Lain na Skulim Ol Narapela Long Stretpela Pasin Kristen
“Yupela i save skulim ol arapela manmeri, tasol bilong wanem yupela i no save skulim yupela yet?”—ROM 2:21.
1, 2. I gat wanem ol as na yu gat laik long stadi long Baibel?
I GAT planti as na yu ken stadi long Tok Bilong God. Ating yu gat laik long save long ol tok i stap long en—stori bilong ol manmeri, ol samting i bin kamap, ol ples, na ol narapela samting. Yu gat laik long save long ol bilip tru, em i narapela kain long ol bilip giaman, olsem God Triwan na helpaia. (Jon 8:32) Na yu mas i gat laik long save gut long Jehova bambai yu ken bihainim moa yet pasin bilong em na wokabaut long pasin i stret long ai bilong em.—1 King 15:4, 5.
2 Wanpela bikpela as na yu mas stadi long Tok Bilong God, em bilong inapim yu long lainim ol narapela—famili bilong yu, ol man yu save long ol, na ol man yu no save long ol. Dispela em i wanpela wok ol Kristen i mas mekim. Jisas i tokim ol disaipel: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.”—Matyu 28:19, 20.
3, 4. Bilong wanem em i wanpela gutpela wok long lainim ol narapela olsem Jisas i bin tokim yumi long mekim?
3 Pasin bilong stadi long Baibel bambai yu ken lainim ol narapela em i wanpela gutpela wok na em inap givim amamas long yu long olgeta taim bihain. Inap longtaim pinis, ol man i ting wok tisa em i wanpela gutpela wok tru. Wanpela buk (Encarta Encyclopedia) i tok: “Namel long ol Juda, planti manmeri i bikpela pinis ol i tingim ol tisa olsem ol man bilong soim rot bilong kisim laip, na ol i strong long kirapim ol pikinini long givim biknem long tisa bilong ol, winim papamama bilong ol.” Em i gutpela samting tru long ol Kristen i stadi long Baibel bilong skulim ol yet na bihain ol i ken lainim ol narapela.
4 Wanpela buk (The World Book Encyclopedia) i tok: “Planti manmeri i mekim wok tisa, winim olgeta narapela wok ol man i save mekim. Inap 48 milion man na meri long olgeta hap ol i mekim wok tisa.” Tisa i gat wok long skulim ol yangpela na em inap stiaim i stap bilong ol inap planti yia bihain. Taim yu bihainim tok bilong Jisas long skulim ol narapela, yu inap stiaim i stap bilong ol i go inap longtaim tru; yu inap stiaim ol bilong i stap oltaim oltaim. Aposel Pol i kamapim klia dispela samting taim em i tokim Timoti: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Em nau, wok tisa bilong yu inap mekim na God bai kisim bek ol man.
5. Bilong wanem wok tisa em Kristen i save mekim i nambawan gutpela wok?
5 King bilong heven na graun i bin givim wok long yu long skulim yu yet na ol narapela na em i bosim dispela wok. Dispela samting tasol i mekim na dispela kain wok tisa i winim tru olgeta narapela wok tisa, maski em i wok bilong skulim ol man long sampela bikpela tok, o lainim ol long mekim wanpela wok, o lainim ol long mekim wok dokta samting. Wok tisa em Kristen i save mekim i bilong lainim sumatin long bihainim pasin bilong Pikinini bilong God, Krais Jisas, na bilong lainim ol narapela long mekim wankain pasin.—Jon 15:10.
Bilong Wanem Yu Mas Skulim Yu Yet?
6, 7. (a) Bilong wanem yumi mas skulim yumi yet pastaim? (b) Long wanem rot ol Juda long taim bilong ol aposel i pundaun long mekim wok tisa?
6 Bilong wanem ol i tok olsem pastaim yumi mas skulim yumi yet? Long wanem, yumi no inap lainim gut ol narapela sapos yumi no bin skulim yumi yet pastaim. Pol i kamapim klia dispela samting long wanpela skripsa i kirapim tingting, em dispela skripsa i bikpela samting long ol Juda long bipo na em i gat wanpela bikpela tok long ol Kristen long nau. Pol i tok: “Yupela i save skulim ol arapela manmeri, tasol bilong wanem yupela i no save skulim yupela yet? Yupela i save tok, ol man i no ken stil, tasol ating yupela yet i save stil? Yupela i save tok, ‘Ol marit i no ken mekim pasin pamuk,’ tasol ating yupela yet i save mekim olsem? Yupela i no laikim ol giaman god, tasol ating yupela i save stilim samting bilong ol haus lotu bilong ol haiden? Yupela i save litimapim nem bilong yupela yet na tok, ‘Mipela i save long lo bilong God.’ Tasol ating yupela yet i save kalapim lo, na long dispela pasin yupela i bagarapim nem bilong God.”—Rom 2:21-23.
7 Long rot bilong ol dispela askim, Pol i kamapim tupela rong em Tenpela Lo i tok long en: No ken stil, na no ken mekim pasin pamuk. (Kisim Bek 20:14, 15) Sampela Juda long taim bilong Pol ol i amamas long ol i gat Lo bilong God. Ol ‘i skul pinis long Lo, na ol i ting ol i soim rot long ol aipas, na ol i stap olsem lait bilong ol man i stap long tudak, na ol i tisa bilong ol liklik pikinini.’ (Rom 2:17-20) Tasol sampela ol i man bilong tupela maus, long wanem, long pasin hait ol i wok long stil na mekim pasin pamuk. Dispela pasin i nogutim Lo na Man i bin kamapim Lo, em i stap long heven. Yu inap lukim olsem ol i no inap tru long skulim ol narapela; ol i no wok long skulim ol yet.
8. Ating olsem wanem sampela Juda long taim bilong Pol i bin “stilim samting bilong ol haus lotu”?
8 Pol i stori long pasin bilong stilim ol samting bilong ol haus lotu. Olsem wanem? Sampela Juda i mekim tru dispela samting? Pol i tok long wanem samting? Dispela skripsa i no stori long olgeta samting, olsem na yumi no ken tokaut stret long olsem wanem sampela Juda i “stilim samting bilong ol haus lotu.” Kuskus bilong taun Efesus i bin tok olsem ol poroman bilong Pol i no man bilong “stilim samting bilong haus lotu.” Dispela tok i soim olsem sampela man i ting ol Juda i gat asua long dispela pasin. (Aposel 19:29-37) Olsem wanem? Ol yet i mekim sampela wok o wok bisnis long ol gutpela samting bilong ol haus lotu bilong ol haiden, em ol samting ol i kisim taim ol i pait na daunim ol dispela lain o ol man i strong long lotu ol i bin stilim? Lo bilong God i tok, ol i mas bagarapim gol na silva ol i bin wokim ol giaman god long en, ol i no ken kisim bilong mekim sampela wok long en. (Lo 7:25)a Olsem na ating Pol i tok long ol Juda i bin sakim tok bilong God na ol i mekim wok long ol samting bilong ol haus lotu bilong ol haiden o mekim wok bisnis long en.
9. Wanem pasin nogut ol i mekim long tempel long Jerusalem na dispela i wankain olsem pasin bilong stilim ol samting bilong tempel?
9 Tasol Josifas i stori long wanpela bikpela pasin giaman fopela Juda i bin mekim long Rom, em lida bilong ol dispela man i wanpela tisa bilong Lo. Dispela fopela man i kirapim wanpela meri Rom i save bihainim lotu Juda, long givim gol na ol narapela gutpela samting bilong em olsem presen long tempel i stap long Jerusalem. Taim ol i kisim ol dispela gutpela samting bilong meri, ol yet i mekim wok long ol—i olsem ol i stil long tempel.b Sampela man i stil long tempel bilong God taim ol i givim ol animal i gat sik samting olsem ofa, na mekim wok bisnis long tempel na mekim tempel i kamap olsem “ples hait bilong ol stilman.”—Matyu 21:12, 13; Malakai 1:12-14; 3:8, 9.
Lainim Ol Man Long Stretpela Pasin Kristen
10. Yumi mas tingim wanem bikpela samting bilong tok bilong Pol i stap long Rom 2:21-23?
10 Maski Pol i toktok long wanem pasin ol i bin mekim, olsem pasin stil, pamuk, na stilim ol samting bilong tempel, yumi mas tingim bikpela samting Pol i laik tok long en. Em i tok: “Yupela i save skulim ol arapela manmeri, tasol bilong wanem yupela i no save skulim yupela yet?” Ol samting Pol i toktok long en, em i samting bilong stretpela pasin. Dispela aposel i no toktok long sampela bilip bilong Baibel o long ol samting i bin kamap long bipo. Pasin bilong man long skulim em yet na ol narapela man em Pol i toktok long en, em ol samting bilong stretpela pasin Kristen.
11. Bilong wanem yu mas tingim stretpela pasin Kristen taim yu stadi long Baibel?
11 Bilong yumi ken bihainim tok bilong Rom 2:21-23, yumi mas lain long stretpela pasin Kristen long Baibel, na yumi mas bihainim ol tok yumi kisim save long en, na lainim ol narapela long mekim wankain pasin. Olsem na taim yu stadi long Baibel, traim long luksave long ol lo bilong Jehova, em as bilong stretpela pasin Kristen tru. Tingim tingim long bel ol gutpela tok bilong skulim yu i stap long Baibel. Orait nau strongim bel na bihainim ol tok yu lain long en. Bilong mekim olsem yu mas i gat strongpela bel na yu mas tingting strong long mekim. I no hatwok long yumi ol sinman i kamapim tok bilong soim olsem sampela taim i gat as na yumi no inap o yumi no ken bihainim stretpela pasin Kristen taim wanpela samting i kamap. Ating ol Juda em Pol i toktok long ol, ol i mekim dispela kain tok bilong soim olsem pasin ol i mekim i orait, o ol i laik paulim ol narapela. Tasol tok bilong Pol i soim olsem man i no ken tok olsem i gat as na em i no inap bihainim stretpela pasin Kristen o em i ken givim baksait long en long taim em i ting i stret long mekim olsem.
12. Olsem wanem gutpela pasin o pasin nogut bilong man i mekim sampela samting long nem bilong God Jehova? Bilong wanem i gutpela long tingim dispela samting?
12 Dispela aposel i kamapim wanpela bikpela as na yu mas lain na bihainim stretpela pasin yu kisim save long en long Baibel. Pasin nogut bilong ol Juda i mekim sampela samting long nem bilong Jehova: “Yupela i save litimapim nem bilong yupela yet na tok, ‘Mipela i save long lo bilong God.’ Tasol ating yupela yet i save kalapim lo, na long dispela pasin yupela i bagarapim nem bilong God. . . . ‘Asua bilong yupela tasol, na ol arapela lain i wok long tok bilas na daunim nem bilong God.’ ” (Rom 2:23, 24) Na i wankain tu long nau, sapos yumi givim baksait long stretpela pasin Kristen, yumi bagarapim nem bilong Man i as bilong dispela pasin. Tasol sapos yumi strong long bihainim ol lo bilong God, dispela i save litimapim nem bilong em. (Aisaia 52:5; Esekiel 36:20) Pasin bilong tingim dispela inap strongim tingting bilong yu sapos sampela traim o sampela samting i kamap na i luk olsem pasin bilong givim baksait long stretpela pasin Kristen i gutpela rot bilong bihainim. Na tu, tok bilong Pol i lainim yumi long sampela narapela samting. Yu save olsem pasin bilong yu i mekim sampela samting long nem bilong God. Orait taim yu skulim ol narapela, helpim ol long save olsem sapos ol i bihainim o ol i no bihainim stretpela pasin ol i wok long lainim, dispela i mekim sampela samting long nem bilong Jehova. Tru, pasin bilong bihainim stretpela pasin Kristen i mekim na man inap i stap belgut na skin bilong em bai stap strong, tasol i no dispela samting tasol. Nogat. Dispela pasin i mekim gut nem bilong Man i as bilong dispela pasin na i save kirapim ol man long bihainim.—Song 74:10; Jems 3:17.
13. (a) Olsem wanem Baibel i save helpim yumi long ol samting bilong stretpela pasin? (b) Wanem bikpela tok i stap long 1 Tesalonaika 4:3-7?
13 Stretpela pasin i mekim sampela samting long ol narapela man tu. Yu inap luksave long dispela long stori bilong sampela man long Baibel i soim ol gutpela samting i kamap taim man i bihainim ol lo bilong God long stretpela pasin na ol samting nogut i kamap taim man i no bihainim. (Stat 39:1-9, 21; Josua 7:1-25) Yu inap ritim tu ol dispela strongpela tok long stretpela pasin: “Laik bilong God em i olsem. Yupela i mas givim laip bilong yupela olgeta long em na kamap holi. Olsem na yupela i mas abrusim olgeta kain pasin pamuk. Yupela i mas bosim ol laik na tingting nogut i save kamap long bel bilong yupela, bai yupela i bihainim ol gutpela pasin na ol pasin God i laikim. Nogut ol dispela laik na tingting nogut i pulim yupela na yupela i go mekim olkain pasin pamuk olsem ol haiden i no save long God ol i save mekim. Yupela i no ken mekim rong long ol Kristen brata na giamanim ol na mekim dispela kain pasin wantaim ol meri bilong ol. . . . God i no singautim yumi bilong bihainim pasin i doti. Nogat tru. Em i singautim yumi bilong givim laip bilong yumi long em na bihainim pasin i holi.”—1 Tesalonaika 4:3-7.
14. Yu inap mekim wanem ol askim long yu yet long tok i stap long 1 Tesalonaika 4:3-7?
14 Long rot bilong dispela skripsa, klostu olgeta man inap luksave olsem pasin pamuk i save brukim lo bilong stretpela pasin Kristen. Tasol yu inap kisim sampela save moa long en. Sampela skripsa i opim rot long yu ken stadi moa na tingim tingim dispela tok long bel, na long dispela rot bai yu kisim bikpela save moa. Olsem: Yu inap tingting long mining bilong tok bilong Pol taim em i tok, man i mekim pasin pamuk em inap “mekim rong long ol Kristen brata na giamanim ol.” Ol i mekim wanem kain rong long ol brata, na olsem wanem pasin bilong save gut long dispela inap strongim yu long bihainim stretpela pasin Kristen? Olsem wanem save yu kisim long dispela i ken inapim yu long skulim ol narapela na helpim ol long litimapim nem bilong God?
Stadi Bilong Lainim Ol Narapela
15. Yu ken mekim wok long wanem ol tul bilong skulim yu yet taim yu mekim stadi bilong yu yet?
15 Ol Witnes Bilong Jehova i gat ol tul bilong skelim sampela askim o tok i save kamap taim ol i stadi bilong skulim ol yet o ol narapela. Wanpela tul i stap long planti tok ples em buk Watch Tower Publications Index. Sapos yu gat dispela buk, yu ken mekim wok long en bilong painim sampela save long ol buk na nius bilong Baibel ol Witnes Bilong Jehova i wokim. Yu ken skelim long rot bilong ol bikpela tok o lukim lista i gat ol ves bilong Baibel. Narapela tul ol Witnes Bilong Jehova i ken mekim wok long en long planti bikpela tok ples em Watchtower Library. Dispela program bilong kompiuta i stap long CD-ROM na em i gat planti buk na nius long en. Long rot bilong dispela program man inap skelim ol bikpela tok na kisim save long insait bilong ol skripsa. Sapos yu gat wanpela bilong dispela tul o yu gat tupela wantaim, mekim wok long en taim yu stadi long Baibel bambai yu ken skulim ol narapela.
16, 17. (a) Yu inap kisim we sampela tok i givim save long yumi long ol rong em 1 Tesalonaika 4:6 i stori long en? (b) Long wanem ol rot man bilong mekim pasin pamuk i mekim rong long narapela?
16 Yumi ken skelim dispela skripsa yumi lukim pinis, em 1 Tesalonaika 4:3-7. Em i toktok long sampela rong ol man i bin mekim long ol narapela. Ol i mekim rong long husat? Na olsem wanem ol i mekim rong long ol? Taim yu mekim wok long ol dispela tul mipela i stori long en, ating yu bai painim planti tok i stori long ol dispela ves, na long ol dispela rong em Pol i tok long en. Yu ken ritim sampela tok olsem long buk Insight on the Scriptures, Volium 1, pes 863-864; Bel Isi na Gutpela Sindaun—Bai Kamap Olsem Wanem?, pes 145; Wastaua (tok Inglis), Novemba 15, 1989, pes 31.
17 Taim yu stadi, bai yu lukim olsem ol dispela buk i kamapim klia olsem tok bilong Pol i tru. Man i mekim pasin pamuk em i mekim sin long God na em inap kisim ol sik. (1 Korin 6:18, 19; Hibru 13:4) Man i mekim pasin pamuk em i mekim planti rong long meri em i mekim sin wantaim em. Man i mekim na meri i no stap klin long ai bilong God, na bel bilong em i gat tok. Sapos em i meri singel, man i pasim em long marit olsem nupela meri, na man dispela meri i maritim long bihain i no inap maritim nupela meri. Man i nogutim papamama bilong meri na man bilong em sapos meri i marit. Man i mekim pasin pamuk i bagarapim nem bilong famili bilong em yet. Sapos em i insait long kongrigesen Kristen, em i bagarapim nem bilong kongrigesen tu.—1 Korin 5:1.
18. Olsem wanem pasin bilong stadi long Baibel long stretpela pasin Kristen i ken helpim yu?
18 Ol kain tok olsem long rong man i mekim long narapela i helpim yu long kisim bikpela save moa long mining bilong dispela ves, a? Kain pasin olsem bilong stadi inap helpim yu tru. Taim yu mekim olsem, yu wok long lainim yu yet. Pasin bilong yu long pilim dispela tok na save olsem tok bilong God i tru olgeta, em bai go bikpela. Bai yu strongim tingting bilong yu long bihainim stretpela pasin Kristen, maski wanem kain traim bai kamap. Na bai yu inap mekim wok tisa bilong yu i kamap gutpela moa! Olsem: Taim yu skulim ol narapela long tok i tru bilong Baibel, yu ken kamapim insait bilong 1 Tesalonaika 4:3-7 long ol, na helpim ol long save na pilim tru stretpela pasin Kristen. Long dispela rot, stadi yu mekim inap helpim yu na planti narapela man long litimapim nem bilong God. Mipela i bin kamapim wanpela tok tasol bilong pas Pol i bin raitim long ol Tesalonaika. I gat planti narapela samting bilong stretpela pasin Kristen, na planti narapela stori long Baibel na tok kaunsel em yu ken stadi, bihainim, na lainim ol narapela long en.
19. Bilong wanem em i bikpela samting long yu mas bihainim stretpela pasin Kristen?
19 Yumi ken save tru olsem em i savepasin long bihainim stretpela pasin Kristen. Jems 3:17 i tok, “gutpela tingting na save” i kam long God Jehova yet, na i “save bihainim klinpela tingting.” Dispela i kamapim klia olsem yumi mas bihainim ol lo bilong God long stretpela pasin. Jehova i laik bai ol man i olsem mausman bilong em bilong skulim ol narapela long Baibel, ol yet i mas i stap olsem gutpela piksa long pasin bilong “i stap klin tru.” (1 Timoti 4:12) Wokabaut bilong ol disaipel bilong bipo olsem Pol na Timoti i kamapim klia olsem ol i sakim pasin pamuk. Pol i tok olsem: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin. Yupela i no ken mekim tok doti na tok kranki na tok pilai nogut.”—Efesus 5:3, 4.
20, 21. Bilong wanem yu wanbel long tok bilong aposel Jon i stap long 1 Jon 5:3?
20 Tru, ol lo bilong stretpela pasin i stap long Baibel i klia na i kolim stret ol samting, tasol ol i no putim hevi long man. Dispela i klia tru long tingting bilong Jon, em wanpela aposel i bin stap longpela taim tru. Em i bin skelim i stap bilong ol man inap planti yia, na em i save olsem stretpela lo Kristen i no putim hevi long ol. Nogat. Em i gutpela, na i helpim man, na i kamapim ol gutpela samting. Jon i kamapim klia dispela samting, em i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 Jon 5:3.
21 Tasol Jon i no tok, pasin bilong bihainim tok bilong God na stretpela pasin Kristen i save helpim yumi long abrusim ol hevi na ol samting nogut em pasin bilong sakim tok i save kamapim, na long dispela as tasol em i nambawan gutpela rot long bihainim. Nogat. Em i kamapim stretpela tingting long dispela samting, na pastaim em i tok yumi bihainim stretpela pasin Kristen, long wanem, yumi laikim tru God Jehova, na em i gutpela rot long yumi ken soim dispela pasin bilong laikim em tru. Tru tumas, bilong yumi ken skulim yumi yet na ol narapela long laikim tru God, yumi mas bilip long ol gutpela lo bilong em na bihainim. Yes, yumi mas skulim yumi yet na ol narapela long stretpela pasin Kristen.
[Ol Futnot]
a Josifas i tok ol Juda i no save bagarapim ol samting i holi, tasol em i senisim liklik tok bilong lo bilong God na tok: “No ken bagarapim nem bilong ol god em ol man bilong ol narapela taun i save lotuim, no ken stilim ol samting long ol haus lotu bilong ol narapela lain, no ken kisim ol gutpela samting ol i bin makim bilong mekim sampela wok long nem bilong wanpela god.”—Buk Jewish Antiquities, Buk 4, sapta 8, paragraf 10.
b Buk Jewish Antiquities, Buk 18, sapta 3, paragraf 5.
Yu Inap Tingim?
• Bilong wanem pastaim yumi mas stadi bilong skulim yumi yet bambai yumi ken skulim ol narapela?
• Olsem wanem pasin bilong yumi inap mekim sampela samting long nem bilong Jehova?
• Man bilong mekim pasin pamuk inap mekim rong long husat?
• Yu gat wanem strongpela tingting long stretpela pasin Kristen?
[Piksa long pes 22]
“Ol lo bilong en i no givim hevi long yumi”