Sapta 10
Nolaik Tru Long “Ol Toktok Hait Bilong Satan”
TAIATAIRA
1. Taiataira i stap longwe long ol narapela kongrigesen o olsem wanem? I gat wanem ol samting bilong lotu long Taiataira?
INAP 64 kilomita longwe long taun Bergama (Pergamum) i gat wanpela taun bilong Turki i stap, ol i kolim Akisar. Inap olsem 1,900 yia bipo, taun Taiataira i stap long dispela ples. I gat rot i stap na i no hatwok long wasman bilong raun em i go long dispela taun na long Sardis na Filadelfia na Laodisia tu. Long Pergamum pasin bilong lotuim king bilong Rom i strong, tasol ating long Taiataira, nogat. Tasol long Taiataira i gat planti alta na planti haus lotu bilong ol god giaman bilong ol haiden, na i gat planti wok bisnis.
2, 3. (a) Baibel i stori olsem wanem long wanpela meri bilong Taiataira i bin kamap Kristen? (b) Jisas em i “Pikinini Bilong God” na ‘ai bilong em i lait olsem paia’ na olsem wanem dispela tupela samting i bikpela samting long ol Kristen long Taiataira?
2 Taim Pol i autim tok long hap bilong Masedonia, em i bungim wanpela meri bilong Taiataira, em Lidia, em i save wok bisnis long retpela laplap. Lidia wantaim ol wanhaus bilong em ol i bilip, na Lidia i strong long singautim Pol na ol poroman bilong em i go long haus bilong em. (Aposel 16:14, 15) Lidia em namba wan Taiataira em Baibel i stori long em i bin kamap Kristen. Bihain kongrigesen Kristen i kamap long dispela taun. Jisas i givim planti tok long dispela kongrigesen, winim ol narapela. Em i kirapim tok olsem: “Yu mas raitim sampela tok long ensel bilong sios [kongrigesen] i stap long taun Taiataira. Dispela tok i olsem, ‘Mi Pikinini Bilong God, na ai bilong mi i lait olsem paia i lait strong moa, na lek bilong mi i lait tru olsem bras ol bin polisim gut tru. Mi salim dispela tok i kam long yu.’ ”—KTH 2:18.
3 Dispela tok “Pikinini Bilong God” i stap long dispela ves tasol long Kamapim Tok Hait 2:18, tasol long sampela hap moa bilong Kamapim Tok Hait, Jisas i kolim God olsem “Papa bilong mi.” (KTH 2:27; 3:5, 21) Taim Jisas i tok, “Mi Pikinini Bilong God,” ating dispela i helpim ol Kristen long Taiataira long tingim olsem Jisas i save gut long God, long wanem em i Pikinini bilong em. Ai bilong Pikinini “i lait olsem paia”—em i skelim ol dispela Kristen long kot na em bai pinisim olgeta samting nogut em i lukim long kongrigesen, olsem paia i kukim. Em i tok gen olsem lek bilong em “i lait tru olsem bras ol i bin polisim gut tru,” na dispela i kamapim klia olsem taim em i stap long graun na em i stap gut long God, em i makim gutpela pasin tru ol narapela i ken bihainim. Ating ol Kristen long Taiataira i bin bihainim ol tok em i givim long ol, na yumi tu mas mekim olsem!—1 Pita 2:21.
4, 5. (a) Ol Kristen long Taiataira i bin mekim wanem na Jisas inap tok, ol i bin mekim gutpela wok? (b) Ol kongrigesen bilong ol Witnes Bilong Jehova long nau i gat wanem pasin i wankain olsem kongrigesen bilong Taiataira long bipo?
4 Jisas i mekim gutpela tok long ol Kristen long Taiataira. Em i tok: “Mi save pinis long olgeta pasin yu save mekim. Mi save, yu laikim tru ol manmeri, na yu bilip long mi, na yu save mekim olkain wok bilong helpim ol arapela. Mi save, yu sanap strong long olgeta hevi i kamap long yu. Mi save, ol pasin yu bin mekim bipo, ol i gutpela, na nau ol pasin bilong yu i kamap gutpela moa yet.” (KTH 2:19) Ol Kristen long Taiataira i no olsem ol Kristen long Efesus, em ol i no givim bel tru long Jehova olsem ol i bin mekim taim ol i bilip nupela. Bilip bilong ol dispela Kristen long Taiataira i stap strong. Na ol i mekim planti pasin i gutpela moa yet, winim bilong pastaim. Ol i sanap strong long olgeta hevi, wankain olsem ol 3-pela kongrigesen Jisas i salim pinis tok long ol. Long nau tu inap olsem 100,000 kongrigesen bilong ol Witnes Bilong Jehova ol i mekim wankain pasin! Ol i givim bel tru long Jehova, na ol yangpela wantaim ol lapun i wok strong long autim tok. Planti tru ol i kirap mekim wok painia, olsem na ol i mekim gutpela wok long liklik hap taim i stap yet bilong autim tok bilong Kingdom.—Matyu 24:14; Mak 13:10.
5 Inap planti yia pinis, planti gutpela wokboi bilong liklik lain na bikpela lain ol i bin sanap strong long wok bilong God. Ol narapela manmeri i bel hevi moa yet, tasol yumi ken strongim bel! Long wanem, “De bilong Bikpela [Jehova] . . . em i klostu nau na dispela De bai i kamap kwiktaim tru.”—Sefanaia 1:14; Joel 2:1; Habakuk 2:3; KTH 7:9; 22:12, 13.
“Dispela Meri Jesebel”
6. (a) Kongrigesen long Taiataira i bin mekim sampela gutpela wok, tasol Jisas i lukim wanem pasin nogut ol i mas stretim kwiktaim? (b) Jesebel em i husat? I stret em i ken tok em i profet o nogat?
6 Ai bilong Jisas i lait olsem paia na em i lukim wanpela pasin kongrigesen Taiataira i mas stretim kwiktaim. Em i tokim ol: “Tasol mi gat dispela tok long yu. Yu save larim dispela meri Jesebel i stap wantaim yu. Dispela meri i save tok olsem em i profet, tasol em i save giamanim ol wokman bilong mi na em i lainim ol long mekim pasin pamuk na long kaikai abus ol i bin ofaim long ol giaman god.” (KTH 2:20) Kwin Jesebel i stap inap olsem 950 yia paslain long Krais. Em i meri bilong King Ahap bilong Israel na em i save lotuim god giaman Bal. Em i kisim nem nogut tru, long wanem em i kilim i dai man na mekim pasin pamuk na i laik bosim ol man. Jehova i makim Jehu bilong kilim em i dai. (1 King 16:31; 18:4; 21:1-16; 2 King 9:1-7, 22, 30, 33) I no gat as na dispela meri Jesebel, em meri bilong lotuim ol god giaman, em i ken tok em i wanpela profet. Em i no olsem Miriam na Debora, em tupela gutpela profet meri long Israel. (Kisim Bek 15:20, 21; Hetman 4:4; 5:1-31) Na spirit bilong Jehova i no bin kirapim Jesebel long autim tok profet olsem spirit i bin mekim long lapun Ana na 4-pela pikinini meri bilong evanjelis Filip.—Luk 2:36-38; Aposel 21:9.
7. (a) Taim Jisas i tok long “dispela meri Jesebel,” em i tok long wanem pasin i kamap insait long kongrigesen? (b) Sampela meri i bung wantaim kongrigesen ol i bihainim laik bilong ol yet na ating ol i mekim wanem bilong haitim rong bilong ol?
7 Olsem na “dispela meri Jesebel” long Taiataira i tok em i profet, em i giaman. Em i no gat spirit bilong God. Em i husat? Ating em i wanpela meri o em i makim wanpela lain meri ol i save mekim pasin i no stret na ol i bagarapim kongrigesen. Ating i gat sampela meri ol i bung wantaim kongrigesen na ol i wok long pulim sampela long kongrigesen long mekim pasin pamuk. Ol i bihainim laik bilong ol yet na ol i no sem long paulim sampela tok bilong Baibel bilong haitim rong bilong ol. Ol i autim ol tok giaman—ol i profet giaman! Ol i pulim ol narapela long bihainim pasin bilong ol, em “pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal . . . Dispela pasin bilong mangal em i wankain olsem pasin bilong lotu long giaman god.” (Kolosi 3:5) Ol i laik bai ol manmeri bilong kongrigesen i mekim olkain pasin pamuk na amamasim skin bilong ol yet. Planti misin long nau ol i no gat tok long kain pasin nogut olsem.
8. (a) Jisas i tok wanem long dispela “Jesebel” long Taiataira? (b) Long nau sampela meri i mekim wanem na i no stret ol i mekim?
8 Jisas i mekim sampela tok moa na em i tokim ol elda long Taiataira: “Mi laik bai em [dispela meri Jesebel] i tanim bel, olsem na mi larim em i stap sampela taim. Tasol nogat. Em i no laik tanim bel na givim baksait long pasin pamuk bilong en. Orait harim. Bai mi mekim dispela meri i kisim sik na i gat bikpela pen. Na ol dispela man i mekim pasin pamuk wantaim em, sapos ol i no tanim bel na givim baksait long ol pasin em i mekim, orait bai mi givim bikpela pen na hevi long ol tu.” (KTH 2:21, 22) Jesebel bilong pastaim em i bin bosim man bilong em Ahap, na em i bikhet long Jehu, em dispela man God i makim bilong kilim i dai ol man nogut. Na olsem tasol ating ol meri kain olsem Jesebel long nau ol i laik bosim man bilong ol o ol elda. I no stret ol meri i mekim olsem, tasol ating ol elda long Taiataira i larim dispela pasin i stap insait long kongrigesen. Olsem na Jisas i givim strongpela tok long ol, na dispela tok i bilong ol kongrigesen bilong lain bilong Jehova long nau tu. I gat sampela meri long nau, em ol i strong long bihainim laik bilong ol yet, na ol i mekim na man bilong ol i lusim bilip tru, na sampela meri olsem ol i bin putim sampela gutpela wokboi bilong Jehova i go long kot.—Lukim Jut 5-8.
9. (a) Ol tok Jisas i mekim long Jesebel, olsem wanem dispela i no makim olsem olgeta meri long kongrigesen ol i nogut? (b) Long wanem taim tasol pasin bilong Jesebel i kamap?
9 Tasol i gat planti gutpela meri ol i stap insait long ol kongrigesen Kristen. Long nau ol dispela meri Kristen i mekim bikpela hap wok bilong autim tok; ol i mekim ol Baibel-stadi na long dispela rot ol i bringim planti planti nupela man na meri i kam insait long kongrigesen. Song 68:11 i tok: “Bikpela i givim tok long ol manmeri bilong en, na planti meri i go autim dispela tok.” Sapos ol meri i mekim gutpela pasin isi na ol i save harim tok bilong man bilong ol, dispela gutpela pasin bilong ol inap kirapim man bilong ol long tanim bel, na “i gutpela moa yet long ai bilong God.” (1 Pita 3:1-4) King Lemuel i litimapim nem bilong meri marit em i mekim gut ol wok bilong em. (Sindaun 31:10-31) Tasol sapos ol meri i pulim man long mekim pasin pamuk o ol i bikhet long ol man i gat wok long bosim ol, em nau, pasin kain olsem bilong Jesebel bai kamap.—Efesus 5:22, 23; 1 Korin 11:3.
10. (a) Bilong wanem Jesebel na ol pikinini bilong em i kisim strafe? (b) Ol manmeri i kamap pikinini bilong Jesebel ol i stap nogut olsem wanem? Ol i mas mekim wanem?
10 Jisas i stori moa long “dispela meri Jesebel” na em i tok: “Ol pikinini bilong em tu, bai mi kilim ol i dai. Olsem na olgeta sios [kongrigesen] bai i save, mi save skelim gut bel na tingting bilong olgeta man. Na bai mi givim pe long yupela wan wan, inap long pasin yupela i mekim.” (KTH 2:23) Jisas i bin givim liklik hap taim long Jesebel na long ol pikinini bilong em bambai ol i ken tanim bel, tasol ol i no lusim ol pasin nogut bilong ol, olsem na ol i mas kisim strafe. Dispela i olsem strongpela toksave i go long ol Kristen bilong nau. Maski ol i man o meri, sapos ol i bihainim pasin bilong Jesebel na kamap pikinini bilong em, olsem ol i kalapim lo bilong Baibel na ol i no daun long ol man i stap het bilong ol, o ol i mekim pasin pamuk, o ol i bikhet na ol i no bihainim pasin God i bin kamapim insait long lain bilong em, orait ol i gat bikpela sik bilong spirit. Sapos kain man o meri olsem i go long ol elda bambai ol i ken beten bilong helpim em, orait ol dispela elda ‘i bilip long God na ol i beten,’ olsem na “Bikpela bai i mekim orait dispela sikman”—sapos em i bihainim pasin daun na em i mekim pasin i stret wantaim ol dispela beten. Tasol nogut kain man (o meri) olsem i ting em inap giamanim God o Krais na em i wok long haitim pasin nogut em i mekim, o long ai bilong ol man em i mekim olsem em i givim bel long mekim wok bilong God.—Jems 5:14, 15.
11. Ol kongrigesen bilong nau i mas mekim wanem bilong was gut, nogut sampela meri i kirap mekim pasin i no stret?
11 Gutpela tru, planti kongrigesen bilong ol Witnes Bilong Jehova long nau ol i save was gut long dispela samting. Ol elda i save was gut, nogut sampela insait long kongrigesen i kirap na sakim lo bilong God na ol i bihainim tingting o pasin i no stret. Taim ol elda i lukim sampela i laik pundaun, ol i save wok strong long helpim ol bambai ol i ken kamap strong gen na ol i no ken lus. (Galesia 5:16; 6:1) Sapos sampela meri insait long kongrigesen i laik kirapim pasin bilong sakim ol man, ol elda i strong long pasim ol dispela meri, tasol ol i mekim long pasin sori. Na tu long sampela taim ol buk na nius bilong ol Witnes Bilong Jehova i givim gutpela tok long yumi bilong helpim yumi long abrusim ol kain pasin olsem.a
12. Liklik lain em Jon i piksa bilong ol, ol i wok strong long mekim wanem na i wankain olsem Jehu i bin mekim?
12 Tasol sapos wanpela insait long kongrigesen i mekim pasin nogut tru, olsem pasin pamuk samting, na em i no tanim bel na lusim dispela pasin, orait kongrigesen i mas rausim em. Jehu i bin wok strong long pinisim pasin nogut em Jesebel i kamapim long Israel. Na olsem tasol long nau, dispela liklik lain, ol i strong long pinisim pasin nogut insait long kongrigesen. Long dispela rot ol i makim gutpela pasin ol poroman bilong ol i ken bihainim, em Jonadap i piksa bilong ol. Na tu, ol i kamapim long ples klia olsem ol i narapela kain tru long ol pris pasto, em ol i save larim tasol ol man i mekim pasin nogut.—2 King 9:22, 30-37; 10:12-17.
13. Ol manmeri i larim ol meri i pulim ol long mekim pasin i no stret, wanem samting bai painim ol?
13 Pikinini bilong God em i Man bilong autim tok bilong God na em i Jas, olsem na i stret em i mas kamapim long ples klia ol meri bilong nau i bihainim pasin bilong Jesebel, na i stret em i tromoi ol long bet bilong sikman, long wanem ol i gat bikpela sik bilong spirit em bilong i dai. (Malakai 3:1, 5) Ol lain i pundaun na bihainim pasin nogut bilong ol dispela meri, ol tu bai kisim bikpela pen na hevi—bai kongrigesen i rausim ol, na bai ol i no inap bung moa wantaim kongrigesen Kristen na i olsem ol i dai pinis. Ol i mas tanim bel na lusim pasin nogut bilong ol na bai kongrigesen i kisim bek ol. Sapos nogat, bai ol i dai tru—bai Krais i “kilim ol i dai” long taim bilong bikpela hevi tru sapos ol i no i dai paslain long dispela taim. Tasol i gat liklik hap taim i stap yet, olsem na sapos ol i hevi long bikpela rong ol i bin mekim na ol i tanim bel tru, ol inap i kam bek insait long kongrigesen.—Matyu 24:21, 22; 2 Korin 7:10.
14. (a) Jisas i givim wanem wok long ol elda bilong stretim sampela hevi i kamap insait long kongrigesen, olsem sampela i kirap bihainim pasin bilong Jesebel? (b) Ol elda i wok long stretim ol kain hevi olsem, kongrigesen i mas wok gut wantaim ol olsem wanem?
14 ‘Olgeta kongrigesen’ i mas save Jisas i save “skelim gut bel na tingting bilong olgeta man.” Em i save skelim wanem kain tingting tru i kirapim man long mekim pasin em i mekim. Olsem na Jisas i givim wok long ol “sta,” olsem ol elda, bilong stretim sampela hevi i kamap insait long kongrigesen, olsem sampela i kirap bihainim pasin bilong Jesebel. (KTH 1:20) Taim ol dispela elda i skelim pinis kain hevi olsem na ol i tokaut pinis long samting ol i mas mekim long man i gat rong, orait ol wan wan insait long kongrigesen i no ken wok long askim olsem i gat wanem as na ol elda i mekim olsem long em. Nogat. Olgeta i mas mekim pasin daun na bihainim tok bilong ol elda, na ol i mas wok gut yet wantaim ol dispela “sta” bilong kongrigesen. Sapos ol i stap gut long Jehova na long ol man em i putim bilong lukautim kongrigesen, bai ol i kisim gutpela pe. (Song 37:27-29; Hibru 13:7, 17) Gutpela sapos yu yet yu inap kisim blesing taim Jisas i givim pe long olgeta wan wan inap long pasin ol i bin mekim.—Galesia 5:19-24; 6:7-9.
“Olgeta Samting Yupela i Save Holim, Em Yupela i Mas Holim Strong”
15. (a) Jisas i tok wanem long ol manmeri i no bin bihainim pasin nogut bilong Jesebel? (b) I gat wanem samting na yumi save, sampela manmeri i tok ol i Kristen long 1918 ol i no bihainim pasin nogut bilong ol man i lusim pinis bilip Kristen tru?
15 Ol tok Jisas i mekim nau i strongim bel bilong ol, em i tok: “Tasol nau mi tok long yupela ol arapela manmeri bilong sios [kongrigesen] i stap long Taiataira. Yupela i no bihainim tok bilong dispela meri, na yupela i no bin kisim save long dispela pasin ol i kolim ‘Ol toktok hait bilong Satan.’ Mi tokim yupela olsem, mi no inap putim narapela hevi long yupela. Tasol olgeta samting yupela i save holim, em yupela i mas holim strong, i go inap long taim mi kam.” (KTH 2:24, 25) I gat sampela gutpela manmeri long kongrigesen bilong Taiataira em ol i no bin bihainim pasin bilong Jesebel. Na 40 yia paslain long 1918 na bihain long dispela taim, i gat sampela manmeri i tok ol i Kristen na ol i no orait long olkain pasin pamuk na pasin giaman i pulap long ol misin. Liklik lain nau ol i kisim nem olsem ol Witnes Bilong Jehova, ol i bin wok long helpim lain bilong ol misin long save, lotu haiden i as bilong planti bilip bilong ol misin. Na dispela liklik lain yet i kirap lusim olgeta bilip na pasin bilong lotu bilong Babilon i stap insait long ol misin i bin lusim bilip Kristen tru. Dispela liklik lain i lusim tu ol tok bilong “dispela meri Jesebel” i orait long ol pasin nogut.
16. Jisas na lain bilong bosim ol Kristen bilong pastaim i no laik putim narapela hevi long ol Kristen, tasol ol i mas klia long wanem ol samting?
16 Liklik lain i bin kirapim bikpela lain long was gut long ol samting i laik pulim ol long mekim pasin pamuk samting. I no gat wok long ol i lukim piksa o buk nogut o insait long sampela amamas bilong dispela graun bambai ol i ken save long ol dispela kain pasin, o ol i ken save wanem kain pasin ol i mas klia long en. Nogat. Ol i mas bihainim gutpela tingting na klia olgeta long ol “toktok hait bilong Satan.” Olsem Jisas i tok: “Mi no inap putim narapela hevi long yupela.” Dispela tok bilong Jisas i kirapim yumi long tingim tok bilong lain bilong bosim ol Kristen bilong pastaim, em ol i tok: “Holi Spirit i stap wantaim mipela na mipela i pasim tok olsem, mipela i no laik putim planti hevi long yupela. . . . Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai. Na yupela i mas abrusim olkain pasin pamuk. Sapos yupela i . . . abrusim ol dispela pasin, em bai i gutpela.” (Aposel 15:28, 29) Sapos yu laik i stap gut long ol samting bilong spirit, yu mas klia long lotu giaman, na yu no ken mekim wok nogut long blut (olsem kisim blut long haus sik), na yu mas klia long pasin pamuk! Sapos yu mekim olsem, dispela bai helpim skin bilong yu tu long i stap gutpela.
17. (a) I gat wanem ol “toktok hait” em Satan i bin pulim ol man long bihainim long nau? (b) Yumi mas ting olsem wanem long ol “toktok hait” bilong ol saveman bilong dispela graun Satan i bosim?
17 I gat planti narapela “toktok hait bilong Satan” long nau, olsem ol kain kain askim na save bilong graun i pulim tingting bilong ol man. Na planti man i ting yumi mas larim tasol ol man i mekim pasin pamuk samting—ol i tok, ‘Laik bilong wan wan.’ Dispela kain tingting na tok i olsem wanpela “toktok hait bilong Satan.” Na ol kain pasin olsem posin na marila samting, na tingting bilong ol man olsem yumi bin kamap nating long rot bilong ol animal—dispela tu i olsem ol “toktok hait bilong Satan.” God i ting olsem wanem long ol dispela “toktok hait”? God i tok: “Bai mi pinisim save bilong ol saveman.” “Olgeta tingting hait bilong God” i narapela kain tru long ol dispela tingting bilong ol man, em Satan i as bilong en. Ol tingting bilong God i stret na i klia na i gutpela. Ol Kristen i gat gutpela tingting ol i save sakim ol “toktok hait” bilong ol saveman bilong dispela graun Satan i bosim. Yumi mas save, ‘pasin bilong dispela graun bai i pinis, na aigris bilong en tu wantaim. Tasol man i bihainim tok bilong God, em bai i stap oltaim.’—1 Korin 1:19; 2:10; 1 Jon 2:17.
18. Ol Kristen em God i makim ol na ol i stap gut long God i go inap long pinis, ol bai kisim wanem ol blesing, olsem Jisas i tok promis pinis? Ol dispela lain i kirap bek pinis bai ol i kisim wanem gutpela wok long Armagedon?
18 Nau Jisas i mekim gutpela tok long ol dispela Kristen long Taiataira na em i strongim bel bilong ol. Dispela tok i strongim tu liklik lain Kristen long nau, em God i bin makim ol. Jisas i tok: “Sapos man i winim pait, na em i bihainim pasin bilong mi i go inap taim bilong olgeta samting i pinis, orait mi bai givim em namba bilong i stap hetman bilong ol lain manmeri. Na em bai i bosim ol strong tru na brukim ol liklik liklik, olsem man i brukim wanpela sospen graun. Dispela wok mi bai givim em, em i wankain olsem dispela wok Papa bilong mi i bin givim mi bilong bosim ol manmeri.” (KTH 2:26, 27) Em gutpela wok tru! Liklik lain em God i makim ol na ol i winim pinis pait, taim ol i kirap bek bai ol i kisim dispela wok. Bai ol i wok wantaim Jisas long “brukim” o bagarapim ol bikhet lain long Armagedon. Ol strongpela samting bilong pait ol dispela lain bilong graun i bin wokim bai i olsem i no gat strong moa taim Krais i bagarapim ol birua bilong em.—Song 2:8, 9; KTH 16:14, 16; 19:11-13, 15.
19. (a) Dispela “sta i save kamap long moningtaim tru” em i husat? Olsem wanem bai em i givim em yet long ol manmeri i winim pait? (b) I gat wanem tok bilong strongim ol manmeri bilong bikpela lain?
19 Na Jisas i tok moa, olsem: “Mi bai givim em dispela sta i save kamap long moningtaim tru.” (KTH 2:28) Bihain Jisas yet i stori long dispela “sta” i makim wanem samting, em i tok: “Mi dispela sta i save lait tumas long moningtaim tru.” (KTH 22:16) Yes, Jisas yet i truim dispela tok profet em Jehova i bin subim Balam long mekim, olsem: “Wanpela [sta] i gat biknem na strong bai i kamap king bilong dispela lain Israel.” (Namba 24:17) Olsem wanem Jisas bai givim “dispela sta i save kamap long moningtaim tru” long ol man i winim pait? Bai em i givim em yet long ol, olsem em bai i pas tru wantaim ol. (Jon 14:2, 3) Dispela samting em i strongpela samting tru bilong kirapim ol long karim hevi na sanap strong! Na dispela samting i strongim bikpela lain tu, long wanem ol i save, liklik taim na “dispela sta” bai em i kirap mekim wok long strong bilong em bilong bosim Kingdom na bai em i kamapim bek Paradais hia long graun!
Stap Gut Long God
20. I gat wanem kain pasin i kamap insait long ol misin i gat nem Kristen na i kirapim yumi long tingim sampela pasin kranki bilong kongrigesen long Taiataira long bipo?
20 Ol dispela tok i mas strongim tru ol dispela Kristen long Taiataira. Olaman! Pikinini bilong God long heven em yet i toktok wantaim ol long sampela hevi bilong ol! Yumi save, sampela long kongrigesen i bin bihainim ol dispela gutpela tok bilong helpim ol. Jisas i salim tok i go long 7-pela kongrigesen, na em i givim planti tok long dispela kongrigesen, na dispela tok i helpim yumi long save long lain Kristen tru long nau. Long yia 1918 Jisas i bin kam long haus bilong Jehova bilong mekim wok kot, na long dispela taim planti lain i tok ol i Kristen ol i gat pasin nogut i stap long ol—ol i save lotuim ol god giaman na mekim pasin pamuk bilong spirit. (Jems 4:4) As bilong bilip bilong sampela em ol tok bilong sampela meri i gat strongpela tingting, em ol i bin i stap long yia 1850 samting. Sampela meri olsem em Ellen White bilong lotu SDA na Mary Baker Eddy bilong lotu Kristen Saiens, na long nau i gat planti meri i kamap pris o pasto na ol i autim tok insait long haus lotu na lainim ol manmeri. (Skelim wantaim 1 Timoti 2:11, 12.) Long sampela kain lotu Katolik, ol i save litimapim moa yet nem bilong Maria, winim God na Krais. Jisas i no bin mekim olsem. (Jon 2:4; 19:26) Ol lain i orait long ol meri i mekim ol dispela kain wok i no stret ol i mekim, yu ting ol i Kristen tru?
21. Ol tok Jisas i givim long kongrigesen long Taiataira i lainim yumi wan wan long wanem ol samting?
21 Olgeta wan wan Kristen i mas tingim gut dispela tok, maski ol i bilong liklik lain o ol i bilong ‘bikpela lain.’ (Jon 10:16) Ating sampela i laik abrusim hatwok, olsem ol manmeri i bihainim Jesebel long Taiataira. O ating ol i pilim olsem sapos ol i lusim lo bilong God liklik, i no gat rong long dispela. Long nau i gat ol narapela kain samting yumi mas was gut long en, olsem yumi no ken kaikai samting ol man i bin wokim long blut, na yumi no save kisim blut long haus sik. Sampela i ting olsem sapos ol i strong long i go long ol haus na autim tok o long mekim ol tok long Haus Kingdom, i orait sapos ol i no strong long sakim ol piksa nogut o ol video i kamapim pasin pait na pasin pamuk, o ol i save dring planti tumas. Tasol toksave Jisas i givim long ol Kristen long Taiataira i soim yumi, yumi no ken lusim lo bilong God liklik. Jehova i laik bai yumi stap stret, na givim bel olgeta, na no ken brukim lain nabaut.
22. Jisas i tok wanem na yumi save, i bikpela samting yumi mas harim gut ol tok?
22 Na las tru Jisas i tok: “Orait man i gat yau, em i mas harim gut dispela tok Holi Spirit i autim long ol sios [kongrigesen].” (KTH 2:29) Em namba 4 taim Jisas i bin kolim dispela tok bilong kirapim tingting bilong ol, na em laspela tok em i mekim long ol narapela 3-pela kongrigesen em i salim tok long ol bihain. Olsem wanem? Yu harim gut ol tok? Sapos olsem, orait nau yu ken putim yau long ol narapela tok God i autim.
[Futnot]
a Lukim stori “Ol Gutpela Meri Kristen i Save Lotu Long God,” long Wastaua bilong Novemba 1, 2003.
[Ol Piksa long pes 51]
Long nau ol gutpela sista i mekim bikpela hap wok bilong autim tok, na long pasin daun ol i save wok gut wantaim ol man God i putim bilong bosim ol