Sapta 21
Laik Bilong Jehova i Kamap Gut
1, 2. (a) Jehova i tingting pinis long ol ensel na ol man i mas mekim wanem? (b) Husat ol i insait long famili bilong God em ol i wanbel long lotuim em?
OLGETA ensel na olgeta manmeri i stap wanbel long lotuim God tru, na ol i stap fri olsem ol pikinini bilong God—dispela em i gutpela samting Jehova i tingting pinis long ol i mas mekim. Na ol man i laikim tumas stretpela pasin, ol tu i gat dispela laik.
2 Jehova i kirap long kamapim ol samting em i tingting pinis long mekim taim em i kirap long wokim ol samting. Namba wan samting em i wokim em wanpela Pikinini man na kirap long taim dispela Pikinini i kirap bek em i “soim bikpela lait bilong God . . . na em i wankain tru olsem God yet.” (Hibru 1:1-3) Dispela Pikinini em i narapela kain, long wanem, em wanpela tasol God yet i bin wokim. Long rot bilong dispela Pikinini olgeta narapela lain i kamap—pastaim ol ensel long heven, na bihain ol man long graun. ( Jop 38:7; Luk 3:38) Olgeta dispela lain i kamap wanpela famili i stap long heven na graun. Long olgeta dispela lain, Jehova em i God, King bilong heven na graun, na gutpela Papa bilong ol.
3. (a) Yumi olgeta i bin kisim wanem samting long namba wan papamama bilong yumi? (b) Jehova i tingim tru ol pikinini bilong Adam, olsem na em i mekim wanem bilong helpim ol?
3 Taim namba wan papamama bilong yumi i mekim sin long laik bilong tupela yet, God i tok tupela i mas i dai. Em i rausim ol long Iden na God i no stap moa olsem Papa bilong ol. Ol i no insait moa long famili bilong em i stap long heven na graun. (Stat 3:22-24; Lo 32:4, 5) Yumi olgeta i tumbuna pikinini bilong ol, olsem na taim mama i karim yumi, sin na pasin kranki i stap pinis long skin bilong yumi. Tasol Jehova i save olsem sampela pikinini bilong Adam na Iv bai laikim stretpela pasin. Olsem na Em i tingim tru ol na em i wokim rot na bai ol inap “kamap fri bilong kisim glori bilong ol pikinini bilong God.”—Rom 8:20, 21, King Jems Nupela Testamen.
Lain Israel i No Stap Gut Moa
4. Jehova i wokim rot na lain Israel bilong bipo i ken kisim wanem gutpela samting?
4 Inap 2,500 yia bihain long Jehova i wokim Adam, em i wokim rot na sampela man inap pas gut wantaim Em. Em i makim lain Israel bilong bipo long i stap lain bilong em na em i givim Lo bilong em long ol. (Stat 12:1, 2) Em i wokim ol i kamap wanpela lain na long rot bilong dispela lain em bai kamapim ol samting em i tingting pinis long mekim. (Lo 14:1, 2; Aisaia 43:1) Tasol ol i kalabus yet long sin na i dai, olsem na ol i no stap fri olsem Adam na Iv i bin i stap.
5. Ol Israel i mekim wanem na ol i no i stap moa olsem lain bilong God?
5 Tasol lain Israel i stap gut long ai bilong God. Ol i gat wok tu long rispek long Jehova olsem Papa bilong ol na mekim ol samting i stret wantaim ol samting em i tingting pinis long mekim. Jisas i tok em i bikpela samting long ol i mas mekim olsem. (Matyu 5:43-48) Tasol lain Israel i no mekim. Ol dispela Juda i tok, “mipela i gat wanpela Papa tasol, em God,” tasol Jisas i tok pasin na tingting bilong ol i soim olsem dispela tok i no stret. ( Jon 8:41, 44, 47) Long 33 C.E., God i pinisim Lo na lain Israel i no i stap moa olsem lain bilong em. Tasol olsem wanem? Dispela i makim olsem ol manmeri i no inap pas gut moa wantaim God?
Bungim “Ol Samting Bilong Heven”
6. Wanem wok bilong dispela rot Jehova i wokim, olsem Pol i kamapim long Efesus 1:9, 10?
6 Aposel Pol i tok sampela manmeri inap pas gut wantaim God. Em i stori long pasin Jehova i bihainim na bai ol man i bilip ol inap insait long famili bilong Em. Pol i tok: “Bipo God i tingting pinis long dispela samting em i laik mekim long wok bilong Krais. . . . Dispela samting em i laik mekim em i olsem: Em i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais, ol samting bilong heven na bilong graun tu.” (Efesus 1:9, 10) Jisas Krais em i bikpela samting tru insait long dispela rot Jehova i wokim na bai ol man inap insait long famili bilong Em. Long rot bilong em, God inap orait long ol manmeri. Liklik lain manmeri inap kisim laip long heven. Planti manmeri tru bai i stap oltaim long graun.
7. Husat ol i olsem “ol samting bilong heven”?
7 Pastaim long Pentikos 33 C.E., God i kirap long bungim “ol samting bilong heven,” em ol man bai mekim wok king wantaim Krais long Kingdom bilong heven. Ol i bilip long ofa bilong Krais na long dispela as God i kolim ol stretpela man. (Rom 5:1, 2) Bihain, ol Juda na ol man bilong narapela lain i insait long dispela lain, na namba bilong “ol samting bilong heven” em 144,000. (Galesia 3:26-29; KTH 14:1) Liklik hap lain bilong ol, olsem remnan, i stap yet long graun.
Bungim ‘Ol Samting Bilong Graun’
8. Husat ol i olsem ‘ol samting bilong graun?’ Ol i stap olsem wanem wantaim Jehova?
8 Long wankain pasin God i bungim tu ‘ol samting bilong graun.’ Long nau em i bungim planti milion manmeri em ol inap kisim laip oltaim long graun. Ol i wanbel wantaim lain remnan bilong Kingdom na ol i litimapim nem bilong Jehova na lotu bilong em. (Aisaia 2:2, 3; Sefanaia 3:9) Ol tu i save kolim Jehova olsem “Papa,” long wanem, ol i save em i as bilong laip. Na ol i bilip long blut bilong Jisas i baim bek ol, olsem na ol i stap gutpela long ai bilong Jehova. (KTH 7:9, 14) Tasol ol i gat sin yet, olsem na long nau God i no ken orait olgeta long ol olsem ol pikinini bilong em, dispela samting bai kamap bihain.
9. Rom 8:21 i mekim wanem tok promis long ol manmeri?
9 Ol manmeri husat inap kisim laip long graun, ol i wet long taim “God bai i pinisim dispela kalabus bilong bagarap nau olgeta samting i stap long en.” (Rom 8:21) Dispela samting bai kamap bihain long taim Krais na ami bilong em long heven i kamapim Armagedon bilong pinisim taim bilong bikpela hevi tru. Olgeta pasin nogut bilong graun bilong Satan bai pinis na ol gutpela samting bai kamap long Taim Bilong Wan Tausen Yia Bilong Jisas Krais i Stap King long Kingdom.—KTH 19:17-21; 20:6.
10. Ol wokman bilong Jehova bai mekim wanem singsing bilong litimapim nem bilong Jehova?
10 Em bai gutpela samting tru taim ol wokman bilong Jehova long graun i wanbel long mekim wankain tok olsem ol wokman bilong Jehova long heven i mekim, em ol i tok: “Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam na lotu long yu. Long wanem, stretpela pasin bilong yu i kamap ples klia pinis.” (KTH 15:3, 4) Yes, olgeta wokman bilong Jehova bai i stap wanbel long lotuim dispela wanpela God tru. Ol manmeri i dai pinis ol bai kirap bek na ol tu bai inap long litimapim nem bilong Jehova.—Aposel 24:15.
Ol Bai i Stap Fri Long Bihain
11. Ol manmeri i winim taim bilong bikpela hevi tru, ol bai i stap fri long wanem ol samting?
11 Bihain long bikpela hevi tru, em Armagedon i pinis bilong en, bai i no gat moa pasin nogut long graun, na Satan bai no stap moa olsem “giaman god bilong dispela graun.” Ol man i lotu long Jehova i no gat hatwok moa long sakim ol samting nogut bilong Satan. (2 Korin 4:4; KTH 20:1, 2) Lotu giaman i no ken bagarapim moa nem bilong Jehova na brukim ol man long narapela narapela lain. Ol bikman bilong gavman bai no mekim moa pasin i no stret long ol wokboi bilong trupela God. Ol bai i stap fri tru!
12. Long wanem rot bai olgeta i lusim kalabus bilong sin na ol hevi bilong en?
12 Jisas, olsem ‘Pikinini Sipsip Bilong God i rausim sin bilong olgeta manmeri bilong graun,’ bai mekim wok long ofa bilong em na tekewe ol rong ol man i bin mekim. ( Jon 1:29) Taim Jisas i stap long graun na em i tok sin bilong wanpela man i tekewe, em i oraitim sik bilong dispela man na bai ol man i ken save sin bilong em i tekewe. (Matyu 9:1-7; 15:30, 31) Na olsem tasol, Krais Jisas, em King bilong Kingdom bilong God long heven, em bai wokim mirakel na oraitim ol aipas, mauspas, yaupas, ol lek nogut, ol man i gat sik long tingting, na ol man i gat ol narapela kain sik tu. (KTH 21:3, 4) Olgeta man i harim tok, “lo bilong sin” bai i tekewe long skin bilong ol na tingting na pasin bilong ol bai i kamap gutpela, na ol yet na God tu bai amamas long dispela. (Rom 7:21-23) Long pinis bilong Wan Tausen Yia, skin na tingting bilong ol i kamap gutpela olgeta, ol bai “kamap olsem” dispela wanpela God tru.—Stat 1:26.
13. Krais bai mekim wanem taim Wan Tausen Yia i pinis? Wanem samting bai kamap?
13 Taim Krais i helpim pinis ol manmeri long kamap gutpela olgeta, em bai givim bek long Papa dispela namba em i bin kisim bilong mekim dispela wok. Baibel i tok: “Long dispela taim bai olgeta samting i pinis. Na bai Krais i pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa. Long wanem, Krais i mas i stap king i go inap em i daunim olgeta birua bilong en.” (1 Korin 15:24, 25) Wok bilong Kingdom long bosim graun inap Wan Tausen Yia em inapim wok bilong en, olsem na bai i no gat wok moa long dispela gavman i stap namel long Jehova na ol lain manmeri. Na sin na i dai bai pinis olgeta na Jisas i kisim bek ol man, olsem na wok bilong Jisas olsem Man bilong kisim bek ol man i pinis. Baibel i tok: “Pikinini Bilong God bai i putim em yet aninit long God. Pastaim God i bin putim olgeta samting aninit long Pikinini bilong en, tasol taim Pikinini Bilong God i putim em yet aninit long God, orait God bai i stap het tru bilong olgeta samting.”—1 Korin 15:28.
14. Taim ol manmeri i kamap gutpela olgeta, God bai mekim wanem long ol? Bilong wanem em i mekim olsem?
14 Bihain long dispela, ol manmeri i kamap gutpela olgeta ol i ken kamapim bel bilong ol, ol i laik mekim wok bilong dispela wanpela God tru inap oltaim oltaim o nogat. Olsem na paslain long God i kisim ol i stap pikinini bilong em, em bai traim ol dispela manmeri i gutpela olgeta. Dispela em laspela traim. Satan na ol spirit nogut bilong em bai lusim hul i no gat as. Dispela samting i no ken bagarapim ol manmeri i laikim tru Jehova. Tasol ol manmeri i larim Satan i pulim ol long bikhet long Jehova, ol bai lus olgeta wantaim Satan na ol spirit nogut.—KTH 20:7-10.
15. Olgeta long heven na graun bai i stap olsem wanem long bihain?
15 Ol manmeri i gutpela olgeta na i stap gut long God long laspela traim, Jehova bai kisim ol olsem ol pikinini bilong em. Kirap long dispela taim, ol bai i stap fri tru olsem ol pikinini bilong God, ol i insait long famili bilong God i stap long heven na graun. Olgeta long heven na long graun bai wanbel gen long lotuim em, em dispela wanpela God tru. Ol samting Jehova i tingting pinis long kamapim bai kamap gutpela tru! Olsem wanem? Yu laik insait long dispela famili bilong heven na graun i stap amamas na i stap oltaim? Sapos yu laik, orait mipela i laik bai yu bihainim tru tok Baibel i mekim long 1 Jon 2:17: “Dispela graun bai i pinis, na olgeta pasin bilong dispela graun, . . . ol tu bai i pinis wantaim. Tasol man i bihainim tok bilong God, em bai i stap oltaim.”
Stori Gen Long Ol Dispela Tok
• Taim pasin bikhet i no kamap yet long Iden, olgeta lain i lotu long Jehova ol i stap olsem wanem wantaim em?
• Ol manmeri i mekim wok bilong God ol i mas mekim wanem?
• Husat bai kamap pikinini bilong God long bihain? Olsem wanem dispela samting i insait long laik bilong Jehova long olgeta man na ensel i mas wanbel long lotuim em?
[Piksa long pes 190]
Ol manmeri i harim tok, ol bai i stap long Paradais