Mekim Ol Ofa Jehova i Amamas Long En

WANPELA taim long bipo, ol man inap lukim narapela kain samting tru i stap long ples bilong go insait long gaden Iden long hap bilong is.a Long dispela ples i gat ol strongpela ensel i sanap na was i stap. Ol i samting bilong pret long en, na ol man inap save gut olsem i tambu tru long go insait. Na narapela samting bilong pret long en, em wanpela bainat i gat paia i lait long en na i save tanim tanim long olgeta hap, na long nait ating lait bilong en i holim ol diwai na sapos man i lukim em bai pret. (Stat 3:​24) Tru, ating ol man i kirap nogut long dispela samting, tasol sapos wanpela i laik lukim, em bai sanap longwe.

Yumi ken ting olsem Kein wantaim Abel i bin go lukim dispela ples planti taim. Adam na Iv i bin kamapim tupela taim ol i stap ausait long dispela gaden, olsem na tupela i no save, Adam na Iv i gat wanem kain sindaun long Paradais bipo, i gat ol gutpela wara long en na grinpela gras na diwai samting na planti kaikai. Liklik hap bilong Iden nau ol inap lukim, ating bus i kamap pinis long en na i no gat gaden moa.

Yumi save, Adam na Iv i stori pinis long ol pikinini bilong tupela olsem i gat wanem as na nau i no gat man i lukautim dispela gaden, na i gat wanem as na God i bin rausim tupela long en. (Stat 2:​17; 3:​6, 23) Ating Kein na Abel i bel hevi stret long dispela samting! Ol inap lukim gaden, tasol ol i no inap i go insait long en. Ol i stap klostu tru long Paradais, tasol i olsem ol i stap longwe tru long en. Sin i stap pinis long skin bilong ol, na i no gat wanpela samting em Kein o Abel inap mekim bilong stretim dispela samting.

Na yumi ken save, papamama bilong tupela i no pas gut wantaim, na dispela tu inap givim hevi long tupela. Taim God i kolim strafe bilong Iv, em i tok: “Bai yu gat bikpela laik yet long man bilong yu, na bai em i bosim yu.” (Stat 3:​16) Olsem dispela tok profet i tok, ating nau Adam i mekim hatpela pasin na bosim strong meri bilong em na i no mekim pasin long em olsem wanpela poroman na helpim bilong em olsem pastaim em i bin mekim. Na i olsem Iv i strong tumas long wetim dispela man i helpim em long ol samting. Wanpela buk i stori long dispela pasin bilong Iv na i tok, dispela “bikpela laik” bilong Iv long man bilong em i strong tumas na ‘i olsem wanpela sik nogut’ i stap long skin bilong em.

Dispela pasin i stap namel long tupela marit, em i pasim rot bilong tupela manki long givim biknem long papamama o nogat, em Baibel i no tok. Tasol yumi save, Adam na Iv i no stap olsem gutpela piksa bilong ol pikinini bilong tupela.

Ol i Bihainim Narapela Narapela Rot

Bihain Abel i kamap man bilong lukautim ol sipsip, na Kein i kamap man bilong wokim gaden. (Stat 4:⁠2) Taim Abel i wok long lukautim ol sipsip, ating em i gat bikpela hap taim bilong tingim dispela narapela kain tok profet God i bin mekim taim em i laik rausim papamama bilong Abel long Iden: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:​15) Ating Abel i tingting, ‘Tok promis bilong God long wanpela pikinini em bai bagarapim snek, em bai kamap olsem wanem, na snek bai krungutim lek bilong dispela pikinini olsem wanem?’

Sampela yia bihain, ating taim tupela i bikpela man pinis, Kein na Abel i mekim ofa long Jehova. Abel em i man bilong lukautim sipsip, olsem na em i kisim “namba wan pikinini sipsip mama i bin karim,” na em i mekim ofa long Jehova. Tasol Kein i “kamautim kaikai long gaden na em i bringim sampela na i mekim ofa.” Jehova i amamas long ofa bilong Abel, tasol “em i no amamas long Kein na ofa bilong em.” (Stat 4:​3-5) Bilong wanem?

Sampela man i save tok, God i amamas long ofa bilong Abel, long wanem, em i kisim “namba wan sipsip mama i bin karim” na em i mekim ofa long en, tasol Kein i kisim “kaikai long gaden” na mekim ofa long en. Tasol i no olsem ol kaikai bilong gaden em Kein i ofaim i no gutpela, nogat; long wanem, Baibel i tok Jehova i amamas “long Abel na ofa bilong em,” tasol “em i no amamas long Kein na ofa bilong em.” Olsem na Jehova i skelim bel bilong dispela tupela man i lotuim em. Taim em i mekim olsem, em i lukim wanem samting? Hibru 11:4 i tok, Abel “i bilip long God” na i mekim ofa long em. Olsem na ating Kein i no gat strongpela bilip olsem Abel, em dispela bilip i mekim na God i amamas long ofa bilong Abel.

Na i gat narapela samting bilong ol dispela ofa yumi mas tingim: Ofa bilong Abel i gat blut long en na em i kapsaitim blut bilong dispela ofa. Ating em i bin kisim stretpela tingting olsem, bilong God i ken truim tok promis bilong em long wanpela pikinini em Satan bai krungutim lek bilong en, wanpela samting i gat laip i mas i dai olsem ofa. Olsem na taim Abel i kilim sipsip na mekim ofa long en, i olsem em i singaut long God i ken lusim sin bilong em long rot bilong dispela ofa, na dispela i kamapim bilip bilong Abel olsem bihain bai God i givim wanpela ofa bilong tekewe sin bilong ol man.

Tasol yumi ken ting olsem Kein i no tingting tumas long ofa em i mekim. Inap wan handet yia samting bipo, wanpela saveman bilong Baibel i tok: ‘Ofa bilong em i tokaut tasol olsem God em i Man bilong givim ol gutpela samting long ol man. Ofa em i mekim i kamapim klia olsem em i no ting em i stap longwe long God, o em i mas kamapim sin bilong em long God, o i mas i gat wanpela ofa bilong helpim em.’

Na tu, Kein em i namba wan pikinini, olsem na em inap ting olsem em yet i dispela pikinini God i tok promis long en na em bai bagarapim Snek, em Satan. Iv tu inap ting olsem long namba wan pikinini bilong em. (Stat 4:⁠1) Tasol sapos Kein na Iv i gat dispela kain tingting, ol i popaia stret.

Jehova i bin mekim wanem bilong makim olsem em i amamas long ofa bilong Abel, Baibel i no tok. Sampela saveman bilong Baibel i ting paia i kam daun long heven na kukim dispela ofa. Dispela samting i kamap o nogat, em yumi no save, tasol taim Kein i save God i sakim ofa bilong em, “Kein i kros nogut tru, na pes bilong en i senis olgeta.” (Stat 4:⁠5) Em nau, Kein i stap long rot bilong bagarap.

Tok Bilong Jehova na Samting Kein i Mekim

Jehova i tokim gut Kein olsem: “Watpo yu kros? Na watpo pes bilong yu i senis olgeta?” Dispela i givim rot long Kein na bai em i ken skelim bel na tingting bilong em. Jehova i tok moa olsem: “Sapos yu mekim gutpela pasin, orait bai yu amamas, long wanem, mi orait long ofa bilong yu. Tasol sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.”​—⁠Stat 4:​6, 7. (Lukim blok long pes 23.)

Kein i no harim dispela tok. Em i kisim Abel i go wokabaut long ples kunai na kilim em i dai. Bihain Jehova i askim Kein olsem Abel i stap we, na Kein i tok giaman long em na mekim sin bilong em i go bikpela moa. Em i tok: “Mi no save. Olsem wanem? Yu ting mi stap tasol bilong lukautim brata bilong mi?”​—⁠Stat 4:​8, 9.

Taim em i no bagarapim yet Abel, na bihain long en tu, Kein i no baut na “mekim gutpela pasin.” Long laik bilong em yet em i larim sin i winim em, olsem na Jehova i rausim em i go na em i mas lusim dispela hap ol man i sindaun long en. Jehova i putim wanpela “mak” long em, ating em i olsem wanpela tambu, na bai ol man i no ken kilim em i dai bilong bekim pasin birua em i bin mekim long Abel.​—⁠Stat 4:​15.

Bihain Kein i wokim wanpela taun na i givim nem bilong pikinini bilong em long dispela taun. Ol tumbuna pikinini bilong Kein i gat nem olsem man bilong pait na bagarapim man. Bihain olgeta lain bilong Kein i bagarap taim Bikpela Tait i kamap long taim bilong Noa na i pinisim olgeta man i bihainim pasin i no stret.​—⁠Stat 4:​17-​24; 7:​21-​24.

Ol i no bin raitim stori bilong Kein na Abel long Baibel bambai yumi ken amamas nating long kaunim, nogat. Ol i bin “raitim bilong skulim yumi,” na “em i gutpela samting tru bilong skulim yumi long tok tru na bilong stretim ol manmeri tingting bilong ol i no stret.” (Rom 15:4; 2 Timoti 3:​16) Dispela stori inap skulim yumi long wanem samting?

Samting Em i Skulim Yumi Long En

Olsem Kein na Abel, God i singautim ol Kristen long nau long mekim ofa long em​—⁠i no wanpela ofa tru em paia i kukim, nogat​—⁠yumi mas “givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 13:15) Long nau ol Witnes Bilong Jehova i mekim dispela samting long olgeta hap bilong graun taim ol i wok long autim gutnius bilong Kingdom bilong God long 230 kantri. (Matyu 24:14) Yu insait long dispela wok? Sapos olsem, orait yu ken bilip tru olsem “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God.”​—⁠Hibru 6:​10.

Olsem ofa bilong Kein na Abel, God i no lukim ofa bilong yu long ai tasol na em i skelim​—⁠olsem hamas aua yu lusim long wok bilong autim tok. Jeremaia 17:10 i tok, Jehova i save “glasim tingting na bel” bilong yumi na em i save “skelim pasin bilong olgeta wan wan”​—⁠em olgeta tingting na laik i stap insait tru long bel bilong ol na i save kirapim ol long mekim ol samting. Olsem na ol tingting na laik i save kirapim man long mekim wok bilong Jehova, dispela em i bikpela samting; Jehova i no save skelim yumi long hamas aua yumi save lusim long dispela wok. Maski yumi givim bikpela ofa o liklik ofa long God, dispela ofa i gutpela samting tru long em sapos yumi laikim em tru long bel bilong yumi na dispela i kirapim yumi long givim ofa long em.​—⁠Skelim Mak 12:​41-​44 wantaim 14:​3-9.

Tasol yumi mas save tu olsem Jehova i no ken amamas long ol ofa nogut i kain olsem sipsip i gat sik o lek i bruk, olsem em i no bin amamas long ofa bilong Kein, long wanem, em i no bin givim bel tru long mekim ofa. (Malakai 1:​8, 13) Jehova i strong long yu mas givim nambawan gutpela samting bilong yu long em, olsem yu mas givim bel bilong yu olgeta, na tingting bilong yu olgeta, na strong bilong yu olgeta long mekim wok bilong em. (Mak 12:30) Yu mekim olsem? Sapos olsem, orait yu ken amamas long ofa yu givim long em. Pol i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”​—⁠Galesia 6:⁠4.

Papamama i bin mekim bikpela long Kein na Abel long wankain pasin. Tasol insait long taim tupela i wok long go bikpela na i gat ol samting i painim ol, i gat rot long tupela wan wan long kisim ol pasin bilong ol yet. Ol samting nogut i wok long kamap long tingting bilong Kein, olsem bel nogut, kros, na belhat.

Tasol Abel i narapela kain. God i tingim em i stretpela man. (Matyu 23:35) Em i strong long mekim pasin God i laikim, maski wanem samting i painim em, na dispela i mekim na em i narapela kain long famili bilong em, em Adam, Iv, na Kein, ol i no tenkyu liklik long God. Baibel i tok, maski Abel i dai, i olsem em i “autim tok yet.” Stori bilong em long i stap gut long wok bilong God, em i stap long Baibel wantaim stori bilong ol narapela samting i bin kamap bipo, em ol bai stap oltaim long Baibel. Yumi mas bihainim pasin bilong Abel na oltaim yumi givim ol ofa long God em i save amamas long en.​—⁠Hibru 11:⁠4.

[Futnot]

[Blok/Piksa long pes 23]

Gutpela Piksa Bilong Ol Kristen i Gat Wok Long Stretim Man

“WATPO yu kros? Na watpo pes bilong yu i senis olgeta?” Long gutpela pasin isi Jehova i givim dispela askim long Kein bilong toktok gut wantaim em. Em i no subim Kein long senisim pasin bilong em, long wanem, Kein i stap fri long tingim ol samting em yet i laik mekim. (Skelim wantaim Lo 30:19.) Tasol Jehova i no surik long tokim Kein long samting bai painim em long dispela pasin bikhet em i bihainim. Em i givim tok lukaut long Kein olsem: “Sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.”​—⁠Stat 4:​6, 7.

Tasol maski Jehova i givim dispela strongpela tok long Kein, em i no mekim long Kein olsem i no inap long wanpela man i ken helpim em. Em i tokim Kein long ol gutpela samting i wetim em sapos em i senisim pasin bilong em, na em i tok Kein inap senisim pasin bilong em sapos em i laik mekim olsem. Jehova i tokim em: “Sapos yu mekim gutpela pasin, orait bai yu amamas, long wanem, mi orait long ofa bilong yu.” Na em i tokim Kein long dispela bikpela kros i stap long bel bilong em: “Yu mas strong na winim em.”

Long nau ol elda long kongrigesen Kristen ol i mas bihainim pasin bilong Jehova. Olsem 2 Timoti 4:2 i tok, sampela taim ol i mas givim “strongpela tok” long ol Kristen i bihainim pasin i no stret, na ol i mas tokaut stret long ol samting nogut bai painim ol long dispela rot ol i bihainim. Tasol ol elda i mas givim tok long ol “bilong kirapim ol long tanim bel.” Wanpela tok Grik, pa·ra·ka·leʹo, insait bilong en i olsem “strongim” man. Wanpela buk (Theological Dictionary of the New Testament) i tok: ‘Dispela tok bilong stretim man i no olsem tok i save sutim bel bilong man, o tok pait, o skelim skelim man bilong painim sampela rong long em, long wanem, narapela insait bilong dispela tok Grik i olsem mekim gut bel bilong man.’

I gat narapela tok Grik olsem, em pa·raʹkle·tos, na em inap makim wanpela man i gat wok long helpim narapela, o wanpela man i helpim narapela long kot. Olsem na taim ol elda i givim strongpela tok long man bilong stretim em, long dispela taim tu ol i mas tingting olsem ol i man bilong helpim dispela man ol i gat wok long stretim em​—⁠ol i no birua bilong em. Olsem Jehova i mekim, tok bilong ol elda i mas soim olsem ol i bilip olsem dispela man ol i givim tok long em, em inap stretim pasin bilong em.​—⁠Skelim wantaim Galesia 6:⁠1.

Tasol taim ol elda i givim tok long man bilong stretim em, em wok bilong dispela man yet long bihainim tok ol i bin givim long em. (Galesia 6:5; Filipai 2:​12) Ating ol elda bai lukim olsem sampela man i no harim ol tok lukaut bilong ol, olsem Kein i bin givim baksait long tok bilong Bikpela Man i bin wokim em. Tasol taim ol elda i bihainim pasin bilong Jehova, em nambawan Piksa bilong ol Kristen i gat wok long stretim man, ol inap save tru olsem ol i bin mekim ol samting ol i mas mekim.