Pasin Bilong Namba Wan Man na Meri Inap Skulim Yumi
GOD i bin lukluk long graun bilong yumi. Em i wok long redim bilong ol man i ken i stap long en. Em i lukim olsem olgeta samting em i wok long mekim i gutpela. Na taim em i pinisim dispela wok em i tok olsem olgeta dispela samting “i gutpela.” (Stat 1:12, 18, 21, 25, 31) Tasol paslain long em i mekim dispela gutpela tok, God i bin toktok long wanpela samting em “i no gutpela.” Tasol dispela i no makim olsem God i wokim wanpela samting em i no gutpela tumas, nogat. Em i tok olsem, long wanem, wok bilong em long wokim ol samting i no pinis yet. Jehova i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.”—Stat 2:18.
Em laik bilong Jehova olsem ol man bai stap oltaim long graun na no gat sik, na ol i stap amamas, na ol i gat planti gutpela samting. Adam em i papa bilong olgeta man long graun. Meri bilong em, Iv, em i kamap “tumbuna mama bilong olgeta manmeri.” (Stat 3:20) Maski long nau graun i pulap long planti bilion tumbuna pikinini bilong tupela, i stap bilong ol dispela manmeri i no gutpela.
Planti man i save long stori bilong Adam na Iv. Tasol olsem wanem dispela stori inap helpim yumi? Ol samting i bin painim namba wan man na meri em inap skulim yumi long wanem samting?
“God i Mekim Ol i Kamap Man na Meri”
Taim Adam i wok long givim nem long ol animal, em i lukim olsem ol i gat poroman na em yet i no gat poroman. Olsem na taim em i lukim dispela naispela samting Jehova i bin wokim long wanpela bun long banis bilong em, em i amamas tru. Taim Adam i lukim olsem em i wanpela hap tru bilong bodi bilong em, em i tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi. God i wokim em long bun bilong mi, olsem na bai mi kolim em ‘meri.’ ”—Stat 2:18-23.
Man i mas i gat “wanpela poroman bilong helpim em.” Nau em i gat wanpela poroman i stret tru long em. Iv em inap tru long helpim Adam—long lukautim ples gaden bilong ol na ol animal, long kamapim pikinini, na long kamapim ol gutpela tingting bilong strongim poroman bilong em.—Stat 1:26-30.
Jehova i givim olgeta samting tupela i laikim. Taim em i kisim Iv i go long man bilong em na tokaut long tupela bai i stap wantaim, em i kamapim marit na pasin bilong sindaun olsem famili famili, em pasin ol man i mas bihainim bilong i stap gut wantaim. Stori long Buk Stat i tok: “Man i save lusim papamama na i pas wantaim meri bilong en, na tupela i kamap wanpela bodi tasol.” Na taim Jehova i blesim namba wan man na meri marit na tokim tupela long kamap planti, em i kamapim klia olsem em i laik bai olgeta pikinini i mas kamap insait long wanpela famili i gat pasin sori, na i gat papa na mama bilong lukautim ol.—Stat 1:28; 2:24.
“Olsem God Yet”
Adam i bin kamap olsem wanpela pikinini bilong God i gutpela olgeta, em God i wokim em i kamap ‘olsem em yet.’ Tasol “God em i Spirit,” olsem na ol i no wankain long skin. (Stat 1:26; Jon 4:24) Ol i wankain long ol pasin, na dispela i mekim na ol man i winim tru ol animal. Tru tumas, kirap long taim God i wokim man long namba wan taim, em i bin putim pasin sori, gutpela tingting, strong, na stretpela pasin long bel bilong man. Em yet inap long tingim wanem pasin em i laik bihainim na em inap long tingim ol samting bilong spirit. Maus bilong bel i stap pinis long skin bilong em long taim mama i karim em, na dispela i save helpim em long skelim wanem pasin i stret na wanem pasin i no stret. Man inap long tingim ol samting, na dispela i save helpim em long tingim as bilong i stap bilong ol man, na em inap kisim save long Man i bin wokim em, na kisim pasin bilong pas gut wantaim dispela Man. Olsem na Adam i gat olgeta samting em i mas kisim bilong helpim em long inapim wok bilong em olsem man i bosim ol samting God i bin wokim long graun.
Iv i Mekim Rong
I stret yumi ken ting olsem kwiktaim Adam i bin toksave long Iv long wanpela samting Jehova i tambuim ol long en: Tupela i ken kaikai pikinini bilong olgeta diwai long ples gaden bilong tupela, tasol tupela i no ken kaikai pikinini bilong wanpela diwai—em dispela diwai bilong givim save long wanem samting i gutpela na wanem samting i nogut. Tupela i no ken kaikai pikinini bilong dispela diwai. Sapos ol i kaikai, wantu bai ol i dai.—Stat 2:16, 17.
I no longtaim na wanpela bikpela tok i kamap long dispela diwai tambu. Wanpela spirit em yumi no inap lukim, em i mekim wok long wanpela snek olsem maus bilong em na em i toktok long Iv. Em i mekim olsem em i no save long wanpela samting na em i askim meri: “Ating God i tambuim yutupela long kaikai pikinini bilong olgeta diwai bilong gaden, a?” Iv i bekim tok olsem tupela i ken kaikai pikinini bilong olgeta diwai bilong gaden, pikinini bilong wanpela diwai tasol tupela i no ken kaikai long en. Tasol nau snek i daunim tok bilong God, na em i tokim meri: “Nogat. Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.” Orait nau meri i kisim tupela tingting long dispela diwai tambu. “Dispela diwai i naispela tru na i gat ol gutpela pikinini tru bilong kaikai i stap long en.” Iv i bilipim tok giaman bilong snek, na em i brukim lo bilong God.—Stat 3:1-6; 1 Timoti 2:14.
Yu ting Iv i mas mekim dispela sin? Nogat tru! Tingim olsem samting i painim Iv i bin painim yu. Tok bilong snek i paulim tru tok God na Adam i mekim. Bai yu pilim olsem wanem sapos wanpela man yu no save long em na em i sutim tok giaman long wanpela man yu save laikim tru na yu bilip long em? Iv inap kamapim olsem em i nolaik tru na i kros long tok bilong Satan, na em i no laik harim dispela tok. Na tu, em i no stret dispela snek i sutim tok long stretpela pasin bilong God na daunim tok bilong man bilong em, a? Sapos em i daun long wok bos bilong man bilong em, em bai askim em long givim sampela gutpela tok long em paslain long em i mekim wanpela samting. Yumi tu i mas mekim olsem sapos sampela i kamapim wanpela tok i no stret wantaim ol lo God i tok yumi mas bihainim. Tasol Iv i bilipim tok bilong dispela man i traim em, na em yet i laik skelim wanem samting i gutpela na wanem samting i nogut. Taim em i wok long tingim tingim dispela samting, nau dispela i kirapim tru bel bilong em. Em i mekim bikpela rong tru taim em i larim tingting bilong em i pas long wanpela laik nogut—em i mas rausim dispela tingting o toktok wantaim het bilong famili long dispela samting!—1 Korin 11:3; Jems 1:14, 15.
Adam i Harim Tok Bilong Meri Bilong Em
I no longtaim na Iv i pulim Adam long mekim sin. Bai yumi stori olsem wanem long pasin em i mekim long kirap wantu tasol long bihainim tok bilong Iv? (Stat 3:6, 17) Adam i mas skelim olsem em bai bihainim tok bilong husat. Em bai bihainim tok bilong Man i bin wokim em na givim em olgeta samting, na givim em tu dispela poroman em i save laikim tru, em Iv? O bai em i askim God long tokim em long wanem samting em i mas mekim nau? O bai em i bihainim tok bilong meri bilong em? Adam i save olsem dispela samting Iv i tingting long kisim sapos em i kaikai pikinini bilong dispela diwai, em bai i no inap long kisim. Spirit holi i givim tingting long aposel Pol long raitim tok olsem: “Adam i no bilipim tok giaman. Nogat. Meri i bilipim tok giaman, na em i mekim sin.” (1 Timoti 2:14) Olsem na long laik bilong em yet, Adam i bikhet na sakim Jehova. Em i pret, nogut em i mas lusim meri bilong em, na dispela tingting i winim bilip bilong em olsem God em inap long stretim dispela hevi.
Pasin bilong Adam i kilim em yet i dai. Na long dispela pasin em i kilim i dai olgeta pikinini bilong em, em Jehova i bin marimari na larim em i kamapim, long wanem, olgeta i kamap bihain long taim em i mekim sin pinis. (Rom 5:12) Man! Pasin bilong sakim tok i kamapim bikpela hevi tru!
Pe Bilong Sin
Namba wan samting i kamap taim tupela i mekim sin em tupela i sem. Ol i no ran i go bilong toktok long Jehova, nogat; nau tupela i hait. (Stat 3:8) Pasin pren bilong tupela wantaim God i bagarap. Taim God i askim tupela long wanem samting ol i bin mekim, ol i no kamapim olsem ol i hevi long rong ol i mekim, maski tupela i save olsem ol i bin brukim lo bilong God. Taim tupela i kaikai pikinini bilong dispela diwai tambu, tupela i sakim ol gutpela samting God i bin mekim long ol.
Long dispela as, God i tokaut olsem meri bai kisim bikpela pen moa long taim bilong karim pikinini. Iv bai laikim yet man bilong em, na em bai i bosim Iv. Olsem na dispela tingting bilong em long kamap bos bilong em yet i no helpim em, nogat; dispela i givim hevi long em. Nau Adam i mas wok hat tru bilong kisim kaikai long graun. Long Iden, i no hatwok long kisim kaikai, tasol nau em i mas taitim bun tru bilong kisim ol samting bilong i stap laip, i go inap long taim em bai go bek gen long graun God i bin wokim em long en.—Stat 3:16-19.
Bihain, God i rausim Adam na Iv long gaden Iden. Em i tok: “Man i save pinis long wanem samting i gutpela na wanem samting i nogut, na em i kamap wankain olsem yumi. Orait yumi no ken larim em i go klostu long dispela diwai bilong givim laip. Nogut em i kaikai pikinini bilong dispela diwai tu na em i stap oltaim.” Saveman Gordon Wenham i tok: ‘Long tok Hibru, dispela tok God i mekim i no pinis,’ na yumi yet i mas pinisim—ating em i tok: “mi mas rausim em long dispela gaden.” Ol man bilong raitim Baibel ol i save kamapim tingting olgeta bilong God. Tasol long hia, Wenham i tok, “tok i no gat pinis bilong en na dispela i makim olsem kwiktaim God i kirap mekim ol samting. Em i no pinisim yet tok bilong em na em i rausim ol long gaden.” (Stat 3:22, 23) Kirap long dispela taim, Jehova i no toktok moa wantaim namba wan man na meri.
Long skin Adam na Iv i no dai insait long dispela de bilong 24 aua stret, nogat. Tasol tupela i dai long ol samting bilong spirit. Nau tupela i stap longwe long As bilong laip, na isi isi tupela i wok long i dai. Tingim bel hevi bilong tupela taim ol i lukim namba wan dai i kamap taim namba wan pikinini man bilong tupela, Ken, em i kilim i dai namba tu pikinini man, em Abel!—Stat 4:1-16.
Bihain long dispela taim, Baibel i no mekim planti stori long namba wan man na meri. Namba tri pikinini man bilong tupela, Set, em i kamap taim Adam i gat 130 krismas. Adam i dai 800 yia bihain taim em i gat 930 krismas, na em i gat “ol pikinini man na pikinini meri.”—Stat 4:25; 5:3-5.
Samting Bilong Lainim Yumi
Samting i painim tupela i kamapim as bilong ol hevi bilong ol man long nau, na tu, em i skulim yumi long wanpela bikpela samting. Yumi mekim pasin kranki tru sapos yumi no laik stap aninit long God Jehova. Ol man i gat gutpela tingting ol i save bilip long Jehova na long Tok bilong em, na ol i no bilip long save bilong ol yet. Jehova i save skelim wanem samting i gutpela na wanem samting i nogut, na bilong mekim stretpela pasin yumi mas bihainim tok bilong em. Pasin bilong mekim rong em olsem: Yumi kalapim na sakim ol lo bilong God.
Long bipo, God i bin givim olgeta gutpela gutpela samting em ol man i laikim, na long nau tu em i laik givim ol dispela samting long yumi—em laip oltaim, stap fri, amamas, gutpela skin, bel isi, planti gutpela samting, na kisim save long ol nupela nupela samting. Tasol sapos yumi laik kisim olgeta dispela samting, orait long nau yumi mas kamapim long ples klia olsem yumi stap daun tru long Papa bilong yumi long heven, em Jehova.—Saveman 3:10-13; Aisaia 55:6-13.
[Blok/Piksa long pes 26]
Adam na Iv—Yu Ting Em Stori Nating Tasol?
Ol Babilon, na Asiria, na Isip, na ol narapela lain bilong bipo, ol i bilip olsem sin i bin mekim na Paradais bilong pastaim i lus. Planti stori i toktok long wanpela diwai bilong givim laip, na sapos man i kaikai pikinini bilong en, em bai stap laip oltaim. Olsem na ol man i tingim yet olsem wanpela samting nogut i bin kamap long Iden.
Long nau, planti man i tok dispela stori bilong Adam na Iv em i wanpela stori nating. Tasol planti saientis i tokaut olsem olgeta lain man i olsem wanpela famili na ol i bin kamap long wanpela tumbuna tasol. Planti tisa bilong lotu ol i no inap sakim dispela tok olsem sin bilong pastaim tru em wanpela tumbuna bilong yumi i bin mekim, ol hevi bilong en i kamap long olgeta manmeri. Bilip bilong sampela man olsem ol man i kamap long narapela narapela tumbuna bai kirapim ol long tok olsem olgeta dispela wan wan tumbuna i bin mekim dispela sin bilong pastaim tru. Na dispela bai kirapim ol long sakim tok olsem Krais, em “narapela Adam i kamap bihain tru,” em i baim bek ol man. Tasol Jisas wantaim ol disaipel bilong em ol i no kisim ol kain tingting kranki olsem. Ol i save olsem stori bilong Adam na Iv long Buk Stat em i tru.—1 Korin 15:22, 45; Stat 1:27; 2:24; Matyu 19:4, 5; Rom 5:12-19.