“Bihainim Mi”
“Krais . . . i soim yupela pinis dispela pasin bilong em, bai yupela i ken bihainim.”—1 PITA 2:21.
1, 2. Olsem wanem na gutpela pasin bilong Jisas long mekim wok tisa em i no antap tumas bilong yumi ken bihainim?
JISAS KRAIS em i nambawan Tisa tru i bin stap long graun. Na tu, em i gutpela olgeta—i no gat wanpela taim em i bin mekim sin. (1 Pita 2:22) Tasol yu ting dispela i makim olsem pasin bilong Jisas olsem tisa em i antap tumas bilong yumi olgeta man bilong sin i ken bihainim? Nogat, i no olsem.
2 Olsem yumi lukim long stori i kamap paslain long dispela, pasin bilong laikim ol narapela em as bilong wok tisa bilong Jisas. Na pasin bilong laikim ol narapela em samting yumi olgeta inap kisim. Planti taim Baibel i kirapim yumi long mekim dispela pasin i kamap strong moa. (Filipai 1:9; Kolosi 3:14) Jehova i no save tokim yumi long mekim ol samting yumi no inap mekim. Na tingim: ‘God i as bilong pasin bilong laikim ol arapela,’ na em i bin wokim yumi i kain olsem em yet, olsem na yumi ken tok em i wokim yumi bilong laikim ol arapela. (1 Jon 4:8; Stat 1:27) Olsem na taim yumi ritim tok bilong aposel Pita long as skripsa bilong dispela stori, yumi ken ting olsem yumi inap bihainim. Em nau, yumi inap bihainim pasin bilong Krais. Yes, yumi inap bihainim dispela tok Jisas yet i mekim: “Bihainim mi.” (Luk 9:23) Orait nau bai yumi stori long olsem wanem yumi inap bihainim pasin bilong Krais, long laikim tru ol tok i tru em i bin skulim ol man long en, na long laikim tru ol man em i bin skulim.
Kisim Pasin Bilong Laikim Ol Tok i Tru Yumi Kisim Save Long En
3. I gat wanem as na sampela i hatwok long stadi? Sindaun 2:1-5 i kirapim yumi long mekim wanem?
3 Bilong laikim ol tok i tru yumi skulim ol man long en, yumi yet i mas amamas long lain na kisim save long ol dispela tok i tru. Long nau, pasin bilong amamas long lain na kisim save em i hatwok liklik long kisim. Planti man ol i nolaik tru long stadi, long wanem, taim ol i yangpela, ol i no bin skul gut na ol i no bin lain long pasin bilong stadi. Tasol i bikpela samting tru long yumi kisim skul long Jehova. Sindaun 2:1-5 i tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save. . . . Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.”
4. Dispela tok “wok strong” i makim wanem samting? Wanem kain tingting bai helpim yumi long mekim olsem?
4 Long ves 1 i go 4, yumi lukim planti tok i tokim yumi long wok strong long “harim” na “putim gut” na ‘wok long painim.’ Tasol wanem samting bai kirapim yumi long mekim ol dispela samting? Orait lukim dispela tok, “wok strong long kisim gutpela save.” Dispela tok i makim olsem bel bilong yumi i mas i gat bikpela laik tru long kisim tok bilong God. Orait wanem samting inap kirapim yumi na bai yumi gat bikpela laik tru long lain na kisim save long ol tok Jehova i skulim yumi long en? Yumi mas kisim dispela kain tingting: Yumi mas tingim ‘save bilong God’ i kain olsem “silva” na “mani samting ol i bin haitim.”
5, 6. (a) Insait long ol yia i kam i go pinis, wanem samting inap kamap? Yumi ken mekim wanem na bai dispela samting i no ken kamap? (b) I gat wanem as na yumi mas wok long kisim sampela save moa na bungim wantaim ol save yumi painim pinis long Baibel?
5 I no hatwok long kisim dispela kain tingting. Olsem: Insait long dispela ‘save bilong God’ yu bin kisim, i gat dispela tok i tru: Jehova i laik bai ol gutpela man i ken stap oltaim long Paradais long graun. (Song 37:28, 29) Taim yu bin lainim dispela tok i tru long pastaim, ating yu tingim dispela tok i tru i olsem wanpela gutpela samting tru olsem silva samting, na dispela i kamapim bikpela amamas long tingting na bel bilong yu na yu gat gutpela samting bilong wetim i kamap. Orait olsem wanem long nau? Insait long ol yia i kam i go pinis, pasin bilong yu long tingim tok i tru em i gutpela samting tru, dispela i no strong olsem bipo? Sapos olsem, orait traim long mekim 2-pela samting. Namba wan samting, oltaim tingim gen i gat wanem as na yu pilim tru olgeta wan wan tok i tru Jehova i bin lainim yu long en, na ol tok i tru yu bin lainim planti yia i go pinis tu.
6 Namba tu samting, wok long kisim sampela gutpela tok i tru moa na bungim wantaim ol tok i tru yu kisim pinis. Tingim: Sapos yu digim graun na yu painim wanpela gutpela ston i gat bikpela pe, bai yu amamas na putim long poket na em tasol? O bai yu digim graun moa na bai yu ken save i gat sampela moa i stap o nogat. Long Baibel i gat planti gutpela tok i tru i kain olsem ol gutpela ston na silva samting. Maski hamas yu painim pinis, i gat sampela moa i stap bilong yu ken painim. (Rom 11:33) Taim yu painim wanpela gutpela tok i tru, askim yu yet: ‘Wanem samting i mekim na em i wanpela gutpela samting tru? Em i helpim mi long save gut moa long pasin bilong Jehova na long ol samting em i tingting pinis long mekim? Em inap helpim mi gut long bihainim pasin bilong Jisas?’ Pasin bilong tingim tingim ol kain askim olsem bai helpim yu long kisim pasin bilong laikim ol tok i tru Jehova i bin skulim yu long en.
Kamapim Klia Yumi Laikim Ol Tok i Tru Yumi Skulim Ol Man Long En
7, 8. Wanem sampela samting yumi ken mekim bilong soim ol man olsem yumi laikim tru ol tok i tru yumi bin lainim long Baibel? Stori long dispela.
7 Taim yumi skulim ol man, olsem wanem yumi ken kamapim klia yumi laikim ol tok i tru bilong Baibel yumi bin kisim save long en? Olsem Jisas i bin mekim, yumi save mekim bikpela wok long Baibel taim yumi autim tok na skulim ol man. Long nau, ol manmeri bilong God long olgeta hap graun i bin kisim tok i laik kirapim ol long mekim bikpela wok moa long Baibel long taim ol i autim tok. Taim yu mekim olsem, wok long painim rot bilong helpim man bilong haus long save olsem ol tok bilong Baibel yu kamapim em i bikpela samting long yu.—Matyu 13:52.
8 Olsem: Bihain long bagarap ol teroris i kamapim long New York Siti long yia i go pinis, wanpela sista Kristen i kamapim Song 46:1, 11 long ol man em i bungim. Pastaim em i askim ol, ol i hatwok long karim dispela hevi o olsem wanem. Em i putim yau gut long bekim bilong ol, na nau em i tok: “Mi laik ritim wanpela skripsa i bin mekim gut bel bilong mi long dispela taim nogut.” I no planti man i sakim em—planti ol i putim yau na em i toktok gut wantaim ol. Taim em i toktok wantaim ol yangpela, dispela sista i save tok: “Inap 50 yia pinis mi bin skulim ol man long Baibel, na i no gat wanpela hevi mi save long en em dispela buk i no inap helpim man long stretim.” Taim yumi amamas long kamapim ol tok, yumi soim ol man olsem yumi laikim tru ol tok yumi bin lainim long Baibel na yumi tingim ol dispela tok i bikpela samting tru.—Song 119:97, 105.
9, 10. Bilong wanem i bikpela samting long mekim wok long Baibel taim yumi bekim ol askim ol man i kamapim long ol bilip bilong yumi?
9 Taim ol man i kamapim ol askim long ol bilip bilong yumi, orait nau yumi gat rot long kamapim klia olsem yumi laikim tru Tok Bilong God. Olsem Jisas yet i bin mekim, taim yumi bekim ol askim, yumi no save kamapim tingting bilong yumi yet. (Sindaun 3:5, 6) Taim yumi bekim tok, yumi save mekim wok long Baibel. Olsem wanem? Yu pret olsem wanpela man bai givim askim long yu em yu no inap long bekim? Orait tingim tupela gutpela samting yu ken mekim.
10 Wok strong long redi gut. Aposel Pita i tok: “Sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol. Tasol yupela i mas bekim tok bilong ol long tok isi na long gutpela pasin.” (1 Pita 3:15, 16) Olsem wanem? Yu redi long kamapim ol tok bilong helpim ol bilip bilong yu? Olsem: Sapos wanpela man i laik save long as na yu no insait long wanpela pasin i no stret wantaim tok bilong Baibel, orait no ken tok, “Lotu bilong mi i tambuim.” Dispela kain bekim inap makim olsem yu larim ol narapela i tokim yu long ol samting yu mas mekim na yu insait long wanpela liklik lain lotu i bihainim wanpela man. Mobeta yu tok, “Tok Bilong God, em Baibel, i tambuim dispela samting” o, “Em samting God bilong mi i nolaik tru long en.” Orait nau yu ken tokaut gut long i gat wanem as na yu tok olsem.—Rom 12:1.
11. Wanem tul inap helpim yumi long redi long bekim ol askim bilong ol tok i tru bilong Baibel?
11 Sapos yu pilim olsem yu no inap bekim ol askim, orait lusim sampela hap taim long lukim buk Toktok Gut Wantaim Ol Man Long Baibel.a Lukim sampela tok yu ting ol man bai kamapim, na putim sampela bikpela tok bilong Baibel long tingting bilong yu. Putim buk Toktok Gut na Baibel i stap klostu. No ken surik long mekim wok long dispela tupela buk. Taim man i gat askim, tokim em yu holim wanpela gutpela tul bilong helpim yu long painim bekim long ol askim bilong Baibel.
12. Sapos yumi no save long bekim bilong wanpela askim bilong Baibel, orait yumi ken tok wanem?
12 No ken tingting planti tumas. I no gat wanpela man bilong graun i save long bekim bilong olgeta askim. Olsem na taim man i kamapim wanpela askim bilong Baibel yu no inap bekim, yu ken tok: “Tenkyu long kamapim dispela gutpela askim. Tasol sori tru, mi no save long bekim bilong en, tasol mi save Baibel inap helpim yumi long kisim save long dispela samting. Mi save amamas tru long lukim Baibel bilong painim save, olsem na bai mi skelim dispela askim na kam bek wantaim bekim bilong en.” Sapos yu tokaut stret olsem, na mekim long pasin daun, ating rot bai op long yu ken kam bek na toktok moa wantaim dispela man.—Sindaun 11:2.
Laikim Tru Ol Man Yumi Skulim
13. I gat wanem as na yumi mas holimpas gutpela tingting long ol man yumi autim tok long ol?
13 Jisas i laikim tru ol man em i skulim. Olsem wanem yumi ken bihainim em long dispela samting? Yu no ken kisim pasin olsem yumi no sori long ol man. Tru, “pait [bilong] dispela bikpela de bilong God I Gat Olgeta Strong” i kam klostu tru, na planti manmeri bai kisim bagarap. (KTH 16:14; Jeremaia 25:33) Tasol yumi no save husat bai stap laip na husat bai dai. Taim bilong skelim ol manmeri long kot i no yet, na em wok bilong dispela man Jehova i bin makim, Jisas Krais. I go inap long taim Jisas i skelim pinis ol man, yumi mas tingim olgeta wan wan man olsem ol inap kamap wokboi bilong Jehova.—Matyu 19:24-26; 25:31-33; Aposel 17:31.
14. (a) Yumi ken mekim wanem bilong skelim yumi yet olsem yumi sori long ol man na pilim tru hevi bilong ol o nogat? (b) Wanem sampela samting yumi ken mekim bilong soim olsem yumi tingim ol man?
14 Olsem Jisas, yumi wok long pilim hevi bilong ol man. Yumi ken askim yumi yet: ‘Mi pilim tru hevi bilong ol man em ol lain bilong lotu na politik na bikpela bisnis i bin giamanim ol? Sapos ol i no gat bikpela laik long harim tok yumi laik autim long ol, mi wok long save long as na ol i pilim olsem? Mi luksave olsem mi—o sampela moa em ol i stap gut long wok bilong Jehova long nau—i bin i gat dispela kain tingting long bipo? Dispela i mekim na mi senisim pasin bilong mi long autim tok long ol? O mi ting olsem ol dispela man i no inap senis?’ (KTH 12:9) Taim ol man i pilim olsem yumi sori long ol, ating bai ol i gat laik moa long putim yau. (1 Pita 3:8) Sapos yumi pilim hevi bilong ol man, dispela inap kirapim yumi long tingim moa yet ol man yumi bungim long wok autim tok. Yumi ken tingim ol askim na ol hevi bilong ol. Taim yumi go bek lukim ol, yumi ken tokim ol yumi bin tingim ol dispela tok ol i bin kamapim. Na sapos ol i mas i gat helpim bilong mekim wanpela samting long nau stret, na yumi ting yumi inap helpim ol, orait yumi ken tokim ol olsem.
15. I gat wanem as na yumi mas wok long painim ol gutpela pasin long ol man? Yumi ken mekim olsem wanem?
15 Olsem Jisas, yumi wok long painim ol gutpela pasin long ol man. Ating wanpela mama singel i wok strong long mekim bikpela long ol pikinini bilong em. Ating wanpela man i hatwok long lukautim famili bilong em long ol samting bilong skin. Ating wanpela lapun i soim olsem em i gat laik long kisim save long God. Olsem wanem? Yumi lukim ol dispela samting long ol man yumi bungim na tok amamas long ol? Taim yumi mekim olsem, yumi kamapim ol samting yumi stap wanbel long en na dispela inap opim rot long yumi autim tok long ol long Kingdom.—Aposel 26:2, 3.
Pasin Daun i Bikpela Samting
16. Taim yumi autim tok long ol man, bilong wanem yumi mas tok isi na mekim gutpela pasin long ol?
16 Sapos yumi laikim tru ol man yumi skulim, dispela bai kirapim yumi long bihainim dispela tok: “Save nating em i save kirapim pasin bilong bikhet. Tasol pasin bilong givim bel bilong yumi long ol arapela man, dispela i save mekim yumi i kamap strongpela Kristen.” (1 Korin 8:1) Jisas i gat bikpela save tru, tasol em i no mekim pasin antap. Olsem na taim yu autim bilip bilong yu, no ken mekim long pasin olsem yu tok pait o yu antap long ol, winim ol, nogat. Yumi gat laik long putim tok i go daun long bel bilong ol man na kirapim ol long amamas long ol tok i tru yumi laikim tumas. (Kolosi 4:6) Tingim, taim Pita i tokim ol Kristen long ol i mas redi long sambai long bilip bilong ol, em i tok ol i mas mekim “long tok isi na long gutpela pasin.” (1 Pita 3:16) Sapos yumi tok isi na mekim gutpela pasin long ol man, ating bai ol i redi moa long kam long dispela God yumi lotuim.
17, 18. (a) Yumi mas i gat wanem tingting taim ol man i tok yumi no winim mak bilong mekim wok autim tok? (b) Bilong wanem i no olsem ol sumatin bilong Baibel i mas i gat save long ol tok ples bilong bipo ol i bin raitim Baibel long en?
17 Yumi no gat wok long kamapim save bilong yumi bambai ol man i ken givim biknem long yumi, nogat. Sapos sampela long teritori i no laik putim yau long tok bilong ol man i no gat yunivesiti digri o bikpela nem samting, no ken larim dispela i daunim yu. Jisas i no tingim ol tok ol man i sutim long em olsem em i no bin i go long ol bikpela skul bilong ol tisa bilong lotu Juda, na em i no larim dispela tingting bilong ol i kirapim em long kamapim bikpela save bilong em na bai ol man i ken givim biknem long em.—Jon 7:15.
18 Pasin daun na pasin sori em i bikpela samting long ol wokman Kristen bilong God, winim skul bilong graun. Nambawan Tisa, Jehova, em inapim yumi long mekim wok autim tok. (2 Korin 3:5, 6) Na maski ol pris pasto bilong Kristendom i tok wanem, i no olsem yumi mas lain long ol tok ples ol i bin raitim Baibel long en bambai yumi inap kamap tisa bilong Tok Bilong God, nogat. Jehova i kirapim ol man long raitim Baibel long ol tok i klia tru, bambai olgeta man inap kisim gut ol gutpela tok i tru i stap long en. Ol dispela tok i tru i no save senis liklik, maski ol i tanim i go long planti handet tok ples. Olsem na tru, pasin bilong save long ol dispela tok ples bilong bipo inap helpim man sampela taim, tasol i no olsem man i mas i gat save long ol dispela tok ples, nogat. Na tu, sapos man i hambak long em i save gut long ol tok ples, dispela inap mekim na em i lusim wanpela gutpela pasin ol trupela Kristen i mas i gat—em pasin bilong larim man i skulim em.—1 Timoti 6:4.
19. Olsem wanem wok Kristen bilong yumi long autim tok em i wanpela wok bilong helpim ol man?
19 Tru tumas, bilong mekim wok Kristen bilong yumi long autim tok, yumi mas i gat pasin daun. Planti taim ol dispela kain samting inap kamap—ol man i kros, o ol i no laik harim tok, o ol i mekim nogut long yumi. (Jon 15:20) Tasol taim yumi mekim dispela wok autim tok, yumi save mekim wanpela bikpela wok bilong helpim man. Sapos yumi wok yet long mekim pasin daun na helpim ol man long rot bilong dispela wok, orait yumi bihainim pasin bilong Jisas Krais long laikim tru ol man. Tingim: Sapos yumi mas autim tok long 1,000 manmeri i kros o i no laik harim tok bambai yumi inap painim wanpela man i gat pasin kain olsem sipsip, ating bai yumi amamas long mekim, a? Olsem na taim yumi mekim dispela wok i go i go, na yumi no givap, yumi save mekim wok bilong helpim ol man i kain olsem sipsip em yumi no painim yet. Jehova na Jisas bai wokim rot na bai yumi inap painim na helpim planti manmeri moa taim pinis i no kamap yet.—Hagai 2:7.
20. Wanem sampela samting yumi ken mekim na bai long pasin bilong yumi, yumi ken skulim ol man?
20 Long pasin bilong yumi, yumi inap skulim ol man, na dispela tu i soim olsem yumi amamas long helpim ol man. Olsem: Yumi laik skulim ol man olsem pasin bilong mekim wok bilong Jehova, God bilong “amamas,” em i nambawan gutpela wok tru yumi inap mekim, winim ol narapela wok. (1 Timoti 1:11) Olsem wanem? Taim ol i lukim pasin bilong yumi yet na ol samting yumi mekim long ol wanskul, na ol wanwok, na ol man i sindaun klostu long yumi, ol inap lukim olsem yumi stap amamas na bel gut? Na tu, yumi skulim ol Baibel-stadi olsem kongrigesen Kristen i stap olsem wanpela gutpela ples i gat pasin sori long en, namel long ol lain bilong dispela graun i kros pait na i no gat pasin sori. Olsem wanem? Ol Baibel-stadi bilong yumi inap lukim olsem yumi laikim tru olgeta man insait long kongrigesen na yumi wok strong long stap wanbel wantaim ol?—1 Pita 4:8.
21, 22. (a) Sapos yumi skelim yumi yet long ol samting bilong wok autim tok, dispela inap opim rot long yumi mekim wanem? (b) Wastaua i kamap bihain bai toktok long wanem samting?
21 Pasin bilong givim bel long mekim wok autim tok, dispela inap kirapim yumi long skelim gen ol samting yumi mekim. Planti i bin mekim olsem na ol i luksave ol inap mekim bikpela wok moa, olsem mekim wok bilong God fultaim o go mekim wok long hap i sot long man bilong autim tok. Sampela i bin tingting long lainim wanpela tok ples na bai ol inap helpim ol man bilong narapela kantri ol i bin kam sindaun long hap bilong ol. Sapos kain rot olsem i op long yu, orait skelim gut na beten long dispela samting. Sapos yumi mekim wok bilong God long laip olgeta bilong yumi, dispela bai kamapim bikpela amamas na bel isi na yumi stap belgut.—Saveman 5:12.
22 Olsem na long kain kain rot, yumi mas wok long bihainim pasin bilong Jisas Krais na kisim pasin bilong laikim tru ol tok i tru yumi skulim ol man long en na laikim tru ol man yumi skulim. Sapos yumi kisim dispela pasin na kamapim, dispela bai helpim yumi long kamap gutpela tisa kain olsem Krais. Tasol olsem wanem yumi inap mekim olsem? Wastaua i kamap bihain bai stori long sampela pasin bilong skulim ol man em Jisas yet i bin mekim wok long en.
[Futnot]
a Ol Witnes Bilong Jehova i wokim.
Bai Yu Bekim Olsem Wanem?
• Olsem wanem yumi ken bilip, pasin bilong Jisas olsem tisa em i no antap tumas long yumi ken bihainim?
• Yumi ken mekim wanem bilong soim olsem yumi laikim tru ol tok i tru em yumi bin kisim save long en long Baibel?
• Bilong wanem i bikpela samting long yumi bihainim pasin daun taim yumi wok long kisim sampela save moa?
• Wanem sampela samting yumi ken mekim bilong soim olsem yumi laikim tru ol man yumi skulim?
[Ol Piksa long pes 16]
Wok strong long redi gut
[Ol Piksa long pes 16, 17]
Sapos yu tingim ‘save bilong God’ em i bikpela samting, orait yu inap mekim gut wok long Baibel
[Piksa long pes 18]
Yumi soim olsem yumi laikim tru ol man taim yumi autim gutnius long ol