Klostu Nau Bai i No Gat Pen Moa!
KLOSTU nau bai i no gat pen moa! Sapos dispela tok i tru, ol man i karim pen oltaim bai ol i amamas tru, maski ol i gat pen long skin o long tingting, o bikpela bel hevi i givim pen long ol. Planti milion manmeri i gat sampela kain sik kensa o sik bilong klok samting na ol i karim bikpela pen moa yet, bai ol i amamas long sik bilong ol i pinis! Sapos i no gat pen moa, ol man i gat bikpela sik long tingting bai ol i amamas tru. Bel bilong planti manmeri i pen tru, long wanem, ol i pret, o ol i hevi long man i dai pinis, o ol i pilim olsem ol i gat asua long wanpela samting, o ol i tingting planti. Sapos dispela hevi bilong ol i pinis, bai ol i amamas tru. Tasol yu ting i gutpela sapos olgeta pen i pinis?
Wanpela dokta bilong skelim skin bilong man, em Allan Basbaum bilong Yunivesiti bilong Kalifonia, long Sen Fransisko, em i tok: “Sapos yumi no inap pilim pen, dispela inap bagarapim yumi.” I gat gutpela as na em i tok olsem. Pen yumi pilim long skin i toksave long yumi olsem wanpela samting i laik bagarapim skin.
Sapos yumi no inap pilim pen long skin, dispela inap bagarapim yumi, olsem wanpela stori long wanpela nius (Time) i kamapim. Nius i stori olsem: “Wanpela liklik manki i gat 12-pela krismas. Pes bilong em i lait na i amamas, tasol skin bilong em i nogut tru. Han lek bilong em i krungut olsem wanpela sik nogut i bin mekim ol bun bilong em i malumalum na i krungut. Sampela pinga long han bilong em i lus. Em i gat traipela sua long skru bilong lek, na em i save kaikaim maus bilong em na ol sua i kamap long maus. Taim yu lukim skin bilong em bai yu ting olsem wanpela man i bin paitim em nogut tru . . . Taim mama i karim em, em i gat narapela kain sik long skin bilong em na em i no save pilim pen long skin. Olsem na taim em i holim samting i hat o samting em inap bagarapim em, em i no pilim pen na em i no pulim han i kam bek, olsem na samting ya i kukim han bilong em o bagarapim pinga. Taim em i wokabaut o ran, em i tromoi lek strong tumas i paitim graun, tasol em i no pilim na dispela samting i bin bagarapim ol bun bilong lek na i krungut nabaut. Taim em i wokabaut long skru na krungutim ol samting i sap, em i no pilim pen na traipela sua i kamap long skru. Sapos wanpela bun bilong em i bruk o skru i lus, em i no pilim pen na bai em i ken singaut long ol man i helpim em. Nogat.”
Ol man i lukim bikpela pen na hevi i painim planti milion manmeri na ol i kirap na putim asua i go long God. Tasol yu ting i stret ol i tok em asua bilong God?
Em Asua Bilong God o Olsem Wanem?
Inap olsem 6,000 yia ol manmeri bilong graun i bin kalabus long ol pen bilong skin na tingting. Naintin handet yia bipo, aposel Kristen Pol i tok stret olsem: “Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” (Rom 8:22) I gat kain kain marasin long stua bilong kilim i dai pen, na i gat ol dokta bilong stretim sik bilong skin na tingting, tasol ol manmeri i stap kalabus yet long pen. Sampela i tok nogut long God long ol pen na hevi ol i karim, olsem meri bilong Jop i laik kirapim Jop long mekim! Tasol Jop i save, sapos man i mekim olsem em i kranki stret.—Jop 2:9, 10.
I no stret sapos ol man i tok, em asua bilong God na ol manmeri i stap kalabus long pen. Em asua bilong wanpela man bilong giaman em yumi no inap lukim em, na em asua bilong namba wan papamama bilong yumi.
Baibel i makim olsem i gat wanpela ensel pastaim em i stret olgeta, tasol bihain em i mangal long kisim bikpela nem na bikpela strong bilong bosim ol man. Taim namba wan man na meri i kamap long graun, em i lukim na em i tingim olsem lain bilong ol bai pulap long gutpela ples paradais long graun na olgeta bai givim bel long God I Gat Olgeta Strong, em Jehova. Laik nogut long bel bilong em i kirapim em long sakim Man bilong wokim olgeta samting, na em i laik bai ol manmeri i lotu long em tasol. Dispela laik nogut bilong em i kamap ples klia taim em i mekim wanpela tok giaman. Na dispela i kamapim sin long graun.
Jehova i tokim namba wan man, em Adam, olsem sapos em i kaikai pikinini bilong diwai bilong givim save long wanem samting i gutpela na wanem samting i nogut, bai em i dai. (Stat 2:15-17) Tasol meri bilong Adam, em Iv, i no harim tok. Long rot bilong maus bilong wanpela snek, dispela ensel, em Man Bilong Giaman, em i tokim Iv: “Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” (Stat 3:1-5) Dispela em i namba wan tok giaman, na nau dispela spirit nogut i kisim nem olsem: “Papa tru bilong pasin bilong tok giaman.” (Jon 8:44) Em i mekim wok long snek long gaden Iden na Baibel i kolim em “snek bilong bipo yet” na “Satan” na “Man I Save Kotim Olgeta Manmeri.”—Kamapim Tok Hait 12:9.
Sin i bringim pen na hevi long ol manmeri. Taim Adam i mekim sin, long dispela de stret God i truim tok bilong em na putim strafe bilong i dai long tupela. Long ai bilong God, Adam tupela Iv i dai long dispela de. (Lukim Luk 20:37, 38.) Nau namba wan meri i gat sin, na long Iden Jehova i tokim em: “Bai mi givim yu bikpela hevi long taim yu gat bel. Na bai yu gat bikpela pen long taim yu karim pikinini. Tasol bai yu gat bikpela laik yet long man bilong yu, na bai em i bosim yu.” (Stat 3:16) Adam bai i hatwok na karim pen ausait long gaden Iden, long graun i no gutpela ples paradais. Jehova i tok: “Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:17-19) Kirap long dispela taim i kam inap long nau pen i painim ol manmeri.
Olsem na sin na i dai i kam long ol manmeri long rot bilong Adam. Olsem aposel Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Tasol Baibel i helpim yumi long karim pen, long wanem Baibel i tokim yumi i gat wanem as na Jehova i bin larim pen na hevi i stap, na Baibel i tok promis olsem klostu nau bai i no gat pen moa. Jehova i larim Satan, em snek nogut na “man bilong tok giaman,” i putim hevi long stretpela man Jop na traim bilip bilong em. Satan i tok, Jop i lotuim Jehova bilong kisim ol samting bilong skin tasol, na em i no givim bel long Jehova. (Jop 1:8-12) Tasol Jop i sanap strong na stap gut long God, na dispela i makim olsem ol manmeri i gat sin ol inap givim bel long Jehova na stap gut long em maski bikpela traim i painim ol. Jop i karim pen na hevi na em i sanap strong na dispela samting i bin litimapim nem bilong Jehova na i kamapim long ples klia olsem Satan em i man bilong giaman. Na Jop i kisim planti blesing, long wanem, em i sanap strong. (Jop 42:12-17; Jems 5:11) Stori bilong Jop i lainim yumi olsem God i laik mekim wanpela wok na em i larim pen na hevi i stap, tasol taim dispela wok em inap pinis, orait pen i kalabusim ol manmeri em bai pinis. Tasol olsem wanem yumi ken save tru, pen bai pinis?
Rot Bilong Pinisim Pen
Jehova i gat gutpela rot bilong pinisim pen. Em bai mekim long rot bilong ofa bilong Pikinini bilong em, Krais Jisas. Jisas em i “Pikinini Sipsip Bilong God. Em i kam bilong tekewe sin bilong olgeta manmeri bilong graun.” (Jon 1:29) Em “i no bin i kam [long graun] bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Long pasin bikhet, Adam i lusim laip i stretpela olgeta, wantaim ol gutpela blesing. Tasol ofa bilong Jisas i baim bek ol dispela samting. (1 Timoti 2:5, 6; Hibru 7:26) “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
God i tok promis olsem olgeta pen bai i pinis. Spirit bilong God i kirapim aposel Jon long raitim wanpela tok profet i makim olsem bihain bai i no gat sin na pen moa. Jon i tok:
“Nau mi lukim nupela skai na nupela graun i stap. Namba wan skai na namba wan graun i go pinis olgeta. Na solwara i no i stap moa. . . . Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ ”—Kamapim Tok Hait 21:1-5.
Ol manmeri i bihainim tok ol bai kisim gutpela helpim long ofa bilong Jisas. Dispela bai kamap taim Kingdom i bosim graun, em ol stretpela manmeri i bin beten long en inap longtaim pinis na i tok: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:9, 10) Long Kingdom i stap long heven, Krais Jisas bai mekim wok king i go inap long taim em i putim olgeta birua aninit long lek bilong em. Em bai daunim tu dispela birua, em pen i save painim ol man long nau, na taim em i pinisim pinis ol narapela birua, orait em bai pinisim dai tu.—1 Korin 15:25, 26.
Tru tumas, klostu nau bai gutpela samting i painim olgeta manmeri i bihainim tok bilong God—bai God ‘i mekim drai wara i stap long ai bilong ol. Na bai ol i no i dai moa, o bel hevi moa o krai moa, na bai ol i no inap kisim pen moa.’ (Kamapim Tok Hait 21:4) Na dispela tok profet nau i makim samting bilong spirit, bihain bai i kamap tru long skin, olsem: “Litimapim nem bilong Bikpela. . . . Em i save lusim olgeta sin bilong [yumi], na em i save mekim orait olgeta sik bilong [yumi].” “I no gat man . . . bai i tok olsem, ‘Mi gat sik.’ ”—Song 103:1-3; Aisaia 33:24.
Wanem Taim Bai Pen i Pinis?
Klostu nau bai pen i pinis. Dispela samting bai kamap long taim bilong yumi; ol lain manmeri bilong dispela taim nau bai i lukim. Truim bilong ol tok profet bilong Baibel i soim yumi olsem yumi stap long taim bilong pinis bilong dispela pasin nogut bilong graun. Ol planti pait, na hangre, na guria, na wok bilong ol Witnes Bilong Jehova long autim gutpela tok bilong Kingdom long olgeta hap, olgeta dispela samting i olsem wanpela “mak” na i makim olsem Jisas i kam bek i stap olsem king bilong Kingdom.—Matyu 24:3-14, 21, 34.
Klostu nau “namba wan skai na namba wan graun,” olsem dispela olpela pasin bilong Satan wantaim wok gavman bilong en, bai i no i stap moa. “Solwara,” olsem olgeta man nogut, bai ol i pinis olgeta. Olsem na yumi stap klostu tru long taim bilong wanpela gutpela gavman, olsem “nupela skai,” i bosim “nupela graun,” em stretpela lain manmeri. Na “stretpela pasin tasol bai i stap.”—Kamapim Tok Hait 21:1; 2 Pita 3:13.
Ol dispela blesing aninit long nupela gavman, em Kingdom bilong God, i klostu tru, olsem na yu ken strongim bel. Wok long kisim sampela save moa long dispela nupela taim i laik kamap na bai i no gat pen na i dai moa. Givim bel long wetim dispela gutpela taim i klostu pinis. Long dispela taim olgeta man i laikim tumas Jehova na bihainim tok bilong em bai ol i no gat pen moa.