Paradais Inap Kamap Maski Ol Man i Sakim Tok

 1. Hap taim i lus na nau namba wan man na meri i stap we? Em wanem kain ples?

HAP taim i lus na nau namba wan man na meri i sem na tupela i no i stap skin nating moa. Tupela i gat klos, em longpela klos God i wokim long skin bilong animal. Tupela i stap ausait long gutpela gaden bilong Iden. Ol i givim baksait long gaden na lukluk i go long ol samting i stap long ai bilong ol. Ol i lukim bus i karamapim graun. Dispela graun i no gat blesing bilong God. Ol i lukim ol rop i gat nil na ol gras nogut i kamap long dispela graun. Tasol olsem wanem? Em dispela graun tasol God i bin tokim tupela long bosim na lukautim, a? Tru, tasol nau tupela i lusim gaden Iden na i stap ausait, na tupela i no gat wok long skruim gaden i go long dispela graun bipo i no gat man bilong lukautim. Nogat.

 2. Bilong wanem man tupela meri i no wok long go bek insait long gaden Paradais?

² Ol i lukim ples ausait i nogut, orait bilong wanem ol i no go bek insait long gutpela ples Paradais? I no hatwok long mekim askim olsem, tasol lukim rot bilong go bek insait long gaden. Sampela samting i gat laip, em ol strongpela ensel, i pasim rot bilong tupela. Tupela i no bin lukim ol ensel bipo, na taim tupela i stap insait long gaden tu, tupela i no bin lukim. Ol dispela strongpela ensel i was i stap, na wanpela bainat tu i stap em i gat paia i lait long en na i save tanim tanim long olgeta taim. Sapos man tupela meri i laik go bek insait long gaden, bai tupela i dai!—Stat 3:24.

 3. Wanem samting i bin kamap na dispela bikpela senis i painim tupela?

³ Wanem samting i mekim na dispela senis i kamap? As bilong dispela samting i no hait na bai ol saveman bilong saiens i mas wok inap planti tausen yia bilong kisim save long en. Nogat. I no hatwok long save long as bilong en. God i bin givim wok long namba wan man na meri long de tupela i marit na tupela i mas bihainim tok bilong Papa bilong ol long wanpela liklik samting bambai ol inap kisim ol gutpela samting dispela wok bai kamapim. God i tambuim wanpela kaikai tasol na dispela i traim tupela, bai tupela i bihainim stret tok bilong God o nogat. Tupela i no ken kaikai pikinini bilong “diwai bilong givim gutpela save long wanem samting i gutpela na wanem samting i nogut.” (Stat 2:16, 17) Sapos tupela i sakim tok bilong God na tupela i kaikai, bai tupela i dai tru. Meri i bin kamap bihain long Adam na nau Adam i mekim wok olsem profet bilong God na tokim meri bilong em long dispela lo bilong God. Tasol snek (na·chashʹ) i tok, God i giaman taim em i tok Adam bai dai sapos em i kisim dispela kaikai tambu long “diwai bilong givim gutpela save long wanem samting i gutpela na wanem samting i nogut.” Snek i giamanim meri na meri i ting sapos em i brukim lo bilong God na em i kisim dispela kaikai i tambu, bai em i kamap olsem God na bai em inap sakim God na em yet i skelim wanem samting i gutpela na wanem samting i nogut.—Stat 3:1-5.

I No Stori Nating Bilong Ol Tumbuna

 4, 5. Aposel Pol i tok wanem na yumi ken save, stori bilong snek i giamanim namba wan meri em i no stori nating?

⁴ Olsem wanem? Yu kirap nogut long dispela stori? Yu ting em i wanpela stori nating bilong tumbuna na i no gat as bilong en, na ol man bilong nau, em ol i gat save, ol i no ken bilip long en? Tasol wanpela man bilong bipo, em i man bilong raitim ol tok i tru na planti man bilong nau tu i save kaunim ol tok bilong em, em i bilip long dispela stori; em i no ting dispela stori em i wanpela stori nating bilong ol tumbuna. Dispela man em aposel Pol, em Krais yet i bin makim em i kamap aposel, na Pol i save, ol tok em i raitim em i stret. Em i raitim tok long ol Kristen i stap long Korin, em ples bilong planti saveman bilong dispela graun, na em i tok: “Tasol mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lukim pasin bilong i stap klin na tingting long Krais tasol.”—2 Korin 11:3.

⁵ Pol i no ken kolim wanpela stori nating bilong strongim tok em i mekim long ol dispela Korin, em ol i save gut long ol stori nating bilong lotu haiden Grik. Pol i kolim stori bilong Olpela Testamen na Pol i bin tok, ol tok bilong Olpela Testamen em “tok bilong God.” Pol i tok stret olsem ‘snek i bin giamanim Iv.’ (1 Tesalonaika 2:13) Na tu, taim aposel Pol i raitim pas long wanpela wasman Kristen i gat wok long lainim ol man long “gutpela tok,” Pol i tok: “God i wokim Adam pastaim, na bihain em i wokim Iv. Na Adam i no bilipim tok giaman. Nogat. Meri i bilipim tok giaman, na em i mekim sin.”—2 Timoti 1:13; 1 Timoti 2:13, 14.

 6. (a) Olsem wanem na rong Adam i mekim i narapela kain long rong meri i mekim? (b) Olsem wanem yumi ken save, meri i no giaman taim em i stori long ol samting snek i bin mekim?

⁶ Dispela stori long snek i giamanim meri em i tru; em i no wanpela stori nating. Dispela samting i bin kamap tru wankain olsem ol hevi i bin kamap tru, em ol hevi i bin kamap taim meri i sakim tok na kisim kaikai tambu. Meri i brukim lo bilong God. Em i mekim rong na bihain em i pulim man bilong em na man tu i brukim lo bilong God na kisim kaikai tambu, tasol snek i no giamanim man. (Stat 3:6) Bihain God i askim tupela long dispela samting tupela i bin mekim, na stori bilong ol tok tupela i bekim long God i olsem: “Na man i bekim tok olsem, ‘Dispela meri yu bin givim mi olsem poroman bilong mi, em tasol i givim mi pikinini bilong dispela diwai na mi kaikai.’ Orait God, Bikpela i askim meri olsem, ‘Watpo yu mekim dispela samting?’ Na meri i bekim tok olsem, ‘Snek i grisim mi na mi kaikai pikinini bilong dispela diwai.” (Stat 3:12, 13) Meri i no mekim stori giaman long ol samting snek (na·chashʹ) i bin mekim. Nogat. Na God Jehova i no ting dispela stori bilong meri i stori nating o stori giaman. Jehova i mekim ol samting long snek olsem tru snek i bin giamanim meri na grisim meri long brukim lo bilong Em, em i God na Man bilong wokim dispela meri. God i no ken mekim olsem sapos stori meri i mekim long snek em i wanpela stori nating tasol.

 7. (a) Baibel i stori olsem wanem long strafe God i givim long snek? (b) Snek i bin giamanim namba wan meri na olsem wanem em inap giamanim yumi tu? (Stori tu long liklik tok i stap daunbilo.)

⁷ Baibel i stori long strafe God i givim long dispela snek long Iden, na Baibel i tok: “Na God, Bikpela i tokim snek olsem, ‘Yu bin mekim dispela pasin nogut, olsem na nau mi gat strongpela tok bilong daunim yu. Bai yu gat bikpela hevi. Hevi yu karim bai i winim hevi bilong olgeta arapela animal. Nau na long olgeta taim bihain bai yu wokabaut long bel bilong yu tasol. Na bai yu kaikai das bilong graun. Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:14, 15) Taim ol man i mekim stretpela kot ol i save skelim ol samting tru i bin kamap; ol i no save harim ol stori nating. Olsem na God Jehova i no harim wanpela stori nating na mekim kot long wanpela snek em i no i stap tru. Nogat. Sapos em i mekim olsem bai em i semim em yet. Em i mekim kot long wanpela samting i stap tru na i gat rong. Nogut dispela snek i giamanim yumi tu na yumi ting olsem em i no i stap tru, na stori bilong em i stori nating tasol na em i no gat asua long wanpela pasin nogut hia long graun.a

 8. God i givim wanem strafe long meri? Olsem na wanem samting i painim ol pikinini meri na ol tumbuna pikinini meri bilong em?

⁸ Yumi save, tok bilong meri long snek em i tok tru, long wanem Baibel i stori long meri na i tok: “Na God i tokim meri olsem, ‘Bai mi givim yu bikpela hevi long taim yu gat bel. Na bai yu gat bikpela pen long taim yu karim pikinini. Tasol bai yu gat bikpela laik yet long man bilong yu, na bai em i bosim yu.’” (Stat 3:16) God i no bin mekim kain hatpela tok olsem taim em i givim dispela meri long Adam bilong marit long em. God i bin givim ol gutpela tok tasol long tupela. Long dispela taim God i bin tokim tupela: “Yupela i mas kamap planti na i go sindaun long olgeta hap bilong graun.” (Stat 1:28) Dispela gutpela wok God i givim long man tupela meri i makim olsem bai meri i karim planti pikinini, tasol bai em i no gat hevi o bikpela pen, na man i no ken bosim em nogut na daunim em. Dispela strafe God i tok bai painim namba wan meri em i givim hevi long ol pikinini meri na ol tumbuna pikinini meri bilong em long olgeta lain tumbuna i kamap bihain.

Strafe Bilong Adam i Litimapim Lo Bilong God

 9, 10. (a) God i bin givim wanem toksave long Adam stret? Sapos God i givim dispela strafe long Adam, wanem samting bai kamap? (b) God i givim wanem strafe long Adam?

⁹ Tasol wanem strafe i mas painim meri na man tu wantaim, long wanem, meri i bin pulim man na man tu i mekim sin? God i bin tokim dispela man stret olsem: “Yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, [long dispela de] bai yu dai.” (Stat 2:17) Adam i kaikai wanpela pikinini bilong diwai, em tasol, olsem na yu ting God, em Jas, bai givim dispela strafe long Adam na Adam i dai? Tingim ol samting i mas kamap sapos em i givim dispela strafe long Adam: Ol gutpela gutpela samting Adam tupela Iv i bin tingting long en taim tupela i marit na bel bilong tupela i amamas long en, ol dispela samting i no inap kamap—bai ol i no inap kamapim ol pikinini i gutpela olgeta na graun. Bai i no gat ol gutpela manmeri i sindaun gut wantaim na i stap oltaim long paradais long graun na i stap yangpela oltaim na i stap wanbel wantaim God, em i Papa bilong ol long heven. Olsem na yu ting God bai tingim ol dispela samting em i laik kamapim long ol man na dispela graun na em i no ken givim dispela strafe long namba wan man na meri? Yu ting olsem, a? Orait, harim tok God i bin mekim. Stori bilong Baibel i tok:

¹⁰ “Na God i tokim Adam olsem, ‘Yu bin harim tok bilong meri bilong yu, na yu bin kaikai pikinini bilong dispela diwai mi bin tambuim yu long kaikai. Olsem na nau bai mi bagarapim graun, na ol kaikai bai i no inap kamap gut long en. Oltaim bai yu wok hat tru bilong mekim kaikai i kamap long graun. Ol rop i gat nil na ol gras nogut bai i kamap na karamapim gaden bilong yu. Na bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.’”—Stat 3:17-19.

11. I gat wanem samting long pasin bilong bihainim tok na yumi save, strafe God i givim long Adam i stret?

¹¹ Dispela strafe God i kolim bilong Adam i makim olsem Adam i mas i dai. Tru God i laik bai olgeta hap bilong graun i kamap gutpela ples paradais na ol manmeri i gutpela olgeta ol i pulap long en na narapela i laikim tru narapela na ol i sindaun gut wantaim na wok oltaim long lukautim dispela Paradais. Tasol God i mas truim tok bilong em na givim dispela strafe long Adam, maski dispela i mekim wanem long laik bilong Em. Adam i bihainim tok bilong meri bilong em na em i no bihainim tok bilong God, em God i bin tambuim em long kaikai pikinini bilong “diwai bilong givim gutpela save long wanem samting i gutpela na wanem samting i nogut.” Sapos em i no bihainim tok bilong God, em Man bilong wokim em, yu ting em bai wok oltaim long lainim ol pikinini bilong em long bihainim tok bilong God? Yu ting pasin em yet i mekim inap lainim ol long bihainim tok bilong God Jehova?—Lukim 1 Samuel 15:22.

12, 13. (a) Sin bilong Adam bai mekim wanem long ol pikinini bilong em? (b) Olsem wanem na i stret Adam i no ken i stap oltaim long Paradais o long narapela hap bilong graun?

¹² Olsem wanem long ol pikinini bilong Adam? Bai ol inap bihainim stret lo bilong God, olsem Adam inap mekim taim em i stap gutpela olgeta? Nogat, a? Long wanem ol i pikinini bilong Adam na ol pikinini i save kisim ol pasin bilong papamama bilong ol. Em wanpela lo long skin bilong yumi. Olsem na ol pikinini bilong Adam i kisim pasin bilong Adam—ol i no strong long bihainim tok bilong God; ol i save bihainim tok bilong ol narapela. Ol samting tru i bin kamap i kamapim klia dispela samting.—Rom 5:12.

¹³ Sapos dispela man i bihainim stret tru ol tok bilong God bai em i kamapim bel bilong em, em i givim bel tru long God. Tasol em i tingim wanpela meri bilong dispela graun na em i sakim tok bilong God. Olsem na yu ting i stret em i ken i stap laip oltaim long Paradais o long narapela hap bilong dispela graun? Yu ting i orait em i ken i stap oltaim long graun? Em i mekim rong pinis, olsem na sapos God i larim em i stap oltaim long graun, yu ting dispela bai litimapim lo bilong God o kamapim stretpela pasin bilong God? O yu ting dispela bai lainim ol narapela long sakim lo bilong God na i makim olsem God i save giaman na yumi no ken bilipim tok bilong em?

God i Rausim Ol long Gaden Iden

14. Baibel i stori olsem wanem long ol samting God i mekim long Adam na long meri bilong Adam?

¹⁴ Baibel i stori long pasin God i bin mekim bilong stretim ol dispela askim, Baibel i tok: “Na bihain God, Bikpela i wokim klos long skin bilong animal, na em i givim long Adam wantaim meri bilong em na tupela i putim. Bihain God, Bikpela i tok, ‘Man i save pinis long wanem samting i nogut, na em i kamap wankain olsem yumi. Orait yumi no ken larim em i go klostu long dispela diwai bilong givim laip. Nogut em i kaikai pikinini bilong dispela diwai tu na em i stap oltaim.’ Olsem na God, Bikpela i rausim man long gaden Iden, na i salim em i go bilong wok long dispela graun God i bin wokim em long en. Na nau man i mas brukim graun na wokim gaden. God i rausim pinis man na meri, na em i makim ol strongpela ensel bilong sanap na was i stap long hap sankamap bilong gaden Iden. Na tu em i putim wanpela bainat i gat paia i lait long en na i save tanim tanim long olgeta hap. Oltaim ol dispela ensel wantaim dispela bainat i save was i stap, nogut wanpela man i go klostu long dispela diwai bilong givim laip.”—Stat 3:21-24.

15. (a) Adam tupela Iv i sem long ol i stap skin nating na God i mekim wanem na yumi save em i tingim dispela samting? (b) Husat i rausim namba wan man na meri long gaden Iden? (c) Taim tupela i stap ausait long gaden Iden, tupela i stap olsem wanem?

¹⁵ Nau Adam tupela Iv i sem long tupela i stap skin nating. God, em Jas, em i tingim dispela samting, olsem na em i givim longpela klos long tupela, em i bin wokim long skin bilong animal, na dispela klos i senisim ol lip tupela i bin samapim na pasim olsem laplap bilong haitim skin bilong ol. Baibel i no stori long God i wokim dispela klos olsem wanem. (Stat 3:7) Dispela kain klos bai stap longtaim na lukautim gut skin bilong tupela bambai nil bilong ol rop na gras nogut, o narapela samting nogut i stap long graun ausait long Iden i no ken bagarapim skin bilong ol. Taim tupela i mekim rong pinis, bel bilong tupela i gat tok na tupela i laik hait long ai bilong God namel long ol diwai long gaden Iden. (Stat 3:8) Taim God i kolim pinis strafe bilong tupela, nau God i rausim tupela long gaden. God i rausim tupela i go long hap sankamap na ol i lusim gaden na i stap ausait. Inap long olgeta taim bihain tupela i no inap i go bek insait long gaden. Nau tupela i no ken wok long skruim dispela gaden i go na mekim olgeta hap bilong graun i kamap olsem gutpela ples Paradais. Nau tupela i mas kaikai bret ol i wokim long ol kain gras samting i kamap long graun. Tasol dispela kain kaikai i no inap strongim skin bilong tupela bambai tupela inap i stap oltaim. I no gat rot long tupela i kisim kaikai long “dispela diwai bilong givim laip.” Bihain bihain—hamas yia?—tupela i mas dai!

Laik Bilong Jehova long Pastaim i No Ken Lus Nating

16. God i no tingting long mekim wanem? Bilong wanem em i no tingting long mekim olsem?

¹⁶ Taim dispela man na meri God i bin wokim long das bilong graun i brukim lo bilong em na mekim rong, yu ting nau God i tingting long bagarapim graun na mun na san na ol sta tu? Sapos em i mekim olsem bai gutpela laik bilong em long pastaim i lus nating long rot bilong ol samting wanpela snek (na·chashʹ) i bin kirapim. Yu ting wanpela snek nating inap bagarapim laik bilong God? Taim God i givim meri long Adam, God i kamapim laik bilong em. Em i tokim tupela, em i laik bai tupela i kamapim planti pikinini na bai ol manmeri i gutpela olgeta ol i go pulap long olgeta hap bilong graun, na bai ol i mekim olgeta hap bilong graun i kamap gutpela ples olsem gaden Iden, na olgeta manmeri i stap isi na bosim gut olgeta kain kain animal samting bilong graun na bilong solwara. Em, God i laik bai gutpela samting olsem i kamap na inap 6-pela de, olsem planti tausen tausen yia, em i bin wok long redim ol samting bilong kamapim dispela laik bilong em! Olsem wanem? Yu ting nau dispela gutpela laik bilong God i no ken kamap, long wanem wanpela snek i mekim sampela samting na namba wan man na meri i bikhet? Nogat tru!—Lukim Aisaia 46:9-11.

17. God i pasim tok pinis long bel long mekim wanem long de namba 7? Olsem na wanem samting i mas kamap long dispela de?

¹⁷ Namba 7 de, em de malolo bilong God Jehova, em i no pinis yet. God i bin makim dispela de i holi, olsem de bilong em yet, na gutpela samting i mas kamap long en. Em i no inap larim dispela de i kamap de nogut. Na sapos wanpela man i tingting long mekim wanpela samting bilong bagarapim dispela de malolo bilong God, bai God i senisim dispela samting na mekim i kamap gutpela, na taim dispela de i pinis bai i gutpela de—bai olgeta hap bilong graun i stap olsem ples holi, na bai ol man i bihainim laik bilong God long graun olsem ol i mekim long heven, na bai ol dispela manmeri long graun i gutpela olgeta.—Lukim Matyu 6:10.

18, 19. (a) Ol lain bilong namba wan sinman na meri i karim hevi, bilong wanem ol i ken amamas? (b) Bihain bai Wastaua i stori long wanem samting?

¹⁸ God i no les. Em i no lusim laik bilong em. Em i pasim tok pinis long bel long stretim bek nem bilong em bambai olgeta man i ken save, em i Man bilong truim tok bilong em—olgeta samting em i tok long mekim, em i save mekim tru, na dispela bai litimapim nem bilong em. (Aisaia 45:18) Yumi ol lain bilong namba wan sinman na meri, em yumi no gutpela na yumi karim hevi, tasol yumi ken amamas na wetim God i kamapim laik bilong em bilong pastaim. Taim em i mekim olsem, dispela bai helpim yumi inap oltaim oltaim. Sampela tausen yia bilong de malolo bilong God i go pinis, na laspela hap bilong en i gat gutpela blesing bilong en em i klostu pinis. Long dispela namba 7 de, “nait i go pinis” olsem long ol narapela 6-pela de bilong God i bin wokim ol samting, na nau “moning” i mas kamap. Taim olgeta gutpela samting bilong dispela “moning” i kamap pinis, na olgeta lain i lukim gutpela laik bilong God i kamap pinis olsem ol i wetim i stap, nau bai ol inap raitim tok olsem: ‘Nait i go pinis na moning i kamap. Em i de namba 7.’ Em gutpela samting tru yumi ken wetim i kamap!

¹⁹ Yumi tingim olgeta dispela samting i laik kamap na skin bilong yumi i kirap! Bihain bai Wastaua i stori moa long ol gutpela samting bilong Paradais em inap painim ol manmeri i bihainim tok, em ol i laikim tumas lo bilong God.

[Futnot]

Bai Yu Tok Wanem?

◻ Namba wan man na meri i mekim wanem na God i rausim tupela long Paradais?

◻ Olsem wanem yumi save stori bilong snek i giamanim Iv em i no stori nating tasol?

◻ God i kolim wanem strafe bilong meri?

◻ God i kolim wanem strafe bilong Adam? Na olsem wanem dispela i litimapim lo bilong God?

◻ Olsem wanem na God i no les long kamapim laik bilong em, olsem em i laik bai ol manmeri i gutpela olgeta ol i ken i stap long Paradais long graun?