Kliagut Long Wok Bilong Jisas Insait Long Laik Bilong God
“Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.”—JO. 14:6.
1, 2. Bilong wanem yumi mas i gat laik long save long wok bilong Jisas insait long laik bilong God?
LONG bipo tru i kam inap nau, planti man i bin wok strong long stap narapela kain, tasol i no planti i bin winim dispela mak. Wan wan man tasol inap tok ol i stap narapela kain long ol bikpela samting. Tasol Jisas Krais, Pikinini Bilong God, em i stap narapela kain long planti rot.
2 Yumi mas i gat laik long save long ol rot we Jisas i stap narapela kain. Bilong wanem? Long wanem, pasin bilong yumi long pas gut wantaim Jehova, Papa bilong yumi long heven, i insait long dispela samting. Jisas i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jo. 14:6; 17:3) Orait nau yumi ken skelim sampela rot we Jisas i stap narapela kain. Taim yumi mekim olsem, dispela bai helpim yumi long kliagut na tingim tru wok bilong Jisas insait long laik bilong God.
“Dispela Wanpela Pikinini”
3, 4. (a) Olsem wanem yumi ken tok olsem dispela wanpela Pikinini em i narapela kain? (b) Olsem wanem wok bilong Jisas insait long ol samting Jehova i bin wokim i narapela kain?
3 Tru, Jisas em i Pikinini Bilong God, tasol Baibel i kolim em tu “dispela wanpela Pikinini Bilong God.” (Jo. 3:16, 18) Tok Grik ol i tanim olsem “dispela wanpela Pikinini” i makim olsem em i “narapela kain, i no gat narapela i wankain olsem em.” Jehova i gat planti milion pikinini spirit. Orait olsem wanem Jisas i “narapela kain”?
4 Jisas i narapela kain, long wanem, God wanpela i wokim Jisas, na i no gat narapela man em God wanpela tasol i bin wokim. Em i namba wan Pikinini Bilong God. Em i “het tru [“fesbon,” NW ] bilong olgeta samting God i bin mekim ol i kamap.” (Kl. 1:15) Em i “kirap bilong olgeta samting God i bin wokim.” (KTH 3:14, NW ) Wok bilong dispela wanpela Pikinini Bilong God insait long ol samting God i bin wokim, dispela tu i narapela kain. Em i no Krieta, o As, bilong ol samting i kamap, nogat. Tasol long rot bilong em, Jehova i bin wokim olgeta narapela samting. (Ritim Jon 1:3.) Aposel Pol i tok: “Yumi gat wanpela God tasol, em God Papa. Em i as bilong olgeta samting, na yumi stap olsem ol manmeri bilong em stret. Na i gat wanpela Bikpela tasol, em Jisas Krais. Em i bin wokim olgeta samting, na yumi bin kisim laip long em.”—1 Ko. 8:6.
5. Wanem samting long Baibel i kamapim klia sampela rot we Jisas i stap narapela kain?
5 Tasol i gat planti rot moa we Jisas i stap narapela kain insait long laik bilong God. Dispela samting i kamap ples klia long planti biknem em Baibel i kolim long em. Orait nau yumi ken skelim 5-pela moa bilong ol dispela biknem i stap long Ol Skripsa Grik.
“Tok”
6. Bilong wanem i stret Baibel i kolim Jisas olsem “Tok”?
6 Ritim Jon 1:14. Bilong wanem Baibel i kolim Jisas olsem “Tok,” o Logos? Dispela biknem i makim wok em i bin mekim bihain long taim ol narapela ensel i kamap. Jehova i bin mekim wok long Pikinini bilong em long givim tok long ol ensel, na tu, long ol man hia long graun. Jisas i kamapim klia olsem em yet em Tok, o Mausman Bilong God taim em i givim dispela tok long ol Juda, olsem: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam. Sapos wanpela man i gat laik tru bilong bihainim tok bilong God, orait em bai i save tru long as bilong dispela tok mi autim. Em bai i save, dispela tok i kam long God, o em i kamap long tingting bilong mi yet.” (Jo. 7:16, 17) Bihain long Jisas i go bek long heven, em i holim yet dispela biknem “Tok bilong God.”—KTH 19:11, 13, 16.
7. Olsem wanem yumi ken bihainim pasin daun bilong Jisas long wok em i mekim olsem “Tok”?
7 Tingim samting dispela biknem i makim. Tru, Jisas i gat bikpela savetingting, winim olgeta narapela samting Jehova i bin wokim, tasol em i no bihainim savetingting bilong em yet. Olgeta tok em i mekim, em i mekim olsem Papa i tokim em. Olgeta taim em i save stiaim tingting bilong ol man i go long Jehova—long em yet, nogat. (Jo. 12:50) Dispela i makim gutpela piksa tru long yumi ken bihainim! Yumi tu i bin kisim gutpela wok bilong ‘autim gutnius.’ (Ro. 10:15) Dispela gutpela pasin bilong Jisas long daunim em yet i mas kirapim yumi long no ken kamapim ol tok em yumi yet i as bilong en. Taim yumi autim ol tok bilong Baibel, em ol tok bilong helpim man long abrusim bagarap na stap laip, yumi mas “bihainim pasin i stret olsem buk bilong God i tok long en, na [yumi] no ken kalapim dispela tok.”—1 Ko. 4:6.
“I Tru”
8, 9. (a) Bilong wanem Baibel i tok Jisas em i man bilong tok “I tru”? (b) Olsem wanem Jisas i inapim wok bilong em olsem man bilong tok “I tru”?
8 Ritim KTH 3:14. Bilong wanem Baibel i tok Jisas i man bilong tok “I tru” long olgeta tok na promis bilong God? Mining bilong tok Hibru ol i kisim dispela tok long en i makim pasin bilong “bihainim tok” o “truim promis.” Dispela tok Hibru i makim tu pasin bilong Jehova long bihainim olgeta tok bilong em. (Lo 7:9; Ais. 49:7) Orait olsem wanem Jisas i stap narapela kain long wok em i mekim olsem man bilong tok “I tru”? Namba 2 Korin 1:19, 20 i bekim dispela askim, olsem: “Krais i no man bilong tok ‘Yes’ na ‘Nogat’ wantaim. Nogat. Oltaim Krais i save tok ‘Yes’ tasol. I gat planti promis bilong God i stap, na Krais i save tok ‘Yes’ long dispela olgeta promis. Olsem na taim yumi harim tok bilong God, long nem bilong Krais yumi save tok ‘I tru.’ ”
9 Jisas i man bilong tok “I tru” long olgeta promis bilong God. Stretpela pasin bilong Jisas hia long graun, na dai bilong em tu olsem ofa, i strongim olgeta promis bilong God Jehova na i opim rot long ol i ken kamap tru. Na tu, em i stap gut long God na dispela i kamapim klia olsem tok bilong Satan i giaman—em i bin tok, sapos hevi na traim i painim ol wokboi bilong God, ol bai sakim Em. (Jop 1:6-12; 2:2-7) Dispela namba wan Pikinini i winim olgeta man na ol ensel long bekim dispela tok bilong Satan. Na Jisas i kamapim klia tru olsem em i sapotim Papa bilong em long dispela bikpela tok i bin kamap olsem i stret Jehova i stap bos bilong heven na graun o nogat.
10. Olsem wanem yumi inap bihainim pasin bilong Jisas long wok bilong em olsem man bilong tok “I tru”?
10 Olsem wanem yumi inap bihainim pasin bilong Jisas long wok em i mekim olsem man bilong tok “I tru”? Yumi ken mekim olsem long rot bilong stap gut long Jehova na sapotim wok bos bilong em. Taim yumi mekim olsem, yumi bihainim tok bilong Sindaun 27:11: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”
‘Namelman Bilong Nupela Kontrak’
11, 12. Olsem wanem wok bilong Jisas olsem Namelman i narapela kain?
11 Ritim 1 Timoti 2:5, 6. Jisas em dispela “wanpela namelman tasol i sanap namel long God na ol manmeri.” Em i “namelman bilong strongim nupela kontrak.” (Hi. 9:15; 12:24) Tasol Moses tu em i wanpela namelman—namelman bilong kontrak bilong Lo. (Ga. 3:19) Orait, olsem wanem wok bilong Jisas olsem Namelman i narapela kain?
12 Tok Grik ol i tanim olsem “namelman” em i wanpela tok bilong lo. Em i makim Jisas olsem Namelman bilong nupela kontrak i opim rot bilong wanpela nupela lain, em “Israel tru bilong God,” i ken kamap. (Ga. 6:16) Dispela lain em ol Kristen God i bin makim, na ol i stap olsem wanpela lain pris i mekim wok king long heven. (1 Pi. 2:9; Kis. 19:6) Kontrak Bilong Lo, em Moses i namelman bilong en, i no inap kamapim wanpela lain olsem.
13. Jisas i mekim wanem wok olsem Namelman?
13 Jisas i mekim wanem wok olsem Namelman? Jehova i mekim wok long pe bilong blut bilong Jisas bilong helpim ol Kristen long kam insait long nupela kontrak. Long dispela rot, Jehova inap kolim ol olsem stretpela man. (Ro. 3:24; Hi. 9:15) Orait nau God inap kisim ol i kam insait long nupela kontrak na ol i gat rot long kamap king na pris long heven! Jisas i Namelman bilong ol na i helpim ol long stap stretpela man long ai bilong God.—Hi. 2:16.
14. Bilong wanem na olgeta Kristen, maski ol i wet long kisim laip we, ol i mas pilim tru wok bilong Jisas olsem Namelman?
14 Olsem wanem long ol man i no insait long nupela kontrak, em ol i wet long kisim laip i stap oltaim long graun, na i no long heven? Tru, ol i no insait long nupela kontrak, tasol ol i kisim ol gutpela samting bilong en. God i lusim ol rong bilong ol na i kolim ol olsem stretpela man na pren bilong em. (Jem. 2:23; 1 Jo. 2:1, 2) Maski yumi wet long kisim laip long heven o long graun, i gat as na yumi olgeta wan wan i mas pilim tru wok bilong Jisas olsem Namelman bilong nupela kontrak.
“Hetpris”
15. Olsem wanem wok bilong Jisas olsem Hetpris i narapela kain long olgeta narapela hetpris?
15 Long bipo, planti man i bin mekim wok olsem hetpris, tasol wok bilong Jisas olsem Hetpris i narapela kain tru. Olsem wanem em i narapela kain? Pol i tok: “Ol hetpris bilong bipo ol i gat wok bilong mekim ofa long olgeta de. . . . Tasol Jisas i no gat wok olsem. Nogat. Em i mekim ofa wanpela taim tasol. Em i givim laip bilong em yet long God. Lo i save makim ol man i no gat strong, na ol i kamap hetpris. Tasol dispela tok tru antap i kamap bihain long lo, em i makim Pikinini Bilong God. Dispela hetpris em i gutpela man tru na em i kamap nambawan man tru bilong helpim yumi. Na em bai i stap olsem oltaim oltaim.”—Hi. 7:27, 28.a
16. Bilong wanem ofa bilong Jisas i narapela kain tru?
16 Jisas em i stretpela man olgeta, wankain stret long Adam taim em i no mekim yet sin. (1 Ko. 15:45) Olsem na Jisas wanpela tasol inap mekim ofa i gutpela olgeta—em kain ofa i no gat wok long mekim gen. Aninit long Lo Bilong Moses, ol pris i save mekim ofa long olgeta de. Ol dispela ofa na ol wok bilong pris ol i olsem piksa tasol na i makim samting em Jisas bai mekim. (Hi. 8:5; 10:1) Jisas inap mekim samting ol narapela hetpris i no inap mekim na em bai stap Hetpris oltaim oltaim, olsem na wok bilong em olsem Hetpris em i narapela kain.
17. Bilong wanem yumi mas amamas tru long wok bilong Jisas olsem Hetpris bilong yumi? Olsem wanem yumi inap mekim olsem?
17 Jisas i Hetpris na em inap helpim yumi long stap olsem stretpela man long ai bilong God. Em i wanpela gutpela Hetpris tru! Pol i tok: “Yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin.” (Hi. 4:15) Yumi amamas tru long dispela samting, olsem na dispela i mas kirapim yumi na yumi ‘no ken tingting moa long yumi yet na wokabaut, nogat, yumi mas tingting long dispela man i kisim ples bilong yumi na i dai pinis.’—2 Ko. 5:14, 15; Lu. 9:23.
Pikinini Bilong Promis
18. Bihain long Adam i mekim sin, God i tok profet long wanem samting? Bihain, God i kamapim klia wanem samting bilong dispela tok profet?
18 Bipo long Iden, taim i luk olsem ol man bilong graun i bin lusim olgeta samting—pasin bilong stap stret long ai bilong God, laip oltaim, amamas, na Paradais—God Jehova i tokaut long wanpela Man Bilong Kisim Bek ol man. Baibel i kolim em olsem dispela “pikinini.” (Stt. 3:15, NW ) Dispela Pikinini, em ol man long bipo i no save em i husat, em i kamap olsem as tok bilong planti tok profet long Baibel. Em wanpela tumbuna pikinini bilong Abraham, Aisak, na Jekop. Na tu, em bai kamap long lain bilong King Devit.—Stt. 21:12; 22:16-18; 28:14; 2 Sml. 7:12-16.
19, 20. (a) Husat i Pikinini bilong promis? (b) Jisas em dispela pikinini God i bin tok profet long en, tasol olsem wanem yumi ken tok i gat sampela moa tu?
19 Dispela Pikinini bilong promis em i husat? Bekim bilong dispela askim i stap long Galesia 3:16. (Ritim.) Tasol bihain, long dispela sapta yet, aposel Pol i tokim ol Kristen God i bin makim: “Sapos yupela i stap lain bilong Krais, orait yupela i stap pikinini bilong Abraham tu.” (Ga. 3:29) Olsem wanem Krais em i dispela Pikinini bilong promis, tasol i gat sampela moa tu?
20 Planti milion manmeri i tok ol i tumbuna pikinini bilong Abraham, na sampela i bin mekim wok olsem profet. Sampela lotu i tok olsem ol profet bilong ol i bin kamap long lain bilong Abraham na ol i ting dispela samting em i bikpela samting tru. Tasol olsem wanem? Olgeta ol i dispela Pikinini bilong promis? Nogat. Holi spirit i kirapim aposel Pol long tok olsem i no olgeta tumbuna pikinini bilong Abraham i ken tok ol i Pikinini bilong promis. God i no bin mekim wok long ol tumbuna pikinini bilong ol arapela pikinini bilong Abraham long givim blesing long ol manmeri, nogat. Pikinini bilong givim blesing em bai kamap long rot bilong Aisak tasol. (Hi. 11:17, 18) Wanpela man tasol, Jisas Krais, em Baibel i kamapim nem bilong ol tumbuna bilong em, em dispela pikinini God i bin tok profet long en.b Olgeta narapela em bihain ol i kamap nambatu lain pikinini bilong Abraham, ol i kamap olsem, long wanem, ol i “lain bilong Krais.” Tru tumas, wok bilong Jisas long truim dispela tok profet em i narapela kain.
21. Yu laikim wanem samting long pasin bilong Jisas long inapim wok bilong em insait long laik bilong Jehova?
21 Orait, yumi bin kisim wanem save long wok bilong Jisas insait long laik bilong Jehova? Kirap long taim God i wokim em na i kam, dispela wanpela Pikinini Bilong God i bin i stap narapela kain tru. Tasol long pasin daun, oltaim dispela Pikinini Bilong God em bihain em i kamap Jisas, i bin mekim wok i stret wantaim laik bilong Papa bilong em na em i no wok long givim biknem long em yet. (Jo. 5:41; 8:50) Em i stap gutpela piksa tru bilong yumi long nau i ken bihainim! Wankain olsem Jisas, yumi tu i mas mekim “olgeta samting bilong givim biknem long God.”—1 Ko. 10:31.
[Ol Futnot]
a Wanpela saveman bilong Baibel i tok, dispela tok ol i tanim olsem “wanpela taim tasol” i makim olsem “dai bilong Krais i narapela kain, i gat wok long mekim wanpela taim tasol.”
b Ol Juda long taim bilong Jisas ol i ting olsem ol yet i dispela lain God bai orait long en, long wanem, ol i lain tumbuna pikinini bilong Abraham, tasol maski ol i gat dispela tingting, ol i wetim wanpela man tasol long kam na stap olsem Mesaia, o Krais.—Jo. 1:25; 7:41, 42; 8:39-41.
Yu Tingim Yet?
• Ol biknem bilong Jisas i bin givim wanem save long yu long ol wok em i mekim i narapela kain? (Lukim blok.)
• Yu ken mekim wanem bilong bihainim pasin bilong Pikinini Bilong Jehova, em dispela Pikinini i narapela kain?
[Blok/Piksa long pes 15]
Sampela Biknem Em Ol i Makim Wok Bilong Jisas Insait Long Laik Bilong God
◼ Dispela Wanpela Pikinini. (Jo. 1:3) God wanpela i wokim Jisas, na i no gat narapela man em God wanpela tasol i bin wokim.
◼ Tok. (Jo. 1:14) Jehova i save mekim wok long Pikinini bilong em olsem Mausman bilong givim tok long ol narapela.
◼ I Tru. (KTH 3:14) Stretpela pasin bilong Jisas hia long graun, na dai bilong em tu olsem ofa, i strongim ol promis bilong God Jehova na i opim rot long ol i ken kamap tru.
◼ Namelman Bilong Nupela Kontrak. (1 Ti. 2:5, 6) Olsem wanpela Namelman, Jisas i mekim na wanpela nupela lain, em “Israel tru bilong God” i kamap, em ol Kristen em ol bai kamap wanpela lain pris na king long heven.—Ga. 6:16; 1 Pi. 2:9.
◼ Hetpris. (Hi. 7:27, 28) Jisas wanpela tasol inap givim laip bilong em olsem ofa i gutpela olgeta, na i no gat wok long mekim gen. Em inap tekewe sin bilong yumi na dai em sin i kamapim.
◼ Pikinini Bilong Promis. (Stt. 3:15, NW ) Wanpela man tasol, Jisas Krais, em i dispela pikinini God i bin tok profet long en. Ol narapela em bihain ol i kamap nambatu lain pikinini bilong Abraham, ol i “lain bilong Krais.”—Ga. 3:29.