Strongim Bel Long Rot Bilong Bilip na Wetim Jehova
“Bilip na wetim Bikpela i kam helpim yu. Sanap strong. . . . Bilip na wetim Bikpela i helpim yu.”—SONG 27:14.
1. Pasin bilong bilip na wet, olsem wanem em i bikpela samting? Long Baibel, dispela tok “bilip na wetim” i makim wanem samting?
PASIN bilong bilip na wet i mekim na yumi no lukluk tasol long ol hevi bilong nau, nogat; yumi sanap strong na amamas long lukluk i go long ol gutpela samting bai kamap bihain. Long Baibel, Jehova i bin tok promis long ol gutpela samting yumi ken bilip na wet long en. (2 Timoti 3:16) Dispela tok “bilip na wetim” i stap planti taim long Baibel, na i makim olsem man i bilip tru na i wetim gutpela samting i kamap.
2. Jisas i bilip na wet long Jehova na dispela i helpim em olsem wanem?
2 Taim ol hevi na traim i painim Jisas, em i bilip na wet long Jehova na lukluk i go long ol gutpela samting bai kamap bihain. “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai . . . , na nau em i sindaun long han sut bilong sia king bilong God.” (Hibru 12:2) Jisas i tingting long wok bilong mekim nem bilong Jehova i stap holi na kamapim klia olsem i stret Jehova i stap nambawan bos, na dispela i strongim em long bihainim tru tok bilong God, maski wanem hevi i painim em.
3. Pasin bilong ol wokboi bilong God long bilip na wet, dispela i helpim ol olsem wanem?
3 Tok bilong King Devit i soim olsem pasin bilong bilip na wet na pasin bilong sanap strong, o strongim bel, tupela i poroman wantaim. Em i tok: “Yu mas bilip na wetim Bikpela i kam helpim yu. Sanap strong. . . . Yu mas bilip na wetim Bikpela i helpim yu.” (Song 27:14) Sapos yumi laik kisim strongpela bel, orait samting yumi bilip na wet long en i mas stap klia tru long tingting bilong yumi na yumi mas pilim tru. Dispela bai helpim yumi long bihainim pasin bilong Jisas long sanap strong na givim bel long mekim dispela wok em i bin givim long ol disaipel. (Matyu 24:14; 28:19, 20) Baibel i bungim pasin bilong bilip na pasin laikim wantaim pasin bilong wet long gutpela samting i kamap, em pasin ol wokboi bilong Jehova i mas i gat.—1 Korin 13:13.
Pasin Bilong Bilip na Wet i “Pulap Tru” Long Yu?
4. Ol Kristen God i bin makim na “ol arapela sipsip” ol i wetim wanem samting?
4 Lain bilong God i wet long gutpela samting tru bai kamap bihain. Ol Kristen God i makim, ol i wet long mekim wok wantaim Krais long heven, na “ol arapela sipsip” i wet long God i ‘lusim ol long kalabus bilong bagarap na mekim ol i kamap fri bilong kisim glori bilong ol pikinini bilong God’ hia long graun. (Jon 10:16; Rom 8:19-21, King Jems Nupela Testamen; Filipai 3:20) Ol bai “kamap fri,” na lusim kalabus bilong sin na ol samting nogut sin i save kamapim. Jehova—Man Bilong Givim ‘ol presen i gutpela tru’—em bai mekim olsem long ol gutpela wokboi bilong em.—Jems 1:17; Aisaia 25:8.
5. Yumi mas mekim wanem na bai pasin bilong bilip na wet i ken “pulap tru” long yumi?
5 Samting yumi ol Kristen i bilip na wet long en, dispela i mas mekim wanem long yumi? Rom 15:13 i tok: “God i bin promis long givim yumi ol dispela gutpela samting yumi wet long kisim. Yupela i save bilip long em, na em i ken mekim bikpela amamas na bel isi i kamap na i pulap long yupela. Na long strong bilong Holi Spirit, pasin bilong wetim taim God bai i givim ol dispela gutpela samting long yumi, em i ken pulap tru long yupela.” Yes, pasin bilong bilip na wet inap mekim bel isi na amamas i pulap tru long yumi, na i stap bilong yumi i gat as bilong en, na yumi gat strongpela bel. Dispela pasin i save “pulap tru” long yumi taim yumi bilip long Tok Bilong God, em Baibel, na kisim holi spirit bilong Em. Rom 15:4 i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” Olsem na askim yu yet: ‘Mi save ritim Baibel long olgeta de na stadi long en na bai samting mi wet long en i ken stap klia tru long tingting bilong mi? Oltaim mi save beten askim God long givim holi spirit long mi?’—Luk 11:13.
6. Bilong samting yumi bilip na wet long en i ken stap klia tru long tingting bilong yumi, yumi mas was gut long wanem samting?
6 Jisas, Man i stap gutpela piksa bilong yumi, em i save kisim strong long Tok Bilong God. Taim yumi tingim gut pasin bilong em, dispela i strongim yumi na yumi ‘no les long sanap strong, na bel bilong yumi i no guria.’ (Hibru 12:3) Olsem na sapos ol gutpela samting God i tok promis long givim yumi i no stap klia moa long tingting bilong yumi o yumi kirap lukluk i go long ol arapela samting—olsem ol samting bilong skin o sampela mak bilong graun yumi laik winim—ating i no longtaim na bai yumi les long ol samting bilong spirit, na bihain bai yumi no gat strong moa long bihainim ol stretpela pasin. Long kain taim olsem, “bilip bilong [yumi inap] bagarap olgeta olsem sip i bruk long rip.” (1 Timoti 1:19) Tasol sapos samting yumi wet long en i stap klia tru long tingting bilong yumi, dispela bai strongim bilip bilong yumi.
Wetim Gutpela Samting i Kamap—Em Bikpela Samting Long Helpim Bilip
7. Olsem wanem pasin bilong wetim gutpela samting i kamap inap helpim pasin bilong bilip?
7 Baibel i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:1) Olsem na pasin bilong wetim gutpela samting i kamap em i wanpela bikpela samting bilong helpim bilip. Tingim Abraham. Em wantaim meri bilong em, Sara, ol i abrusim pinis taim bilong kamapim pikinini, tasol Jehova i tok promis olsem ol bai kamapim wanpela pikinini. (Stat 17:15-17) Abraham i mekim wanem? “Abraham i no save, olsem wanem God bai i mekim ol dispela samting em i bin promis long mekim, tasol em i bilip tru, olsem man i save pinis long ol samting bai i kamap.” (Rom 4:18) Dispela gutpela samting God i tok promis long givim long Abraham na em i wet long kisim, dispela i mekim na bilip bilong Abraham, olsem em bai kamapim wanpela pikinini, i gat as bilong en. Na dispela bilip i strongim pasin bilong em long wetim gutpela samting i kamap. Abraham na Sara i strongim bel na lusim ples na ol wanblut bilong ol, na ol i go sindaun long haus sel long wanpela kantri ol i no save long en, i go inap long taim ol i dai!
8. Olsem wanem pasin bilong stap strong long mekim yet wok bilong God i strongim pasin bilong bilip na wetim gutpela samting i kamap?
8 Abraham i bihainim olgeta tok bilong Jehova, maski sampela taim i hatwok long mekim, na long dispela rot samting em i bilip na wet long en i stap klia tru long tingting bilong em. (Stat 22:2, 12) Na olsem tasol, taim yumi bihainim tok bilong Jehova na stap strong long mekim wok bilong em, yumi ken bilip tru olsem yumi bai kisim gutpela prais. Pol i tok, sapos yumi ‘stap strong na sakim ol traim,’ God bai orait long yumi na yumi ken wetim em i helpim yumi, na “yumi no save wet nating.” (Rom 5:4, 5) Long dispela as Pol i mekim dispela tok tu: “Mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi.” (Hibru 6:11) Yumi pas gut wantaim Jehova na wet long gutpela samting i kamap, na maski wanem hevi i painim yumi, bai yumi amamas na sanap strong.
‘Amamas Long Wetim God i Mekim Gut Long Yu’
9. Oltaim yumi mas mekim wanem bilong helpim yumi long ‘amamas long wetim Bikpela i mekim gut long yumi’?
9 Samting God i tok promis long givim yumi em i winim tru ol samting ol man bilong dispela graun i tok promis long mekim. Song 37:34 i tok: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.” Yes, i gat as tru na yumi ken amamas long ‘wetim Bikpela i mekim gut long yumi.’ (Rom 12:12) Tasol bilong mekim olsem, oltaim yumi mas tingim dispela gutpela samting yumi wet long en. Olsem wanem? Oltaim yu save tingim tingim ol gutpela samting God i bin tok promis long givim yu? Yu inap piksaim yu yet long Paradais—yu gat gutpela helt, yu stap namel long ol man yu laikim tumas, yu belgut long mekim gutpela wok, na yu no gat ol wari? Yu save skelim long bel ol piksa bilong Paradais yu lukim long ol buk bilong yumi? Taim yumi mekim olsem, i olsem yumi klinim glas long wanpela windo na bai yumi inap lukim ol gutpela diwai samting. Sapos yumi no klinim glas, i no longtaim na bai glas i doti na yumi no inap lukim gut moa ol dispela gutpela samting. Ating ol narapela samting bai pulim ai bilong yumi. Yumi no ken larim dispela samting i kamap!
10. Olsem wanem pasin bilong tingting long gutpela prais i soim olsem yumi pas gut wantaim Jehova?
10 Namba wan as na yumi mekim wok bilong Jehova, em yumi laikim em tru. (Mak 12:30) Tasol yumi mas tingting tu long gutpela prais God i laik givim yumi. Jehova i laik bai yumi mekim olsem! Hibru 11:6 i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” Bilong wanem Jehova i laik bai yumi tingim em olsem Man Bilong Givim Prais? Long wanem, taim yumi mekim olsem, yumi soim klia olsem yumi save gut long Papa bilong yumi long heven. Em i save amamas long givim ol samting, na em i laikim tru ol pikinini bilong em. Sapos yumi no gat gutpela samting bilong ‘wetim i kamap,’ yumi inap les kwik na yumi no amamas.—Jeremaia 29:11.
11. Gutpela samting God i tok promis long givim Moses, olsem wanem dispela i helpim em long wokim ol gutpela disisen?
11 Wanpela man husat i bin lukluk i go stret long ol samting God i tok promis long givim em, em Moses. Em i “pikinini bilong pikinini meri bilong king bilong Isip,” olsem na em i gat bikpela namba na strong na em inap mekim wok long olgeta mani samting bilong Isip. Olsem wanem? Em bai wok long kisim ol dispela samting, o em bai mekim wok bilong Jehova? Moses i strongim bel na mekim wok bilong Jehova. Bilong wanem? Long wanem, em i “ting long dispela gutpela pe God i laik givim em.” (Hibru 11:24-26) Long tingting bilong Moses, dispela gutpela pe Jehova i laik givim long em, em i bikpela samting.
12. Bilong wanem pasin bilong bilip na wet i kain olsem wanpela hat kapa?
12 Aposel Pol i tok pasin bilong bilip na wet i kain olsem wanpela hat kapa. Long tok piksa, hat kapa bilong yumi i save lukautim gut tingting, na dispela i helpim yumi long wokim ol gutpela disisen, na skelim wanem ol samting i mas i stap nambawan, na stap gut long God. (1 Tesalonaika 5:8) Olsem wanem? Olgeta taim yu kisim dispela pasin bilong bilip na wet na putim olsem hat kapa? Sapos olsem, orait olsem Moses na Pol, bai yu ‘no bilip long ol kain samting i save bagarap kwik, nogat, bai yu bilip tru long God, em God i save givim yumi planti gutpela samting bilong mekim yumi amamas.’ Tru, bilong sakim pasin bilong inapim laik bilong yumi yet, em planti man bilong dispela graun i save bihainim, yumi mas strongim bel, tasol sapos yumi mekim olsem, yumi bai kisim gutpela pe! I no gat narapela samting i winim “dispela laip em i laip tru,” em ol man i bilip na wet long Jehova na laikim em tru ol inap kisim.—1 Timoti 6:17, 19.
“Bai Mi No Lusim Yu”
13. Jehova i givim wanem tok promis long ol gutpela wokboi bilong em?
13 Ol man i bilip long mani samting bilong dispela graun ol i save tingting planti taim ol i lukim ol hevi i wok long i go bikpela. (Matyu 24:8) Tasol ol man i bilip na wet long Jehova ol i no save pret na tingting planti. “Bai ol i stap gut. Na bai ol i no gat hevi na bai ol i no pret, long wanem, ol i save, samting nogut i no inap kamap long ol.” (Sindaun 1:33) Ol i no bilip long mani samting bilong dispela graun, olsem na ol i amamas long bihainim tok bilong Pol, olsem: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ”—Hibru 13:5.
14. Bilong wanem ol Kristen i no ken tingting planti long ol samting bilong skin ol i mas kisim?
14 Dispela promis i kamapim klia olsem God bai lukautim yumi. Jisas tu i tok God bai lukautim yumi. Em i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu [ol samting bilong skin yumi mas kisim] long yupela. Olsem na yupela i no ken tingting tumas long tumora. De tumora em i ken tingting long samting bilong em yet. Hevi bilong wanpela de em inap long dispela de tasol.” (Matyu 6:33, 34, Nupela Testamen na Ol Sam) Jehova i save olsem i hatwok long yumi givim bel long Kingdom bilong em na long wankain taim lukautim yumi yet long ol samting bilong skin. Olsem na yumi mas bilip strong olsem God inap givim yumi olgeta samting yumi mas i gat na em i laik mekim olsem.—Matyu 6:25-32; 11:28-30.
15. Ol Kristen i save mekim wanem na bai ‘ai bilong ol i gutpela’?
15 Taim “ai bilong [yumi] i gutpela,” dispela i soim olsem yumi bilip strong long Jehova. (Matyu 6:22, 23) Na i soim tu olsem yumi gat gutpela bel na yumi no mangal o tingting long kisim biknem. I no olsem yumi mas i stap rabis o slek long lukautim yumi yet long ol samting bilong skin, nogat. Taim ai bilong yumi i gutpela, yumi save “bosim gut laip bilong yumi” na putim wok bilong Jehova i stap namba wan.—2 Timoti 1:7.
16. Bilong wanem yumi mas i gat bilip na strongpela bel na bai ai bilong yumi i ken stap gutpela?
16 Bilong ai bilong yumi i ken stap gutpela, yumi mas i gat bilip na strongpela bel. Olsem: Sapos olgeta taim bos i tokim yu long wok long taim bilong ol miting Kristen, bai yu strongim bel na putim wok bilong God i stap namba wan? Sapos wanpela man i no bilip tumas olsem Jehova bai inapim promis bilong Em long lukautim ol wokboi bilong Em, ating Satan bai kirap na putim sampela hevi moa long em na bihain em i lusim ol miting olgeta. Yes, sapos bilip bilong yumi i no strong, dispela inap opim rot long Satan long bosim yumi na makim ol samting yumi putim i go pas long ol narapela samting, na i no Jehova. Sori tru sapos dispela samting i kamap!—2 Korin 13:5.
“Bilip na Wetim Bikpela”
17. Ol man i bilip strong long Jehova, olsem wanem ol i kisim gutpela blesing long nau tu?
17 Planti tok long Baibel i soim olsem ol man i bilip na wet long Jehova, ol i no save lus long kisim ol samting ol i mas i gat, nogat. (Sindaun 3:5, 6; Jeremaia 17:7) Tru, sampela taim ol i no gat planti samting bilong skin, tasol dispela i olsem liklik samting tasol taim ol i skelim wantaim ol gutpela blesing ol i wet long en. Long dispela rot ol i soim olsem ol i “bilip” na wet long Jehova na ol i bilip strong olsem em bai givim ol samting ol i laikim tru. (Song 37:4, 34) Olsem na ol i save stap amamas tru long nau tu. “Ol stretpela man i wet long Bikpela i givim gutpela taim long ol na bai ol i lukim na ol i amamas. Tasol ol man nogut i wet nating. Ol i no inap lukim gutpela taim.”—Sindaun 10:28.
18, 19. (a) Jehova i mekim wanem gutpela tok promis long yumi? (b) Yumi mas mekim wanem na bai Jehova i ken stap long “han sut” bilong yumi?
18 Taim wanpela liklik mangi i holim han bilong papa na wokabaut i go, em i no save pret, em i pilim seif. Na i wankain tu taim yumi wokabaut wantaim Papa bilong yumi long heven. Jehova i tokim lain Israel: “Yupela i no ken pret, long wanem, mi God bilong yupela na mi stap wantaim yupela. . . . Bai mi helpim yupela. . . . Mi God, Bikpela bilong yupela. Mi save sambai long yupela [“holim han sut bilong yupela,” NW ] na mi tokim yupela olsem, yupela i no ken pret. Bai mi helpim yupela.”—Aisaia 41:10, 13.
19 Jehova i holim han bilong yumi—dispela em i gutpela tok piksa! Devit i tok: “Oltaim mi save pilim Bikpela i stap klostu long mi. Em i stap klostu [“long han sut bilong mi,” NW ] na i givim strong long mi, olsem na i no gat wanpela samting i ken mekim mi i pret na guria.” (Song 16:8) Yumi mas mekim wanem na bai Jehova i ken stap long “han sut” bilong yumi? I gat tupela rot. Namba wan, yumi mas larim Tok bilong em i stiaim yumi long olgeta samting yumi mekim, na namba tu, yumi mas lukluk i go long gutpela prais Jehova i tok pinis long givim long yumi. Asap, man bilong raitim song, i tok: “Mi stap wantaim yu oltaim na yu save holim han bilong mi. Yu save givim mi gutpela tok bilong stiaim wokabaut bilong mi.” (Song 73:23, 24) Jehova i tok promis long stap wantaim yumi, olsem na yumi no pret long ol samting i laik kamap long bihain.
“Taim Bilong God i Kisim Bek Yupela Em i Kam Klostu Pinis”
20, 21. Wanem samting i wetim ol man i bilip na wet long Jehova?
20 Taim i sot pinis, olsem na em i bikpela samting long Jehova i mas stap long han sut bilong yumi. Klostu nau, lotu giaman bai bagarap, na kirap long dispela taim, bikpela hevi tru bai painim dispela graun bilong Satan. Kain hevi olsem i no bin kamap bipo. (Matyu 24:21) Ol man i no bilip long God ol bai pret nogut tru. Tasol long kain taim olsem, ol wokboi bilong Jehova em ol i gat strongpela bel, ol bai amamas na wet long gutpela samting i kamap! Jisas i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.”—Luk 21:28.
21 Olsem na yumi mas amamas long ol gutpela samting God i bin tok promis long givim long yumi na yumi no ken larim Satan i giamanim o pulim yumi. Long wankain taim, yumi mas wok strong long kisim pasin bilong bilip, pasin laikim, na pasin bilong pret long God. Taim yumi mekim olsem, yumi bai sanap strong na bihainim tru tok bilong Jehova na sakim Satan, maski wanem hevi i painim yumi. (Jems 4:7, 8) Yes, “yupela olgeta manmeri i bilip long Bikpela, yupela sanap strong, na bel bilong yupela i ken kisim strong oltaim.”—Song 31:24.
Yu Inap Bekim?
• Samting Jisas i bilip na wet long en, olsem wanem dispela i strongim bel bilong em?
• Olsem wanem pasin bilong bilip i poroman wantaim pasin bilong wet long gutpela samting i kamap?
• Olsem wanem pasin bilong bilip na pasin bilong wet long gutpela samting i kamap inap strongim Kristen long makim ol samting i mas i stap namba wan long laip bilong em?
• Bilong wanem ol man i “bilip na wetim” Jehova i no ken pret long ol samting i laik kamap long bihain?
[Piksa long pes 28]
Maski yu yangpela o lapun, yu inap piksaim yu yet long Paradais?