Em i Bihainim Savetingting na Strongim Bel

1-3. (a) Esta i pilim olsem wanem taim em i go klostu long sia king bilong man bilong em? (b) King i mekim wanem taim Esta i go lukim em?

ESTA i wokabaut isi isi i go klostu long sia king, bel bilong em i sut stret. I no gat wanpela liklik nois long dispela bikpela rum long haus king bilong Persia long taun Susan, ples i stap isi tru na Esta inap harim pairap bilong klos na lek bilong em yet taim em i wokabaut. Esta i no larim ol naispela bilas bilong haus king i pulim nabaut tingting bilong em, ol stail pos, na ol gutpela rup ol i wokim long ol diwai sida bilong Lebanon. Em i putim tingting olgeta i go long dispela man i sindaun long sia king, em man husat bai wokim disisen olsem Esta bai stap laip o dai.

² King i lukluk gut taim Esta i kam klostu, na em i stretim han na makim Esta long stik gol bilong em. I luk olsem em i liklik samting, tasol dispela bai seivim laip bilong Esta, samting king i mekim i soim olsem king i marimari long Esta long rong em i mekim—long i go lukim king taim em i no singautim em. Taim Esta i kamap long sia king, em i putim han i go na tatsim het bilong stik gol.​—Esta 5:1, 2.

³ Olgeta samting long King Ahasuerus i soim olsem em i gat bikpela strong na planti mani kago. Pe bilong klos bilong ol king bilong Persia long dispela taim bipo em inap olsem planti handret milion kina. Tasol taim Esta i lukluk long ai bilong man bilong em, em i luksave olsem man bilong em i laikim em tru. King i tok: “Kwin Esta, olsem wanem? Wanem askim bilong yu? Sapos yu laik bai mi givim yu hap kantri bilong mi, orait bai mi givim yu.”​—Est. 5:3.

 4. Esta bai bungim wanem ol hatwok?

⁴ Esta i bin kamapim klia olsem em i gat strongpela bel na bilip; em i go lukim king bilong protektim lain bilong em long plen ol i wokim bilong kilim olgeta i dai. I kam inap long dispela taim, wok bilong em i kamapim gutpela samting, tasol i gat ol bikpela hatwok i stap yet. Em i mas kirapim dispela king i gat pasin antap long tingim olsem dispela edvaisa em i save trastim i wanpela man nogut na i bin trikim em long kilim i dai olgeta lain bilong Esta. Olsem wanem Esta inap kirapim king long bilipim dispela tok? Yumi inap kisim wanem skul long bilip bilong em?

5, 6. (a) Olsem wanem Esta i bihainim stiatok i stap long Eklisiastis 3:1, 7? (b) Olsem wanem Esta i soim savetingting taim em i toktok long man bilong em?

⁵ Yu ting i gutpela long Esta i kamapim dispela hevi long king long ai bilong olgeta manmeri? Sapos em i mekim olsem, dispela inap semim king na givim rot long edvaisa bilong king, Haman, long tok pait long tok bilong Esta. So Esta i mekim wanem? Sampela handret yia paslain, holi spirit i kirapim King Solomon long tok: “I gat taim bilong olgeta samting, . . . taim bilong pasim maus na taim bilong toktok.” (Ekl. 3:1, 7) Yumi ken tingim olsem waspapa bilong Esta, em bilipman Mordekai, i bin skulim gut dispela yangpela meri long ol dispela stiatok taim em i mekim bikpela long Esta. Olsem na Esta i save em i bikpela samting long makim gut “taim bilong toktok.”

⁶ Esta i tok: “King, sapos i orait long yu, mi laik bai yu na Haman i kam long bikpela kaikai mi bai redim bilong yu nau.” (Est. 5:4) King i orait long dispela na tokim Haman long kam. Yu inap luksave Esta i bihainim savetingting taim em i toktok? Em i rispektim biknem bilong man bilong em na stretim rot long kamapim tingting bilong em.​—Ritim Provep 10:19.

7, 8. Fes bikpela kaikai Esta i mekim i wanem kain? Wai na em i surikim taim long toktok long king?

⁷ I klia olsem Esta i redim gut dispela bikpela kaikai, na putim olgeta kain samting em man bilong em i save laikim. Na tu, long dispela bikpela kaikai i gat gutpela wain bilong mekim man i amamas. (Sng. 104:15) Ahasuerus i amamas tru, na em i askim gen Esta long samting em i laikim. Yu ting nau i gutpela taim bilong toktok?

⁸ Esta i ting nau i no gutpela taim long toktok. Olsem na em i invaitim king na Haman long kam gen long narapela bikpela kaikai long neks de. (Est. 5:7, 8) Wai na em i surikim taim? Tingim, olgeta lain bilong Esta bai dai bikos king i givim namba long Haman long kamapim lo long kilim olgeta lain Juda. Dispela i mekim na Esta i mas tingting gut na makim wanpela taim i stret long toktok. Olsem na em i wet, dispela i opim rot gen long em inap soim man bilong em olsem em i rispektim tru em.

 9. Wai na pasin bilong i no les kwik i bikpela samting? Hau bai yumi bihainim eksampel bilong Esta long i no les kwik?

⁹ Pasin bilong i no les kwik em pasin i dia tumas na planti man i no gat dispela pasin. Esta i bel hevi na i gat laik tru long kamapim tingting bilong em, tasol em i no les kwik long wetim taim i stret bilong mekim olsem. Yumi inap kisim planti skul long eksampel bilong em, long wanem, ating yumi olgeta i bin lukim sampela samting we i gat wok long stretim. Sapos yumi laik kirapim wanpela man i gat namba long stretim wanpela hevi, orait yumi ken bihainim eksampel bilong Esta na i no les kwik. Provep 25:15 i tok: “Long rot bilong pasin bilong i no les kwik, yu inap mekim wanpela man i gat namba i wanbel wantaim yu, na tang i save mekim gutpela tok isi, em inap brukim bun.” Sapos yumi no les kwik na wetim taim i stret na toktok long pasin isi, olsem Esta, maski pasin birua i strong olsem bun em inap bruk. Olsem wanem God bilong Esta, em Jehova, i blesim pasin bilong em long i no les kwik na bihainim savetingting?

10, 11. Wai na amamas bilong Haman i pinis bihain long em i lusim fes bung bilong bikpela kaikai? Meri na ol pren bilong em i kirapim em long mekim wanem?

¹⁰ Pasin bilong Esta long i no les kwik i opim rot long ol gutpela samting i kamap. Taim Haman i lusim fes bung bilong bikpela kaikai, em i “amamas na belgut tru” olsem king na kwin i laikim em. Taim Haman i wokabaut i go long geit bilong haus king, em i lukim Mordekai, dispela man Juda husat i strong yet na i no laik brukim skru long em. Olsem yumi lukim long sapta i kamap paslain, risen bilong Mordekai i no olsem em i no gat pasin rispek, nogat, em i tingim maus bilong bel na pasin pren bilong em wantaim Jehova God. Tasol Haman “i belhat nogut tru.”​—Est. 5:9.

¹¹ Taim Haman i tokim meri na ol pren bilong em long dispela, ol i kirapim em long redim wanpela traipela pos, longpela bilong en i winim 22 mita, na bihain em i ken askim king long givim tok orait bilong hangamapim Mordekai long en. Haman i wanbel long dispela tingting na wantu em i stretim rot long mekim olsem.​—Est. 5:12-14.

12. Wai na king i tok na ol i ritim strong buk i gat ol rekod bilong Gavman bilong kantri long em? Em i kisim save long wanem samting?

¹² Long dispela nait bel bilong king i no stap isi. Baibel i tok: “King i no inap long slip,” olsem na em i tok na ol i ritim strong buk i gat ol rekod bilong Gavman bilong kantri. Ol i ritim tu ripot long tupela wokman i wokim plen bilong kilim i dai King Ahasuerus. Em i tingim samting i bin kamap; ol i bin holimpasim dispela tupela kilman na kilim ol i dai. Tasol olsem wanem long Mordekai, em man husat i bin tokaut long dispela plen nogut? Wantu king i tingim, na askim long wanem samting ol i bin givim olsem pe long Mordekai. Ol i givim wanem long em? Ol i no bin mekim wanpela samting long dispela man.​—Ritim Esta 6:1-3.

13, 14. (a) Hau ol samting i kamap i soim olsem hevi bai painim Haman? (b) Meri na ol pren bilong Haman i tok wanem long em?

¹³ King i belhat, na em i tokim wanpela ofisa long helpim em long stretim dispela samting. Haman i stap pinis long haus king—ating em i bin kam paslain liklik bikos em i laik kisim tok orait bilong kilim i dai Mordekai. Tasol paslain long Haman i kamapim askim bilong em, king i askim Haman long wanpela gutpela rot bilong mekim gut long man em king i amamas long em. Haman i ting olsem king i tingim em na mekim dispela tok. So Haman i tokim king long mekim planti gutpela samting: Pasim klos king long em, putim em long hos bilong king na wanpela namba wan ofisa i ken kisim em na raunim taun Susan, kolim ol gutpela tok bilong givim biknem long em na bai olgeta man i ken harim. Piksaim long tingting pes bilong Haman taim em i kisim save olsem dispela man em king i laik onarim em Mordekai! Na king i makim husat long singaut na preisim Mordekai? Haman!​—Est. 6:4-10.

¹⁴ Haman i bel nogut na mekim wok we em i no laik tru long mekim, na bihain em i bel hevi na hariap i go long haus. Meri na ol pren bilong em i tok ol samting i kamap i makim olsem bagarap bai painim em; em bai lus long pait em i laik mekim long Mordekai, dispela man Juda.​—Est. 6:12, 13.

15. (a) Wanem gutpela samting i kamap long pasin bilong Esta long i no les kwik? (b) Wai na em i savetingting long yumi kisim pasin bilong “wet i stap”?

¹⁵ Esta i no les kwik, em i wetim wanpela de moa bilong kamapim askim bilong em long king, dispela i opim rot long Haman long mekim ol samting bilong daunim em yet. Na ating Jehova God yet i mekim na king i no inap slip, laka? (Prov. 21:1) Olsem na yumi no kirap nogut olsem Tok Bilong God i kirapim yumi long kisim pasin bilong “wet i stap”! (Ritim Maika 7:7.) Taim yumi wet long God, bai yumi luksave olsem ol rot em i makim bilong stretim hevi bilong yumi i winim samting yumi yet inap mekim.

16, 17. (a) Wanem taim Esta i pilim olsem nau em “taim bilong toktok”? (b) Olsem wanem Esta i narapela kain long Vasti, em meri bilong king long pastaim?

¹⁶ Esta i no laik mekim king i wet longpela taim moa; long namba 2 bikpela kaikai, em i laik tokaut long olgeta samting. Tasol hau bai em i mekim? King i givim rot long Esta, na i askim em gen long kamapim tingting bilong em. (Est. 7:2) Esta i pilim olsem nau em “taim bilong toktok.”

¹⁷ Yumi ken piksaim Esta i beten long tingting long God paslain long em i mekim dispela tok: “King, sapos i orait long yu na yu belgut long mi, orait mi laik bai yu no ken larim laip bilong mi i lus na no ken kilim i dai ol manmeri bilong mi.” (Est. 7:3) Tingim, Esta i kamapim klia long king olsem em bai rispektim wanem wanem disisen king i ting i gutpela long mekim. Man! Pasin bilong Esta i narapela kain tru long pasin bilong Vasti, em meri bilong king long pastaim, em i min long semim tru man bilong em! (Est. 1:10-12) Na tu, Esta i no sutim tok long king olsem em i bin popaia long trastim Haman, nogat. Em i askim king long protektim em long ol man i laik kilim em i dai.

18. Olsem wanem Esta i kamapim dispela hevi long king?

¹⁸ Askim bilong Esta i mekim king i kirap nogut na em i laik save moa. Husat tru i laik kilim i dai kwin bilong em? Esta i tok moa: “Ol i salim mipela, mi na ol manmeri bilong mi, bilong bagarapim na kilim mipela i dai. Sapos ol i salim mipela bilong mekim mipela i kamap ol wokboi na ol wokmeri nating, orait bai mi no mekim wanpela tok. Tasol sapos dispela hevi i kamap, em bai i no helpim king, nogat, em bai putim hevi long king tu.” (Est. 7:4) Yumi inap luksave olsem Esta i tokaut stret long hevi, tasol em i tok sapos ol i laik mekim lain bilong em i kamap wokboi na wokmeri nating, orait em bai no gat tok long dispela. Tasol sapos ol i kilim i dai lain olgeta, dispela bai putim bikpela hevi long king yet na em i no inap stap isi.

19. Yumi inap kisim wanem skul long Esta long pasin bilong mekim tok we i kirapim man long mekim samting?

¹⁹ Eksampel bilong Esta i skulim yumi long pasin bilong mekim tok we i kirapim man long mekim samting. Sapos yu mas autim wanpela bikpela hevi long wanpela yu laikim o man i gat bikpela namba, gutpela samting inap kamap sapos yu no les kwik, soim rispek, na tokaut stret long ol samting.​—Prov. 16:21, 23.

20, 21. (a) Olsem wanem Esta i kamapim klia plen nogut bilong Haman? Dispela i kirapim king long mekim wanem? (b) Haman i mekim wanem taim plen nogut bilong em i kamap ples klia?

²⁰ King Ahasuerus i tok strong: “Husat dispela man? Em i no pret long mekim kain samting olsem, a? Em i stap we?” Piksaim long tingting olsem Esta i poinim pinga taim em i tok: “Dispela birua bilong mipela em dispela man nogut Haman.” Dispela strongpela tok i mekim wanem long Haman? Em i pret nogut tru. Tingim, belhat i mekim na pes bilong king i go ret taim em i luksave olsem dispela edvaisa em i save trastim i trikim em long sainim wanpela lo bilong kilim i dai meri bilong em, em i laikim tumas! Kwiktaim king i go ausait long gaden bilong kisim bel isi.​—Est. 7:5-7.

²¹ Plen nogut bilong Haman i kamap ples klia, olsem na em i brukim skru long lek bilong kwin. Taim king i kam bek insait long rum na i lukim Haman i stap long bet bilong Esta na i wok long askim Esta long marimari long em, king i belhat na i sutim tok long Haman i laik reipim kwin insait long haus bilong king yet. Dispela tok i makim olsem ol i mas kilim i dai Haman. Ol i karamapim pes bilong Haman na kisim em i go. Orait wanpela ofisa i tokaut long king long dispela traipela pos em Haman i bin redim bilong Mordekai. Wantu Ahasuerus i odaim ol long hangamapim Haman yet long dispela pos.​—Est. 7:8-10.

22. Olsem wanem eksampel bilong Esta i skulim yumi long no ken bel hevi, toktok planti, o lusim bilip?

²² Nau long dispela taim we ol man i no bihainim stretpela pasin, yumi inap ting olsem i no gat rot tru bilong mekim stretpela kot. Yu save pilim olsem? I no gat wanpela taim we Esta i bin bel hevi, toktok planti, o lusim bilip, nogat tru. Long taim stret, em i strongim bel na askim king long mekim samting i stret, na em i bilip na lusim olgeta narapela samting long han bilong Jehova. I gutpela yumi tu i mekim olsem! Kirap long taim bilong Esta na i kam inap long nau, Jehova i no senis. Long nau tu, em inap daunim ol man nogut na ol konman long trap bilong ol yet, wankain olsem em i bin mekim long Haman.​—Ritim Buk Song 7:11-16.

23. (a) King i givim wanem pe long Mordekai na Esta? (b) Paslain long Jekop i dai, olsem wanem tok profet em i mekim long Benjamin i kamap tru? (Lukim blok “Wanpela Tok Profet i Kamap Tru.”)

²³ Nau, king i kisim save long Mordekai em i husat tru—em man i bin lukautim king na ol man i no kilim em i dai, na tu, em i waspapa bilong Esta. Ahasuerus i givim wok bilong Haman olsem praim minista i go long Mordekai. King i givim haus na mani kago bilong Haman i go long Esta, na Esta i makim Mordekai long bosim ol dispela samting.​—Est. 8:1, 2.

24, 25. (a) Wai na Esta i no stap bel isi bihain long plen nogut bilong Haman i kamap ples klia? (b) Olsem wanem Esta i redi gen long dai bilong helpim lain bilong em?

²⁴ Nau Esta na Mordekai i seif, olsem na yu ting nau kwin i ken stap bel isi? Em bai mekim olsem sapos em i tingim em yet. Long dispela taim, lo bilong Haman long kilim i dai olgeta Juda i wok long i go long olgeta hap em Persia i bosim. Haman i bin pilai satu, o Pur—em wanpela kain wok bilong ol spirit nogut—bilong painimaut gutpela taim bilong karimaut dispela plen nogut. (Est. 9:24-26) Sampela mun i stap yet, tasol dispela de i wok long i kam klostu. Yu ting i gat rot bilong pasim dispela hevi long kamap?

²⁵ Long nau gen, Esta i no tingim laip bilong em yet, em i go lukim king maski king i no singautim em. Em i krai long lain bilong em, em i askim strong man bilong em long rausim dispela lo nogut. Tasol ol lo em king bilong Persia i strongim i no inap senis. (Dan. 6:12, 15) Olsem na king i givim namba long Esta na Mordekai long kamapim nupela lo. Ol i tokaut long namba 2 lo, dispela i givim rait long ol Juda long difendim ol yet. Ol man i sindaun long ol hos i spit i go long olgeta hap Persia i bosim, ol i bringim dispela gutnius i go long ol Juda. Dispela tok i amamasim ol. (Est. 8:3-16) Yumi ken tingim ol Juda i stap long olgeta hap bilong dispela bikpela kantri i redim ol samting bilong pait na redi long pait, em samting ol i no inap mekim sapos i no gat dispela nupela lo. Tasol bikpela samting moa, yu ting “Jehova, bosman bilong bikpela lain ami,” bai stap wantaim ol manmeri bilong em?​—1 Sml. 17:45.

26, 27. (a) Dispela pait em Jehova i helpim lain bilong em long winim na daunim tru ol birua bilong ol i bikpela olsem wanem? (b) Wanem tok profet i kamap tru taim ol pikinini man bilong Haman i dai?

²⁶ Taim dispela de bilong pait i kamap, lain bilong God i redi i stap. Na tu, planti ofisa bilong Persia i stap long sait bilong ol, taim nius i go long olgeta hap olsem nupela praim minista, Mordekai, em wanpela Juda. Jehova i helpim lain bilong em long winim tru pait. Em i helpim lain bilong em long daunim tru ol birua bambai ol birua i no ken mekim nogut gen long ol.a—Est. 9:1-6.

²⁷ Na tu, em bai i no seif long Mordekai i bosim haus bilong Haman sapos 10-pela pikinini man bilong dispela man nogut i stap yet. Ol i kilim ol tu i dai. (Est. 9:7-10) Long dispela rot wanpela tok profet bilong Baibel i kamap tru, bikos pastaim God i bin tok profet olsem lain Amalek olgeta bai pinis, ol yet i kamapim olsem ol i birua tru long lain bilong em. (Lo 25:17-19) Ating ol pikinini man bilong Haman i laspela lain bilong dispela lain em God i tok long ol i mas bagarap.

28, 29. (a) Wai na em laik bilong Jehova long Esta na lain bilong em i mekim pait? (b) Wai na i gutpela yumi bihainim eksampel bilong Esta long nau?

²⁸ Yangpela meri Esta i mekim ol bikpela wok—olsem kamapim lo bilong king i tokaut long woa na kilim ol man i dai. I no isi long mekim olsem. Tasol laik bilong Jehova em long protektim lain bilong em na ol i no ken bagarap; Mesaia bai kamap long lain Israel, em wanpela rot tasol long olgeta lain man i ken bilip na wet long kisim blesing! (Stt. 22:18) Ol wokman bilong God long nau i amamas long save olsem taim Mesaia, Jisas, i bin kam long graun, em i tambuim ol disaipel bilong em long insait long ol pait.​—Mat. 26:52.

²⁹ Tasol ol Kristen i insait long pait bilong bilip; Satan i wok strong tru long bagarapim bilip bilong yumi long Jehova God. (Ritim 2 Korin 10:3, 4.) Esta i stap gutpela eksampel long yumi ken bihainim! Olsem Esta, yumi laik kamapim bilip bilong yumi long rot bilong bihainim savetingting na i no les kwik taim yumi kirapim ol narapela long mekim samting, strongim bel, na redi long daunim laik bilong yumi yet long sambai long lain bilong God.