Baibel i tok dispela pasin i no stret na em i tok yumi mas i stap longwe long olgeta kain wok bilong ol spirit nogut. (Galesia 5:​19-21) Ol spirit nogut i save yusim ol samting bilong pulim ol man i kam long ol, wankain olsem man bilong kisim pis i save yusim guma, o beit, bilong pulim ol pis. Man bilong kisim pis i save yusim kain kain beit bilong kisim kain kain pis. Na olsem tasol, ol spirit nogut i save yusim kain kain samting bilong pulim kain kain manmeri i kam long ol.

11. Pasin bilong glasman em wanem kain pasin? Bilong wanem yumi mas klia long en?

¹¹ Wanpela kain beit ol spirit nogut i save yusim em pasin bilong glasman, olsem pasin bilong kisim save long ol samting bai kamap bihain o samting i stap hait. Wanem sampela rot bilong mekim olsem? Sampela i yusim skin bilong diwai, sampela lip, mambu, o buai bilong mekim wok painimaut. O ol i raitim ol leta ABC wantaim Yes na No bilong kisim bekim long ol askim. Sampela i ting long rot bilong driman o horoskop ol i kisim save long ol samting bai kamap bihain. Maski planti man i ting dispela pasin i no inap bagarapim ol, Baibel i soim olsem ol glasman i wok wantaim ol spirit nogut. Olsem: Aposel 16:​16-18 i tok long ‘wanpela spirit i save tokaut long ol samting bai i kamap bihain’ na i helpim wanpela yangpela meri long mekim dispela kain wok. Tasol taim ol i rausim dispela spirit nogut long em, meri i no inap mekim moa dispela wok.

12. Bilong wanem pasin bilong traim long toktok wantaim ol man i dai pinis inap nogutim man?

¹² Narapela rot bilong ol spirit nogut long giamanim ol man, em ol i save kirapim ol man long traim long toktok long ol man i dai pinis. Ol manmeri i krai sori long wanpela i dai, planti taim ol i bilipim ol tingting kranki long ol man i dai pinis i stap olsem wanem. Ating glasman i kamapim sampela save i kam long daiman o em i toktok long nek i olsem nek bilong man i dai pinis. Olsem na planti man i bilip olsem ol daiman ol i stap laip yet, na sapos ol i toktok wantaim ol, dispela bai daunim bel hevi bilong ol. Tasol dispela kain pasin bilong mekim gut bel bilong man i no samting tru, na tu, em inap bagarapim man. Bilong wanem? Long wanem, ol spirit nogut inap makim nek bilong man i dai pinis na givim sampela save long glasman long dispela daiman. (1 Samuel 28:​3-19) Na tu, olsem yumi lainim long Sapta 6, ol man i dai pinis ol i no stap moa. (Song 115:17) Olsem na man i “toktok wantaim tewel bilong ol man i dai pinis,” ol spirit nogut i bin giamanim em na dispela man i no bihainim laik bilong God. (Lo 18:​10, 11; Aisaia 8:19) Olsem na wok strong long sakim dispela beit nogut ol spirit nogut i save yusim.

13. Planti man em bipo ol i pret long ol spirit nogut ol i bin mekim wanem?

¹³ Ol spirit nogut i save giamanim ol man, na tu, ol i save pretim ol. Long nau, Satan na ol spirit nogut ol i save olsem ol i gat “sotpela taim tasol bilong i stap” na bihain ol i no inap mekim wok bilong ol, olsem na pasin bilong ol i nogut moa, winim bilong bipo. (KTH 12:​12, 17) Tasol maski i olsem, planti tausen manmeri em bipo ol i save pret nogut tru long ol spirit nogut, ol i bin lusim dispela pret. Olsem wanem ol inap lusim? Man inap mekim wanem maski em i insait pinis long wok bilong ol spirit nogut?

14. Olsem ol Kristen long Efesus long taim bilong ol aposel, olsem wanem yumi ken lusim ol spirit nogut?

¹⁴ Baibel i tokim yumi long rot bilong sakim ol spirit nogut na rot bilong lusim ol olgeta. Tingim ol samting ol Kristen long taun Efesus long taim bilong ol aposel i bin mekim. Sampela bilong ol i bin insait long wok bilong ol spirit nogut paslain long ol i kamap Kristen. Taim ol i laik lusim dispela wok, ol i mekim wanem? Baibel i tok: “Planti manmeri i bin wokim ol kain kain marila samting, ol i bungim ol buk bilong ol i gat tok long pasin bilong wokim ol dispela samting, na ol i kukim long paia long ai bilong olgeta manmeri.” (Aposel 19:19) Ol i kukim long paia ol dispela buk bilong ol, olsem na ol dispela nupela Kristen i stap gutpela piksa long ol manmeri i laik sakim ol spirit nogut long nau. Ol manmeri i laik mekim wok bilong Jehova ol i mas rausim olgeta samting i bilong mekim wok bilong ol spirit nogut. Olsem ol buk, ol magasin, ol vidio, ol piksa bilong bilasim haus, na ol musik i strongim ol man long insait long ol wok bilong ol spirit nogut na i kirapim ol long ting ol dispela wok i gutpela samting na samting bilong amamas. Na tu, ol i mas rausim ol paspas na ol narapela samting ol man i save werim bilong lukautim ol yet na bai samting nogut i no inap painim ol.​—1 Korin 10:21.

15. Bilong sakim ol spirit nogut, yumi mas mekim wanem?

¹⁵ Sampela yia bihain long ol Kristen long Efesus i kukim ol buk bilong ol i stori long wok bilong ol spirit nogut, aposel Pol i tokim ol: “Yumi pait long olgeta spirit nogut.” (Efesus 6:12) Ol spirit nogut i no givap. Ol i wok strong yet long bosim ol man. Olsem na ol dispela Kristen i mas mekim wanem narapela samting? Pol i tok: “Yupela i mas kisim dispela olgeta samting bilong pait, na yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela.” (Efesus 6:16) Taim bilip bilong yumi i strong, bai yumi strong moa long sakim ol spirit nogut.​—Matyu 17:20.

16. Olsem wanem yumi ken strongim bilip bilong yumi?

¹⁶ Orait olsem wanem yumi ken strongim bilip bilong yumi? Yumi ken mekim olsem long rot bilong stadi long Baibel. Sapos as bilong haus i strong, orait banis bilong haus tu inap sanap strong. Na olsem tasol, sapos bilip bilong yumi i gat strongpela as bilong en​—em stretpela save long Baibel​—bilip bilong yumi bai strong. Sapos yumi ritim na stadi long Baibel long olgeta de, bilip bilong yumi bai kamap strong. Olsem strongpela banis, kain bilip olsem inap banisim yumi long ol wok bilong ol spirit nogut.​—1 Jon 5:5.

17. Yumi mas mekim wanem bilong sakim ol spirit nogut?

¹⁷ Ol dispela Kristen long Efesus i mas mekim wanem narapela samting? Ol i mas kisim sampela helpim moa bilong lukautim ol, long wanem, ol i sindaun long taun i pulap long ol wok bilong ol spirit nogut. Olsem na Pol i tokim ol: “Yupela i mas prea oltaim. Yupela i mas strong long mekim ol kain kain beten na askim God long helpim yupela.” (Efesus 6:18) Yumi tu i stap long graun i pulap long ol wok bilong ol spirit nogut, olsem na bilong sakim ol spirit nogut em i bikpela samting long givim bel long beten askim Jehova long lukautim yumi. Yumi mas kolim nem bilong Jehova taim yumi beten. (Sindaun 18:10) Olsem na yumi mas wok long beten askim God long ‘kisim bek yumi long ol samting nogut,’ em ol samting bilong Satan. (Matyu 6:13) Jehova bai harim ol kain beten olsem.​—Song 145:19.

18, 19. (a) Bilong wanem yumi inap tru long sanap strong na sakim ol spirit nogut? (b) Sapta i kamap bihain long dispela bai bekim wanem askim?

¹⁸ Ol spirit nogut inap bagarapim yumi, tasol yumi no ken pret long ol sapos yumi sakim Satan na go klostu long God long rot bilong mekim laik bilong Em. (Jems 4:​7, 8) Strong bilong ol spirit nogut i gat mak bilong en. God i givim strafe long ol long taim bilong Noa, na laspela kot bilong ol bai kamap bihain. (Jut 6) Na tingim tu olsem ol strongpela ensel bilong Jehova i lukautim yumi. (2 King 6:​15-17) Ol dispela ensel i laik bai yumi win taim yumi wok long sakim ol spirit nogut. I olsem ol stretpela ensel i wok long tok ure long yumi. Olsem na yumi mas stap klostu long Jehova na famili bilong em, em ol ensel i stap gut long em. Na tu, yumi mas sakim olgeta kain wok bilong ol spirit nogut na oltaim bihainim tok bilong Baibel. (1 Pita 5:​6, 7; 2 Pita 2:9) Long dispela rot yumi inap tru long sanap strong na ol spirit nogut i no inap winim yumi.

¹⁹ Tasol bilong wanem God i bin larim ol spirit nogut na pasin nogut i stap, em ol dispela samting i bin givim bikpela pen na hevi long ol man? Sapta i kamap bihain long dispela bai bekim dispela askim.