God i Gat Hamas Nem?

Bekim bilong Baibel

God i gat wanpela nem tasol. Dispela nem i stap long rait Hibru יהוה na long tok Inglis ol i tanim olsem “Jehova.”a Long rot bilong profet Aisaia, God i tok: “Mi Jehova. Dispela em nem bilong mi.” (Aisaia 42:8) Dispela nem i stap klostu 7,000 taim long ol olpela manuskrip bilong Baibel—em i stap planti taim moa winim ol narapela nem i makim God, o nem bilong ol narapela man.b

Yu ting Jehova i gat ol narapela nem?

Taim Baibel i stori long God em i kolim dispela wanpela nem, tasol em i yusim tu planti biknem na ol tok i makim God. Dispela lista i kamapim sampela biknem na ol tok bilong soim hau wan wan nem i kamapim pasin bilong Jehova.

God i laik bai ol man i mas lotu long em wanpela tasolKisim Bek 3:14Em i no laik bai ol man i lotuim narapela god.

Biknem	Referens	Mining
God i Gat Olgeta Strong	Stat 17:1	Em i gat olgeta strong. Dispela tok Hibru ʼEl Shad·daiʹ, “God i Gat Olgeta Strong,” i stap 7-pela taim long Baibel
Alfa na Omega	Revelesen 1:8; 21:6; 22:13	‘Fes na las,’ o ‘kirap bilong ol samting na pinis bilong ol samting,’ dispela i makim olsem i no gat wanpela God i Gat Olgeta Strong i stap paslain long Jehova na i no gat wanpela bai kamap bihain long em. (Aisaia 43:10) Alfa na Omega em fes na las leta long ol alfabet bilong ol Grik.
Man Bilong Bipo Bipo Yet	Daniel 7:9, 13, 22	Em i no gat kirap bilong em; em i stap paslain tru long wanpela man o wanpela samting i kamap.—Buk Song 90:2.
Krieta	Aisaia 40:28	Em i wokim olgeta samting.
Papa	Matyu 6:9	Man bilong givim laip.
God	Stat 1:1	Wanpela samting ol man i lotuim; Man i gat bikpela strong. Dispela tok Hibru ʼElo·himʹ i makim planti samting, em i makim biknem bilong Jehova, o em i nambawan.
God bilong olgeta god	Lo 10:17	Dispela nambawan God, i winim “ol yusles god” em sampela man i save lotuim.—Aisaia 2:8.
Nambawan Bikpela Tisa	Aisaia 30:20, 21	Em i save givim tok bilong skulim na stiaim man.—Aisaia 48:17, 18.
Bikpela Man Bilong Wokim	Buk Song 149:2	Em i bin wokim olgeta samting.—Revelesen 4:11.
God bilong amamas	1 Timoti 1:11	Amamas em pasin tru bilong em.—Buk Song 104:31.
Man Bilong Harim ol prea	Buk Song 65:2	God yet i save harim olgeta wan wan beten bilong ol man i bilip na beten.
Mi Bai Kamap Wanem Wanem Kain Mi Laikim	Kisim Bek 3:14	Kamap wanem wanem kain bilong inapim ol samting em i tingting pinis long mekim. Dispela tok i kamapim klia nem bilong God, Jehova, olsem i stap long neks ves.—Kisim Bek 3:15.
King bilong oltaim oltaim	Revelesen 15:3	Wok bos bilong em i no gat kirap o pinis bilong en.
Bikpela	Buk Song 135:5	Papa bilong wanpela samting o bosman; Hibru ʼA·dhohnʹ na ʼAdho·nim.
Bikpela bilong bikpela ami, Bikpela bilong Sabaot	Aisaia 1:9, King Jems Pisin Baibel; Rom 9:29, King Jems Pisin Baibel	Komanda bilong bikpela lain ensel. Dispela biknem “Bikpela bilong Sabaot” inap makim tu “Jehova, bosman bilong bikpela lain ami” na “Bikpela bilong lain ami [bilong heven].”—Rom 9:29, New World Translation; NET Bible, futnot.
God Antap Tru	Buk Song 47:2	Em i bosim olgeta hap.
God Holi Tru	Provep 9:10	Holi tru (klin tru na i no gat asua) winim tru ol narapela man.
Man Bilong Wokim Sospen Graun	Aisaia 64:8	Em i bosim ol wan wan man na ol lain man, wankain olsem man bilong wokim sospen graun i bosim dispela klei em i wok long en.—Rom 9:20, 21.
Bikpela man bilong baim bek	Aisaia 41:14; King Jems Pisin Baibel	Kisim bek o baim bek ol man long sin na dai long rot bilong ofa Jisas Krais i givim olsem pe bilong baim bek man.—Jon 3:16.
Bikpela Ston	Buk Song 18:2, 46	Strongpela ples hait na man bilong kisim bek ol man.
Seivia	Aisaia 45:21	Kisim bek ol man long wanpela hevi o bikpela bagarap.
Wasman bilong sipsip	Buk Song 23:1, futnot	Em i save lukautim ol man i lotuim em.
Nambawan Bikpela	Stat 15:2	Em nambawan bos; Hibru ʼAdho·naiʹ.
Nambawan God Antap Tru	Daniel 7:18, 27	Em i antap tru winim ol narapela god.

Nem bilong ol ples long Ol Skripsa Hibru

Sampela nem bilong ol ples long Baibel i gat nem bilong God tu long en, tasol dispela i no makim olsem em narapela nem bilong God.

Nem bilong ples	Referens	Mining
Jehova-jaire	Stat 22:13, 14	“Jehova Bai Givim Ol Samting Man i Nidim.”
Jehova-nisi	Kisim Bek 17:15	“Jehova em i Signal Pos Bilong Mi,” o “Plak bilong mi.” (Buk Baibel) Jehova em God ol man inap ran i go long en na bai em i protektim na helpim ol.—Kisim Bek 17:13-16.
Jehova-salom	Hetman 6:23, 24	“Jehova Em Bel Isi.”
Jehova-sama	Esekiel 48:35, futnot, American Standard Version	“Jehova i Stap Long Dispela Hap.”

Risen long yumi mas save na yusim nem bilong God

God i tingim olsem nem bilong em, Jehova, i bikpela samting, em risen na em i putim planti tausen taim long Baibel.—Malakai 1:11.
Planti taim Pikinini Bilong God, Jisas, i kamapim klia olsem nem bilong God i bikpela samting. Olsem, em i beten long Jehova: “Nem bilong yu i mas i stap holi.”—Matyu 6:9; Jon 17:6.
Ol man husat i kisim save na kolim nem bilong God, dispela em fes samting ol i mekim bilong kisim pasin pren wantaim Jehova. (Buk Song 9:10; Malakai 3:16) Dispela kain pasin pren i opim rot long ol i kisim blesing long ol tok promis bilong God: “Em i laikim mi, olsem na mi bai kisim em bek. Na mi bai lukautim em, long wanem, em i save long nem bilong mi.”—Buk Song 91:14.
● Baibel i tok: “I gat sampela em ol i kolim ol olsem god, em ol i stap long heven o long graun. Na i gat planti ‘god’ na planti ‘bikpela.’” (1 Korin 8:5, 6) Maski i olsem Baibel i kolim nem bilong God tru, Jehova.—Buk Song 83:18.

a Sampela saveman bilong Hibru i laikim “Yahweh” olsem nem bilong God.

b Sotpela wei bilong raitim nem bilong God, “Ja,” i stap klostu 50 taim long Baibel, dispela tok i stap tu long tok “Haleluya,” o “Aleluya,” mining bilong en “Preisim Ja.”—Revelesen 19:1; American Standard Version; King Jems Pisin Baibel.