Sapta 8
‘Yumi Pait Long Ol Spirit Nogut’
1. Bilong wanem yumi mas tingim ol samting ol spirit nogut i save mekim?
PLANTI man i no bilip olsem i gat ol spirit nogut i stap. Tasol dispela i no samting bilong tok pilai long en. Maski ol man i bilip long ol o nogat, ol spirit nogut i stap, na ol i traim long givim hevi long olgeta man. Ol i laik tru long givim hevi long ol man i lotuim Jehova. Aposel Pol i givim tok lukaut long yumi long dispela samting, em i tok: “Yumi no save pait long ol manmeri. Nogat. Yumi pait long ol strongpela spirit na ol gavman [yumi no inap lukim] na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.” (Efesus 6:12) Long taim bilong yumi ol hevi ol spirit nogut i wok long givim long ol man i go bikpela moa, long wanem, Satan i raus long heven na i kam daun long graun na em i belhat tru. Em i save em i gat sotpela taim tasol.—KTH 12:12.
2. Olsem wanem yumi inap winim pait yumi mekim long ol spirit nogut?
2 Yu ting yumi inap winim pait yumi mekim long ol spirit nogut? Yes, yumi inap, tasol yumi mas bilip na wetim Jehova i helpim yumi. Yumi mas putim gut yau long em na bihainim Tok bilong em. Taim yumi mekim olsem, Satan i no inap bagarapim skin o pasin o bel o tingting bilong yumi olsem em i save mekim long ol man i stap aninit long em.—Jems 4:7.
Ol Hetman i Stap Antap
3. Satan i birua tru long husat? Em i mekim olsem wanem?
3 Jehova i stap long heven na i lukim ol samting i kamap long graun na em i stori gut long dispela samting long yumi. Em i givim driman long aposel Jon, na long dispela driman Satan i olsem “wanpela traipela retpela snek.” Em i redi i stap na i laik bagarapim Kingdom bilong God taim dispela Kingdom i kamap long heven long 1914. Tasol Satan i no inap mekim, olsem na em i kirap mekim nogut tru long lain bilong dispela Kingdom ol i stap long graun. (KTH 12:3, 4, 13, 17) Satan bai mekim dispela pait olsem wanem? Em bai mekim long rot bilong ol man i mekim wok bilong em.
4. Husat i givim strong long ol gavman bilong ol man? Olsem wanem yumi save long dispela?
4 Nau Jon i lukim wanpela wel animal i gat sevenpela het na tenpela kom, em i gat “strong bilong bosim ol manmeri bilong olgeta lain man na bilong olgeta kantri.” Dispela wel animal i makim olgeta gavman politik bilong graun. Jon i kisim save olsem “dispela snek [Satan] i givim strong bilong em yet long dispela wel animal.” (KTH 13:1, 2, 7) Yes, Satan i givim strong na namba long ol gavman bilong ol man. Olsem aposel Pol i bin tok, “ol gavman” tru tru bilong graun em ol “spirit nogut i stap antap” na ol i bosim ol gavman bilong ol man. Olgeta man i laik lotuim Jehova ol i mas save gut long dispela samting.—Luk 4:5, 6.
5. Long nau ol i bungim ol bikman bilong ol gavman long wanem samting?
5 Maski planti bikman bilong gavman i tok ol i man bilong lotu, i no gat wanpela kantri i daun long wok bos bilong Jehova o long King em i bin makim, em Jisas Krais. Olgeta i wok strong long holimpas namba bilong ol yet long bosim graun. Long nau, olsem stori bilong Buk Kamapim Tok Hait i soim, ol “spirit nogut tru i save wokim kain kain” samting bilong bungim ol bikman bilong ol gavman long pait bilong “dispela bikpela de bilong God I Gat Olgeta Strong” long Armagedon.—KTH 16:13, 14, 16; 19:17-19.
6. Bilong wanem yumi mas lukaut gut na bai Satan i no ken pulim yumi long sapotim ol wok em i bin kamapim?
6 Long olgeta de, ol man i pait long ol samting bilong wok politik, sindaun bilong ol man, wok mani, na lotu, olsem na ol lain manmeri i bruk bruk. Long ol dispela kain pait ol man i save mekim sampela tok o pasin bilong sapotim kantri, o lain, o tok ples bilong ol yet, o wanpela lain ol yet i insait long en. Maski ol man i no insait long wanpela pait, planti taim ol i save laikim wanpela lain, winim narapela. Tasol maski ol i sapotim husat husat man o wok bilong wanpela lain, tru tru ol i sapotim husat? Baibel i tokaut klia olsem: “Dispela graun olgeta em i stap aninit long strong bilong Satan.” (1 Jon 5:19) Tasol man i ken mekim wanem na Satan i no inap paulim em olsem em i bin paulim planti ol narapela man? Em i mas givim bel tru long Kingdom bilong God na em i no ken insait liklik long ol kros pait bilong dispela graun.—Jon 17:15, 16.
Ol Pasin Giaman Bilong Satan
7. Satan i mekim wanem wok long lotu giaman bilong trikim ol man?
7 Long bipo yet i kam inap nau, Satan i bin kirapim ol man long mekim tok nogut na pasin nogut long ol lain i save lotu tru long God na bai ol i lusim Em. Na em i save mekim ol pasin hait na pasin giaman tu. Long rot bilong lotu giaman em i bin trikim planti man na ol i stap long tudak—em i kirapim ol long ting ol i mekim wok bilong God. Ol i no gat stretpela save long God na ol i no laikim tok i tru, na ating ol i laikim wanpela lotu i gat ol tok hait long en o lotu i save kirapim bel bilong man o mekim ol strongpela wok. (2 Tesalonaika 2:9, 10) Tasol Baibel i mekim tok lukaut olsem: Sampela manmeri bipo ol i lotu tru long God, “bai i lusim bilip bilong ol, . . . ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Timoti 4:1) Olsem wanem dispela inap kamap?
8. Olsem wanem Satan inap pulim yumi i go insait long lotu giaman, maski yumi save lotu long Jehova?
8 Long pasin hait Satan i save mekim wok long ol pasin kranki bilong yumi. Olsem wanem? Yumi save pret long ol man? Sapos olsem, ol wanblut o ol man i stap klostu ol inap subim yumi long insait long sampela pasin em lotu giaman i as bilong en. Olsem wanem? Yumi gat pasin antap? Sapos olsem, ating yumi bel nogut taim wanpela i stretim yumi o ol narapela i no bihainim tingting bilong yumi. (Sindaun 15:10; 29:25; 1 Timoti 6:3, 4) Na ating yumi no laik stretim tingting bilong yumi na bihainim pasin bilong Krais. Yumi putim yau long tok bilong ol man i save mekim ‘kain tok olsem yumi save laik long harim,’ na yumi tok pasin bilong ritim Baibel na bihainim gutpela pasin em inap. (2 Timoti 4:3) Maski yumi no go insait long narapela lotu, o yumi bihainim tingting bilong yumi yet long ol samting bilong lotu, dispela i no bikpela samting long Satan. Em i laik bai yumi no ken lotuim Jehova long pasin God i makim long rot bilong Baibel na oganaisesen bilong em.
9. Olsem wanem Satan i mekim wok long maritpasin bilong kamapim laik nogut bilong em?
9 Na tu, Satan i save grisim ol man long mekim pasin nogut bilong inapim ol laik bilong skin em God i bin putim long yumi. Em i save mekim olsem long laik bilong man long mekim maritpasin. Planti man i sakim ol stretpela lo bilong Baibel, na ol i ting pasin bilong man na meri singel i slip wantaim i orait tasol na em i rot bilong kisim amamas o rot bilong soim olsem ol i bikpela pinis. Na olsem wanem long ol lain i marit pinis? Planti ol i save mekim pasin pamuk. Na maski ol i no mekim olsem, planti ol i laik katim marit o lusim poroman bilong ol na bai ol i ken i sindaun wantaim narapela poroman. Long pasin hait Satan i laik kirapim ol man long painim amamas long nau stret, na ol i no ken tingim ol samting nogut inap painim ol yet na ol narapela, na moa yet ol i no ken tingim pasin bilong ol long stap gut long Jehova na Pikinini bilong em.—1 Korin 6:9, 10; Galesia 6:7, 8.
10. Long wanem rot Satan i laik paulim tingting bilong yumi long pasin pamuk na pasin bilong pait na bagarapim man?
10 Narapela samting yumi laik mekim, em yumi laik painim amamas. Taim yumi painim gutpela amamas, dispela inap mekim gut skin, bel, na tingting bilong yumi. Tasol yumi save mekim wanem taim yumi painim amamas na Satan i giamanim yumi long mekim sampela samting i no stret wantaim tingting bilong God? Olsem: Yumi save Jehova i nolaik tru long pasin pamuk na pasin bilong pait na bagarapim man. Orait taim ol piksa long TV na video samting i kamapim ol dispela samting, yumi save sindaun tasol na lukluk i stap? Tingim tu olsem taim bilong Satan long kalabus long hul i no gat as i wok long kam klostu na em bai mekim na ol dispela piksa samting bai kamap nogut moa yet, long wanem, “ol man nogut na ol giaman profet ol bai i wok long giamanim ol manmeri. Na Satan bai i giamanim ol yet tu, na pasin bilong ol bai i kamap nogut tru.” (2 Timoti 3:13; KTH 20:1-3) Olsem na oltaim yumi mas was gut long ol trik na giaman bilong Satan.—Stat 6:13; Song 11:5, NW; Rom 1:24-32.
11. Maski man i save long tok bilong Baibel long wok bilong ol spirit nogut, olsem wanem em inap pundaun sapos em i no was gut?
11 Yumi save tu olsem ol man i insait long wok bilong ol spirit nogut—wok glasman, posin marila, o ol i traim long toktok wantaim ol man i dai pinis—Jehova i nolaik tru long ol. (Lo 18:10-12) Taim yumi tingim dispela, bai yumi no tingting long go lukim glasman, na bai yumi nolaik tru long ol i kam long haus bilong yumi na mekim wok bilong ol spirit nogut. Tasol olsem wanem? Bai yumi harim tok bilong ol sapos ol i kamap long TV o long Intenet? Maski yumi no laik bai glasman i mekim sampela samting bilong oraitim sik bilong yumi, tasol bai yumi pasim liklik rop long han bilong nupela bebi na ting dispela bai i lukautim em na samting nogut i no inap painim em? Yumi save Baibel i tambuim pasin bilong wokim posin long narapela, tasol bai yumi larim wanpela man i gat narapela kain strong em i bosim tingting bilong yumi?—Galesia 5:19-21.
12. (a) Olsem wanem Satan i mekim wok long musik bilong kirapim yumi long tingim ol samting yumi save em ol samting nogut? (b) Olsem wanem klos man i werim, pasin bilong em long stailim gras, o pasin bilong em long toktok, inap soim olsem em i laikim pasin bilong ol man em Jehova i no orait long ol? (c) Yumi mas mekim wanem na bai ol pasin hait bilong Satan i no ken pundaunim yumi?
12 Baibel i tok, toktok bilong pasin pamuk na pasin doti (olsem man i gat tingting nogut na i mekim dispela kain tok) i no ken kamap namel long yumi. (Efesus 5:3-5) Tasol olsem wanem sapos ol i putim kain tok olsem long wanpela singsing i gat gutpela musik bilong en? Bai yumi kirap mekim dispela singsing i litimapim pasin pamuk, o pasin bilong kisim drak, o sampela narapela pasin nogut? Yumi save yumi no ken bihainim pasin bilong ol man i mekim ol dispela samting, tasol yumi save werim wankain klos olsem ol, o bihainim pasin bilong ol long stailim gras, o pasin bilong ol long toktok? Satan i mekim kain kain pasin hait bilong pulim ol man long bihainim tingting nogut bilong em! (2 Korin 4:3, 4) Yumi mas was gut na bai yumi no bihainim pasin o tingting bilong ol man bilong dispela graun, nogut yumi pundaun long ol pasin hait bilong Satan. Yumi no ken lusim tingting olsem “ol strongpela spirit” ol i husat, na yumi mas pait strong long sakim ol samting ol i mekim bilong pulim yumi.—1 Pita 5:8.
Yumi Inap Winim Pait
13. Olsem wanem yumi ol man i gat pasin kranki inap winim dispela graun Satan i bosim?
13 Paslain long Jisas i dai, em i tokim ol aposel bilong em olsem: “Bel bilong yupela i ken i stap strong. Mi winim pinis strong bilong dispela graun.” ( Jon 16:33) Ol tu inap win. Inap 60 yia bihain, aposel Jon i tok: “Husat i save winim strong bilong dispela graun? Man i bilip long Jisas em i Pikinini Bilong God, dispela man i save win.” (1 Jon 5:5) Yumi kamapim klia olsem yumi gat kain bilip olsem taim yumi bihainim tok bilong Jisas na bilip long Tok Bilong God, olsem Jisas i bin mekim. Yumi mas mekim wanem samting moa? Yumi mas i stap klostu long kongrigesen em Jisas i Het bilong en. Taim yumi popaia, yumi mas tanim bel tru na askim God long lusim tingting long rong bilong yumi long rot bilong ofa bilong Jisas. Long dispela rot, maski yumi gat pasin kranki na yumi save popaia, yumi tu inap winim pait.—Song 130:3, 4.
14. Ritim Efesus 6:13-17, na skelim ol askim na skripsa i stap long dispela paragraf bilong stori long olsem wanem olgeta wan wan hap bilong klos pait bilong spirit inap helpim yumi.
14 Bilong winim dispela pait, yumi mas pasim “olgeta klos pait God i save givim,” na yumi no ken lusim wanpela. Plis opim Baibel bilong yu long Efesus 6:13-17, na ritim ol tok bilong ol dispela klos pait. Bihain bekim ol askim i stap daunbilo, na tingting long olsem wanem olgeta wan wan klos pait inap helpim yu.
“Pasim tok tru olsem let”
Maski yumi save pinis long tok i tru, olsem wanem pasin bilong stadi oltaim, tingim tingim tok i tru bilong Baibel, na go long ol miting inap lukautim yumi? (1 Korin 10:12, 13; 2 Korin 13:5; Filipai 4:8, 9)
“Pasim stretpela pasin olsem siot kapa”
Yumi mas kisim stretpela pasin bilong husat? (KTH 15:3)
Stori long olsem wanem pasin bilong sakim ol stretpela pasin bilong Jehova inap bagarapim yumi long ol samting bilong spirit. (Lo 7:3, 4; 1 Samuel 15:22, 23)
‘Autim gutnius na putim dispela pasin olsem su’
Pasin bilong wok strong long tokim ol narapela man long ol samting God i bin mekim bilong kamapim bel isi, olsem wanem dispela inap lukautim yumi? (Song 73:2, 3; Rom 10:15; 1 Timoti 5:13)
“Kisim tu pasin bilong bilip”
Sapos yumi gat strongpela bilip i gat as bilong en, bai yumi mekim wanem taim sampela man i mekim ol samting bilong kirapim yumi long kisim tupela tingting o bilong mekim yumi i pret? (2 King 6:15-17; 2 Timoti 1:12)
‘God i kisim bek yupela, dispela tingting i mas i stap olsem hat kapa’
Olsem wanem pasin bilong bilip na wetim God i kisim bek yumi i helpim yumi long abrusim pasin bilong laikim tumas mani kago? (1 Timoti 6:7-10, 19)
“Bainat bilong Holi Spirit”
Oltaim yumi mas wet long wanem samting i helpim yumi taim yumi wok long sakim ol samting i laik bagarapim pasin bilong yumi o ol narapela long tingim ol samting bilong spirit? (Song 119:98; Sindaun 3:5, 6; Matyu 4:3, 4)
Wanem narapela samting i bikpela samting bilong helpim yumi long winim pait bilong spirit? Hamas taim yumi mas mekim dispela samting? Yumi mas mekim bilong helpim husat? (Efesus 6:18, 19)
15. Olsem wanem yumi inap pait strong long pait bilong spirit?
15 Yumi ol soldia bilong Krais, na yumi insait long bikpela lain ami i mekim pait bilong spirit. Sapos yumi was gut na pasim olgeta klos pait God i givim long yumi, bai yumi no lus long dispela pait, nogat. Bai yumi helpim ol narapela wokman bilong God long sanap strong. Bai yumi redi long pait strong na autim gutnius bilong Kingdom bilong God long ol man, em dispela gavman bilong heven Satan i birua tru long en.
Stori Gen Long Ol Dispela Tok
• Bilong wanem ol man i lotuim Jehova ol i no insait liklik long ol kros na pait bilong dispela graun?
• Wanem sampela pasin hait Satan i mekim wok long en bilong bagarapim bilip bilong ol Kristen?
• Olsem wanem ol klos pait God i givim i lukautim yumi long dispela pait bilong spirit?
[Ol Piksa long pes 76]
Ol i bungim ol lain man long Armagedon