Bihainim Pasin Bilong Ol King

“Em i mas kisim wanpela buk ol i bin raitim ol lo bilong God long en . . . na raitim wankain tok tasol. Em i mas putim dispela buk i stap klostu long em na ritim hap tok long en long olgeta de.”​—⁠LO 17:​18, 19.

 1. Kristen i mas i gat laik long bihainim pasin bilong husat?

ATING yu no save ting yu wankain olsem wanpela king o kwin. I no gat wanpela gutpela Kristen o sumatin bilong Baibel inap ting olsem em i gat namba long mekim wok king, olsem ol gutpela king olsem Devit, Josaia, Hesekia, na Jehosafat i gat namba long mekim. Tasol long wanpela bikpela samting yu inap bihainim pasin bilong ol na yu mas mekim olsem. Em wanem pasin? Na bilong wanem yu mas i gat laik long bihainim dispela pasin bilong ol?

2, 3. Jehova i lukim olsem ol man bai i gat laik long husat i bosim ol? King i mas mekim wanem?

² Long taim bilong Moses, paslain tru long taim God i orait long wanpela king bilong graun i bosim lain Israel, Em i lukim olsem lain bilong Em bai i gat laik long kisim wanpela king. Olsem na spirit bilong em i kirapim Moses long raitim sampela tok i stret long dispela samting long kontrak bilong Lo. Em ol tok king i mas bihainim.

³ God i tok: “Taim yupela i kisim dispela graun God, Bikpela bilong yumi, i laik givim long yupela, . . . ating yupela i laik bai wanpela king i bosim yupela, olsem ol arapela lain pipel nabaut. Orait long dispela taim, yupela i mas larim Bikpela yet i makim man bilong kamap king. . . . Taim em i kamap king, orait em i mas kisim wanpela buk ol i bin raitim ol lo bilong God long en . . . na raitim wankain tok tasol. Em i mas putim dispela buk i stap klostu long em na ritim hap tok long en long olgeta de. Olsem bai em i ken aninit long Bikpela na bihainim tru olgeta lo na tok bilong God i stap long dispela buk.”​—⁠Lo 17:​14-19.

 4. God i tok ol king i mas mekim wanem ol samting?

⁴ Tru tumas, king em Jehova bai makim bilong bosim ol man i lotuim Em, em i mas raitim long wanpela buk ol tok yu inap painim long Baibel bilong yu yet. King i mas ritim dispela buk long olgeta de, inap planti taim. Dispela i no bilong helpim em long putim gut ol tok long tingting. Nogat. Em i pasin bilong stadi, na wok bilong dispela stadi em i bilong helpim king. King em Jehova i orait long en i mas mekim dispela kain stadi bambai em i ken kisim na holim stretpela tingting long bel bilong em. Na tu, em i mas stadi long ol dispela tok bilong God bambai wok bilong em i ken kamap gutpela na em i ken kamap king i gat gutpela tingting.​—⁠2 King 22:​8-​13; Sindaun 1:​1-4.

Lain Olsem Wanpela King

 5. Wanem ol buk bilong Baibel i stap bilong King Devit i ken raitim na ritim tok bilong en? Em i ting olsem wanem long dispela wok?

⁵ Yu ting dispela i makim olsem Devit i mas mekim wanem taim em i kamap king bilong Israel? Em i mas kisim wanpela buk na raitim ol tok bilong Pentatuk (em Stat, Kisim Bek, Wok Pris, Namba, Lo). Ating dispela i mekim na Devit i pilim tru ol dispela tok long bel na tingting, long wanem, em i mekim wok long ai na han bilong em yet bilong raitim ol tok bilong Lo. Ating Moses i raitim tu Buk Jop na Song 90 na 91. Olsem wanem? Devit i raitim gen tok bilong ol dispela buk tu? Ating em i mekim. Na tu, ating em i gat Buk Josua, Hetman, na Rut. Olsem na yu inap save olsem King Devit em i gat bikpela hap bilong Baibel em i ken ritim na skelim tok bilong en. Na i gat as na yu inap bilip olsem em i bin mekim olsem. Tok em i mekim long Lo bilong God i stap long Song 19:​7-11, i kamapim klia dispela samting.

 6. Olsem wanem yumi ken save tru olsem Jisas i laikim tok bilong Baibel olsem tumbuna bilong em Devit i bin mekim?

⁶ Man Devit i piksa bilong em​—⁠Jisas, em Pikinini bilong Devit​—⁠em i bihainim wankain pasin. Em i pasin bilong Jisas long go long haus lotu long olgeta wik. Long dispela hap em i harim ol i ritim na kamapim insait bilong ol skripsa. Na tu, long sampela taim Jisas yet i ritim strong Tok Bilong God na kamapim insait bilong en. (Luk 4:​16-21) I no hatwok long luksave olsem Jisas i save gut long ol skripsa. Ritim fopela Gutnius na lukim hamas taim Jisas i tok “Buk bilong God i tok” o long sampela narapela rot em i kamapim ol tok bilong Baibel. Long tok bilong em antap long maunten, em Matyu i raitim, Jisas i kolim sampela tok bilong Ol Skripsa Hibru inap 21 taim.​—⁠Matyu 4:​4-​10; 7:​29; 11:10; 21:13; 26:​24, 31; Jon 6:​31, 45; 8:​17.

 7. Olsem wanem pasin bilong Jisas i narapela kain long pasin bilong ol bikman bilong lotu?

⁷ Jisas i bihainim tok i stap long Song 1:​1-3: “Man i no save bihainim tok bilong ol man nogut, . . . dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait. . . . Olgeta samting em i mekim i save kamap gutpela.” Dispela pasin i narapela kain tru long pasin bilong ol bikman bilong lotu long taim bilong em, em ol i save ‘skulim ol man long lo, olsem Moses i bin mekim’ tasol ol i givim baksait long “lo bilong God”!​—⁠Matyu 23:​2-4.

 8. Taim ol bikman bilong lotu Juda i ritim na stadi long Baibel, bilong wanem dispela i no bin helpim ol?

⁸ Tasol sampela inap tingting planti long wanpela skripsa, em yumi inap ting long dispela skripsa Jisas i tok olsem i no gutpela long stadi long Baibel. Long Jon 5:​39, 40, yumi ken ritim tok Jisas i mekim long sampela man long taim bilong em: “Yupela i ting tok i stap long buk bilong God i save givim yupela laip i stap gut oltaim oltaim. Olsem na yupela i save wok long ritim na skelim olgeta tok i stap long buk bilong God. Tasol buk bilong God tu i save tokaut long mi, na yupela i no laik i kam long mi bilong kisim laip.” Jisas i no mekim dispela tok bambai ol Juda i no ken stadi long ol skripsa. Nogat. Em i laik kamapim klia olsem ol i save giaman o ol i no save bihainim wankain pasin long olgeta taim. Ol i save olsem ol skripsa inap bringim ol i go long laip oltaim, tasol ol dispela wankain skripsa ol i wok long skelim i mas bringim ol i go long Mesaia tu, em Jisas. Tasol ol i no laik bilip long em. Olsem na pasin bilong stadi i no helpim ol, long wanem, ol i no gat gutpela bel, na ol i no laik bai narapela i lainim ol.​—⁠Lo 18:15; Luk 11:52; Jon 7:​47, 48.

 9. Ol aposel na ol profet bilong bipo i stap olsem gutpela piksa long wanem samting?

⁹ Pasin bilong ol disaipel bilong Jisas na bilong ol aposel tu i narapela kain! Ol i stadi long ‘tok bilong God em dispela tok inap long givim gutpela tingting long ol, na bai God i ken kisim bek ol.’ (2 Timoti 3:15) Ol i olsem ol profet bilong bipo em ol i bin “wok strong long painim as bilong dispela tok bilong God.” Ol dispela profet i no ting dispela pasin bilong wok strong long stadi i bilong sampela mun o wanpela yia tasol. Nogat. Aposel Pita i tok, “ol profet i wok long askim” long Krais na wanem ol gutpela samting wok bilong em long kisim bek ol manmeri bai kamapim. Long namba wan pas bilong em, inap 34 taim Pita i kamapim tok bilong 10-pela buk bilong Baibel.​—⁠1 Pita 1:​10, 11.

10. Bilong wanem yumi olgeta wan wan i mas i gat laik long stadi long Baibel?

¹⁰ Em nau, pasin bilong stadi gut long Tok Bilong God em i wanpela wok ol king bilong lain Israel long bipo i mas mekim. Jisas i bihainim dispela pasin. Na lain manmeri bilong mekim wok king wantaim Krais long heven, ol tu i mas mekim olsem. (Luk 22:​28-​30; Rom 8:​17; 2 Timoti 2:​12; KTH 5:​10; 20:⁠6) Olgeta man i wet long kisim ol blesing taim Kingdom i bosim graun, em i bikpela samting long ol tu i mas bihainim dispela pasin bilong ol king.​—⁠Matyu 25:​34, 46.

Wanpela Wok Bilong Ol King na Bilong Yu

11. (a) Wanem samting nogut inap kamap long pasin bilong ol Kristen long stadi? (b) Gutpela sapos yumi mekim wanem ol askim long yumi yet?

¹¹ Yumi ken tokaut stret olsem olgeta trupela Kristen i mas mekim stadi bilong ol yet long Baibel. Dispela i no samting yu mas mekim taim yu nupela long stadi long Baibel wantaim ol Witnes Bilong Jehova na em tasol, nogat. Yumi olgeta wan wan i mas tingting strong long abrusim pasin bilong sampela man long taim bilong aposel Pol, em bihain ol i lusim pasin bilong stadi. Ol i bin lain long “ol namba wan hap tru bilong tok bilong God,” olsem “ol skul yumi save kisim pastaim long tok bilong Krais.” Tasol ol i no wok long stadi moa i go, olsem na ol i no “kisim olkain skul bilong ol man i bikpela pinis.” (Hibru 5:12–6:⁠3) Olsem na yumi ken askim yumi yet: ‘Mi gat wanem kain tingting long pasin bilong stadi long Baibel, maski mi bin stap insait long kongrigesen Kristen inap sotpela taim o longpela taim pinis? Pol i beten bambai ol Kristen long taim bilong em i ken mekim ol samting na bai ol i “save long God, na oltaim dispela save bai i kamap bikpela moa.” Olsem wanem? Pasin bilong mi i soim olsem mi gat wankain laik?’​—⁠Kolosi 1:​9, 10.

12. Bilong wanem em i bikpela samting long yumi mas wok yet long laikim Tok Bilong God?

¹² Wanpela bikpela samting bilong helpim yu long stadi gut i olsem: Yu mas lain long laikim tru Tok Bilong God. Song 119:​14-16 i tok, pasin bilong skelim gut Tok Bilong God long olgeta taim na tingim tingim, em i rot bilong kisim amamas long en. Dispela tok em i tru, maski yu bin stap olsem wanpela Kristen inap sotpela taim o longpela taim pinis. Bilong kamapim klia dispela samting, tingim pasin bilong Timoti. Maski dispela elda Kristen i stap pinis olsem “gutpela soldia bilong Krais Jisas,” Pol i laik kirapim em long wok strong long “autim stret tok tru bilong God.” (2 Timoti 2:​3, 15; 1 Timoti 4:​15) Tru tumas, bilong “wok strong” yu mas i gat pasin bilong stadi oltaim.

13. (a) Yu ken mekim wanem bilong kisim bikpela hap taim moa bilong stadi long Baibel? (b) Yu ting yu inap mekim wanem kain senis bilong kisim bikpela hap taim moa long stadi?

¹³ Wanpela rot bilong helpim yu long stadi oltaim, em yu mas makim hap taim bilong stadi long Baibel. Olsem wanem? Yu save mekim olsem? Maski yu bekim dispela askim olsem wanem, tasol sapos yu lusim bikpela hap taim moa bilong stadi, yu ting dispela bai helpim yu? Yu inap tingting, ‘Olsem wanem mi inap mekim olsem?’ Sampela i save kirap hariap long moningtaim bilong ol i gat bikpela hap taim moa bilong stadi gut long Baibel. Ating ol i save ritim Baibel inap 15 minit o ol i mekim sampela stadi bilong ol yet. Narapela samting yu ken mekim, yu ken senisim liklik sediul bilong yu bilong olgeta wik. Olsem: Sapos yu save ritim niuspepa o lukim nius long televisen long klostu olgeta apinun, yu ting yu inap lusim dispela pasin inap wanpela de long wik? Yu inap mekim wok long dispela hap taim bilong stadi moa long Baibel long dispela de. Sapos yu no ritim niuspepa o lukim nius long televisen long wanpela de long olgeta wik na yu lusim hap taim​—⁠inap 30 minit samting​—⁠bilong mekim stadi bilong yu, insait long wanpela yia bai yu kisim 25 aua moa long stadi. Tingim ol gutpela samting yu inap kisim taim yu lusim 25 aua moa bilong ritim Baibel o stadi! Narapela samting yu ken mekim i olsem: Long wik antap, long pinis bilong wan wan de skelim ol samting yu bin mekim. Tingim sapos i gat sampela wok samting yu inap lusim o sotim hap taim yu lusim bilong mekim dispela samting na bai yu gat bikpela hap taim moa bilong ritim Baibel o stadi.​—⁠Efesus 5:​15, 16.

14, 15. (a) Bilong wanem em i bikpela samting long putim ol mak bilong winim taim yu laik mekim stadi bilong yu yet? (b) Wanem ol mak yu ken putim bilong ritim Baibel?

¹⁴ Wanem samting i ken helpim yu na pasin bilong stadi i no hatwok na yu gat laik long mekim? Putim ol mak. Wanem ol mak yu ken putim bilong winim na i stret long yu? Wanpela gutpela mak em planti inap winim, em wok bilong ritim Baibel olgeta. Ating sampela taim yu bin ritim sampela hap bilong Baibel na dispela i bin helpim yu. Orait yu ting nau yu ken putim mak bilong ritim Baibel olgeta? Bilong winim dispela mak, ating pastaim yu ken ritim fopela Gutnius, na bihain yu ken putim narapela mak, olsem ritim ol narapela buk bilong Ol Skripsa Grik. Taim yu kisim amamas na ol gutpela samting long dispela, nau yu ken putim mak bilong ritim ol buk Moses i raitim na ol narapela buk i go inap long Esta. Taim yu mekim olsem pinis, bai yu luksave olsem yu inap ritim Baibel olgeta. Wanpela meri i gat 65 krismas taim em i kamap wanpela Kristen, na em i raitim insait long karamap bilong Baibel bilong em det em i kirap ritim Baibel na det em i pinis long ritim. Ol det i soim olsem em i ritim Baibel olgeta inap 5-pela taim pinis! (Lo 32:​45-47) Na em i no ritim Baibel long kompiuta o long pepa ol i prinim long kompiuta, nogat. Em i holim Baibel long han bilong em.

¹⁵ Sampela em ol i bin ritim pinis Baibel olgeta, ol i mekim ol narapela samting bambai pasin bilong ol long stadi inap kamapim ol gutpela samting moa. Wanpela rot em ol i stadi long wanpela buk samting i stori long buk bilong Baibel ol i laik ritim. Long buk “All Scripture Is Inspired of God and Beneficial” na buk Insight on the Scriptures, yu inap kisim sampela gutpela save long ol ples ol samting i bin kamap long en, na ol narapela samting bilong taim ol i bin raitim Baibel, na olsem wanem ol wan wan buk bilong Baibel inap helpim yu.a

16. Yumi no ken bihainim wanem kain pasin bilong stadi long Baibel?

¹⁶ Taim yu stadi, yu no ken bihainim pasin bilong planti man em ol i save kolim olsem ol saveman bilong Baibel. Ol i strong long skelim ol tok bilong Baibel, i olsem ol man tasol i as bilong ol tok bilong en. Sampela i laik makim wan wan buk i bilong wanpela lain stret, o ol i laik tingim olsem i gat wanem as na man i raitim buk na em i gat wanem kain tingting. Dispela kain tingting bilong ol man inap mekim na man i ting Baibel em buk i stori long ol samting bilong bipo tasol o i stori long ol kain kain tingting bilong lotu. Sampela saveman i strong long skelim ol wan wan tok bilong Baibel. Ol i givim bel long stadi long olsem wanem ol tok i bin kamap na wanem mining bilong ol tok long tok Hibru na tok Grik, na ol i no tingim insait bilong tok bilong God. Yu ting kain pasin olsem bilong mekim stadi i kamapim strongpela bilip i save kirapim man long mekim ol samting?​—⁠1 Tesalonaika 2:⁠13.

17. Bilong wanem yumi mas ting tok bilong Baibel i bilong olgeta man?

¹⁷ Yu ting tingting bilong ol saveman i gat as bilong en? Yu ting tru olgeta wan wan buk bilong Baibel i gat wanpela bikpela tok tasol o i bilong wanpela lain manmeri tasol? (1 Korin 1:​19-21) Ol buk bilong Baibel i save helpim tru ol manmeri i gat kain kain krismas na sindaun. Maski pastaim ol i bin raitim wanpela buk i go long wanpela man tasol, olsem Timoti o Taitus, o long wanpela lain, olsem ol Galesia na ol Filipai, yumi olgeta inap stadi long ol dispela buk na i gutpela long mekim olsem. Ol i bikpela samting long yumi olgeta, na wanpela buk inap skelim planti bikpela tok na helpim kain kain man. Tru tumas, tok bilong Baibel i bilong olgeta lain man, na dispela i helpim yumi long save long as na ol i bin tanim tok bilong en long tok ples bilong ol man long olgeta hap.​—⁠Rom 15:⁠4.

Helpim Yu na Ol Narapela

18. Taim yu ritim Baibel, yu mas tingting long wanem ol samting?

¹⁸ Taim yu stadi long Baibel, em bai helpim yu tru sapos yu traim long kisim gut insait bilong tok bilong Baibel na save long olsem wanem ol liklik tok i stret wantaim. (Sindaun 2:​3-5; 4:⁠7) Ol samting Jehova i bin kamapim klia long rot bilong Tok bilong em i poroman wantaim long ol samting em i laik mekim. Olsem na taim yu ritim Baibel, tingim olsem wanem ol tok yu ritim i stret wantaim ol samting God i laik mekim. Yu ken tingim olsem wanem wanpela samting i bin kamap, o wanpela tingting, o tok profet i stret wantaim ol samting Jehova i gat laik long mekim. Askim yu yet: ‘Dispela i lainim mi long wanem pasin bilong Jehova? Olsem wanem em i stret wantaim ol samting God i laik mekim long rot bilong Kingdom bilong em?’ Yu ken tingim ol dispela askim tu: ‘Olsem wanem mi ken mekim wok long dispela save? Mi inap mekim wok long en taim mi skulim ol narapela o givim ol gutpela tingting long ol em Baibel i as bilong en?’​—⁠Josua 1:⁠8.

19. Taim yu stori long ol samting yu bin lainim, dispela i save helpim husat? Stori long dispela.

¹⁹ Pasin bilong tingim ol narapela i helpim yu long narapela rot tu. Taim yu ritim Baibel na stadi, yu bai lainim ol nupela samting na kisim gutpela save moa. Traim long kamapim ol dispela nupela save taim yu toktok wantaim famili bilong yu na ol narapela man. Sapos yu mekim olsem long taim stret na long pasin daun, kain toktok olsem bai kamapim ol gutpela samting. Taim yu givim bel long stori long ol samting yu bin lainim o i bin kirapim tingting bilong yu, ol narapela bai pilim tru dispela tok. Na tu, dispela bai helpim yu yet. Olsem wanem em bai helpim yu? Ol saveman i tok, man bai tingim longpela taim moa ol samting em i bin lainim o stadi long en sapos em i kolim dispela tok planti taim, olsem stori long ol narapela, taim em i tingim yet dispela tok.b

20. Bilong wanem pasin bilong ritim Baibel planti taim bai helpim yu tru?

²⁰ Olgeta taim yu ritim wanpela buk bilong Baibel, bai yu kisim sampela nupela save. Tok bilong sampela ves bai kirapim tru tingting bilong yu em bipo yu no bin tingting tumas long en. Bai yu kisim sampela save moa long ol dispela skripsa. Dispela i kamapim klia olsem ol man yet i no bin raitim ol buk bilong Baibel, nogat; ol dispela buk i gutpela samting tru na i stret long yu ken stadi oltaim long en na kisim helpim. Tingim, ol king olsem Devit, ol i mas “ritim hap tok long en long olgeta de.”

21. Wanem gutpela samting yu inap kisim taim yu stadi moa long Tok Bilong God?

²¹ Yes, ol man i lusim hap taim bilong stadi gut long Baibel ol bai kisim planti gutpela samting long en. Ol bai kisim gutpela save long ol samting bilong spirit. Ol bai pas gut moa wantaim God. Bai ol inap helpim moa yet famili bilong ol tu, na ol brata na sista long kongrigesen Kristen, na ol man i no lotu yet long Jehova.​—⁠Rom 10:​9-​14; 1 Timoti 4:​16.

[Ol Futnot]

Yu Inap Tingim?

• Ol king bilong Israel i mas mekim wanem?

• Jisas na ol aposel i gat wanem kain pasin bilong stadi long Baibel em yumi mas bihainim?

• Wanem ol senis yu inap mekim bilong kisim bikpela hap taim moa bilong mekim stadi bilong yu yet?

• Yu mas i gat wanem kain tingting taim yu laik stadi long Tok Bilong God?

[Blok long pes 15]

“Long Han Bilong Yumi”

“Sapos yumi laik lukim . . . lista bilong olgeta wan wan hap tok bilong Baibel, Intenet em i nambawan gutpela rot long mekim olsem. Tasol sapos yumi laik ritim Baibel, stadi long en, tingting long en, na tingim tingim tok bilong en, yumi mas holim Baibel long han bilong yumi, long wanem, long dispela rot tasol tok bilong en bai go long tingting na bel bilong yumi.”​—⁠Em tok bilong Gertrude Himmelfarb, em wanpela profesa i gat nem na i ritaia pinis long wok bilong em long City University, New York.