“Jehova, Em i God Bilong Marimari na Sori”
“Jehova, Jehova, em i God bilong marimari na sori, na em i no save belhat kwik; em i save laikim tru ol manmeri na em i save tok tru oltaim.”—KISIM BEK 34:6, NW.
WANPELA papa Kristen i tok: “Pikinini meri i tokim mi olsem em i no laik i stap moa insait long kongrigesen Kristen. Inap sampela de na wik na mun bihain, mi pilim olsem mi gat bikpela pen tru long skin bilong mi. Sapos mi dai, em i no nogut olsem dispela pen mi bin kisim.” Tru tumas, taim wanpela long famili i lusim rot bilong lotuim Jehova, dispela i save givim bikpela bel hevi tru long yumi. Olsem wanem? Dispela samting i bin painim yu? Sapos olsem, orait yu ken save Jehova i pilim tru hevi bilong yu, na dispela save bai mekim gut bel bilong yu. (Kisim Bek 3:7; Aisaia 63:9) Tasol Jehova i ting olsem wanem long ol dispela manmeri i bin mekim rong? Baibel i tok, Jehova i marimari long ol na em i singautim ol long mekim ol samting bambai em i ken orait gen long ol. Em i tokim ol bikhetlain Juda long taim bilong Malakai: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.”—Malakai 3:7.
2 Long maunten Sainai God i kamapim klia marimari bilong em long Moses. Em i kamapim pasin bilong em yet olsem “God bilong marimari na sori, na em i no save belhat kwik; em i save laikim tru ol manmeri na em i save tok tru oltaim.” (Kisim Bek 34:6, NW) Dispela tok Jehova i mekim i soim olsem pasin marimari em i wanpela pasin tru bilong em. Aposel Pita i tok: “[God] i laik bai olgeta man i mas tanim bel.” (2 Pita 3:9) Tasol marimari bilong God i gat mak bilong en. Em i tokim Moses: “Mi save mekim save long ol man i gat asua.” (Kisim Bek 34:7; 2 Pita 2:9) Tasol ‘God em i as bilong pasin bilong laikim ol arapela,’ na pasin marimari em i insait tru long dispela pasin bilong em. (1 Jon 4:8; Jems 3:17) “Kros bilong [Jehova] i no save stap oltaim,” na em i save “amamas long mekim gutpela pasin” long yumi.—Maika 7:18, 19.
3. Olsem wanem tingting bilong Jisas long marimari i narapela kain long tingting bilong ol saveman bilong lo na ol Farisi?
3 Taim Jisas i stap long graun, em i piksa tru bilong Papa bilong em i stap long heven. (Jon 5:19) Em i bin mekim pasin marimari long ol man i mekim rong, tasol i no olsem em i orait long rong ol i bin mekim, nogat. Dispela marimari bilong em i wankain olsem pasin sori em i bin mekim long ol man i gat sik bilong skin. (Skelim wantaim Mak 1:40, 41.) Em nau, Jisas i bungim pasin marimari wantaim “olgeta bikpela hap tok” bilong Lo bilong God. (Matyu 23:23) Tasol ol saveman bilong lo na ol Farisi i narapela kain. Taim ol i mekim kot, ol i strong tumas long bihainim ol lo ol yet i bin kamapim, na i no gat marimari long en. Taim ol i lukim Jisas i bung wantaim ol sinman, ol i tok kros olsem: “Dispela man i save pren wantaim ol man bilong mekim sin na em i save kaikai wantaim ol.” (Luk 15:1, 2) Orait, bilong bekim tok long ol dispela man i bin sutim tok long em, em i mekim 3-pela tok piksa, na olgeta wan wan i kamapim pasin sori bilong God.
4. Jisas i mekim wanem tupela tok piksa? Wanem as bilong dispela tupela tok piksa?
4 Long namba wan tok piksa, Jisas i stori long wanpela man i bin lusim 99 sipsip bilong em na em i go painim wanpela sipsip i lus. Bilong wanem Jisas i mekim dispela tok piksa? Em i tok: “Wankain amamas i save kamap long heven taim wanpela man bilong mekim sin i tanim bel. Tru, ol i save amamas long 99 man i stretpela pinis na i no gat wok long tanim bel. Tasol sapos wanpela man bilong mekim sin em i tanim bel, orait ol i save amamas moa moa yet.” Orait nau Jisas i stori long wanpela meri em i wok long painim wanpela mani bilong em, olsem wan kina i lus, na taim em i painim pinis em i amamas tru. Jisas i kamapim insait bilong dispela stori na em i tok: “Wankain amamas i save kamap namel long ol ensel bilong God taim wanpela man bilong mekim sin em i tanim bel.” Long namba 3 stori Jisas i mekim wanpela tok piksa gen.a Planti man i ting dispela em i wanpela gutpela stori tru, winim olgeta narapela sotpela stori ol man i bin kamapim. Taim yumi skelim dispela tok piksa, dispela bai helpim yumi long pilim tru pasin marimari bilong God na bihainim dispela pasin.—Luk 15:3-10.
Pikinini i Bikhet na Lusim Papa
5, 6. Long namba 3 tok piksa bilong Jisas, olsem wanem dispela namba tu pikinini i soim olsem em i no pilim ol gutpela pasin papa i mekim long em?
5 “Wanpela man i gat tupela pikinini man. Na namba 2 pikinini i tokim papa olsem, ‘Papa, mi ting long olgeta samting yu laik tilim long mi wantaim brata bilong mi. Hap bilong mi, mi laik bai yu givim long mi nau.’ Orait papa i tilim olgeta samting bilong en i go long tupela. I no longtaim, na dispela namba 2 pikinini i bungim olgeta samting bilong en na i salim long ol man. Na em i kisim mani na i go i stap long wanpela longwe ples. Em i stap long dispela ples, na em i mekim ol kain kain hambak pasin, na olgeta mani bilong en i pinis.”—Luk 15:11-13.b
6 Dispela namba 2 pikinini i no pilim liklik ol gutpela pasin papa i bin mekim long em. Ol samting papa i makim bilong tilim long em bihain, em i tok strong long papa i mas givim long em nau tasol. Em i kisim pinis, orait bihain em i tromoi olgeta mani bilong em long “ol kain kain hambak pasin.” Dispela tok “ol kain kain hambak pasin,” ol i kisim long wanpela tok Grik, insait bilong en i olsem ‘mekim ol amamas nogut.’ Wanpela saveman i tok, dispela tok “i makim olsem man i lusim olgeta pasin i stret tru.” Olsem na i gat as na planti man i save kolim dispela yangpela man long tok piksa bilong Jisas olsem man bilong mekim nabaut long olgeta mani bilong em.
7. Long nau husat ol i wankain olsem dispela pikinini i bin lusim papa? Planti manmeri olsem, bilong wanem ol i laik i go long “wanpela longwe ples” na bosim wokabaut bilong ol yet?
7 Olsem wanem? I gat sampela manmeri i kain olsem dispela pikinini i bin lusim papa? Sori tru, i gat sampela i stap, em ol i bin lusim gutpela “haus” bilong Papa bilong yumi long heven, Jehova. (1 Timoti 3:15) Sampela namel long ol i pilim olsem insait long famili bilong God i gat planti lo tumas i pasim ol, na oltaim ai bilong Jehova i save lukluk long ol, na dispela i save pasim rot bilong ol—em i no save helpim ol long i stap gut. (Skelim wantaim Song 32:8.) Yumi ken tingim wanpela meri Kristen, kirap long taim em i liklik yet papamama i bin skulim em long bihainim ol lo bilong Baibel, tasol bihain em i kisim pasin bilong dring planti na kisim drak. Nau em i tingim bek dispela taim em i bin stap nogut na em i tok: “Long dispela taim mi laik kamapim long ples klia olsem mi inap mekim ol samting na bai i stap bilong mi i gutpela moa. Mi laik bihainim laik bilong mi yet, na mi no laik bai wanpela i tokim mi long mekim ol samting i narapela kain long dispela.” Olsem yangpela man long tok piksa i bin mekim, dispela yangpela meri i laik bosim wokabaut bilong em yet. Sori tru, em i mekim ol pasin i no stret wantaim ol lo bilong Baibel, olsem na ol i mas rausim em long kongrigesen Kristen.—1 Korin 5:11-13.
8. (a) Olsem wanem yumi inap helpim ol manmeri em ol i laik bihainim pasin i narapela kain long ol lo bilong God? (b) Bilong wanem yumi mas tingting gut taim yumi laik makim wanem rot bai yumi bihainim long ol samting bilong lotu?
8 Yumi save bel hevi stret taim wanpela wanbilip i kamapim olsem em i laik bihainim pasin i narapela kain long ol lo bilong God. (Filipai 3:18) Taim dispela samting i kamap, ol elda na ol narapela em ol inapim mak long ol samting bilong spirit ol i save wok strong long stretim bek man i bin mekim rong. (Galesia 6:1) Tasol ol i no save subim wanpela man long kisim plang ol disaipel Kristen i save karim. (Matyu 11:28-30; 16:24) Ol yangpela tu, taim ol i winim pinis krismas olsem lo bilong gavman i makim, ol yet i mas tingim wanem rot ol i laik bihainim long ol samting bilong lotu. Yumi olgeta wan wan man na meri i bikpela pinis, yumi stap fri long bihainim wanem rot yumi yet i laikim, na bihain God bai skelim yumi long ol samting yumi bin mekim. (Rom 14:12) Na tu, ‘yumi planim pikinini bilong wanem kain kaikai, em dispela kain kaikai bai yumi kisim long gaden.’ Yangpela man long tok piksa em i kisim save long dispela samting.—Galesia 6:7, 8.
Stap Nogut Long Wanpela Longwe Ples
9, 10. (a) Wanem senis i kamap long i stap bilong dispela yangpela man i bin lusim papa? Em i mekim wanem long dispela? (b) Stori long sampela manmeri long nau ol i lusim lotu i tru na ol wankain hevi i painim ol olsem i bin painim yangpela man i lusim papa?
9 “Taim olgeta mani bilong en i pinis, taim bilong bikpela hangre i kamap long dispela ples. Na em i no gat wanpela samting. Olsem na em i go kisim wok long wanpela man bilong dispela ples. Na dispela man i salim em i go long banis pik bilong en bilong lukautim ol pik. Em i lukim ol pik i kaikai ol skin bilong bin, na em i gat bikpela laik tru long kisim sampela na pulapim bel bilong en. Tasol i no gat wanpela man i givim kaikai long em.”—Luk 15:14-16.
10 Maski em i rabis olgeta, yangpela man hia i no tingting yet long go bek long papa bilong em. Em i bungim wanpela man bilong dispela ples na dispela man i givim wok long em bilong lukautim ol pik. Long Lo Bilong Moses, ol pik i no klin long ai bilong God, olsem na yumi save, ol Juda i no laik mekim kain wok olsem. (Wok Pris 11:7, 8) Tasol sapos bel bilong yangpela man i gat tok long dispela, em i mas daunim, long wanem, em i save bos bilong em i no ken tingim hevi bilong wanpela man bilong narapela kantri. Hevi bilong dispela yangpela man i wankain olsem hevi i painim planti manmeri bilong nau em ol i lusim stretpela rot bilong lotu tru long God. Planti manmeri olsem, ol i save go insait long sampela pasin bipo ol i ting em i pasin nogut tru. Olsem: Taim em i gat 17 krismas, wanpela yangpela man i bikhet na i no laik bihainim ol lo Kristen em papamama i bin skulim em long en. Em i stori long dispela samting na em i tok: “Mi mekim pasin pamuk na kisim drak, na dispela i mekim na ol tok bilong Baibel mi bin lain long en inap planti yia, ol i lus olgeta.” I no longtaim na em i kalabus, long wanem, em i holim gan na hansapim sampela lain bilong kisim mani, na em i kilim man i dai. Tru, bihain em i kamap orait gen long ol samting bilong spirit, tasol em i kisim pe nogut tru long “bihainim pasin bilong sin na kisim amamas bilong sotpela taim tasol”!—Skelim wantaim Hibru 11:24-26.
11 Long tok piksa bilong Jisas, hevi bilong yangpela man i go bikpela moa, long wanem, “i no gat wanpela man i givim kaikai long em.” Orait, ol nupela pren em i bin kisim ol i stap we? Nau em i no gat mani, olsem na ol i ‘no laikim’ em moa. (Sindaun 14:20) Na olsem tasol, planti manmeri bilong nau em ol i lusim rot bilong bilip, ol i lukim olsem ol bilas na amamas na ol tingting bilong dispela graun i olsem samting i “giaman” tasol. (Kolosi 2:8) Wanpela yangpela meri i bin lusim oganaisesen bilong God inap sampela yia samting, em i tok: “Mi kisim bikpela pen na bel hevi tru taim mi lusim Jehova na em i no soim rot moa long mi. Mi laik bihainim pasin bilong ol manmeri bilong dispela graun, tasol mi no wankain tru olsem ol, olsem na ol i givim baksait long mi. Mi pilim olsem mi wanpela pikinini i lus na mi mas i gat wanpela papa bilong soim rot long mi. Em nau, long dispela taim mi save pinis olsem mi mas kisim helpim long Jehova. Mi no laik lusim em moa na bosim wokabaut bilong mi yet, nogat.” Dispela yangpela man long tok piksa bilong Jisas, em i kisim wankain tingting.
Em i Kisim Stretpela Tingting
12, 13. Wanem ol samting i helpim sampela long nau long kisim stretpela tingting? (Lukim blok.)
12 “Orait nau em i kisim stretpela tingting, na em i tok, ‘Olgeta wokboi bilong papa bilong mi ol i gat planti kaikai tru. Tasol mi stap hia na mi bagarap tru long hangre. Maski, bai mi kirap na mi go bek long papa bilong mi. Na bai mi tokim em olsem, “Papa, mi bin mekim sin long God na long yu. Nau mi no gutpela man moa inap long yu kolim mi pikinini bilong yu. Yu larim mi i stap olsem wanpela wokboi bilong yu.” ’ Orait em i kirap na i go long papa bilong en.”—Luk 15:17-20.
13 Em nau, yangpela man “i kisim stretpela tingting.” Inap sampela mun o yia samting, em i bin mekim save painim ol amamas—i olsem em i driman tasol. Tasol nau em i pilim tru olsem em i stap nogut long ol samting bilong spirit. Maski em i bin pundaun, em inap kamap gutpela gen. I gat sampela gutpela pasin i stap yet long em. (Sindaun 24:16; skelim wantaim 2 Stori 19:2, 3.) Orait, olsem wanem long ol manmeri i lusim lain bilong God long nau? Yu ting i stret yumi ken ting ol i lus olgeta, na pasin bikhet bilong ol i makim olsem olgeta wan wan i bin mekim sin long spirit holi bilong God? (Matyu 12:31, 32) Nogat, i no olsem. Bel bilong sampela i wok long kotim ol long dispela pasin bikhet ol i bin mekim, na bihain planti ol i save kisim stretpela tingting. Wanpela sista i tingting long taim em i bin lusim oganaisesen bilong God na em i tok: ‘I no gat wanpela taim mi bin lusim tingting long Jehova, nogat tru. Long olgeta taim mi save beten olsem bihain em i ken kisim mi bek na bai mi ken stap gen insait long tok i tru.’—Song 119:176.
14 Tasol ol man i lusim pinis stretpela rot ol i ken mekim wanem? Long tok piksa bilong Jisas, dispela yangpela man i tingting strong long go bek long papa na askim em long lusim tingting long rong em i bin mekim. Em i tingting long tokim papa, “Larim mi i stap olsem wanpela wokboi bilong yu.” Kain wokboi olsem, em i no bilong i stap oltaim long dispela wok. Bos i baim em long ol wan wan de tasol, na sapos em i laik rausim dispela wokboi, em inap mekim wantu tasol. Ol kain wokboi olsem, ol i samting nating long ai bilong ol man, winim wanpela wokboi nating em bos i bin baim em olgeta na em i olsem wanpela bilong famili. Olsem na yangpela man i no tingting long askim papa long kisim em bek olsem pikinini bilong em, nogat. Em i orait long kisim wok i no gat namba liklik, na long dispela rot em inap kamapim klia olsem, long olgeta wan wan de em i stap gut long papa bilong em. Tasol yangpela man bai kirap nogut long samting bai kamap.
Papa i Mekim Gut Long Em
15-17. (a) Taim papa i lukim pikinini bilong em, em i mekim wanem? (b) Dispela longpela klos, na ring, na su em papa i givim long pikinini, em i makim wanem samting? (c) Taim papa i tokim wokboi long redim bikpela kaikai, dispela i makim wanem samting?
15 “Taim em i stap longwe yet, . . . papa i lukim em i wokabaut i kam. Na bel bilong papa i sori tumas long em. Na papa i ran i go, na i holimpas pikinini na i givim kis long em. Na pikinini i tokim em olsem, ‘Papa, mi bin mekim sin long God na long yu. Nau mi no gutpela man moa inap long yu kolim mi pikinini bilong yu.’ Tasol papa i singautim ol wokboi bilong en i kam na em i tokim ol olsem, ‘Yupela kisim namba wan longpela klos bilong mi na bringim i kam kwiktaim na pasim long em. Na putim wanpela ring long pinga bilong em. Na putim su long lek bilong em. Na yupela go kisim dispela patpela pikinini bulmakau i kam na kilim. Bai yumi kaikai na amamas. Long wanem, dispela pikinini bilong mi em i dai pinis, tasol nau em i kisim laip gen. Em i lus pinis, tasol yumi kisim bek.’ Orait na ol i mekim bikpela kaikai na amamas i stap.”—Luk 15:20-24.
16 Ol papa i save laikim tru pikinini bilong ol, ol bai i laik tru long pikinini i kamap orait gen long ol samting bilong spirit. Olsem na yumi inap tingim papa bilong dispela yangpela man, long olgeta de em i lukluk i go long rot i stap klostu long haus bilong em na em i wetim pikinini bilong em i kam bek. Em nau! Em i lukim pikinini bilong em i wokabaut long rot i go long haus! Tru, ating skin bilong pikinini i no gutpela olsem bilong pastaim, tasol taim em i “stap longwe yet” papa i luksave long em. Papa i no tingim klos bilong em i bruk nabaut na i olsem bel bilong em i bagarap stret; em i lukim pikinini bilong em, na em i ran i go bilong bungim em!
17 Orait taim papa i kamap long pikinini bilong em, em i holimpas pikinini na givim kis long em. Nau em i tokim ol wokboi bilong em long givim longpela klos, na ring, na su long pikinini. Dispela longpela klos i no wanpela klos nating—em i “namba wan,” olsem gutpela klos tru—ating i gat planti gutpela bilas long en na em i kain klos ol i save putim long man i gat namba o nem. Ol wokboi nating i no save putim ring na su, olsem na papa i kamapim klia olsem em i laik kisim bek pikinini bilong em olsem wanpela bilong famili. Tasol papa i mekim sampela samting moa. Em i tokim ol wokboi long redim wanpela bikpela kaikai bilong amamas long pikinini bilong em i kam bek. Ol samting papa i mekim i kamapim klia tru olsem em i no hatwok long lusim rong bilong pikinini, olsem em i mas daunim bel kros samting, na i no olsem pikinini bilong em i kam bek na nau em i mas lusim rong bilong pikinini, nogat. Papa i gat laik tru long lusim rong bilong pikinini. Em i kisim amamas long mekim olsem.
18 Orait, dispela hap stori yumi mekim pinis long pikinini i bin lusim papa, em i skulim yumi olsem wanem long dispela God yumi save lotu long em? Namba wan samting i olsem: Jehova em i “God bilong marimari na sori, na em i no save belhat kwik; em i save laikim tru ol manmeri na em i save tok tru oltaim.” (Kisim Bek 34:6, NW) Tru tumas, pasin marimari em i wanpela pasin God i strong tru long mekim. Em pasin em i save mekim long ol man em ol i sot long wanpela bilong helpim ol. Na tu, dispela tok piksa bilong Jisas i skulim yumi olsem Jehova i redi long lusim rong bilong man. (Song 86:5) I olsem em i lukluk i stap bilong lukim husat ol sinman i tanim bel pinis na bai i gat as na em i ken marimari long ol.—2 Stori 12:12; 16:9.
18, 19. (a) Dispela tok piksa long pikinini i lusim papa, em i skulim yumi olsem wanem long Jehova? (b) Olsem Jehova i bin mekim long Juda na Jerusalem, olsem wanem em “i wet” long sinman i kam bek?
19 Yumi ken tingim pasin God i bin mekim long ol Israel. Jehova i bin kirapim profet Aisaia long stori long Juda na Jerusalem olsem man i gat “ol sua i karamapim het bilong en i go daun inap long lek bilong en.” Tasol em i tok tu olsem: “[God] em i sori long yupela na em i wet long soim marimari bilong em long yupela.” (Aisaia 1:5, 6; 30:18; 55:7; Esekiel 33:11) Jehova i kain olsem dispela papa long tok piksa bilong Jisas—i olsem em i ‘lukluk i go long rot.’ Ol manmeri i bin lusim haus bilong em, em i wetim ol i kam bek. Ol gutpela papa i save mekim olsem, a?—Song 103:13.
20, 21. (a) Pasin marimari bilong Jehova i kirapim planti manmeri bilong nau long mekim wanem? (b) Long stori i kamap bihain long dispela, bai yumi toktok long wanem samting?
20 Long olgeta yia, pasin marimari bilong Jehova i save kirapim planti manmeri long kisim stretpela tingting na kam bek long lotu i tru. Dispela i save givim bikpela amamas tru long famili bilong ol! Yumi ken tingim dispela papa Kristen yumi bin stori long em long pastaim. Gutpela tru, pikinini meri bilong em i kamap gutpela gen long ol samting bilong spirit na nau em i save mekim wok bilong autim tok bilong Baibel long olgeta de. Papa bilong em i tok: ‘Nau mi amamas tru. Pastaim mi bel hevi tru na aiwara bilong mi i pundaun, tasol nau mi amamas tru na aiwara bilong mi i pundaun.’ Na yumi save, Jehova tu i amamas!—Sindaun 27:11.
21 Tasol dispela tok piksa bilong pikinini i bin lusim papa, em i no pinis yet. Jisas i mekim sampela stori moa bilong en bambai em i ken soim olsem pasin marimari bilong Jehova i narapela kain tru long hatpela pasin bilong ol saveman bilong lo na ol Farisi. Olsem wanem Jisas i mekim olsem—na dispela i mekim wanem long yumi—bai yumi toktok long en long stori i kamap bihain long dispela.
[Ol Futnot]
a Ol tok piksa na tok bokis samting long Baibel i no olsem samting i bin kamap tru tru, nogat. Wok bilong ol dispela stori em i bilong skulim yumi long wanpela samting, olsem na yumi no gat wok long painim insait bilong olgeta wan wan tok bilong en olsem em i makim wanpela samting, nogat.
b Insait bilong dispela tok piksa i bin kamap long Wastaua (tok Inglis) bilong Februeri 15, 1989, pes 16, 17.
Stori Gen
◻ Olsem wanem tingting bilong Jisas long pasin marimari i narapela kain long tingting bilong ol Farisi?
◻ Long nau husat ol i wankain olsem dispela yangpela man i bin lusim papa? Ol i wankain olsem wanem?
◻ Wanem samting i kamap na dispela yangpela man i kisim stretpela tingting?
◻ Olsem wanem papa i mekim pasin marimari long pikinini bilong em i tanim bel pinis?
1. (a) Olsem wanem tok bilong Baibel i mekim gut bel bilong ol man em ol i bin lukim wanpela bilong famili i lusim rot bilong lotuim Jehova? (b) Jehova i ting olsem wanem long ol man i bin mekim rong?
2. Olsem wanem Baibel i soim yumi olsem pasin marimari em i wanpela pasin tru bilong Jehova?
11. Wanem samting i mekim na hevi bilong yangpela man i go bikpela? Olsem wanem sampela long nau i lukim olsem ol amamas bilong graun i olsem samting i “giaman” tasol?
14. Yangpela man hia i tingting strong long mekim wanem? Taim em i mekim olsem, olsem wanem em i soim olsem em i mekim pasin daun?
[Blok long pes 11]
OL I KISIM BEK STRETPELA TINGTING
Sampela manmeri em bipo ol i bin raus long kongrigesen Kristen, wanem samting i bin helpim ol na ol i kisim bek stretpela tingting? Sampela stori bilong ol bai givim save long yumi.
“Long bel bilong mi, mi save long ples tok i tru i stap. Inap planti yia mi bin stadi long Baibel na go long ol miting Kristen na ol dispela tok i pas strong long bel bilong mi. Olsem wanem mi inap givim baksait yet long Jehova? Em i no bin lusim mi; mi yet mi bin lusim em. Orait bihain mi tokim skin bilong mi, mi kranki tru na mi bin mekim pasin bikhet, na Tok bilong Jehova i stret—‘wanem kain kaikai yu planim long gaden, dispela kain kaikai tasol bai yu kisim.’ ”—C.W.
“Liklik pikinini meri bilong mi i kirap long toktok, na bel bilong mi i sori tru, long wanem, mi laik skulim em long ol tok olsem Jehova em i husat, na olsem wanem em i ken beten long Jehova. Mi tingim dispela samting na mi no inap slip, na wanpela taim long biknait mi kisim ka na mi draiv i go long wanpela pak na mi krai. Mi krai na mi beten long Jehova. Inap longtaim tru mi no bin beten long em. Mi save pinis, mi mas i kam bek long Jehova, na mi laik bai em inap lusim tingting long rong bilong mi.”—G.H.
“Taim sampela toktok bilong lotu i kamap, mi save tokim ol man olsem sapos mi mas makim wanem lotu i skulim ol man long tok i tru na mi laik bihainim dispela lotu, bai mi kamap wanpela Witnes Bilong Jehova. Orait nau mi save tok, bipo mi wanpela Witnes Bilong Jehova, tasol mi no inap bihainim ol lo bilong en, olsem na mi lusim. Mi pilim tru dispela samting, na planti taim bel bilong mi i gat tok na mi no stap amamas. Orait bihain mi tokim skin bilong mi, ‘Mi stap bel hevi stret. Mi mas senisim tru pasin bilong mi.’ ”—C.N.
“Inap 35 yia i go pinis, kongrigesen i rausim mi wantaim man bilong mi. Orait long 1991, mipela i kirap nogut long tupela elda i kam lukim mipela, na ol i toksave olsem i gat rot long mitupela i ken i kam bek long Jehova. Orait 6-pela mun bihain, mipela i amamas tru long kongrigesen i kisim bek mipela. Man bilong mi i gat 79 krismas na mi gat 63 krismas.”—C.A.