Sapta 30
‘Bikpela Taun Babilon Em i Pundaun Pinis!’
1. Namba 2 ensel i tokaut long wanem samting? Bikpela Babilon em i wanem samting tru?
TAIM i kamap pinis bilong kot bilong God i painim Bikpela Babilon! Orait, harim gut wanpela toksave bilong God: “Narapela ensel i bihainim namba wan ensel na i kam. Dispela namba 2 ensel i tok olsem, ‘Bikpela taun Babilon em i bagarap [pundaun] pinis! Yes, em i bagarap [pundaun] pinis! Dispela taun Babilon tasol em i bin mekim olgeta lain manmeri ol i bihainim strongpela pasin pamuk bilong en. I olsem em i bin givim strongpela wain long ol na ol i dringim.’ ” (KTH 14:8) Dispela em i namba wan taim Kamapim Tok Hait i toktok long Bikpela Babilon. Bihain bai yumi stori long KTH sapta 17, em i tok piksa long Bikpela Babilon em i wanpela meri pamuk. Tasol em i wanem samting tru? Em i wanpela bikpela oganaisesen i bosim ol man long olgeta hap graun, na em i wanpela samting bilong lotu, na em i wanpela samting bilong giaman tasol na Satan i mekim wok long en bilong pait long lain pikinini bilong meri bilong God. (KTH 12:17) Olsem na Bikpela Babilon i makim olgeta lotu giaman. Ol lotu i holim yet ol bilip na pasin bilong Babilon bilong bipo na ol i bihainim pasin na tingting bilong en, olgeta i insait long Bikpela Babilon.
2. (a) Olsem wanem na lotu bilong Babilon i go nabaut long olgeta hap bilong graun? (b) Wanem wanpela bikpela hap tru bilong Bikpela Babilon? Wanem taim dispela bikpela hap bilong en i kamap olsem wanpela strongpela oganaisesen?
2 Winim 4,000 yia bipo, Jehova i bin paulim tok ples bilong ol man bilong Babilon em ol i laik sanapim bikpela haus taua bilong Babel, na ol i kirap mekim ol narapela narapela tok ples. Olsem na lain bilong ol i bruk na ol i go nabaut long olgeta hap, na ol i kisim ol bilip na pasin bilong lotu giaman bilong ol i go long ol dispela ples. Ol dispela bilip na pasin bilong lotu bilong ol i as bilong planti lotu i kam inap long nau. (Stat 11:1-9) Bikpela Babilon em i wanpela hap bilong oganaisesen bilong Satan, olsem hap bilong lotu. (Lukim Jon 8:43-47.) Wanpela bikpela hap tru bilong Bikpela Babilon long nau em ol lotu i bin lusim lotu Kristen tru na holim nating nem Kristen. Long 350 yia samting bihain long taim bilong Krais, dispela lain i kamap olsem wanpela strongpela oganaisesen bilong sakim lo, na planti bilip na pasin bilong lotu ol i bihainim, ol i no kisim long Baibel; ol i kisim long ol lotu i kam long Babilon.—2 Tesalonaika 2:3-12.
3. Olsem wanem yumi inap tok, Bikpela Babilon i pundaun pinis?
3 Orait, ol lotu i gat bikpela strong yet long graun, olsem na bilong wanem ensel i tokaut olsem Bikpela Babilon i pundaun pinis? Orait, yumi ken tingim samting i bin kamap bihain long taim gavman bilong olpela taun Babilon i pundaun long yia 539 paslain long Krais. Long dispela taim ol Israel i lusim kalabus long Babilon na ol i go bek long ples bilong ol na kirapim bek lotu tru bilong ol! Orait, long yia 1919 Jehova i mekim gut long lain Israel bilong spirit na ol i kamap gutpela gen long ol samting bilong spirit, na ol i stap olsem yet. Dispela i kamapim klia olsem Bikpela Babilon i pundaun pinis long yia 1919. Nau em i no gat bikpela strong moa bilong pasim wok bilong lain bilong God. Na insait long lain bilong Babilon yet planti bikpela hevi i kamap. Kirap long 1919, ol pasin nogut bilong en i kamap ples klia, olsem ol pasin giaman na paulim mani na pasin pamuk na ol narapela kain pasin nogut. Long planti hap bilong Yurop long nau, wan wan manmeri tasol i save go long lotu. Ol man i laikim tumas tok i tru bilong Baibel ol i save pinis long ol rong na pasin giaman bilong Bikpela Babilon, olsem na em i gat bikpela sem tru, na nau em i stap na wet long kisim strafe olsem stretpela kot bilong Jehova i makim pinis.
Bikpela Babilon i Pundaun
4-6. Baibel i tok, Bikpela Babilon “i bin mekim olgeta lain manmeri ol i bihainim strongpela pasin pamuk bilong en. I olsem em i bin givim strongpela wain long ol na ol i dringim.” Wanem insait bilong dispela tok?
4 Orait, wanem samting i mekim na Bikpela Babilon i pundaun? Ensel i tok, “Bikpela taun Babilon . . . i bin mekim olgeta lain manmeri ol i bihainim strongpela pasin pamuk bilong en. I olsem em i bin givim strongpela wain long ol na ol i dringim.” Dispela em i wanpela kain tok bilong makim pasin bilong winim pait na daunim narapela lain. Jehova i tokim Jeremaia: “Dispela kap wain mi holim, em i makim belhat bilong mi. Kisim dispela kap na bai mi salim yu i go long ol planti lain manmeri na yu mas mekim ol i dring long dispela kap. Ol i dring pinis, orait ol bai i kamap olsem ol longlong man na wokabaut kranki tru. Long wanem, mi bai salim ol birua i kam pait long ol na bagarapim ol.” (Jeremaia 25:15, 16) Inap 6 handet yia samting paslain long Krais, Jehova i kirapim ol Babilon long i go pait na daunim planti lain, na ol i daunim lain Juda tu, em ol i bin lusim Jehova, na ol i go kalabus long Babilon. I olsem Babilon i givim strongpela wain long ol dispela lain na ol i mas dring. King bilong Babilon i hambak long dispela na em i litimapim nem bilong em yet na daunim nem bilong Jehova. Olsem na Jehova i salim wanpela lain i go daunim Babilon, na nau Babilon yet i pundaun.—Daniel 5:23.
5 Bikpela Babilon tu i daunim planti lain na em i kirap bosim ol, tasol i olsem em i wok hait long mekim. Em i “givim strongpela wain” long olgeta lain “na ol i dringim.” Bilong mekim olsem, em i mekim pasin olsem meri pamuk i save grisim ol man—i olsem em i mekim pasin pamuk wantaim ol. Em i bin grisim ol hetman politik na ol i mekim ol kontrak wantaim em na pren wantaim em. Em i grisim ol gavman long ol samting bilong lotu na long dispela rot em i wok long bosim ol lain politik na ol bikpela kampani na em i daunim ol man nating na ol i stap nogut. Em i bin kirapim ol man long mekim nogut long ol narapela lotu na bagarapim ol, na em i kirapim ol pait bilong lotu, na salim ami bilong em i go long ol narapela kantri na pait long ol na daunim ol, na ol i mas kisim lotu bilong en. Na em i kirapim ol gavman tu long pait long ol narapela kantri; em i mekim olsem bilong helpim em yet long ol samting bilong politik na kisim bikpela mani. Na em i save tok, ol dispela pait em ol pait holi, long wanem ol i kamap long laik bilong God yet.
6 Olgeta man i save pinis, ol lotu i insait long ol pait na wok politik, olsem lotu Sinto i bin mekim long Japan, na lotu Hindu long India, na lotu Buda long Vietnam, na ol lotu i gat nem Kristen long Noten Aialan na Saut Amerika, na sampela lotu moa. Na yumi ken tingim tupela bikpela pait i bin kamap—ol pris pasto bilong ami ol i bin kirapim ol soldia long i go kilim i dai ol soldia bilong ol birua. Na Bikpela Babilon i bin insait long bikpela pait i kamap long Spen long 1936 i go inap 1939, na inap olsem 600,000 man i bin bagarap. Ol lain bilong helpim ol bikman bilong Misin Katolik wantaim ol pren bilong en ol i bin kirapim ol man long mekim dispela pait na kapsaitim blut bilong planti tausen man. Wanpela as na ol i mekim olsem, em gavman bilong Spen i tok long kisim mani bilong Misin na tekewe strong bilong en.
7. Bikpela Babilon i gat bikpela tingting long bagarapim husat? Em i laik mekim long wanem rot?
7 Bikpela Babilon em hap lain bilong Satan, olsem hap bilong lotu, na long olgeta taim bipo na i kam inap nau Bikpela Babilon i birua nogut long “meri” bilong Jehova, em “Jerusalem i stap long heven.” Long taim bilong ol aposel, ol man inap luksave olsem lain Kristen em God i makim ol pinis ol i “lain” o pikinini bilong meri bilong God. (Stat 3:15; Galesia 3:29; 4:26) Long dispela taim bipo Bikpela Babilon i wok strong long daunim dispela stretpela lain Kristen. Bilong mekim olsem, em i wok long grisim na pulim ol long mekim pasin pamuk bilong spirit. Tupela aposel, em Pol na Pita, i toksave olsem planti Kristen bai pundaun, na wanpela bikpela lain i lusim bilip em bai kamap. (Aposel 20:29, 30; 2 Pita 2:1-3) Ol tok Jisas i givim long 7-pela kongrigesen i makim olsem klostu long taim Jon i dai, Bikpela Babilon i pundaunim pinis planti Kristen. (KTH 2:6, 14, 15, 20-23) Tasol Jisas i tok pinis olsem God i no ken larim Bikpela Babilon i mekim olsem long olgeta taim.
Wit na Gras Nogut
8, 9. (a) Tok piksa bilong Jisas long wit na gras nogut i makim wanem samting bai kamap? (b) Wanem samting i kamap “taim ol manmeri i slip”?
8 Long tok piksa bilong Jisas long wit na gras nogut, Jisas i stori long wanpela man i tromoi ol gutpela pikinini wit long gaden bilong em. Tasol “taim ol manmeri i slip,” birua bilong dispela man i kam tromoi pikinini bilong gras nogut namel long wit. Bihain gras nogut i go bikpela na i karamapim wit. Jisas i kamapim insait bilong dispela tok piksa olsem: “Man i tromoi gutpela pikinini wit, em Pikinini Bilong Man. Na gaden em i dispela graun. Na ol gutpela pikinini wit, em ol manmeri bilong kingdom bilong heven. Na gras nogut, em ol manmeri bilong Satan. Dispela birua i tromoi pikinini bilong gras nogut, em Satan.” Nau Jisas i tok, wit na gras nogut i ken kamap wantaim i go inap long “las de,” na long dispela taim ol ensel bai “bungim” ol dispela gras nogut.—Matyu 13:24-30, 36-43.
9 Samting Jisas na Pol na Pita i tokaut long en i kamap pinis. “Taim ol manmeri i slip,” olsem taim ol aposel i dai pinis o taim ol elda Kristen i olsem i slip na ol i no lukautim gut lain bilong God, ol bilip giaman bilong Babilon i kam insait long ol kongrigesen na i olsem i kru na i go bikpela. (Aposel 20:31) I no longtaim na gras nogut i kamap planti, winim wit, na nau gras nogut i karamapim pinis wit. Inap sampela handet yia, i olsem Bikpela Babilon i daunim pinis lain pikinini bilong meri bilong God.
10. Wanem samting i kamap long yia 1870 samting? Bikpela Babilon i mekim wanem long dispela?
10 Orait, long yia 1870 samting ol Kristen em God i makim ol pinis ol i wok strong long lusim ol pasin bilong Bikpela Babilon. Ol i lusim ol bilip giaman em ol misin i gat nem Kristen i bin kisim long ol haiden, na ol i strongim bel na ol i mekim wok long Baibel bilong tokaut olsem taim bilong ol man bilong ol arapela lain bai pinis long 1914. Ol pris pasto i nolaik tru long ol dispela wok em lain bilong Jehova i mekim bilong kamapim bek lotu tru bilong Jehova. Long taim bilong Namba Wan Pait, ol man i wok long litimapim ples bilong ol na ol i strong long winim pait, na ol misin i mekim wok long dispela bambai ol i ken daunim dispela liklik lain Kristen na bai ol i ken pinis olgeta. Orait, long 1918 klostu ol i daunim tru wok bilong dispela liklik lain Kristen. I olsem Bikpela Babilon i winim pinis pait na dispela liklik lain Kristen i lus olgeta.
11. Taim taun Babilon bilong bipo i pundaun, wanem samting i kamap?
11 Babilon bilong bipo i bin pundaun nogut tru long yia 539 paslain long Krais. Long dispela taim wanpela singaut i kamap, olsem: “Babilon i bagarap pinis! Em i bagarap pinis.” Dispela strongpela gavman bilong Babilon em i bin bosim graun, tasol nau Bikpela Sairus i bringim ol ami bilong Midia na Persia i kam long Babilon na daunim olgeta. Tru, taun yet i no bagarap long dispela taim, tasol gavman bilong en i pundaun tru. Bihain ol Juda i lusim kalabus long Babilon na i go bek long Jerusalem na kamapim gen lotu bilong Jehova.—Aisaia 21:9; 2 Stori 36:22, 23; Jeremaia 51:7, 8.
12. (a) Long taim bilong yumi, olsem wanem yumi ken tok Bikpela Babilon i pundaun pinis? (b) Wanem samting i kamapim klia olsem Jehova i sakim pinis ol lotu giaman i holim nem Kristen?
12 Long taim bilong yumi tu ol man i harim pinis dispela singaut olsem Bikpela Babilon i pundaun pinis! Long 1918 ol lotu giaman bilong Bikpela Babilon em ol i gat nem Kristen, i olsem ol i gat strong na ol i daunim dispela liklik lain Kristen, tasol long 1919 dispela liklik lain i kamap strong gen, i olsem man i dai pinis em i kirap bek. Em nau, i olsem Bikpela Babilon i pundaun pinis, long wanem em i no gat strong moa long kalabusim lain bilong God. Ol brata bilong Krais i olsem planti grasopa i lusim bikpela hul na i kam antap, na ol i redi long mekim bikpela wok. (KTH 9:1-3; 11:11, 12) Ol i dispela ‘gutpela wokboi’ long nau, em Bikman bilong ol i makim ol bilong bosim olgeta samting bilong em long graun. (Matyu 24:45-47) Dispela i makim stret olsem Jehova i sakim pinis ol lotu i holim nating nem Kristen. Jehova i kamapim gen lotu tru na nau rot i op bambai em i ken pinisim wok bilong putim mak long liklik hap lain bilong ol 144,000 pikinini bilong meri em ol i stap yet long graun, em dispela meri i birua bilong Bikpela Babilon. Ol dispela samting i kamap i makim olsem ol lotu nogut bilong Satan, ol i pundaun olgeta.
Ol Manmeri Bilong God i Mas i Stap Strong
13. (a) Namba 3 ensel i tokaut long wanem samting? (b) Jehova i tok wanem samting bai painim ol man i kisim mak bilong wel animal?
13 Harim gut tok bilong namba 3 ensel: “Narapela ensel i bihainim dispela tupela ensel na i kam. Dispela namba 3 ensel em i singaut strong olsem, ‘Sapos wanpela man i lotu long dispela wel animal na long piksa bilong en, na em i kisim mak long pes na long han bilong en, orait bai em i mas dringim wanpela kain wain. Dispela wain em belhat bilong God. Na God bai i no inap tanim wara wantaim dispela wain pastaim. Nogat. Em bai i kapsaitim belhat bilong en long kap bilong bekim pe nogut, na dispela man i mas dringim.’ ” (KTH 14:9, 10a) Long Kamapim Tok Hait 13:16, 17 Jisas i kamapim klia olsem long de bilong Bikpela ol man i no lotu long piksa bilong wel animal bai ol i kisim bikpela pen na hevi, na ol birua bai kilim i dai sampela. Tasol Jehova i tingting pinis long givim strafe long ol man i “gat mak bilong nem bilong wel animal o . . . namba bilong nem bilong en.” Ol i mas ‘dringim wain, em belhat’ bilong Jehova. Wanem samting bai painim ol? Bipo, long yia 607 paslain long Krais, belhat bilong Jehova i bin painim ol man bilong Jerusalem, i olsem em i givim ‘wanpela kap wain’ long ol na ol i mas dring. Long dispela taim ol Babilon i kam long Jerusalem na ‘brukim na bagarapim ol, na bikpela hangre i kamap long ol, na ol birua i kilim i dai planti manmeri long bainat.’ (Aisaia 51:17, 19) Na i olsem tu long ol man i save litimapim ol bikpela gavman bilong graun na piksa bilong ol, em Yunaitet Nesen, na i olsem ol i lotu long ol dispela samting—taim ol i dring dispela ‘wain,’ olsem belhat bilong Jehova, samting nogut tru bai painim ol. (Jeremaia 25:17, 32, 33) Jehova bai bagarapim ol olgeta.
14. Taim Jehova i no bagarapim yet ol man i lotuim wel animal wantaim piksa bilong en, wanem samting i mas painim ol? Jon i tok wanem long dispela samting?
14 Taim dispela samting i no kamap yet, ol man i gat mak bilong wel animal long pes bilong ol, bai ol i kisim pen nogut long Jehova. Ensel i tokim Jon olsem: “Long ai bilong ol ensel bilong God, na long ai bilong Pikinini Sipsip, dispela man bai i kisim pen nogut long paia na long ston salfa i paia. Na smok i kamap long dispela paia i givim pen long ol, em bai i go antap oltaim oltaim. Ol dispela man i save lotu long wel animal na long piksa bilong en, na i kisim mak bilong nem bilong en, ol bai i no kisim malolo long san na long nait.”—KTH 14:10b, 11.
15, 16. Wanem insait bilong dispela tok bilong Kamapim Tok Hait 14:10 long ‘paia na ston salfa i paia’?
15 Sampela man i ting dispela tok “paia” na “ston salfa” i makim olsem i gat bikpaia i stap. Tasol yumi ken skelim wanpela tok profet i wankain liklik na bai yumi ken save long insait tru bilong dispela tok ensel i givim long Jon. Long taim bilong Aisaia, Jehova i tokim lain Idom long ol bai kisim strafe, long wanem ol i bin birua long lain Israel. Jehova i tok: “Ol wara bilong kantri Idom bai i kamap olsem kolta, na ol das bai i kamap olsem hatpela ston, na graun bilong Idom bai i paia olsem kolta i paia. Dispela paia bai i no inap pinis. Nogat. Em bai i lait strong long olgeta de na nait na smok bai i kamap oltaim.”—Aisaia 34:9, 10.
16 Orait, yu ting God i tromoi kantri Idom i go long wanpela bikpaia na em i mas paia inap oltaim oltaim? Nogat tru. Samting i painim Idom i olsem: Dispela kantri i no gat nem moa olsem wanpela strongpela gavman long graun—i olsem paia na hatpela ston salfa i kukim olgeta. Taim dispela strafe i painim kantri Idom, i no olsem em i kisim pen bilong oltaim oltaim, nogat; God i “pinisim olgeta samting bilong ol Idom” na “graun bilong ol Idom i stap nating.” (Aisaia 34:11, 12) Na dispela smok “i kamap oltaim,” i makim stret samting i bin painim Idom. Taim wanpela haus i paia olgeta, orait smok i wok long kamap inap longtaim, maski paia i dai pinis; na ol man i lukim dispela smok ol i ken save haus i bin paia olgeta. Long nau tu lain bilong God i tingim bikpela bagarap i bin painim Idom, na dispela i givim save long ol. Em nau, dispela ‘smok bilong paia’ i bin kamap long Idom, i olsem em i wok long kamap yet.
17, 18. (a) Wanem samting bai painim ol man i kisim mak bilong wel animal? (b) Ol man i lotuim wel animal ol i kisim pen olsem wanem? (c) Wanem insait bilong dispela tok olsem “smok i kamap long dispela paia i givim pen long ol, em bai i go antap oltaim oltaim”?
17 Ol man i gat mak bilong wel animal ol tu bai i bagarap olgeta, i olsem paia i kukim ol. Kamapim Tok Hait 19:17, 18 i tok, skin bilong ol bai slip nabaut long graun na ol animal na pisin bai kaikai. Olsem na ol i no kisim pen tru inap oltaim oltaim. Nogat. Orait, olsem wanem ol bai i “kisim pen nogut long paia na long ston salfa i paia”? As bilong dispela tok i olsem: Taim lain bilong God i autim tok i tru, dispela i kamapim rong bilong ol na i toksave long strafe bilong God bai painim ol. Olsem na ol i toknogutim lain bilong God, na ol i save wok hait na kirapim ol lain politik, olsem dispela wel animal, long mekim nogut long ol Witnes Bilong Jehova na kilim ol i dai tu. Tasol Jehova bai bagarapim ol man i birua long lain bilong em na bai ol i pinis olgeta, i olsem paia i kukim ol olgeta. Bihain long dispela, “smok i kamap long dispela paia i givim pen long ol, em bai i go antap oltaim oltaim”—olsem dispela strafe God i givim long ol em bai stap olsem wanpela mak, na sapos bihain wanpela man i laik sutim tok long wok king bilong Jehova, em i ken tingim dispela strafe i bin painim ol narapela birua bilong Jehova na em bai pret. Olsem na dispela bikpela tok i bin kamap bipo long wok king bilong Jehova, em i no ken kamap moa bihain.
18 Long nau wanem lain ol i save autim dispela strongpela toksave i givim pen long ol dispela lotu? Baibel i tok, dispela lain olsem grasopa ol i kisim strong bilong givim pen nogut tru long ol man i no gat mak bilong God long pes bilong ol. (KTH 9:5) Dispela lain i wok aninit long ol ensel, ol yet i gat wok long givim pen long ol dispela man. Dispela lain olsem grasopa ol i strong tru long mekim dispela wok, olsem na Baibel i tok, “Ol dispela man i save lotu long wel animal na long piksa bilong en, na i kisim mak bilong nem bilong en, ol bai i no kisim malolo long san na long nait.” Na taim ol i bagarap pinis, olgeta man bai save, Jehova i stap King tru, na dispela bai stap ples klia tru inap oltaim oltaim, olsem “smok i kamap long dispela paia i givim pen long ol, em bai i go antap oltaim oltaim.” Yumi laik tru bai dispela liklik lain i ken i stap strong i go inap long dispela taim bihain, em olgeta man bai save, Jehova em i King tru! Olsem ensel i tok: “Taim dispela kain pasin i kamap, ol manmeri bilong God i mas i stap strong, em ol manmeri i save bihainim ol lo bilong God na holimpas bilip bilong ol long Jisas.”—KTH 14:12.
19. Bilong wanem ol manmeri bilong God i mas i stap strong? Olsem Jon i tok, wanem samting i strongim ol?
19 Tru tumas, bilong sanap strong ol dispela “manmeri bilong God” i mas givim bel olgeta long Jehova na lotuim em wanpela tasol long rot bilong Krais Jisas. Ol tok ol i autim, ol man bilong graun i no amamas long harim, olsem na ol i biruaim lain bilong God na kilim i dai sampela. Tasol lain bilong God i tingim narapela tok Jon i mekim na dispela i strongim bel bilong ol. Jon i tok: “Mi harim maus bilong wanpela man i singaut long heven olsem, ‘Yu raitim tok olsem, “Nau na olgeta taim bihain, ol manmeri i bilip long Bikpela na ol i dai, ol i ken amamas . . . long wanem, ol i lusim dispela hatwok ol i bin mekim, na ol i ken malolo. Na ol i no i go nating. Nogat. Gutpela pasin ol i bin mekim, em i go wantaim ol.” ’ ”—KTH 14:13.
20. (a) Olsem wanem dispela tok promis Jon i raitim i stret wantaim tok profet bilong Pol long kambek bilong Jisas? (b) Wanem gutpela samting tru bai painim ol manmeri bilong mekim wok king long heven, em ol i dai bihain long taim Satan i raus long heven?
20 Dispela tok promis i stret wantaim tok profet bilong Pol long kambek bilong Jisas. Pol i tok: “Ol man i bilip long Jisas na i dai pinis, ol bai i kirap bek pastaim. Long dispela taim yumi manmeri i gat laip na i stap yet [em ol manmeri God i makim ol bilong i stap king long heven na ol i stap laip long de bilong Bikpela], yumi bai i go antap long klaut wantaim ol dispela manmeri, na yumi olgeta bai i bungim Bikpela.” (1 Tesalonaika 4:15-17) Taim ol i rausim Satan long heven, ol wanlain bilong Krais em ol i dai pinis, ol i kirap bek na i go antap pastaim. (Lukim Kamapim Tok Hait 6:9-11.) Bihain, ol narapela manmeri i bilong i stap king long heven na ol i dai insait long de bilong Bikpela, wanpela gutpela samting tru bai painim ol. Ol i no ken slip long matmat; “wantu tasol” bai ol i kirap bek long bodi spirit na i go long heven. (1 Korin 15:52) Em gutpela samting tru, a? Ol stretpela wok ol i bin mekim long graun, bai ol i mekim yet long heven.
Kaikai Bilong Graun
21. Jon i tok wanem long “kaikai bilong graun i mau pinis”?
21 Long dispela de bilong kot nau yumi stap long en, sampela moa bai kisim ol gutpela samting, olsem Jon i tok: “Mi lukim wanpela waitpela klaut, na wanpela man i wankain olsem yumi man bilong graun i sindaun i stap long dispela klaut. Em i gat hat gol long het bilong en, na long han bilong en em i holim naip i sap tru. Na narapela ensel [em namba 4] i kam ausait long haus bilong God. Em i singaut strong tru long dispela man i sindaun long klaut olsem, ‘Kisim naip bilong yu na katim kaikai. Olgeta kaikai bilong graun i mau pinis, olsem na nau em i taim bilong katim dispela kaikai.’ Orait dispela man i sindaun long klaut em i holim naip bilong en na em i lindaun i go daun long graun, na em i katim ol kaikai i mau i stap long graun.”—KTH 14:14-16.
22. (a) Husat dispela man i gat hat gol long het bilong em na em i sindaun long waitpela klaut? (b) Laspela hap wok bilong bungim kaikai i redi pinis long gaden, em i mas kamap long wanem taim? Wanem samting bai kamap long dispela taim?
22 Dispela man i sindaun long waitpela klaut, yumi inap save long em. Em i wankain olsem yumi man bilong graun na em i gat hat gol long het bilong em; olsem na yumi save em i Jisas, em dispela King God i tok promis long salim i kam, em Daniel tu i bin lukim long driman. (Daniel 7:13, 14; Mak 14:61, 62) Tasol wanem dispela kaikai bilong graun em ensel i tok profet long en? Taim Jisas i stap long graun em i tok piksa long wok bilong kamapim disaipel i kain olsem wok bilong kisim ol kaikai bilong gaden. (Matyu 9:37, 38; Jon 4:35, 36) Dispela wok bilong kisim kaikai bilong gaden i redi pinis, laspela hap bilong dispela wok i kamap long de bilong Bikpela, taim Jisas i kamap King na em i givim strafe long ol man em Papa bilong em i mekim kot pinis long ol. Olsem na taim bilong Jisas long mekim wok king, kirap long 1914, em i taim bilong amamas long kisim ol kaikai bilong gaden i redi pinis.—Lukim Lo 16:13-15.
23. (a) Husat i tok na ol i kirap long bungim dispela kaikai i redi pinis long gaden? (b) Kirap long 1919 i kam inap long nau, wanem wok bilong kisim kaikai bilong gaden i kamap?
23 Jisas em i King na Jas, tasol em i wet long kisim tok bilong Jehova na bai em i kirap long katim ol kaikai bilong graun i mau pinis. Dispela tok i kirap long “haus bilong God” long heven na i kam long rot bilong wanpela ensel. Orait, taim Jisas i kisim tok, wantu em i kirap na bihainim. Kirap long 1919 em i givim wok long ol ensel bilong em na ol i mekim laspela hap wok bilong kisim ol kaikai bilong gaden, olsem kisim ol manmeri bilong inapim dispela lain 144,000. (Matyu 13:39, 43; Jon 15:1, 5, 16) Orait bihain long en i gat wok bilong bungim dispela ‘bikpela lain’ bilong ol arapela sipsip. (Jon 10:16; KTH 7:9) Kirap long 1931 i go inap 1935 planti manmeri bilong dispela lain arapela sipsip ol i kamap ples klia. Long 1935 Jehova i givim tingting long dispela lain em Jon i piksa bilong ol na nau ol i save gut long dispela bikpela lain olsem “planti manmeri tru,” em Baibel i stori long en long Kamapim Tok Hait 7:9-17. Olsem na kirap long dispela taim, liklik lain i strong tru long mekim wok bilong bungim dispela lain. Long yia 2005 dispela lain i bikpela tru, winim 6 milion, na em i wok long i go bikpela moa yet. Tru tumas, dispela man i “olsem yumi man bilong graun” em i kisim planti kaikai moa yet long gaden nau long dispela taim bilong las de.—Lukim Kisim Bek 23:16; 34:22.
Ol i Krungutim Ol Pikinini Wain Bilong Graun
24. Wanem samting i stap long han bilong namba 5 ensel? Namba 6 ensel i singaut strong na i tok wanem?
24 Taim ol i bungim pinis olgeta manmeri bilong kisim laip, nau em i taim bilong katim ol narapela kain kaikai i mau pinis long graun. Jon i tok: “Na narapela ensel [em namba 5] i lusim haus bilong God i stap long heven na i kam ausait. Em tu i holim naip i sap tumas. Na narapela ensel gen [em namba 6] em i lusim alta na i kam, em dispela ensel i gat strong bilong bosim paia. Em i singaut strong long ensel i holim naip i sap tru. Em i tok olsem, ‘Ol pikinini wain bilong graun i mau pinis, olsem na yu kisim dispela naip bilong yu i sap moa, na katim ol pikinini bilong ol diwai wain bilong graun, na bungim i stap long wanpela hap.’ ” (KTH 14:17, 18) Nau long de bilong Bikpela ol ensel i gat bikpela wok tru long kisim ol kaikai i mau pinis long graun na tilim ol gutpela kaikai i go narapela na ol kaikai nogut i go narapela!
25. (a) Namba 5 ensel i lusim haus bilong God na i kam ausait, ating dispela i makim wanem samting? (b) Olsem wanem na i stret long narapela ensel i mekim dispela tok bilong kirapim wok bilong kisim kaikai bilong gaden?
25 Namba 5 ensel i stap insait long haus bilong Jehova na i kam ausait; olsem na laspela hap wok bilong kisim ol kaikai bilong gaden em tu i kamap long laik bilong Jehova. Em i kisim tok long kirapim wok bilong em, na dispela tok i kam long rot bilong narapela ensel em i “lusim alta na i kam.” Yumi mas save long dispela, long wanem ol manmeri i bin holimpas bilip na ol i stap aninit long alta ol i bin krai long Jehova na askim em olsem: “Bikpela King bilong olgeta samting, yu save mekim gutpela na stretpela pasin oltaim. . . . Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol?” (KTH 6:9, 10) Taim ol ensel i kirap katim ol ‘pikinini bilong diwai wain bilong graun,’ Jehova bai bekim blut bilong ol, olsem ol i bin krai long em long mekim.
26. Dispela “diwai wain bilong graun” i makim wanem samting?
26 Tasol wanem dispela “diwai wain bilong graun”? Baibel i tok, lain Juda i olsem gaden wain bilong Jehova. (Aisaia 5:7; Jeremaia 2:21) Krais Jisas wantaim ol manmeri bai wok king wantaim em long Kingdom, Baibel i tok ol tu i olsem wanpela diwai, o rop wain. (Jon 15:1-8) Long dispela kain tok piksa, bikpela samting long diwai wain i olsem em i save karim kaikai, na diwai wain Kristen tru i bin karim planti kaikai, na dispela i litimapim nem bilong Jehova. (Matyu 21:43) Olsem na dispela “diwai wain bilong graun” i no makim lain Kristen tru, nogat; em i makim wanpela bikpela oganaisesen nogut bilong Satan long graun, em ol gavman nogut i bosim ol man, na inap planti handet yia pinis ol i bin karim “ol pikinini wain” bilong Satan. Bikpela Babilon i bin bosim strong dispela diwai wain em pikinini bilong en i gat gip nogut, na ol lotu giaman i gat nem Kristen ol i bikpela hap bilong Bikpela Babilon.—Lukim Lo 32:32-35.
27. (a) Wanem samting i kamap taim dispela ensel i holim naip na i katim ol pikinini bilong diwai wain bilong graun? (b) Wanem sampela tok profet bilong Baibel long Olpela Testamen i makim olsem bikpela bagarap tru bai kamap long dispela taim?
27 Dispela diwai wain i mas kisim strafe! “Dispela ensel i kisim naip . . . na em i katim ol pikinini wain bilong graun, na i bungim i stap. Na em i tromoi ol dispela pikinini wain i go insait long bikpela tang ston bilong krungutim ol pikinini wain. Dispela em i makim belhat bilong God. Na ol i krungutim ol pikinini wain long dispela tang i stap ausait long biktaun, na blut i kamap na i ran i kam ausait long tang, na i ran i go karamapim olgeta graun i go inap 300 kilomita. Na blut i kam antap inap long mak bilong hap ain i stap long maus bilong ol hos.” (KTH 14:19, 20) Inap planti yia pinis lain bilong Jehova i tokaut olsem Jehova i belhat tru long dispela diwai wain. (Sefanaia 3:8) Profet Aisaia i kamapim klia olsem taim ol ensel i krungutim ol pikinini bilong diwai wain bilong graun, ol lain bilong graun bai bagarap. (Aisaia 63:3-6) Joel tu i tok profet olsem “planti tausen manmeri” bai kisim bagarap “long ples daun bilong mekim kot,” olsem man i krungutim ol pikinini bilong wain long tang ston. (Joel 3:12-14) Wanpela bikpela bagarap tru bai kamap! I no gat wanpela bikpela bagarap olsem bai kamap gen; i olsem wanpela traipela gaden wain em kaikai bilong en i mau pinis na ol i katim. Na ol i no katim ol pikinini bilong diwai wain tasol—ol i katim diwai wain olgeta na tromoi dispela tu i go insait long tang ston bilong krungutim olgeta. Olsem na dispela diwai wain i pinis olgeta na i no ken kru gen.
28. Husat ol i gat wok bilong krungutim ol pikinini bilong diwai wain bilong graun? Wanem insait bilong dispela tok olsem ol i krungutim pikinini wain “ausait long biktaun”?
28 Ol hos i krungutim ol pikinini wain wantaim diwai wain. Yumi inap save olsem, long wanem, taim ol i krungutim pikinini wain na diwai wain, blut i kam antap inap long “mak bilong hap ain i stap long maus bilong ol hos.” Taim Baibel i toktok long ol hos, planti taim dispela i makim pait. Olsem na yumi save, ol hos Jon i lukim ol i makim taim bilong pait. Ol ami bilong heven ol i bihainim Jisas i go bilong mekim laspela pait long ol lain bilong Satan long graun, na Baibel i tok ol i “krungutim ol pikinini wain long bikpela tang ston i makim bikpela belhat bilong God I Gat Olgeta Strong.” (KTH 19:11-16) Em dispela lain ami yet ol bai krungutim dispela diwai wain bilong graun. Ol bai mekim “ausait long biktaun,” olsem ausait long Saion bilong heven. Na i stret tru ol i mas krungutim ol pikinini bilong dispela diwai wain long dispela graun yet. Tasol ol bai mekim dispela wok “ausait long biktaun,” na dispela i makim olsem bagarap i no ken painim dispela liklik hap lain olsem pikinini bilong “meri” ol i stap yet long graun, em ol i hap lain bilong Saion bilong heven. Dispela liklik lain wantaim ‘bikpela lain’ bai ol i hait gut i stap insait long oganaisesen bilong Jehova long graun.—Aisaia 26:20, 21.
29. Blut i kamap long dispela tang na i kam antap inap long wanem mak? Blut i ran i go inap long wanem mak? Ol dispela samting i makim wanem samting?
29 Samting dispela driman i makim i wankain olsem tok piksa long Daniel 2:34, 44, i stori long wanpela bikpela ston, olsem Kingdom, bai krungutim ol gavman bilong graun. Bai ol i bagarap olgeta. Blut i ran i kam ausait long tang ston, i kam antap inap long mak bilong hap ain i stap long maus bilong ol hos, na i ran i go karamapim graun inap 300 kilomita.a Dispela blut i karamapim bikpela hap graun tru. Olsem na bikpela bagarap tru bai kamap long olgeta hap graun. (Aisaia 66:15, 16) Dispela diwai wain nogut bilong Satan i no ken kamap moa long graun. Em bai pinis olgeta na i no gat wanpela liklik hap bilong en bai stap!—Song 83:17, 18.
30. Diwai wain bilong Satan i kamapim wanem ol kaikai nogut? Yumi mas tingting strong long mekim wanem?
30 Nau yumi stap klostu long pinis long taim bilong las de, olsem na dispela driman bilong tupela taim bilong kisim kaikai bilong gaden em i bikpela samting long yumi. Yumi inap lukim ol kaikai nogut bilong dispela diwai wain bilong Satan, olsem: Rausim bel, na ol narapela pasin bilong kilim man i dai, na man i slip wantaim man, na pasin pamuk na ol pasin nogut olsem, na pasin bilong giaman na stil, na ol man i no laikim ol wanblut—ol dispela kain pasin i mekim na ol man bilong dispela graun i samting nogut tru long ai bilong Jehova. Diwai wain bilong Satan i save karim kaikai “i gat pait” na bai “i bagarapim planti man.” Pasin nogut bilong en na pasin bilong en long lotuim ol god giaman em i save bagarapim nem bilong Jehova. (Lo 29:18; 32:5; Aisaia 42:5, 8) Gutpela tru yumi ken bung wantaim dispela lain em Jon i piksa bilong ol na wok wantaim ol long bungim ol gutpela kaikai bilong gaden, em Jisas i kamapim bilong litimapim nem bilong Jehova! (Luk 10:2) Yumi olgeta i mas pasim tok long bel olsem yumi no ken larim diwai wain nogut bilong graun i bagarapim yumi; yumi mas klia olgeta long en; olsem na taim Jehova i kirap long givim strafe long dispela diwai wain na krungutim na bagarapim olgeta, yumi no ken bagarap wantaim dispela diwai wain bilong graun.
[Futnot]
a Dispela 300 kilomita em olsem 1,600 stadia; ol i kisim dispela namba taim ol i wokim 4 taims 4 taims 10 taims 10. Lukim sta daunbilo bilong Kamapim Tok Hait 14:20.
[Blok long pes 208]
‘Ol i Pamuk Wantaim Em na Kamap Longlong Olsem Man i Spak’
Wanpela strongpela hap bilong Bikpela Babilon em Misin Katolik, em pop i bosim. Misin i tok, olgeta pop ol i senis bilong aposel Pita. Daunbilo i gat stori bilong sampela buk long wok ol dispela pop i bin mekim, em ol i tok ol i senis bilong Pita:
Fomosus (yia 891-896): ‘Taim Fomosus i dai ol i planim em long ples matmat bilong ol pop, tasol 9-pela mun bihain ol i kamautim bodi bilong em na mekim kot long em. Nupela pop [Stiven] i bosim kot. Kot i tok Fomosus i bin paulim ol samting bambai em i ken kamap pop, na em i no gat namba long mekim wok pop, olsem na ol i pinisim ol lo em i bin kamapim. Ol i rausim olgeta bilas bilong pop long em, na ol i katim olgeta pinga i stap long han sut bilong em.’—New Catholic Encyclopedia.
Stiven Namba 6 (yia 896-897): ‘Inap tupela mun samting bihain [long taim ol i bin mekim kot long Fomosus], bikpela kros i kamap long dispela. Ol i rausim namba bilong Pop Stiven, na kalabusim em, na kilim em i dai.’—New Catholic Encyclopedia.
Sergius Namba 3 (yia 904-911): ‘Tupela pop paslain long em i kisim kalabus na ol i kilim tupela i dai. Long Rom, lain bilong Tiofilaktus i helpim em; ol i tok, pikinini meri bilong em Marosia i karim pikinini man bilong dispela pop (bihain dispela pikinini i kamap Pop Jon Namba 11).’—New Catholic Encyclopedia.
Stiven Namba 7 (yia 928-931): ‘Bihain Marosia i belhat long Pop Jon Namba 10, na pop i kalabus na ol i kilim em i dai. Nau Marosia i givim wok pop long Pop Leo Namba 6, tasol 6-pela mun samting bihain, pop hia i dai. Orait nau Pop Stiven Namba 7 i senisim em—ating Marosia i bin helpim em long kisim dispela namba. Em i stap Pop inap tupela yia, tasol Marosia yet i bosim em.’—New Catholic Encyclopedia.
Jon Namba 11 (yia 931-935): ‘Taim Stiven Namba 7 i dai, Marosia bilong lain bilong Tiofilaktus, em i givim namba long pikinini bilong em Jon, i gat 20 krismas samting, na em i kamap pop, tasol mama bilong em i bosim em.’—New Catholic Encyclopedia.
Jon Namba 12 (yia 955-964): ‘Em i gat 18 krismas tasol, na ol man i bin tok em i no save tingim God liklik—em i givim bel long ol amamas bilong graun, na em i bihainim olgeta laik nogut bilong skin.’—The Oxford Dictionary of Popes.
Benedik Namba 9 (yia 1032-1044; 1045; 1047-1048): ‘Em i save baim namba bilong wok pop i go long waspapa bilong em, tasol tupela taim em i baim bek dispela namba.’—The New Encyclopædia Britannica.
Olsem na yumi save, ol pop i no bihainim pasin bilong Pita, em i bin i stap gut long wok Kristen. Ol i bin mekim pasin nogut na ol i larim pasin bilong bagarapim man na pasin pamuk bilong spirit na bilong skin na pasin nogut olsem bilong Jesebel i kam insait na bagarapim misin. (Jems 4:4) Long 1917 wanpela buk bilong ol Sumatin Bilong Baibel (The Finished Mystery) i tokaut long wok nogut bilong ol dispela pop. Buk hia em wanpela rot bilong ol Sumatin Bilong Baibel i “mekim ol kain kain samting nogut i kamap bilong bagarapim ol manmeri bilong graun.”—KTH 11:6; 14:8; 17:1, 2, 5.
[Piksa long pes 206]
King Krais Jisas i skelim olgeta lain long kot na ol ensel i helpim em
[Piksa long pes 207]
Taim Babilon i pundaun long yia 539 paslain long Krais, ol i lusim ol kalabusman bilong en i go