Yu Save Tingim Tru Laip Olsem God i Save Tingim?

1, 2. (a) God i bin givim wanem gutpela presen long yumi? (b) Long nau, bilong wanem em i bikpela samting moa long yumi mas i gat save long skelim ol stiatok bilong Baibel?

PAPA bilong yumi long heven i bin givim yumi wanpela presen i dia tumas​—em i givim yumi laip na yumi gat tingting na save na yumi inap kamapim ol pasin bilong em. (Stat 1:27) Dispela gutpela presen i mekim na yumi inap kliagut long olsem wanem ol stiatok bilong Baibel i helpim yumi. Long rot bilong bihainim ol dispela stiatok, yumi inap kamap ol strongpela Kristen i laikim tru Jehova na yumi inap “skelim wanem ol pasin i gutpela na wanem ol pasin i nogut.”​—Hibru 5:14.

² Long nau em i bikpela samting moa long yumi mas i gat save long skelim ol stiatok bilong Baibel, long wanem, kain kain samting i kamap na i givim hatwok, na yumi no inap kamapim ol lo i stret long olgeta samting em ol inap kamap long laip bilong yumi. Save bilong ol dokta long nau i kamapim klia dispela samting, na moa yet long ol marasin na rot bilong stretim sik we ol i save mekim wok long blut. Dispela em i bikpela samting long olgeta man husat i laik bihainim tok bilong Jehova. Tasol sapos yumi kliagut long ol stiatok bilong Baibel long dispela samting, yumi inap wokim ol gutpela disisen i stret wantaim maus bilong bel bilong yumi na i helpim yumi long i stap insait yet long pasin laikim bilong God. (Sindaun 2:​6-11) Tingim sampela bilong ol dispela stiatok.

3, 4. Wanem samting i kamap na Baibel i tok long namba wan taim olsem blut i samting holi? Wanem ol stiatok i as bilong dispela?

³ Bihain liklik long Kein i kilim i dai Abel, Jehova i kamapim klia long namba wan taim olsem laip na blut i poroman wantaim na ol i samting holi. God i tokim Kein: “Blut bilong brata bilong yu i kapsait pinis long graun, na mi harim dispela blut i krai long mi long bekim dispela rong.” (Stat 4:10) Long ai bilong Jehova, blut bilong Abel i makim laip bilong em, em dispela laip i pinis hariap tumas. Olsem na yumi ken tok, blut bilong Abel i krai long God i mas bekim rong.​—Hibru 12:24.

⁴ Bihain long Bikpela Tait long taim bilong Noa, God i givim tok orait long ol man i ken kaikai abus, tasol ol i no ken kaikai blut. God i tok: “Wanpela samting tasol yupela i no ken kaikai, em mit i gat blut i stap yet long en, long wanem, blut em i as bilong laip. Na sapos wanpela animal o wanpela man i pinisim laip bilong yupela, bai mi mekim save tru long em.” (Stat 9:​4, 5) Dispela lo i go long olgeta tumbuna pikinini bilong Noa i kam inap long taim bilong yumi. Lo i strongim tok God i bin mekim long Kein​—olsem blut i makim laip bilong ol man na ol animal. Na tu, dispela lo i kamapim klia olsem Jehova, As bilong laip, em bai kotim olgeta manmeri husat i no soim rispek long laip na blut.​—Song 36:9.

5, 6. Olsem wanem Lo Bilong Moses i soim olsem blut em i samting holi na i bikpela samting? (Lukim tu blok long pes 90.)

⁵ Lo Bilong Moses i kamapim dispela tupela bikpela tok i tru. Wok Pris 17:​10, 11 i tok: “Sapos wanpela man . . . i kaikai mit i gat blut i stap yet long en, bai mi Bikpela, mi birua long em na rausim em long lain manmeri bilong mi. Blut i save givim laip long olgeta man na animal. Olsem na mi tokim yupela olsem. Pris i mas kapsaitim blut bilong ofa long alta, bilong rausim ol sin bilong yupela manmeri. Blut tasol i as bilong laip, na blut tasol i save rausim sin bilong yupela ol manmeri.”​—Lukim blok “Strong Bilong Blut Long Rausim Sin,” long pes 88.

⁶ Sapos ol i no yusim blut bilong animal long alta, orait ol i mas kapsaitim dispela blut i go long graun. Long dispela rot i olsem ol i givim laip i go bek long Man i bin givim laip. (Lo 12:16; Esekiel 18:4) Tasol tingim, i no olsem ol Israel i mas mekim bikpela wok tru bilong rausim olgeta liklik hap blut i stap long mit bilong animal. Nogat. Sapos ol i bin katim nek bilong animal na rausim blut bilong en, ol Israel i ken kaikai dispela abus na bel i no ken kotim ol, long wanem, dispela pasin bilong rausim blut i soim rispek long Man Bilong Givim Laip.

 7. Devit i mekim wanem bilong soim olsem blut i samting holi?

⁷ Devit em man “[God] i laikim” tru, em i kliagut long ol stiatok bilong lo bilong God long blut. (Aposel 13:22) Wanpela taim nek bilong Devit i drai tru, na tripela wokman bilong em i strong na i go insait long kem bilong ol birua, na kisim wara long wanpela hulwara na bringim i kam long em. Devit i mekim wanem? Em i tok: “Sapos mi dring, bai i olsem mi dring blut bilong ol dispela man.” Long tingting bilong Devit, dispela wara i olsem blut bilong ol dispela man husat inap i dai taim ol i go kisim wara. Olsem na maski nek bilong em i drai tru, em i “kapsaitim [wara] olsem ofa long Bikpela.”​—2 Samuel 23:​15-17.

8, 9. Tingting bilong God long laip na blut i senis taim kongrigesen Kristen i kamap o olsem wanem? Stori long dispela.

⁸ Inap 2,400 yia bihain long God i tokim Noa long ol samting bilong blut na inap 1,500 yia bihain long God i kamapim kontrak bilong Lo, holi spirit bilong Jehova i kirapim lain i bosim kongrigesen Kristen bilong bipo long raitim tok olsem: “Holi Spirit i stap wantaim mipela na mipela i pasim tok olsem, mipela i no laik putim planti hevi long yupela. Olsem na yupela i mas bihainim ol dispela pasin tasol. Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai. Na yupela i mas abrusim olkain pasin pamuk.”​—Aposel 15:​28, 29.

⁹ Lain i bosim ol Kristen bilong bipo i save olsem blut em i samting holi, na pasin bilong mekim wok i no stret long blut i wanpela bikpela rong, wankain olsem pasin bilong lotuim god giaman o pasin pamuk. Ol Kristen tru long nau i bilip long dispela tok. Na tu, ol Kristen i save tingim ol stiatok bilong Baibel, olsem na ol inap mekim ol samting Jehova i orait long en taim ol i wokim disisen long ol samting bilong blut.

10, 11. (a) Ol Witnes Bilong Jehova i ting olsem wanem long pasin bilong kisim blut stret na fopela bikpela hap bilong en? (b) Long ol samting bilong blut, ol Kristen i gat narapela narapela tingting long wanem ol samting?

¹⁰ Ol Witnes Bilong Jehova i save olsem pasin bilong ‘abrusim blut’ i makim olsem ol i no ken kisim blut, givim blut, o putim blut bilong ol yet i stap na kisim gen bihain. Ol i rispek long lo bilong God, olsem na ol i no orait long kisim fopela bikpela hap bilong blut: ol retpela sel, ol waitpela sel, ol pletlet, na plasma.

¹¹ Long nau, planti taim ol dokta i save brukim ol dispela fopela bikpela hap i go long ol liklik liklik hap na mekim narapela narapela wok long ol. Olsem wanem? Kristen inap kisim ol dispela liklik hap bilong blut? Em i tingim ol dispela liklik hap i olsem “blut”? Olgeta wan wan i mas wokim disisen bilong ol yet long dispela samting. Na i wankain long ol pasin ol dokta i save bihainim bilong helpim ol sikman, olsem hemodialysis, hemodilution, na cell salvage, we ol i mekim wok long blut bilong sikman yet, tasol ol i no bin kisim dispela blut pastaim na putim i stap bilong yusim bihain, nogat.​—Lukim Apendiks, pes 246-49.

12. Yumi mas ting olsem wanem na mekim wanem long ol samting em maus bilong bel i mas makim?

¹² Yu ting ol samting yumi yet i mas wokim disisen long en em i liklik samting long Jehova? Nogat, i no olsem, em i laik save long tingting na bel bilong yumi. (Sindaun 17:3; 21:2; 24:12) Olsem na taim yumi askim pinis Jehova long stiaim yumi na yumi mekim wok painimaut long ol marasin na rot bilong helpim sikman, orait yumi mas bihainim maus bilong bel bilong yumi em Baibel i skulim pinis. (Rom 14:​2, 22, 23) Ol arapela i no ken wokim disisen bilong yumi o fosim yumi long bihainim tingting bilong ol, na tu, yumi yet i no ken mekim kain askim olsem, “Yu bai mekim wanem sapos dispela samting i painim yu?” Long ol kain samting olsem, olgeta wan wan Kristen i mas “karim hevi bilong pasin ol yet i mekim.”a​—Galesia 6:5; Rom 14:12; lukim blok “Mi Tingim Blut i Samting Holi?” long pes 93.

13. Ol lo na stiatok bilong Jehova i kamapim klia wanem ol pasin bilong em? Stori long dispela.

¹³ Ol lo na ol stiatok i stap long Baibel i kamapim klia olsem Jehova em i Man Bilong Givim Lo, na em i gutpela Papa husat i tingim tru i stap bilong ol pikinini bilong em. (Song 19:​7-11) Tru, God i no givim dispela lo bilong “sakim blut” bilong lukautim helt bilong yumi ol man, tasol dispela lo i banisim yumi long ol hevi i save painim ol man i kisim blut. (Aposel 15:​20, NW) Planti dokta i tok olsem ol operesen we ol i no mekim wok long blut, em i nambawan gutpela rot bilong helpim sikman. Long ol Kristen tru, dispela i kamapim klia olsem savetingting na pasin laikim bilong Jehova i bikpela tru.​—Aisaia 55:9; Jon 14:​21, 23.

14, 15. (a) Pasin bilong God long laikim lain bilong em i kamap ples klia long wanem ol lo? (b) Olsem wanem yu ken bihainim ol stiatok bilong ol dispela lo?

¹⁴ Pasin bilong God long tingim i stap bilong lain Israel bilong bipo i kamap ples klia long planti lo bilong em. Olsem, ol Israel i save mekim planti wok samting antap long rup bilong haus, olsem na God i tokim ol long wokim banis long arere bilong rup bambai ol man i no ken kisim bagarap. (Lo 22:8; 1 Samuel 9:​25, 26; Nehemia 8:16; Aposel 10:9) God i tok tu olsem ol man i mas kisim ol bulmakau i save bagarapim man na putim ol insait long banis. (Kisim Bek 21:​28, 29) Man i sakim ol dispela lo i soim olsem em i no tingim i stap bilong ol arapela na em inap kisim asua long blut.

¹⁵ Olsem wanem yu ken bihainim ol stiatok bilong ol dispela lo? Yu ken tingim ka bilong yu, pasin bilong yu long draivim ka, ol animal bilong yu, haus bilong yu, ples wok bilong yu, na ol amamas yu save insait long en. Long sampela kantri, ol eksiden i namba wan as na ol yangpela i save dai, na planti taim dispela i kamap, long wanem, ol i save mekim ol samting ol inap kisim bagarap long en. Tasol ol yangpela husat i laik i stap insait yet long pasin laikim bilong God, ol i tingim tru laip na ol i no painim amamas long ol samting ol inap kisim bagarap long en. Ol i no longlong, ol i save olsem ol yangpela tu inap kisim bagarap. Ol i sakim ol samting ol inap kisim hevi long en na ol i stap amamas taim ol i yangpela.​—Saveman 11:​9, 10.

16. Wanem stiatok bilong Baibel i stret long pasin bilong rausim bel? (Lukim tu futnot.)

¹⁶ Laip bilong bebi i stap yet long bel bilong mama i bikpela samting long ai bilong God. Long Israel bilong bipo, sapos wanpela i mekim samting na meri i gat bel i kisim bagarap, na sapos meri o pikinini i dai, God i tingim dispela man i olsem kilman na em i mas i dai olsem “bekim bilong laip i bin lus.”b (Kisim Bek 21:​22, 23, NW) Olsem na tingim, Jehova i pilim olsem wanem taim em i lukim olsem long olgeta yia planti meri i kilim i dai pikinini i stap yet long bel? Na planti meri i mekim olsem, long wanem, ol i tingim laik bilong ol yet tasol.

17. Bai yu tok wanem bilong mekim gut bel bilong meri husat i bin rausim bel paslain long em i kisim save long ol lo bilong God?

¹⁷ Tasol olsem wanem long meri husat i bin rausim bel paslain long em i kisim save long tok i tru bilong Baibel? Yu ting God i no inap marimari long em? Em bai marimari long em! Man o meri i tanim bel tru i ken bilip olsem Jehova bai fogivim em long rot bilong blut bilong Jisas i bin kapsait. (Song 103:​8-14; Efesus 1:7) Em nau, Krais yet i bin tok: “Mi no kam bilong singautim ol stretpela man long tanim bel. Nogat. Mi kam bilong singautim ol man i save mekim sin.”​—Luk 5:32.

18. Baibel i tok wanem samting i kirapim ol man long kapsaitim planti blut?

¹⁸ Jehova i no laik bai yumi mekim nogut long ol arapela, na tu, em i laik bai yumi rausim pasin bilong heitim ol arapela​—dispela pasin i as na planti blut i bin kapsait. Aposel Jon i tok: “Olgeta man husat i heitim brata bilong ol, ol i kilman.” (1 Jon 3:​15, NW) Kain man olsem i nolaik tru long brata bilong em, na i no dispela samting tasol, em i laik bai brata bilong em i mas i dai. Pasin birua bilong em inap kirapim em long mekim tok baksait o sutim tok giaman olsem brata i bin mekim wanpela rong, em wanpela rong we em i mas kisim strafe long God sapos tru tru em i bin mekim dispela rong. (Wok Pris 19:16; Lo 19:​18-21; Matyu 5:22) Olsem na em i bikpela samting long yumi wok long rausim olgeta kain tingting nogut i stap long bel!​—Jems 1:​14, 15; 4:​1-3.

19. Man em ol stiatok bilong Baibel i stiaim em, em i gat wanem tingting long tok bilong Song 11:5 na Filipai 4:​8, 9?

¹⁹ Ol man husat i tingim tru laip olsem Jehova i save tingim na ol i laik i stap insait yet long pasin laikim bilong em, ol i save sakim olgeta kain pasin bilong pait na bagarapim man. Song 11:5 (NW) i tok: “[Jehova] i heitim tru ol man i laikim pasin pait.” Dispela ves i no kamapim tasol wanpela pasin bilong God, nogat, em i kamapim wanpela stiatok bilong stiaim wokabaut bilong yumi. Dispela tok i kirapim ol man i laikim God long abrusim olgeta kain amamas i gat pasin bilong pait na bagarapim man long en. Baibel i tok Jehova em i “God bilong bel isi,” na dispela i kirapim ol wokboi bilong em long pulimapim tingting na bel bilong ol long ol samting i strongim pasin laikim, ol samting i gutpela, na ol samting i stret long ol man i litimapim, em ol pasin i save kamapim bel isi.​—Filipai 4:​8, 9, NW.

20-22. Long ol samting bilong dispela graun, ol Kristen i stap olsem wanem? Bilong wanem i olsem?

²⁰ Long ai bilong God, graun olgeta bilong Satan i gat asua long blut. Ol lain politik bilong en, em Baibel i tok ol i olsem ol wel animal, ol i bin kilim i dai planti milion manmeri, na planti wokboi bilong Jehova tu. (Daniel 8:​3, 4, 20-22; KTH 13:​1, 2, 7, 8) Ol bisnis na saiens i wok wantaim ol dispela lain i olsem wel animal, na ol i bin kamapim ol gan na bom i nogut tru, na kisim bikpela winmani long en. Tru tumas, “dispela graun olgeta em i stap aninit long strong bilong Satan”!​—1 Jon 5:19.

²¹ Ol disaipel bilong Jisas “i no insait long ol samting bilong dispela graun” na ol wok politik na ol pait bilong en, olsem na ol wan wan disaipel yet i no gat asua long blut na ol i no insait long wanpela lain i gat asua long blut.c (Jon 15:​19, NW; 17:16) Na olsem Krais i bin mekim, ol i no pait na bekim pe nogut long ol man i mekim nogut long ol. Nogat. Ol i soim pasin laikim long ol birua bilong ol, na ol i beten tu long God i ken helpim ol.​—Matyu 5:44; Rom 12:​17-21.

²² Na bikpela samting moa, ol Kristen tru i no insait long ‘Bikpela Babilon,’ em olgeta lotu giaman em ol i gat bikpela asua tru long blut, winim olgeta narapela lain. Baibel i tok, em i “gat asua bilong kilim i dai ol profet na ol manmeri bilong en. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” Olsem na Baibel i tok: “Yupela ol manmeri bilong mi, yupela i mas lusim dispela ples na i kam ausait.”​—KTH 17:6; 18:​2, 4, 24.

23. Bilong lusim Bikpela Babilon man i mas mekim wanem?

²³ Bilong lusim Bikpela Babilon ol man i mas rausim nem bilong ol long ol buk bilong ol, na ol i mas mekim sampela samting moa. Ol i mas nolaik tru long ol pasin nogut ol lotu giaman i save orait long en na i sapotim​—olsem pasin pamuk, insait long wok politik, na pasin bilong mangal long kisim planti mani kago. (Song 97:10; KTH 18:​7, 9, 11-17) Planti taim ol dispela pasin i save kirapim ol man long kilim i dai ol arapela!

24, 25. Wanem samting i stap olsem as na God i ken marimari long man i gat asua long blut na i tanim bel? Long taim bilong ol man i bin raitim Baibel, wanem samting i makim dispela?

²⁴ Paslain long yumi kam insait long lotu i tru, yumi olgeta i bin sapotim graun bilong Satan long sampela kain rot, olsem na yumi bin kisim asua long blut. Tasol yumi bin senisim pasin bilong yumi, na bilip long ofa bilong Krais long baim bek ol man, na dediketim laip bilong yumi long God, olsem na God i marimari long yumi na i lukautim yumi long ol samting bilong spirit. (Aposel 3:19) Long taim bilong ol man i bin raitim Baibel, ol taun bilong hait i makim dispela pasin bilong God long marimari na lukautim yumi.​—Namba 35:​11-15; Lo 21:​1-9.

²⁵ Wanem wok bilong ol dispela taun bilong hait? Sapos wanpela man Israel i popaia na kilim i dai narapela man, em i mas ranawe i go long wanpela bilong ol dispela taun bilong hait. Taim ol jas i skelim pinis samting i bin kamap, orait dispela man husat i bin popaia na kilim i dai narapela em i mas i stap long taun bilong hait i go inap long hetpris i dai. Bihain long dispela em i fri long i go i stap long narapela hap. Dispela i kamapim klia pasin marimari bilong God na pasin bilong em long tingim tru laip bilong man! Ol dispela taun bilong hait bilong bipo i makim samting God i putim long nau em ofa bilong Krais long baim bek ol man i as bilong en. Dispela samting i bilong lukautim yumi na bai yumi no i dai sapos yumi popaia na brukim lo bilong God long ol samting bilong laip na blut. Olsem wanem? Yu save tingim tru dispela samting? Olsem wanem yu ken soim olsem yu save mekim olsem? Wanpela rot em yu ken singautim ol man long kam long ples em ol taun bilong hait i makim, na mekim moa yet long dispela taim we “bikpela hevi tru” i wok long i kam klostu.​—Matyu 24:21; 2 Korin 6:​1, 2.

26-28. Olsem wanem i stap bilong yumi i wankain olsem bilong profet Esekiel? Olsem wanem yumi ken stap insait yet long pasin laikim bilong God?

²⁶ I stap bilong lain bilong God long nau i kirapim yumi long tingim profet Esekiel, em Jehova i bin givim wok long em long stap olsem wasman bilong lain Israel. God i tok: “Taim mi gat strongpela tok bilong autim long ol, orait bai mi givim yu na yu mas autim long ol.” Sapos Esekiel i no mekim wok bilong em, em bai i gat asua long blut bilong ol man i dai taim Jerusalem i kisim kot bilong en. (Esekiel 33:​7-9) Tasol Esekiel i bin bihainim tok na em i no kisim asua long blut.

²⁷ Klostu nau graun olgeta bilong Satan bai bagarap. Olsem na long tingting bilong ol Witnes Bilong Jehova, wok bilong autim tok long Kingdom na long de bilong God long “mekim save long ol birua,” dispela i olsem wanpela wok ol i mas mekim na ol i amamas long mekim. (Aisaia 61:2; Matyu 24:14) Olsem wanem? Yu save givim bel long mekim dispela bikpela wok? Aposel Pol i tingim wok bilong em long autim tok i olsem bikpela samting tru. Olsem na em inap tok: “Sapos wanpela namel long yupela em i lus, dispela em i no asua bilong mi, long wanem, mi no bin surik long autim olgeta tingting bilong God long yupela.” (Aposel 20:​26, 27) Em i stap gutpela piksa long yumi ken bihainim!

²⁸ Bilong stap insait yet long pasin laikim bilong Jehova, yumi mas tingim laip na blut olsem Jehova i save tingim, tasol yumi mas mekim sampela samting moa. Yumi mas i stap klin, olsem holi, long ai bilong em olsem yumi bai lukim long sapta i kamap bihain long dispela.