Sapta 7
Laikim Tru God Olsem Long Pastaim!
EFESUS
1. Jisas i salim namba wan tok i go long wanem kongrigesen? Em i kirapim ol wasman long tingim wanem samting?
JISAS i salim namba wan tok i go long kongrigesen long Efesus. Dispela taun i stap long nambis bilong Esia Maina, na em i klostu liklik long ailan Patmos, na long bipo i gat planti wok bisnis long dispela taun. Jisas i tokim Jon: “Yu mas raitim sampela tok long ensel bilong sios [kongrigesen] i stap long taun Efesus. Dispela tok i olsem, ‘Mi save holim ol 7-pela sta long han sut bilong mi, na mi save wokabaut namel long ol 7-pela lam gol. Na mi salim dispela tok i kam long yu.’ ” (KTH 2:1) Long dispela tok na long ol narapela 6-pela tok, Jisas i kolim wanpela samting i makim olsem em i gat namba bilong mekim wok. Em i kirapim ol wasman bilong kongrigesen long Efesus long tingim bikpela wok em i holim, olsem em i wasman bilong olgeta elda na em i wok long skelim olgeta kongrigesen. Na inap long nau em i mekim yet dispela gutpela wok wasman bilong helpim ol elda na strongim olgeta insait long ol kongrigesen. Sampela taim em i stretim sampela wok long kongrigesen bambai lait i kamap bikpela moa. Tru tumas, Jisas em i Nambawan Wasman bilong ol sipsip bilong God.—Matyu 11:28-30; 1 Pita 5:2-4.
2. (a) Jisas i kolim wanem ol gutpela wok kongrigesen long Efesus i bin mekim? (b) Ol elda long Efesus i bin bihainim wanem tok bilong aposel Pol?
2 Nau Jisas i mekim wankain pasin olsem em i mekim long 5-pela bilong ol dispela 7-pela kongrigesen, olsem: Pastaim em i kolim ol gutpela pasin ol i save mekim. Long ol Efesus em i tok: “Mi save pinis long olgeta pasin yu save mekim, na long hatwok bilong yu. Na mi save, yu save sanap strong, na yu no laikim tru ol man nogut. Ol dispela man i bin tokim yu olsem, ‘Mipela i aposel tu.’ Tasol nogat, ol i no aposel. Na yu skelim pinis tok bilong ol, na yu painimaut olsem ol i man bilong giaman tasol. Ol man i lukim yu i holim nem bilong mi, na ol i save mekim nogut long yu. Tasol mi save olsem, yu save sanap strong na karim dispela hevi, na yu no bin les long dispela hatwok.” (KTH 2:2, 3) Planti yia bipo aposel Pol i bin toksave long ol elda bilong Efesus olsem “ol weldok nogut tru,” em ol man i lusim bilip Kristen tru, bai ol i wok long bagarapim lain sipsip. Pol i bin tokim ol elda ol i mas “was gut oltaim” olsem em i bin mekim. (Aposel 20:29, 31) Yumi save, ol i no bin les long mekim dispela wok na ol i sanap strong, olsem na nau Jisas i tokim ol, ‘Yupela i bin mekim gutpela wok.’
3. (a) Ol “giaman aposel” i bin mekim wanem bilong giamanim ol Kristen tru long taim bilong yumi? (b) Pita i givim wanem toksave long yumi long ol dispela kain man i lusim bilip Kristen tru?
3 Long de bilong Bikpela sampela “giaman aposel” i mas kamap. Bai ol i “mekim tok giaman nabaut, bilong pulim ol manmeri bilong God i go bihainim ol.” (2 Korin 11:13; Aposel 20:30; KTH 1:10) Ol i ting olgeta lotu bilong dispela graun i gutpela tasol, maski ol i bruk bruk. Na ol i tok, God i no gat wanpela lain bilong em yet, na ol i no bilip olsem Jisas i bin kamap King long Kingdom long yia 1914. Pasin ol i mekim i truim tok bilong 2 Pita 3:3, 4, olsem: “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas olsem, ‘Em i bin tok olsem em bai i kam bek gen, a? Orait em i stap we? Em i no inap i kam.’ ”
4. (a) Pasin hambak na pasin bikhet bilong ol man bilong tok bilas em i bin kamap ples klia olsem wanem? (b) Ol Kristen tru long nau ol i bihainim pasin bilong ol Efesus long bipo na ol i mekim wanem long ol birua i laik giamanim ol?
4 Ol dispela man bilong tok bilas ol i bikhet na ol i no laik autim bilip bilong ol long ol man. (Rom 10:10) Ol i bin kirapim ol pris pasto na ol nius na televisen long sutim ol tok giaman long ol dispela Kristen bipo ol i bung wantaim ol. Tasol ol Kristen tru inap pilim kwik olsem tok na pasin bilong ol dispela man bilong giaman i no stret. Ol Kristen long Efesus long bipo ol i “no laikim tru ol man nogut,” na ol Kristen tru bilong nau ol tu i no laik tru long ol dispela kain man, olsem na ol i save rausim ol long ol kongrigesen bilong ol.a
5. (a) Jisas i tok, ol Efesus i pundaun long wanem samting? (b) I stret ol Efesus i mas tingim wanem ol tok?
5 Tasol nau Jisas i kolim wanpela bikpela hevi i stap long dispela kongrigesen. Em i mekim olsem long 5-pela bilong dispela 7-pela kongrigesen. Em i tokim ol Efesus: “Tasol mi gat tok long yu olsem, taim yu bilip nupela, yu bin laikim mi tru, tasol nau nogat.” (KTH 2:4) I no gat as na ol i pundaun olsem, long wanem 35 yia bipo Pol i bin raitim pas long ol na em i tok, God “i givim bel bilong en moa yet long yumi,” na em i bin tokim ol, “God i save laikim yupela tru, na . . . yupela i mas bihainim ol pasin em yet i save mekim.” (Efesus 2:4; 5:1, 2) Na tok bilong Jisas tu i mas i stap long bel bilong ol. Jisas i tokim ol: “Yupela i mas laikim God [Jehova], Bikpela bilong yumi. Yupela i mas laikim em tru long bel bilong yupela na long [laip] bilong yupela na long tingting bilong yupela na long strong bilong yupela.” (Mak 12:29-31) Tasol ol Efesus i no putim dispela tok long bel bilong ol—ol i no givim bel tru long God olsem ol i bin mekim taim ol i bilip nupela.
6. (a) Maski yumi olpela man o nupela man long kongrigesen, yumi mas was gut, nogut yumi bihainim wanem kain tingting na pasin? (b) Yumi laikim tru God na dispela i mas kirapim yumi long mekim wanem?
6 Maski yumi olpela man long kongrigesen o yumi nupela man, yumi mas was gut, nogut yumi lusim pasin bilong laikim tru Jehova. Yumi mas laikim em tru olsem long taim yumi bilip nupela. Wanem samting inap mekim na bai yumi no givim bel moa long Jehova? Sapos yumi givim bel tumas long wok mani bilong yumi, o yumi laik tumas long kisim bikpela mani, o yumi tingting tumas long painim amamas, orait bai yumi wokabaut long pasin bilong olpela bel na bai yumi no tingim gut ol samting bilong spirit. (Rom 8:5-8; 1 Timoti 4:8; 6:9, 10) Yumi laikim tru Jehova na dispela i mas kirapim yumi long stretim kwik ol kain tingting kranki o pasin kranki na wok strong yet long ‘painim Kingdom pastaim wantaim stretpela pasin bilong God.’ Long dispela rot bai yumi ‘bungim ol gutpela samting bilong yumi long heven.’—Matyu 6:19-21, 31-33.
7. (a) Wanem samting i mas kirapim yumi long mekim wok bilong Jehova? (b) Jon i tok wanem long pasin bilong laikim tru God?
7 Yumi mas givim bel tru long Jehova na dispela samting tasol i mas kirapim yumi long mekim wok bilong em. Yumi mas pilim tru ol gutpela samting Jehova wantaim Krais i bin mekim bilong helpim yumi. Olsem Jon i bin raitim bihain: “Pasin bilong laikim ol arapela, em i pasin bilong God. Yumi no ken ting, yumi bin laikim God pastaim. Nogat. God i laikim yumi pastaim. Olsem na em i bin salim Pikinini Man bilong en i kam long graun bilong lusim ol sin bilong yumi.” Na Jon i tokim yumi: “God yet em i as bilong pasin bilong laikim tru ol arapela. Na man i save laikim tru ol arapela em i pas wantaim God, na God i pas wantaim em.” Yumi no ken lusim pasin bilong laikim tumas Jehova, na Bikpela bilong yumi Krais Jisas, na Baibel, em Tok bilong God na i gat strong! Sapos yumi laik kamapim bel bilong yumi, olsem yumi laikim tru Jehova, orait yumi mas wok strong long mekim wok bilong em, na yumi mas bihainim “dispela lo yumi kisim long Krais, em i olsem: Man i save laikim tru God, em i mas laikim tru ol arapela manmeri bilong God.”—1 Jon 4:10, 16, 21; Hibru 4:12; lukim tu 1 Pita 4:8; Kolosi 3:10-14; Efesus 4:15.
“Mekim Kain Pasin Olsem Pastaim Yu Save Mekim”
8. Jisas i tok ol Efesus i mas mekim wanem?
8 Ol Efesus i mas kirapim gen bel bilong ol long laikim tru God olsem pastaim ol i save mekim, nogut ol i lus. Jisas i tokim ol: “Bipo yu bin mekim gutpela pasin, tasol yu lusim dispela pasin na yu pundaun pinis. Olsem na yu mas tingim gen dispela pasin yu bin mekim bipo, na yu mas tanim bel na mekim kain pasin olsem pastaim yu save mekim. Sapos yu no mekim olsem, orait bai mi kam long yu na rausim dispela lam bilong yu.” (KTH 2:5) Ol Kristen long Efesus i harim dispela tok na ol i mekim wanem? Yumi no save. Yumi laik long ol i mas tanim bel na givim bel gen long Jehova. Sapos nogat, orait lait bilong lam bilong ol bai dai, na Jisas bai tekewe lam bilong ol. Bai ol i no inap holim moa gutpela wok bilong ol bilong autim tok i tru na i stap olsem lait.
9. (a) Jisas i kolim wanem gutpela pasin ol Efesus i mekim na dispela tok i strongim ol? (b) Taim Jon i dai pinis, bihain ol kongrigesen i mekim wanem na ol i no bihainim moa ol tok Jisas i bin givim long ol Efesus?
9 Tasol Jisas i mekim gutpela tok long ol Efesus, olsem: “Tasol wanpela gutpela pasin bilong yu i olsem: Yu no laikim tru pasin bilong ol lain bilong Nikolas. Mi tu, mi no laikim tru pasin bilong ol.” (KTH 2:6) Ol i no laik bai lain bilong ol i bruk. Na Jisas tu i nolaik tru long dispela pasin. Tasol bihain bihain planti kongrigesen i no bihainim moa dispela tok bilong Jisas. Ol i no givim bel tru long Jehova, na long tok i tru, na long ol brata, olsem na isi isi ol i lusim lotu i tru na ol i stap olsem long bikpela tudak bilong spirit. Ol i bruk bruk na i kamap planti lain na ol i kros pait. Ol kuskus bilong raitim raitim ol Baibel, em ol i tok ol i “Kristen,” ol i no givim bel tru long Jehova, olsem na ol i rausim nem bilong em long Baibel long tok Grik. Ol dispela kain “Kristen” ol i kirap bihainim ol bilip giaman em lotu bilong Babilon na tingting bilong ol Grik i as bilong en, olsem bikpaia, na klinpaia, na God Triwan. Ol i no givim bel tru long God na long tok i tru, olsem na maski ol i gat nem Kristen, planti ol i no autim gutpela tok bilong Kingdom bilong God. Ol pris pasto i tingim ol yet tasol na ol i kamap olsem lain bilong bosim ol dispela “Kristen” na i olsem ol i gat kingdom bilong ol yet hia long graun.—Lukim 1 Korin 4:8.
10. Ol misin i gat nem Kristen, olsem wanem long ol long yia 1918?
10 God i kirap long skelim lain bilong em long yia 1918 na long dispela taim ol pris pasto bilong ol misin i gat nem Kristen ol i givim bel long helpim Namba Wan Pait Bilong Olgeta Hap. Ol i wok long kirapim ol Katolik na ol Talatala long i go long pait na kilim i dai ol wanlotu bilong ol bilong narapela kantri. (1 Pita 4:17) Kongrigesen long Efesus long bipo ol i nolaik tru long pasin bilong lain bilong Nikolas, tasol ol misin i gat nem Kristen long nau ol i no mekim olsem. Inap longtaim pinis ol i bin holim ol bilip giaman i no litimapim nem bilong God, na narapela bilip i pait wantaim narapela bilip. Na ol pris pasto bilong ol dispela misin i insait long ol wok bilong dispela graun. Tasol Jisas i tok, ol disaipel tru bilong em i no bilong dispela graun. (Jon 15:17-19) Ol kongrigesen bilong ol dispela misin i no save long bikpela as tok bilong Baibel, em tok bilong Kingdom bilong God, olsem na ol i no i stap olsem lait—ol i no autim ol tok i tru bilong Baibel, olsem givim lait long ol man. Nogat. Na lain bilong ol i no insait long haus holi bilong Jehova, em haus holi bilong spirit. Ol man (na meri) i gat namba long ol dispela kongrigesen ol i no olsem sta. Samting i kamap ples klia em olsem: Ol i bilong dispela lain olsem “man bilong sakim lo.”—2 Tesalonaika 2:3; Malakai 3:1-3.
11. (a) Long yia 1918 wanem lain Kristen long graun i bihainim tok Jisas i bin givim long ol Efesus? (b) Dispela lain em Jon i piksa bilong ol, ol i mekim wanem kirap long yia 1919 na bihain long dispela taim?
11 Taim bilong hevi long Namba Wan Pait i kamap i go pinis na bihain dispela lain em Jon i piksa bilong ol, ol i givim bel tru long Jehova na long tok i tru, na dispela i kirapim ol long wok strong tru long mekim wok bilong Em. Ol i sakim ol man i litimapim namba wan presiden bilong Sosaiti Was Taua, em Charles T. Russell, na putim em i stap olsem god o bikpela bilong ol taim em i dai long yia 1916. Ol i no larim ol dispela man i brukim lain bilong ol. Dispela liklik lain Kristen i bin karim hevi ol man i putim long ol na ol narapela hevi i bin painim ol na dispela i bin stretim ol, olsem na taim Bikman bilong ol i kam bilong skelim pasin bilong ol, em i tokim ol: “Yu bin mekim gutpela wok tru.” Na em i tok: “Yu kam amamas wantaim mi.” (Matyu 25:21, 23) Ol i lukim ol samting i kamap long graun na ol i tingim ol samting i bin painim ol na ol i save, ol dispela samting i truim tok profet Jisas i bin mekim taim em i kolim ol samting bai kamap olsem mak bilong em i stap King pinis long heven. Kirap long yia 1919 na bihain long dispela taim, ol i wok strong i go bilong mekim dispela wok em tu i hap truim bilong dispela bikpela tok profet Jisas i bin mekim, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 6:9, 10; 24:3-14) Sapos bipo ol i no bin givim bel tru long Jehova, nau bel bilong ol i kirap na ol i givim bel tru.
12. (a) Long bikpela kibung long yia 1922, wanem singaut i go long ol Kristen tru? (b) Ol Kristen tru i kisim wanem nem long yia 1931? Na ol i bin mekim wanem, tasol nau ol i tanim bel?
12 Long Septemba 5-13 long yia 1922, long wanpela bikpela kibung long Sida Poin, Ohaio, long Amerika, inap olsem 18,000 bilong ol dispela Kristen i bung. Ol i harim wanpela singaut i go long ol, olsem: “Yupela ol pikinini bilong God antap tru, yupela i mas go bek long wok! . . . Olgeta manmeri i mas save, Jehova em i God na Krais Jisas em i King i winim olgeta narapela king na em i Bikpela i winim olgeta narapela bikpela man. . . . Olsem na yupela i mas autim tok, autim tok, autim tok bilong King na kingdom bilong em.” Ol i litimapim tru nem bilong Jehova. Long yia 1931 ol dispela Kristen i kibung long Kalambas, Ohaio, long Amerika, na ol i amamas long kisim nem olsem God i makim pinis long tok profet bilong Aisaia—ol Witnes Bilong Jehova. (Aisaia 43:10, 12) Kirap long Mas 1, 1939, ol i senisim nem bilong nius ol i wokim na ol i kolim Wastaua i Tokaut Long Kingdom Bilong Jehova (tok Inglis). Long dispela rot ol i givim biknem long Man bilong wokim yumi na long Kingdom o gavman bilong em. Sapos bipo ol Witnes Bilong Jehova i no bin givim bel tumas long litimapim nem na Kingdom bilong Jehova, nau ol i tanim bel pinis na ol i givim bel tru long Jehova.—Song 106:6, 47, 48.
“Sapos Man i Winim Pait”
13. (a) Sapos ol Efesus i “winim pait” bai ol i kisim wanem blesing? (b) Ol Kristen long Efesus i mas mekim wanem na bai ol i “winim pait”?
13 Nau Jisas i givim laspela tok long dispela kongrigesen wankain olsem em i givim long ol narapela kongrigesen. Em i tokaut olsem long maus bilong em spirit bilong God i kolim ol blesing man i stap gut long God inap kisim. Jisas i tokim ol Efesus: “Orait man i gat yau, em i mas harim gut dispela tok Holi Spirit i autim long ol sios [kongrigesen]. Sapos man i winim pait, bai mi larim em i kisim kaikai long diwai bilong givim laip. Dispela diwai i stap long heven, long gaden [paradais] bilong God.” (KTH 2:7) Ol man i save harim gut tok, nau ol i mas harim gut dispela bikpela tok long wanem ol i save, Jisas i no mekim wanpela samting long tingting bilong em yet, olsem na dispela tok i no kam long Jisas, em i kam long Nambawan Bikpela King Jehova long rot bilong spirit holi o strong bilong em. Ol i mas mekim wanem na bai ol i “winim pait”? Ol i mas bihainim gut lek bilong Jisas, em i bin holimpas lo bilong God i go inap long em i dai, olsem na em inap tok: “Bel bilong yupela i ken i stap strong. Mi winim pinis strong bilong dispela graun.”—Jon 8:28; 16:33; lukim tu 1 Jon 5:4.
14. Dispela tok Jisas i kolim, olsem “gaden bilong God,” em i makim wanem samting?
14 Ol Kristen em God i makim ol, olsem ol dispela Kristen long Efesus, ol i no ken i stap long Paradais long graun. Orait, olsem wanem ol bai “kisim kaikai long diwai bilong givim laip” long man, em dispela diwai i stap “long gaden bilong God”? Em i no dispela Paradais bai kamap bek long graun, long wanem, lain 144,000 em God i makim ol pinis, na ol manmeri bilong kongrigesen Efesus i insait long en, God i baim bek ol namel long ol manmeri bilong graun bambai ol i ken mekim wok king wantaim Pikinini Sipsip, em Krais Jisas, long maunten Saion long heven, na bai ol i kamap pikinini spirit bilong God. (Efesus 1:5-12; KTH 14:1, 4) Olsem na dispela tok “gaden bilong God” i mas makim heven, em gutpela ples ol dispela man i winim pait ol i kisim laip long en. Long dispela “gaden bilong God,” long ples Jehova yet i stap long en, dispela lain i bin winim pait na God i bin givim laip oltaim long ol na ol i no inap i dai, ol bai i stap oltaim oltaim—i olsem ol i kisim kaikai long diwai bilong givim laip long man.
15. Bilong wanem bikpela lain long nau ol i mas tingim tok bilong Jisas na wok long winim pait?
15 Orait, olsem wanem long ol gutpela man long graun ol i helpim lain 144,000? Ol dispela Witnes, o poroman bilong liklik lain, ol i bikpela lain tru na ol tu i wok long winim pait. Tasol ol i wet long kisim laip long Paradais long graun. Bai ol i dring long “wara bilong givim laip,” na “lip” bilong ol diwai i stap long arere bilong wara bai oraitim ol. (KTH 7:4, 9, 17; 22:1, 2) Sapos yu bilong dispela lain, yu tu yu mas kamapim long ples klia olsem yu laikim tru Jehova, na yu mas sanap strong long bilip na winim pait. Long dispela rot bai yu kisim bikpela amamas—bai yu inap i stap oltaim long Paradais long graun.—Lukim 1 Jon 2:13, 14.
[Futnot]
a Bilong save moa long ol giaman aposel, lukim buk Toktok Gut Wantaim Ol Man Long Baibel pes 398-405, ol Witnes Bilong Jehova i wokim.
[Blok long pes 36]
Ol i Litimapim Nem Bilong Jehova na Jisas
Long buk singsing em lain bilong Jehova i bin wokim long 1905, planti singsing i litimapim nem bilong Jisas, winim ol singsing i litimapim nem bilong Jehova. Long buk singsing bilong 1928, ol singsing i litimapim nem bilong Jehova i planti, wankain olsem ol singsing i litimapim nem bilong Jisas. Tasol long nupela buk singsing (bilong 1990, tok Pisin) planti singsing tru i litimapim nem bilong Jehova, winim ol singsing i litimapim nem bilong Jisas. Dispela i stret long tok bilong Jisas olsem: “Papa . . . i winim mi.” (Jon 14:28) Yumi mas laikim tru Jehova—em nambawan bikpela samting, na yumi mas laikim Jisas tu, na tingim gut ofa bilong em na namba God i givim long em, em i Hetpris na King.
[Sat long pes 34]
Pasin Bilong Jisas Long Givim Tok Long Ol
(lista hia i kolim ol sapta na ves bilong Kamapim Tok Hait)
Tok i go Em i gat Pastaim Em i Em i stretim Blesing
long namba long em i kolim kolim klia na/o ol inap
kongrigesen givim tok ol gutpela pasin hevi strongim ol kisim
Pergamum 2:12 2:13 2:14, 15 2:16 2:17
Taiataira 2:18 2:19 2:20, 21 2:24, 25 2:26-28
Sardis 3:1 — 3:1, 2 3:3, 4 3:5
Filadelfia 3:7 3:8 — 3:8-11 3:12
Laodisia 3:14 — 3:15-17 3:18-20 3:21