Adam na Iv​​—Yu Ting Ol i Bin Stap Tru Tru?

PLANTI manmeri i ting, stori bilong Adam na Iv long Buk Stat long Baibel em i stori nating tasol. Wanpela pas long magasin Time i tok: “Inap longtaim pinis planti manmeri bilong ol bikpela lotu Kristen i ting stori bilong Adam na Iv long Buk Stat em tok piksa tasol.” Planti saveman bilong lotu Katolik, ol lotu Protestan, na lotu Juda, ol i wanbel long dispela. Ol i tok, ol stori bilong Buk Stat i no stret wantaim ol samting i bin kamap bipo o ol samting bilong saiens.

Yu ting wanem? Yu ting Adam na Iv i bin stap tru tru? I gat sampela samting i makim olsem ol i bin stap tru tru? Na sapos yumi ting stori bilong Buk Stat em wanpela stori nating tasol, wanem samting bai kamap long dispela?

Yu Ting Saiens i Strongim Tok Bilong Buk Stat?

Pastaim yumi ken skelim gen ol bikpela samting long stori bilong taim God i bin wokim namba wan man. Baibel i tok long Adam olsem: “God, Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” (Stat 2:7) Yu ting dispela tok i stret wantaim ol samting em ol saientis i painim pinis?

Buk Nanomedicine i tok, bodi bilong man i gat 41 kain kain kemikal i stap long en. Ol dispela kemikal​—kabon, ain, oksijen, na sampela moa​—ol i stap insait long graun. Olsem na tok bilong Buk Stat em i tru, olsem God i bin “kisim graun” na wokim man long en.

Tasol olsem wanem ol dispela kemikal i no gat laip long en, ol i bung wantaim na kamapim man i gat laip? Dispela em bikpela wok stret. Tasol bilong kliagut long en, yumi ken stori long wanpela kain roket em lain NASA i bin wokim, em i narapela kain stret na i hatwok long wokim kain masin olsem. Roket hia i gat 2.5 milion liklik liklik hap bilong en. Inap planti yia, wanpela lain ensinia i bin wok bung wantaim long droim plen bilong en na wokim ol hap bilong en na skruim wantaim. Orait nau tingim bodi bilong man. Bodi bilong man i gat 7 oktilion atom, na 100 trilion sel.a Na tu, bodi bilong man i gat planti ol liklik hap bilong en, na 9-pela bikpela hap. Bodi bilong yumi i olsem masin i narapela kain tru na i gat kain kain samting i wok insait long en na i nambawan tru. Orait, em i bin kamap olsem wanem? Em i bin kamap nating tasol o wanpela man i gat bikpela save tru em i bin wokim?

Wanem samting i mekim na yumi ol man i stap laip? Laip bilong yumi i kamap olsem wanem? Ol saientis i tok ol i no save. Na taim ol i stori long laip i kamap olsem wanem, ol i no gat wanpela tingting. Tasol ol man husat i bilip olsem i gat Krieta, ol i save long bekim bilong dispela askim. As bilong laip, em God tasol.b

Olsem wanem long stori bilong Buk Stat olsem God i wokim Iv long wanpela bun bilong banis bilong Adam? (Stat 2:​21-23) Nogut yu tok hariap olsem em i wanpela stori nating tasol​—pastaim tingim ol dispela samting: Long Janueri 2008, ol saientis long California, Amerika, i kisim sel long bodi bilong wanpela man na kamapim wanpela pikinini i blut yet; em namba wan taim ol i bin mekim olsem. Ol saientis i bihainim wankain pasin na ol i kamapim 20-pela animal. Na wanpela bilong ol em sipsip ol i kolim Dolly. Ol i kisim sel bilong wanpela sipsip i bikpela pinis na ol i yusim bilong wokim em long 1996.c

Yumi no save wanem samting bai kamap long ol dispela kain wok bilong ol saientis. Tasol tingim dispela: Sapos ol man inap mekim wok long sel bilong wanpela animal na kamapim narapela animal i wankain stret, orait Krieta i gat olgeta strong, em inap kamapim wanpela meri long hap bun bilong wanpela man, a? Ol dokta i save kisim hap bun bilong banis long stretim bun bilong man i bin kisim bagarap, long wanem, bun bilong banis inap kamap gen na senisim bun ol i bin rausim.

Ol Tok Baibel Yet i Kamapim

Sampela man i kirap nogut long save olsem planti taim Baibel i stori long Adam na Iv. Olsem wanem Baibel i soim olsem ol samting Buk Stat i stori long en ol i bin kamap tru tru?

Tingim lista bilong nem bilong ol lain tumbuna bilong ol Juda, i stap long Baibel long 1 Stori, sapta 1 i go 9, na long Gutnius Luk i Raitim, sapta 3. Wanpela lista i kolim nem bilong 48 lain tumbuna, na narapela lista i kolim nem bilong 75 lain tumbuna. Luk i kolim ol lain tumbuna bilong Jisas Krais, tasol 1 Stori i kolim ol lain tumbuna bilong lain Israel, olsem ol king na pris. Tupela lista wantaim i kolim ol nem yumi save long en, olsem Solomon, Devit, Jekop, Aisak, Abraham, Noa, na las tru em Adam. Olgeta nem long dispela tupela lista em nem bilong ol man tru tru, na Adam em i namba wan man tru tru long tupela lista wantaim.

Na tu, planti taim Baibel i stori long Adam na Iv olsem ol i man na meri tru tru, na i no olsem stori nating tasol. Skelim sampela eksampel:

• “Long wanpela tumbuna tasol [God] i bin mekim olgeta lain manmeri i kamap.”​​—APOSEL 17:26.

• “Wanpela man i bin mekim sin, na long dispela pasin sin i kamap long graun. Na sin i bringim dai i kam. . . . Stat long taim bilong Adam na i kam inap long taim bilong Moses, dai i wok long daunim olgeta man.”​​—ROM 5:​12, 14.

• “Namba wan man, Adam, i bin kisim laip.”​​—1 KORIN 15:45.

• “God i wokim Adam pastaim, na bihain em i wokim Iv.”​​—1 TIMOTI 2:13.

• “Enok em i namba 7 man i kamap long ol lain tumbuna pikinini bilong Adam, na em i bin autim tok profet long ol samting bai i kamap long ol dispela man nogut.”​​—JUT 14.

Bikpela samting moa i olsem: Jisas Krais, em nambawan witnes long Baibel, em i tokaut olsem Adam na Iv i bin stap tru tru. Taim ol man i tok pait wantaim Jisas long pasin bilong katim marit, em i tokim ol: “ ‘Bipo tru, taim God i wokim olgeta samting, em i wokim ol . . . i kamap man na meri. Olsem na man i save lusim papamama na i pas wantaim meri bilong en, na tupela i kamap wanpela bodi tasol.’ . . . Olsem na samting God i pasim pinis, em man i no ken katim.” (Mak 10:​6-9) Orait yu ting Jisas bai kolim wanpela stori nating bilong kamapim wanpela strongpela lo olsem? Nogat tru! Em i kolim stori bilong Buk Stat, long wanem, em i stori tru tru.

Buk The New Bible Dictionary i skelim ol dispela tok bilong Baibel na i tok: “Nupela Testamen i strongim stori bilong ol samting em ol sapta long kirap bilong Buk Stat i stori long en.”

Olsem Wanem Long Ol Narapela Tok?

Planti lotu manmeri em ol i gat gutpela bel, ol i ting yumi inap i stap gutpela Kristen maski yumi no bilip olsem Adam na Iv i bin stap tru. Tru, sapos yumi no skelim gut dispela samting, i luk olsem dispela tingting bilong ol i stret. Tasol mobeta yumi skelim gut dispela kain tingting bilong painimaut.

Olsem: Tingim wanpela bilip bilong Baibel em planti lotu manmeri i save bilip strong long en​—em pe Jisas i bin givim bilong baim bek ol man. Baibel i tok, Jisas Krais i bin givim laip bilong em i gutpela olgeta olsem pe bilong baim bek ol man long ol sin bilong ol. (Matyu 20:28; Jon 3:16) Pe bilong baim bek wanpela samting i mas stret wantaim samting i bin lus. Olsem na Baibel i tok Jisas i bin givim laip bilong em yet “[“olsem pe i stret,” NW] bilong baim bek olgeta manmeri.” (1 Timoti 2:6) Em “pe i stret” long wanem samting? Baibel i tok: “Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.” (1 Korin 15:22) Jisas i bin givim laip i gutpela olgeta olsem ofa bilong kisim bek ol man bilong bihainim tok, na dispela laip i stret wantaim laip Adam i bin lusim taim em i mekim sin long Iden. (Rom 5:12) I klia tru olsem, sapos Adam i no bin stap tru, orait ofa bilong Krais long baim bek man bai i no gat as bilong en.

Sapos yumi sakim o daunim stori bilong Adam na Iv long Buk Stat, dispela bai daunim olgeta bikpela bilip bilong Baibel!d Kain tingting olsem bai kamapim planti askim i no gat bekim bilong en, na bilip bai i no gat as bilong en.​—Hibru 11:1.

Laip​​—I Gat As Bilong En o Nogat?

Orait nau yumi ken mekim dispela bikpela askim: Sapos yumi sakim stori bilong Buk Stat, yu ting bai laip bilong yumi ol man i gat as bilong en? Richard Dawkins, em man i go pas long bilip long evolusen na em i bilip tu olsem i no gat wanpela God i stap, em i stori long ples antap na graun na i tok, “i no gat man i bin wokim, na i no gat wok bilong en, na i no gat pasin nogut o gutpela pasin, na olgeta samting i stap nating tasol na i no gat marimari na i no gat pasin bilong tingim narapela.” Dispela kain tingting i narapela kain tru long pasin na laik bilong yumi ol man!

Tasol tok bilong Baibel i narapela kain tru long tok bilong dispela man. Baibel i kamapim gutpela bekim long ol bikpela askim olsem: Yumi bin kamap olsem wanem? Yumi stap bilong mekim wanem? Bilong wanem i gat planti pasin nogut na pen na hevi long graun? Pasin nogut bai pinis o olsem wanem? Na i gat planti askim moa. Na ol man i bilip long ofa bilong Krais long baim bek man, ol inap tingting long kisim laip oltaim long Paradais long graun, wankain olsem long Iden, em ples we God i bin putim namba wan man na meri, Adam na Iv. (Song 37:29; KTH 21:​3-5) Em i wanpela gutpela samting tru yumi ken wetim!e

Maski stori bilong Adam na Iv i no wankain olsem tok bilong evolusen, em i stret wantaim ol save bilong saiens. Na tu, em i stret wantaim olgeta narapela tok bilong Baibel, em Tok Bilong God, we i soim yumi olsem i stap bilong yumi i gat as tru bilong en.

Olsem na mobeta yu yet i skelim sampela tok moa bilong Baibel, a? Ol Witnes Bilong Jehova ol i stap redi long helpim yu, na ol i amamas long mekim olsem.

[Ol Futnot]

[Rait long pes 14]

I klia tru olsem, sapos Adam i no bin stap tru, orait ofa bilong Krais long baim bek man bai i no gat as bilong en

[Ol Piksa long pes 12, 13]

Ol i bin tingim gut na wokim roket, na olsem tasol i gat Man i bin tingim gut na wokim bodi bilong yumi ol man

[Piksa long pes 15]

Jisas i tokaut klia olsem Adam na Iv i bin stap tru