Onarim Nem Bilong Jehova

1, 2. Ol Witnes Bilong Jehova i gat wanem tingting long nem bilong God?

OL LOTU i holim nating nem Kristen i no yusim nem bilong God. Olsem: Long ol pes i stap long kirap bilong wanpela Baibel (Revised Standard Version), i gat hap tok olsem “i no stret liklik” long lotu i kolim wanpela nem long God.

² Tasol ol Witnes Bilong Jehova i amamas long holim nem bilong God na litimapim dispela nem. (Ritim Song 86:12; Aisaia 43:10.) Na tu, yumi amamas olsem yumi kliagut long mining bilong nem bilong God, na yumi luksave olsem em i bikpela samting long nem bilong God i mas i stap holi. (Mat. 6:9) Em i gutpela samting tru olsem yumi save long Jehova. Orait, bilong helpim yumi na bai yumi no lusim tingting long dispela samting, yumi ken skelim 3-pela bikpela askim: Sapos man i laik save long nem bilong God, em i mas mekim wanem? Olsem wanem Jehova i inapim nem bilong em? Na olsem wanem yumi inap “wokabaut long nem bilong Jehova”?

 3. Sapos man i laik save long nem bilong God, em i mas mekim wanem?

³ Taim man i save long nem bilong God, em “Jehova,” dispela tasol i no inap, em i mas mekim sampela samting moa. Man i mas kisim save long God Jehova em i wanem kain God. Man i mas kisim save long gutnem bilong God, ol pasin bilong em, samting em i tingting pinis long mekim, ol wok em i mekim, na moa yet em ol samting em i mekim bilong helpim lain bilong em. Jehova i truim samting em i tingting pinis long mekim, na isi isi em i kamapim klia olsem em i wanem kain God. (Snd. 4:18, 19) Yumi save olsem God i bin tokim Adam na Iv long nem bilong em, long wanem, Iv i kolim nem bilong God bihain long em i karim Kein. (Stt. 4:1, NW) Ol gutpela wokman bilong Jehova olsem Noa, Abraham, Aisak, na Jekop, ol tu i save long nem bilong God. Taim God i blesim ol, lukautim ol, na tokim ol long samting em i tingting pinis long mekim, dispela i helpim ol long kisim sampela save moa long em. Planti yia bihain, God i tokim Moses long wanpela bikpela samting long mining bilong nem bilong em.

 4. Bilong wanem Moses i askim God long nem bilong em? Bilong wanem Moses i laik kirapim lain Israel long bilip olsem God bai helpim ol?

⁴ Ritim Kisim Bek 3:10-15. Taim Moses i gat 80 krismas, God i tokim em: “Bringim ol manmeri bilong mi, ol Israel, i lusim Isip na i kam.” Orait Moses i givim wanpela bikpela askim long Jehova olsem: ‘Sapos lain Israel i askim mi long nem bilong yu, orait bai mi tok wanem long ol?’ Lain bilong God i save long nem bilong em inap longpela taim pinis, olsem na bilong wanem Moses i givim dispela askim? Em i laik save moa long God Jehova em i wanem kain God. Moses i laik kirapim lain Israel long bilip olsem God bai kisim bek ol. Na yumi inap save long as na em i mekim olsem. Lain Israel i bin stap kalabus inap planti yia na ating ol i gat 2-pela tingting olsem Jehova inap helpim ol, o nogat. Sampela manmeri bilong Israel i bin lotuim ol god bilong Isip!—Ese. 20:7, 8.

 5. Taim Jehova i toktok long Moses, em i tokaut long wanem samting long nem bilong em?

⁵ Jehova i tok wanem long Moses? Em i tok Moses i mas tokim lain Israel olsem: “[“Jehova,” NW], em God bilong ol tumbuna bilong yupela, . . . em i bin salim mi na mi kam long yupela.” Na tu, em i tokim Moses long tok: “Mi Yet, em i nem bilong God. Na em i bin salim mi na mi kam long yupela.”a Taim God i mekim ol dispela tok, em i tokaut long wanpela bikpela samting. Em bai kamap wanem wanem kain em i laik, o em bai mekim wanem wanem samting em i mas mekim, bilong inapim ol tok promis bilong em. Na oltaim em i stap God bilong truim olgeta samting em i tok promis long mekim. Dispela em as na Jehova i tok, dispela em i “nem bilong mi oltaim oltaim, na ol lain tumbuna i kamap bihain i mas kolim mi olsem.” Ating Moses i pilim tru ol dispela tok na dispela i strongim bilip bilong em!

6, 7. Olsem wanem Jehova i mekim ol samting em i bin tok promis long mekim?

⁶ Bihain long Jehova i toktok wantaim Moses, Jehova i mekim samting em i tok promis long mekim na helpim lain Israel long lusim kalabus. Em i givim 10-pela hevi olsem strafe long lain Isip na dispela i soim olsem Fero na ol god bilong Isip i no gat strong. (Kis. 12:12) Bihain Jehova i mekim na solwara Retsi i bruk i go 2-pela hap, na em i bringim lain Israel i go long hapsait bilong solwara, na em i mekim na Fero na ami bilong em i draun long solwara na i dai. (Sng. 136:13-15) Long ples drai nating, Jehova i givim kaikai na wara bilong lukautim planti milion manmeri bilong lain Israel. Ol klos na ol su bilong ol tu i no bagarap. (Lo 1:19; 29:5) Olgeta dispela samting i kamapim klia olsem i no gat wanpela samting inap pasim Jehova long inapim ol tok promis bilong em. Bihain em i tokim Aisaia olsem: “Mi tasol mi Bikpela, na oltaim mi save kisim bek yupela.”—Ais. 43:11.

⁷ Josua, em man i kisim ples bilong Moses na kamap lida bilong lain Israel, em tu i lukim ol strongpela wok em Jehova i bin mekim long Isip na long ples drai nating. Olsem na klostu long taim Josua i dai, em i tokim lain Israel olsem: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” (Jos. 23:14) Jehova i mekim stret ol samting em i bin tok promis long en.

 8. Long nau, olsem wanem Jehova i mekim ol samting em i bin tok promis long en?

⁸ Long nau tu, Jehova i wok long mekim ol samting em i bin tok promis long en. Long rot bilong Pikinini bilong em, em i bin tokaut olsem long taim bilong las de, ol bai autim gutnius bilong Kingdom “long olgeta hap bilong graun.” (Mat. 24:14) Jehova wanpela tasol inap mekim tok profet long dispela wok, na em i gat strong long mekim dispela wok i kamap. Na em i yusim ol man nating long mekim dispela wok! (Apo. 4:13) Olsem na taim yumi autim gutnius, yumi helpim long inapim dispela tok profet bilong Baibel. Yumi givim biknem long Papa bilong yumi na soim olsem yumi pilim tru ol tok bilong dispela beten: “Nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.”—Mat. 6:9, 10.

9, 10. Ol samting em Jehova i mekim long lain Israel i givim wanem save long yumi long pasin bilong Jehova?

⁹ Bihain liklik long taim lain Israel i lusim Isip, Jehova i soim klia sampela moa pasin bilong em. Jehova i wokim kontrak bilong Lo wantaim ol na em i tok promis long lukautim ol long pasin olsem man marit i save lukautim meri bilong em. (Jer. 3:14) Na lain Israel i stap olsem meri bilong Jehova. Nem bilong Jehova i stap long lain bilong ol. (Ais. 54:5, 6) Sapos ol i bihainim ol lo bilong em, em bai blesim ol, lukautim ol, na givim ol bel isi. (Nam. 6:22-27) Olgeta lain man bai save olsem i no gat narapela God i olsem Jehova. (Ritim Lo 4:5-8; Song 86:7-10.) Lain Israel i stap olsem lain bilong God, tasol planti man na meri bilong ol narapela lain tu i kam bilong lotuim Jehova. Ol i mekim wankain pasin olsem Rut bilong lain Moap, em i tokim Naomi olsem: “Lain bilong yu bai i kamap lain bilong mi. Na God bilong yu bai i kamap God bilong mi.”—Rut 1:16.

¹⁰ Inap olsem 1,500 yia, ol samting Jehova i mekim long lain Israel i soim klia sampela moa pasin bilong em. Maski inap planti taim ol i no bihainim tok bilong em, em i marimari na soim pasin isi long ol. (Kis. 34:5-7) Tasol pasin isi bilong Jehova i gat mak bilong en. Taim lain Israel i no laik bilip long Jisas na ol i kilim em i dai, nem bilong God i no stap moa long ol. (Mat. 23:37, 38) Long ai bilong Jehova, ol i olsem wanpela diwai i drai pinis. (Luk 23:31) Orait, ol i kisim wanem tingting long nem bilong God?

11. Bilong wanem lain Israel i lusim pasin bilong kolim nem bilong God?

¹¹ Bihain, lain Juda i kisim tingting kranki long nem bilong God. Ol i kisim tingting olsem nem bilong God i holi tru na ol man i no ken kolim. (Kis. 20:7) Olsem na isi isi ol i lusim pasin bilong kolim nem bilong God. Ating Jehova i bin pilim bikpela bel hevi taim em i lukim olsem ol man i no rispektim nem bilong em. (Sng. 78:40, 41) Jehova i tingim tru nem bilong em. Baibel i tok Jehova i no inap larim wanpela god i senisim em. Lain Juda i no onarim nem bilong Jehova, olsem na dispela nem i no stap moa long ol. (Kis. 34:14) Dispela i skulim yumi olsem em i bikpela samting tru long soim bikpela rispek long nem bilong dispela Man Bilong Wokim yumi.

12. Nem bilong God i stap long wanem lain?

¹² Long rot bilong Jeremaia, Jehova i tok promis olsem em bai mekim “nupela kontrak” wantaim wanpela nupela lain. Olgeta manmeri bilong dispela lain, “maski ol i man nating o ol i gat biknem,” ol inap “save long [“Jehova,” NW].” (Jer. 31:31, 33, 34) God i bin mekim dispela nupela kontrak long wanem taim? Em long taim bilong Pentikos bilong yia 33 C.E. Jehova i bin mekim dispela nupela kontrak wantaim wanem lain? Baibel i kolim dispela lain olsem “lain Israel bilong God,” na dispela lain i gat ol manmeri bilong olgeta lain man. Jehova i kolim dispela lain olsem “lain em nem bilong mi i stap long ol.”—Gal. 6:16; ritim Aposel 15:14-17; Mat. 21:43.

13. (a) Yu ting ol Kristen bilong pastaim i bin yusim nem bilong God? Olsem wanem yumi save long dispela? (b) Yu pilim olsem wanem taim yu yusim nem bilong God long wok autim tok?

¹³ Ol Kristen bilong pastaim, em ol i insait long dispela nupela lain, ol i bin yusim nem bilong God. Olsem: Ol i yusim nem bilong God taim ol i kolim ol tok bilong Ol Skripsa Hibru.b Long Pentikos bilong yia 33 C.E., aposel Pita i toktok long planti manmeri bilong lain Israel na ol man i bin joinim lotu Juda, na em i kolim nem bilong God inap planti taim. (Apo. 2:14, 20, 21, 25, 34) Ol Kristen bilong pastaim i bin givim biknem long Jehova, olsem na em i blesim wok bilong ol long autim tok. Long nau, taim yumi autim nem bilong Jehova long ol man, na soim ol long dispela nem i stap long Baibel bilong ol, Jehova i save blesim wok bilong yumi tu. Dispela em gutpela wok tru bilong helpim ol man long save long Jehova. Na taim ol man i kisim save long God, dispela bai helpim ol long kamap pren bilong Jehova na pas gut moa wantaim em inap oltaim oltaim.

14, 15. Olsem wanem yumi save olsem Jehova i bin lukautim nem bilong em?

¹⁴ Bihain long dai bilong ol aposel, sampela man i kamapim ol bilip giaman na dispela i bagarapim kongrigesen Kristen. (2 Tes. 2:3-7) Na tu, ol dispela giaman tisa i bihainim bilip kranki bilong ol Juda na ol i no yusim nem bilong God. Yu ting God i larim nem bilong em i lus? Nogat tru! Olsem wanem yumi save long dispela? Yumi no save long pasin stret ol i bin kolim nem bilong God long bipo, tasol nem bilong em i stap yet na i no lus. Inap planti handret yia, nem bilong God i stap long planti Baibel em ol man i bin tanim, na long ol buk samting em ol saveman bilong Baibel i bin raitim. Olsem: Long 1757, Charles Peters i tok mining i stap long nem bilong God i kamapim gut ol pasin bilong God Jehova, na dispela i winim olgeta narapela biknem. Long wanpela buk bilong 1797 we i stori long pasin bilong lotuim God, Hopton Haynes i tok ol Juda i bin yusim nem Jehova bilong makim God, “em wanpela tasol ol i lotuim; olsem Krais na ol Aposel bilong em i bin mekim.” Henry Grew (1781-1862) i bin yusim nem bilong God, na tu, em i luksave olsem ol man i no bin rispektim nem bilong God, olsem na i gat wok long mekim dispela nem i stap holi. Na tu, George Storrs (1796-1879) na Charles T. Russell, em ol i bin wok bung wantaim, ol i bin yusim nem bilong God.

¹⁵ Yia 1931 em i bikpela samting tru long ol manmeri bilong God. Paslain long dispela taim, ol i bin holim nem olsem ol Sumatin Bilong Baibel. Tasol long 1931, ol i kisim nem olsem ol Witnes Bilong Jehova. (Ais. 43:10-12, NW) Ol i tokaut long olgeta manmeri olsem ol i amamas tru long stap olsem “lain em nem bilong [God] i ken stap long ol,” na ol i ken litimapim nem bilong God. (Apo. 15:14) Taim yumi tingim ol samting Jehova i bin mekim bilong lukautim nem bilong em, dispela i kirapim yumi long tingim tok bilong em long Malakai 1:11, olsem: “Ol manmeri bilong olgeta kantri ol i save givim biknem long mi.”

16. Yumi holim nem olsem ol Witnes Bilong Jehova na yumi mas pilim olsem wanem long dispela?

¹⁶ Profet Maika i tok: “Olgeta lain manmeri bai wokabaut long nem bilong god bilong ol yet; tasol mipela bai wokabaut long nem bilong Jehova, em God bilong mipela, i go inap long taim bihain bihain, inap oltaim oltaim.” (Mai. 4:5, NW) Long dispela taim bipo, ol manmeri bilong God i pilim olsem em i gutpela samting tru long nem bilong God i stap long ol. Na tu, dispela i helpim ol long bilip olsem God i orait long ol. (Ritim Malakai 3:16-18.) Yu tu i pilim olsem? Yu wok strong long “wokabaut long nem bilong Jehova”?

17. Man i mas mekim wanem ol samting bilong “wokabaut long nem bilong Jehova”?

¹⁷ Sapos yumi laik “wokabaut long nem bilong Jehova,” yumi mas mekim 3-pela samting. Namba 1, yumi mas tokim ol narapela long dispela nem, long wanem, “olgeta manmeri i singaut long nem bilong Jehova, em bai kisim bek ol.” (Rom 10:13) Namba 2, yumi mas i gat ol pasin em Jehova i gat, na moa yet em pasin laikim. (1 Jon 4:8) Namba 3, yumi mas redi long bihainim ol lo bilong God, na long dispela rot yumi bai givim biknem long Papa bilong yumi. (1 Jon 5:3) Olsem wanem? Bai yu “wokabaut long nem bilong Jehova” na mekim olsem i go inap oltaim oltaim?

18. Olgeta manmeri husat i onarim nem bilong Jehova, bilong wanem ol i bilip na wet long ol gutpela samting bai kamap bihain?

¹⁸ Olgeta man husat i sakim Jehova o bikhet long em, klostu nau ol bai luksave long em i wanem kain God. (Ese. 38:23) Ol i wankain olsem Fero husat i tok: “Bikpela em i husat? Bilong wanem mi mas harim tok bilong en”? I no longtaim, Fero i lukim stret bikpela strong bilong God Jehova. (Kis. 5:1, 2; 9:16; 12:29) Tasol yumi bin mekim disisen long kisim save long Jehova na stap olsem ol pren bilong em. Yumi amamas long stap olsem ol manmeri husat i bihainim tok bilong em, na holim nem bilong em. Yumi bilip na wet long ol samting bai kamap bihain, long wanem, yumi bilipim tok promis i stap long Song 9:10, olsem: “Bikpela, yu no save givim baksait long ol manmeri i kam long yu. Olsem na ol man i save long yu bai ol i bilip tru long yu.”