Sapta 38
Litimapim Nem Bilong Ja—Kot Bilong Em i Stret!
1. Jon i harim wanem tok i olsem bilong “bikpela lain” long heven?
BIKPELA BABILON i pinis! Dispela tok i kamapim bikpela amamas tru! Jon i harim ol ensel long heven i singaut amamas na litimapim nem bilong Jehova! Jon i tok: “Bihain long dispela, mi harim samting olsem bikpela singaut bilong bikpela lain manmeri i stap long heven. Ol i tok olsem, ‘Yumi litimapim nem bilong God!a God bilong yumi em wanpela tasol i bin kisim bek yumi. Em i gat biknem na strong. God i save skelim pasin bilong ol manmeri long kot, na kot bilong en em i tru na i stret olgeta. Dispela bikpela pamukmeri em i bin bagarapim olgeta manmeri bilong graun long pasin pamuk bilong en. Olsem na God i bekim pe nogut long em. Dispela meri em i gat asua bilong kilim i dai ol wokman bilong God, na God i bekim pinis dispela asua bilong em.’ Na ol i singaut gen olsem, ‘Yumi litimapim nem bilong God! Smok bilong paia i kukim dispela biktaun, em i save go antap oltaim oltaim!’ ”—KTH 19:1-3.
2. (a) Wanem insait bilong dispela tok “Haleluya”? Jon i harim dispela tok tupela taim, na dispela i makim wanem samting? (b) Taim ol i bagarapim Bikpela Babilon, husat bai kisim biknem long dispela wok? Stori long dispela.
2 Long tok Hibru dispela tok “litimapim nem bilong God,” em “Haleluya,” olsem litimapim nem bilong Ja. Ja em sotpela nem bilong Jehova. Yumi tingim wanpela tok bilong Song i tok: “Yupela olgeta samting i gat laip, litimapim nem bilong Bikpela [Ja]! Litimapim nem bilong Bikpela [Ja]!” (Song 150:6) Jon i harim lain bilong heven i amamas na singaut na i tok “Haleluya”! tupela taim, na dispela i makim olsem Jehova i wok yet long kamapim tok i tru i bin stap hait. Em i God bilong dispela tupela hap bilong Baibel ol i kolim Nupela Testamen na Olpela Testamen. Nem bilong em Jehova. Em yet i bin daunim taun Babilon bilong bipo, na long nau em i skelim pinis pasin bilong Bikpela Babilon na bagarapim em. Olsem na yumi mas givim biknem long Jehova long dispela samting! Tru, ol gavman i bagarapim Bikpela Babilon, tasol Jehova yet i bosim na stiaim ol long mekim olsem. Olsem na yumi mas givim biknem long Jehova tasol.—Aisaia 12:2; KTH 4:11; 7:10, 12.
3. Olsem wanem na dispela bikpela pamukmeri i mas kisim bikpela strafe olsem?
3 Olsem wanem na dispela pamukmeri i mas kisim bikpela strafe olsem? Long wanem, Jehova i bin givim lo long Noa, na dispela lo i go long olgeta man, olsem: Sapos man i kilim i dai narapela man, em i mas i dai. Na long rot bilong Moses God i givim dispela lo long ol Israel tu. (Stat 9:6; Namba 35:20, 21) Dispela lo i tok, sapos man i mekim pasin pamuk bilong skin o bilong spirit, em i mas i dai. (Wok Pris 20:10; Lo 13:1-5) Inap long planti tausen yia Bikpela Babilon i bin kilim ol man i dai na mekim pasin pamuk. Misin Katolik i tambuim ol pris long marit, na dispela i as na planti pris i mekim pasin pamuk, na planti i kisim sik AIDS. (1 Korin 6:9, 10; 1 Timoti 4:1-3) Tasol nambawan bikpela rong bilong ol lotu giaman, em ol i mekim pasin pamuk bilong spirit, na ‘ol i hipim ol sin bilong ol i kam antap inap long heven.’ Dispela pasin pamuk bilong spirit i olsem: Bikpela Babilon i bin lainim ol man long ol bilip giaman, na em i bin pren na wok wantaim ol man nogut bilong politik. (KTH 18:5) Tasol nau strafe i painim em na lain bilong heven i amamas tru na i tok “Haleluya”! namba 2 taim.
4. Taim Bikpela Babilon i kisim bagarap ‘na smok bilong paia i bin kukim na i wok long go antap oltaim oltaim,’ dispela i makim wanem samting?
4 I olsem Bikpela Babilon i paia, olsem wanpela taun ol birua i bin daunim na ol i kukim, na “smok bilong paia . . . i save go antap oltaim oltaim.” Sapos ami i daunim na kukim wanpela ples o taun, smok i save kamap i go inap long paia i dai na sit bilong paia i kol. Sapos man i laik sanapim gen ol haus taim hap paia i stap yet, paia bai kukim skin bilong em. Smok bilong Bikpela Babilon bai go antap oltaim oltaim, na dispela i makim olsem Jehova i givim strafe pinis long em na em i pinis tru na i no inap ol i kirapim em gen. Ol lotu giaman bai pinis olgeta. Tru tumas, Haleluya!—Lukim Aisaia 34:5, 9, 10.
5. (a) “Ol 24 hetman wantaim ol 4-pela samting i stap laip” ol bai mekim wanem, na ol bai tok wanem? (b) Olsem wanem singsing Haleluya bilong dispela lain bilong heven i winim tru singsing Haleluya bilong ol misin?
5 Long wanpela driman Jon i bin lukim 4-pela samting i gat laip ol i raunim sia king bilong Jehova, na 24 hetman, em ol i makim lain bilong Kingdom, ol i kisim namba long heven. (KTH 4:8-11) Nau Jon i lukim ol gen na ol i singaut strong na tok “Haleluya”! namba 3 taim, long wanem, Bikpela Babilon i kisim bagarap: “Ol 24 hetman wantaim ol 4-pela samting i stap laip ol i brukim skru na lotu long God i sindaun i stap long sia king bilong en. Ol i tok olsem, ‘I tru. Yumi litimapim nem bilong God!’ ” (KTH 19:4) Dispela singsing Haleluya i no dispela ‘nupela singsing’ ol i bin mekim long litimapim Pikinini Sipsip, nogat. Em i narapela. (KTH 5:8, 9) Nau ol i mekim wanpela singsing bilong winim pait na litimapim nem bilong Bikpela King Jehova, long wanem, em i daunim pinis Bikpela Babilon. Ol dispela singsing Haleluya i winim bilong ol misin taim ol i singsing Haleluya, long wanem, ol i save nogutim nem bilong Jehova, na ol i nolaik tru long dispela nem. Ol i gat tupela maus taim ol i singsing olsem, na ol i semim nem bilong Jehova, tasol nau Jehova i pasim maus bilong ol inap long olgeta taim bihain!
6. Ol i harim “maus” bilong husat? Maus i tokim ol long mekim wanem? Husat ol i bihainim dispela samting?
6 Long 1918 Jehova i kirap long ‘givim pe long ol man i pret long em, em ol man i gat nem na ol man i no gat nem’—ol Kristen em God i bin makim ol na ol i stap gut long em inap long ol i dai, ol i paslain long kisim pe, na Jehova i kirapim bek ol na ol i stap long lain 24 hetman long heven. (KTH 11:18) Ol i singsing Haleluya, na i gat sampela moa i singsing wantaim ol, olsem Jon i tok: “Na long sia king bilong God maus bilong wanpela man i singaut olsem, ‘Yupela wokman bilong God, em yupela ol lain i save pret long God na aninit long en, yupela ol man nating wantaim yupela ol man i gat nem, yupela olgeta litimapim nem bilong God!’ ” (KTH 19:5) Dispela “maus” em maus bilong Jisas yet, em i olsem Mausman bilong Jehova na “em i sanap i stap namel long sia king.” (KTH 5:6) Na i no long heven tasol ol i singsing olsem—long graun tu olgeta “wokman bilong God” i insait long dispela singsing, na lain em Jon i piksa bilong ol na ol i stap yet long graun ol i go pas long singsing. Ol i givim bel long bihainim maus i tok: “Yupela olgeta litimapim nem bilong God!”
7. Taim Bikpela Babilon i kisim bagarap, husat bai stap na litimapim nem bilong Jehova?
7 Em i stret—dispela bikpela lain tu i bilong dispela lain “wokman bilong God.” Kirap long 1935 ol i wok long lusim Bikpela Babilon. Samting i painim ol pinis olsem God i tok promis long ol, olsem: “Bikpela bai i mekim gut long olgeta manmeri i save pret long em, ol manmeri i gat nem na ol manmeri i no gat nem.” (Song 115:13) Taim pamukmeri Babilon i bagarap pinis, planti milion bilong ol, wantaim dispela lain em Jon i piksa bilong ol, na lain bilong heven tu, ol dispela bai “litimapim nem bilong God.” Bihain moa ol man i bin dai bai kirap bek na i stap long graun, em ol man i gat nem na ol man i no gat nem, na ol bai harim olsem Bikpela Babilon i bagarap olgeta, olsem na ol tu bai singsing Haleluya. (KTH 20:12, 15) Yumi olgeta bai litimapim nem bilong Jehova, long wanem, em i pinisim dispela pamukmeri!
8. Stori bilong ol dispela singsing Jon i lukim long heven i mas kirapim yumi long mekim wanem long taim Bikpela Babilon i no bagarap yet?
8 Dispela save i kirapim yumi long nau long givim bel long mekim wok bilong God! Olgeta wokman bilong Ja i mas givim bel long autim tok long ol strafe em bai bekim long ol man, na autim gutpela tok tu bilong Kingdom, na ol i mas mekim nau, taim Bikpela Babilon i no kisim yet bagarap.—Aisaia 61:1-3; 1 Korin 15:58.
‘Haleluya—Jehova i Stap King!’
9. Olsem wanem namba 4 Haleluya i gutpela moa?
9 Na i gat sampela as moa bilong amamas, olsem Jon i tok: “Orait mi harim samting olsem toktok bilong ol bikpela lain manmeri i bung i stap. Na em i olsem nois bilong bikpela wara i pairap. Na em i olsem ol klaut i wok long pairap strong tru. Ol i singaut olsem, ‘Yumi litimapim nem bilong God! God, Bikpela I Gat Olgeta Strong, nau em i stap king tru!’ ” (KTH 19:6) Dispela namba 4 Haleluya i save mekim ol dispela singsing i kamap stret olgeta na mekim i kamap olsem singsing bilong heven; em i winim gutpela krai bilong wara i kalap, na pairap bilong en i samting bilong pretim man, winim pairap bilong klaut. Ol dispela maus long heven i singsing amamas, long wanem, “God, Bikpela I Gat Olgeta Strong, nau em i stap king tru!”
10. Taim Bikpela Babilon i pinis, olsem wanem na i stret ol i tok long Jehova, “nau em i stap king tru”?
10 Tasol wanpela man bilong raitim Song long Baibel, em i bin tok: “God, bipo tru yu bin i stap king bilong mipela.” (Song 74:12) Taim em i raitim dispela tok, Jehova i bin i stap King longtaim moa yet. Orait olsem wanem na nau ol i singsing na i tok, “nau em i stap king tru”? Ol i tok olsem, long wanem, taim Bikpela Babilon i bagarap pinis, i no gat birua moa bilong pulim ol man long lusim Jehova, nogat; ol bai stap aninit long em na em bai stap Bikpela King bilong olgeta hap. Ol lotu giaman i no inap kirapim moa ol king bilong graun long sakim Jehova. Taim ol lain i bin daunim olpela taun Babilon bilong bipo, Saion i harim gutpela toksave bilong amamas, olsem: “Nau God bilong yu i bosim olgeta samting.” (Aisaia 52:7) Kingdom i bin kirap long 1914, na bihain 24 hetman i tok: “Bikpela, . . . Yu kisim pinis bikpela strong bilong yu, na yu kamap king tru. Olsem na mipela i tenkyu long yu.” (KTH 11:17) Taim Bikpela Babilon i bagarap, dispela tok i kamap gen: “God, Bikpela I Gat Olgeta Strong, nau em i stap king tru!” Long dispela taim bai i no gat wanpela god giaman bilong resis wantaim Jehova long i stap king, nogat. Trupela God Jehova tasol bai stap King!
Pikinini Sipsip i Laik Marit!
11, 12. (a) Ol Jerusalem bilong bipo ol i ting olsem wanem long ol Babilon bilong bipo? Olsem na nupela Jerusalem inap long ting olsem wanem long Bikpela Babilon? (b) Taim Bikpela Babilon i bagarap, lain bilong heven bai singsing na tok wanem?
11 Lain bilong Jerusalem i bin kolim Babilon olsem “birua bilong yumi.” (Maika 7:8) I olsem tu long “taun bilong God, em nupela Jerusalem,” em lain 144,000 olsem meri bilong Krais Jisas—i gat as na ol tu inap kolim Bikpela Babilon olsem birua bilong ol. (KTH 21:2) Tasol bihain Bikpela Babilon bai bagarap, na pasin marila na ol glasman bilong em i no inap helpim em. (Lukim Aisaia 47:1, 11, 13.) Long dispela taim bai trupela lotu i win!
12 Pamukmeri nogut, em Bikpela Babilon, bai pinis olgeta, na nau meri bilong Pikinini Sipsip bai kisim biknem, em i gutpela nupela meri! Olsem na lain bilong heven bai singsing amamas na litimapim nem bilong Jehova na i tok: “ ‘Yumi ken belgut na amamas moa yet na litimapim nem bilong en, long wanem, taim i kamap pinis bilong Pikinini Sipsip i marit, na meri bilong en i redi i stap. God i givim naispela waitpela klos long dispela meri, em klos i klin tru na i lait moa yet.’ Dispela naispela waitpela klos em i makim stretpela pasin ol manmeri bilong God i mekim.”—KTH 19:7, 8.
13. Inap planti handet yia pinis Jisas, em Pikinini Sipsip, i mekim wanem bilong redim ol samting bilong marit bilong em?
13 Inap planti handet yia Jisas i bin mekim pasin sori na redim ol samting bilong dispela marit bai kamap long heven. (Matyu 28:20; 2 Korin 11:2) Em i bin stretim lain 144,000 Israel bilong spirit na mekim ol i kamap klin, long wanem, “em i laik mekim sios [kongrigesen] i kamap naispela tru long ai bilong em, na bai sios i no gat doti na grile na kain samting olsem. Nogat. Sios i ken i stap holi na i no gat asua.” (Efesus 5:25-27) Olgeta Kristen bilong dispela lain 144,000 ol i gat tingting long “kisim prais. . . . Em i olsem: Long wok bilong Krais Jisas, God i singautim [ol] bilong go antap na i stap gut tru wantaim em.” Olsem na ol i lusim olpela pasin bilong ol na kisim nupela pasin Kristen na givim bel long mekim ol stretpela wok, olsem ol i mekim wok bilong Jehova.—Filipai 3:8, 13, 14; Kolosi 3:9, 10, 23.
14. Satan i bin mekim wanem bilong paulim lain 144,000, em meri bilong Pikinini Sipsip?
14 Kirap long de Pentikos long yia 33, long rot bilong Bikpela Babilon Satan i wok strong long paulim lain 144,000, em meri bilong Pikinini Sipsip. Taim yia 100 i no yet, Satan i kirapim sampela bilip giaman bilong Babilon insait long ol kongrigesen. (1 Korin 15:12; 2 Timoti 2:18; KTH 2:6, 14, 20) Aposel Pol i stori long ol man i laik paulim bilip bilong ol Kristen, na em i tok: “Ol i giaman aposel na giaman wokman. Ol i save senisim pasin bilong ol bilong mekim ol man i ting ol i stap aposel tru bilong Krais. Na yupela i no ken kirap nogut long dispela . . . Yumi save, Satan yet i save senisim pasin bilong en na kamap olsem ensel bilong lait.” (2 Korin 11:13, 14) Bihain ol Kristen giaman i kamap, na ol i bihainim wankain pasin na bilip olsem bilong ol narapela lotu giaman bilong Bikpela Babilon, na ol i kisim planti mani kago bilong graun, na ol i holim ol wok bilong graun na ol i gat namba na biknem, na ol dispela samting i olsem bilas bilong ol, olsem “retpela klos, na . . . bilas gol na . . . naispela ston wantaim ol bis i dia tumas.” (KTH 17:4) Ol pris pasto na pop samting i bin pren wantaim ol bikman nogut bilong kilim man i dai, olsem Konstantin na Salemein. Ol i no bihainim “stretpela pasin ol manmeri bilong God i mekim.” Ol i tok ol i meri bilong Krais, tasol Satan i bin kamapim dispela meri olsem nambawan rot bilong giamanim ol man. Tasol nau dispela meri i pinis olgeta!
Meri Bilong Pikinini Sipsip i Redim Skin Bilong Em
15. Lain 144,000 i kisim mak olsem wanem? Ol Kristen em God i bin makim ol pinis, ol i mas mekim wanem?
15 Long de Pentikos na i kam inap nau em klostu 2,000 yia, na olgeta bilong lain 144,000 ol i wok long redi long dispela marit. Wanem taim tru dispela meri bilong Pikinini Sipsip i bin redim skin bilong em? Kirap long de Pentikos long yia 33 na i kam inap nau, “God i bihainim promis em i bin mekim bipo na em i givim Holi Spirit long [ol], olsem mak bilong [ol] i stap lain manmeri bilong em stret”; long wanem, God “i makim taim bilong kisim bek [ol] na mekim [ol] i kamap fri tru.” Olsem aposel Pol i tok, God “i bin putim mak bilong em yet long yumi, na em i givim Holi Spirit bilong i stap long bel bilong yumi. Holi Spirit em i olsem namba wan hap bilong ol gutpela samting God i laik givim long yumi.” (Efesus 1:13; 4:30; 2 Korin 1:22) Olgeta wan wan Kristen bilong dispela lain olsem meri bilong Krais, God “i bin singautim ol na em i bin makim ol bilong em yet,” na olgeta wan wan i stap gut long God na “bihainim tru tok bilong em.”—KTH 17:14.
16. (a) Wanem taim God i bin makim pinis Pol? Yumi save olsem wanem long dispela? (b) Wanem taim meri bilong Pikinini Sipsip i redi pinis bilong marit?
16 Pol i bin karim hevi inap planti yia, na nau em i tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God. Nau prais bilong man i winim resis em i redi na i wetim mi i stap. Dispela prais em i olsem. Bikpela bai i kolim mi stretpela man . . . na long De bilong bikpela kot bilong em, em bai i givim dispela prais long mi. Na em bai i no givim long mi wanpela tasol. Nogat. Em bai i givim long olgeta man i laikim tumas long lukim em na i wetim em i kamap ples klia.” (2 Timoti 4:7, 8) God i bin makim Pol pinis long dispela taim, maski em i stap yet olsem man bilong graun na em i save bihain bai ol i kilim em i dai. I olsem tu long hap lain bilong 144,000 ol i stap yet long graun—taim i mas kamap na olgeta wan wan i kisim pinis mak. (2 Timoti 2:19) Na taim ol i kisim mak pinis, i olsem meri bilong Pikinini Sipsip i redi pinis long marit—long dispela taim bikpela hap bilong lain 144,000 bai stap pinis long heven na ol i kisim pinis prais bilong ol, na hap lain i stap yet long graun em Jehova i orait pinis long ol na em i putim pinis mak long ol, long wanem, ol i bin stap gut long em.
17. Wanem taim bai Pikinini Sipsip i marit?
17 Orait, taim Jehova i putim mak pinis long olgeta bilong 144,000, ol ensel bai lusim 4-pela win bilong “bikpela hevi tru.” (KTH 7:1-3) Pastaim Krais Jisas bai bagarapim Bikpela Babilon, na kwiktaim bihain Armagedon bai bagarapim ol narapela hap bilong oganaisesen bilong Satan long graun, na bihain long dispela Satan wantaim ol spirit nogut bilong em bai kalabus long hul i no gat as. (KTH 19:11–20:3) Sapos i gat hap lain bilong 144,000 i stap yet long graun, ating i no longtaim bihain long Krais i winim pait, bai ol i go long heven na kisim prais bilong ol na bung wantaim ol narapela wanlain bilong ol, olsem meri bilong Pikinini Sipsip. Orait nau, long taim God i makim, marit bilong Pikinini Sipsip bai kamap!
18. Song 45 i stori olsem wanem long ol samting bai kamap long taim bilong Pikinini Sipsip i laik marit?
18 Song 45 i stori olsem: Pastaim King i raun long hos na daunim ol birua. (Song 45 Ves 1-7) Daunim ol pinis, na nau marit bilong King bai kamap long heven, na ‘bikpela lain’ manmeri long graun, olsem “ol yangpela meri i poroman” bilong meri bilong King, ol bai amamas long em. (Song 45 Ves 8-15) Marit pinis, na nau ol i kamapim ol pikinini—em ol man i bin dai bai kirap bek, na King bai “givim bikpela namba” long sampela, “na bai ol i bosim ol manmeri long olgeta hap bilong graun.” (Song 45 Ves 16, 17) Ol gutpela samting tru bai kamap taim Pikinini Sipsip i marit!
Ol Man God i Bin Singautim Ol Ol i Ken Amamas
19. Wanem dispela namba 4 amamas bilong Kamapim Tok Hait? Husat ol bai insait long dispela amamas?
19 Nau Jon i stori long namba 4 amamas bilong dispela 7-pela amamas long Kamapim Tok Hait: “Na ensel i tokim mi olsem, ‘Yu raitim tok olsem, “Ol dispela man God i bin singautim i kam long bikpela kaikai bilong marit bilong Pikinini Sipsip, ol i ken amamas.” ’ Na em i tokim mi moa olsem, ‘Dispela tok em i tok tru bilong God.’ ” (KTH 19:9)b “Ol dispela man God i bin singautim i kam long bikpela kaikai bilong marit bilong Pikinini Sipsip,” ol i dispela lain 144,000, olsem meri bilong marit. (Lukim Matyu 22:1-14.) Olgeta bilong dispela lain i amamas long God i bin singautim ol. Planti bilong ol i go pinis long heven, em ples dispela kaikai bilong marit bai kamap. Hap lain i stap yet long graun, ol tu bai amamas, long wanem, God i bin singautim ol pinis, na ples bilong ol long dispela kaikai i redi i stap. (Jon 14:1-3; 1 Pita 1:3-9) Taim ol i dai na kirap bek i go long heven, olgeta bilong dispela lain olsem meri bilong marit ol bai stap wantaim, na nau ol bai amamas wantaim Pikinini Sipsip long marit bilong ol.
20. (a) Wanem insait bilong tok bilong ensel, em i tok, “Dispela tok em i tok tru bilong God”? (b) Taim Jon i harim dispela tok em i ting olsem wanem na em i mekim wanem? Tasol ensel i tok wanem long em?
20 Ensel i tok: “Dispela tok em i tok tru bilong God.” Dispela tok olsem “tru” long tok Grik em a·le·thi·nosʹ, na insait bilong en i olsem “i no giaman” na “yumi ken bilip long en.” Jehova i as bilong dispela tok, olsem na yumi ken save em i stret. (Lukim 1 Jon 4:1-3; Kamapim Tok Hait 21:5; 22:6.) Jon i bilong dispela lain em God i singautim bilong i kam long kaikai bilong marit na em i amamas tru long dispela—em i tingim ol gutpela samting dispela lain olsem meri bilong marit ol bai kisim bihain, na dispela tingting i kirapim tru bel bilong em. Olsem na ensel i givim strongpela tok long Jon, olsem Jon i tok: “Mi brukim skru klostu long lek bilong ensel, na mi laik lotu long em. Tasol em i tok, ‘Yu no ken mekim olsem! Mi tu mi wanwok bilong yu wantaim ol brata bilong yu, em yupela ol lain i save bilip long tok Jisas i autim. Yu mas lotu long God wanpela tasol.’ ”—KTH 19:10a.
21. (a) Kamapim Tok Hait i stori olsem wanem long ol ensel? (b) Ol Kristen i mas ting olsem wanem long ol ensel?
21 Kamapim Tok Hait i tokaut klia long ol ensel i givim bel long mekim gut wok bilong ol. Ol ensel i insait long ol samting Jehova i mekim bilong kamapim klia tok i tru. (KTH 1:1) Ol i save wok wantaim ol man long autim gutpela tok na long kapsaitim samting nogut tru i go long graun na solwara samting. (KTH 14:6, 7; 16:1) Na ol i bin wok wantaim Jisas long mekim pait long Satan na ol ensel bilong Satan na rausim ol long heven, na ol bai helpim Jisas long pait bilong Armagedon. (KTH 12:7; 19:11-14) Na ol inap i go klostu long Jehova na lukim em. (Matyu 18:10; KTH 15:6) Tasol ol i wokboi tasol bilong Jehova, na ol i gat pasin daun. Sapos yumi laik bihainim stretpela lotu yumi no ken lotuim ol ensel liklik, na yumi no ken lotuim God long rot bilong wanpela santuman o ensel samting. (Kolosi 2:18) Ol Kristen i save lotuim Jehova wanpela tasol, na ol i beten long em long rot bilong Jisas.—Jon 14:12, 13.
Wok Bilong Jisas Long Ol Tok Profet
22. Ensel i tok wanem long Jon? Wanem insait bilong dispela tok?
22 Ensel i tok moa olsem: “Yumi save, tok Jisas i autim, em tasol i save kirapim ol man long autim tok profet.” (KTH 19:10b) Insait bilong dispela tok i olsem: Olgeta tok profet i makim ol wok samting em Jisas bai mekim na ol narapela wok bilong em bilong inapim laik bilong Jehova. Namba wan tok profet long Baibel i tok promis long wanpela pikinini bai kamap. (Stat 3:15) Jisas em i dispela Pikinini. Bihain planti tok profet moa i kamap, na i strongim dispela tok profet long Stat 3:15. Aposel Pita i tokim bilipman Kornilius: “Olgeta profet i bin autim tok long ol samting em [Jisas] bai i mekim.” (Aposel 10:43) Inap 20 yia bihain aposel Pol i tok: “I gat planti promis bilong God i stap, na Krais i save tok ‘Yes’ long dispela olgeta promis.” (2 Korin 1:20) Inap 43 yia bihain moa Jon i tok: “Long Jisas Krais yumi kisim . . . [tok] i tru.”—Jon 1:17.
23. Jisas i gat bikpela namba, tasol olsem wanem Jehova i bikpela moa na yumi mas lotu long em tasol?
23 Ol dispela samting i no makim olsem yumi mas lusim Jehova na lotuim Jisas, nogat. Yumi tingim tok bilong ensel em i tok: “Yu mas lotu long God wanpela tasol.” Jisas i no bin wok long kamap bikman olsem Jehova, nogat. (Filipai 2:6) Tru, Jehova i tok long olgeta man na ensel i mas “brukim skru long ai bilong Jisas na i stap aninit long em,” tasol ol i mekim bilong “givim biknem long God Papa,” em Jehova. (Hibru 1:6, NW; Filipai 2:9-11) Jehova yet i bin givim bikpela namba long Jisas, na sapos yumi bilip long dispela na daun long em, i olsem yumi litimapim nem bilong Jehova. Na sapos yumi bikhet long Jisas na yumi no laik bai em i bosim yumi, i olsem yumi givim baksait long God Jehova yet.—Song 2:11, 12.
24. Wanem tupela bikpela samting yumi wetim i stap? Wanem wanpela tok, o singsing, yumi mas wok long mekim?
24 Orait, gutpela sapos yumi olgeta wantaim i mekim dispela namba wan tok bilong Song 146 i go inap long Song 150, olsem: “Litimapim nem bilong Bikpela [olsem Haleluya]!” Yumi mas mekim dispela singsing Haleluya i kamap bikpela moa na wetim Jehova i bagarapim Bikpela Babilon! Na yumi ken amamas na tingim marit bilong Pikinini Sipsip liklik taim bai kamap!
[Ol Futnot]
a Lukim sta daunbilo long pes 493 bilong Nupela Testamen long Buk Baibel.
b Lukim tu Kamapim Tok Hait 1:3; 14:13; 16:15.
[Blok long pes 273]
“Pas i Go Long Sodom na Gomora”
Dispela het-tok i stap long wanpela nius (Daily Telegraph) bilong Landon bilong Novemba 12, 1987, na i stori long Bikpela Kibung Bilong Sios Bilong Inglan, em sampela i laik rausim ol man bilong dispela misin ol i mekim pasin sodom. Nius i tok, ‘Asbisop bilong Kantaberi i bel hevi na i tok, “Sapos aposel Pol i raitim pas long Sios Bilong Inglan, ating em bai tok wanem?” ’ Nius i tok: ‘Pol bai tok, “Mi salim pas i go long Sodom na Gomora.” ’ Na nius i tok, ‘Asbisop Runcie i ting dispela pas bai wankain olsem Rom sapta 1.’
Nius i kolim tok bilong Pol long Rom 1:26-32 i tok: “Ol man . . . i mekim pasin nogut wantaim ol arapela man. . . . God i tok olsem, ‘Ol man i mekim kain pasin olsem ol i mas i dai.’ Dispela ol man i save gut long dispela lo, tasol ol i save sakim . . . Ol i save litimapim nem bilong ol man i mekim ol dispela kain pasin.” Na nius i tok, ‘Pol i bin tingting long ol man i save kam harim lotu, tasol Runcie i tingting long ol pris pasto yet.’
Wanem dispela tingting bilong asbisop? Wanpela nius (Daily Mail) bilong Oktoba 22, 1987, long Landon i tok: ‘ “Long olgeta 3-pela 3-pela pasto, wanpela i save mekim pasin sodom.” Sapos Sios Bilong Inglan i rausim ol man i save mekim dispela pasin sem, lain bilong Misin bai pinis.’ Nius i kolim tok bilong wanpela pasto em kuskus bilong wanpela lain i save mekim pasin sodom na pasto i tok: ‘Sapos Misin i rausim ol man i mekim dispela pasin, Misin bai pinis, na Asbisop i save long dispela samting. I gat 35 pesen samting bilong ol pasto bilong Sios Bilong Inglan ol i mekim pasin sodom, tasol ol i mekim bikpela wok bilong helpim Misin.’ Dispela pasin i go bikpela na em i wanpela as na planti man i lusim dispela misin.
Kibung bilong misin i mekim wanem? Klostu olgeta memba bilong kaunsil, inap 388 memba, i no laik tambuim tumas dispela pasin nogut bilong ol pasto. Wanpela nius (The Economist) bilong Novemba 14, 1987, i tok: ‘Sios Bilong Inglan i no laikim pasin sodom, tasol ol i no tambuim tumas. Kaunsil i toktok long pasin sodom ol pasto i mekim, na kaunsil i tok, “dispela pasin i no olsem pasin pamuk tru, olsem na i no gat rong long en.” ’ Nius i skelim tingting bilong Asbisop wantaim tok bilong Pol long Rom 1:26, 27, na nius i kamapim wanpela tok bilong Pol aninit long het-tok olsem: ‘Pol i kolim stret samting em i tingim.’
Jisas tu i kolim stret samting em i tingim, na em i tok, “long de God i makim bilong kotim ol manmeri, hevi i kamap long [ol bikman bilong lotu i sakim tok bilong em] bai i winim tru hevi i kamap long ol Sodom.” (Matyu 11:23, 24) Ol dispela bikman bilong lotu i bin sakim Jisas na ol tok bilong em, olsem na ol i gat bikpela asua moa, winim bilong ol Sodom. Jut 7 i tok, “God i mekim save long ol [Sodom] long paia i stap oltaim,” olsem ol i bagarap olgeta. (Matyu 25:41, 46) Olsem na ol dispela bikman bilong ol misin bai kisim bikpela strafe moa, long wanem, ol i giamanim na paulim lain bilong ol na ol dispela lain i no bihainim stretpela lo bilong Kingdom bilong God. (Matyu 15:14) Dispela maus long heven i toktok long ol man i stap long ol lotu giaman, em Bikpela Babilon, na i tok: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em . . . long taim em i kisim pe nogut.”—KTH 18:2, 4.
[Ol Piksa long pes 275]
Long heven 4-pela singsing Haleluya i kamap bilong litimapim nem bilong Ja, em i pinisim Bikpela Babilon