Ol Gutpela Samting Yumi Inap Kisim—Yu Ting Olsem Wanem Long En?
“Papa bilong mi . . . i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet.”—MATYU 25:34.
1. Ol man i bin kisim wanem ol samting long papamama o tumbuna bilong ol?
OLGETA manmeri bilong graun i bin kisim sampela samting long papamama o ol tumbuna. Sampela i bin kisim gutpela sindaun na planti samting bilong skin. Sampela i bin kisim sindaun bilong ol rabisman. Na sampela tumbuna i bin painim taim nogut, o ol i bin harim sampela stori, na dispela i mekim na ol i bel nogut tru long sampela lain, na dispela pasin bilong ol i kalap long ol pikinini na tumbuna pikinini bilong ol. Tasol i gat wanpela samting em yumi olgeta i bin kisim. Yumi olgeta i bin kisim sin long namba wan man, Adam. Dispela samting yumi bin kisim long em, dispela i mekim na yumi save dai.—Saveman 9:2, 10; Rom 5:12.
2, 3. Long pastaim tru Jehova i wokim rot bambai ol pikinini bilong Adam tupela Iv i ken kisim wanem ol gutpela samting? I gat wanem as na ol i no kisim ol dispela gutpela samting?
2 Jehova em i gutpela Papa i stap long heven, olsem na long pastaim tru em i laik givim narapela kain samting tru long ol man, em laip i stap oltaim long Paradais, na skin bilong ol bai i gutpela olgeta. Taim God i bin wokim tupela tumbuna bilong pastaim, em Adam tupela Iv, skin bilong tupela i gutpela olgeta, no gat sin long en. God Jehova i givim dispela graun olgeta long ol man olsem presen. (Song 115:16) Em i givim gaden Iden long ol na ol i ken save, bihain olgeta hap bilong graun bai kamap olsem; na tu, em i givim wanpela gutpela wok tru long dispela tupela tumbuna bilong yumi. Tupela i mas kamapim pikinini, na lukautim graun na olgeta diwai na purpur samting na ol animal na pisin samting i stap long en, na ol i mas skruim Paradais i go bikpela na bai em inapim olgeta hap bilong graun. (Stat 1:28; 2:8, 9, 15) Ol pikinini bilong ol bai insait long ol dispela wok. Man! Em gutpela samting tru tupela inap givim long ol pikinini bilong ol!
3 Tasol bilong kisim ol dispela gutpela samting, Adam na Iv wantaim ol pikinini bilong tupela ol i mas pas gut wantaim God. Ol i mas laikim tru Jehova na bihainim tok bilong em, na dispela i olsem dinau ol i mas bekim long em. Tasol Adam tupela Iv i no tenkyu long ol samting God i bin givim long ol, na ol i bikhet na i no bihainim lo bilong em. Em nau, tupela i mas lusim ples Paradais bilong ol, na ol gutpela gutpela samting God i tok long givim long ol i lus pinis long tupela. Olsem na tupela i no inap givim ol dispela samting long ol pikinini bilong ol.—Stat 2:16, 17; 3:1-24.
4. Olsem wanem yumi inap kisim ol dispela gutpela samting em Adam i bin lusim?
4 Tasol Jehova i marimari long ol man na em i wokim rot bambai ol pikinini bilong Adam na Iv i gat rot long kisim ol samting em Adam i bin lusim. Jehova i mekim olsem wanem? Long taim em yet i makim, Pikinini bilong em yet, Jisas Krais, em i dai na givim laip bilong em olsem man i gutpela olgeta bilong helpim ol pikinini bilong Adam. Long dispela rot Krais i baim olgeta pikinini bilong Adam. Tasol ol i no inap kisim nating ol dispela gutpela samting, nogat. Ol i mas i stap gut long ai bilong God na em i orait long ol, na bilong mekim olsem ol i mas bilip long ofa bilong Jisas em inap tekewe sin bilong ol man, na bilong kamapim dispela bilip ol i mas bihainim tok bilong God. (Jon 3:16, 36; 1 Timoti 2:5, 6; Hibru 2:9; 5:9) Olsem wanem long yu? Wokabaut bilong yu i kamapim klia olsem yu amamas long dispela samting God i bin mekim bilong helpim yumi?
Ol Samting Ol Pikinini Bilong Abraham i Kisim Long Rot Bilong Em
5. Olsem wanem Abraham i kamapim bel bilong em olsem em i amamas long i stap pren bilong Jehova?
5 Taim Jehova i wok long mekim ol samting bilong kamapim laik bilong em long dispela graun, em i tingim Abraham na i mekim wanpela bikpela samting long em. Em i tokim dispela bilipman long lusim kantri bilong em na go long wanpela hap em God yet bai soim long em. Abraham i bihainim tok bilong God. Taim Abraham i kamap pinis long dispela hap, Jehova i tok ol lain tumbuna pikinini bilong Abraham bai kisim dispela graun olsem samting ol i bin kisim long Abraham, tasol Abraham yet i no ken kisim. (Stat 12:1, 2, 7) Orait Abraham i ting olsem wanem long dispela? Em i orait long mekim wok bilong Jehova long wanem hap na long wanem pasin God i makim, bambai ol tumbuna pikinini bilong em i ken kisim dispela graun. Abraham i mekim wok bilong Jehova long graun i no bilong em, na em i mekim olsem inap 100 yia, i go inap long taim em i dai. (Stat 12:4; 25:8-10) Sapos yu bin i stap long dispela taim, bai yu mekim olsem? Jehova i tok, Abraham em “pren” bilong em.—Aisaia 41:8.
6. (a) Abraham i kamapim klia wanem samting taim em i orait long kilim pikinini bilong em olsem ofa? (b) Wanem gutpela samting tru Abraham inap givim long ol pikinini bilong em?
6 Abraham i bin wet inap planti yia long kisim wanpela pikinini man, Aisak, na Abraham i laikim em tumas. Orait taim dispela pikinini i kamap olsem yangpela man, Jehova i tokim Abraham long kisim pikinini bilong em na givim long Jehova olsem ofa. Abraham i no save olsem em bai mekim wanpela samting i makim samting God yet bai mekim, olsem Em bai givim Pikinini bilong em olsem wanpela ofa bilong baim bek ol man. Tasol Abraham i bihainim tok bilong God na taim em i laik kilim Aisak olsem ofa, ensel bilong Jehova i pasim em. (Stat 22:9-14) Jehova i tok pinis olsem ol promis em i bin mekim long Abraham ol bai kamap tru long rot bilong Aisak. Olsem na Abraham i bilip tru olsem God inap kirapim bek Aisak sapos em i mas mekim olsem, maski kain samting olsem i no bin kamap bipo. (Stat 17:15-18; Hibru 11:17-19) Abraham i no pasim pikinini bilong em, olsem na Jehova i tokaut olsem: “Long rot bilong pikinini bilong yu olgeta lain bilong graun bai kisim blesing.” (Stat 22:15-18, NW ) Dispela i makim olsem dispela Pikinini em Stat 3:15 (NW ) i toktok long en, em Mesaia bilong kisim bek ol man, em bai kamap long lain bilong Abraham. Man! Em gutpela samting tru Abraham inap givim long ol pikinini bilong em!
7. Olsem wanem Abraham, Aisak, na Jekop i kamapim olsem ol i amamas tru long gutpela samting ol i kisim?
7 Abraham i no save long as bilong samting Jehova i mekim long dispela taim, na i wankain tu long pikinini bilong em, Aisak, na tumbuna pikinini bilong em, Jekop, em “ol man God i bin promis long givim dispela graun long ol.” Tasol olgeta i bilip long Jehova. Ol i no laik sindaun long wanpela taun i stap long dispela kantri na kamap olsem man bilong dispela ples, long wanem, ol i wetim samting i gutpela moa—em wanpela “taun i stap strong tru, em dispela taun God wanpela tasol i bin tingim pasin bilong wokim na em yet i bin wokim.” (Hibru 11:8-10, 13-16) Tasol i no olgeta tumbuna pikinini bilong Abraham i pilim olsem ol samting ol inap kisim long rot bilong Abraham i gutpela samting tru.
Sampela i Ting Em Pipia Nating Tasol
8. Olsem wanem Iso i kamapim olsem em i no pilim olsem samting em inap kisim long papa bilong em i gutpela samting tru?
8 Iso em i namba wan pikinini man bilong Aisak, olsem na em i bilong kisim ol samting bilong namba wan pikinini. Tasol em i ting dispela i samting nating. Em i no tingim ol samting i holi. Orait, wanpela taim Iso i hangre, olsem na em i larim brata bilong em, Jekop, i baim namba bilong em olsem namba wan pikinini. Jekop i baim long wanem samting? Em i givim sampela bret wantaim sup long Iso! (Stat 25:29-34; Hibru 12:14-17) Ol tok promis God i bin mekim long Abraham ol i bilong kamap tru long rot bilong lain tumbuna pikinini bilong Jekop, em God i bin senisim nem bilong em na kolim em Israel. Orait dispela gutpela samting em lain bilong Jekop i kisim long em, dispela i opim rot bilong ol long mekim wanem?
9. Ol tumbuna pikinini bilong Jekop, o Israel, i bin kisim ol gutpela samting bilong spirit long em, olsem na Jehova i kisim bek ol long wanem samting?
9 Long taim bilong bikpela hangre, Jekop wantaim lain bilong em ol i go sindaun long Isip. Long dispela hap ol i kamap planti moa yet olsem wanpela bikpela lain tru, tasol ol i kamap wokboi nating tu. Tasol Jehova i no lusim tingting long kontrak em i bin mekim wantaim Abraham. Long taim God i makim, em i kisim bek ol Israel long kalabus na em i toksave long ol olsem em bai bringim ol i go long “wanpela bikpela graun i gat planti gris na ol kaikai i save kamap gutpela tumas,” em dispela graun God i bin tok promis long givim long Abraham.—Kisim Bek 3:7, 8; Stat 15:18-21.
10. Long maunten Sainai, wanem ol narapela kain samting moa i kamap na i insait long ol samting ol Israel inap kisim long ol tumbuna bilong ol?
10 Taim ol Israel i wokabaut i go long Graun Bilong Promis, Jehova i bungim ol long maunten Sainai. Long dispela hap em i tokim ol: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem ol pris. Na bai yupela i stap ol manmeri tru bilong mi.” (Kisim Bek 19:5, 6) Olgeta manmeri i wanbel long dispela tok, na nau Jehova i kirap na i givim Lo bilong em long ol—em samting em i no bin mekim long narapela lain.—Song 147:19, 20.
11. Wanem ol gutpela samting tru bilong spirit ol Israel inap kisim?
11 Man! Dispela nupela lain ol inap kisim gutpela samting tru bilong spirit! Ol i lotuim dispela God em wanpela tasol i God tru. Em i bin kisim bek ol long Isip na ol i lukim ol narapela kain samting tru i kamap taim God i givim Lo long ol long maunten Sainai. Bihain ol i kisim narapela gutpela samting, olsem: Long rot bilong ol profet, God i givim sampela tok moa bilong em long ol. (Rom 3:1, 2) Jehova i makim ol long i stap olsem witnes bilong em. (Aisaia 43:10-12) Pikinini bilong promis, em Mesaia, em bai kamap insait long lain bilong ol. Lo i makim em, na Lo bai helpim ol long luksave long em na helpim ol long pilim tru olsem em i mas i kam bilong helpim ol. (Galesia 3:19, 24) Na tu, God bai givim rot long ol long wok wantaim dispela Mesaia olsem wanpela lain pris na lain holi.—Rom 9:4, 5.
12. Ol Israel i bin go insait long Graun Bilong Promis, tasol wanem gutpela samting i no painim ol? Bilong wanem?
12 Jehova i truim tok promis bilong em na em i bringim ol Israel i go long Graun Bilong Promis. Tasol olsem aposel Pol i tok, ol i no bilip, olsem na dispela graun i no stap olsem “ples malolo” tru. Dispela lain i no go insait long “malolo bilong God,” long wanem, ol i no pilim as na God i gat de malolo bilong em yet, na ol i no mekim wok i stret wantaim laik bilong God long dispela de malolo bilong en, em i kirap bihain long taim God i bin wokim Adam na Iv.—Hibru 4:3-10.
13. Lain Israel i no amamas long ol gutpela samting bilong spirit ol inap kisim, olsem na wanem samting i tekewe long ol?
13 Lain Israel bilong skin i gat rot long inapim dispela lain em ol bai wok wantaim Mesaia long Kingdom bilong em long heven na i stap olsem wanpela lain pris na lain holi. Tasol ol Israel i no amamas long dispela gutpela samting ol inap kisim. Taim Mesaia i kam, liklik hap lain tasol bilong ol Israel bilong skin i bilip long em. Olsem na liklik namba tasol i insait long kingdom i gat lain pris, em Baibel i tok profet long en. God i rausim Kingdom long han bilong lain Israel bilong skin na em i “givim long wanpela lain manmeri ol i save kamapim kaikai bilong dispela kingdom.” (Matyu 21:43) Wanem dispela lain?
Ol i Kisim Gutpela Samting Long Heven
14, 15. (a) Taim Jisas i dai pinis, olsem wanem ol narapela lain i kisim blesing long rot bilong “pikinini” bilong Abraham? (b) “Lain Israel tru bilong God” i kisim wanem ol samting?
14 Dispela lain em God i givim Kingdom long ol, em “lain Israel tru bilong God,” olsem Israel bilong spirit, i gat 144,000 disaipel bilong Jisas Krais long en, em God i bin mekim ol i kamap pikinini bilong em long rot bilong spirit holi. (Galesia 6:16; KTH 5:9, 10; 14:1-3) Sampela bilong dispela lain 144,000 ol i Juda bilong skin, tasol planti ol i bilong ol narapela lain. Long dispela rot, tok promis Jehova i bin mekim long Abraham, olsem long rot bilong “pikinini” bilong em olgeta lain bilong graun bai kisim blesing, em i kirap long kamap tru. (Aposel 3:25, 26; Galesia 3:8, 9) Long dispela namba wan truim, God Jehova i makim ol manmeri bilong ol narapela lain long spirit holi na em i kisim ol olsem pikinini bilong em long spirit na brata bilong Jisas Krais. Olsem na ol tu i kamap olsem ol nambatu “pikinini” bilong Abraham.—Galesia 3:28, 29.
15 Klostu long taim Jisas i dai, em i tokim ol Juda bilong dispela nupela lain olsem God bai kamapim nupela kontrak wantaim ol, na blut bilong Jisas yet bai strongim dispela kontrak. Sapos ol i bilip long dispela ofa, orait ol manmeri em God i kisim ol bilong i stap insait long nupela kontrak, ol bai ‘kamap gutpela na i stap olsem inap oltaim oltaim.’ (Hibru 10:14-18) God inap “mekim [ol] i kamap stretpela manmeri” na lusim ol sin bilong ol. (1 Korin 6:11) Olsem na long dispela samting ol i wankain olsem Adam taim em i no mekim sin yet. Tasol dispela lain i no bilong i stap long wanpela paradais long graun, nogat. Jisas i tok em bai i go na redim wanpela ples bilong ol long heven. (Jon 14:2, 3) Ol i lusim gutpela sindaun ol inap kisim long graun bambai ol i ken kisim “gutpela laip bilong heven.” (1 Pita 1:4) Ol i gat wanem wok long heven? Jisas i tokaut long dispela, olsem: “Mi givim kingdom long yupela.”—Luk 22:29.
16. Ol Kristen God i bin makim ol bai kisim wanem gutpela wok tru long bihain?
16 Ol lain bilong mekim wok king wantaim Krais ol bai stap long heven na helpim em long rausim olgeta pasin bilong bikhet long wok king bilong Jehova, na dispela pasin i no ken stap moa long graun. (KTH 2:26, 27) Ol i nambatu lain pikinini bilong Abraham long spirit, olsem na ol bai insait long wok bilong helpim ol manmeri bilong olgeta lain na bai ol i ken kisim laip i gutpela olgeta. (Rom 8:17-21) Tru tumas, dispela lain bai kisim gutpela samting tru long heven!—Efesus 1:16-18.
17. Ol Kristen God i bin makim, ol i kisim wanem ol gutpela samting taim ol i stap yet long graun?
17 Tasol ol gutpela samting em liklik lain bilong Jisas bai kisim, i no ol samting bilong bihain tasol, nogat. Long pasin Jisas tasol inap mekim, em i bin helpim ol long kisim save long Jehova, em wanpela tasol i God tru. (Matyu 11:27; Jon 17:3, 26) Long tok na long pasin bilong em, em i skulim ol long insait bilong dispela tok “wet tasol long God,” na ol i mas mekim wanem bilong bihainim tok bilong Jehova. (Hibru 2:13; 5:7-9) Jisas i givim save bilong tok i tru long ol, em tok bilong ol samting God i laik mekim, na em i tokim ol olsem spirit holi bai stiaim ol i go na bihain ol bai save gut long en. (Jon 14:24-26) Em i putim gut long tingting na bel bilong ol olsem Kingdom bilong God i bikpela samting tru. (Matyu 6:10, 33) Na tu, Jisas i givim wok long ol long autim tok na kamapim ol disaipel long Jerusalem, Judia, Samaria, na i go inap long olgeta hap bilong graun.—Matyu 24:14; 28:19, 20; Aposel 1:8.
Gutpela Samting Tru Em Bikpela Lain Bai Kisim
18. Tok promis bilong Jehova long olgeta lain bai kisim blesing long rot bilong “pikinini” bilong Abraham, olsem wanem em i wok long kamap tru long nau?
18 Yumi ken ting namba olgeta bilong lain Israel bilong spirit, em “liklik lain” bilong kisim Kingdom, em inap pinis. (Luk 12:32) Inap planti yia pinis Jehova i bin stiaim wok bilong bungim ol narapela manmeri, em wanpela bikpela lain ol i bilong olgeta kantri. Olsem na tok promis Jehova i bin mekim long Abraham, olsem olgeta lain bai kisim blesing long rot bilong “pikinini” bilong em, dispela tok promis i wok long kamap tru moa yet. Ol dispela lain tu i amamas long lotuim Jehova na mekim wok bilong em. Na ol i save olsem ol i mas bilip long Pikinini Sipsip Bilong God, em Jisas Krais, bambai ol i ken kisim laip i stap oltaim. (KTH 7:9, 10) Jehova i singautim ol man long kam insait long dispela lain i stap amamas. Orait olsem wanem long yu? Yu bihainim dispela singaut bilong em?
19. Ol manmeri bilong ol narapela lain em ol i kisim ol blesing long nau, ol i wet long kisim wanem gutpela samting?
19 Jehova i laik givim wanem gutpela samting tru long ol manmeri i no bilong liklik lain? Tru, em i no wanpela gutpela samting i stap long heven, nogat. Em dispela samting Adam inap givim long ol pikinini bilong em, olsem ol inap tingting long kisim laip i stap oltaim na i stap gutpela olgeta long wanpela paradais em isi isi bai kamap long olgeta hap bilong graun. Long dispela paradais, “ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:4) Olsem na Baibel i tokim yu yet olsem: “Yu mas bilip tru long God, na mekim gutpela pasin. Yu mekim olsem na bai yu stap gut oltaim long graun bilong yu, na i no gat wanpela samting i ken bagarapim yu. Yu mas amamas long Bikpela, na em bai i givim yu ol samting yu laikim tru. I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.”—Song 37:3, 4, 10, 11, 29.
20. Olsem wanem na “ol arapela sipsip” ol i kisim planti gutpela samting bilong spirit em ol i bilong ol Kristen God i bin makim?
20 “Ol arapela sipsip” bilong Jisas ol bai kisim gutpela samting long dispela graun em Kingdom bilong God bai bosim. (Jon 10:16a) Ol i no ken i stap long heven, tasol planti gutpela samting bilong spirit em liklik lain i kisim, ol i givim long ol dispela arapela sipsip. Long rot bilong dispela lain “wokboi i gat gutpela tingting” em God i bin makim ol, ol dispela arapela sipsip i klia gut long ol gutpela tok promis i stap long Baibel. (Matyu 24:45-47; 25:34) Liklik lain God i bin makim na ol arapela sipsip, tupela lain wantaim ol i save long Jehova, em wanpela tasol i God tru, na ol i save lotuim em wantaim. (Jon 17:20, 21) Tupela lain i save bung wantaim long tok tenkyu long God long dispela ofa bilong Jisas i gat strong long tekewe sin bilong ol man. Ol i save mekim wok bilong God wantaim olsem wanpela lain sipsip i stap aninit long wanpela Wasman tasol, em Jisas Krais. (Jon 10:16b) Olgeta wantaim ol i insait long bikpela lain i stap long olgeta hap, em narapela i save laikim tru narapela. Ol i save wok wantaim long wok bilong i stap olsem Witnes Bilong Jehova na bilong Kingdom bilong em. Em nau, sapos yu wanpela wokman bilong Jehova i dediket na baptais pinis, ol dispela gutpela samting bilong spirit ol i bilong yu tu.
21, 22. Yumi olgeta i ken mekim wanem bilong kamapim olsem yumi laikim tru ol gutpela samting bilong spirit yumi kisim?
21 Olsem wanem long yu? Yu save laikim tumas ol dispela gutpela samting bilong spirit yu kisim? Yu ting em i gutpela samting tru na yu putim wok bilong mekim laik bilong God i stap olsem nambawan bikpela samting bilong yu? Bilong makim olsem, yu save bihainim tok em Baibel na oganaisesen bilong God i givim long yumi, olsem yumi mas i go oltaim long olgeta miting bilong kongrigesen Kristen? (Hibru 10:24, 25) Dispela gutpela samting yu kisim, yu ting em i bikpela samting tru na yu wok yet long mekim wok bilong God maski i gat ol hevi i painim yu? Na olsem wanem? Yu pilim tru dispela gutpela samting yu kisim na dispela i strongim yu long sakim ol traim i kamap bilong pulim yu long bihainim wanpela rot na ating bihain yu mas lusim ol dispela gutpela samting yu bin kisim?
22 Yumi olgeta i mas laikim tumas ol dispela gutpela samting bilong spirit God i bin givim long yumi. Yumi lukluk i go long dispela Paradais bai kamap bihain, na taim yumi wok long mekim olsem, yumi mas insait tru long ol gutpela wok bilong spirit God i givim long yumi long nau. Sapos pasin bilong pas gut wantaim Jehova i as bilong olgeta samting yumi save mekim, orait yumi kamapim klia olsem yumi laikim tru ol gutpela samting God i givim long yumi. I gutpela tru long yumi ken insait long dispela lain ol i tokaut olsem: “God na king bilong mi, bai mi tokaut long biknem bilong yu. Na oltaim oltaim bai mi tok tenkyu long yu.”—Song 145:1.
Bai Yu Stori Olsem Wanem?
• Sapos Adam i bin stap gut long God, yumi inap kisim wanem ol gutpela samting long em?
• Ol pikinini bilong Abraham i ting olsem wanem long ol dispela gutpela samting ol inap kisim?
• Lain bilong Krais em God i bin makim ol, ol i bilong kisim wanem ol gutpela samting?
• Wanem ol gutpela samting em bikpela lain inap kisim? Olsem wanem ol i ken kamapim olsem ol i amamas tru long gutpela samting ol inap kisim?
[Ol Piksa long pes 20]
God i tok promis long ol tumbuna pikinini bilong Abraham bai kisim gutpela samting tru long em
[Ol Piksa long pes 23]
Yu amamas long ol gutpela samting bilong spirit yu kisim?