Sapta 15

“Husat i Gutpela Man, Inap Long Em i Ken . . . Opim Dispela Buk?”

 1. Nau Jon i lukim wanem samting?

JON i lukim ol samting i nambawan tru! Em sia king bilong Jehova namel long ol bombom na ol ensel na ol 24 hetman, na dispela samting olsem bikpela solwara. Orait, nau Jon i lukluk gen long dispela sia king long heven na em i lukim wanem samting? Em i tok: “Dispela Man i sindaun i stap long sia king, na long han sut bilong en mi lukim wanpela buk i stap. Dispela buk i olsem wanpela longpela pepa ol i bin raunim na pasim, na dispela pepa i gat rait i stap long tupela hap bilong en. Na ol i bin raunim long 7-pela hap ol i bin pasim strong long gris bilong kandel na ol i putim mak antap long olgeta dispela 7-pela gris kandel. Na mi lukim wanpela strongpela ensel i singaut bikmaus olsem, ‘Husat i gutpela man, inap long em i ken rausim ol gris kandel ol i bin pasim buk long en na opim dispela buk?’ Tasol i no gat wanpela i stap long heven o i stap long graun o i stap aninit long graun, em inap long opim buk na lukluk insait long en. Mi lukim olsem i no gat wanpela man em inap long opim dispela buk na lukluk insait long en, na mi krai planti.”​—⁠KTH 5:​1-4.

2, 3. (a) Bilong wanem Jon i laik tru bai i gat man bilong opim dispela buk? Tasol i gat wanpela gutpela man inap long opim o olsem wanem? (b) Liklik lain God i makim, ol i bin wetim wanem samting nau long taim bilong yumi?

² Jehova, em Nambawan Bikpela, em yet i holim dispela buk. Pepa bilong dispela buk i gat rait long pes na long baksait, olsem na yumi save i gat ol bikpela tok long en. Em wanem ol tok? Jehova i laik soim Jon “olgeta samting i mas kamap bihain.” (KTH 4⁠:⁠1) Orait, nau yumi laik save long ol dispela samting. Tasol sori! Ol i bin pasim strong dispela buk long 7-pela gris kandel!

³ Olsem wanem? Strongpela ensel bai lukim wanpela man i gutpela man inap long em i opim dispela buk? Tok bilong wanpela Baibel (Kingdom Interlinear) i makim olsem han bilong Jehova i op na i olsem em i laik givim dispela buk long wanpela man. Tasol i no gat wanpela man long heven o long graun em i gutpela man inap long em i kisim dispela buk na opim. Na i no gat wanpela man i stap “aninit” long graun, olsem wanpela bilipman bilong bipo i stap long matmat, em inap long mekim. Olsem na Jon i krai! Ating em i no inap kisim save long “olgeta samting i mas kamap bihain.” Long taim bilong yumi tu, liklik lain God i makim, ol i bin wetim em i givim stretpela save long ol long ol dispela tok i stap long Kamapim Tok Hait. Isi isi God i wok long kamapim as bilong ol dispela tok hait long taim stret bilong truim bilong en bambai em i ken ‘helpim ol’ long kisim laip i stap oltaim.​—⁠Song 43⁠:​3, 5.

Dispela Gutpela Man

 4. (a) Husat i gutpela man inap long em i rausim ol gris kandel na opim dispela buk? (b) Liklik lain na ol gutpela poroman bilong ol long nau, ol i kisim wanem gutpela pe na gutpela wok?

⁴ Tru tumas, i gat wanpela man em inap long opim dispela buk! Jon i stori olsem: “Na wanpela bilong ol hetman i tokim mi olsem, ‘Yu no ken krai. Harim. Dispela Laion i bin kamap long lain Juda, em dispela Kru i kamap long ol lain tumbuna bilong King Devit, em i winim pait na i daunim pinis ol birua bilong en. Olsem na em inap long rausim ol 7-pela gris kandel i pasim buk na opim dispela buk.’ ” (KTH 5⁠:⁠5) Olsem na Jon yu no ken krai! Liklik lain na ol gutpela poroman bilong ol long nau, ol i bin karim hevi na traim inap planti planti yia na wetim taim bilong God i givim save long ol long as bilong ol dispela tok hait. Ol i no les long wet. Na nau yumi kisim pinis dispela save, na yumi kisim gutpela wok bilong autim ol dispela tok!

 5. (a) I gat wanem tok profet long Juda? Ol lain bilong Juda i bin mekim wok king we? (b) Husat dispela man i mas “kamap long taun Silo”?

⁵ Dispela “gutpela man” em “dispela Laion i bin kamap long lain Juda”! Jon i save long wanpela tok profet em Jekop, tumbuna bilong lain Juda, i bin mekim. Jekop i tok long namba 4 pikinini man bilong em olsem: “Juda i olsem wanpela yangpela laion. . . . Em i holim dispela stik i makim strong bilong king, na em bai i stap king oltaim. Em bai i holim dispela namba inap em i kamap long taun Silo.” (Stat 49⁠:​9, 10) Kirap long taim Devit i kamap king long Jerusalem i go inap long taim ol Babilon i bagarapim Jerusalem, ol king bilong lain bilong God i bin kamap long lain bilong Juda. Tasol i no gat wanpela em i dispela king i mas kamap long taun Silo, olsem Jekop i tok profet long en. Insait bilong tok “Silo” i olsem “Man bilong kisim dispela wok.” Dispela tok profet i makim Jisas, em man bilong kisim dispela wok king bilong lain bilong Devit, na nau em i kisim pinis na em bai stap King oltaim.​—⁠Esekiel 21⁠:​25-​27; Luk 1⁠:​32, 33; KTH 19⁠:⁠16.

 6. Olsem wanem Jisas em i olsem “kru” i kamap long lain bilong Jesi na long ol lain tumbuna bilong King Devit?

⁶ Jon i kisim kwik as bilong dispela tok bilong hetman long “Kru” i kamap long ol lain tumbuna bilong Devit. God i bin tok promis long salim wanpela man i kam bilong kisim bek lain bilong em, na tok profet i kolim dispela Man olsem “nupela kru” na “nupela king” em bai i kamap long “lain bilong Jesi.” (Aisaia 11⁠:​1, 10) Jisas em i olsem “nupela kru” i kamap long lain bilong Jesi, long wanem, em i kamap long lain bilong King Devit, em pikinini bilong Jesi. Em i “nupela king” i kamap long lain bilong Jesi, olsem na em i dispela Man bilong kirapim gen wok king bilong lain bilong Devit​—⁠em i givim strong long en bambai dispela wok king i ken i stap oltaim.​—⁠2 Samuel 7⁠:⁠16.

 7. Olsem wanem Jisas em i gutpela man inap long em i kisim dispela buk long han bilong Man i sindaun long sia king?

⁷ Taim Jisas i stap man long graun em i nambawan tru na em i win olgeta long i stap gut long Jehova maski bikpela pen na traim i bin painim em. Satan i bin sutim tok long Jehova, tasol Jisas i givim rot long Jehova long bekim tok long Satan na daunim dispela tok bilas olgeta. (Sindaun 27⁠:⁠11) Olsem na em inap tru long tok olsem: “Mi winim pinis strong bilong dispela graun.” (Jon 16⁠:33) Long dispela as Jehova i bin givim bikpela namba long Jisas taim em i kirap bek. Long olgeta wokboi bilong God, Jisas tasol em i gutpela man inap long em i kisim dispela buk na kamapim ol bikpela tok bilong en long ol man.​—⁠Matyu 28⁠:⁠18.

 8. (a) I gat wanem samting bilong Kingdom na dispela i makim olsem Jisas em inap long opim dispela buk? (b) Bilong wanem i stret long wanpela bilong ol 24 hetman i tokim Jon long dispela man em inap long opim dispela buk?

⁸ Olsem na i stret Jisas i mas opim dispela buk. Kirap long yia 1914 em i bin i stap King bilong Kingdom bilong God, na dispela buk i kamapim planti tok long ol samting bilong dispela Kingdom. Taim Jisas i stap long graun em i stap gut long wok bilong autim ol tok i tru bilong Kingdom. (Jon 18⁠:​36, 37) Em i lainim ol disaipel long beten long dispela Kingdom i ken i kam. (Matyu 6⁠:​9, 10) Em i kirapim wok bilong autim gutpela tok bilong Kingdom long taim lotu Kristen i kamap nupela, na em i tok profet olsem dispela wok bai pinis long taim bilong las de. (Matyu 4⁠:23; Mak 13⁠:10) Na i stret tu long wanpela bilong ol dispela 24 hetman i mas tokim Jon olsem Jisas em i man bilong opim dispela buk, long wanem ol dispela hetman bai wok king wantaim Krais long Kingdom bilong em.​—⁠Rom 8⁠:17; KTH 4⁠:⁠4.

‘Pikinini Sipsip Ol i Bin Kilim Em i Dai’

 9. Jon i no lukim wanpela laion, em i lukim wanem samting i sanap i stap “namel long sia king”? Jon i stori olsem wanem long dispela samting?

⁹ Jon i laik lukim dispela “Laion i bin kamap long lain Juda,” tasol olaman! Em i lukim narapela samting olgeta! Em i tok: “Mi lukim wanpela Pikinini Sipsip i sanap i stap. Em i luk olsem ol i bin kilim em i dai. Em i sanap i stap namel long sia king na dispela 4-pela samting i stap laip, na ol sia bilong ol hetman i raunim em i stap. Em i gat 7-pela kom na 7-pela ai, em ol 7-pela spirit bilong God. God i bin salim ol i go nabaut long olgeta hap bilong graun.”​—⁠KTH 5:⁠6.

10. Dispela “Pikinini Sipsip” Jon i lukim em i husat? Bilong wanem dispela nem “Pikinini Sipsip” i stret long em?

¹⁰ Klostu long sia king, namel long dispela 4-pela samting i stap laip na ol 24 hetman, Jon i lukim wanpela pikinini sipsip i sanap i stap! Kwiktaim Jon i luksave olsem dispela pikinini sipsip em dispela “Laion i bin kamap long lain Juda” na “Kru i kamap long ol lain tumbuna bilong King Devit.” Jon i save long dispela samting, long wanem, winim 60 yia bipo Jon Bilong Baptais i bin tokim ol Juda, Jisas em i “Pikinini Sipsip Bilong God. Em i kam bilong tekewe sin bilong olgeta manmeri bilong graun.” (Jon 1⁠:29) Taim Jisas i stap long graun em i stap stret olgeta​—⁠em i olsem wanpela sipsip i no gat mak o sua samting i bagarapim skin bilong en​—⁠i no gat wanpela rong i stap long em, olsem na em inap givim dispela gutpela laip bilong em olsem ofa bilong helpim ol man.​—⁠1 Korin 5⁠:7; Hibru 7⁠:⁠26.

11. Jisas i kisim pinis biknem, tasol long dispela piksa em i olsem ‘wanpela pikinini sipsip i luk olsem ol i bin kilim em i dai,’ orait dispela i daunim nem bilong em o nogat?

¹¹ Jisas i kisim pinis biknem long heven, tasol dispela driman i makim em i olsem “wanpela Pikinini Sipsip . . . i luk olsem ol i bin kilim em i dai.” Olsem wanem? Dispela i daunim nem bilong em? Nogat tru! Maski ol birua i bin kilim Jisas i dai, em i bin i stap gut long God i go inap long taim em i dai na dispela samting i daunim tru Satan na litimapim tru nem bilong God Jehova. Olsem na i stret dispela driman i makim em i olsem wanpela pikinini sipsip​—⁠dispela i kamapim klia olsem em i winim pinis strong bilong dispela graun Satan i bosim, na i kirapim yumi long tingim gutpela pasin bilong Jehova na Jisas, em tupela i laikim tru yumi ol man. (Jon 3⁠:16; 15⁠:13; skelim wantaim Kolosi 2⁠:15.) Dispela driman i makim olsem Jisas em i dispela “lain bilong meri” em God i bin tok promis long em, na em inap tru long opim dispela buk.​—⁠Stat 3⁠:⁠15.

12. Sevenpela kom bilong Pikinini Sipsip i makim wanem samting?

¹² I gat wanem samting moa bilong dispela “Pikinini Sipsip” i helpim yumi long pilim tru wok bilong em? Em i gat 7-pela kom. Long Baibel, planti taim dispela tok “kom” i makim bikpela strong o bikpela namba bilong man, na namba 7 i makim samting em inap olgeta. (Long Buk Baibel long 1 Samuel 2⁠:​1, 10 na Song 112⁠:9 na 148⁠:14 ol i tanim dispela tok “kom” olsem “biknem” na “bikpela namba” na ‘strong.’) Olsem na 7-pela kom bilong Pikinini Sipsip i makim bikpela strong Jehova i bin givim long Jisas, na dispela strong em inap olgeta. Jisas i stap antap tru long “olgeta hetman na long olgeta gavman, na long olgeta samting i gat strong. Em i stap antap long olgeta man i gat nem nau long dispela taim, na long taim bihain tu.” (Efesus 1⁠:​20-​23; 1 Pita 3⁠:22) Jisas i bin kisim bikpela strong bilong mekim wok gavman kirap long yia 1914 long taim Jehova i putim em i stap King long heven.​—⁠Song 2⁠:⁠6.

13. (a) Sevenpela ai bilong Pikinini Sipsip i makim wanem samting? (b) Nau Pikinini Sispsip i kirap mekim wanem?

¹³ Na tu spirit holi i pulap long Jisas inap olgeta, na 7-pela ai bilong Pikinini Sipsip i makim dispela samting, long wanem, dispela 7-pela ai “em ol 7-pela spirit bilong God.” Long rot bilong Jisas, spirit, o strong, bilong Jehova i save kam long ol wokboi bilong Em long graun na dispela spirit em inap olgeta long ol. (Taitus 3⁠:⁠6) Jisas i stap long heven, tasol long rot bilong spirit holi em inap lukim ol samting i kamap hia long graun. Olsem Papa bilong em, Jisas tu i save long olgeta samting i kamap. (Lukim Song 11⁠:4; Sekaraia 4⁠:10.) Tru tumas, dispela Pikinini bilong God em i gutpela man tru inap long em i kisim dispela buk long han bilong God Jehova, long wanem, em i bin winim strong bilong dispela graun na i stap gut long God, na em i Laion i kamap long lain Juda, na em i Kru i kamap long lain bilong King Devit, na em i bin lusim laip bilong em olsem ofa bilong helpim ol man, na em i gat bikpela nem na namba inap olgeta, na spirit holi i pulap long em inap olgeta, na God Jehova i bin givim save long em long olgeta samting. Olsem wanem? Em i pret long kisim dispela wok long oganaisesen bilong Jehova i antap tru? Nogat! “Pikinini Sipsip i go kisim dispela buk i stap long han sut bilong dispela Man i sindaun long sia king.” (KTH 5:⁠7) Em i stap olsem gutpela piksa bilong pasin bilong bihainim tok!

Ol Singsing Bilong Litimapim Nem Bilong God

14. (a) Taim Jisas i kisim dispela buk, 4-pela samting i stap laip na ol 24 hetman i kirap mekim wanem? (b) Save Jon i kisim long ol 24 hetman, olsem wanem dispela save i kamapim klia lain na wok bilong ol?

¹⁴ Ol narapela i stap long pes bilong sia king bilong Jehova ol i mekim wanem? Jon i stori olsem: “Em i kisim pinis dispela buk, orait dispela 4-pela samting i stap laip na ol 24 hetman ol i brukim skru klostu long Pikinini Sipsip. Olgeta hetman wan wan i holim wanpela musik olsem gita na wanpela dis gol, na smok i gat gutpela smel i kamap long olgeta dis. Dispela em i makim ol beten bilong ol manmeri bilong God.” (KTH 5:⁠8) Ol 4-pela samting i stap laip ol i save daun long Jisas, na ol 24 hetman tu i mekim olsem, long wanem Jisas i gat bikpela namba. Tasol ol dispela hetman tasol i holim musik olsem gita na dis i gat smok smel long en.a Na ol tasol i kirap mekim nupela singsing. (KTH 5⁠:⁠9) Olsem na ol i wankain olsem lain 144,000, olsem “lain Israel tru bilong God,” em ol tu i holim musik olsem gita na ol i mekim nupela singsing. (Galesia 6⁠:16; Kolosi 1⁠:12; KTH 7⁠:​3-8; 14⁠:​1-4) Na Jon i lukim ol dispela 24 hetman i mekim wanpela wok bilong ol pris long heven, olsem ol pris bilong Israel long bipo i bin mekim, em ol i kukim smok smel bilong lotu long Jehova long haus lotu sel​—⁠dispela wok bilong ol pris long graun i pinis long taim God i nilim Lo Bilong Moses long diwai bilong Krais. (Kolosi 2⁠:14) Ol dispela samting i givim wanem save long yumi? Olsem: Ol dispela samting i piksa bilong ol manmeri God i bin makim, long taim ol i winim pinis pait na ol i kisim pinis wok king na wok pris bilong ol long heven.​—⁠KTH 20⁠:⁠6.

15. (a) Long lain Israel, husat tasol inap i go insait long Rum Tambu Tru long haus lotu sel? (b) Bilong wanem hetpris i mas wokim smok smel taim em i go insait long Rum Tambu Tru?

¹⁵ Long lain Israel bipo, hetpris tasol inap go insait long Rum Tambu Tru na sanap olsem long ai bilong Jehova. Taim hetpris i go insait, em i mas holim paura bilong kamapim smok i gat gutpela smel, nogut em i dai. Lo bilong Jehova i tok: “[Aron] i mas kisim wanpela sospen ain na i go long alta na pulimapim hap paia long sospen na karim i go long Rum Tambu Tru. Na em i mas pulimapim tupela han long paura bilong kamapim smok i gat gutpela smel, na kisim i go na putim long dispela paia, na bai mi lukim. Na smok bilong dispela paura bai i karamapim ples bilong lusim sin long Bokis Kontrak. Olsem bai Aron i no inap lukim dispela ples bilong lusim sin. Nogut em i lukim na bai mi kilim em i dai.” (Wok Pris 16⁠:​12, 13) Hetpris i mas wokim dispela smok smel bambai em inap go kamap gut insait long Rum Tambu Tru.

16. (a) Long lain Kristen, husat ol i go insait long dispela ples em Rum Tambu Tru i piksa bilong en? (b) Liklik lain Kristen God i makim, bilong wanem ol i mas ‘wokim smok smel’?

¹⁶ Long lain Kristen, Hetpris Krais Jisas na olgeta wan wan nambatu pris, em lain 144,000, ol bai go insait long dispela ples em Rum Tambu Tru i piksa bilong en​—⁠bai ol i go sanap long pes bilong Jehova yet long heven. (Hibru 10⁠:​19-​23) Bilong i go insait long dispela Rum Tambu Tru long heven, ol dispela pris, em 24 hetman i piksa bilong ol, ol i mas ‘wokim smok smel,’ olsem long olgeta taim ol i mas beten na askim Jehova long helpim ol.​—⁠Hibru 5⁠:7; Jut 20, 21; skelim wantaim Song 141⁠:⁠2.

Wanpela Nupela Singsing

17. (a) Ol 24 hetman i mekim wanem nupela singsing? (b) Baibel i save kolim dispela tok “nupela song” bilong makim wanem samting?

¹⁷ Nau wanpela gutpela singsing i kamap. Ol pris i wok wantaim Pikinini Sipsip, em ol 24 hetman, ol i mekim dispela singsing long em. Jon i tok: “Ol i singim wanpela nupela song olsem, ‘Yu inap tru long kisim buk na rausim olgeta gris kandel i pasim buk. Long wanem, ol i bin kilim yu i dai, na long blut bilong yu yu bin baim bek ol manmeri, bilong givim ol long God. Yes, yu baim bek ol manmeri bilong olgeta lain man, na bilong olgeta tok ples, na bilong olgeta kain skin, na bilong olgeta kantri.’ ” (KTH 5:⁠9) Dispela tok “nupela song” i kamap sampela taim long Baibel na i makim singsing ol man i mekim bilong litimapim nem bilong Jehova taim em i bin mekim wanpela strongpela wok bilong kisim bek ol. (Song 96⁠:1; 98⁠:1; 144⁠:⁠9) Olsem na em i “nupela song,” long wanem Jehova i mekim narapela bikpela wok bilong helpim ol na ol man bilong mekim singsing ol inap tokaut long dispela na litimapim nem bilong Em.

18. Jisas i bin mekim wanem na ol 24 hetman i litimapim nem bilong em long nupela singsing ol i mekim?

¹⁸ Tru, dispela 24 hetman i mekim “nupela song” long Jisas​—⁠ol i no mekim long Jehova. Tasol as bilong dispela samting ol i mekim i wankain tasol. Ol i litimapim nem bilong Jisas, long wanem em i Pikinini bilong God na em i bin mekim planti nupela samting bilong helpim ol. Long blut bilong em, em i kamap namelman bilong nupela kontrak na long dispela rot em i kamapim wanpela nupela lain ol i lain stret bilong Jehova. (Rom 2⁠:​28, 29; 1 Korin 11⁠:25; Hibru 7⁠:​18-​25) Ol manmeri bilong dispela nupela lain bilong spirit ol i bilong kain kain lain bilong skin, tasol Jisas i mekim ol i kamap wanpela lain tasol.​—⁠Aisaia 26⁠:2; 1 Pita 2⁠:​9, 10.

19. (a) Lain Israel bilong skin i no stap gut long kontrak na ol i lus long kisim wanem blesing? (b) Nupela lain bilong Jehova bai kisim wanem blesing?

¹⁹ Long taim bilong Moses, taim Jehova i kisim ol Israel i kamap lain bilong em, em i wokim kontrak wantaim ol. Na em i mekim tok promis long ol olsem sapos ol i stap gut long dispela kontrak, bai ol i mekim wok bilong em olsem lain pris. (Kisim Bek 19⁠:​5, 6) Ol Israel i no holim strong dispela kontrak na truim bilong dispela tok promis i no painim ol. Tasol dispela nupela lain i kamap long rot bilong nupela kontrak, em Jisas i namelman bilong en, ol i stap gut long kontrak bilong ol. Olsem na ol manmeri bilong dispela lain ol bai mekim wok king na bosim dispela graun, na ol bai mekim wok pris, na bai ol inap helpim ol manmeri i gat gutpela bel long kamap wanbel wantaim Jehova. (Kolosi 1⁠:20) I olsem nupela singsing i tok: “Yu bin mekim ol i kamap ol pris bilong lain bilong king, na ol i stap lain pris bilong God bilong mipela. Na bai ol i stap king na bosim ol manmeri bilong graun.” (KTH 5:10) Ol 24 hetman i amamas tru long mekim dispela nupela singsing bilong litimapim nem bilong Jisas, em i kisim pinis biknem long heven!

Ol Ensel i Singsing

20. Nau wanem singsing i kamap bilong litimapim nem bilong Pikinini Sipsip?

²⁰ Ol narapela long bikpela lain bilong Jehova long heven ol i mekim wanem taim ol i harim dispela nupela singsing? Ol dispela ensel i wanbel long dispela singsing. Jon i amamas long dispela na em i tok: “Orait, mi lukluk gen, na mi harim maus bilong planti ensel moa. Namba bilong ol i olsem planti handet milion, na planti tausen tausen moa. Ol i sanap raunim sia king na ol samting i stap laip na ol hetman. Ol i singaut strong olsem, ‘Dispela Pikinini Sipsip bipo ol i kilim em i dai, em inap tru long kisim namba na olgeta gutpela samting na gutpela save na bikpela strong. Em inap tru long olgeta man i litimapim nem bilong em na amamas long em na givim tenkyu long em.’ ” (KTH 5:​11, 12) Em gutpela singsing tru bilong litimapim nem bilong em!

21. Ol i litimapim nem bilong Pikinini Sipsip na dispela i daunim wok king na bikpela namba bilong Jehova o nogat? Stori long dispela.

²¹ Olsem wanem? Ating Jisas i kisim ples bilong God Jehova na nau olgeta samting God i bin wokim i kirap litimapim nem bilong Jisas na ol i no litimapim moa nem bilong Papa bilong em? Nogat tru! Dispela singsing bilong litimapim nem bilong Jisas i stret wantaim tok bilong aposel Pol, em i tok: “God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem. Em i givim dispela nem long Jisas, bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela,’ na ol i ken givim biknem long God Papa.” (Filipai 2⁠:​9-​11) Ol i litimapim nem bilong Jisas, long wanem em i bin mekim bikpela hap wok bilong stretim bikpela tok i bin kamap long wok bos bilong Jehova​—⁠long ai bilong olgeta em i bin stretim bek nem bilong Jehova, olsem i stret Jehova i stap nambawan bos bilong heven na graun. Dispela i givim biknem tru long Papa bilong em!

Sampela Moa i Singsing

22. Sampela lain long graun ol tu i kirap litimapim nem bilong husat?

²² Jon i lukim bikpela lain tru long heven ol i mekim singsing bilong litimapim nem bilong Jisas, long wanem em i bin i stap gut long God na em i gat bikpela namba long heven. Nau sampela lain long graun tu i kirap litimapim nem bilong Papa wantaim Pikinini. Sapos wanpela pikinini long graun i mekim gutpela wok, dispela inap givim biknem long papamama bilong em, na olsem tasol gutpela wok bilong Jisas i mekim na olgeta kain samting God i bin wokim “i givim biknem long God Papa.” Jon i stori moa olsem: “Mi harim toktok bilong olgeta kain samting God i bin wokim, em ol samting i stap long heven na i stap long graun na i stap aninit long graun na i stap long solwara. Yes, olgeta samting i stap long olgeta hap, mi harim ol i tok olsem, ‘Dispela Man i save sindaun long sia king bilong en, na Pikinini Sipsip tu, tupela i ken kisim olgeta tenkyu na biknem na amamas na strong, inap oltaim oltaim.’ ”​—⁠KTH 5:⁠13.

23, 24. (a) Wanem samting i kamap na nau ol lain bilong heven i ken litimapim nem bilong God na Jisas? Wanem samting bai kamap na ol manmeri i stap long graun bai litimapim nem bilong God na Jisas? (b) Bihain, olsem wanem bai planti moa i kirap long litimapim nem bilong God na Jisas?

²³ Wanem taim ol dispela lain i kirap litimapim nem bilong God na Jisas olsem? Long taim de bilong Bikpela i kirap nupela. Taim Jisas i rausim Satan na ol narapela ensel nogut long heven, nau “ol samting i stap long heven” i ken litimapim nem bilong God na Jisas. Na sampela samting i bin kamap long graun i makim olsem kirap long yia 1919 na bihain long dispela taim, bikpela lain long graun i kirap long litimapim nem bilong Jehova. Dispela lain i wok long i go bikpela​—⁠long 1919 ol inap olsem sampela tausen, tasol long 2005 ol i winim 6 milion.b Taim God i bagarapim pinis dispela graun bilong Satan, bai “ol samting . . . i stap long graun” i litimapim nem bilong Jehova wantaim Pikinini bilong em. Na long taim Jehova i makim pinis, “ol samting . . . i stap aninit long graun,” em ol planti milion manmeri i dai pinis na God i tingim ol, bai ol i kirap bek, na bai ol tu inap mekim dispela singsing.

²⁴ Planti milion manmeri “bilong ol kantri i stap longwe” na bilong ‘solwara na ol ailan’ ol i kirap pinis long wok wantaim lain bilong Jehova long olgeta hap bilong graun long mekim wanpela nupela singsing. (Aisaia 42⁠:10; Song 150⁠:​1-6) Dispela singsing bilong litimapim nem bilong Jehova na Jisas bai kamap strong moa yet long pinis bilong Taim Bilong 1,000 Yia. Long dispela taim bai skin na tingting bilong olgeta manmeri long graun i kamap gutpela olgeta. Na bihain dispela snek bilong bipo yet, em Satan, em man bilong giamanim olgeta manmeri, em bai pinis na dispela bai inapim tru tok profet i stap long Stat 3⁠:15. Ol dispela laspela samting i kamap pinis, orait olgeta kain samting i stap laip long heven na long graun bai ol i singsing wantaim na i tok: “Dispela Man i save sindaun long sia king bilong en, na Pikinini Sipsip tu, tupela i ken kisim olgeta tenkyu na biknem na amamas na strong, inap oltaim oltaim.” Long olgeta hap, bai olgeta i wanbel long dispela tok; bai i no gat wanpela i no wanbel long en.

25. (a) Yumi kaunim stori bilong Jon long ol dispela lain i litimapim nem bilong God na Krais na dispela i kirapim yumi long mekim wanem? (b) Long pinis bilong driman, 4-pela samting i stap laip na ol 24 hetman i mekim wanem na ol i makim gutpela pasin yumi mas bihainim long nau?

²⁵ Taim bilong bikpela amamas tru bai kamap! Ol dispela samting Jon i stori long en i mekim bel bilong yumi i amamas tru na i kirapim yumi long mekim singsing wantaim ol lain bilong heven na litimapim nem bilong God Jehova wantaim Krais Jisas. Yumi tingting strong moa yet long i stap strong long mekim ol wok i stret, a? Sapos yumi mekim olsem, orait yumi ken save, Jehova i mas helpim yumi na bai yumi inap i stap long dispela gutpela taim bilong amamas na mekim singsing wantaim lain bilong heven na bilong graun na litimapim nem bilong God. Ol dispela kain ensel em 4-pela samting i stap laip i piksa bilong ol, wantaim ol Kristen God i bin makim na ol i kirap bek pinis, yumi ken save ol i wanbel long mekim olsem, long wanem long pinis bilong dispela driman i gat tok olsem: “Na ol 4-pela samting i stap laip ol i tok, ‘I tru.’ Na ol hetman i brukim skru na i lotu long tupela.”​—⁠KTH 5:⁠14.

26. Yumi mas bilip long wanem samting? Nau Pikinini Sipsip i laik mekim wanem?

²⁶ Yu kaunim ol dispela tok, na olsem wanem long yu? Mipela i laik bai yu bilip long ofa bilong Pikinini Sipsip​—⁠em dispela “gutpela man”​—⁠na bai Jehova i blesim ol wok yu mekim bilong lotu long Em​—⁠em “Man i save sindaun long sia king.” Long nau dispela lain em Jon i piksa bilong ol, ol i wok long ‘skelim kaikai bilong spirit long ol man long taim stret,’ na yu mas larim ol i helpim yu tu. (Luk 12⁠:42) Tasol Pikinini Sipsip i laik opim 7-pela gris kandel i pasim buk! Nau bai yumi kisim save long wanem ol samting?

[Ol Futnot]

[Piksa i karamapim pes olgeta long pes 86]