Ol Man i Askim

Bilong Wanem Ol Witnes Bilong Jehova i No Save Yusim Ol Imis Long Lotu?

Long olgeta hap bilong graun, ol Hindu, Budis, Katolik, na ol lain bilong Misin Otodoks, ol i tingim pasin bilong mekim wok long ol imis o piksa olsem em i bikpela samting long lotu bilong ol. Long sampela hap bilong Afrika, ol man i save lotu long ol piksa ol i bin sapim long diwai o ston. Ol i bilip olsem wanpela god o spirit bilong en i stap long ol dispela kaving.

Tasol ol Witnes Bilong Jehova i no save mekim wok long ol imis o piksa samting long lotu bilong ol. Sapos yu go long Haus Kingdom bilong ol we ol i save bung, bai yu no lukim piksa bilong “ol santu” o stetiu bilong Jisas o Maria.a Bilong wanem? Tingim ol tok Baibel i mekim long dispela samting.

God i Laik Bai Ol Israel i Mas Mekim Wanem?

God Jehova i helpim ol Israel long lusim Isip na bihain em i tok klia long ol long pasin ol i mas bihainim bilong lotuim em. Namba 2 lo bilong ol Tenpela Lo i tok: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru.”​​—⁠Kisim Bek 20:​4, 5.

Long wankain taim God i givim ol dispela lo long Moses, ol Israel i wokim wanpela bulmakau gol​—⁠ating ol i bihainim pasin bilong ol Isip em ol i save lotuim ol animal. Tasol ol i no kolim nem bilong wanpela god bilong Isip long dispela imis. Ol i mekim wok long dispela imis bilong lotu long Jehova. (Kisim Bek 32:​5, 6) God i mekim wanem? Em i belhat tru long ol man i adorim dispela imis, na Moses i bagarapim dispela imis.​​—⁠Kisim Bek 32:​9, 10, 19, 20.

Bihain, God Jehova i skruim sampela tok moa long dispela namba 2 lo. Long maus bilong Moses, em i tokim ol Israel: “Yupela i mas lukaut gut bai yupela i no wokim wanpela giaman god. Sapos yupela i mekim olsem bai yupela i mekim pasin nogut. Maski wokim piksa bilong man o meri o animal o pisin o snek o pis, na mekim dispela piksa i kamap god bilong yupela.” (Lo 4:​15-​18) Tru tumas, God i no laik bai ol Israel i mekim wok long ol piksa samting bilong lotuim em.

Tasol bihain ol Israel i kirap lotuim ol god giaman. Bilong stretim tingting bilong ol, Jehova i salim ol profet i go long ol na ol i tokaut long strafe bai painim ol Israel, long wanem, ol i lotu long ol god giaman. (Jeremaia 19:​3-5; Amos 2:⁠8) Lain Israel i sakim ol dispela tok lukaut, olsem na long 607 B.C.E., Jehova i larim ol Babilon i bagarapim Jerusalem na kisim ol Israel i go kalabus.​​—⁠2 Stori 36:​20, 21; Jeremaia 25:​11, 12.

Wanem Tingting Bilong Ol Kristen Bilong Pastaim?

Taim ol man i no Juda i kamap Kristen long taim bilong ol aposel, ol i no moa yusim ol imis bilong lotu long God. Tingim tok em Demitrius​—⁠wanpela man long Efesus husat i save wokim ol samting long silva na i gat bisnis long wokim ol imis​—⁠i mekim long wok autim tok bilong aposel Pol. Em i tok: “Ol wanwok, yupela i save, gutpela pe bilong yumi em i save kamap long wok bisnis yumi save mekim. Na dispela man Pol em i save pulim bikpela lain manmeri na i paulim tingting bilong ol, olsem yupela i lukim na harim pinis. Na em i no mekim dispela pasin long taun Efesus tasol. Nogat. Klostu em inapim olgeta hap bilong provins Esia. Em i save tok, ‘Ol god yumi wokim long han, ol i no god tru.’ ”​​—⁠Aposel 19:​25, 26.

Tok Pol yet i mekim i soim olsem dispela tok bilong Demitrius i tru. Taim Pol i toktok wantaim ol Grik long Atens, em i tok: “Yumi no ken ting God em i olsem gol na silva na ston. Na yumi no ken ting em i olsem ol samting yumi man i save wokim long han na tingting bilong yumi yet. ‘Bipo ol man i no gat save, na God i no toktok planti long ol samting ol i bin mekim long dispela taim. Tasol nau em i tok strong long olgeta man long olgeta ples i mas tanim bel.’ ” (Aposel 17:​29, 30) Na taim Pol i raitim pas long ol man long Tesalonaika, em i mekim tok amamas long ol olsem: “Yupela i bin lusim ol giaman god [“ol imis,” NW ] na tanim bel i go long God tru.”​​—⁠1 Tesalonaika 1:⁠9.

Tasol i no Pol tasol i mekim kain tok olsem, aposel Jon tu i tok ol Kristen i no ken mekim wok long ol imis long lotu bilong ol. Inap olsem 100 yia bihain long taim mama i karim Jisas, Jon i tok strong long ol Kristen: “Yupela i mas i stap longwe long olgeta giaman god [“ol imis,” NW ].​​—⁠1 Jon 5:​21.

Ol Witnes Bilong Jehova i bihainim tok bilong God em i tokaut klia olsem ol man i no ken mekim wok long ol piksa o imis samting taim ol i lotuim em. Ol i bilip long dispela tok God Jehova i mekim: “Mi tasol mi Bikpela. Bikpela, em nem bilong mi, na yupela i mas givim biknem long mi wanpela tasol. Yupela i no ken litimapim nem bilong ol giaman god [“ol imis,” NW ], em ol man yet i wokim.”​​—⁠Aisaia 42:⁠8.

[Futnot]

[Rait long pes 31]

“Mi tasol mi Bikpela. Bikpela, em nem bilong mi, na yupela i mas givim biknem long mi wanpela tasol. Yupela i no ken litimapim nem bilong ol giaman god [“ol imis,” NW ], em ol man yet i wokim.”​—⁠Aisaia 42:8