Jehova “i Save Mekim Gut Tru Long Ol Man i Wok Long Painim Em”
“Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”—HIBRU 11:6.
1, 2. Wanem ol samting inap mekim na sampela wokboi bilong Jehova i kisim ol tingting kranki?
“MI BIN i stap wanpela Witnes Bilong Jehova inap klostu 30 yia, tasol i no gat wanpela taim we mi pilim olsem mi gutpela inap long holim dispela nem.” Dispela em tok bilong Barbara.a Em i tok moa: “Maski mi bin mekim wok painia na mekim planti arapela gutpela wok, i no gat wanpela bilong ol dispela wok i mekim na mi pilim olsem mi inap stap wanpela Witnes.” Keith i gat wankain tingting olsem Barbara, na em i tok: “Sampela taim mi pilim olsem mi no gutpela, long wanem, ol wokboi bilong Jehova i gat planti samting ol i ken amamas long en, tasol mi no save amamas. Dispela i mekim na mi pilim olsem mi gat asua, na dispela i givim bikpela hevi moa long mi.”
2 Planti gutpela wokboi bilong Jehova, long bipo na long nau tu, ol i bin kisim ol kain tingting olsem. Olsem wanem? Sampela taim yu kisim kain tingting olsem? Ating ol hevi i wok long painim yu, tasol i luk olsem ol wanbilip bilong yu i no gat hevi na ol i stap amamas. Olsem na ating dispela inap mekim na yu pilim olsem Jehova i no orait long yu na em i no tingim yu. No ken hariap long kisim kain tingting olsem. Baibel i tok: “[Bikpela] i no save givim baksait long ol rabisman. Em i no save ting hevi na pen bilong ol em i samting nating. Em i no save stap longwe long ol. Nogat. Em i save harim beten bilong ol.” (Song 22:24) Dispela tok profet i stori long Mesaia i soim olsem Jehova i save harim beten bilong ol gutpela wokboi bilong em, na tu, em i save mekim samting bilong helpim ol.
3. Bilong wanem yumi no inap abrusim ol hevi bilong dispela taim?
3 I no gat wanpela man inap abrusim ol hevi bilong dispela taim nau yumi stap long en—lain bilong Jehova tu ol i no inap abrusim, nogat. Dispela graun yumi stap long en i stap aninit long strong bilong Satan, em nambawan birua bilong Jehova. (2 Korin 4:4; 1 Jon 5:19) Jehova i no wokim mirakel bilong lukautim ol wokboi bilong em, nogat, ol i stap nambawan lain Satan i birua long ol. (Jop 1:7-12; KTH 2:10) Olsem na ‘sapos hevi i kamap long yumi, orait yumi mas sanap strong’ na “beten long olgeta taim” na mekim olsem i go inap long taim God i makim, na yumi mas bilip tru olsem Jehova i tingim yumi. (Rom 12:12) Yumi no ken larim ol hevi bilong dispela graun i pulim yumi long ting olsem God bilong yumi, Jehova, em i no laikim yumi, nogat!
Ol i Bin Sanap Strong
4. Stori long sampela gutpela wokboi bilong Jehova em ol i bin karim ol bikpela hevi.
4 Planti wokboi bilong Jehova long bipo ol i bin sanap strong na karim ol bikpela hevi. Olsem: Hana i bin “pilim nogut tru,” long wanem, em i no gat pikinini—em i ting dispela i makim olsem God i no tingim em. (1 Samuel 1:9-11) Taim Kwin Jesebel i laik kilim i dai Elaija, Elaija i pret na em i beten long Jehova: “Bikpela, mi inap pinis long ol dispela hevi i kamap long mi. Nau mi laik bai yu larim mi i dai, long wanem, mi no gutpela man. Nogat. Mi wankain olsem ol tumbuna bilong mi.” (1 King 19:4) Na ating aposel Pol i bin pilim tru ol hevi i kamap long rot bilong sin i stap long skin na em i tok: “Taim mi laik mekim gutpela pasin, pasin nogut i save pasim rot bilong mi.” Em i tok moa olsem: “O sori, dispela hevi i bagarapim tru tingting bilong mi!”—Rom 7:21-24.
5. (a) Olsem wanem Jehova i bin mekim gut long Hana, Elaija, na Pol? (b) Olsem wanem Tok Bilong God inap mekim gut bel bilong yumi sapos ol tingting kranki i givim hatwok long yumi?
5 Tru, Hana, Elaija, na Pol, ol i bin karim ol hevi na ol i sanap strong na mekim wok bilong Jehova, na Jehova i mekim gut tru long ol. (1 Samuel 1:20; 2:21; 1 King 19:5-18; 2 Timoti 4:8) Tasol ol samting olsem bel hevi, tingting i bagarap, na pret, i bin givim hatwok long ol. Olsem na yumi no ken kirap nogut sapos sampela taim yumi tu i gat ol tingting kranki. Yu ken mekim wanem sapos ol hevi i mekim na yu tingting planti olsem Jehova i laikim yu o nogat? Tok Bilong God inap mekim gut bel bilong yu. Olsem: Long stadi i kamap paslain, yumi bin stori long tok bilong Jisas olsem Jehova i ‘kaunim pinis olgeta gras long het bilong yu.’ (Matyu 10:30) Ol dispela tok i makim olsem Jehova i tingim tru olgeta wan wan wokboi bilong em. Tingim tu tok piksa bilong Jisas long ol liklik pisin. Sapos Jehova i save olsem wanpela bilong ol dispela liklik pisin i pundaun long graun, orait em i save tu long hevi bilong yu.
6. Olsem wanem Baibel inap mekim gut bel bilong ol man em ol tingting kranki i laik daunim ol?
6 Olsem wanem? Strongpela Man Bilong Wokim yumi, em God Jehova, em inap tingim yumi ol sinman olsem yumi gutpela samting tru? Yes! I gat planti tok bilong Baibel i helpim yumi long save long dispela. Taim yumi tingim tingim ol dispela tok, yumi inap mekim wankain tok olsem man bilong raitim song, em i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Song 94:19) Yumi ken skelim sampela bilong ol dispela tok bilong Baibel i save mekim isi bel bilong man, na dispela bai helpim yumi long pilim tru olsem God i tingim yumi na em bai mekim gut long yumi sapos yumi mekim yet laik bilong em.
“Manmeri Tru” Bilong Jehova
7. Long rot bilong Malakai, Jehova i mekim wanem tok profet em inap strongim bel bilong dispela bikhet lain?
7 Foa handet yia paslain long Krais, ol Juda i bin i stap nogut tru. Ol pris i orait long ol animal i gat bagarap long skin na ol i givim olsem ofa long Jehova. Ol hetman i no mekim wankain pasin long olgeta man. Ol man i mekim pasin sanguma, pasin giaman, na bagarapim ol marit. (Malakai 1:8; 2:9; 3:5) Malakai i mekim wanpela tok profet i narapela kain long dispela lain i mekim bikhet pasin tasol. Bihain Jehova bai helpim lain bilong em long mekim i stap bilong ol i kamap stret long ai bilong em. Baibel i tok: “Bikpela I Gat Olgeta Strong em i tok olsem, ‘Dispela ol lain bai i stap lain bilong mi tasol. Long dispela bikpela De mi bin makim, bai ol dispela lain i stap manmeri tru bilong mi. Na bai mi marimari long ol olsem wanpela papa i save marimari long pikinini i mekim wok bilong papa.’ ”—Malakai 3:17.
8. Bilong wanem tok bilong Malakai 3:17 i stret tu long lain planti manmeri tru?
8 Long nau, tok profet bilong Malakai i gat hap truim bilong en long ol Kristen God i bin makim, em lain 144,000. Ol i “lain manmeri tru” bilong Jehova. (1 Pita 2:9) Na tu, tok profet bilong Malakai inap strongim bel bilong lain “planti manmeri tru,” em ol i “sanap i stap long pes bilong sia king na long ai bilong Pikinini Sipsip” na “ol i bin putim ol longpela waitpela klos.” (KTH 7:4, 9) Ol i kamap wanpela lain sipsip wantaim ol Kristen God i bin makim, na ol i gat wanpela wasman tasol, em Jisas Krais.—Jon 10:16.
9. Bilong wanem lain bilong Jehova i olsem ol “manmeri tru” bilong em?
9 Jehova i gat wanem tingting long ol man i mekim wok bilong em? Olsem yumi lukim pinis long Malakai 3:17, em i tingim ol long wankain pasin olsem gutpela papa i save tingim pikinini bilong em. Na tingim ol tok em i mekim bilong stori long lain bilong em—“manmeri tru bilong mi.” Ol narapela Baibel i tanim dispela hap tok olsem “bilong mi stret,” “nambawan gutpela samting tru bilong mi,” na “ol bis bilong mi i dia tumas.” Bilong wanem Jehova i gat kain tingting olsem long ol man i mekim wok bilong em? Wanpela as em olsem: Em i God bilong tingim tru ol samting ol man i mekim. (Hibru 6:10) Em i save go klostu long ol man em bel i kirapim ol long mekim wok bilong em, na em i tingim ol i olsem gutpela samting tru.
10. Jehova i save mekim wanem bilong lukautim lain bilong em?
10 Olsem wanem? Yu gat wanpela samting em yu save laikim tumas? Ating yu save was gut na bai yu ken lukautim gut dispela samting, a? Jehova i save mekim wankain pasin long ol “manmeri tru” bilong em. Tru, em i no save banisim lain bilong em na bai ol hevi i no ken painim ol, nogat. (Saveman 9:11) Tasol Jehova inap lukautim ol gutpela wokboi bilong em long ol samting bilong spirit, na em bai mekim olsem. Em i save givim strong long ol bilong karim olgeta kain hevi i painim ol. (1 Korin 10:13) Olsem na Moses i bin tokim lain bilong God long bipo, em lain Israel: “Yupela i mas sanap strong . . . God, Bikpela bilong yumi, bai i stap wantaim yupela. Na em bai i no inap lusim tingting long yupela o larim yupela i stap nating.” (Lo 31:6) Jehova i save mekim gut tru long lain bilong em. Em i tingim ol olsem ol “manmeri tru” bilong em.
Jehova i Man Bilong “Mekim Gut Tru” Long Ol Man
11, 12. Taim yumi pilim tru olsem Jehova i Man Bilong Mekim Gut long ol man, olsem wanem dispela inap helpim yumi long sakim ol tingting kranki?
11 Narapela samting i kamapim klia olsem Jehova i tingim tru ol wokboi bilong em i olsem: Em i save mekim gut tru long ol. Em i tokim ol Israel: “Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.” (Malakai 3:10) Bihain, Jehova bai mekim gut tru long ol wokboi bilong em, em bai givim laip oltaim long ol. (Jon 5:24; KTH 21:4) Dispela gutpela samting Jehova bai givim i kamapim klia pasin laikim na pasin bilong em long givim ol samting. Em i soim tu olsem em i tingim tru ol man i mekim wok bilong em. Taim yumi lain long tingim Jehova olsem Man bilong amamas long mekim gut long yumi, dispela inap helpim yumi long daunim ol tingting kranki long yumi stap olsem wanem long ai bilong God. Jehova i kirapim yumi long tingim em olsem Man Bilong Mekim Gut Tru long yumi! Pol i tok: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”—Hibru 11:6.
12 Tru, yumi mekim wok bilong Jehova, long wanem, yumi laikim em—i no olsem yumi tingim tasol tok promis bilong em long mekim gut long yumi. Tasol dispela i no makim olsem i no stret long yumi tingim tingim gutpela samting em bai givim long yumi, nogat. (Kolosi 3:23, 24) Jehova i laikim tru ol man i wok long painim em, na em i tingim tru ol, olsem na em i save mekim gut long ol.
13. Bilong wanem pe bilong baim bek man i nambawan bikpela samting i kamapim klia olsem Jehova i laikim tru yumi?
13 Nambawan bikpela samting i kamapim klia olsem Jehova i tingim tru ol man, em pe bilong baim bek man. Aposel Jon i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Pe bilong baim bek man i kamapim klia olsem dispela tingting olsem Jehova i no tingim na laikim yumi, em i tingting kranki. Tru tumas, sapos Jehova i givim bikpela pe tru bilong baim bek yumi—em i givim laip bilong dispela wanpela Pikinini tasol bilong em olsem ofa—orait dispela i kamapim klia olsem em i laikim tru yumi.
14. Wanem samting i kamapim klia tingting bilong Pol long pe bilong baim bek man?
14 Olsem na sapos yu kisim ol tingting kranki, skelim skelim long bel dispela pe bilong baim bek man. Tingim dispela pe olsem wanpela presen Jehova i givim stret long yu. Aposel Pol i bin mekim olsem. Tingim tok bilong em: “O sori, dispela hevi i bagarapim tru tingting bilong mi!” Tasol em i tok moa: “Mi tenkyu long God! Long han bilong Jisas Krais, Bikpela bilong yumi,” em i bin “laikim mi tru na em i lusim laip bilong em yet bilong helpim mi.” (Rom 7:24, 25; Galesia 2:20) Taim Pol i mekim dispela tok, dispela i no makim olsem em i litimapim nem bilong em yet, nogat. Em i kamapim strongpela bilip bilong em olsem Jehova i tingim em yet. Olsem Pol, yu tu yu mas lain long tingim pe bilong baim bek man olsem wanpela presen God i givim long yu stret. Jehova em i strongpela Man Bilong Kisim Bek yumi, na tu, em i Man Bilong Mekim Gut long yumi.
Lukaut Long Ol “Trik” Bilong Satan
15-17. (a) Olsem wanem Satan i save mekim wok long ol tingting kranki bilong nogutim man? (b) Samting i bin painim Jop inap strongim yumi olsem wanem?
15 Ating yu hatwok yet long bilip olsem ol gutpela tok bilong God long Baibel i stret long yu. Ating yu pilim olsem bilong kisim laip oltaim long nupela taim God bai kamapim, em samting ol narapela tasol inap kisim, na yu yet i no gutpela inap long yu ken kisim dispela samting. Sapos yu pilim olsem, yu inap mekim wanem?
16 Ating yu save long tok Pol i bin mekim long ol Kristen long Efesus: “Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.” (Efesus 6:11) Taim yumi harim dispela hap tok olsem ol trik bilong Satan, ating kwiktaim yumi tingim pasin bilong bungim ol samting bilong skin na pasin pamuk, na i stret yumi ting olsem. Ol dispela samting i bin pundaunim planti manmeri bilong God long bipo na long nau tu. Tasol yumi no ken lusim tingting long narapela trik tu bilong Satan—em i wok strong long pulim ol man long ting olsem God Jehova i no laikim ol.
17 Satan i save tru long pasin bilong mekim wok long dispela tingting kranki bilong pulim ol man long lusim God. Tingim ol tok Bildat i mekim long Jop: “Olsem wanem na bai yumi man bilong graun inap long kamap stretpela na klin long ai bilong God? Yumi save lukim lait bilong mun i bikpela, tasol long God, em i liklik tru, na ol sta tu i no klin long ai bilong en. Olsem na tru tumas, yumi man yumi no klin long ai bilong God. Yumi olsem ol liklik snek bilong graun. Yumi i samting nating tasol.” (Jop 25:4-6; Jon 8:44) Ating dispela tok i bin bagarapim tru bel bilong Jop. Olsem na no ken larim Satan i bagarapim bel bilong yu. Tasol yu mas save long ol trik bilong Satan na bai yu inap strongim bel na stap strong long mekim pasin i stret. (2 Korin 2:11) Maski Jehova i mas stretim Jop, Jehova i bin praisim pasin bilong Jop long sanap strong na karim hevi na em i dabolim olgeta samting Jop i bin i gat bipo.—Jop 42:10.
Save Bilong Jehova i “Winim Tru Save i Stap Long Bel Bilong Yumi”
18, 19. Olsem wanem ‘save bilong God i winim tru save i stap long bel bilong yumi’? Olsem wanem God i “save long olgeta samting”?
18 Tru, i hatwok long daunim bel hevi sapos bel hevi i pas strong long tingting bilong yumi. Tasol spirit bilong Jehova inap helpim yu na isi isi yu inap daunim “ol strongpela banis . . . i save pasim rot bilong ol man i laik kisim save long God.” (2 Korin 10:4, 5) Taim ol tingting kranki i laik daunim yu, tingim tingim tok bilong aposel Jon: “Sapos yumi laikim tru ol arapela, orait yumi ken save, yumi bihainim tok tru. Na maski sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.”—1 Jon 3:19, 20.
19 Wanem mining bilong dispela hap tok olsem ‘save bilong God i winim tru save i stap long bel bilong yumi’? Sampela taim, bel bilong yumi inap kotim yumi, na moa yet taim yumi save olsem yumi bin mekim rong. O ol samting long sindaun bilong yumi i mekim na yumi gat tingting kranki long yumi yet, na yumi ting olsem i no gat wanpela samting yumi mekim na Jehova bai orait long en. Tok bilong aposel Jon i strongim yumi olsem save bilong Jehova i winim tru ol tingting kranki bilong yumi! Em i luksave long ol samting yumi inap mekim, na em i no tingim ol rong bilong yumi, nogat. Na tu, em i save long ol tingting i stap long bel bilong yumi. Devit i tok: “Em i save olsem em i bin kisim graun na wokim yumi na em i tingim yumi i olsem das tasol.” (Song 103:14) Yes, Jehova i save gut long olgeta samting bilong yumi, winim yumi yet!
“Naispela Hat King”
20. Long tok profet bilong Aisaia, Jehova i gat wanem tingting long ol wokboi bilong em?
20 Long rot bilong profet Aisaia, Jehova i tokim lain bilong em long bipo olsem em bai mekim i stap bilong ol i kamap gutpela gen. Taim ol i stap kalabus long Babilon, dispela tok i bin mekim gut bel bilong ol na i strongim ol! Jehova i tok long wanpela taim bai kamap na ol bai go bek long ples bilong ol, na em i tok: “Yu bai stap olsem naispela hat king Bikpela i holim long han bilong en.” (Aisaia 62:3) Taim Jehova i mekim dispela tok, em i helpim lain bilong em long pilim olsem ol i gat biknem na ol i gutpela samting tru long ai bilong em. Long nau tu Jehova i bin mekim wankain pasin long lain Israel bilong spirit. I olsem em i litimapim nem bilong ol na bai olgeta manmeri i ken laikim ol.
21. Olsem wanem yu inap bilip strong olsem Jehova bai mekim gut long yu long pasin bilong yu long sanap strong na karim hevi?
21 Bikpela truim bilong dispela tok profet i kamap long ol Kristen God i bin makim ol, tasol em i kamapim tu olsem Jehova i givim biknem long olgeta man i mekim wok bilong em. Olsem na taim yu kisim ol tingting kranki, tingim olsem maski yu gat sin, yu inap stap gutpela samting tru olsem “naispela hat king” long han bilong Jehova. Olsem na wok yet long mekim em i belgut long rot bilong wok strong long mekim laik bilong em. (Sindaun 27:11) Taim yu mekim olsem, yu ken bilip tru olsem Jehova bai mekim gut tru long yu long pasin bilong yu long sanap strong na karim hevi!
[Futnot]
a Mipela i bin senisim sampela nem.
Yu Inap Tingim?
• Olsem wanem yumi stap olsem ol “manmeri tru” bilong Jehova?
• Bilong wanem em i bikpela samting long tingim Jehova olsem Man Bilong Mekim Gut Tru long yumi?
• Yumi mas lukaut gut long wanem “trik” bilong Satan?
• Olsem wanem ‘save bilong God i winim tru save i stap long bel bilong yumi’?
[Piksa long pes 26]
Pol
[Piksa long pes 26]
Elaija
[Piksa long pes 26]
Hana
[Piksa long pes 28]
Baibel i gat planti gutpela tok bilong mekim isi bel