PASIN HELPIM Long Toktok na Long Pasin

PASIN helpim i save strongim na mekim gut bel bilong yumi! Yumi save amamas tru taim yumi luksave olsem ol narapela i tingim yumi na helpim yumi. Olsem na yumi ken mekim wanem bilong kisim dispela naispela pasin?

Taim yumi soim pasin helpim long narapela, dispela i makim olsem yumi tingim em—yumi soim pasin helpim long toktok na pasin bilong yumi. Pasin yumi mekim bai soim klia olsem yumi gat pasin helpim. Pasin laikim na pasin bilong pilim tru ol samting long bel bai kirapim yumi long helpim ol narapela. Na tu, pasin helpim em wanpela pasin holi spirit i save kamapim na ol Kristen i mas wok hat long kisim dispela pasin. (Gal. 5:22, 23) Yumi ken stori long olsem wanem Jehova na Pikinini bilong em i soim pasin helpim, na hau yumi inap bihainim eksampel bilong tupela.

Jehova i tingim gut olgeta manmeri na helpim ol, na em i tingim tu “ol man i no gat pasin bilong tok tenkyu na ol man nogut.” (Luk 6:35) Jehova “i save mekim san bilong em i kam antap long ol man nogut na ol gutpela man, na em i save mekim ren i kam daun long ol stretpela man na ol man i no mekim stretpela pasin.” (Mat. 5:45) Olsem na maski sampela manmeri i no save olsem Jehova em i Krieta, ol i kisim helpim long ol samting em i wokim bilong helpim yumi long i stap laip, na ol inap i stap amamas.

Jehova i givim bikpela helpim long Adam na Iv. Bihain long tupela i mekim rong, tupela “i samapim ol lip bilong diwai fik bilong karamapim tupela yet.” Tasol Jehova i save olsem tupela i mas werim ol klos bilong lukautim ol yet taim ol i go ausait long gaden Iden we i gat “ol rop i gat nil na gras nogut.” Olsem na Jehova i helpim tupela—em i wokim “longpela klos long skin bilong animal.”—Stt. 3:7, 17, 18, 21.

Jehova i save helpim “ol man nogut na ol gutpela man,” tasol em i laik tumas long helpim ol wokman bilong em. Long taim bilong profet Sekaraia, ol manmeri bilong God i wokim tempel long Jerusalem, tasol bihain ol i stop long wok. Wanpela ensel i lukim dispela na em i bel hevi. Jehova i putim yau long dispela ensel, na em i “bekim gutpela tok . . . na mekim isi bel bilong em.” (Sek. 1:12, 13) Jehova i mekim wankain pasin long profet Elaija. Dispela profet i bin bel hevi tru na em i askim Jehova long tekewe laip bilong em. Jehova i pilim tru hevi bilong Elaija na em i salim wanpela ensel i go strongim em. Na tu, God i tokim em olsem planti manmeri i stap yet long sait bilong em. Ol dispela tok i strongim Elaija na em i kirap gen long mekim asainmen bilong em. (1 Kin. 19:1-18) Husat i stap gutpela eksampel tru long bihainim pasin bilong Jehova long soim pasin helpim?

Taim Jisas i stap long graun, em i tingim tru ol manmeri na helpim ol. I no gat wanpela taim em i mekim hatpela pasin o bosim strong ol man. Em i pilim tru hevi bilong ol na em i tok: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. . . . Hap plang bilong mi i gutpela.” (Mat. 11:28-30) Ol manmeri i amamas long Jisas i helpim ol, olsem na ol i bihainim em i go long olgeta hap. Jisas “i sori tru long ol” na em i givim kaikai long ol, oraitim ol sikman, na skulim ol long “planti samting” long Papa bilong em.—Mak 6:34; Mat. 14:14; 15:32-38.

Jisas i gat bikpela pasin helpim, olsem na em i pilim tru tingting bilong ol narapela. Sampela taim Jisas i laik malolo, tasol ol manmeri i save go yet long em. Maski i olsem, em “i amamas” long helpim ol. (Luk 9:10, 11) Wanpela meri i karim blut inap 12-pela yia. Em i bilip olsem em bai kamap orait sapos em i tatsim klos bilong Jisas. Maski lo i tok dispela meri i no klin, Jisas i no krosim em. (Wkp. 15:25-28) Jisas i sori tru long em na i tok: “Pikinini, bilip bilong yu i mekim na yu kamap orait. Yu go wantaim bel isi, na dispela sik i no ken givim hevi moa long yu.” (Mak 5:25-34) Jisas i soim bikpela pasin helpim long dispela meri!

Ol eksampel yumi stori pinis long en i kamapim olsem sapos yumi laik soim pasin helpim, yumi mas mekim gutpela pasin long ol narapela. Long stori bilong gutpela man Samaria, Jisas i kamapim klia dispela samting. Maski pasin birua i stap namel long ol Samaria na ol Juda, man Samaria i sori tru long man Juda em ol raskol i bin paitim, kisim olgeta kago bilong em, na lusim em i stap hap indai long rot. Pasin helpim i kirapim man Samaria long mekim gut long dispela man Juda. Em i wasim ol sua bilong man Juda na kisim em i go long wanpela haus pasindia. Em i baim papa bilong haus pasindia long lukautim man Juda, na em i tok long bekim ekstra mani em papa bilong haus pasindia i yusim bilong lukautim man Juda.—Luk 10:29-37.

Taim yumi mekim ol gutpela tok bilong strongim ol narapela, dispela tu i soim olsem yumi gat pasin helpim. Baibel i tok: “Wari i stap long bel bilong man i save daunim bel bilong em, tasol gutpela tok i save amamasim bel bilong em.” (Prov. 12:25) Taim yumi mekim ol gutpela tok bilong strongim ol narapela, dispela bai mekim ol i amamas.a Ol gutpela tok bai soim olsem yumi tingim ol, na dispela bai strongim ol long karim ol hevi.—Prov. 16:24.

God i wokim yumi ol manmeri “i kamap olsem em yet,” olsem na yumi olgeta inap kisim pasin helpim. (Stt. 1:27) Julius em ofisa long ami bilong Rom. Em i kisim Pol i go long Rom, na em i “mekim gutpela pasin long Pol na larim em i go long ol pren bilong em na kisim helpim long ol” long Saidon. (Apo. 27:3) Bihain, Pol na ol narapela i kalap long sip bilong i go long Rom, tasol sip i bagarap, olsem na ol i swim i go long ailan Malta. Ol manmeri long dispela ailan i “mekim gutpela pasin tru” long ol. Ol i wokim paia bambai Pol na ol lain i stap wantaim em inap hatim skin. (Apo. 28:1, 2) Sapos man i gat pasin helpim, em bai soim dispela pasin long olgeta taim.

Sapos yumi laik amamasim God, orait pasin helpim i mas kamap pasin tru bilong yumi. Jehova i tok yumi mas “werim” dispela pasin olsem klos. (Kol. 3:12, futnot) Tasol sampela taim yumi inap pilim hatwok long mekim dispela pasin i kamap pasin tru bilong yumi. Ating yumi pilim sem, pret liklik, ol man i birua long yumi, o yumi tingim yumi yet. Maski i olsem, yumi inap winim ol dispela hevi taim yumi kisim helpim long holi spirit na yumi bihainim pasin bilong Jehova long helpim ol narapela.—1 Kor. 2:12.

Olsem wanem? Yu inap luksave long sampela samting em yu inap mekim bilong helpim ol narapela? Askim yu yet: ‘Mi save putim gut yau na pilim tingting bilong narapela? Mi luksave long ol samting ol narapela i nidim? Mi save soim pasin helpim long ol narapela em ol i no wanfamili o gutpela pren bilong mi?’ Yumi ken putim sampela mak em yumi laik winim, olsem save gut long ol narapela i stap klostu long yumi, na moa yet long kongrigesen. Long dispela rot, yumi inap kisim save long sindaun bilong ol na luksave long ol samting ol i sot long en. Taim yumi laik helpim ol narapela, yumi mas soim pasin em yumi laik bai ol i mekim long yumi. (Mat. 7:12) Jehova bai helpim yumi long kisim pasin helpim sapos yumi beten askim em long helpim yumi.—Luk 11:13.

Pol i kolim ol pasin em i bihainim bilong soim olsem em i wokman bilong God, na wanpela em “pasin helpim.” (2 Kor. 6:3-6) Ol manmeri i laikim Pol bikos toktok na pasin bilong em i soim olsem em i tingim tru ol. (Apo. 28:30, 31) Sapos yumi tu i soim pasin helpim, dispela inap kirapim laik bilong ol manmeri long kisim save long tok i tru. Taim yumi soim pasin helpim long olgeta manmeri na ol manmeri husat i birua long yumi, yumi inap mekim ol i bel kol na ol i no inap birua moa long yumi. (Rom 12:20) Bihain, ol inap amamas long kisim save long tok bilong Baibel.

Taim Paradais i kamap long graun na planti lain manmeri i kirap bek, ol bai amamas stret long luksave olsem ol narapela i bin soim bikpela pasin helpim long ol—ating em fes taim bilong ol long pilim tru dispela pasin. Dispela bai kirapim ol tu long helpim ol narapela. Ol manmeri husat i soim pasin helpim long ol narapela, ol tasol bai stap laip taim Kingdom Bilong God i bosim graun. Ol bai soim pasin laikim na pasin helpim long narapela narapela. (Sng. 37:9-11) Ol man bai i no pret na ol bai stap bel isi! Tasol long nau yet, yumi mas soim pasin helpim long ol narapela. Olsem wanem dispela pasin inap helpim yumi?

Baibel i tok: “Man i gat pasin helpim, dispela i save helpim em yet.” (Prov. 11:17) Ol narapela i save laikim man i gat pasin helpim, na ol tu bai helpim em. Jisas i tok: “Pasin yupela i mekim long ol man, ol bai mekim wankain pasin long yupela.” (Luk 6:38) Olsem na man i gat pasin helpim, em i gat planti gutpela pren.

Aposel Pol i kirapim ol Kristen long Efesus long “mekim pasin helpim long narapela narapela, na sori tru long ol, na redi long fogivim narapela narapela.” (Efe. 4:32) Taim olgeta insait long kongrigesen i pilim tru hevi bilong narapela narapela na soim pasin helpim, dispela bai strongim kongrigesen olgeta. Ol i no inap sutim tok, tok bilas, tok baksait, o mekim ol tok bilong rabisim ol narapela, nogat. Ol bai mekim ol tok bilong helpim ol. (Prov. 12:18) Long dispela rot, kongrigesen bai stap strong na olgeta bai amamas long mekim wok bilong God.

Tru tumas, yumi soim pasin helpim long toktok na pasin bilong yumi. Taim yumi helpim ol narapela, yumi bihainim gutpela pasin bilong God bilong yumi, Jehova. (Efe. 5:1) Yumi strongim kongrigesen na kirapim ol narapela long bihainim lotu i tru. Yumi laik bai ol narapela i tingim yumi olsem ol manmeri bilong soim pasin helpim!