Jehova i Bringim Planti Pikinini Bilong Em i Go Bilong Kisim Biknem
“[God] i laik bringim planti pikinini bilong en i go long heven na i stap gut tru. God i laik bai Jisas i mas kirapim wok bilong kisim bek ol manmeri, olsem na em i larim Jisas i karim pen, na long dispela pen em i mekim Jisas i kamap nambawan man tru bilong helpim ol manmeri.”—HIBRU 2:10.
1. Olsem wanem yumi inap save tru olsem laik bilong Jehova long ol man bilong graun em bai kamap tru?
JEHOVA i bin wokim graun bilong ol manmeri i gutpela olgeta ol i ken sindaun long en inap oltaim oltaim olsem wanpela famili. (Saveman 1:4; Aisaia 45:12, 18) Tru, tumbuna bilong yumi Adam em i bin mekim sin, olsem na em i givim sin na indai long ol pikinini bilong em. Tasol laik bilong God long ol manmeri bilong graun bai kamap tru long rot bilong Pikinini em i tok promis long salim i kam, em Krais Jisas. (Stat 3:15; 22:18; Rom 5:12-21; Galesia 3:16) Jehova “i gat wanpela Pikinini tasol i stap. Tasol [em] i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Na pasin sori i kirapim Jisas long “givim laip bilong em bilong baim bek planti manmeri.” (Matyu 20:28) Dispela pe em i givim bilong “baim bek” ol man, em inap stret long baim bek olgeta samting Adam i bin lusim, na nau ol manmeri inap kisim laip i stap oltaim.—1 Timoti 2:5, 6; Jon 17:3.
2 Samting ol i bin mekim long Bikpela De Bilong God i Tekewe Sin Bilong Ol Manmeri, em i save kamap wanpela taim insait long yia, em i olsem piksa na i makim wok bilong ofa bilong Jisas bilong baim bek ol man. Long dispela de, pastaim hetpris bilong Israel i kilim wanpela bulmakau man na mekim ofa bilong tekewe sin, na em i tromoi hap blut bilong en long ai bilong Bokis Kontrak insait long Rum Tambu Tru bilong haus lotu sel, na bihain long haus lotu tru. Em i mekim olsem bilong tekewe sin bilong em yet, na ol wanhaus bilong em, na lain Livai. Na Krais Jisas tu, em i givim pe bilong blut bilong em long God bilong tekewe sin bilong ol “brata” spirit bilong em pastaim. (Hibru 2:12; 10:19-22; Wok Pris 16:6, 11-14) Long Bikpela De Bilong God i Tekewe Sin Bilong Ol Manmeri, hetpris i kilim wanpela meme tu na mekim ofa bilong tekewe sin, na em i kisim blut bilong en i go insait long Rum Tambu Tru, bilong tekewe sin bilong 12-pela lain bilong Israel em ol i no bilong lain pris. Na olsem tasol, Hetpris Krais Jisas bai mekim wok long blut bilong em bilong helpim ol manmeri bilong graun i bilip long em, na em bai tekewe sin bilong ol.—Wok Pris 16:15.
Ol i Go Bilong Kisim Biknem Long Heven
3. Olsem Hibru 2:9, 10 i tok, God i bin mekim wanem insait long 1,900 yia?
3 Insait long 1,900 yia, God i bin mekim narapela kain samting tru long ol “brata” bilong Jisas. Aposel Pol i tok long dispela samting olsem: “Yumi lukim Jisas i kisim biknem tru. Bipo long sotpela taim tasol em i stap aninit long ol ensel, bai em i ken kisim ples bilong olgeta manmeri na i dai, na marimari bilong God i ken helpim olgeta manmeri. Jisas i karim bikpela pen na i dai, olsem na God i litimapim em na i givim bikpela namba na biknem long em. God . . . i laik bringim planti pikinini bilong en i go long heven na i stap gut tru. God i laik bai Jisas i mas kirapim wok bilong kisim bek ol manmeri, olsem na em i larim Jisas i karim pen, na long dispela pen em i mekim Jisas i kamap nambawan man tru bilong helpim ol manmeri. Dispela pasin God i mekim, em i stret tru.” (Hibru 2:9, 10) Dispela Nambawan Man Tru bilong helpim ol manmeri, em Krais Jisas, em i bin karim pen long taim em i stap man long graun na dispela i skulim em long bihainim tok bilong God. (Hibru 5:7-10) Jisas em i namba wan man bilong kamap pikinini bilong God long spirit.
4 Jehova i mekim wok long spirit holi, olsem strong, bilong em bilong mekim Jisas i kamap Pikinini bilong em long spirit, bilong bringim em i go long heven na kisim biknem. Taim Jisas wanpela tasol i stap wantaim Jon Bilong Baptais, Jon i putim Jisas i go insait olgeta long wara bilong makim olsem em i givim em yet long God. Gutnius Luk i raitim i stori olsem: “Taim olgeta manmeri i kisim baptais, Jisas tu i kisim baptais. Em i kisim baptais pinis, orait em i beten i stap, na heven i op, na Holi Spirit i kam daun long em. Holi Spirit i kamap olsem wanpela bilong ol dispela kain pisin ol i kolim balus, na ol i lukim em i stap antap long het bilong Jisas. Na long heven wanpela maus i singaut olsem, ‘Yu Pikinini bilong mi. Mi laikim yu tumas. Bel bilong mi em i amamas long yu.’ ” (Luk 3:21, 22) Jon i lukim spirit holi i kam daun long Jisas na em i harim Jehova i tokaut olsem em i amamas long Jisas, em gutpela Pikinini bilong Em. Long dispela taim, na long rot bilong spirit holi, Jehova i mekim Jisas i kamap namba wan bilong ‘planti pikinini bilong en bai i go long heven’ na kisim biknem.
5. Husat i namba wan lain bilong kisim gutpela samting long ofa bilong Jisas? I gat hamas manmeri insait long dispela lain?
5 Ol “brata” bilong Jisas ol i namba wan lain bilong kisim gutpela samting long ofa bilong em. (Hibru 2:12-18) Long piksa olsem driman, aposel Jon i lukim ol i stap pinis long maunten Saion long heven wantaim Pikinini Sipsip, em Bikpela bilong yumi Krais Jisas i kirap bek pinis long matmat. Na Jon i kolim namba bilong ol, em i tok: “Mi lukluk gen, na mi lukim Pikinini Sipsip i sanap long maunten Saion, na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol. . . . God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip. Ol i no bin mekim tok giaman. Nogat. Ol i no gat asua long wanpela samting.” (KTH 14:1-5) Olsem na ol dispela ‘planti pikinini bilong God em i bringim ol i go long heven’ bilong kisim biknem, ol inap olsem 144,001 tasol—em Krais Jisas wantaim ol brata spirit bilong em.
“Kamap Pikinini Bilong God”
6, 7. Husat ol i “kamap pikinini bilong God”? Dispela em inapim ol long mekim wanem?
6 Ol manmeri Jehova i mekim ol i kamap pikinini bilong em, i olsem em i kamapim ol na ol i “kamap pikinini bilong God.” Aposel Jon i toktok long ol kain man olsem na em i tok: “Sapos wanpela man i kamap pikinini bilong God, orait em i no save bihainim pasin bilong sin. Laip bilong God yet em i stap long dispela man, olsem na em i no inap long bihainim pasin bilong sin. Nogat. Em i stap pikinini bilong God.” (1 Jon 3:9) Dispela “laip” em spirit holi bilong God. Spirit holi i wok wantaim tok i tru bilong God na i givim “nupela laip” long olgeta wan wan bilong lain 144,000 na ol i wet long kisim laip long heven.—1 Pita 1:3-5, 23.
7 Taim Jisas i kamap nupela pikinini long graun, em i stap Pikinini bilong God, wankain olsem Adam taim em i gutpela olgeta, em tu i “pikinini bilong God.” (Luk 1:35; 3:38) Tasol taim Jisas i baptais pinis, Jehova i tokaut olsem: “Yu Pikinini bilong mi. Mi laikim yu tumas. Bel bilong mi em i amamas long yu.” (Mak 1:11) God i mekim dispela tokaut taim spirit holi i kam daun long Jisas, na dispela i kamapim klia tru olsem long dispela taim God i mekim Jisas i kamap Pikinini bilong Em long spirit. I olsem God i givim “nupela laip” long Jisas bilong inapim em long kisim laip gen olsem Pikinini spirit bilong God long heven. Na ol 144,000 brata spirit bilong Jisas, ol tu i “kamap nupela gen.” (Jon 3:1-8; lukim Wastaua, Novemba 15, 1992, pes 3-6.) Na God i makim ol long spirit holi na givim wok long ol long autim gutnius, wankain olsem em i bin mekim long Jisas.—Aisaia 61:1, 2; Luk 4:16-21; 1 Jon 2:20.
Bilong Makim Tru Olsem Ol i Kamap Pikinini Bilong God
8. Wanem samting i kamapim long ples klia olsem long rot bilong spirit holi God i bin mekim (a) Jisas i kamap pikinini bilong em (b) ol disaipel bilong Jisas bilong pastaim i kamap pikinini bilong Em?
8 I gat sampela samting i kamapim long ples klia tru olsem God i bin mekim Jisas i kamap pikinini bilong em long rot bilong spirit holi. Jon Bilong Baptais i bin lukim spirit i kam daun long Jisas, na Jon i harim God i tokaut long dispela Mesaia em i bin makim, olsem em i pikinini bilong Em long spirit. Tasol olsem wanem ol disaipel bilong Jisas bai save God i bin mekim ol i kamap pikinini bilong em long rot bilong spirit holi? Orait, long de Jisas i go antap long heven em i tok: “Jon i bin baptaisim ol manmeri long wara. Tasol i no planti de nau na bai yupela i kisim baptais long Holi Spirit.” (Aposel 1:5) Ol disaipel bilong Jisas ol i “kisim baptais long Holi Spirit” long de Pentikos bilong yia 33 C.E. Taim spirit i kam daun long ol, “wanpela nois i kam long heven, em i olsem krai bilong strongpela win,” na “ol i lukim samting olsem paia i kamap, na i luk olsem planti tang bilong man,” na ol i kam daun long olgeta wan wan disaipel. Narapela kain samting tru i kamap long dispela taim—ol disaipel inap “mekim tok long ol kain kain tok ples. Holi Spirit i mekim na ol inap mekim ol dispela toktok.” Olsem na ol i lukim na harim ol samting i kamapim long ples klia olsem rot i op pinis long ol disaipel bilong Krais ol inap kisim laip long heven olsem ol pikinini bilong God.—Aposel 2:1-4, 14-21; Joel 2:28, 29.
9. Wanem samting i kamapim long ples klia olsem ol Samaria, Kornilius, na sampela moa long taim bilong ol aposel ol i bin kamap pikinini bilong God long rot bilong spirit holi?
9 Bihain long dispela taim, Filip i autim gutnius long Samaria. Ol Samaria i bilip long tok bilong em na ol i kisim baptais, tasol ol i no lukim sampela mak na bai ol i ken save God i bin mekim ol i kamap pikinini bilong em. Orait, taim aposel Pita na aposel Jon i beten na putim han antap long ol dispela bilipman, em nau, “ol i kisim Holi Spirit” long wanpela kain rot ol man i stap klostu ol inap luksave long en. (Aposel 8:4-25) Dispela i kamapim klia olsem God i bin mekim ol dispela bilipman bilong Samaria i kamap pikinini bilong em long rot bilong spirit holi. Na i wankain tu long yia 36 C.E., taim Kornilius na sampela manmeri moa bilong ol narapela lain ol i bilip long tok i tru bilong God. Pita na ol bilipman Juda i bin kam wantaim em “ol i harim ol dispela manmeri i mekim tok long ol kain kain tok ples na i litimapim nem bilong God, na ol i kirap nogut na ol i tok olsem, ‘Lukim. God i givim Holi Spirit olsem presen long ol manmeri bilong ol arapela lain tu.’ ” (Aposel 10:44-48) Planti Kristen long taim bilong ol aposel ol i kisim ol “presen” bilong spirit holi, olsem ol i mekim tok long kain kain tok ples. (1 Korin 14:12, 32) Olsem na ol dispela manmeri inap luksave klia tru olsem God i bin mekim ol i kamap pikinini bilong em long rot bilong spirit holi. Tasol olsem wanem ol Kristen bilong bihain ol inap save, God i bin mekim ol i kamap pikinini bilong em o nogat?
Spirit i Tokaut Ples Klia
10, 11. Taim yu skelim tok bilong Rom 8:15-17, bai yu stori olsem wanem long dispela tok olsem spirit yet i save tokaut ples klia wantaim ol lain em ol bai stap king wantaim Krais?
10 I gat sampela samting i kamapim klia tru long olgeta 144,000 Kristen God i bin makim, olsem ol i gat spirit bilong God. Pol i tingim dispela samting taim em i tok: “Spirit bilong God i save mekim yupela i kamap pikinini bilong God. Na long strong bilong Holi Spirit yumi save singaut long God olsem, ‘Aba, Papa.’ Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. Orait yumi stap pikinini bilong God, na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em.” (Rom 8:15-17) Ol Kristen God i bin makim, ol i pilim strong tru olsem ol i pas gut wantaim Papa bilong ol long heven olsem pikinini bilong em. (Galesia 4:6, 7) Ol i save tru tru olsem, long rot bilong spirit holi God i bin mekim ol i kamap pikinini bilong em long spirit na bai ol i mekim wok king wantaim Krais long Kingdom bilong heven. Spirit holi bilong Jehova i gat wanpela wok tru long dispela samting.
11 Spirit holi bilong God i stiaim ol dispela lain, na tingting bilong ol i kirapim ol strong long pilim tru olsem ol tok Baibel i mekim long ol lain i wet long kisim laip long heven, em i makim ol yet. Olsem: Taim ol i kaunim ol tok Baibel i mekim long ol lain i stap olsem pikinini bilong Jehova long spirit, wantu ol i luksave olsem ol dispela tok i makim ol yet. (1 Jon 3:2) Ol i save ol i bin “pas wantaim Krais Jisas na kisim baptais” na long dispela baptais ol i bin “pas wantaim [em long] dai bilong em.” (Rom 6:3) Ol i bilip tru tru olsem ol i pikinini bilong God long spirit, na ol bai i dai na kirap bek na kisim laip long heven, olsem Jisas i bin mekim.
12. Spirit bilong God i bin kamapim wanem kain tingting long bel bilong ol Kristen God i bin makim?
12 Dispela pasin bilong kamap pikinini bilong God long spirit, em i no wanpela laik em man i mas wok long kamapim long bel bilong em, nogat. Ol dispela lain God i bin mekim ol i kamap pikinini bilong em, i no olsem bel bilong ol i bagarap long sampela bikpela hevi ol i karim long graun long nau na long dispela as ol i laik i go long heven, nogat. (Jop 14:1) Ol manmeri God i bin makim ol tru tru, spirit bilong Jehova i bin kamapim wanpela tingting na laik long bel bilong ol i narapela kain long tingting na laik bilong ol manmeri bilong graun. Ol dispela manmeri em God i bin makim, ol i save em i gutpela samting tru long i stap oltaim long Paradais long graun, na skin i kamap gutpela olgeta, na ol famili na pren i stap klostu na olgeta i stap amamas. Tasol dispela kain sindaun i no nambawan bikpela laik long bel bilong ol. Ol manmeri God i bin makim ol i gat strongpela tingting moa yet long kisim laip long heven, olsem na ol i orait long lusim olgeta samting, olsem gutpela sindaun long graun long bihain, o famili samting.—2 Pita 1:13, 14.
13 Dispela tingting bilong i go long heven em God i bin putim long bel bilong ol, em i strong tumas, olsem na ol i gat wankain tingting olsem Pol, em i tok: “Yumi save pinis olsem, sapos dispela haus sel bilong graun nau yumi stap long en, em i bagarap, orait yumi gat narapela haus God i laik givim yumi. Dispela haus ol man i no bin wokim long han. Em i stap long heven, na em bai i stap oltaim oltaim. Nau yumi stap long dispela haus hia, na yumi krai i stap. Yumi laikim tumas long kisim dispela haus bilong yumi i stap long heven na em bai i karamapim yumi olsem klos. Long wanem, taim yumi putim dispela pinis, yumi bai i no inap i stap olsem skin nating. Taim yumi stap yet long dispela haus sel bilong graun, yumi save pilim hevi na yumi krai i stap. I no olsem yumi laik lusim olpela bodi. Nogat. Yumi laikim tumas long putim nupela bodi, olsem yumi putim nupela klos samting, na bai dispela bodi bilong i dai em i ken kisim laip tru. God yet i bin redim yumi bilong kisim dispela laip, na em i bin givim Holi Spirit long yumi. . . . Yumi kisim Holi Spirit pinis, olsem na yumi ken save, tru tumas bai yumi kisim olgeta arapela samting tu.” (2 Korin 5:1-5) Pol i “laikim tumas” long kirap bek long matmat na go antap long heven na kamap wanpela spirit i no save dai. Taim em i toktok long bodi bilong graun, em i tok piksa long wanpela haus sel i save bagarap, em i no gat strong na em i save stap sotpela taim tasol sapos yumi skelim wantaim wanpela haus tru. Tru, ol i stap long graun long skin i save bagarap, tasol ol dispela Kristen em ol i gat spirit holi olsem mak bilong ol bai kisim laip long heven long bihain, ol i wet long kisim wanpela “haus God i laik givim” long ol, em wanpela bodi spirit i no save dai, na i no save bagarap. (1 Korin 15:50-53) Ol inap mekim wankain tok olsem Pol: “Bel bilong yumi i stap strong, na yumi laikim tumas long lusim dispela bodi hia [bilong graun] na i go sindaun gut [long heven] wantaim Bikpela, na ples em i stap long en, em bai i kamap ples tru bilong yumi.”—2 Korin 5:8.
Ol i Go Insait Long Sampela Kontrak
14 Ol Kristen God i bin mekim ol i kamap pikinini bilong em, ol i save tru olsem God i bin kisim ol i go insait long tupela bikpela kontrak. Jisas i bin toktok long wanpela kontrak taim em i mekim wok long bret i no gat yis na wain bilong kamapim bung bilong tingim indai bilong em, na em i tok long kap wain olsem: “Dispela kap wain em i nupela kontrak mi mekim long blut bilong mi, em mi kapsaitim bilong helpim yupela.” (Luk 22:20; 1 Korin 11:25) Husat ol i insait long nupela kontrak? God Jehova wantaim ol manmeri bilong lain Israel bilong spirit—em dispela lain Jehova i laik bringim ol i go long heven na kisim biknem. (Jeremaia 31:31-34; Galesia 6:15, 16; Hibru 12:22-24) Blut bilong Jisas i bin kapsait, dispela i mekim na nau nupela kontrak i kirap mekim wok, na i kisim sampela manmeri bilong olgeta lain long holim nem bilong Jehova; na tu, nupela kontrak i mekim na ol dispela Kristen God i bin makim, ol i kamap “pikinini” bilong Abraham. (Galesia 3:26-29; Aposel 15:14) Nupela kontrak i givim rot long olgeta Israel bilong spirit na ol bai kisim biknem long rot bilong kirap bek long matmat na go long heven na kisim laip i no save dai. Dispela “kontrak bilong i stap oltaim,” ol gutpela samting ol man bai kisim long en bai i stap oltaim oltaim. Bihain dispela kontrak bai mekim ol narapela wok insait long Taim Bilong Wan Tausen Yia na bihain long en o nogat, em yumi no save; yumi mas wetim taim bihain.—Hibru 13:20.
15 Ol dispela “planti pikinini” Jehova i laik ‘bringim ol i go long heven’ bilong kisim biknem, em i bin kisim olgeta wan wan i go insait long narapela kontrak tu, em kontrak bilong wanpela Kingdom bilong heven. Jisas i toktok long dispela kontrak em i bin mekim wantaim ol disaipel bilong em, olsem: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia na yupela bai i bosim ol 12-pela lain bilong Israel.” (Luk 22:28-30) Dispela kontrak bilong Kingdom i kamap taim spirit holi i kam daun long ol disaipel bilong Jisas long Pentikos bilong yia 33 C.E. Dispela kontrak i wok i stap namel long Krais na ol wanwok king bilong em i go inap long olgeta taim bihain. (KTH 22:5) Olsem na ol Kristen God i bin mekim ol i kamap pikinini bilong em, ol i save tru tru olsem ol i insait long nupela kontrak na kontrak bilong Kingdom. Long dispela as, long bung bilong mekim Kaikai Bilong Bikpela, liklik hap lain Kristen God i bin makim na ol i stap yet long graun, ol tasol i save kisim bret, i makim skin bilong Jisas i no gat sin long en, na ol i kisim wain, i makim blut bilong Jisas i bin kapsait long taim em i dai na i strongim nupela kontrak.—1 Korin 11:23-26; lukim Wastaua, Februeri 1, 1990, pes 19-23.
Singautim Ol, Makim Bilong Em Yet, Ol i Stap Gut Long Em
16, 17. (a) Olgeta wan wan bilong lain 144,000 ol i mas mekim wanem na bai God i ken bringim ol i go long heven na kisim biknem? (b) Dispela “10-pela king” ol i husat? Ol i mekim wanem kain pasin long ol “brata” bilong Krais?
16 Namba wan wok bilong ofa bilong Jisas long baim bek ol man, em i opim rot long lain 144,000 na God inap singautim ol bilong kisim laip long heven, na God inap makim ol bilong em yet taim ol i kamap pikinini bilong God. Tasol bilong bringim ol i go long heven na kisim biknem, pastaim ol i mas ‘wok strong long i stap ol lain tru bilong [God],’ na ol i mas i stap gut long God i go inap long taim ol i dai. (2 Pita 1:10; Efesus 1:3-7; KTH 2:10) Liklik hap lain God i bin makim na ol i stap yet long graun, ol i stap gut long God maski “10-pela king”—em olgeta gavman politik wantaim—i biruaim ol. Wanpela ensel i tok: “Ol bai i pait long Pikinini Sipsip, na Pikinini Sipsip bai i winim ol tru. Em i Bikpela bilong olgeta bikman, na em i King bilong olgeta king. Na olgeta man i stap wantaim em, em ol lain em i bin singautim ol na em i bin makim ol bilong em yet na ol i save bihainim tru tok bilong em, ol dispela man bai i win wantaim Pikinini Sipsip long dispela pait.”—KTH 17:12-14.
17 Ol hetman bilong graun ol i no inap mekim wanpela samting bilong biruaim Jisas, em dispela “King bilong olgeta king,” long wanem, em i stap antap long heven. Tasol ol i mekim pasin birua long liklik hap lain “brata” bilong em ol i stap yet long graun. (KTH 12:17) Dispela pasin bai pinis long pait bilong God, em Armagedon—“King bilong olgeta king” wantaim “ol brata” bilong em, “em ol lain [God] i bin singautim ol na em i bin makim ol bilong em yet na ol i save bihainim tru tok bilong em,” ol bai winim tru dispela pait. (KTH 16:14, 16) Tasol long nau ol Kristen God i bin mekim ol i kamap pikinini bilong em, ol i gat bikpela wok ol i mas mekim. Long nau ol i mekim wanem wok paslain long taim Jehova i bringim ol i go bilong kisim biknem long heven?
Wanem Bekim Bilong Yu?
◻ Husat ol manmeri God ‘i bringim ol i go long heven’ bilong kisim biknem?
◻ Wanem insait bilong dispela tok “kamap pikinini bilong God”?
◻ Olsem wanem spirit yet i save tokaut ples klia wantaim sampela Kristen?
◻ Ol manmeri God i bin mekim ol i kamap pikinini bilong em, em i kisim ol i go insait long wanem ol kontrak?
2. Long Israel, long Bikpela De Bilong God i Tekewe Sin Bilong Ol Manmeri, ol i mekim wanem na i olsem piksa bilong wok em ofa bilong Jisas i mekim bilong baim bek ol man?
4. Wanem taim God i bin mekim Jisas i kamap Pikinini bilong em long spirit? God i mekim olsem wanem?
13. Olsem 2 Korin 5:1-5 i tok, Pol i “laikim tumas” long mekim wanem? Dispela i givim wanem tingting long yumi long ol manmeri God i bin mekim ol i kamap pikinini bilong em?
14. Taim Jisas i kamapim bung bilong tingim indai bilong em, pastaim Jisas i toktok long wanem kontrak? Dispela kontrak i gat wanem wok long ol Israel bilong spirit?
15. Olsem Luk 22:28-30 i tok, ol disaipel bilong Jisas em God i bin makim, ol i go insait long wanem narapela kontrak? Wanem taim ol i mekim olsem?
[Piksa long pes 15]
Long Pentikos bilong yia 33 C.E., i gat mak i kamapim klia olsem rot i op bilong sampela manmeri ol inap i go long heven