Sapta 14
Gutpela Bilas Tru Bilong Sia King Bilong Jehova
Driman 2—Kamapim Tok Hait 4:1–5:14
Stori: Ol bikpela samting i kamap long ai bilong sia king bilong God long taim bilong kot
Taim bilong truim: Dispela driman i makim sampela samting i mas kamap long yia 1914 na i go inap long pinis bilong 1,000 yia na bihain long en, em taim bilong olgeta long heven na graun bai litimapim nem bilong Jehova.—KTH 5:13
1. Bilong wanem yumi mas tingim tru ol samting Jon i lukim olsem driman na em i tokim yumi long en?
NAU Jon i kirap long stori long sampela samting moa em spirit holi i soim long em olsem long driman. Ol dispela samting i bilong de bilong Bikpela, olsem na i bikpela samting long yumi ol manmeri i stap nau long dispela de. Long rot bilong ol dispela samting Jon i lukim olsem driman, Jehova i helpim yumi long save long sampela samting tru i stap long heven, em ai bilong ol man i no inap lukim, na em i kamapim tingting bilong em long strafe bilong em i mas painim ol man bilong graun. Na maski yumi wet bilong kisim laip long heven o long graun, ol dispela tok hait Jehova i kamapim long yumi i helpim yumi long save long ol wok em i laik bai yumi mekim. Olsem na yumi olgeta i mas tingting strong yet long tok bilong Jon olsem: “Dispela tok em i tok profet i kam long God, na man i ritim dispela tok long ol arapela, em i ken amamas. Na ol manmeri i harim dispela tok na ol manmeri i bihainim dispela tok bilong God mi bin raitim, ol tu i ken amamas.”—KTH 1:3.
2. Nau wanem samting i painim Jon?
2 Nau Jon i lukim wanpela gutpela samting tru. Em i tok: “Long heven mi lukim wanpela dua i op i stap. Na maus bilong dispela man, bipo mi harim em i singaut strong long mi olsem krai bilong biugel, nau em i tok olsem, ‘Yu kam antap hia, na bai mi soim yu olgeta samting i mas kamap bihain.’ ” (KTH 4:1) Jon i lukim sampela samting ai bilong ol man i no inap lukim—ol dispela samting i stap long heven long ples Jehova yet i stap long en. Dispela ples i antap tru, winim ples antap ol man i bin raun long en long ol roket samting bilong lukim mun samting, na i antap moa yet long ol bikpela bikpela lain sta bilong skai. I olsem wanpela dua long heven i op i stap na Jon inap lukluk i go insait na lukim olgeta hap bilong dispela ples em Jehova yet i stap long en long sia king bilong em. (Song 11:4; Aisaia 66:1) Em gutpela samting tru!
3. Dispela maus i singaut strong olsem “krai bilong biugel” i kirapim yumi long tingim wanem samting? Husat i As bilong ol tok dispela maus i mekim?
3 Jon i harim “maus” bilong wanpela man i singaut. Baibel i no tok em maus bilong husat, tasol maus i singaut strong olsem krai bilong biugel, wankain olsem Jisas i bin mekim taim Jon i harim em i singaut long pastaim. (KTH 1:10, 11) Dispela i kirapim yumi long tingim strongpela krai bilong biugel i bin kamap bilong makim olsem Jehova i stap long maunten Sainai. (Kisim Bek 19:18-20) Olsem na yumi save, Jehova i As bilong dispela singaut i go long Jon. (KTH 1:1) Jehova yet i opim dua bambai Jon, long driman, inap go insait long dispela ples i tambu tru.
Bikpela Lait Bilong Jehova
4. (a) Ol samting Jon i lukim olsem driman, bilong wanem i bikpela samting long liklik lain Kristen God i bin makim? (b) Bilong wanem i bikpela samting long ol man i wet long kisim laip oltaim long graun?
4 Jon i lukim wanem samting? Harim, nau em i laik stori. Em i tok: “Na wantu tasol Holi Spirit i kamap strong long mi, na long heven mi lukim wanpela sia king i stap, na wanpela Man i sindaun i stap long dispela sia.” (KTH 4:2) Wantu tasol strong bilong God i mekim na long tingting bilong Jon i olsem em i go kamap long sia king bilong Jehova yet. Gutpela samting tru i painim Jon! Em i lukim dispela ples long heven em yet wantaim ol narapela Kristen God i bin makim bai ol i go long en na kisim “dispela laip em i no inap bagarap.” Dispela kain laip “i klin olgeta long ai bilong God, na em bai i no inap pinis.” (1 Pita 1:3-5; Filipai 3:20) Ol dispela samting Jon i lukim olsem driman i bikpela samting tu long ol man i wet long kisim laip oltaim long graun. Dispela i helpim ol long save long biknem bilong Jehova, na long dispela lain king bilong heven em Jehova i givim wok long ol bilong skelim ol lain man, na bilong bosim ol man long graun long bihain. God Jehova i save moa yet long pasin bilong stretim wok na bosim gut ol samting!
5. Jon i lukim wanem samting tru em ai bilong Bokis Kontrak i makim?
5 Planti samting Jon i lukim long heven i kain olsem ol samting i bin i stap long haus lotu sel bilong ol Israel long ples nating. Inap olsem 1,600 yia paslain long taim Jon i lukim dispela driman, ol i bin wokim dispela haus lotu sel olsem ples bilong lotuim Jehova. Bokis kontrak i stap long Rum Tambu Tru bilong dispela haus lotu sel, na antap long ai gol bilong en Jehova yet i save autim lo bilong em. (Kisim Bek 25:17-22; Hibru 9:5) Olsem na ai bilong Bokis Kontrak i makim sia king bilong Jehova. Nau Jon i lukim samting tru ai bilong Bokis i makim: Em i lukim Nambawan Bikpela King Jehova yet i sindaun long gutpela naispela sia king bilong em i stap antap tru!
6. Jon i stori olsem wanem long Jehova? Olsem wanem stori bilong em i stret?
6 Sampela profet paslain long Jon i bin lukim sia king bilong Jehova olsem long driman na ol i stori planti long Man Holi i sindaun long dispela sia, tasol Jon i no stori tumas long em. (Esekiel 1:26, 27; Daniel 7:9, 10) Jon i stori long em olsem: “Dispela Man i lait olsem ston jaspa na retpela ston konilian. Wanpela renbo i raunim sia king, na mi lukim dispela renbo i lait olsem grinpela ston emeral.” (KTH 4:3) Em gutpela bilas tru! Jon i lukim Jehova i sindaun isi i stap na em i lait tru olsem ol gutpela ston i dia tumas. Dispela i stret wantaim stori bilong disaipel Jems, em i stori long Jehova na em i tok, Jehova em i “Papa i bin mekim kamap olgeta lait bilong skai”! (Jems 1:17) Na Jon yet i tok: “God em i lait, na i no gat liklik hap tudak i stap long em.” (1 Jon 1:5) Tru tumas, God Jehova em i Man i gat biknem na gutpela bilas tru!
7. Wanpela renbo i raunim sia king bilong Jehova na dispela i lainim yumi long wanem samting?
7 Jon i lukim wanpela renbo i raunim dispela sia king na renbo i lait olsem grinpela ston emeral. Hap tok Grik (irʹis) ol i tanim olsem renbo long dispela KTH 4:3 ves, em i makim samting i raunpela olgeta. Namba wan taim Baibel i stori long wanpela renbo em long taim bilong Noa. Ol wara bilong Bikpela Tait i slek pinis na nau Jehova i kamapim renbo long antap olsem wanpela mak. Em i stori long ol samting dispela renbo i makim na em i tok: “Mi putim renbo bilong mi long klaut olsem mak bilong dispela kontrak bilong oltaim mi mekim pinis wantaim yupela na olgeta animal. Dispela renbo bai i stap olsem mak bilong kontrak mi mekim wantaim olgeta samting bilong graun. Na bai mi tingim dispela promis mi mekim pinis wantaim yupela na ol animal, olsem na bai tait i no ken bagarapim gen olgeta samting i gat laip.” (Stat 9:13, 15) Dispela renbo Jon i lukim i mas kirapim em long tingim pasin bilong i stap wanbel wantaim Jehova, olsem liklik lain em Jon i piksa bilong ol i stap wanbel wantaim Em long nau. Na tu, Jon bai pilim bel isi na gutpela pasin isi bilong Jehova, em olgeta man i bihainim tok bai kisim dispela bel isi long taim “haus bilong God i stap wantaim ol manmeri” long nupela graun.—Song 119:165; Filipai 4:7; KTH 21:1-4.
Dispela 24 Hetman
8. Jon i lukim husat ol i sindaun long ol sia i raunim sia king bilong Jehova? Ol i olsem piksa na i makim wanem lain?
8 Jon i save i gat ol pris i save mekim wok long haus lotu sel bilong bipo. Olsem na ating em i kirap nogut long samting nau em i lukim. Em i stori olsem: “I gat 24 sia i raunim dispela sia king, na 24 hetman i sindaun i stap long ol dispela sia. Ol dispela hetman i putim longpela waitpela klos, na ol i gat ol hat gol olsem ol hat king i stap long het bilong ol.” (KTH 4:4) Em nau, em i no lukim ol pris i stap—em i lukim 24 hetman i stap, em ol i gat hat gol olsem bilong king na ol i sindaun long ol sia king. Ol dispela hetman i olsem piksa na i makim liklik lain Kristen God i bin makim, na Jon i lukim olsem ol i kirap bek pinis na ol i kisim pinis wok king long heven. Olsem wanem yumi save, dispela 24 hetman i olsem piksa bilong dispela lain?
9, 10. Olsem wanem yumi save, dispela 24 hetman i olsem piksa bilong liklik lain Kristen God i makim, taim ol i kisim pinis wok king bilong ol long heven?
9 Wanpela samting i helpim yumi long save, em olsem: Ol i gat hat gol olsem bilong king na ol i sindaun long ol sia king na dispela i makim olsem ol i holim strong bilong mekim wok king. (Lukim Kamapim Tok Hait 6:2; 14:14.) Dispela samting i helpim yumi long save, dispela 24 hetman i olsem piksa bilong liklik lain taim ol i kisim pinis wok bilong ol long heven, long wanem Jisas i bin mekim kontrak wantaim ol na em i tok, ol bai sindaun long ol sia king long Kingdom bilong em. (Luk 22:28-30) Baibel i no stori long ol ensel i kisim dispela wok. Nogat. Baibel i stori long Jisas wantaim ol 24 hetman tasol ol i sindaun long ai bilong Jehova na mekim wok king.
10 Dispela i stret wantaim tok promis Jisas i bin mekim long kongrigesen i stap long taun Laodisia, em i bin tokim ol: “Sapos man i winim pait, bai mi larim em i sindaun wantaim mi long sia king bilong mi.” (KTH 3:21) Ol dispela 24 hetman i mekim wok king long heven na ol i mekim narapela wok tu. Taim Jon i kirap long raitim ol tok bilong Kamapim Tok Hait, em i tok: “[Jisas] i bin mekim yumi i kamap ol pris bilong lain bilong king, na yumi stap lain pris bilong God, em Papa bilong Jisas.” (KTH 1:5, 6) Ol dispela hetman i holim wok king na wok pris tu wantaim.—KTH 20:6.
11. Bilong wanem i stret namba bilong ol hetman em 24? Dispela namba i makim wanem samting?
11 Ol dispela hetman Jon i lukim ol inap olsem 24. Orait dispela namba 24 i makim wanem samting? Ol gutpela pris bilong lain Israel long bipo i olsem piksa bilong dispela lain hetman long planti samting. Aposel Pita i bin stori long liklik lain Kristen God i makim na em i tok: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God.” (1 Pita 2:9) Ol i bin tilim ol pris bilong Israel long bipo i go long 24 lain, na ol i makim taim bilong olgeta wan wan lain i mas i go mekim wok long haus lotu bilong Jehova, bambai long olgeta taim i gat ol lain bilong lotu long Jehova na mekim wok bilong em. (1 Stori 24:5-19) Olsem na i stret Jon i lukim 24 hetman i mekim wok pris long heven, long wanem, dispela lain pris bai mekim wok bilong Jehova oltaim oltaim. Taim dispela lain em inap pinis, bai i gat 144,000 olgeta, em olsem 24 lain bilong 6 tausen 6 tausen man bilong winim pait (olsem 24 taims 6 tausen). Kamapim Tok Hait 14:1-4 i tok: “God i bin baim bek ol dispela lain namel long olgeta manmeri bilong graun” na ol bai sanap wantaim Pikinini Sipsip, em Krais Jisas, long maunten Saion long heven. Namba 12 i olsem piksa na i makim wanpela lain o oganaisesen God yet i kamapim long heven o long graun. Sapos yumi dabolim 12 (olsem 2 taims 12), dispela i mekim 24, olsem na dispela namba 24 i makim olsem God i dabolim, olsem strongim, dispela lain hetman em i bin kamapim.
‘Lait Bilong Klaut, na Nois, na Klaut i Pairap’
12. Orait, nau Jon i lukim na harim wanem samting? Dispela ‘lait bilong klaut, na nois, na klaut i pairap’ i kirapim yumi long tingim wanem samting?
12 Nau Jon i lukim na harim wanem samting? Em i tok: “Long sia king mi lukim lait bilong klaut i sut i go nabaut, na mi harim bikpela nois i kamap na klaut i pairap.” (KTH 4:5a) Kain samting olsem i bin kamap long taim Jehova i kamapim bikpela strong bilong em long bipo. Olsem: Moses i stori long taim Jehova i bin “kam daun” long maunten Sainai, na Moses i tok: “Long moningtaim bilong dispela de namba 3, bikpela klaut i kamap long maunten, na klaut i pairap na lait bilong klaut i sut i go nabaut, na wanpela biugel i krai bikpela moa. . . . Na krai bilong biugel i kamap bikpela moa. Na Moses i tok long God na God i mekim klaut i pairap na Moses i harim maus bilong God i bekim tok long em.”—Kisim Bek 19:16-19.
13. Lait bilong klaut i kam long sia king bilong Jehova i makim wanem samting?
13 Long de bilong Bikpela, Jehova i kamapim strong na biknem bilong em long wanpela rot i nambawan tru. Em i no kamapim long rot bilong lait tru bilong klaut, long wanem ol samting Jon i lukim i olsem piksa tasol. Orait, dispela lait bilong klaut Jon i lukim, em i makim wanem samting? Lait bilong klaut inap givim lait long man, tasol sapos em i holim man em inap bagarapim em. Olsem na dispela lait bilong klaut i kamap long sia king bilong Jehova na i sut i go nabaut i makim ol tok na save Jehova i givim long lain bilong em, na i makim tu ol tok bilong em i kolim strafe bilong ol man nogut.—Lukim Song 18:14; 144:5, 6; Matyu 4:14-17; 24:27.
14. Olsem wanem ol maus i bin kamap long nau tu?
14 Na olsem wanem long dispela bikpela “nois,” o pairap, Jon i harim? Em pairap bilong ol maus i kamap long heven. Taim Jehova i bin kam daun long maunten Sainai, Moses i harim wanpela maus bilong heven i toktok long em. (Kisim Bek 19:19) Long hap bilong Kamapim Tok Hait, planti taim wanpela maus long heven i singaut na givim tok long ol man long ol samting ol i mas mekim, o i mekim sampela tokaut. (KTH 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Long nau tu, Jehova i bin givim tok long lain bilong em long ol samting ol i mas mekim na em i bin mekim sampela tokaut long ol, na em i bin givim save long ol, olsem lait, na dispela i helpim ol long save long ol tok profet na ol lo bilong Baibel. Long sampela bikpela kibung ol i bin kisim kain save o lait olsem, na ol i bin tokaut long olgeta hap bilong graun long ol dispela tok i tru bilong Baibel ol i kisim save long en. Aposel Pol i stori long ol man i wok strong long autim “gutnius” na em i tok: “Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.”—Rom 10:18.
15. Wanem samting olsem klaut i pairap i lusim sia king nau long dispela hap taim long de bilong Bikpela?
15 Taim klaut i lait, bihain klaut i save pairap. Devit i stori long Jehova na em i tok, taim Jehova i singaut strong i “olsem klaut i pairap.” (Song 29:3, 4) Jehova i bin helpim Devit long daunim ol birua na Baibel i tok, long dispela taim Jehova i singaut bikmaus na i “olsem klaut i pairap.” (2 Samuel 22:14; Song 18:13) Elihu i tokim Jop, taim ol man i harim maus bilong Jehova i olsem ol i harim “klaut i pairap,” long wanem “em i save mekim olkain samting, i winim tingting bilong yumi.” (Jop 37:4, 5) Nau long dispela hap taim long de bilong Bikpela, maus bilong Jehova i “pairap”—em i toksave long ol bikpela wok em bai mekim bilong daunim ol birua bilong em. Dispela “pairap” i bin go nabaut long olgeta hap bilong graun. Sapos yu bin bihainim ol dispela toksave i olsem klaut i pairap, na yu bin mekim gutpela wok long maus bilong yu bilong autim ol dispela toksave long ol man, orait yu ken amamas.—Aisaia 50:4, 5; 61:1, 2.
Ol Bombom i Lait na Solwara Glas
16. Dispela “7-pela bombom” i makim wanem samting?
16 Orait, Jon i lukim wanem samting moa? Em i tok: “Long pes bilong sia 7-pela bombom i lait i stap. Dispela ol bombom em ol 7-pela spirit bilong God. Long pes bilong sia king i gat wanpela samting i stap, em i olsem bikpela solwara ol i bin wokim long glas, na em i klia tru.” (KTH 4:5b, 6a) Jon yet i tokim yumi long samting dispela 7-pela bombom i makim, em i tok: “Dispela ol bombom em ol 7-pela spirit bilong God.” Namba 7 i makim samting bilong God em inap olgeta; olsem na dispela 7-pela bombom i makim strong bilong spirit holi bilong givim save em inap tru. Liklik lain long nau em Jon i piksa bilong ol, ol i amamas long God i bin givim dispela save o lait long ol, na ol i amamas long em i bin givim wok long ol bilong autim dispela save long ol manmeri bilong graun ol i hangre long ol kaikai bilong spirit! Yumi amamas tru, long wanem, long olgeta yia planti handet milion nius Wastaua i wok long givim dispela lait, o save, long ol man long planti tok ples, inap olsem 150!—Song 43:3.
17. “Solwara ol i bin wokim long glas” em i makim wanem samting?
17 Jon i lukim tu wanpela samting “i olsem bikpela solwara ol i bin wokim long glas.” Dispela i makim wanem samting long ol manmeri Jehova i bin singautim ol i go long heven? Pol i stori long ol samting Jisas i mekim bambai dispela lain bilong i go long heven ol i ken kamap klin; em i tok Jisas i mekim ol i kamap klin “long wara na long tok bilong en.” (Efesus 5:26) Taim Jisas i no i dai yet, em i tokim ol disaipel: “Yupela i kamap klin pinis. Dispela tok mi givim yupela, em i mekim yupela i kamap klin.” (Jon 15:3) Olsem na dispela samting i olsem solwara glas i makim Tok bilong God i save mekim ol i kamap klin. Ol manmeri bilong i go i stap klostu long Jehova na mekim wok king na pris long heven ol i mas kamap klin pastaim long rot bilong Tok bilong em.
Lukim—“4-pela Samting i Stap Laip”!
18. Jon i lukim wanem samting i stap long 4-pela sait bilong sia king?
18 Nau Jon i lukim narapela samting. Em i tok: “Na 4-pela samting i stap laip ol i sanap i stap long ol 4-pela sait bilong sia king. Dispela 4-pela samting i stap laip ol i gat planti ai i karamapim olgeta hap bilong bodi bilong ol, em long baksait tu.”—KTH 4:6b.
19. Dispela 4-pela samting i stap laip i piksa bilong wanem samting? Olsem wanem yumi inap save long dispela samting?
19 Dispela “4-pela samting” i piksa bilong wanem samting? Sampela samting profet Esekiel i bin lukim olsem driman i helpim yumi long save long dispela samting. Esekiel i bin lukim Jehova i sindaun long wanpela sia king long heven i kain olsem karis i gat wil, na klostu long en i gat 4-pela samting ol i kain olsem dispela 4-pela samting i stap laip em Jon i lukim. (Esekiel 1:5-11, 22-28) Bihain, Esekiel i lukim gen dispela sia king na dispela ol samting olsem man na nau Esekiel i tok, ol i wanpela kain ensel bilong God. (Esekiel 10:14, 20) Olsem na dispela 4-pela samting i stap laip em Jon i lukim, i mas makim ol dispela kain ensel em ol i planti na ol i gat bikpela wok long oganaisesen bilong God long heven. Jon i no ken kirap nogut long lukim sampela ensel i stap klostu tru long God Jehova, long wanem, long haus lotu sel long bipo i gat piksa bilong tupela ensel ol i bin wokim long gol antap long ai bilong Bokis Kontrak bilong Jehova, em ai bilong bokis i makim sia king bilong Jehova. Maus bilong Jehova i save kamap namel long dispela tupela ensel na givim ol tok na lo bilong em long lain Israel.—Kisim Bek 25:22; Song 80:1.
20. Olsem wanem yumi ken tok dispela 4-pela samting i stap laip ol i stap “long namel na long 4-pela sait bilong sia king”?
20 Dispela 4-pela samting i stap laip ol i stap long “4-pela sait bilong sia king.” Sampela Baibel (olsem The Jerusalem Bible) i tok, ol i stap “long namel na long 4-pela sait bilong sia king.” Olsem na ating ol i sanap klostu long sia king long namel bilong olgeta wan wan sait bilong en, o ating dispela tok i makim olsem ol i stap namel tru long heven, olsem long ples dispela sia king i stap long en. Tasol bikpela samting em olsem: Ol dispela kain ensel i stap klostu tru long sia king bilong Jehova, wankain olsem dispela 4-pela samting Esekiel i lukim i sanap klostu long 4-pela wil bilong ‘karis,’ olsem oganaisesen, bilong Jehova. (Esekiel 1:15-22) Olgeta dispela samting i stret wantaim tok bilong Song 99:1 i tok, Jehova “i sindaun long sia king bilong en antap long ol ensel.”
21, 22. (a) Jon i stori olsem wanem long dispela 4-pela samting i stap laip? (b) Pes bilong dispela 4-pela samting i stap laip i makim wanem samting?
21 Jon i stori moa olsem: “Namba wan samting i stap laip em i olsem laion. Namba 2 samting i stap laip em i olsem bulmakau man. Namba 3 samting i stap laip em i gat pes olsem pes bilong man. Na namba 4 samting i stap laip em i olsem wanpela bikpela tarangau i flai i stap.” (KTH 4:7) Bilong wanem dispela 4-pela samting i stap laip i narapela narapela kain? Em bilong makim narapela narapela gutpela pasin bilong God. Namba wan samting i stap laip em i olsem laion. Long Baibel, laion i makim pasin bilong sanap strong na i no pret long bihainim stretpela pasin. (2 Samuel 17:10; Sindaun 28:1) Olsem na laion i makim gutpela pasin bilong God long sanap strong na mekim stretpela kot. (Lo 32:4; Song 89:14) Namba 2 samting i stap laip em i olsem bulmakau man. Taim yu tingim wanpela bulmakau man, yu tingim wanem kain pasin? Long ol Israel bulmakau man i bikpela samting, long wanem, em i gat bikpela strong bilong mekim wok. (Sindaun 14:4; lukim tu Jop 39:9-11.) Olsem na bulmakau man i makim strong, olsem bikpela strong i kam long Jehova.—Song 62:11; Aisaia 40:26.
22 Namba 3 samting i stap laip em i gat pes olsem pes bilong man. Dispela i mas makim pasin sori bilong God, long wanem, God i bin wokim ol man tasol i kain olsem em yet, em ol i gat dispela pasin i nambawan tru, em pasin bilong sori. (Stat 1:26-28; Matyu 22:36-40; 1 Jon 4:8, 16) Yumi save, ol dispela ensel i save bihainim dispela pasin taim ol i mekim wok klostu long sia king bilong Jehova. Orait, olsem wanem long namba 4 samting i stap laip? Em i olsem wanpela bikpela tarangau i flai i stap. Jehova yet i stori long pasin bilong ol tarangau em ol inap lukluk i go longwe. Jehova i tok: “Maski abus i stap longwe, ol [tarangau] i save lukim.” (Jop 39:29) Olsem na tarangau i makim stret gutpela tingting na save bilong Jehova, em inap save long ol samting ‘i stap longwe.’ Jehova em i As bilong olgeta gutpela tingting na save. Taim ol ensel bilong em i bihainim tok bilong em na mekim ol wok em i bin tokim ol long mekim, ol i save bihainim gutpela tingting na save i kam long em.—Sindaun 2:6; Jems 3:17.
Ol i Litimapim Nem Bilong Jehova
23. Dispela 4-pela samting i gat “planti ai” na dispela i makim wanem samting? Ol i gat 6-pela wing na dispela i makim wanem samting?
23 Jon i stori moa na em i tok: “Dispela 4-pela samting i stap laip, olgeta wan wan i gat 6-pela wing. Na planti ai i karamapim bodi bilong ol, na i stap aninit long ol wing tu. Na long san na long nait ol i save tok olsem, ‘God, Bikpela I Gat Olgeta Strong, em i holi, em i holi, em i holi. Bipo em i stap, na nau em i stap, na bihain bai em i kam.’ Ol i no save malolo long mekim dispela tok.” (KTH 4:8) Dispela planti ai i makim olsem ol inap lukim olgeta samting na lukluk i go longwe. Dispela 4-pela samting i stap laip ol i no save slip, olsem na long olgeta taim ai bilong ol i op na ol i wok long lukim ol samting na lukluk i go longwe. Ol i bihainim pasin bilong Jehova, em Baibel i tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun.” (2 Stori 16:9) Ol dispela ensel i gat planti ai, olsem na ol inap lukim ol samting long olgeta hap. No gat wanpela samting inap hait long ai bilong ol. Olsem na ol inap tru long helpim God long wok bilong em long skelim ol man. Baibel i tok: “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.” (Sindaun 15:3) Na ol dispela 4-pela samting i stap laip i gat 6-pela wing, olsem na ol inap raun spit tru na tokaut long strafe bilong Jehova na givim dispela strafe long ol man.
24. Ol dispela ensel i tok wanem bilong litimapim nem bilong Jehova? Na dispela i makim wanem samting?
24 Harim! Ol dispela ensel i mekim gutpela singsing tru bilong litimapim nem bilong Jehova na i kirapim tru bel bilong yumi. Ol i tok: “God, Bikpela I Gat Olgeta Strong, em i holi, em i holi, em i holi. Bipo em i stap, na nau em i stap, na bihain bai em i kam.” Tripela taim ol i kolim dispela tok “em i holi”—ol i mekim olsem bilong strongim dispela tok. Ol i tokaut strong long pasin holi bilong God Jehova. Em i As bilong pasin holi na em i Mak tru bilong en. Na tu em i “King bilong olgeta taim”—oltaim em i stap olsem “paslain tru” na “las tru,” na “namba wan tru” na “bihain tru,” na em i “as bilong olgeta samting, na [em i] save pinisim olgeta wok [em i] mekim.” (1 Timoti 1:17; KTH 22:13) Ol ensel i no save malolo liklik long tokaut long ol gutpela pasin tru bilong Jehova long ai bilong olgeta samting em i bin wokim.
25. Olsem wanem 4-pela samting i gat laip na ol 24 hetman i bung wantaim long litimapim nem bilong Jehova?
25 Insait tru long heven ol i litimapim tru nem bilong Jehova! Jon i stori olsem: “Dispela ol samting i stap laip, ol i save amamas long dispela Man i sindaun long sia king bilong en na i stap laip oltaim oltaim. Na ol i litimapim nem bilong en na ol i tenkyu long em. Na olgeta taim ol 4-pela samting i stap laip ol i mekim olsem, orait dispela 24 hetman ol i save brukim skru long pes bilong dispela Man i sindaun i stap long sia king. Na ol i save lotu long em, em Man bilong i stap oltaim oltaim. Ol i save kisim ol hat gol bilong ol na tromoi ol i go pundaun klostu long pes bilong sia king, na ol i save singim song olsem, ‘Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.’ ” (KTH 4:9-11) Long olgeta tok bilong Baibel, dispela tok em i nambawan gutpela tokaut tru bilong daun long Jehova na litimapim nem bilong em, em i God bilong yumi na Nambawan Bikpela King!
26. Bilong wanem ol 24 hetman i tromoi hat king bilong ol i go pundaun long ai bilong Jehova?
26 Ol 24 hetman i gat wankain tingting olsem bilong Jisas—ol i daun tru long Jehova, olsem na ol i tromoi hat king bilong ol i go pundaun long ai bilong em. Ol i stap klostu long God, tasol ol i no tingting liklik long litimapim nem bilong ol yet. Ol i gat pasin daun na ol i save, ol i bin kamap king bilong mekim wanpela wok tasol, em bilong givim biknem long God, olsem Jisas i save mekim long olgeta taim. (Filipai 2:5, 6, 9-11) Ol i daun long God Jehova, long wanem, ol i save ol yet i no gat nem—Nambawan Bikpela King Jehova i bin givim wok king long ol. Olsem na ol i wanbel wantaim ol dispela ensel na ol narapela ensel na ol man i stap gut long God, na ol i wok wantaim ol long litimapim nem bilong God na givim biknem long em, em i Man bilong wokim olgeta samting.—Song 150:1-6.
27, 28. (a) Stori bilong Jon long dispela driman i mas mekim wanem long yumi? (b) I gat wanem ol askim long ol samting Jon i lukim na harim bihain long dispela?
27 Wanem man i stap na bel bilong em i no kirap taim em i kaunim stori bilong Jon long dispela samting em i lukim olsem driman? Nogat tru! Jon i lukim nambawan gutpela samting! Em i lukim olsem piksa, tasol olsem wanem long samting tru piksa i makim? Jehova em i nambawan bikpela King na olgeta man i gat gutpela bel i mas pilim tru bikpela namba bilong em na bai ol i bung wantaim ol 4-pela samting i stap laip na ol 24 hetman long litimapim nem bilong Em! Bai ol i mekim olsem long taim ol i beten na long taim ol i autim nem bilong Em long ol man. Ol Kristen long nau i gat gutpela wok ol i ken mekim—ol i ken i stap witnes bilong dispela God na autim tok bilong em. (Aisaia 43:10) Yumi mas save, Jon i lukim ol samting bilong de bilong Bikpela, em dispela taim nau yumi stap long en. Long olgeta taim “ol 7-pela spirit bilong God” i redi i stap bilong soim rot long yumi na strongim yumi. (Galesia 5:16-18) Long nau yumi gat Baibel, na dispela inap helpim yumi long bihainim pasin holi long taim yumi mekim wok bilong dispela God i holi. (1 Pita 1:14-16) Tru tumas, yumi amamas long kaunim dispela tok profet long ol narapela man. (KTH 1:3) Dispela tok profet i kirapim yumi long i stap gut long Jehova na yumi no laik larim wanpela samting bilong dispela graun i pulim yumi na bai yumi lusim wok bilong litimapim nem bilong em!—1 Jon 2:15-17.
28 Em nau, Jon i stori long ol samting em i lukim taim God i singautim em i go antap long heven. Em i stori long bikpela King Jehova em i gat bikpela lait na biknem na em i sindaun long gutpela sia king bilong em long heven. Ol lain i mekim wok bilong em, em wanpela oganaisesen i winim olgeta narapela oganaisesen, ol i sanap klostu long em long bikpela lait na ol i stap gut long em. Em nau, bikpela King, em God Jehova, wantaim lain bilong em ol i bung i stap. (Daniel 7:9, 10, 18) Ol samting i redi pinis bilong narapela kain samting i ken kamap. Wanem samting i laik kamap? Dispela samting i mekim wanem long yumi long nau? Orait, nau yumi ken skelim ol samting i wok long kamap!
[Piksa i karamapim pes olgeta long pes 75]
[Piksa i karamapim pes olgeta long pes 78]