Strong Bilong Bagarapim Ol Samting—“Jehova Em i Strongpela Soldia”

1-3. (a) Ol Isip i laik mekim wanem long lain Israel? (b) Olsem wanem Jehova i pait bilong lukautim lain bilong em?

LAIN Israel i no inap ranawe—long wanpela sait i gat ol bikpela maunten ol i no inap go antap long en na long narapela sait i gat solwara ol i no inap brukim. Ami bilong Isip, em lain bilong kilim i dai ol man, ol i wok strong long bihainim ol Israel, ol i laik tru long kilim ol i dai.a Tasol Moses i tokim lain bilong God olsem ol i no ken ting ol bai kisim bagarap. Em i tokim ol: “Jehova yet bai pait bilong helpim yupela.”​—Kisim Bek 14:14.

² Tasol Moses i singaut yet long Jehova, na God i tok: “Wai na yu wok long krai long mi? . . . Apim stik wokabaut bilong yu na makim solwara, na solwara bai bruk i go tupela hap.” (Kisim Bek 14:15, 16) Tingim ol samting i kamap. Wantu Jehova i tokim ensel bilong em long mekim ol samting, na bikpela klaut i go long baksait bilong lain Israel, ating em i kamap olsem banis na pasim ol Isip long kirapim pait. (Kisim Bek 14:19, 20; Buk Song 105:39) Moses i apim han bilong em. Strongpela win i kirap na brukim solwara i go tupela hap. Solwara i sanap olsem tupela banis, na bikpela rot i kamap long namel inap long lain Israel olgeta i ken wokabaut long en!​—Kisim Bek 14:21; 15:8.

³ Taim God i soim bikpela strong bilong em olsem, em bai gutpela moa sapos Fero i tokim ami bilong em long tanim i go bek long ples. Tasol Fero i gat pasin antap na em i tokim ol long pait. (Kisim Bek 14:23) Ol Isip i ronim ol Israel na bihainim ol i go namel long solwara, tasol i no longtaim na ol samting i paul nabaut taim ol wil bilong karis i lus na pundaun. Taim lain Israel i kamap gut long hapsait bilong solwara, Jehova i tokim Moses: “Stretim han bilong yu na makim solwara, na bai solwara i kam bek na karamapim ol Isip na ol karis bilong pait wantaim ol soldia i sindaun long ol hos.” Ol banis wara i pundaun na karamapim Fero na lain ami bilong em!​—Kisim Bek 14:24-28; Buk Song 136:15.

 4. (a) Long Solwara Retsi Jehova i soim olsem em i wanem kain? (b) Sampela inap ting olsem wanem long dispela stori long Jehova?

⁴ God i helpim lain Israel long abrusim bagarap long Solwara Retsi, dispela em i wanpela bikpela samting bilong ol man bilong graun em God i bin insait long en. Long dispela hap Jehova i soim olsem em i “strongpela soldia.” (Kisim Bek 15:3) Tasol dispela stori long Jehova i givim wanem tingting long yu? Ol woa i bin givim bikpela pen na hevi long ol manmeri. Olsem wanem? Pasin bilong God long yusim strong bilong em bilong bagarapim ol samting i laik pasim yu long i go klostu long em?

5, 6. (a) Bilong wanem i stret God i gat biknem olsem “Jehova, bosman bilong bikpela lain ami”? (b) Olsem wanem pait bilong God i narapela kain long pait bilong ol man?

⁵ Long ol tokples ol i bin raitim Baibel long en, dispela biknem bilong God, Jehova “bosman bilong bikpela lain ami,” i stap long Ol Skripsa Hibru inap 260 taim na tupela taim long Ol Skripsa Grik. (1 Samuel 1:11) Jehova em i King, na em i bosim bikpela lain ami bilong ol ensel. (Josua 5:13-15; 1 King 22:19) Strong bilong dispela lain ami bilong bagarapim ol samting i bikpela tru. (Aisaia 37:36) Yumi no amamas long tingim olsem ol man bai kisim bagarap. Tasol yumi mas tingim olsem ol pait bilong God i no olsem pait bilong ol man we i no gat as tru bilong en. Ol lida bilong ami na lain politik inap tok olsem i gat gutpela as na ol i pait. Tasol pasin gridi na pasin bilong tingim laik bilong ol yet i bikpela samting long ol woa bilong man.

⁶ Tasol Jehova i no kirap nating long mekim ol samting. Long Lo 32:4 Baibel i tok: “Dispela Bikpela Ston, olgeta wok bilong em i gutpela olgeta, long wanem, olgeta pasin bilong em i stret olgeta. Em God i save bihainim ol tok bilong em yet na oltaim em i save mekim pasin i fea; pasin bilong em i gutpela na stretpela tasol.” Baibel i no orait long pasin bilong belhat, o pasin bilong mekim nogut long narapela, o pasin bilong pait na bagarapim man. (Stat 49:7; Buk Song 11:5) Olsem na i gat as na Jehova i kirap mekim ol samting. Inap wan wan taim tasol em i yusim strong bilong em long bagarapim ol samting, na em i mekim olsem taim i no gat narapela rot bilong stretim hevi. Long rot bilong profet Esekiel, em i tok: “Nambawan Bikpela Jehova i tok, ‘Yupela i ting mi save amamas taim wanpela man nogut i dai? Nogat tru, mi laik bai em i lusim pasin nogut bilong em na stap laip yet.’”​—Esekiel 18:23.

7, 8. (a) Jop i kisim wanem tingting kranki long ol hevi bilong em? (b) Elihu i mekim wanem bilong stretim tingting bilong Jop? (c) Ol samting i painim Jop i ken lainim yumi long wanem samting?

⁷ Orait bilong wanem Jehova i yusim strong bilong em long bagarapim ol samting? Paslain long bekim dispela, yumi ken tingim stretpela man Jop. Satan i sutim tok olsem Jop—na ol narapela man tu—bai i no stap gut long God taim traim i kamap. Bilong stretim tok, Jehova i larim Satan long traim pasin bilong Jop long stap gut long em. Olsem na Jop i kisim bikpela sik, olgeta kago samting bilong em i lus, na ol pikinini bilong em i dai. (Jop 1:1–2:8) Jop i no save long as na ol hevi i painim em, na em i kisim tingting kranki olsem God i mekim save nating long em. Jop i askim God long wai na Em i “tagetim” em na “birua” long em.​—Jop 7:20; 13:24.

⁸ Yangpela man Elihu i kamapim klia olsem tingting bilong Jop i no stret. Em i tok: “Olsem wanem? Yu bilip tru olsem yu stretpela man olsem na yu tok, ‘Pasin bilong mi i stret na i winim pasin bilong God’?” (Jop 35:2) Em tru, i no gutpela long ting save bilong yumi i winim save bilong God o ting em i no mekim pasin i stret. Elihu i tok: “God i no inap tru long mekim pasin nogut, God i Gat Olgeta Strong i no inap mekim pasin i no stret. Nogat tru!” Bihain em i tok: “Husat inap tokim em long ol samting em i mas mekim? Na husat inap tokim em olsem, ‘Pasin yu mekim i no stret’?” (Jop 34:10; 36:22,23; 37:23) Yumi ken save tru olsem taim God i pait, i gat as tru na em i mekim olsem. Orait nau yumi ken skelim i gat wanem as na sampela taim God bilong bel isi i save kamap wanpela soldia.​—1 Korin 14:33.

 9. Bilong wanem God bilong pasin holi i save pait?

⁹ Bihain long em i tok God em i “strongpela soldia,” Moses i tok: “O Jehova, husat ol arapela god i olsem yu? Yu wanpela tasol yu holi olgeta, i no gat wanpela i olsem yu.” (Kisim Bek 15:11) Profet Habakuk tu i tok: “Ai bilong yu i klin tumas long lukim samting nogut, na yu no save laikim pasin nogut.” (Habakuk 1:13) Jehova em i God bilong pasin laikim, tasol tu em i God bilong pasin holi na stretpela pasin. Sampela taim ol dispela pasin i kirapim em long yusim strong bilong em long bagarapim ol samting. (Aisaia 59:15-19; Luk 18:7) Olsem na God i no bagarapim pasin holi bilong em long taim em i pait. Nogat. Em i pait, long wanem, em i holi.​—Wok Pris 19:2.

10. I gat wanem rot tasol bilong pinisim pasin birua em Stat 3:15 i tok profet long en? Dispela bai kamapim wanem ol gutpela samting long ol stretpela man?

¹⁰ Tingim ol samting i kamap bihain long namba wan man na meri, Adam tupela Iv, i bikhet long God. (Stat 3:1-6) Sapos Jehova i bin orait long pasin nogut bilong ol, i olsem em i daunim namba bilong em yet olsem King Bilong Heven na Graun. Em i God bilong bihainim stretpela pasin, olsem na em i mas makim dai olsem strafe bilong ol. (Rom 6:23) Long namba wan tok profet bilong Baibel, em i tok pasin birua bai stap namel long ol wokman bilong em na ol man i bihainim “snek,” em Satan. (Revelesen 12:9; Stat 3:15) I gat wanpela rot tasol bilong pinisim dispela pasin birua, em long rot bilong bagarapim Satan. (Rom 16:20) Tasol dispela strafe i kam long God bai kamapim planti blesing long ol man, na Satan bai no stiaim moa ol man na graun olgeta bai kamap gutpela ples paradais. (Matyu 19:28) Tasol taim Satan i no bagarap yet, ol man i bihainim em bai wok strong long birua, mekim nogut, na traim long bagarapim lain i laikim God. Na sampela taim Jehova i mas mekim sampela samting bilong helpim ol.

11. Bilong wanem God i pilim olsem em i mas kamapim bikpela tait wara long olgeta hap?

¹¹ Bikpela Tait i kamap long taim bilong Noa i wanpela samting God i mekim bilong helpim ol man. Stat 6:11, 12 i tok: “Long ai bilong God tru, graun i stap nogut tru na pasin bilong pait na bagarapim man i pulap long en. God i lukluk i kam daun long graun na em i lukim olsem graun i bagarap. Ol manmeri i mekim ol pasin nogut tasol.” Olsem wanem? God bai larim ol man nogut i pinisim wan wan stretpela man tasol i stap yet? Nogat. Jehova i pilim olsem em i mas kamapim bikpela tait long olgeta hap bilong pinisim ol man i gat pasin bilong pait na bagarapim man na mekim pasin pamuk.

12. (a) Jehova i mekim wanem tok profet long “pikinini” bilong Abraham? (b) Bilong wanem lain Amor i mas bagarap?

¹² Na i wankain long strafe God i givim long lain Kenan. Jehova i tokaut olsem long rot bilong Abraham wanpela pikinini bai kamap em olgeta lain manmeri bai kisim blesing long en. Bilong mekim ol samting i stret wantaim dispela tok, God i tok ol lain tumbuna pikinini bilong Abraham bai kisim kantri Kenan, em hap ol Amor i sindaun long en. Olsem wanem i stret long God i rausim dispela lain man long ples bilong ol? Jehova i tok profet olsem taim bilong em long rausim dispela lain bai i kamap 400 yia bihain—long taim ‘asua bilong ol Amor i kamap’ bikpela tru.b (Stat 12:1-3; 13:14, 15; 15:13, 16; 22:18) Insait long dispela haptaim, pasin nogut bilong lain Amor i go nogut moa yet. Kenan i kamap ples bilong lotuim ol god giaman, kapsaitim blut bilong man, na mekim ol pasin sem nogut tru. (Kisim Bek 23:24; 34:12, 13; Namba 33:52) Ol manmeri bilong dispela kantri i kilim i dai ol pikinini olsem ofa. Yu ting God holi inap larim lain bilong em i stap klostu long ol man i mekim kain pasin olsem? Nogat! Em i tok: “Graun bilong ol i kamap doti, na bai mi mekim save long ol manmeri bilong dispela ples long pasin nogut bilong ol. Na graun bai trautim ol dispela manmeri.” (Wok Pris 18:21-25) Tasol Jehova i no kilim i dai olgeta dispela man. Nogat. Ol man Kenan husat i gat gutpela bel, olsem Rahap na lain Gibeon, ol i abrusim bagarap.​—Josua 6:25; 9:3-27.

13, 14. (a) Bilong wanem Jehova i mas mekim holi nem bilong em? (b) Olsem wanem Jehova i stretim bek nem bilong em?

¹³ Jehova i holi, olsem na nem bilong em i holi. (Wok Pris 22:32) Jisas i lainim ol disaipel bilong em long beten olsem: “Nem bilong yu i mas i stap holi.” (Matyu 6:9) Pasin bikhet long Iden i bagarapim nem bilong God, em i daunim gutnem bilong God na pasin bilong em long bosim ol man. Jehova i no inap orait long dispela pasin bilong bagarapim nem bilong em na bikhet long em. Em i mas stretim bek nem bilong em.​—Aisaia 48:11.

¹⁴ Tingim gen lain Israel. Taim ol i mekim yet wok kalabus long Isip, tok promis bilong God long Abraham—olsem long rot bilong pikinini bilong em olgeta lain man bai kisim blesing—i olsem samting nating. Tasol taim em i helpim ol long lusim kalabus na mekim ol i kamap wanpela lain, Jehova i stretim bek nem bilong em. Olsem na Profet Daniel i mekim dispela tok long God bilong em taim em i beten: “O Jehova, God bilong mipela, yu bin kisim ol manmeri bilong yu long kantri Isip na bringim ol i kam, yu mekim olsem long strongpela han bilong yu na yu kisim biknem tru i kam inap long nau.”​—Daniel 9:15.

15. Bilong wanem Jehova i helpim lain Juda long lusim kalabus long Babilon?

¹⁵ Daniel i tingim lain Juda taim em i mekim dispela kain beten, Jehova i mas mekim sampela samting gen bilong stretim bek nem bilong Em. Ol Juda i no harim tok, nau ol i kalabus long Babilon. Biktaun bilong ol yet, Jerusalem, i bagarap i stap. Daniel i save sapos lain Juda i go bek long ples bilong ol, dispela bai litimapim nem bilong Jehova. Olsem na Daniel i beten: “O Jehova, fogivim mipela. O Jehova, putim yau long mipela na mekim sampela samting! No ken lusim taim, tingim nem bilong yu, O God bilong mi, bikos nem bilong yu i stap long taun bilong yu na ol manmeri bilong yu.”​—Daniel 9:18, 19.

16. Stori long as na pasin bilong Jehova long mekim gut nem bilong em i no makim olsem em i tingim em yet tasol.

¹⁶ Laik bilong Jehova long mekim gut nem bilong em i makim olsem em i tingim em yet tasol? Nogat, taim em i mekim ol samting i stret wantaim pasin bilong em long laikim tru stretpela pasin na pasin holi, em i lukautim lain bilong em. Tingim Stat sapta 14. Dispela sapta i stori long fopela king i kam pait na i stilim pikinini bilong brata bilong Abraham, em Lot, na famili bilong Lot. God i helpim Abraham, na Abraham i winim ol lain ami i strong tru! Ating dispela stori bilong Abraham na lain ami bilong em i win, em i namba wan stori i stap long “buk i stori long Ol Pait Bilong Jehova.” Ating long dispela buk ol i raitim tu stori bilong sampela narapela pait em Baibel i no stori long en. (Namba 21:14) Bihain long dispela pait Abraham i insait long en, lain bilong God i winim planti moa pait.

17. Wanem samting i soim olsem Jehova i pait bilong helpim lain Israel bihain long ol i go insait long kantri Kenan? Kamapim sampela stori i soim dispela.

¹⁷ Paslain liklik long lain Israel i go insait long kantri Kenan, Moses i tokim ol: “Jehova, God bilong yupela, bai go pas long yupela na em bai pait bilong helpim yupela, olsem yupela i bin lukim em i mekim long Isip.” (Lo 1:30; 20:1) Kirap long taim bilong senis bilong Moses, em Josua, na i go inap long taim bilong ol Hetman na ol gutpela king bilong lain Juda, Jehova i bin pait bilong helpim lain bilong em, na planti taim em i helpim ol long winim ol birua.​—Josua 10:1-14; Hetman 4:12-17; 2 Samuel 5:17-21.

18. (a) Bilong wanem yumi ken amamas long Jehova i no bin senis? (b) Wanem samting bai kamap taim dispela pasin birua Stat 3:15 i stori long en i laik pinis?

¹⁸ Jehova i no bin senis; na tingting bilong em long mekim dispela graun i kamap wanpela paradais, dispela tu i no senis. (Stat 1:27, 28) Pasin bilong God long nolaik tru long pasin nogut i no senis. Tasol em i laikim tru lain bilong em na klostu nau em bai mekim ol samting bilong helpim ol. (Buk Song 11:7) Klostu nau bikpela senis tru bai kamap long dispela pasin birua em Stat 3:15 i stori long en. Bilong mekim holi nem bilong em na lukautim lain bilong em, Jehova bai kamap gen olsem “strongpela soldia”!​—Sekaraia 14:3; Revelesen 16:14, 16.

19. (a) Kamapim tok piksa i soim olsem wanem pasin bilong God long yusim strong bilong em long bagarapim ol samting i ken pulim yumi i go klostu long em. (b) Pasin bilong God long redi long pait i mas mekim wanem long yumi?

¹⁹ Tingim wanpela tok piksa: Tingim olsem wanpela animal nogut i go bagarapim famili bilong wanpela man na dispela man i go pait long dispela animal nogut na kilim em i dai. Yu ting meri pikinini bilong dispela man bai pilim nogut long em i mekim olsem? Nogat, ol bai pilim tru pasin bilong papa long laikim ol tru na i no tingim em yet. Na olsem tasol, yumi tu i no ken pilim nogut long pasin bilong God long yusim strong bilong em long bagarapim ol samting. Pasin bilong em long redi long pait bilong lukautim yumi i mas kirapim yumi long laikim em moa yet. Na tu, dispela i mas kirapim yumi long pilim moa yet bikpela strong bilong em na bai yumi ken “mekim wok bilong God long pasin em i orait long en, na mekim wantaim pret na pasin bilong daun tru long em.”​—Hibru 12:28.

20. Taim yumi ritim ol stori bilong Baibel long ol pait bilong God na yumi no kliagut long as bilong en, yumi mas mekim wanem? Bilong wanem yumi mas mekim olsem?

²⁰ Tru, Baibel i no stori oltaim long olgeta liklik liklik samting i kirapim Jehova long mekim pait. Tasol yumi ken bilip tru long dispela samting: Jehova i no save bagarapim nating ol man, na em i no mekim long pasin i no stret o long pasin i nogut tru. Planti taim pasin bilong skelim ol ves i stap klostu long wanpela stori bilong Baibel o yumi kisim sampela save moa long dispela stori, dispela i helpim yumi long kisim stretpela tingting. (Provep 18:13) Na maski yumi no save long olgeta liklik liklik samting, taim yumi kisim sampela save moa long Jehova na tingim tingim long bel ol gutpela pasin bilong em, dispela i helpim yumi long ol samting yumi inap kisim tupela tingting long en. Taim yumi mekim olsem, bai yumi save olsem i gat planti as na yumi ken bilip tru long God bilong yumi, Jehova.​—Jop 34:12.

21. Sampela taim Jehova em i “strongpela soldia,” tasol tru tru em i gat wanem kain pasin?

²¹ Maski Jehova em i “strongpela soldia” long taim em i mas i stap olsem, dispela i no makim olsem pasin bilong pait em i pasin tru bilong em. Long driman bilong Esekiel long traipela karis long heven, Jehova i redi long pait long ol birua bilong em. Tasol Esekiel i lukim renbo i raunim God—renbo i makim bel isi. (Stat 9:13; Esekiel 1:28; Revelesen 4:3) Tru tumas, em pasin bilong Jehova long i stap bel isi. Aposel Jon i tok: “God em i pasin laikim.” (1 Jon 4:8) Olgeta pasin bilong Jehova i wok gut wantaim. Em i gutpela samting tru long yumi ken i go klostu long kain strongpela God olsem i save laikim tru ol man!