Pe Bilong Baim Bek Ol Man​—Nambawan Gutpela Presen God I Givim

1, 2. (a) Wanem kain presen i gutpela tru long yu yet? (b) Bilong wanem pe bilong baim bek ol man em i nambawan gutpela presen God i givim?

WANEM samting i nambawan gutpela presen yu bin kisim? I no olsem man i mas tromoi bikpela mani na bai yu ting em i gutpela presen. Nogat. Taim presen i mekim yu i amamas o inapim yu long samting yu sot long en, yu tenkyu long dispela.

² Long olgeta presen God i bin givim yumi, i gat wanpela i winim tru olgeta narapela. Em nambawan presen God i bin givim ol man. Long dispela sapta, yumi bai kisim save olsem Jehova i bin salim Pikinini bilong em, Jisas Krais, i kam. Jisas i givim laip bilong em olsem pe bilong baim bek ol man na bai ol i ken i stap oltaim. (Ritim Matyu 20:28.) Jehova i kamapim klia olsem em i laikim yumi taim em i salim Jisas i kam long graun olsem pe bilong baim bek ol man.

 3. Bilong wanem ol man i save dai?

³ Pe bilong baim bek ol man em i rot bilong Jehova long kisim bek ol manmeri long sin na dai. (Efesus 1:7) Bilong kliagut long wai na i mas i gat pe bilong baim bek man, yumi mas tingim ol samting i kamap long gaden Iden planti tausen yia bipo. Namba wan papamama bilong yumi, Adam na Iv, i bin mekim sin, olsem na tupela i bin i dai. Yumi tu i save dai, long wanem, yumi kisim sin long Adam na Iv.—Lukim Futnot long pes 210.

 4. Adam em i husat? Na em i gat wanem kain bodi?

⁴ Taim Jehova i wokim namba wan man, Adam, Em i givim wanpela gutpela samting tru long em. Em i givim Adam laip i gutpela olgeta. Skin na tingting bilong em i gutpela olgeta. Em bai i no sik, go lapun, o i dai. Jehova i wokim Adam, olsem na Em i papa bilong em. (Luk 3:38) Jehova i save toktok wantaim em. God i tokim Adam long ol samting em i mas mekim na givim gutpela wok long em.—Stat 1:28-30; 2:16, 17.

 5. Wanem mining bilong dispela tok bilong Baibel olsem God i wokim Adam “i kamap olsem em yet”?

⁵ God i wokim Adam “i kamap olsem em yet.” (Stat 1:27) Jehova i putim ol pasin bilong em yet long Adam, olsem pasin laikim, savetingting, stretpela pasin, na strong. Em i larim Adam i stap fri long makim rot em i laik bihainim. Adam i no olsem wanpela robot. God i wokim em bai em inap makim wanem samting i stret na wanem samting i no stret. Sapos em i bin makim rot bilong bihainim tok bilong God, em bai stap oltaim long Paradais long graun.

 6. Taim Adam i sakim tok bilong God, em i lusim wanem samting? Dispela i mekim wanem long yumi?

⁶ Taim Adam i sakim tok bilong God na God i tok em i mas i dai, Adam i lusim samting i dia tumas. Em i lusim laip i gutpela olgeta, naispela ples Paradais, na pasin pren bilong em wantaim Jehova. (Stat 3:17-19) Adam na Iv i sakim tok bilong God, olsem na tupela i no gat rot bilong i stap oltaim. Samting Adam i mekim i as na “sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Taim Adam i mekim sin, em i mekim em yet na yumi tu i stap “wokboi” bilong sin na dai. (Rom 7:14) Olsem wanem? I gat rot bilong helpim yumi? Yes, i gat.

7, 8. Pe bilong baim bek ol man em wanem samting?

⁷ Pe bilong baim bek ol man em i wanem samting? Pe bilong baim bek ol man i makim tupela samting. Namba wan, em i pe i opim rot long man i ken kamap fri o em i pe bilong baim bek wanpela samting. Namba tu, em i karamapim o baim pe bilong wanpela samting.

⁸ I no gat wanpela man inap givim pe bilong stretim dispela bikpela hevi em Adam i kamapim taim em i mekim sin na bringim dai i kam long yumi. Tasol Jehova i wokim rot bilong yumi i ken lusim kalabus bilong sin na dai. Orait yumi ken skelim olsem wanem pe bilong baim bek ol man i mekim wok na olsem wanem em inap helpim yumi.

 9. I mas i gat wanem kain pe bilong baim bek ol man?

⁹ I no gat wanpela bilong yumi inap long givim pe bilong baim laip i gutpela olgeta em Adam i bin lusim. Bilong wanem? Long wanem, yumi no gutpela olgeta. (Song 49:7, 8) I mas i gat narapela laip i gutpela olgeta bilong baim bek ol man. Olsem na Baibel i kolim dispela olsem “pe i stret bilong baim bek olgeta man.” (1 Timoti 2:6) I mas i gat pe i wankain long laip em Adam i bin lusim.

10. Olsem wanem Jehova i wokim rot bilong baim bek ol man?

¹⁰ Olsem wanem Jehova i wokim rot bilong baim bek ol man? Jehova i salim Pikinini em i laikim tumas i kam long graun. Dispela Pikinini, Jisas, em i namba 1 samting em i wokim paslain long olgeta arapela samting. (1 Jon 4:9, 10) Jisas i redi long lusim Papa bilong em na ples bilong em long heven. (Filipai 2:7) Jehova i kisim laip bilong Jisas long heven na putim long bel bilong Maria long graun, na Jisas i bon olsem wanpela man i gutpela olgeta na i no gat sin.—Luk 1:35.

11. Olsem wanem wanpela man inap stap olsem pe bilong baim bek ol man?

¹¹ Taim namba wan man, Adam, i sakim tok bilong Jehova, em i lusim laip i gutpela olgeta em olgeta man inap kisim. Olsem wanem? I gat narapela man inap kisim bek olgeta pikinini bilong Adam long i dai? Yes. (Ritim Rom 5:19.) Jisas i no bin mekim sin, em i givim laip bilong em i gutpela olgeta olsem pe bilong baim bek ol man. (1 Korin 15:45) Laip bilong em i gutpela olgeta inap helpim ol pikinini bilong Adam long kisim laip.—1 Korin 15:21, 22.

12. Bilong wanem Jisas i mas karim bikpela pen na hevi?

¹² Baibel i stori long pen na hevi Jisas i karim paslain long em i dai. Ol i wipim em nogut tru, nilim em long diwai pos, na em i karim bikpela pen na dai. (Jon 19:1, 16-18, 30; lukim Futnot long pes 213-214) Bilong wanem Jisas i mas karim bikpela pen? Long wanem Satan i bin sutim tok olsem i no gat wanpela man bai stap gut long God taim bikpela traim i painim em. Jisas i kamapim klia olsem man i gutpela olgeta inap i stap gut long God maski em i karim bikpela pen tru. Tingim Jehova i amamas tru long Jisas!—Provep 27:11.

13. Olsem wanem Jisas i givim pe bilong baim bek ol man?

¹³ Olsem wanem Jisas i givim pe bilong baim bek ol man? Jisas i givim pe bilong laip bilong em long Papa bilong em. Long yia 33 C.E long Nisan 14 long kalenda bilong ol Juda, Jehova i larim ol birua bilong Jisas i kilim em i dai. (Hibru 10:10) Tripela de bihain long Jisas i dai, Jehova i kirapim em bek olsem spirit. Bihain, taim Jisas i go bek long heven long Papa bilong em, em i givim pe bilong laip bilong em i gutpela olgeta long Jehova olsem ofa bilong baim bek ol man. (Hibru 9:24) Jisas i givim ofa bilong baim bek yumi pinis, olsem na rot i op long yumi lusim kalabus bilong sin na dai.—Ritim Rom 3:23, 24.

14, 15. Yumi mas mekim wanem bilong God i ken lusim ol sin bilong yumi?

¹⁴ Dispela nambawan gutpela presen i kam long God i helpim yumi. Yumi ken skelim olsem wanem dispela presen i helpim yumi long nau na long bihain.

¹⁵ Lusim ol rong bilong yumi. I hatwok long mekim pasin i stret long olgeta taim. Yumi olgeta i save popaia, na sampela taim yumi save mekim toktok na pasin i no stret. Olsem wanem God inap lusim ol rong bilong yumi? Yumi mas bel hevi tru long rong yumi mekim na long pasin daun askim Jehova long lusim rong bilong yumi. Taim yumi mekim olsem pinis, yumi ken bilip tru olsem God i lusim ol rong bilong yumi.—Kolosi 1:13, 14; 1 Jon 1:8, 9.

16. Yumi mas mekim wanem na bai maus bilong bel bilong yumi i stap klin?

¹⁶ Yumi ken i gat klinpela maus bilong bel. Sapos maus bilong bel i kotim yumi, bel bai i gat tok, na yumi inap ting i no gat gutpela samting yumi ken wetim na yumi pilim olsem yumi no gutpela. Tasol no ken givap. Sapos yumi askim Jehova long fogivim yumi, yumi ken bilip tru olsem em bai harim beten bilong yumi na fogivim yumi. (Hibru 9:13, 14) Jehova i laik bai yumi tokim em long ol hevi bilong yumi na ol samting i save traim yumi. (Hibru 4:14-16) Long dispela rot, bel bilong yumi bai i no gat tok long ai bilong God.

17. Jisas i dai bilong helpim yumi, olsem na yumi inap kisim wanem ol blesing?

¹⁷ Yumi wet long kisim laip oltaim. “Pe bilong sin em dai, tasol presen God i givim em laip oltaim long rot bilong Krais Jisas, Bikpela bilong yumi.” (Rom 6:23) Jisas i bin dai bilong helpim yumi, olsem na yumi ken i stap oltaim na i gat gutpela helt. (Revelesen 21:3, 4) Tasol yumi mas mekim wanem bilong kisim ol dispela blesing?

18. Olsem wanem yumi save Jehova i laikim yumi?

¹⁸ Tingim yu pilim olsem wanem taim wanpela i givim yu naispela presen? Pe bilong baim bek ol man em i nambawan gutpela presen tru, na yumi mas tenkyu tru long Jehova long en. Jon 3:16 i tok olsem “God i laikim tumas olgeta manmeri bilong graun, olsem na em i givim dispela Pikinini tru bilong em.” Yes, Jehova i laikim yumi tru olsem na em i givim yumi Jisas, dispela gutpela Pikinini bilong em. Na yumi save Jisas i laikim yumi tu, long wanem, em i redi long dai bilong helpim yumi. (Jon 15:13) Dispela ofa i mas kirapim yu long bilip tru olsem Jehova na Jisas i laikim yu tru.—Galesia 2:20.

19, 20. (a) Olsem wanem yu inap kamap pren bilong Jehova? (b) Olsem wanem yu ken kamapim bilip bilong yu long ofa bilong baim bek ol man em Jisas i bin givim?

¹⁹ Yu kisim save pinis long bikpela pasin laikim bilong God, olsem wanem yu inap soim olsem yu tenkyu long dispela ofa? Namba wan samting, yu mas kisim save long Jehova na kamap pren bilong em. (Jon 17:3) Taim yu mekim olsem, pasin bilong yu long laikim em bai go bikpela, yu bai laik long amamasim em, na yu bai kamap pren bilong em. So wok yet long kisim save long Jehova long rot bilong stadi long Baibel.—1 Jon 5:3.

²⁰ Bilip long ofa bilong Jisas. Baibel i tok “man i bilip long Pikinini, em i gat laip i stap oltaim.” (Jon 3:36) Pasin bilong bilip i makim wanem samting? Em i makim olsem yumi mekim ol samting Jisas i skulim yumi long en. (Jon 13:15) Yumi no inap tok tasol olsem yumi bilip long Jisas. Yumi mas mekim sampela samting bilong kamapim bilip bilong yumi. Jems 2:26 i tok: “Bilip i no kamapim ol gutpela wok, dispela bilip i dai pinis.”

21, 22. (a) Bilong wanem yumi mas i go long Memorial bilong tingim i dai bilong Krais long olgeta yia? (b) Sapta 6 na 7 bai skelim wanem samting?

²¹ Go long Memorial bilong tingim i dai bilong Krais. Long nait paslain long Jisas i dai, em i tok yumi mas mekim Memorial bilong tingim i dai bilong em. Yumi save mekim olsem long olgeta yia, na nem bilong dispela bung em Memorial o “Kaikai Bilong Bikpela.” (1 Korin 11:20; Matyu 26:26-28) Jisas i laik bai yumi tingim olsem em i givim laip bilong em i gutpela olgeta olsem ofa bilong baim bek yumi. Em i tok: “Yupela i mas mekim olsem yet bilong tingim mi.” (Ritim Luk 22:19.) Taim yu go long Memorial, yu soim olsem yu tingim dispela pe bilong baim bek ol man na bikpela pasin laikim bilong Jehova na Jisas long yumi.—Lukim Futnot long pes 214.

²² Pe bilong baim bek ol man em wanpela gutpela presen tru. (2 Korin 9:14, 15) Dispela gutpela presen bai helpim planti milion manmeri em ol i dai pinis. Sapta 6 na 7 bai skelim olsem wanem dispela presen bai helpim ol.