Sapta 28

Pait Wantaim Tupela Animal Bilong Kros

Driman 8​​—Kamapim Tok Hait 13:​1-​18

Stori: Wel animal i gat 7-pela het; wel animal i gat tupela kom; piksa bilong wel animal

Taim bilong truim: Taim bilong Nimrot na i kam inap long taim bilong ‘bikpela hevi tru’

1, 2. (a) Jon i tok wanem long dispela snek? (b) Jon i tok piksa na em i tok wanem long wanpela oganaisesen hia long graun na em i bilong dispela snek?

OL I tromoi pinis traipela snek i go daun long graun! Taim yumi lainim ol tok bilong Kamapim Tok Hait yumi save olsem dispela Snek na lain spirit nogut bilong em ol i no inap go bek gen long heven. Tasol yumi mas stori moa long “dispela snek bilong bipo . . . ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun.” Nau Jon i kamapim klia samting Satan i mekim wok long en long ‘pait long dispela meri na ol pikinini bilong en.’ (KTH 12:​9, 17) Jon i stori long dispela snek na em i tok: “Na snek i sanap i stap long nambis bilong solwara.” (KTH 12:​18) Orait, nau yumi ken stori long pasin bilong dispela snek long mekim ol wok bilong em.

² Satan wantaim lain spirit nogut bilong em i no inap i stap moa long heven. Ol i bin raus long heven na ol i olsem kalabus hia long graun, olsem na long nau planti wok bilong spirit nogut i stap, olsem posin na marila na sanguma samting. Satan i man bilong trik na giaman na em i bosim yet ol dispela spirit nogut, ol i olsem oganaisesen nogut bilong em. Tasol olsem wanem? Em i gat wanpela oganaisesen yumi inap lukim na i wok long paulim ol man, o nogat? Jon yet i tokim yumi long dispela samting. Em i tok: “Na mi lukim wanpela wel animal i kamap long solwara. Em i gat 7-pela het na 10-pela kom i kamap long ol het bilong en. Na 10-pela hat olsem ol hat bilong king i stap long ol kom bilong en. Long ol het bilong en ol nem i stap, na as bilong ol dispela nem em ol kain kain pasin bilong tok bilas long God. Dispela wel animal nau mi lukim, em i olsem bikpela wel pusi ol i kolim lepat, na lek bilong en i olsem lek bilong bea, na maus bilong en i olsem maus bilong laion. Na dispela snek i givim strong bilong em yet long dispela wel animal. Em i mekim em i stap king olsem em yet, na em i givim bikpela strong long em.”​—KTH 13:​1, 2.

 3. (a) Long driman profet Daniel i lukim wanem ol animal nogut? (b) Ol dispela traipela animal em Daniel sapta 7 i stori long en, ol i makim wanem samting?

³ Dispela wel animal i makim wanem samting? Baibel yet i tokim yumi. Taim Babilon i no pundaun yet long yia 539 paslain long Krais, wanpela profet Juda, em Daniel, em i driman na em i lukim sampela ol animal nogut. Long Daniel 7:​2-8 em i stori long 4-pela animal i lusim solwara na i kam antap, na namba wan i olsem laion, na namba 2 i olsem bea, na namba 3 i olsem lepat; na Daniel i “lukluk i stap yet na [em i] lukim namba 4 animal. Man, pes bilong en i nogut tru na em i gat bikpela strong moa, na [Daniel i] pret tru long en. Em . . . i gat 10-pela kom long het bilong en.” Dispela animal i wankain olsem animal Jon i lukim long yia 96. Animal Jon i lukim, em i gat ol pasin samting olsem bilong dispela laion na bea na lepat, na em i gat 10-pela kom tu. Ol bikpela animal Daniel i lukim, ol i makim wanem samting? Daniel i tok: “Dispela 4-pela bikpela animal i makim 4-pela [king] bai i kamap.” (Daniel 7:17) Em nau, ol dispela animal i makim ol “king” o ol lain politik ol i bosim graun.

 4. (a) Long Daniel sapta 8, sipsip man na meme man i makim wanem samting? (b) Bikpela kom bilong meme i bruk na 4-pela nupela kom i kamap, na dispela i makim wanem samting?

⁴ Long narapela driman Daniel i lukim wanpela sipsip man i gat tupela kom, na wanpela meme man i gat bikpela kom em i daunim dispela sipsip. Ensel Gebriel i tokim Daniel long tupela animal i makim wanem samting. Gebriel i tok: “Sipsip man i . . . makim [king bilong] Midia na [king bilong] Persia. Na dispela meme . . . i makim [king bilong] Grik.” Na Gebriel i tok, traipela kom bilong dispela meme bai bruk na 4-pela nupela kom bai kamap. Dispela samting i bin kamap 200 yia bihain, taim Bikman Aleksander i dai pinis na gavman bilong em i bruk na i kamap 4-pela gavman, na 4-pela bikman bilong em i bosim ol.​—Daniel 8:​3-8, 20-​25.a

 5. (a) Long tok Grik, dispela tok ‘wel animal’ i makim wanem kain animal? (b) Dispela wel animal bilong Kamapim Tok Hait 13:​1, 2 wantaim 7-pela het bilong en, i makim wanem samting?

⁵ Olsem na nau yumi save, long ai bilong Jehova ol hetman politik bilong graun i olsem ol wel animal. Wanem kain animal? Wanpela saveman, em R. C. H. Lenski, em i tok, dispela animal Kamapim Tok Hait 13:​1, 2 i stori long en em i animal nogut, na Lenski i tok: ‘Wanpela tok Grik (θηρίον) i makim dispela kain animal, na i olsem animal nogut bilong pait na bagarapim na pretim man na em i hangre long kaikai abus.’ Dispela kain animal i makim stret olgeta lain politik bilong dispela graun, em ol i bin kapsaitim blut bilong planti man na ol i rot bilong Satan long bosim ol man! Na 7-pela het bilong dispela wel animal i makim 6-pela bikpela gavman i kam inap long taim bilong Jon​—em Isip, na Asiria, na Babilon, na Midia wantaim Persia, na Grik, na Rom​—na namba 7 i mas kamap bihain.​—Lukim Kamapim Tok Hait 17:​9, 10.

 6. (a) Dispela 7-pela het i bin go pas long mekim wanem? (b) Olsem wanem Jehova i bin mekim wok long ol Rom long givim strafe long lain Juda? Olsem wanem long ol Kristen bilong Jerusalem long dispela taim?

⁶ Na i gat ol narapela gavman tu i bin stap, i no 7-pela tasol; olsem dispela wel animal Jon i bin lukim, em i gat 7-pela het na 10-pela kom na em i gat wanpela bodi tasol. Tasol dispela 7-pela het i makim 7-pela bikpela gavman na olgeta wan wan i bin go pas long mekim nogut long lain bilong God. Long yia 33, taim gavman bilong Rom i stap nambawan bikpela gavman, Satan i mekim wok long dispela gavman long kilim i dai Pikinini bilong God. Long dispela taim God i lusim lain Juda em ol i no bin stap gut long em, na long yia 70 God i larim ol Rom i bekim strafe bilong em long lain Juda. Tasol gutpela tru, God i bin toksave long ol Kristen em i bin makim ol long spirit holi, olsem lain Israel tru bilong God, na ol i lusim Jerusalem na Judia na ol i ranawe i go kalapim wara Jordan na i go long narapela hap na ol i abrusim bagarap.​—Matyu 24:​15, 16; Galesia 6:16.

 7. (a) Wanem samting i mas kamap long las taim, long taim de bilong Bikpela i kirap? (b) Dispela namba 7 het bilong wel animal em Kamapim Tok Hait 13:​1, 2 i stori long en, em i makim wanem samting?

⁷ Tasol klostu long yia 100 samting, planti bilong lain Kristen bilong pastaim ol i lusim tok i tru, na ol “gras nogut, em ol manmeri bilong Satan,” ol i daunim ol Kristen tru, olsem ol ‘gutpela wit,’ “em ol manmeri bilong kingdom.” Tasol long las taim, i gat lain Kristen tru i kamap gen na ol i wok gut wantaim. Long de bilong Bikpela ol dispela stretpela Kristen i mas “lait olsem san.” Olsem na ol i stretim ol samting na bai ol i ken kirap mekim wok bilong God. (Matyu 13:​24-​30, 36-​43) Long dispela taim gavman bilong Rom i no stap moa, tasol narapela gavman i stap, em bikpela gavman bilong Inglan wantaim strongpela gavman bilong Amerika, olsem tupela gavman i bung wantaim na i stap olsem wanpela. Namba 7 het bilong wel animal i makim dispela gavman.

 8. Olsem wanem na i no gat rong long tok, wanpela wel animal i makim gavman bilong Inglan tupela Amerika?

⁸ Sapos yumi tok, ol bikpela gavman politik i kain olsem wel animal, olsem wanem dispela tok i no wanpela tok nogut? Long taim bilong Namba 2 Pait ol birua i bin kotim ol Witnes Bilong Jehova long dispela samting. Long dispela taim ol bikpela kot bilong graun i bin sutim tok long oganaisesen bilong ol Witnes Bilong Jehova na long ol wan wan Witnes tu, olsem ol i no gat namba bilong mekim wok bilong ol. Tasol yumi mas tingim wanpela samting, olsem: Ol gavman yet i gat ol animal o pisin samting i olsem mak bilong kantri bilong ol. Laion i makim Inglan, na tarangau i makim Amerika, na snek i makim Saina. Olsem na yumi no ken bel nogut sapos dispela Man i bin kamapim Baibel Holi em i kolim sampela ol animal bilong makim sampela gavman.

 9. (a) Baibel i tok, Satan i bin givim strong long dispela wel animal, na olsem wanem i no stret sapos sampela man i no orait long dispela tok bilong Baibel? (b) Baibel i tok wanem long Satan? Em i save mekim wanem long stiaim tingting bilong ol gavman?

⁹ Baibel i tok, bikpela strong bilong dispela wel animal, em Satan yet i bin givim long en. Ol man i no ken bel nogut long dispela tok, long wanem, God yet i as bilong en, na long ai bilong God “ol manmeri bilong graun i olsem samting nating. Ol i olsem das bilong graun na i olsem liklik wara i pundaun.” (Aisaia 40:​15, 17; Song 2:​10-​12) Satan i wanpela spirit tru, tasol em i no save bosim bikpaia na givim pen long tewel bilong ol man i stap long en, olsem stori nating bilong ol man i tok, nogat. I no gat bikpaia i stap. Baibel i tok: “Satan yet i . . . kamap olsem ensel bilong lait.” Em i save moa long pasin bilong giamanim ol man, na em i save bosim strong ol wok politik.​—2 Korin 11:​3, 14, 15; Efesus 6:​11-​18.

10. (a) Olgeta wan wan bilong 10-pela kom i gat hat king long en, na dispela i makim wanem samting? (b) I gat 10-pela kom na 10-pela hat king, na dispela tok “10-pela” i makim wanem samting?

¹⁰ I gat 10-pela kom long 7-pela het bilong dispela wel animal. Ating 4-pela het i gat wanpela wanpela kom, na 3-pela het i gat tupela tupela kom. Na olgeta 10-pela kom i gat hat king long en. Daniel i bin stori long sampela ol animal nogut i gat kom, na namba bilong kom bilong ol em i namba tru. Sipsip man i gat tupela kom stret, na i makim wanpela gavman i gat tupela lain stret insait long en, em Midia na Persia. Na meme i gat 4-pela kom stret na i makim 4-pela gavman stret i bin kamap wantaim insait long gavman Grik bilong Bikman Aleksander na i senis bilong gavman bilong em. (Daniel 8:​3, 8, 20-​22) Tasol i no olsem long 10-pela kom bilong dispela wel animal em Jon i lukim. Dispela tok “10-pela” em i tok piksa tasol. (Lukim Daniel 7:24; Kamapim Tok Hait 17:12.) Em i makim olgeta gavman wantaim, em ol i bilong Satan. Na ol dispela kom ol i samting bilong pait. Animal i gat 7-pela het, tasol i no olsem 7-pela gavman i stap long wanpela taim tasol, nogat. Olgeta wan wan bilong dispela 7-pela gavman olgeta, ol i stap long ol narapela narapela taim na bosim graun. Na tu, 10-pela hat king i makim olsem ol liklik gavman bai mekim wok bilong ol long taim ol dispela 7-pela bikpela gavman i bosim graun.

11. “Long ol het bilong [wel animal] ol nem i stap,” na olsem wanem ol dispela nem i olsem “ol kain kain pasin bilong tok bilas long God”?

¹¹ “Long ol het bilong [wel animal] ol nem i stap, na as bilong ol dispela nem em ol kain kain pasin bilong tok bilas long God.” Dispela animal nogut i litimapim nem bilong em yet na dispela i daunim God Jehova na Krais Jisas. Ol gavman i giaman na kolim nating nem bilong God na Krais na bai dispela ol nem i ken helpim ol long mekim wok politik bilong ol; na ol dispela gavman i wok wantaim ol misin giaman na ol i larim ol pris pasto i holim ol wok politik. Ol bisop i insait long wok politik long Inglan. Ol kadinal bilong Misin Katolik i bin holim bikpela wok politik long Frans na Itali. Na long nau ol pris i kisim wok politik long Saut Amerika. Na sampela gavman i raitim tok long mani pepa bilong ol olsem ‘MIPELA I BILIP LONG GOD,’ na long mani silva ol i makim olsem God i orait long ol bos bilong gavman bilong ol​—ol i raitim tok olsem em yet i bin givim dispela wok long ol. Ol dispela kain tok i olsem tok bilas long God, long wanem, ol i laik pulim God i kam insait long ol wok politik nogut bilong ol.

12. (a) “Wel animal i kamap long solwara,” na dispela i makim wanem samting? Long wanem taim dispela wel animal i wok long kirap? (b) Snek i givim strong long wel animal na dispela i givim wanem save long yumi?

¹² Dispela “wel animal i kamap long solwara,” na solwara i makim ol man long graun em ol i no sindaun gut na i stap isi​—ol i olsem solwara i gat bikpela si i go i kam; ol gavman bilong graun ol i kirap namel long dispela “solwara.” (Aisaia 17:​12, 13) Dispela “wel animal” i kirap long lusim solwara na i kam antap long taim bilong Nimrot (olsem 2,270 yia samting paslain long taim bilong Krais), em bihain long bikpela Tait Wara na long taim ol man i givim baksait long Jehova na ol i kirapim ol gavman bilong ol yet. (Stat 10:​8-​12; 11:​1-9) Tasol long de bilong Bikpela, namba 7 het bilong dispela wel animal i kamap strong. Na “snek i givim strong bilong em yet long dispela wel animal. Em i mekim em i stap king olsem em yet, na em i givim bikpela strong long em.” (Lukim Luk 4:6.) Satan i bin kamapim dispela wel animal taim em i kirapim wok politik namel long ol man. Tru tumas, Satan em i “hetman i save bosim dispela graun.”​—Jon 12:31.

I Olsem Em i Dai

13. (a) Taim de bilong Bikpela i kirap, wanem hevi i painim wel animal? (b) Olsem wanem na wel animal yet i kisim pen na hevi taim ol i sutim wanpela het bilong en na i olsem em i dai?

¹³ Taim de bilong Bikpela i kirap nupela, hevi i painim wel animal. Jon i tok: “I luk olsem ol i bin sutim wanpela het bilong dispela wel animal na kilim em i dai. Tasol dispela sua nogut em i drai pinis, na i orait gen. Na olgeta manmeri ol i kirap nogut long lukim dispela wel animal, na ol i bihainim em.” (KTH 13:3) Dispela KTH 13 ves 3 i tok, ol i sutim wanpela het na i olsem em i dai, tasol KTH 13 ves 12 i tok olsem animal yet i dai. Olsem wanem na i gat tupela tok? Long wanem, i no olgeta het wantaim i bosim ol man long wanpela taim tasol, nogat. Wanpela het i stap bos long wanpela taim, na em i pinis, na nau narapela i kamap bos long narapela taim. Ol dispela wan wan het i bin bosim strong lain bilong God tu. (KTH 17:10) Olsem na taim de bilong Bikpela i kirap, wanpela het tasol, em namba 7, em i stap nambawan bikpela gavman long dispela taim. Na taim ol i sutim dispela het inap long em i dai, dispela i givim bikpela pen na hevi long animal yet.

14. Wanem taim bainat i bin kilim i dai namba 7 het? Wanpela ofisa bilong ami i tok wanem long samting dispela i mekim long wel animal bilong Satan?

¹⁴ Wanem samting i sutim dispela het na i olsem em i dai? KTH 13 Ves 14 i tok wanpela bainat i mekim, na bainat i makim pait. Olsem na yumi ken save dispela samting i bin painim wel animal long taim bilong Namba Wan Pait, taim de bilong Bikpela i bin kirap. Ol gavman politik em Satan i bin kamapim, olsem “wel animal,” i bin kisim nogut long dispela taim bilong pait. (KTH 6:​4, 8; 13:14) Man bilong raitim buk, em Maurice Genevoix, em ofisa bilong ami long dispela taim, em i tok: ‘Olgeta man i save, long Ogas 2, 1914, wanpela taim nogut tru i bin kirap, winim ol narapela samting nogut bilong bipo. Pastaim dispela bikpela hevi i kisim Yurop, na bihain em i kisim olgeta lain bilong graun. Olgeta kontrak na promis na lo i no gat strong moa; ol gavman i no bihainim moa ol dispela samting. Hevi i go bikpela moa, winim ol hevi ol man i ting inap kamap. Ol samting nogut bilong en i kisim yumi tu, na yumi karim yet ol dispela hevi.’​—Maurice Genevoix, memba bilong Académie Française, em i bin tok olsem, na tok bilong em i stap long wanpela buk (Promise of Greatness [1968]).

15. Olsem wanem namba 7 het bilong animal i kisim bagarap?

¹⁵ Dispela pait i bin bagarapim tru namba 7 het bilong wel animal. Planti yangpela man bilong Inglan na ol narapela kantri long Yurop ol i dai long pait. Wanpela pait bilong dispela taim i bin kamap long 1916, ol i kolim Pait Bilong Wara Som, na 420,000 man bilong Inglan na 194,000 bilong Frans na 440,000 bilong Jemani ol i dai​—winim 1,000,000 olgeta! Na pait i rabisim Inglan na ol narapela kantri long Yurop. Dispela pait i pinisim bikpela hap strong bilong gavman bilong Inglan, na em i no kisim bek dispela bikpela strong olsem bipo em i holim. I gat 28 kantri i bin insait long dispela pait, na pait i putim bikpela hevi long olgeta lain bilong graun, na i olsem em i kilim ol i dai. Long Ogas 4, 1979, olsem 65 yia bihain long taim Namba Wan Pait i bin kirap, wanpela nius (The Economist) bilong Landon, Inglan, i tok: “Bihain long 1914 ol man i no pas gut moa olsem ol i bin mekim bipo.”

16. Long Namba Wan Pait, Amerika i mekim wanem na yumi save namba 7 het i gat 2-pela gavman insait long en?

¹⁶ Dispela Namba Wan Pait i opim rot na Amerika i bung wantaim Inglan na kamap wanpela gavman tasol, em ol i kolim Gavman Bilong Inglan na Amerika. Pastaim gavman bilong Amerika i no go insait long dispela pait, long wanem, ol Amerika i no laik, tasol bihain Amerika i go insait long en. Wanpela man bilong raitim stori bilong ol samting i bin kamap bipo (Esmé Wingfield-Stratford) em i tok, ‘long dispela taim bikpela hevi i stap na Inglan na Amerika i mas lusim tingting long kros i stap namel long ol na ol i mas tingting long i stap wanbel na narapela i ken helpim narapela.’ Olsem na long 1917 Amerika i kirap long helpim Inglan long ol samting bilong pait na salim ol ami samting tu bilong helpim Inglan. Long dispela taim Inglan i hatwok long winim pait, tasol taim Amerika i helpim em, nau tupela wantaim, olsem namba 7 het, ol i winim pait.

17. Bihain long pait, olsem wanem long wok bilong Satan hia long graun?

¹⁷ Bihain long pait ol man bilong graun i stap narapela kain. Pait i bin bagarapim oganaisesen bilong Satan hia long graun, na ‘i olsem em i dai,’ tasol bihain em i kamap orait gen na em i kamap strong moa, na ol man “i kirap nogut long lukim dispela wel animal” i orait bek.

18. Olsem wanem “olgeta manmeri ol i kirap nogut long lukim dispela wel animal, na ol i bihainim em”?

¹⁸ Wanpela man bilong raitim stori bilong ol samting i bin kamap bipo (Charles L. Mee, Jr.) em i tok: ‘Namba wan pait i pinisim olpela pasin na lo bilong graun, na dispela samting i mas kamap bilong givim rot long sampela nupela kantri na lain ol i ken kisim independens.’ Namba 7 het bilong wel animal em i orait gen na em i go pas long bihainim dispela nupela pasin, na Amerika i strongpela hap bilong en. Dispela namba 7 het, olsem gavman bilong Inglan na Amerika, i go pas tu long kirapim Lig ov Nesen na Yunaitet Nesen. I kam inap long yia 2005, gavman bilong Amerika i go pas long ol narapela kantri i gat planti mani samting long kamapim gutpela sindaun na long painim rot bilong oraitim ol sik, na long kisim save long wokim ol nupela samting. Na Amerika i salim 12-pela man i go long mun. Ol man i lukim Inglan tupela Amerika, em dispela namba 7 het bilong wel animal, ol i gat bikpela save na strong, olsem na ol i kirap nogut long “dispela wel animal, na ol i bihainim em.”

19. (a) Ol man i no “bihainim” tasol dispela wel animal​—ol i mekim wanem samting moa? (b) Husat i bosim olgeta kingdom, o gavman, bilong graun? Olsem wanem yumi ken save em yet i bosim graun? (c) Long wanem rot em Satan i “givim strong” long wel animal? Na dispela i mekim wanem long ol man?

¹⁹ Ol man i “bihainim” dispela wel animal, na ol i mekim narapela samting tu, olsem Jon i tok: “Ol manmeri i save olsem traipela snek i bin givim strong bilong em yet long dispela wel animal, olsem na ol i lotuim dispela snek. Na ol i lotuim wel animal tu, na ol i tok olsem, ‘Husat em i wankain olsem dispela wel animal? Husat inap long pait long em?’ ” (KTH 13:4) Taim Jisas i stap long graun Satan i tok em i bosim olgeta kingdom, o gavman, bilong graun, na Jisas i no tok dispela tok bilong Satan i giaman; Jisas i save dispela tok i stret. Em yet i tok Satan i bosim ol man bilong graun, olsem na Jisas i no laik insait long ol samting bilong politik. Na bihain Jon i tokim ol Kristen tru: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” (1 Jon 5:19; Luk 4:​5-8; Jon 6:15; 14:30) Satan i “givim strong” long wel animal long rot bilong ol wan wan gavman. Olsem na ol man i tingim lain na kantri bilong ol yet tasol na ol i litimapim dispela tasol na ol i no stap wanbel wantaim ol narapela lain na pas gut wantaim; ol i bruk bruk. I olsem ol i lotuim dispela hap bilong wel animal em i save bosim kantri o lain bilong ol, na dispela i givim biknem long wel animal na i olsem ol i lotuim em na bihainim em.

20. (a) Ol man i mekim wanem na i olsem ol i lotuim wel animal? (b) Ol Kristen i lotuim Jehova, bilong wanem ol yet i no save lotuim dispela wel animal? Ol i bihainim pasin bilong husat?

²⁰ Ol i lotuim em olsem wanem? Ol man i save moa laikim kantri bilong ol na ol i no save laikim God olsem. Tru, klostu olgeta man i save laikim tumas kantri em mama i bin karim ol long en, na ol Kristen tru i save bihainim ol tok na lo bilong gavman na ol i no bikhet long plak bilong kantri ol i sindaun long en, na ol i mekim ol gutpela wok samting bilong helpim ol man long hap bilong ol. (Rom 13:​1-7; 1 Pita 2:​13-​17) Tasol ol i no inap givim bel long wanpela kantri na ting em i winim narapela kantri, nogat. Ol i no save tok, “Kantri bilong mi i gutpela na i winim ol narapela kantri.” Olsem na ol Kristen i save lotuim God Jehova ol i no inap litimapim wanpela hap bilong dispela wel animal; sapos ol i mekim olsem, i olsem ol i lotuim snek i save givim strong long dispela wel animal. Ol i no inap amamas long wel animal na litimapim nem bilong en na i tok: “Husat em i wankain olsem dispela wel animal?” Ol i bihainim pasin bilong Maikel, em insait bilong nem bilong em i olsem: “Husat i Wankain Olsem God?” na ol i givim bel long Jehova, em King bilong olgeta hap. Long taim God i bin makim, Maikel, olsem Jisas Krais, em bai kirap na pait wantaim dispela wel animal na daunim em, olsem em i bin mekim long Satan long heven.​—KTH 12:​7-9; 19:​11, 19-​21.

Pait Long Ol Manmeri Bilong God

21. Jon i stori olsem wanem long Satan i bosim wel animal?

²¹ Satan i gat tingting long bosim dispela animal na bai Satan i ken kamapim laik bilong em. Jon i tok: “Orait God i larim dispela wel animal [i gat 7-pela het] na em i bikmaus nabaut na i tok bilas long God. Na em i gat strong bilong mekim dispela pasin inap long 42 mun. Olsem na em i opim maus bilong en na em i tok bilas long God. Em i tok nogut long nem bilong God na long ples bilong God na long ol lain bilong God i stap long heven. Na God i larim em na em i pait long ol manmeri bilong God, na em i winim pait na i daunim ol. Na em i kisim strong bilong bosim ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Olgeta manmeri long graun, nem bilong ol i no i stap long buk bilong laip long taim God i no mekim graun i kamap yet, ol bai i lotu long dispela wel animal. Dispela buk bilong laip, em buk bilong Pikinini Sipsip, bipo ol i bin kilim em i dai.”​—KTH 13:​5-8.

22. (a) Dispela 42 mun i makim wanem hap taim? (b) Long taim bilong dispela 42 mun, olsem wanem wel animal i “daunim” ol Kristen em God i bin makim ol?

²² Ating dispela 42 mun i wankain olsem dispela 3 na hap yia em lain bilong God i bin kisim nogut long wanpela kom i bin kamap long wanpela animal long tok profet bilong Daniel. (Daniel 7:​23-​25; lukim tu Kamapim Tok Hait 11:​1-4.) Kirap long pinis bilong yia 1914 na i go inap long 1918 ol kantri i wok long pait olsem ol animal nogut, na ol i subim lain bilong ol long lotuim dispela wel animal, olsem litimapim nem bilong kantri bilong ol; sampela i mas redi long i dai bilong helpim kantri bilong ol. Ol dispela samting i bin putim bikpela pen na hevi long lain bilong God em i bin makim ol long spirit holi; ol i save ol i mas bihainim tok bilong gavman, tasol ol i mas moa bihainim tok bilong God Jehova na Pikinini bilong em Jisas Krais. (Aposel 5:29) Long Jun 1918 wel animal i “daunim” lain bilong God long Amerika, na gavman i kalabusim sampela ol wasman bilong Sosaiti Was Taua, maski ol i no gat asua, na gavman i putim hevi long ol brata Kristen bilong ol na ol i hatwok long autim tok. Wel animal i “bosim ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin,” olsem na em i pasim wok bilong God long olgeta hap.

23. (a) Wanem dispela “buk bilong laip, em buk bilong Pikinini Sipsip”? Bihain long 1918 Jehova i bin mekim wanem? (b) Taim lain bilong Satan i winim pait na i daunim “ol manmeri bilong God,” olsem wanem ol i no winim tru pait?

²³ Taim dispela i kamap i olsem Satan na oganaisesen bilong em i win. Tasol ol i no win tru, long wanem, i no gat nem bilong sampela man bilong lain bilong Satan i stap long “dispela buk bilong laip, em buk bilong Pikinini Sipsip.” Dispela “buk” i olsem i gat nem bilong ol man bai stap king wantaim Jisas long Kingdom bilong em long heven. Sampela nem i go pinis long “buk” long de Pentikos long yia 33, na bihain sampela nem moa i go long dispela buk. Bihain long 1918 Jehova i wok long putim mak long hap lain bilong 144,000 i stap yet long graun, na klostu nau bai nem bilong olgeta i go pinis long “dispela buk bilong laip, em buk bilong Pikinini Sipsip.” Na ol birua i lotuim wel animal, i no gat wanpela em nem bilong em i ken i stap long dispela buk. Olsem na ol i no winim tru pait taim ol i daunim “ol manmeri bilong God”; ol i win inap long sotpela taim tasol.

24. Jon i tok, ol man i gat yau ol i mas harim wanem tok? Dispela tok i mas kirapim lain bilong God long mekim wanem?

²⁴ Nau Jon i tokim ol man i gat gutpela tingting ol i mas harim gut; em i tok: “Man i gat yau, em i mas harim gut dispela tok.” Na em i tok moa olsem: “Sapos God i makim wanpela man bilong i go long kalabus, orait em i mas i go long kalabus. Na sapos em i makim wanpela man bilong ol i kilim em i dai long bainat, orait ol bai i kilim em i dai long bainat. Na taim dispela kain pasin i kamap, orait ol manmeri bilong God i mas i stap strong na holimpas bilip bilong ol.” (KTH 13:​9, 10) Klostu liklik long yia 607 paslain long Krais, Jeremaia i bin mekim wankain tok bilong makim olsem Jehova i no ken senisim tingting bilong em long givim strafe long ol lain bilong Jerusalem em ol i no bin i stap gut long em. (Jeremaia 15:2; lukim tu Jeremaia 43:11; Sekaraia 11:9.) Taim bikpela hevi i laik painim Jisas em i tokim lain bilong em long ol i no ken surik, na em i tok: “Olgeta man i pait long bainat, bainat bai i bagarapim ol.” (Matyu 26:52) Na long nau tu long de bilong Bikpela, lain bilong God i mas holimpas ol lo bilong Baibel. Ol man i lotuim wel animal, sapos ol i no tanim bel ol i no inap abrusim bagarap. Yumi olgeta i mas sanap strong na bihainim ol lo bilong God na holimpas strongpela bilip, na bai yumi no ken pret na surik na pundaun taim ol man i mekim nogut long yumi long bihain.​—Hibru 10:​36-​39; 11:6.

Wel Animal i Gat Tupela Kom

25. (a) Jon i stori olsem wanem long narapela wel animal? (b) Tupela kom bilong en i makim wanem samting? Em “i kirap insait long graun,” na dispela i makim wanem samting?

²⁵ Tasol nau narapela wel animal i kamap. Jon i tok: “Orait mi lukim narapela wel animal i kirap insait long graun na i kam antap. Long het bilong en tupela kom i kamap olsem ol kom bilong pikinini sipsip, na toktok bilong en em i olsem toktok bilong wanpela bikpela snek. Long taim dispela namba 2 wel animal em i stap wantaim namba wan wel animal, em i kisim olgeta strong bilong namba wan wel animal. Na em i wok strong long mekim graun wantaim ol manmeri i stap long graun ol i lotu long dispela namba wan wel animal, em i bin kisim sua nogut inap long kilim em i dai, tasol dispela sua em i drai pinis. Namba 2 wel animal em i wokim ol kain kain bikpela mirakel. Wanpela kain mirakel em i olsem: Long ai bilong ol manmeri em i mekim paia i lusim heven na i kam daun long graun.” (KTH 13:​11-13) Tupela kom bilong dispela wel animal i makim olsem tupela gavman i poroman wantaim na i kamap olsem wanpela gavman tasol. Em “i kirap insait long graun”​—i no solwara, na dispela “graun” i makim ol pasin na wok bilong dispela graun em Satan i bin kirapim na em i as bilong en. Dispela wel animal i makim wanpela bikpela gavman bilong graun, em i bin kamap bipo, tasol nau long de bilong Bikpela em i mekim narapela kain wok.

26. (a) Dispela wel animal i gat tupela kom, em i wanem samting? Em i stap olsem wanem long namba wan wel animal? (b) Olsem wanem tupela kom bilong en i olsem toktok bilong wanpela pikinini sipsip? Olsem wanem toktok bilong en i “olsem toktok bilong wanpela bikpela snek”? (c) Sapos ol man i save litimapim nem bilong kantri bilong ol, i olsem ol i lotuim wanem samting? Pasin bilong litimapim nem bilong kantri, dispela pasin i olsem wanem samting? (Lukim sta i gat liklik rait, i stap long pes 194.)

²⁶ Dispela wel animal em i makim Gavman Bilong Inglan na Amerika wantaim. Em i wankain olsem namba 7 het bilong namba wan wel animal, olsem Inglan tupela Amerika, tasol dispela narapela wel animal em i makim tupela long taim tupela wantaim i mekim narapela kain wok! Tupela gavman hia i narapela narapela, tasol tupela i save wok wantaim. Tupela kom bilong animal i olsem “kom bilong pikinini sipsip,” na dispela i makim olsem long ai bilong ol man em Inglan tupela Amerika i save stap isi na ol i no mekim nogut long ol narapela lain, na ol i gat wanpela kain gavman i gat bikpela save, na olgeta narapela kantri i mas kamapim kain gavman olsem. Tasol toktok bilong dispela wel animal em i “olsem toktok bilong wanpela bikpela snek,” na dispela i makim Inglan na Amerika i save tok strong long ol narapela lain na subim ol long bihainim laik bilong tupela na kamapim gavman i wankain olsem bilong tupela, na sapos ol dispela narapela kantri i no mekim, sampela taim tupela i kirapim pait long ol. Tupela i no kirapim ol man long bihainim Kingdom bilong God em Pikinini Sipsip bilong God i save bosim, nogat; tupela i kirapim ol long bihainim laik bilong bikpela snek, em Satan. Tupela i mekim ol kantri i bruk na narapela i birua long narapela, na ol wan wan i litimapim nem bilong kantri bilong ol yet na i olsem ol i lotuim namba wan wel animal.b

27. (a) Dispela wel animal “i mekim paia i lusim heven na i kam daun,” na dispela i makim olsem animal hia i ting em inap mekim wanem? (b) Planti man i ting olsem wanem long dispela wel animal i gat tupela kom?

²⁷ Dispela wel animal i gat tupela kom em i save “wokim ol kain kain bikpela mirakel,” na em i “mekim paia i lusim heven na i kam daun long graun.” (Lukim Matyu 7:​21-​23.) Dispela samting em i mekim olsem mak i kirapim yumi long tingim wanpela profet bilong God long bipo, em Elaija. Em i resis wantaim ol profet bilong god Bal, na long nem bilong Jehova em i singautim paia long heven i kam daun, na taim paia i kam daun ol man i save pinis Elaija i profet tru na ol profet bilong Bal ol i profet giaman. (1 King 18:​21-​40) Ol dispela profet bilong Bal ol i ting ol inap mekim wok profet, na dispela wel animal i gat tupela kom em tu i ting em i gat namba long mekim wok profet. (Kamapim Tok Hait 13:​14, 15; 19:20.) Em i tok em i pinisim ol pasin nogut long tupela bikpela pait na winim ol lain Komyunis! Planti man i ting, dispela wel animal i gat tupela kom i gutpela samting bilong sakim ol lain i save daunim ol man, na em i as bilong ol mani kago samting tu.

Piksa Bilong Wel Animal

28. Jon i tok wanem na bai yumi ken save, dispela wel animal i gat tupela kom i no gat gutpela pasin olsem bilong pikinini sipsip?

²⁸ Dispela wel animal i gat kom olsem bilong gutpela pikinini sipsip i no save mekim rong, tasol olsem wanem long dispela wel animal yet? Jon i tok: “God i larim em i wokim ol kain kain mirakel long ai bilong namba wan wel animal, na long dispela pasin em i giamanim ol manmeri bilong graun. Em i tokim ol manmeri olsem, ‘Yupela i mas wokim piksa bilong dispela wel animal, bilong litimapim nem bilong en. Em dispela wel animal bipo bainat i bin kilim em, tasol em i stap laip yet.’ Na God i larim em na em i givim win bilong laip long piksa bilong wel animal, na dispela piksa i mekim toktok. Na sapos sampela man i no laik lotu long piksa bilong wel animal, orait em i gat strong bilong kilim ol i dai.”​—KTH 13:​14, 15.

29. (a) Wanem wok bilong piksa bilong wel animal? Dispela piksa i bin kamap long wanem taim? (b) Olsem wanem yumi ken save dispela piksa em i gat laip na em i ken tingting na mekim ol wok?

²⁹ Wanem dispela “piksa bilong wel animal,” na wanem wok bilong en? Wok bilong en i bilong kirapim ol man long lotuim dispela wel animal em i piksa bilong en, em dispela animal i gat 7-pela het; na piksa i gat wok tu long strongim dispela wel animal bambai em i ken i stap. Dispela piksa i bin kamap bihain long taim sua bilong wel animal i gat 7-pela het em i drai pinis, olsem bihain long pinis bilong Namba Wan Pait. Dispela piksa i no wanpela samting i no gat tingting o laip; em i no olsem dispela traipela piksa bilong man em Nebukatnesar i bin sanapim long ples stret ol i kolim Dura. (Daniel 3:1) Dispela wel animal i gat tupela kom em i givim win bilong laip long dispela piksa na bai piksa i stap laip na em inap tingting na toktok na insait long ol wok politik na sampela wok moa bilong ol man bilong graun.

30, 31. (a) Sapos yumi skelim ol samting i bin kamap yumi ken save dispela “piksa” em i wanem samting? (b) Olsem wanem? Ol i bin kilim i dai sampela man taim ol i no laik lotuim dispela “piksa”? Stori long dispela samting.

³⁰ Sapos yumi skelim ol samting i bin kamap yumi ken save dispela “piksa” em i dispela oganaisesen em Inglan tupela Amerika i bin tingim na kirapim na strongim, olsem Lig ov Nesen. Kamapim Tok Hait sapta 17 i kolim narapela kain nem long en na i tok em i wanpela “retpela wel animal” na em i bosim wokabaut bilong em yet. Dispela “piksa” i gat sampela bikman bilong ol kantri insait long en, na em i “mekim toktok” na i hambak na i tok em tasol inap long kamapim bel isi na gutpela sindaun long ol man. Tasol taim ol lain bilong en bilong ol narapela narapela kantri i bung na toktok, narapela i tok kros na tok bilas na toknogutim narapela. Na sapos sampela lain o kantri i no laik daun long dispela “piksa,” em i tok em bai rausim ol, olsem “kilim ol i dai.” Na em i bin mekim olsem long sampela kantri i no laik bihainim tingting bilong en. Long taim “bikpela hevi tru” i laik kirap, ol ami samting, olsem “ol kom” bilong dispela piksa bilong wel animal, ol bai kamapim wanpela bikpela bagarap tru.​—Matyu 24:21; KTH 17:​8, 16.

³¹ Dispela “piksa bilong wel animal” nau em Yunaitet Nesen, na bihain long Namba 2 Pait em i as na planti man i bagarap. Long 1950 ami bilong Yunaitet Nesen i helpim Saut Korea long pait wantaim Not Korea, na ol i kilim i dai 1,420,000 man bilong Not Korea na Saina. Na long 1960 i go inap 1964 ami bilong Yunaitet Nesen i insait long pait long Kongo (Kinsasa). Na ol bikman bilong gavman bilong graun na Pop Paul Namba 6 na Pop John Paul Namba 2 i tok dispela “piksa” em i nambawan samting bilong helpim ol man long kamapim bel isi na gutaim, na i no gat narapela rot, na sapos ol man i no givim bel long en ol bai bagarap. Long tok piksa, i olsem yumi ken tok, ol dispela bikman na pop ol i kilim i dai ol man i no daun long dispela “piksa” na lotu long en.​—Lo 5:​8, 9.

Mak Bilong Wel Animal

32. Jon i stori olsem wanem long pasin bilong Satan long bosim ol wok politik bilong oganaisesen bilong em hia long graun bambai hap lain bilong pikinini bilong meri bilong God ol bai kisim bikpela hevi na pen?

³² Nau Jon i lukim pasin bilong Satan long bosim ol wok politik bilong oganaisesen bilong em hia long graun bambai em i ken givim bikpela pen na hevi long hap lain bilong pikinini bilong meri bilong God ol i stap yet long graun. (Stat 3:15) Jon i tok: “Orait namba 2 wel animal i tok na ol i putim wanpela mak long han sut na long pes bilong olgeta manmeri, maski ol i manmeri nating o ol i gat nem, na maski ol i gat planti mani o ol i stap rabis, na maski ol i stap fri o ol i wokboi na wokmeri nating.” Nau Jon i stori gen long namba wan wel animal olsem: “Na sapos man i no gat dispela mak bilong nem bilong wel animal o sapos em i no gat namba bilong nem bilong en, orait em i no inap baim samting long ol arapela manmeri na ol i no inap baim samting long em. Man i gat gutpela tingting, em inap save gut long dispela samting. Man i gat save, em i mas kaunim gut namba bilong wel animal. Dispela namba em i namba bilong wanpela man, na namba bilong dispela man em 666.”​—KTH 13:​16-18.

33. (a) Wel animal i gat wanem nem? (b) Namba 6 i makim wanem samting? Stori long dispela samting.

³³ Wel animal i gat nem, na nem bilong en em wanpela namba, em 666. Namba 6 i makim ol birua bilong Jehova. Wanpela Filistia bilong lain Refaim “em i longpela bun tru” na em i gat 6-pela 6-pela pinga long ol wan wan han lek bilong em. (1 Stori 20:6) King Nebukatnesar i wokim wanpela piksa bilong man long gol, na longpela bilong en em 60 kubit (27 mita) na bikpela bilong en em 6 kubit (3 mita). Wok bilong en i bilong bungim ol bikman bilong politik long wanpela lotu tasol. Taim ol wokman bilong God i no laik lotu long dispela piksa, king i tromoi ol i go long paia. (Daniel 3:​1-​23) Namba 7 i makim ol samting em inap olgeta long ai bilong God, tasol namba 6 i sot long namba 7. Olsem na 3-pela 6 i makim olsem samting i sot olgeta na i nogut tru long ai bilong God.

34. (a) Nem o namba bilong wel animal “em i namba bilong wanpela man,” na dispela i makim olsem wel animal em wanem samting? (b) Olsem wanem na dispela nem 666 i stret long ol wok politik bilong Satan hia long graun?

³⁴ Bilong save long wanpela man, yumi mas save long nem bilong em. Orait, olsem wanem dispela namba 666 i helpim yumi long save long dispela wel animal? Jon i tok, nem o namba bilong dispela animal em i nem o “namba bilong wanpela man” bilong graun, na i no nem bilong wanpela ensel. Olsem na dispela nem i makim samting bilong graun​—em i makim wok gavman bilong ol man bilong graun. Namba 6 i sot long namba 7, olsem na 3-pela 6, olsem 666, em i makim ol wok gavman na wok politik bilong ol man i sot olgeta long mak em God i laikim, olsem samting i gutpela olgeta. Dispela wel animal, olsem ol gavman politik bilong graun, i holim nem o namba olsem 666 na em i stap olsem nambawan bos bilong graun; na ol bikpela wok politik, na ol bikpela lotu, na ol bikpela bisnis, i helpim wel animal long i stap na daunim ol man na mekim nogut long lain bilong God.

35. Jon i tok “ol i putim wanpela mak long han sut na long pes bilong olgeta manmeri,” na mak hia em nem bilong wel animal, na wanem insait bilong dispela tok?

³⁵ Jon i tok “ol i putim wanpela mak long han sut na long pes bilong olgeta manmeri,” em mak bilong wel abus​—dispela i makim wanem samting? Taim Jehova i bin givim Lo long ol Israel em i tokim ol: “Yupela i mas pulimapim bel na tingting bilong yupela long ol dispela lo. Yupela i mas pasim ol long han bilong yupela na putim ol antap long pes bilong yupela, bai yupela i no ken lusim tingting long ol.” (Lo 11:18) I olsem ol Israel i mas tingim dispela Lo long olgeta taim na bai em i ken bosim tingting na wokabaut bilong ol. Jon i tok, lain 144,000 i gat nem bilong Jehova na Jisas i stap long pes bilong ol, na dispela i makim ol i bilong God Jehova na Krais Jisas. (KTH 14:1) Satan i bihainim dispela pasin na em tu i laik putim nem o mak o namba bilong wel animal i go long olgeta man bilong graun. Taim ol i mekim ol wok bilong skin, olsem baim ol samting i go i kam, em i subim ol long bihainim laik bilong em, olsem long mekim ol bung o amamas long ol bikpela de olsem holide samting. Ol i mas lotuim wel animal na larim em i bosim olgeta samting ol i mekim na bai ol i ken kisim mak bilong en.

36. Wanem ol hevi i bin painim man em ol i no laik kisim mak bilong wel animal?

³⁶ Hevi i bin painim ol man i no laik kisim dispela mak bilong wel animal. Kirap long 1930 samting ol i bin kot planti taim, na ol man i bin paitim ol na mekim nogut long ol. Long sampela kantri em gavman i bin kalabusim ol long ol banis kalabus nogut na planti ol i dai. Bihain long Namba 2 Pait ol i bin kalabusim planti yangpela man inap longtaim, na ol i givim bikpela pen long sampela na kilim ol i dai, long wanem, ol dispela yangpela i laik bihainim lo Kristen na ol i no laik insait long ol pait samting bilong dispela graun. Na long sampela ol narapela kantri ol Kristen i no inap baim ol samting o baim samting i go long ol narapela man. Na ol i tambuim sampela Kristen long i stap papa bilong sampela hap graun o long narapela samting. Na ol i bin bagarapim sampela meri Kristen, na ol i kilim i dai sampela Kristen, na rausim sampela long graun bilong ol, long wanem, ol dispela Kristen i bihainim maus bilong bel na ol i no laik baim kat politik.c​—Jon 17:16.

37, 38. (a) Ol man i no laik kisim mak bilong wel animal, bilong wanem ol i gat hatwok long dispela graun? (b) Husat ol i holimpas lo bilong God? Ol i strong long mekim wanem?

³⁷ Long sampela hap, em misin i bosim strong ol man, na sapos sampela i laik bihainim tok i tru bilong Baibel, famili bilong ol na ol pren bilong ol bilong bipo i birua long ol. Ol i mas i gat strongpela bilip na bai ol i ken sanap strong. (Matyu 10:​36-​38; 17:22) Ol man bilong dispela graun i save givim bel tru long mani kago samting, olsem lotuim dispela samting, na ol i no bihainim pasin i stret, olsem na Kristen tru i mas tingim Jehova bai helpim na strongim em taim em i wok long bihainim pasin i stret. (Song 11:7; Hibru 13:18) Na pasin pamuk i kamap bikpela, olsem na Kristen i mas strongim bel na bai em i ken stap gut na abrusim ol dispela pasin nogut. Na taim sik i painim Kristen, planti taim ol dokta na nes i save subim em long brukim lo bilong God na kisim blut. Na sampela taim ol Kristen i kot long dispela na ol i mas sakim tok bilong kot em i pait wantaim bilip bilong ol. (Aposel 15:​28, 29; 1 Pita 4:​3, 4) Na long nau i hatwok long painim sampela wok mani, olsem na ol Kristen tru i hatwok long painim sampela kain wok i stret long Kristen na i no brukim lo bilong God.​—Maika 4:​3, 5.

³⁸ Tru tumas, sapos man i no gat dispela mak bilong wel animal, planti hevi na traim bai painim em. Tasol lain pikinini bilong meri bilong God ol i stap yet long graun ol i stap gut na holimpas bilip bilong ol, long wanem, Jehova i strongim ol na blesim ol, na em i mekim olsem tu long 6 milion samting manmeri bilong bikpela lain. Ol i strong long i stap gut na holimpas ol lo bilong God, maski ol samting bilong graun i subim ol long brukim lo bilong God. (KTH 7:9) Long olgeta hap bilong graun yumi olgeta i stap wanbel, na yumi mas wok yet long litimapim nem bilong Jehova na ol stretpela pasin bilong em, na yumi mas nolaik tru long kisim mak bilong wel animal.​—Song 34:​1-3.

[Ol Futnot]

[Piksa long pes 195]

Em i givim win bilong laip long piksa bilong wel animal