“God i Soim Yumi Olsem Em i Laikim Yumi Tru”
“Long dispela pasin bilong en God i soim yumi olsem em i laikim yumi tru. Olsem na yumi wan wan i mas laikim tru ol arapela.”—1 JON 4:11.
LONG Sande, Mas 23, 1997, bihain long taim san i go daun, ating bai i gat bikpela lain moa, winim 13,000,000, ol bai bung long olgeta hap bilong graun long ol Haus Kingdom na ol narapela ples ol Witnes Bilong Jehova i save mekim miting long en. Bilong wanem bikpela lain olsem bai bung? Long wanem, bel bilong ol i pilim tru nambawan bikpela samting God i bin mekim na i kamapim klia olsem em i laikim tru ol man. Krais Jisas i tokaut long dispela gutpela samting tru i makim sori bilong God, em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
2 Taim yumi tingim dispela pasin sori God i bin mekim, yumi mas askim yumi yet olsem: ‘Mi pilim tru dispela samting God i bin mekim? Ol samting mi mekim long i stap bilong mi, em i kamapim klia olsem mi pilim tru dispela samting?’
‘God i As Bilong Pasin Bilong Laikim Ol Arapela’
3 I no narapela kain samting long God long laikim tru ol man, long wanem, “God yet em i as bilong dispela pasin bilong laikim ol arapela.” (1 Jon 4:8) Dispela pasin bilong laikim tru ol narapela, em i nambawan bikpela pasin bilong God. Taim em i bin redim graun bilong ol man i ken i stap long en, em i bin mekim ol maunten i go antap na em i bungim wara na kamapim ol raunwara na solwara, na dispela i kamapim tru strong bilong em. (Stat 1:9, 10) God i bin wokim rot bambai wara i ken kam daun olsem ren na i go antap gen, na em i wokim rot bambai yumi ken kisim win oksijen, na em i wokim ol milion milion liklik binatang yumi no inap lukim long ai, na kain kain sayor samting i save tanim ol marasin bilong graun i kamap kaikai na bai ol man inap kaikai na i stap laip, na em i putim wanpela kain save long skin bilong yumi na em i wok stret wantaim ol aua bilong ol de na mun long dispela graun bilong yumi. Ol dispela wok God i mekim i kamapim gutpela tingting na save bilong em. (Song 104:24; Jeremaia 10:12) Tasol bikpela samting moa yet yumi inap lukim long ol samting God i bin wokim long graun, em pasin bilong em long laikim tru ol man.
4 Maus bilong yumi i save tokim yumi long dispela pasin sori bilong God taim yumi kaikai wanpela gutpela pikinini bilong diwai i mau na i swit, na God i no wokim bilong yumi ken kaikai na i stap laip tasol, nogat; em i wokim bilong yumi ken kisim amamas long kaikai. Na ai bilong yumi tu i lukim ol samting i kamapim klia sori bilong God—yumi lukim ol gutpela gutpela kala long skai taim san i laik go daun, na long nait yumi lukim ol planti planti sta i pulap long skai, na ol kain kain plaua i gat gutpela gutpela kala, na gutpela pilai bilong ol pikinini animal, na pes bilong ol pren i lait taim ol i bungim yumi. Na nus bilong yumi i kirapim yumi long tingim sori bilong God taim yumi pulim win na yumi harim gutpela smel bilong ol plaua. Na yau bilong yumi i pilim sori bilong God taim yumi harim krai bilong wara i kalap, na singsing bilong ol pisin, na nek bilong ol manmeri yumi save laikim tumas ol. Na yumi pilim sori bilong God taim wanpela yumi save laikim tumas em i holimpas yumi. I gat sampela samting em sampela animal inap lukim, o harim, o harim smel bilong en na yumi man i no inap. Tasol God i bin wokim yumi ol man i kamap olsem em yet, olsem na yumi inap pilim sori bilong God, tasol ol animal i no inap.—Stat 1:27.
5 Taim God Jehova i wokim namba wan man na meri, em Adam na Iv, em i putim planti samting i kamapim klia olsem em i laikim ol tru. Em i bin wokim wanpela gaden, olsem wanpela paradais, na em i mekim ol kain kain diwai i kamap long en. Em i putim wanpela wara na dispela i givim wara long ol diwai samting long gaden, na em i putim planti gutpela pisin na animal long en. Em i givim dispela olgeta samting long Adam na Iv olsem ples bilong ol long sindaun long en. (Stat 2:8-10, 19) Jehova i mekim pasin long ol olsem ol pikinini bilong em, na ol i insait long famili bilong em i stap long heven na graun. (Luk 3:38) Papa bilong tupela long heven i givim Iden long tupela olsem piksa bilong kain gutpela ples i mas kamap long olgeta hap, na em i givim wok long tupela long skruim Paradais i go long olgeta hap bilong graun. Ol pikinini bilong tupela i mas inapim olgeta hap bilong graun.—Stat 1:28.
6 Tasol i no longtaim na traim i painim Adam na Iv, olsem tupela bai bihainim tok bilong God na stap gut long em o nogat. Pastaim wanpela na bihain narapela i kamapim klia olsem ol i no pilim gutpela pasin sori God i bin mekim long ol. Samting tupela i mekim i nogut tru. Ol i no inap tok ol i no gat asua! Olsem na tupela i no pas gut moa wantaim God, na em i rausim tupela long famili bilong em, na em i rausim tupela long Iden. Yumi ol manmeri bilong nau i pilim yet ol hevi em sin bilong tupela i bin kamapim. (Stat 2:16, 17; 3:1-6, 16-19, 24; Rom 5:12) Tasol olsem wanem? Dispela samting i bin kamap em i skulim yumi? Yumi yet i mekim wanem long pasin bilong God long laikim tru yumi? Ol samting yumi tingting pinis long mekim long olgeta wan wan de i kamapim klia olsem yumi pilim tru dispela sori bilong God?—1 Jon 5:3.
7 Tasol maski tupela tumbuna bilong yumi bilong pastaim i no pilim liklik ol gutpela samting God i bin mekim bilong helpim tupela, dispela i no pasim God long mekim pasin sori. Em i sori long ol manmeri i no kamap yet—na yumi ol manmeri i stap long nau tu—na em i larim Adam tupela Iv i kamapim ol pikinini na mekim bikpela long ol long taim tupela i no dai yet. (Stat 5:1-5; Matyu 5:44, 45) Sapos em i no bin mekim olsem, i no gat wanpela bilong yumi bai kamap. Na Jehova i mekim narapela samting tu. Isi isi em i wok long kamapim klia laik bilong em, na long dispela rot olgeta pikinini bilong Adam i bilip ol inap wetim gutpela samting i kamap bihain. (Stat 3:15; 22:18; Aisaia 9:6, 7) Na em i wokim rot bambai ol manmeri bilong olgeta lain ol inap kisim bek dispela samting Adam i bin lusim, olsem laip i gutpela olgeta, na ol inap i stap insait long famili bilong God i stap long heven na graun. Bilong mekim olsem, em i givim wanpela pe bilong baim bek ol man.
Bilong Wanem i Mas i Gat Pe Bilong Baim Bek Ol?
8 Tasol olsem wanem? I mas i gat wanpela man bilong graun i olsem pe bilong baim bek ol man? Ating God inap tok, maski Adam na Iv i bikhet long em na ol i mas i dai, tasol olgeta pikinini bilong tupela i bihainim tok bilong em ol inap i stap oltaim. God inap tok olsem, a? Tru, long yumi ol man bilong graun, i olsem dispela tingting i gutpela. Tasol Jehova “i laikim olgeta gutpela pasin na olgeta samting i stret.” (Song 33:5) Taim Adam tupela Iv i mekim sin pinis, bihain long dispela taim tasol ol i kamapim pikinini; olsem na i no gat wanpela bilong ol dispela pikinini i gutpela olgeta. (Song 51:5) Olgeta i bin kisim sin long papamama, na pe bilong sin em dai tasol. Sapos Jehova i no tingim dispela samting, em i no stap olsem gutpela piksa long famili bilong em i stap long heven na graun, a? Em i no inap givim baksait long ol stretpela lo bilong em yet. Em i tingim lo bilong stretpela pasin em i mas bihainim. I no gat as na wanpela man inap sutim tok long pasin bilong God long stretim bikpela tok i bin kamap long dispela taim.—Rom 3:21-23.
9 Orait, olsem wanem God inap wokim rot bilong kisim bek ol pikinini bilong Adam em ol bai kamapim klia olsem ol i laikim em tru na ol i bihainim tok bilong em? Sapos i gat wanpela man i gutpela olgeta na em bai dai olsem wanpela ofa, orait stretpela pasin bai makim olsem dispela laip i gutpela olgeta em inap karamapim sin bilong ol manmeri i bilip long ofa bilong dispela man. Sin bilong wanpela man, em Adam, i as na olgeta man bilong graun ol i sinman, olsem na blut bilong narapela man i gutpela olgeta em inap stretim dispela samting, long wanem, dispela pe em bai wankain stret long samting i bin lus. (1 Timoti 2:5, 6) Tasol God inap painim we wanpela man olsem?
Pe i Bikpela Olsem Wanem?
10 Namel long ol pikinini bilong Adam, i no gat wanpela man inap givim laip bilong em bilong baim bek dispela kain laip Adam i bin lusim. “Yumi save, i no gat wanpela man i ken baim bek em yet . . . Na em i no inap givim [wanpela samting] long God inap long baim laip bilong en. Nogat tru. Long wanem, pe bilong baim bek man, em i antap tumas. Man i no inap baim God bai God i larim em i stap laip oltaim na em i no ken i dai.” (Song 49:7-9) Tasol Jehova i no lusim ol man na bai ol i no gat rot long wetim gutpela samting i kamap bihain, nogat. Em i marimari long ol na em yet i givim wanpela pe bilong baim bek ol.
11 Jehova i no salim wanpela ensel i kam daun long graun na tanim i kamap man na em i giaman long i dai, olsem em i lusim dispela bodi bilong graun na em i stap yet long bodi spirit. Jehova i no mekim olsem. Em i wokim wanpela mirakel em God, Man bilong wokim olgeta samting, em wanpela tasol inap tingim—em i kisim laip na olgeta pasin na tingting samting bilong wanpela pikinini bilong em long heven na em i putim insait long bel bilong wanpela meri, em Maria, pikinini bilong Heli, bilong lain Juda. Strong bilong God, olsem spirit holi bilong em, i lukautim pikinini taim em i go bikpela insait long bel bilong mama, na taim mama i karim em, em i kamap wanpela man i gutpela olgeta. (Luk 1:35; 1 Pita 2:22) Em nau, dispela man i holim pe bilong baim bek ol man, na dispela pe bai inapim tru lo bilong stretpela pasin bilong God.—Hibru 10:5.
12 Jehova i givim dispela wok long wanem pikinini namel long ol milion milion pikinini bilong em long heven? Em i givim long dispela pikinini em Baibel i kolim olsem dispela “wanpela Pikinini tasol” bilong God. (1 Jon 4:9) Dispela tok i makim em taim em i stap yet long heven—i no long taim Maria i karim em olsem wanpela man long graun. Em dispela pikinini Jehova wanpela i bin wokim na i no gat narapela i bin helpim em long mekim. Dispela pikinini i bin kamap paslain long olgeta narapela samting God i bin wokim. God i bin mekim wok long em bilong kamapim olgeta narapela samting i gat laip. Ol ensel ol i pikinini bilong God, na Adam tu em i bin i stap pikinini bilong God. Tasol Baibel i tok, Jisas i gat “bikpela namba na strong bilong em. Em i namba bilong dispela wanpela Pikinini tasol, Papa i salim em i kam.” Na Baibel i tok “em i stap klostu tru long Papa.” (Jon 1:14, 18) Em i pas gut tru wantaim Papa bilong em, na narapela inap toktok gut wantaim narapela. Em i bihainim pasin bilong Papa bilong em na em i laikim tru ol man bilong graun. Sindaun 8:30, 31 i stori long tingting bilong Papa long dispela Pikinini bilong em, na tingting bilong Pikinini long ol man bilong graun: “Olgeta de mi bin mekim em [Jehova] i amamas, long wanem, mi bin amamas tumas long lukim ol samting em i bin wokim. Mi [Jisas, Saveman i Bosim Wok, em man bilong bihainim gutpela na stretpela tingting] . . . bin amamas i stap oltaim long ai bilong Bikpela [olsem em i laikim tumas ol man bilong graun].” Em dispela nambawan gutpela Pikinini tru God i bin salim i kam long graun bilong baim bek ol man. Olsem na i gat as tru bilong tok bilong Jisas, em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol.”—Jon 3:16.
13 Bilong helpim yumi long pilim liklik dispela tok, yumi ken tingim samting i bin kamap bipo, olsem: Paslain tru long taim Jisas i bin kam daun long graun, God i bin givim tok long Abraham inap olsem 3,890 yia i go pinis, olsem: “Yu gat wanpela pikinini tasol, Aisak, na yu laikim em tumas. Yu mas kisim dispela pikinini na yu go long hap bilong Moria, na bai mi soim yu wanpela maunten. Na long dispela maunten yu mas givim Aisak long mi olsem ofa bilong paia i kukim olgeta.” (Stat 22:1, 2) Abraham i bilip na bihainim tok bilong God. Orait, sapos yu Abraham na yu gat dispela wanpela pikinini tasol yu save laikim em tumas, bai yu gat wanem tingting long bel bilong yu taim yu brukim paiawut bilong kukim ofa long paia, na wokabaut inap sampela de i go long hap bilong Moria, na putim pikinini bilong yu antap long alta?
14 Papa i gat pasin sori, bilong wanem em bai bel sori olsem long pikinini bilong em? Stat 1:27 i tok, God i wokim man i kamap olsem Em yet. Pasin bilong yumi long laikim tru ol narapela na bel sori long ol, dispela i olsem liklik piksa tru bilong pasin bilong Jehova yet long laikim tru ol man na bel sori long ol. God i pasim Abraham, olsem na em i no kilim Aisak olsem ofa. (Stat 22:12, 13; Hibru 11:17-19) Tasol Jehova yet i no surik long givim pe bilong baim bek ol man, maski em na Pikinini bilong em i mas givim bikpela pe tru. Tasol i no olsem God i mas mekim dispela samting, nogat. Dispela samting em i mekim i kamapim long ples klia dispela narapela kain pasin tru bilong em long mekim gut long ol man. Olsem wanem long yumi? Yumi pilim tru dispela gutpela pasin em i bin mekim?—Hibru 2:9.
Samting Dispela i Kamapim
15 Dispela gutpela samting God i bin mekim, em i mekim bikpela samting tru long i stap bilong ol man i bilip long en. Sin bilong ol i bin mekim na pastaim ol i stap longwe long God. Olsem Baibel i tok, ol i olsem ‘birua long em, na ol i bin wok long mekim ol pasin nogut.’ (Kolosi 1:21-23) Tasol “Pikinini bilong God i dai bilong pinisim [dispela] pasin birua,” na nau ol i “kamap wanbel wantaim God.” (Rom 5:8-10) Ol i senisim wokabaut bilong ol, na ol i bilip olsem God i save lusim rong bilong ol man i bilip long ofa bilong Krais, olsem na bel bilong ol i stap klin long ai bilong God.—Hibru 9:14; 1 Pita 3:21.
16 Jehova i mekim gut tru long liklik lain namel long ol dispela manmeri na em i givim rot long ol long i stap wantaim Pikinini bilong em long Kingdom bilong heven, bilong kamapim laik bilong God bilong pastaim tru long dispela graun. (Luk 12:32) Dispela lain ol i bilong “olgeta lain man, na bilong olgeta tok ples, na bilong olgeta kain skin, na bilong olgeta kantri. . . . Ol i stap lain pris bilong God bilong mipela. Na bai ol i stap king na bosim ol manmeri bilong graun.” (KTH 5:9, 10) Aposel Pol i tokim dispela lain: “Spirit bilong God i save mekim yupela i kamap pikinini bilong God. Na long strong bilong Holi Spirit yumi save singaut long God olsem, ‘Aba, Papa.’ Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. Orait . . . bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis.” (Rom 8:15-17) God i kisim ol olsem pikinini bilong em, em dispela gutpela samting tru Adam i bin lusim; tasol God bai givim narapela gutpela samting tu long ol dispela pikinini bilong em, em wanpela gutpela wok long heven—em wanpela samting Adam i no bin kisim. Olsem na aposel Jon i tok: “Olaman, Papa i bin laikim yumi na givim bel bilong em moa yet long yumi! Em i kolim yumi ol pikinini bilong God”! (1 Jon 3:1) God i mekim pasin sori (a·gaʹpe) long dispela lain, tasol i no dispela pasin tasol em i mekim; em i laikim tru ol (phi·liʹa), em dispela pasin i save stap namel long tupela man i stap pren tru.—Jon 16:27.
17 Ol narapela tu—em olgeta manmeri i bilip long gutpela samting God i bin mekim bilong kisim laip long rot bilong Krais Jisas—Jehova i wokim rot bambai ol inap kisim gutpela samting tru em Adam i bin lusim. Aposel Pol i tok: “Olgeta samting God i bin wokim [ol manmeri em Adam i bin kamapim], ol i wetim taim God i makim bilong kamapim ples klia yumi ol pikinini bilong en [olsem ol i wetim taim bilong kamapim long ples klia olsem ol pikinini bilong God, em ol bai stap king wantaim Krais long Kingdom bilong heven, ol i kirap mekim wok bilong helpim ol man bilong graun]. . . . Nau olgeta samting i stap nogut na i save bagarap [taim mama i karim ol, ol i gat sin na ol i wet long i dai tasol, na ol i no gat rot long lusim dispela kalabus bilong indai]. Dispela i no kamap long laik bilong ol yet. Nogat. God yet i mekim ol i stap olsem, bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.” (Rom 8:19-21) Bai ol i stap gutpela tru olsem wanem? Ol bai lusim kalabus bilong sin na dai. Skin na tingting bilong ol bai kamap gutpela olgeta, na ol bai sindaun long Paradais, na ol bai stap oltaim oltaim, olsem na inap long olgeta taim bihain ol inap amamas long i stap bilong ol na tok tenkyu long Jehova, em wanpela tasol i God tru. Olsem wanem ol inap kisim ol dispela gutpela samting? Ol inap kisim long rot bilong ofa bilong dispela wanpela Pikinini tasol bilong God.
18 Long Nisan 14, long yia 33 C.E., long wanpela rum long Jerusalem, Jisas i kamapim wanpela bung bilong tingim dai bilong em. Dispela bung i save kamap long olgeta yia, na em i kamap wanpela bikpela samting tru bilong olgeta Kristen tru. Jisas yet i tok: “Yupela i mas mekim olsem bilong tingim mi.” (Luk 22:19) Long 1997, dispela bung, olsem Memorial, bai kamap bihain long taim san i go daun long Mas 23 (Nisan 14 i kirap long dispela taim). Long dispela de em i bikpela samting tru long kam long dispela bung bilong Memorial.
Bai Yu Bekim Olsem Wanem?
◻ Long wanem ol rot God i bin soim olsem em i laikim tumas ol man?
◻ Bilong wanem i mas i gat wanpela man i gutpela olgeta bilong baim bek ol pikinini bilong Adam?
◻ Bilong wokim dispela rot bilong baim bek ol, Jehova i mas givim wanem bikpela pe tru?
◻ Pe bilong baim bek ol man i opim rot long ol i ken kisim wanem ol samting?
[Askim Bilong Stadi]
1. Long Mas 23, bihain long taim san i go daun, bilong wanem planti milion manmeri long olgeta hap ol bai bung long ol Haus Kingdom na ol narapela ples ol i save mekim miting long en?
2. Taim yumi tingim sori bilong God, yumi ken givim wanem ol askim long yumi yet bilong helpim yumi?
3. (a) Olsem wanem na i no narapela kain samting long God long laikim tru ol narapela? (b) Olsem wanem ol samting God i bin wokim i kamapim long ples klia bikpela strong na gutpela tingting na save bilong em?
4. Long ol samting God i bin wokim, yumi olgeta i mas lukim na pilim tru wanem samting i kamapim klia pasin bilong God long laikim tru ol man?
5. Jehova i bin mekim wanem na em i soim olsem em i laikim tumas Adam na Iv?
6. (a) Yu ting olsem wanem long pasin bikhet Adam tupela Iv i mekim? (b) Wanem samting inap kamapim klia olsem samting i bin kamap long Iden i skulim yumi na dispela save i bin helpim yumi?
7. Maski Adam na Iv i bikhet, Jehova i mekim wanem pasin sori long ol pikinini bilong tupela?
8. Bilong wanem God i no inap tok, maski Adam na Iv i mas i dai, tasol ol pikinini bilong tupela i bihainim tok bilong em ol i no ken i dai?
9. I mas i gat wanem kain pe bilong baim bek ol man na bai em i stret wantaim lo bilong God long stretpela pasin?
10. Bilong wanem ol pikinini bilong Adam i no inap givim dispela pe?
11. Jehova i mekim wanem na em i givim wanpela man i gutpela olgeta olsem pe inap tru long baim bek ol man?
12. (a) Olsem wanem Jisas em i dispela “wanpela Pikinini tasol” bilong God? (b) Taim God i salim dispela man i kam bilong baim bek ol man, olsem wanem dispela i kamapim klia olsem God i laikim tru yumi?
13, 14. Stori bilong Baibel long Abraham i laik givim Aisak olsem ofa, em i mas helpim yumi long pilim tru wanem samting long dispela pasin sori Jehova i mekim? (1 Jon 4:10)
15. Nau long dispela taim tu, dispela pe bilong baim bek yumi i bin mekim wanem long i stap bilong sampela man?
16. Liklik lain i bilip long pe bilong baim bek ol man, olsem na God i givim wanem ol gutpela blesing long ol?
17. (a) Ol manmeri i bilip long dispela pe bilong baim bek ol man, ol i gat rot long mekim wanem? (b) Taim ‘olgeta samting i stap gutpela tru wantaim ol pikinini bilong God,’ ol bai kisim wanem ol gutpela samting?
18. Long Mas 23, bihain long taim san i go daun, yumi bai mekim wanem? Bilong wanem yumi bai mekim olsem?
[Piksa long pes 10]
God i givim dispela wanpela Pikinini tasol bilong em