Jehova Em i God Bilong Mekim Ol Kontrak
“Bai mi mekim nupela kontrak wantaim ol lain bilong Israel na ol lain bilong Juda.”—JEREMAIA 31:31.
1, 2. (a) Jisas i kamapim wanem nupela bung long nait bilong Nisan 14, long yia 33 C.E.? (b) Jisas i toktok long wanem kontrak taim em i tok long indai bilong em?
LONG nait bilong Nisan 14, long yia 33 C.E., Jisas i mekim Pasova wantaim 12-pela aposel bilong em. Em i save dispela em i laspela kaikai em bai mekim wantaim ol, na liklik taim bai ol birua i kilim em i dai, olsem na em i skulim ol gutpela disaipel bilong em long planti bikpela samting.—Jon 13:1–17:26.
2 Long dispela taim yet, taim Jisas i rausim pinis Judas Iskariot, em i kamapim wanpela bung bilong lotu em i tok ol Kristen i mas mekim long olgeta yia—em bung bilong tingim indai bilong em; i no gat narapela bikpela de bilong lotu em i tokim ol long tingim. Baibel i tok: “Ol i kaikai i stap, na Jisas i kisim wanpela bret, na i tenkyu long God na i brukim, na i givim long ol disaipel. Na em i tok, ‘Yupela kisim na kaikai. Dispela em i bodi bilong mi.’ Na em i kisim wanpela kap wain, na i tenkyu long God, na i givim long ol, na i tok, ‘Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong tekewe sin bilong planti manmeri.’ ” (Matyu 26:26-28) Taim ol disaipel bilong Jisas i mekim dispela bung bilong tingim indai bilong em, ol i mas mekim long dispela pasin na no ken mekim planti bilaspasin long en. Na taim Jisas i toktok long indai bilong em, em i tok tu long wanpela kontrak. Long Gutnius Luk i raitim, Jisas i kolim olsem “nupela kontrak.”—Luk 22:20.
3. I gat wanem ol askim long nupela kontrak?
3 Wanem dispela nupela kontrak? Sapos em i nupela kontrak, ating dispela i makim olsem i gat olpela kontrak? I gat sampela kontrak moa i olsem poroman bilong dispela nupela kontrak? Em ol bikpela askim, long wanem, Jisas i tok blut bilong em bilong mekim kontrak em bai kapsait “bilong tekewe sin” bilong ol man. Yumi olgeta man i mas i gat dispela samting bilong tekewe sin bilong yumi.—Rom 3:23.
Wanpela Kontrak Wantaim Abraham
4. Wanem tok promis bilong bipo yet i helpim yumi long kisim gut dispela tok long nupela kontrak?
4 Bilong kisim gut tok bilong dispela nupela kontrak, yumi mas stori long ol samting i bin kamap klostu olsem 2,000 yia paslain long taim Jisas i bin mekim wok bilong em long graun. Long dispela taim Tera wantaim famili bilong em—sampela em Abram (bihain em i kisim nem Abraham) na meri bilong Abram, em Sarai (bihain em i kisim nem Sara)—ol i lusim taun Ur bilong ol Kaldia na ol i wokabaut i go long Haran long hap not bilong Mesopotemia. Ol i stap long dispela hap i go inap long taim Tera i dai. Orait nau God i tokim Abraham na em i brukim wara Yufretis na wokabaut long hap bilong saut-wes i go long graun Kenan, na em i mas sindaun long ol haus sel na raun raun olsem tripman long Kenan. Long dispela taim Abraham i gat 75 krismas. (Stat 11:31–12:1, 4, 5; Aposel 7:2-5) Dispela em yia 1943 B.C.E. Taim Abraham i stap yet long Haran, Jehova i bin tokim em: “Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru. Olsem na taim ol manmeri i laik mekim gutpela tok long ol arapela man, ol bai i tokim ol olsem, ‘God i ken mekim gut long yu, olsem em i bin mekim long Abram.’ Bai mi mekim gut long ol man i save mekim gutpela pasin long yu. Tasol bai mi yet mi bagarapim ol man i tok long bagarapim yu. Na long yu, bai mi mekim gut long olgeta lain manmeri bilong graun.” Bihain, taim Abraham i go insait pinis long Kenan, Jehova i tok moa olsem: “Bai mi givim dispela graun long ol lain pikinini bilong yu.”—Stat 12:2, 3, 7.
5 Tok promis Jehova i mekim long Abraham em i insait long narapela tok promis bilong Jehova. Dispela i mekim na Abraham em i wanpela bikpela rot tru bilong kamapim truim bilong namba wan tok profet bilong Baibel. Taim Adam na Iv i mekim sin long gaden Iden, Jehova i kolim strafe bilong tupela, na long dispela taim yet em i givim tok long Satan, em i bin giamanim Iv, na Em i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Kontrak Jehova i mekim wantaim Abraham i makim olsem dispela Pikinini em bai bagarapim olgeta wok bilong Satan, em bai kamap long lain bilong Abraham yet.
6. (a) Tok promis Jehova i bin mekim long Abraham em bai kamap tru long rot bilong husat? (b) Wanem dispela kontrak Jehova i bin mekim wantaim Abraham?
6 Tok promis bilong Jehova i toktok long wanpela pikinini, olsem na Abraham i mas i gat wanpela pikinini man bambai dispela Pikinini i ken kamap long lain bilong em. Tasol Abraham na Sara i go lapun pinis na ol i no gat wanpela pikinini. Tasol bihain Jehova i mekim gut long tupela, na long rot bilong wanpela mirakel em i kirapim bek strong bilong tupela long kamapim pikinini, na Sara i karim wanpela pikinini man bilong Abraham, nem bilong em Aisak, bambai dispela tok promis long wanpela pikinini bai kamap, em i ken i go yet. (Stat 17:15-17; 21:1-7) Planti yia bihain, taim Jehova i traim pinis bilip bilong Abraham long kilim i dai gutpela pikinini bilong em, Aisak, olsem ofa—Jehova i mekim gen tok promis long Abraham: “Tru tumas bai mi mekim gut long yu na bai mi mekim ol pikinini bilong yu i kamap planti olsem ol sta long skai na olsem wesan long nambis, na ol tumbuna pikinini bilong yu bai bosim dua bilong taun bilong ol birua bilong ol. Na long rot bilong pikinini bilong yu olgeta lain bilong graun bai kisim blesing, long wanem, yu bin bihainim tok bilong mi.” (Stat 22:15-18, NW) Dispela tok promis em Jehova i skruim hap tok moa long en, planti taim ol i kolim olsem kontrak God i bin mekim wantaim Abraham, na sampela samting bilong en i bilong nupela kontrak i kamap bihain long en.
7. Olsem wanem ol tumbuna pikinini bilong Abraham i wok long kamap planti? Wanem ol samting i kamap na ol i sindaun olgeta long Isip?
7 Bihain Aisak i gat tupela pikinini man i kamap wantaim, em Iso na Jekop. Jehova i makim Jekop long kamap tumbuna bilong dispela Pikinini Em i tok promis long kamapim. (Stat 28:10-15; Rom 9:10-13) Jekop i gat 12-pela pikinini man. Orait nau em i taim bilong ol tumbuna pikinini bilong Abraham long kamap planti. Taim ol pikinini man bilong Jekop i bikpela pinis, na planti ol i gat meri pikinini bilong ol yet, taim bilong bikpela hangre i kamap na olgeta i mas i go long Isip—God i bin stiaim ol samting na pikinini bilong Jekop, em Josep, em i bin redim rot bilong ol long kam. (Stat 45:5-13; 46:26, 27) Sampela yia bihain, dispela taim bilong hangre i pinis liklik long Kenan. Tasol lain bilong Jekop ol i sindaun olgeta long Isip—pastaim king i bin singautim ol i kam i stap, tasol bihain ol i stap olsem lain kalabus long Isip. Ol i stap olsem i go inap long yia 1513 B.C.E., em 430 yia bihain long taim Abraham i bin brukim wara Yufretis. Orait nau Moses i bringim ol tumbuna pikinini bilong Jekop i go lusim kalabus long Isip. (Kisim Bek 1:8-14; 12:40, 41; Galesia 3:16, 17) Nau Jehova bai tingim moa yet ol samting bilong dispela kontrak em i bin mekim wantaim Abraham.—Kisim Bek 2:24; 6:2-5.
“Olpela Kontrak”
8. Jehova i mekim wanem samting wantaim ol tumbuna pikinini bilong Jekop long Sainai? Olsem wanem dispela em i samting bilong kontrak Jehova i bin mekim wantaim Abraham?
8 Taim Jekop wantaim ol pikinini man bilong em i go i stap long Isip, ol i wanpela famili tasol. Tasol taim ol tumbuna pikinini bilong ol i lusim Isip, ol i wanpela bikpela lain i gat planti manmeri tru long olgeta wan wan lain bilong ol pikinini man bilong Jekop. (Kisim Bek 1:5-7; 12:37, 38) Taim Jehova i no bringim ol i go yet long Kenan, em i bringim ol long hap bilong saut i go kamap long as bilong maunten ol i kolim Horep (olsem Sainai), long Arebia. Long dispela hap em i mekim kontrak wantaim ol. Bihain ol i kirap kolim olsem “olpela kontrak,” long wanem, i gat “nupela kontrak” i kamap. (2 Korin 3:14) Long rot bilong olpela kontrak, Jehova i kamapim liklik truim bilong dispela kontrak em i bin mekim wantaim Abraham.
9 Jehova i tokaut long ol Israel long ol samting bilong dispela kontrak: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem ol pris. Na bai yupela i stap ol manmeri tru bilong mi.” (Kisim Bek 19:5, 6) Jehova i bin tok promis olsem pikinini bilong Abraham bai (1) kamap wanpela bikpela lain, (2) daunim ol birua bilong ol, (3) kisim graun bilong Kenan, na (4) i olsem rot bilong olgeta lain bilong graun i kisim blesing. Orait nau Jehova i tokaut olsem ol yet inap kisim ol dispela blesing sapos ol i stap lain manmeri tru bilong em, Israel, na ol bai kamap wanpela ‘lain manmeri i save mekim wok bilong em olsem pris, na bai ol i stap ol manmeri tru bilong em,’ sapos ol i bihainim tok bilong em. Olsem wanem? Ol Israel i orait long go insait long dispela kontrak? Olgeta i wanbel na i tok: “Mipela bai mekim olgeta samting olsem Bikpela i bin tok.”—Kisim Bek 19:8.
10. Olsem wanem Jehova i mekim ol Israel i kamap olsem lain bilong wanpela kantri? Em i laik bai ol i mas mekim wanem?
10 Olsem na Jehova i mekim ol Israel i kamap olsem lain bilong wanpela kantri. Em i givim ol lo long ol i bosim lotu na sindaun bilong ol. Na em i givim wanpela haus lotu sel long ol (bihain em i givim wanpela bikpela haus lotu long ol long Jerusalem) na wanpela lain pris bilong mekim wok holi bilong em insait long haus lotu sel. Bilong holim strong kontrak, ol i mas bihainim ol lo bilong Jehova, na bikpela samting tru, ol i mas lotuim em wanpela tasol. Namba wan bilong Tenpela Lo i as bilong ol dispela lo, em i tok: “Mi yet mi Bikpela, mi God bilong yupela. Mi bin kisim yupela long Isip, dispela ples bilong wok kalabus, na mi bringim yupela i kam. Yupela i mas bihainim mi wanpela tasol. Yupela i no ken bihainim ol giaman god.”—Kisim Bek 20:2, 3.
Ol Blesing Long Rot Bilong Kontrak Bilong Lo
11, 12. Ol tok promis bilong olpela kontrak i kamap tru long ol Israel long wanem ol rot?
11 Olsem wanem? Ol tok promis insait long kontrak bilong Lo i kamap tru long ol Israel? Yu ting ol Israel i bin kamap wanpela lain holi, olsem “ol manmeri tru bilong [Jehova]”? Ol Israel i tumbuna pikinini bilong Adam, olsem na ol i sinman. (Rom 5:12) Tasol aninit long Lo, ol i save kilim ol animal na givim long God olsem ofa bilong tekewe sin bilong ol. Jehova i toktok long ol ofa ol bai mekim long Bikpela De Bilong God i Tekewe Sin Bilong Ol Manmeri, i save kamap wanpela taim long olgeta yia, na em i tok: “Long dispela de tasol bai pris i mekim ol ofa bilong tekewe sin bilong yupela, na bai yupela i kamap klin long ai bilong mi.” (Wok Pris 16:30) Taim ol Israel i stap gut long Jehova, ol i stap olsem lain holi, em Jehova i mekim ol i kamap klin bambai ol i ken mekim wok bilong em. Tasol bilong i stap klin olsem, ol i mas bihainim tok bilong Lo na mekim ol ofa long olgeta taim.
12 Yu ting ol Israel i bin kamap olsem “lain manmeri i save mekim wok bilong [Jehova] olsem ol pris”? Kirap long taim Jehova i mekim kontrak wantaim ol Israel, ol i stap olsem lain bilong wanpela kantri, olsem kingdom, na Jehova i stap King bilong ol long heven. (Aisaia 33:22) Na kontrak bilong Lo i makim olsem bai i gat ol man i stap king, olsem na bihain Jehova i bosim lain Israel long rot bilong ol king i sindaun long Jerusalem. (Lo 17:14-18) Tasol olsem wanem? Ol Israel i stap olsem wanpela lain pris? Orait tingim dispela: Ol i gat wanpela lain pris i mekim wok holi long haus lotu sel. Dispela haus lotu sel (na bihain haus lotu) em ples tru bilong ol Israel na ol lain i no Israel em ol i mas lotuim Jehova. Na lain Israel tasol i rot bilong ol manmeri bilong graun i ken kisim tok i tru em Jehova i kamapim long ples klia pinis. (2 Stori 6:32, 33; Rom 3:1, 2) Olgeta Israel i stap gut long Jehova—i no ol pris bilong lain Livai tasol—ol i “witnes” bilong Jehova. Ol Israel ol i “wokman” bilong Jehova, na em i mekim ol i kamap lain bilong em bilong ‘tokaut long biknem bilong em.’ (Aisaia 43:10, 21) Planti manmeri bilong ol narapela lain em ol i gat pasin daun, ol i bin lukim strong bilong Jehova long helpim lain bilong em na ol i laikim trupela lotu. Ol i kirap bihainim Lo Bilong Moses. (Josua 2:9-13) Tasol i gat wanpela lain tasol long Israel i mekim wok tru olsem pris em God i bin makim.
Ol Man Bilong Ol Narapela Lain
13, 14. (a) Olsem wanem yumi ken tok, ol manmeri bilong ol narapela lain i bihainim Lo Bilong Moses ol i no insait long kontrak bilong Lo? (b) Olsem wanem ol dispela manmeri bilong ol narapela lain i stap aninit long kontrak bilong Lo?
13 Orait olsem wanem long ol manmeri bilong ol narapela lain i stap wantaim ol Israel na ol i bihainim Lo Bilong Moses? Taim Jehova i mekim kontrak bilong em, em i mekim wantaim ol Israel tasol. Ol dispela “planti arapela lain manmeri” ol i stap, tasol ol i no insait long dispela kontrak. (Kisim Bek 12:38; 19:3, 7, 8) Na taim ol i mas skelim pe bilong baim bek ol namba wan pikinini bilong ol Israel, Jehova i no bungim ol namba wan pikinini bilong ol dispela manmeri bilong ol narapela lain i stap wantaim ol Israel. (Namba 3:44-51) Planti yia bihain, taim ol i tilim graun bilong Kenan long ol lain bilong Israel, ol i no makim sampela hap graun bilong ol bilipman i no bilong lain Israel. (Stat 12:7; Josua 13:1-14) Bilong wanem i olsem? Long wanem, Jehova i no bin mekim kontrak bilong Lo wantaim ol manmeri bilong ol narapela lain i bihainim Lo Bilong Moses, nogat. Tasol ol man bilong ol dispela narapela lain ol i katim skin olsem Lo i tok. Ol i bihainim ol tok bilong dispela Lo na ol i kisim ol gutpela samting bilong en. Ol manmeri bilong ol dispela narapela lain i sindaun wantaim ol Israel, ol i stap aninit long kontrak bilong Lo wankain olsem ol Israel.—Kisim Bek 12:48, 49; Namba 15:14-16; Rom 3:19.
14 Olsem: Sapos wanpela bilong ol dispela narapela lain i popaia na i kilim i dai wanpela man, em inap ranawe i go long wanpela taun bilong hait, olsem ol Israel inap mekim. (Namba 35:15, 22-25; Josua 20:9) Long Bikpela De Bilong God i Tekewe Sin Bilong Ol Manmeri, ol pris i mas kilim wanpela animal na mekim ofa long en bilong helpim “olgeta manmeri bilong Israel.” Ol dispela manmeri bilong ol narapela lain i bihainim Lo Bilong Moses, ol i insait long dispela lain, olsem kongrigesen, olsem na ol tu i insait long ol samting ol Israel i mekim long dispela de, na ofa i tekewe sin bilong ol tu. (Wok Pris 16:7-10, 15, 17, 29; Lo 23:7, 8) Ol manmeri bilong ol narapela lain i bihainim Lo Bilong Moses ol i pas gut wantaim ol Israel aninit long kontrak bilong Lo, olsem na long Pentikos bilong yia 33 C.E., taim aposel Pita i mekim wok long namba wan “ki bilong kingdom” bilong helpim ol Juda, ol dispela manmeri bilong ol narapela lain i bihainim lotu Juda ol tu i kisim gutpela samting long en. Olsem na ‘Nikolas, em i man bilong Antiok na i no wanpela Juda, tasol em i bihainim lotu bilong ol,’ em i kamap Kristen na em i insait long dispela “7-pela man” ol aposel i makim bilong tilim kaikai samting long ol manmeri long kongrigesen bilong Jerusalem.—Matyu 16:19; Aposel 2:5-10; 6:3-6; 8:26-39.
Jehova i Mekim Gut Long Lain Pikinini Bilong Abraham
15, 16. Olsem wanem na kontrak Jehova i bin mekim wantaim Abraham i kamap tru aninit long kontrak bilong Lo?
15 Jehova i bungim pinis ol tumbuna pikinini bilong Abraham olsem wanpela bikpela lain i stap aninit long Lo, na Jehova i mekim gut long ol olsem em i bin tok promis long Abraham. Long yia 1473 B.C.E., senis bilong Moses, em Josua, em i bringim ol Israel i go insait long Kenan. Orait taim ol i tilim graun long ol lain bilong Israel, dispela i truim tok promis bilong Jehova long givim dispela graun long lain pikinini bilong Abraham. Taim lain Israel i stap gut long Jehova, em i truim tok promis bilong em long helpim ol long daunim ol birua bilong ol. Jehova i truim moa yet dispela tok long taim King Devit i bosim Israel. Orait long taim bilong pikinini bilong Devit, em Solomon, namba 3 samting bilong tok promis Jehova i bin mekim long Abraham em i kamap tru. “Ol manmeri bilong Juda na Israel i bikpela lain tumas, inap olsem wesan bilong nambis. Ol i sindaun gut na ol i gat kaikai na dring na ol i amamas.”—1 King 4:20.
16 Tasol olsem wanem olgeta lain manmeri bai kisim blesing long rot bilong lain Israel, em ol tumbuna pikinini bilong Abraham? Olsem yumi tok pinis, lain Israel em ol manmeri tru bilong Jehova, olsem maus bilong Jehova namel long ol narapela lain. Klostu long taim ol Israel i laik go insait long Kenan, Moses i tok: “Ol manmeri bilong ol arapela kantri, yupela i mas litimapim nem bilong [olsem amamas wantaim] ol manmeri bilong God.” (Lo 32:43) Planti manmeri bilong ol narapela lain ol i bihainim dispela tok. Taim ol Israel i bin lusim Isip, “planti arapela lain manmeri” ol i kirap bihainim ol, na ol i lukim strong bilong Jehova long ples drai nating, na ol i bin harim singaut bilong Moses olsem ol i mas amamas. (Kisim Bek 12:37, 38) Bihain, Rut bilong lain Moap em i maritim Boas bilong lain Israel na em i kamap wanpela tumbuna meri bilong Mesaia. (Rut 4:13-22) Jonadap bilong lain Kin wantaim ol tumbuna pikinini bilong em, na Ebetmelek bilong Itiopia, tupela i strong long bihainim ol stretpela lo taim planti Israel bilong skin ol i no stap gut long Jehova. (2 King 10:15-17; Jeremaia 35:1-19; 38:7-13) Planti manmeri bilong ol narapela lain em ol i stap aninit long Gavman Persia, ol i kirap bihainim Lo Bilong Moses na ol i helpim ol Israel long mekim pait long ol birua bilong ol.—Esta 8:17.
Mas i Gat Nupela Kontrak
17. (a) Bilong wanem Jehova i rausim lain Israel long hap bilong not na hap bilong saut? (b) Wanem samting i kamap na bihain Jehova i rausim ol Juda olgeta na i no kisim bek ol moa?
17 Tasol bilong kisim olgeta gutpela samting bilong truim bilong tok promis bilong God, lain manmeri tru bilong God ol i mas i stap gut long em. Tasol ol i no mekim olsem. Tru, i gat sampela Israel em ol i gat strongpela bilip tru. (Hibru 11:32–12:1) Tasol planti taim lain Israel i lusim God na lotuim ol god haiden—ol i ting ol dispela god bai helpim ol long ol samting bilong skin. (Jeremaia 34:8-16; 44:15-18) Sampela ol i paulim tok bilong Lo bilong helpim ol yet o ol i givim baksait long en. (Nehemia 5:1-5; Aisaia 59:2-8; Malakai 1:12-14) Taim Solomon i dai pinis, lain Israel i bruk long tupela lain, olsem lain bilong not na lain bilong saut. Taim lain bilong not i bikhet olgeta long Jehova, em i tokaut olsem: “Ol manmeri i no save bihainim mi, olsem na bai ol i bagarap. Yupela ol pris tu i no save bihainim mi na yupela i sakim pinis tok bilong mi. Olsem na bai mi rausim yupela.” (Hosea 4:6) Lain bilong saut tu i kisim bikpela strafe, long wanem, ol i no bihainim tok bilong kontrak. (Jeremaia 5:29-31) Na taim ol Juda i sakim Jisas na ol i no bilip olsem em i Mesaia, Jehova i sakim ol. (Aposel 3:13-15; Rom 9:31–10:4) Orait bihain Jehova i kamapim nupela pasin bambai olgeta samting bilong kontrak em i bin mekim wantaim Abraham i ken kamap tru.—Rom 3:20.
18, 19. Jehova i kamapim wanem nupela pasin bambai kontrak em i bin mekim wantaim Abraham em inap kamap tru olgeta?
18 Dispela nupela pasin Jehova i kamapim, em nupela kontrak. Jehova i tok profet long dispela kontrak taim em i tok: “Harim. Mi makim pinis wanpela taim na bai mi mekim nupela kontrak wantaim ol lain bilong Israel na ol lain bilong Juda. . . . Dispela nupela kontrak mi laik mekim wantaim ol manmeri bilong Israel, em i olsem. Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi.”—Jeremaia 31:31-33.
19 Em dispela nupela kontrak Jisas i bin toktok long en long Nisan 14 long yia 33 C.E. Long dispela taim em i kamapim long ples klia olsem dispela kontrak Jehova i bin tok promis long kamapim, nau em i laik kamapim namel long em na ol disaipel bilong Jisas, na Jisas bai stap namelman bilong en. (1 Korin 11:25; 1 Timoti 2:5; Hibru 12:24) Long rot bilong dispela nupela kontrak, tok promis Jehova i bin mekim long Abraham bai kamap tru na i stap longtaim, winim olpela kontrak, na truim bilong en bai i gutpela moa yet, olsem yumi bai lukim long stori i kamap bihain long dispela.
Yu Inap Stori Long Dispela?
◻ Jehova i mekim wanem tok promis long kontrak em i bin mekim wantaim Abraham?
◻ Kontrak Jehova i bin mekim wantaim Abraham, olsem wanem Jehova i kamapim truim bilong en long lain Israel bilong skin?
◻ Olsem wanem olpela kontrak i bin helpim ol manmeri bilong ol narapela lain em ol i bihainim Lo Bilong Moses?
◻ Bilong wanem i mas i gat nupela kontrak?
5. Tok promis Jehova i bin mekim long Abraham em i insait long wanem bikpela tok profet?
9. (a) Long rot bilong kontrak Jehova i bin mekim wantaim Abraham, Jehova i tok promis long wanem 4-pela samting? (b) Long kontrak Jehova i mekim wantaim lain Israel, wanem gutpela samting inap painim ol? Tasol ol i mas mekim wanem?
[Piksa long pes 9]
Long rot bilong kontrak bilong Lo, Jehova i kamapim wanpela piksa i olsem truim bilong kontrak em i bin mekim wantaim Abraham