Ol Papamama, Lukautim Gut Famili Bilong Yupela

“Sapos wanpela man i no lukautim ol wanblut tru bilong em yet . . . orait dispela man i lusim pinis bilip bilong em.”​—⁠1 TIMOTI 5:⁠8.

1, 2. (a) Bilong wanem yumi kisim strong taim yumi lukim ol famili i kam wantaim long ol miting Kristen? (b) Ol famili i mas winim wanem ol hevi bilong i kam long ol miting long taim stret?

TAIM yu lukluk raun long kongrigesen Kristen paslain long miting i kirap, ating yu bai lukim ol pikinini, em ol i stap klin na ol i bilas gut na ol i sindaun wantaim papamama. Yumi amamas long lukim pasin laikim i stap insait long ol kain famili olsem, a? Ol i laikim tumas Jehova na ol arapela insait long famili. Tasol em i isi long lusim tingting long bikpela wok papamama i mas mekim bilong famili i ken kamap long ol miting long taim stret.

² Long planti famili ol papamama i save bisi long de olgeta, na long ol nait taim i gat ol miting, famili i bisi moa yet. Ol i mas redim kaikai, mekim ol wok bilong lukautim haus, na pinisim ol homwok. Ol papamama i gat bikpela wok moa, long wanem, ol i mas helpim ol pikinini long waswas, kaikai, na redi long taim stret. Taim yu gat ol pikinini ol hevi inap kamap long taim i no gutpela long ol i kamap. Olsem: Bikpela mangi i brukim trausis bilong em taim em i pilai i stap. Laspela pikinini i kapsaitim kaikai bilong em. Ol pikinini i kirap tok pait namel long ol yet. (Sindaun 22:15) Ol dispela samting i mekim wanem? Maski papamama i bin plen gut, plen bilong ol inap bagarap. Tasol klostu olgeta taim famili i save stap long Haus Kingdom paslain tru long taim miting i kirap. Yumi kisim strong taim yumi lukim ol i kam long ol miting long olgeta wik i go i go inap planti yia na yumi lukim ol pikinini i kamap bikpela na ol i mekim wok bilong Jehova!

 3. Olsem wanem yumi save Jehova i save tingim ol famili olsem ol i bikpela samting?

³ Maski sampela taim wok papa o wok mama bilong yu i hatwok na i pinisim tru strong bilong yu, yu mas save tru olsem Jehova i amamas tru long hatwok yu mekim. Jehova em Man i bin kamapim famili long pastaim. Baibel i tok Jehova yet i givim nem long olgeta famili​—⁠olsem Em i as na olgeta famili i stap laip. (Efesus 3:​14, 15) Olsem na yupela papamama taim yupela i wok long mekim stret ol wok insait long famili em God i makim yupela long mekim, dispela i givim biknem long Bikpela King bilong heven na graun. (1 Korin 10:31) Em i wanpela gutpela wok tru, a? Olsem na i stret yumi skelim wok Jehova i bin givim long ol papamama. Long dispela stadi bai yumi tingim ol samting papamama i mas mekim bilong lukautim famili. Yumi laik stori long 3-pela rot em Jehova i laik bai ol papamama i lukautim ol pikinini long en.

Lukautim Ol Long Ol Samting Bilong Skin

 4. Jehova i tok em wok bilong husat long lukautim ol pikinini insait long famili?

⁴ Aposel Pol i tok: “Harim. Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” (1 Timoti 5:⁠8) Taim Pol i tok long “wanpela man,” em i tingting long husat? Em i tingim het bilong famili, planti taim em papa. Na tu, God i givim gutpela wok long ol meri olsem helpim bilong man bilong ol. (Stat 2:18) Long taim bilong ol man i raitim Baibel em i pasin bilong planti meri long helpim man bilong ol long lukautim famili. (Sindaun 31:​13, 14, 16) Long nau, i gat planti famili i gat papa o mama tasol.a Planti papa o mama wanpis, em ol i Kristen, ol i mekim gutpela wok long lukautim famili bilong ol. Tasol em i gutpela moa sapos famili i gat papa na mama, na papa i go pas long mekim ol samting.

5, 6. (a) Wanem sampela hevi i save painim ol man em ol i wok long lukautim famili long ol samting bilong skin? (b) Wanem kain tingting long wok skin inap helpim ol papa Kristen long wok strong yet long mekim wok skin?

⁵ Long 1 Timoti 5:​8, Pol i stori long lukautim famili long wanem samting? Ol skripsa i stap klostu i helpim yumi long save olsem em i stori long ol samting bilong skin famili i mas kisim. Long nau i gat planti samting inap givim hatwok long het bilong famili long lukautim famili long ol samting bilong skin. Long olgeta hap i gat hevi long mani samting, ol kampani i rausim ol man long wok, planti man i no gat wok, na pe bilong ol samting i go antap. Wanem samting inap helpim man i lukautim famili na em i no ken givap long mekim wok bilong em?

⁶ I gutpela sapos man bilong lukautim famili i tingim wok em i mekim em i wanpela wok Jehova i givim em. Holi spirit i kirapim Pol na em i soim olsem sapos man inap mekim dispela wok tasol em i sakim, em i wankain olsem man “i lusim bilip.” Ol Kristen bai wok strong tru, long wanem, ol i no laik i stap nogut long ai bilong God. Tasol sori tru, planti man long nau ol i “no laikim tru ol wanblut.” (2 Timoti 3:​1, 3, NW ) Tru tumas, planti papa i sakim wok bilong ol, na ol i no lukautim famili. Ol man marit Kristen i no holim kain tingting nogut long pasin bilong ol long lukautim famili. Ol i no gat wankain tingting olsem ol wanwok, nogat. Maski ol narapela i ting wanpela wok em i wok nating, ol papa Kristen bai ting em wanpela gutpela wok na i bikpela samting na em wanpela rot bilong amamasim God Jehova, long wanem, long rot bilong dispela wok em inap lukautim famili bilong em.

 7. Bilong wanem i stret ol papamama i ken skelim gutpela piksa Jisas i makim?

⁷ Sapos ol het bilong famili i skelim gutpela piksa Jisas i makim dispela inap helpim ol. Tingim, long tok profet Baibel i kolim Jisas olsem “Papa bilong i stap oltaim oltaim.” (Aisaia 9:​6, 7) Olsem “narapela Adam,” Jisas i kisim ples bilong “namba wan man, Adam” na em i stap papa bilong ol manmeri i bilip long em. (1 Korin 15:45) Adam em i wanpela papa i bin tingim em yet, tasol Jisas i no olsem. Em i gutpela papa tru. Baibel i tok long em olsem: “Jisas i lusim laip bilong em yet na i dai bilong helpim yumi, na dispela pasin bilong en i soim yumi pinis long pasin bilong laikim tru ol arapela.” (1 Jon 3:16) Tru tumas, long laik bilong em yet Jisas i bin givim laip bilong em bilong helpim ol narapela. Na tu, long ol wan wan de em i tingim laik bilong ol narapela paslain long laik bilong em yet long ol samting i no bikpela samting tumas. Em i gutpela sapos yupela ol papamama i bihainim pasin bilong em long tingim narapela pastaim.

8, 9. (a) Ol papamama inap kisim wanem save long pasin bilong ol pisin long lukautim pikinini? (b) Planti papamama Kristen i mekim wanem bilong kamapim pasin bilong lusim samting bilong ol yet bilong helpim narapela?

⁸ Ol papamama inap kisim planti save long pasin bilong laikim tru narapela na i no tingim ol yet long tok Jisas i mekim long lain bilong God, em ol i bikhet: “Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en.” (Matyu 23:37) Long hia Jisas i kamapim tok piksa long wanpela mama kakaruk i haitim ol pikinini aninit long wing bilong em. Tru tumas, pasin bilong mama pisin long lukautim pikinini na redi long kisim bagarap bilong mekim olsem inap skulim ol papamama. Ol samting papamama pisin i mekim long olgeta wan wan de em i narapela kain tru. Oltaim ol i flai i go i kam bilong painim kaikai. Maski strong bilong ol i laik pinis, ol i givim kaikai long ol pikinini, em ol i daunim kaikai na singaut long kisim sampela moa. Planti animal Jehova i bin wokim ol i gat “gutpela tingting tru” long pasin bilong lukautim ol pikinini bilong ol.​—⁠Sindaun 30:⁠24.

⁹ Long wankain pasin, ol papamama Kristen long olgeta hap ol i wok long kamapim pasin bilong lusim samting bilong ol yet. Bilong lukautim ol pikinini bilong yupela, yupela yet i redi long kisim bagarap paslain long yupela i larim bagarap i painim ol pikinini. Na long olgeta de yupela i orait long lusim samting bilong yupela yet bilong lukautim famili bilong yupela. Planti bilong yupela i kirap long bikmoning tru na mekim ol wok mani i hatwok long mekim. Yupela i wok strong long baim ol gutpela kaikai. Yupela i save wok hat tru na bai ol pikinini i gat klinpela klos, ples slip, na gutpela skul. Na yupela i mekim olsem long olgeta taim i go i go i go. Kain pasin olsem i save amamasim Jehova! (Hibru 13:16) Tasol long seim taim yupela luksave olsem i gat sampela samting yupela i mas mekim bilong lukautim famili na em i bikpela samting moa.

Lukautim Ol Long Ol Samting Bilong Spirit

10, 11. Wanem nambawan samting ol man i mas kisim? Ol papamama Kristen i mas mekim wanem samting pastaim na bai ol inap givim dispela samting long ol pikinini?

¹⁰ Lukautim famili long ol samting bilong spirit em i bikpela samting moa winim pasin bilong lukautim ol long samting bilong skin. Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4; 5:⁠3) Yupela papamama i ken mekim wanem bilong lukautim famili long ol samting bilong spirit?

¹¹ Taim yumi stori long dispela samting, ol i save kamapim planti taim tok bilong Lo 6:​5-7. Plis opim Baibel bilong yu na ritim ol dispela ves. Pastaim skripsa i tokim papamama long wok long kamap strong long ol samting bilong spirit, wok long laikim Jehova na putim tok bilong em long bel bilong ol. Tru tumas, yu mas stadi gut long Baibel, ritim Baibel long olgeta taim na wok long tingim tingim long bel tok bilong en na bai yu ken kliagut na laikim tru ol pasin, ol stiatok, na ol lo bilong Jehova. Dispela bai mekim na bel bilong yu bai pulap long ol gutpela tok bilong Baibel na ol dispela tok bai kirapim yu long amamas, rispektim, na laikim tru Jehova. Bai yu gat planti gutpela samting bilong givim long ol pikinini bilong yu.​—⁠Luk 6:⁠45.

12. Olsem wanem ol papamama inap bihainim pasin bilong Jisas taim ol i laik putim tok i tru bilong Baibel long bel bilong ol pikinini?

¹² Ol papamama i stap strong long ol samting bilong spirit ol i redi long bihainim tok i stap long Lo 6:7; ol i redi long “lainim” ol pikinini long tok bilong Jehova long olgeta taim. Bilong “lainim” ol olsem ol i mas skulim ol long rot bilong kamapim planti taim ol tok ol i mas kisim. Jehova i save yumi olgeta​—⁠na moa yet ol pikinini​—⁠i mas harim tok planti taim bilong lain gut long en. So Jisas i bin kolim gen wankain tok taim em i autim tok. Olsem: Taim em i skulim ol disaipel long mekim pasin daun na no ken hambak na resis wantaim narapela, em i kamapim wankain stiatok long ol narapela narapela rot. Bilong skulim ol man, em i bin toktok gut wantaim ol, kamapim ol tok piksa, na soim ol pasin ol yet i mas bihainim. (Matyu 18:​1-4; 20:​25-27; Jon 13:​12-15) Tasol i no gat wanpela taim em i soim olsem em i les long ol. Long wankain pasin ol papamama i mas painim rot long skulim ol pikinini long ol as bilong tok i tru, na long gutpela pasin isi ol i mas kamapim planti taim ol stiatok bilong Jehova i go inap long ol pikinini i kisim na bihainim.

13, 14. Ol papamama inap putim tok tru bilong Baibel long bel bilong ol pikinini long wanem ol narapela narapela taim? Ol i ken yusim wanem ol samting bilong helpim ol long mekim olsem?

¹³ Nambawan gutpela taim long skulim ol pikinini em long taim bilong famili stadi. Tru tumas, bilong famili i ken stap strong long ol samting bilong spirit oltaim ol i mas mekim stadi long Baibel i save strongim ol. Ol famili Kristen long olgeta hap ol i amamas long ol kain stadi olsem, na ol i yusim ol buk samting em oganaisesen bilong Jehova i bin redim bilong helpim ol pikinini. Buk Kisim Skul Long Bikpela Tisa na buk Sampela Askim Bilong Ol Yangpela​—⁠Ol Gutpela Bekim ol i gutpela tru long helpim ol pikinini.b Tasol no ken skulim ol pikinini long taim bilong famili stadi tasol.

¹⁴ Olsem Lo 6:7 i kamapim, i gat kain kain taim na ples we yupela papamama i ken toktok wantaim ol pikinini long ol samting bilong spirit. Taim yupela i raun wantaim, mekim wok long haus wantaim, o yupela i malolo wantaim, yupela inap painim rot bilong givim pikinini bilong yupela ol samting bilong spirit ol i mas kisim. I no olsem oltaim yupela i mas “tokim” ol long tok tru bilong Baibel. Nogat. Taim yupela i toktok, stori long ol samting bilong spirit i save strongim narapela. Olsem: Magasin Kirap! i save stori long kain kain samting. Sampela stori inap opim rot long yupela long toktok long ol animal samting Jehova i wokim, ol naispela ples long ol narapela hap, na ol manmeri bilong ol narapela narapela hap ol i gat ol narapela narapela pasin na sindaun. Taim yupela i stori olsem, ating dispela bai kirapim ol yangpela long ritim moa yet ol buk na nius em wokboi i gat gutpela tingting i save redim.​—⁠Matyu 24:​45-47.

15. Ol papamama inap mekim wanem bilong helpim ol pikinini long tingim olsem wok autim tok Kristen em i wanpela gutpela wok i gat amamas long en?

¹⁵ Taim yu toktok wantaim ol pikinini bilong strongim ol dispela bai helpim yu long inapim narapela samting bilong spirit ol i mas kisim. Ol pikinini Kristen i mas lain long mekim gutpela wok long autim bilip bilong ol long ol narapela. Taim yu stori long wanpela poin yu laikim insait long Wastaua o Kirap! wok long painim rot long stori long olsem wanem yu inap yusim dispela poin long taim bilong autim tok. Yu inap mekim kain askim olsem: “Em bai gutpela sapos planti man moa i save long dispela samting bilong Jehova, a? Yu ting yumi ken mekim wanem bilong kirapim man long i gat laik long harim stori bilong dispela samting?” Kain toktok inap helpim ol yangpela long kisim bikpela laik moa long tokim ol narapela long ol samting ol i lainim. Na taim ol pikinini i go wantaim yu long autim tok ol inap harim yu i kamapim ol dispela samting yupela i bin toktok long en. Na tu, ating ol inap kisim save olsem wok autim tok em i wanpela wok bilong amamas.​—⁠Aposel 20:⁠35.

16. Ol pikinini i ken kisim save long wanem samting taim ol i putim yau long ol beten bilong papamama bilong ol?

¹⁶ Na tu, ol papamama i save lukautim ol pikinini long ol samting bilong spirit taim ol i beten. Jisas i bin skulim ol disaipel long beten, na em i bin beten wantaim ol planti taim. (Luk 11:​1-13) Man! Tingim save ol i bin kisim taim ol i beten wantaim Pikinini Bilong Jehova yet! Long wankain pasin ol pikinini inap kisim planti save long rot bilong ol beten bilong yu. Ating ol inap kisim save olsem Jehova i laik bai yumi toktok wantaim Em long olgeta taim na kamapim tingting i stap long bel bilong yumi long olgeta hevi yumi tingting long en. Yes, ol beten bilong yupela inap helpim ol pikinini bilong yupela long lainim wanpela bikpela tok i tru bilong spirit: Ol inap pas gut wantaim Papa bilong ol long heven.​—⁠1 Pita 5:⁠7.

Lukautim Ol Long Ol Samting Bilong Bel

17, 18. (a) Olsem wanem Baibel i kamapim olsem em i bikpela samting long ol papamama i mas kamapim pasin laikim long ol pikinini? (b) Ol papa i mas mekim wanem bilong bihainim pasin bilong Jehova taim ol i kamapim olsem ol i laikim ol pikinini bilong ol?

¹⁷ Ol pikinini i mas kisim tu ol samting bilong tingting na bel. Baibel i tokim ol papamama olsem em i bikpela samting long lukautim ol pikinini long dispela samting. Olsem: Baibel i tokim ol yangpela meri long “laikim tru . . . ol pikinini bilong ol.” Taim ol yangpela mama i mekim olsem ol i bihainim gutpela tingting. (Taitus 2:⁠4) Tru tumas, ol i bihainim stretpela tingting taim ol i kamapim pasin laikim long pikinini bilong ol. Dispela i lainim pikinini long mekim pasin laikim na i save helpim em long olgeta taim bihain. Tasol sapos ol i no kamapim pasin laikim long pikinini, orait dispela em i longlong pasin. Dispela i kamapim bikpela pen na i makim olsem papamama i no bihainim pasin bilong Jehova, em i bin kamapim bikpela pasin laikim long yumi, maski yumi sinman.​—⁠Song 103:​8-14.

¹⁸ Jehova i save go pas long laikim ol pikinini bilong em hia long graun. Olsem 1 Jon 4:​19 i tok, “God i bin laikim yumi pastaim.” Yupela papa i mas bihainim pasin bilong Jehova na go pas long kamapim pasin laikim namel long yupela na ol pikinini bilong yupela. Baibel i tok ol papa i no ken mekim ol pikinini i kros, “nogut ol i pilim olsem ol i no inap mekim wanpela gutpela wok.” (Kolosi 3:21) Ol pikinini bai pilim olsem sapos papa o mama i mekim olsem ol i no laikim ol pikinini o ol i mekim olsem ol pikinini i samting nating. Ol papa husat i sem long kamapim olsem ol i laikim pikinini ol i mas tingim pasin bilong Jehova. Jehova i stap long heven na em i tok olsem em i amamas long Pikinini bilong em na Em i laikim em tru. (Matyu 3:17; 17:⁠5) Dispela i bin strongim tru Jisas! Olsem tasol, ol pikinini i kisim strong na strongpela bel taim ol papamama i kamapim olsem ol i laikim ol na i amamas long ol.

19. Bilong wanem em i bikpela samting long stretim ol pikinini? Ol papamama i mas wok long bihainim wanem pasin taim ol i stretim ol pikinini?

¹⁹ Tasol ol papamama i no kamapim tasol pasin laikim long ol pikinini long ol tok ol i mekim. Nambawan rot long kamapim pasin laikim em long ol samting yu mekim long narapela. Pasin bilong lukautim pikinini long skin na spirit i kamapim olsem papamama i laikim pikinini, na moa yet taim ol i mekim long pasin i soim olsem nambawan as na ol i mekim em pasin laikim. Na tu, narapela bikpela samting i kamapim pasin laikim bilong papamama em pasin bilong stretim pikinini. Tru tumas, “Bikpela i save stretim ol man em i laikim tumas.” (Hibru 12:⁠6) Tasol sapos papamama i no stretim pikinini, dispela i soim olsem ol i no laikim pikinini! (Sindaun 13:24) Long olgeta taim Jehova i save skelim stret strafe em i givim na em i ‘bihainim stretpela pasin tasol na i stretim yumi.’ (Jeremaia 46:28) I no isi long ol papamama, husat i no gutpela olgeta, long mekim olsem. Tasol em i gutpela sapos yu wok strong long mekim olsem. Pasin bilong strong long stretim pikinini long pasin laikim i save helpim em long amamas na mekim gutpela wok taim em i go bikpela. (Sindaun 22:⁠6) Olgeta papamama Kristen i laik bai ol pikinini bilong ol i ken kisim kain sindaun long bihain, a?

20. Ol papamama i ken mekim wanem bilong helpim gut ol pikinini bilong ol long makim rot i go long laip?

²⁰ Taim yupela papamama i mekim dispela bikpela wok Jehova i makim yupela long mekim​—⁠lukautim ol pikinini long skin, spirit, na bel⁠—​yupela bai kisim ol gutpela prais. Long dispela rot yupela i helpim gut ol pikinini long makim rot i go long laip na bihain ol i ken “stap gut.” (Lo 30:19) Ol pikinini husat i laik mekim wok bilong Jehova na bihainim rot bilong laip taim ol i wok long i go bikpela, ol i givim bikpela amamas tru long papamama bilong ol. (Song 127:​3-5) Kain amamas bai stap oltaim! Tasol olsem wanem ol yangpela i ken litimapim nem bilong Jehova long nau? Stadi i kamap bihain long dispela bai stori long dispela samting.

[Ol Futnot]

Bai Yu Bekim Olsem Wanem?

Ol papamama i ken mekim wanem bilong lukautim ol pikinini bilong ol long ol samting bilong

• skin?

• spirit?

• bel na tingting?

[Piksa long pes 18]

Planti pisin i wok strong tru long lukautim pikinini bilong ol

[Piksa long pes 20]

Pastaim ol papamama yet i mas kamap strong long samting bilong spirit

[Ol Piksa long pes 20, 21]

I gat kain kain taim na ples we papamama i ken skulim ol pikinini long Man Bilong Wokim olgeta samting

[Piksa long pes 22]

Ol pikinini i kisim strong na strongpela bel taim papamama i tokaut olsem ol i amamas long ol