Kisim Gutpela Bel Jehova i Laikim
“God, yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.”—SONG 51:10.
1, 2. I gat wanem as na yumi mas tingim bel bilong yumi?
EM I longpela bun na em i luk naispela. Olsem na taim profet Samuel i lukim dispela namba wan pikinini bilong Jesi, em i ting em dispela man tasol God i bin makim bilong kamap king bihain long Sol. Tasol Jehova i tok: “Yu no ken ting long [dispela pikinini] i longpela bun o long em i luk naispela na bai mi makim em. Nogat. Mi no laik bai dispela man i kamap king. . . . Ol man i save lukluk long bodi. Tasol mi save lukim tingting na laik bilong man na mi skelim ol.” Jehova i makim laspela pikinini bilong Jesi, em Devit—em i “wanpela gutpela man i save bihainim pasin Bikpela i laikim.”—1 Samuel 13:14; 16:7.
2 God inap lukim bel bilong man. Em i kamapim klia dispela samting, olsem: “Mi Bikpela, mi save glasim tingting na bel bilong olgeta man. Na mi save skelim pasin bilong olgeta wan wan man, na mi bekim pe long ol inap long pasin ol i bin mekim.” (Jeremaia 17:10) Em nau, Jehova i save “traim [olsem skelim] bel bilong yumi.” (Sindaun 17:3) Tasol wanem dispela bel Jehova i skelim? Na yumi ken mekim wanem bilong kisim gutpela bel em i laikim?
Pasin Tru i Stap “Insait” Long Bel
3, 4. Long Baibel, planti taim “bel” i makim wanem samting? Stori long sampela tok bilong Baibel olsem.
3 Dispela tok “bel” i stap olsem 1,000 taim long Baibel. Planti taim Baibel i tok piksa long bel. Jehova i tokim profet Moses: “Tokim ol Israel long kisim ol samting na givim long mi.” Na ol man dispela ‘tok i sutim bel bilong ol, ol i kam’ na givim samting. (Kisim Bek 25:2; 35:21) Olsem na bel i makim samting i save kirapim yumi long mekim ol samting. Bel i makim tu ol laik bilong yumi na ol samting yumi pilim long bel. Bel inap kirapim yumi long kros, pret, bel sori, amamas. (Song 27:3; 39:3; Jon 16:22; Rom 9:2) Na em inap kirapim yumi long hambak o daunim yumi yet, o laikim narapela o birua long em.—Sindaun 16:5; Matyu 11:29; 1 Pita 1:22.
4 Olsem na planti taim “bel” i makim samting i kirapim yumi long mekim ol samting, na i makim ol samting yumi pilim long bel, tasol “tingting” i narapela samting—em i gat wok long kisim save na tingim ol samting. Em mining bilong dispela tupela tok taim tupela wantaim i stap long wanpela ves. (Matyu 22:37; Filipai 4:7) Tasol sampela taim tingting na bel i no makim narapela narapela samting. Jisas i tokim ol saveman bilong lo ol i birua long em: “Bilong wanem yupela i gat dispela tingting nogut long bel bilong yupela?” (Matyu 9:4; Mak 2:6) Olsem na bel inap makim tu tingting bilong yumi.
5. Bel i makim wanem samting?
5 Wanpela bikpela buk i tok, bel i makim ‘insait tru bilong man, olsem na em i makim pasin tru bilong man, i kamap ples klia long ol wok na laik na tingting bilong em, na ol samting em i pilim tru, na ol save, na gutpela tingting, na save bilong mekim wok, na bilip, na pasin bilong skelim ol tok, na holim ol samting long tingting, na kain samting olsem.’ Em i makim pasin tru i stap “insait” long bel bilong yumi. (1 Pita 3:4) Em dispela samting tasol Jehova i save lukim na skelim. Olsem na Devit inap beten: “God, yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Yumi ken mekim wanem bilong kisim klinpela bel?
“Putim Gut Long Bel” Tok Bilong God
6. Taim ol Israel i bung long ples stret bilong Moap, Moses i givim wanem tok long ol?
6 Taim ol Israel i laik go insait long Graun Bilong Promis na ol i bung long ples stret bilong Moap, Moses i tokim ol: “Yupela i mas lukaut gut na bihainim [“putim gut long bel,” NW ] olgeta dispela lo nau mi givim yupela. Na yupela i mas toksave long ol pikinini bilong yupela, olsem bai ol tu i ken bihainim olgeta tok bilong God oltaim.” (Lo 32:46) Ol Israel i mas “putim gut long bel” ol tok bilong God. Ol yet i mas save gut long ol lo bilong God bambai ol inap lainim ol pikinini bilong ol long en.—Lo 6:6-8.
7. Bilong “putim gut long bel” Tok Bilong God, yumi mas mekim wanem?
7 Bilong kisim klinpela bel, wanpela bikpela samting i olsem: Yumi mas kisim stretpela save long laik bilong God na ol samting em i tingting pinis long mekim. Tok Bilong God tasol i as bilong dispela save. (2 Timoti 3:16, 17) Tasol ol save yumi kisim na i stap long het tasol, dispela i no helpim yumi long kisim gutpela bel Jehova i laikim. Bilong dispela save i ken stiaim pasin tru bilong yumi, yumi mas “putim gut long bel” ol tok yumi lainim. Yumi inap mekim olsem wanem? Man bilong raitim Song, Devit, em i tok: “Nau mi tingting gen long ol samting i bin kamap bipo. Na mi tingting long [“tingim tingim long bel,” NW ] ol samting yu bin mekim na long ol gutpela wok bilong yu.”—Song 143:5.
8. Taim yumi stadi, yumi ken tingim wanem ol askim?
8 Yumi tu i mas tenkyu na tingim tingim long bel ol samting Jehova i bin mekim. Taim yumi ritim Baibel o ol buk em Baibel i as bilong en, i gutpela sapos yumi tingim tingim ol askim olsem: ‘Dispela tok i skulim mi olsem wanem long Jehova? Dispela tok i kamapim wanem ol pasin bilong Jehova? Dispela tok i skulim mi olsem wanem long ol samting Jehova i laikim na ol samting em i no laikim? Wanem samting bai kamap sapos mi bihainim rot Jehova i laikim o mi bihainim rot em i nolaik tru long en? Olsem wanem dispela tok i stret wantaim ol save mi kisim pinis?’
9. Pasin bilong stadi na tingim tingim long bel em i bikpela samting olsem wanem?
9 Lisaa i gat 32 krismas, na em i stori long samting i kirapim em long pilim tru olsem pasin bilong stadi gut na tingim tingim long bel, em i bikpela samting tru. Em i tok: “Taim mi baptais pinis long 1994, mi wok strong insait long tok i tru inap tupela yia. Mi go long olgeta miting Kristen, na mi autim tok inap 30 i go 40 aua long olgeta mun, na mi save bung wantaim ol wanlain Kristen. Tasol bihain, isi isi mi wok long lusim tok i tru. I stap bilong mi i go nogut na mi mekim sampela pasin i no stret na mi brukim lo bilong God. Tasol bihain mi kisim bek gutpela tingting na mi stretim wokabaut bilong mi. Mi amamas tru long Jehova i luksave olsem mi tanim bel pinis na em i kisim mi bek! Planti taim mi bin ting olsem: ‘I gat wanem as na mi lusim tok i tru?’ Bekim bilong dispela askim i olsem: Mi bin lusim pasin bilong stadi gut na tingim tingim long bel. Tok i tru bilong Baibel i no bin go daun long bel bilong mi. Kirap long dispela taim na i kam, pasin bilong stadi na tingim tingim long bel em bai stap olsem bikpela samting tru long laip bilong mi long olgeta taim.” Taim yumi wok long kisim sampela save moa long Jehova, na Pikinini bilong em, na Tok bilong em, yumi mas makim taim bilong tingim tingim long bel ol dispela save.
10. I gat wanem as na yumi mas painim taim bilong mekim stadi na tingim tingim long bel?
10 Long nau i gat planti wok yumi mas mekim, olsem na i hatwok long painim taim bilong mekim stadi na tingim tingim long bel. Tasol ol Kristen long nau i stap klostu tru long wanpela gutpela Graun Bilong Promis—em nupela taim God bai kamapim long graun na stretpela pasin tasol bai stap long en. (2 Pita 3:13) Liklik taim ol bikpela samting bai kamap, olsem ‘Bikpela Babilon’ bai bagarap, na ‘Gok bilong Magok’ bai kam pait long lain bilong Jehova. (KTH 17:1, 2, 5, 15-17; Esekiel 38:1-4, 14-16; 39:2) Ol samting i laik kamap ol inap traim pasin bilong yumi long laikim tru Jehova. Taim i sot pinis, olsem na nau yumi mas painim taim bilong tingim gut long bel Tok Bilong God!—Efesus 5:15, 16.
‘Redim Bel Long Kisim Save’
11. Olsem wanem bel bilong yumi i kain olsem graun?
11 Long tok piksa, bel i kain olsem graun bilong planim pikinini kaikai bilong tok i tru long en. (Matyu 13:18-23) Olsem ol man i save brukim graun long gaden bambai ol kaikai i ken kamap gutpela, olsem tasol yumi mas wok strong long redim bel bambai em i ken redi long kisim Tok Bilong God. Pris Esra i bin “wok strong [“redim bel,” NW ] long kisim save long lo bilong Bikpela na long bihainim gut dispela lo.” (Esra 7:10) Yumi ken mekim wanem bilong redim bel bilong yumi?
12. Yumi ken mekim wanem bilong redim bel long stadi?
12 Bilong redim gut bel long kisim save long Tok Bilong God, yumi mas beten strong. Ol i save mekim beten bilong kirapim na pinisim ol miting Kristen bilong ol manmeri i lotu tru long God. Olsem na olgeta taim yumi stadi long Baibel, i stret yumi mekim beten bilong kirapim stadi na tingim Jehova insait long dispela stadi!
13. Yumi mas mekim wanem bilong kisim gutpela bel Jehova i laikim?
13 Bel i mas redi long lusim sampela tingting yumi kisim pinis. Ol bikman bilong lotu long taim bilong Jisas ol i no laik mekim olsem. (Matyu 13:15) Tasol mama bilong Jisas, Maria, em i bin skelim ol tok em i putim “long bel” wantaim ol tok i tru em i harim pinis. (Luk 2:19, 51) Em i kamap gutpela disaipel bilong Jisas. Lidia bilong Taiataira em i harim tok bilong Pol, na Jehova “i tanim bel bilong em, na em i putim yau.” Em tu i kamap disaipel. (Aposel 16:14, 15) Olsem na nogut yumi strong tru long holimpas sampela tingting bilong yumi yet o sampela bilip yumi laikim tumas. Yumi mas bilip olsem: “Olgeta man i save giaman, tasol God wanpela i save mekim tok tru oltaim.”—Rom 3:4.
14. Yumi ken mekim wanem bilong redim bel long harim ol tok long ol miting Kristen?
14 Yumi mas redim bel long harim tok i kamap long ol miting Kristen—dispela em i bikpela samting. Nogut sampela samting i pulim tingting bilong yumi na yumi no putim yau long ol tok ol brata i mekim. Sapos yumi putim tingting i go long ol samting i bin kamap long moningtaim samting o yumi tingting planti long ol samting i laik painim yumi long tumora, ating ol tok ol brata i mekim bai i no inap helpim yumi. Bilong ol tok i ken helpim gut yumi, yumi mas tingting strong long putim yau na kisim save. Sapos yumi tingting strong long kisim gut ol tok bilong Baibel yumi harim, na kisim gut as bilong en, dispela bai helpim gut yumi!—Nehemia 8:5-8, 12.
15. Olsem wanem pasin daun i mekim na ol narapela i no hatwok long skulim yumi?
15 Ol marasin samting ol man i putim long graun inap mekim graun i kamap gutpela, na olsem tasol, sampela pasin yumi kisim, olsem pasin daun, na hangre long ol samting bilong spirit, na bilip, na pret long God, na laikim tumas God, dispela inap helpim bel long kamap gutpela moa. Pasin daun i mekim bel i redi long harim tok, na dispela i mekim na ol narapela i no hatwok long skulim yumi. Jehova i tokim King Josaia bilong Juda: “Taim yu harim tok long ol samting mi laik mekim long ol manmeri bilong yu, yu bin tanim bel na daunim yu yet long ai bilong mi . . . na krai na singaut long mi.” (2 King 22:19) Josaia i daunim em yet na dispela i mekim bel i redi long harim tok. Pasin daun i bin helpim ol disaipel bilong Jisas, em ol i “man nating tasol,” long kisim gut na bihainim tok i tru bilong ol samting bilong spirit, em “ol man i gat gutpela save na tingting” ol i no bin kisim. (Aposel 4:13; Luk 10:21) Yumi tu mas “daunim yumi yet long ai bilong God” taim yumi wok long kisim gutpela bel Jehova i laikim.—Esra 8:21.
16. Wanem samting i mekim na yumi mas wok strong long kisim pasin bilong laikim ol kaikai bilong spirit?
16 Jisas i tok: “Ol manmeri i save, ol i stap rabis tru [olsem sot tru] long ol samting bilong God, em ol i ken amamas.” (Matyu 5:3) God i bin wokim yumi na bai yumi inap tingim ol samting bilong spirit, tasol ol hevi bilong dispela taim nogut na pasin bilong les em inap mekim na yumi no pilim tumas olsem yumi mas kisim ol samting bilong spirit. (Matyu 4:4) Olsem na yumi mas lain long laikim ol kaikai bilong spirit. Sapos pastaim yumi no kisim amamas long ritim Baibel na stadi, yumi mas mekim i go i go na bihain bai yumi “belgut” long ol save yumi kisim na amamas long wetim taim bilong stadi.—Sindaun 2:10, 11.
17. (a) I gat wanem as na Jehova em inap tru long yumi bilip olgeta long em? (b) Olsem wanem yumi ken kisim pasin bilong bilip strong long God?
17 King Solomon i tok: “Yu mas bilip strong long Bikpela. Yu no ken ting save bilong yu yet inap helpim yu.” (Sindaun 3:5) Sapos yumi bilip strong long Jehova long bel bilong yumi, bai yumi save olsem, samting Em i tokim yumi long mekim long rot bilong Baibel, dispela i stret long olgeta taim. (Aisaia 48:17) Jehova em inap tru long yumi bilip olgeta long em. Em inap mekim olgeta samting em i bin tok long mekim. (Aisaia 40:26, 29) Long wanem, insait bilong nem bilong em i olsem, “Em i Mekim i Kamap,” na dispela i strongim bilip bilong yumi olsem em inap truim ol tok promis bilong em! Em “i save bihainim stretpela pasin na em i save marimari long yumi long olgeta samting em i mekim.” (Song 145:17) Tasol bilong kisim pasin bilong bilip tru long em, yumi yet i mas ‘traim na lukim na bai yumi save olsem Bikpela i gutpela tru’—long i stap bilong yumi yumi mas bihainim ol tok yumi lainim long Baibel na tingim ol gutpela samting dispela i save kamapim.—Song 34:8.
18. Olsem wanem pasin bilong pret long God i helpim yumi long kisim ol tok bilong God bilong stiaim yumi?
18 Solomon i kamapim narapela samting i helpim bel long kisim ol tok bilong God bilong stiaim yumi. Em i tok: “Yu mas aninit [“pret,” NW ] long Bikpela na givim baksait long pasin nogut.” (Sindaun 3:7) Jehova i tok long ol Israel bilong bipo olsem: “Mi laik bai ol i tingting olsem oltaim, na bai ol i mas aninit [“pret,” NW ] long mi na bihainim olgeta lo bilong mi oltaim. Olsem bai olgeta wok samting bilong ol na bilong ol tumbuna pikinini bilong ol i ken kamap gutpela oltaim.” (Lo 5:29) Yes, ol man i pret long God ol i save bihainim tok bilong em. Jehova inap tru long ‘helpim na strongim ol man i save aninit long em wanpela tasol,’ na givim strafe long ol man i sakim tok bilong em. (2 Stori 16:9) Pasin bilong pret long mekim ol samting God i no save laikim, dispela i mas bosim tingting, na bel, na ol samting yumi mekim.
‘Laikim Tru God Long Bel Bilong Yu’
19. Pasin sori i mekim wanem wok bilong kirapim bel long bihainim ol tok Jehova i givim long yumi?
19 Pasin bilong laikim tru God em i nambawan pasin tru bilong kirapim bel long kisim ol tok Jehova i givim long yumi bilong stiaim yumi. Man i laikim tru God long bel bilong em olgeta, em i gat bikpela laik long kisim save long ol samting God i laikim na ol samting God i no laikim. (1 Jon 5:3) Jisas i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Yumi mas mekim pasin bilong laikim God i kamap strong moa, olsem long rot bilong tingim ol gutpela pasin em i mekim, na oltaim toktok wantaim em na tingim em olsem wanpela gutpela pren, na amamas long tokim ol narapela long em.
20. Yumi ken mekim wanem na bai yumi inap kisim gutpela bel Jehova i laikim?
20 Orait nau yumi ken kamapim gen ol bikpela tok: Bilong kisim gutpela bel Jehova i laikim, yumi mas larim Tok Bilong God i stiaim pasin tru i stap insait long bel bilong yumi. Yumi mas stadi gut long Baibel na tingim tingim long bel. Bilong mekim olsem, yumi mas redim bel—bel i mas redi long lusim sampela tingting bipo yumi kisim, na yumi mas kisim ol pasin i mekim na ol narapela i no hatwok long skulim yumi! Tru tumas, sapos Jehova i helpim yumi, yumi inap kisim gutpela bel God i laikim. Tasol yumi ken mekim wanem bilong was gut long bel bilong yumi?
[Futnot]
a Mipela i senisim nem.
Bai Yu Bekim Olsem Wanem?
• Wanem dispela bel Jehova i skelim?
• Yumi mas mekim wanem bilong “putim gut long bel” Tok Bilong God?
• Yumi mas mekim wanem bilong redim bel long kisim save long Tok Bilong God?
• Yumi skelim pinis ol dispela tok, na nau bel i kirapim yu long mekim wanem?
[Piksa long pes 17]
Devit i save tingim tingim long bel ol samting bilong spirit. Yu tu yu save mekim olsem?
[Ol Piksa long pes 18]
Taim yu laik stadi long Tok Bilong God, redim bel bilong yu