Olsem Wanem Mi Ken Helpim Pikinini Long Kisim Nambawan Gutpela Skul?
WOK bilong lainim ol pikinini i kain olsem wanpela longpela raun i gat amamas na hatwok long en. Em wanpela raun em yu na ol pikinini bilong yu i mekim wantaim. Yu save strongim na stiaim ol pikinini na helpim ol long wokabaut gut long rot bilong laip. I gat planti samting ol i mas lain long en.
Bilong i stap bilong ol pikinini i ken kamap gutpela na amamas, ol i mas lain long stretpela pasin ol i mas bihainim na pas gut wantaim God na lain long skelim wanem samting i stret na wanem samting i no stret. Sapos ol i save gut long Jehova na laikim em tru, orait gutpela skul ol i kisim bai helpim tru ol, na ol save ol i kisim bai stap oltaim oltaim. Yupela ol papamama i gat bikpela wok bilong lainim ol pikinini na helpim ol long skelim na kisimgut ol samting ol i lainim.
Long dispela raun, i gat sampela hatwok ol papamama i mas winim. Ol samting ol pikinini i lukim na harim inap stiaim ol, na ol inap lainim planti samting nogut long pasin bilong ol man i no famili bilong ol. Dispela graun olgeta i stap aninit long strong bilong Satan. (1 Jon 5:19) Satan i laik bai ol pikinini bilong yu i kisim skul, tasol i gat narapela as na em i gat dispela laik. Satan em i wanpela tisa na em i save tru long mekim dispela wok. Tasol em i tisa nogut. Em i mekim olsem em i “ensel bilong lait,” tasol ol tok em i givim long ol man i save giamanim ol na i narapela kain tru long Tok Bilong Jehova na laik bilong Em. (2 Korin 4:4; 11:14; Jeremaia 8:9) Satan na ol ensel nogut ol i save gut long pasin bilong giamanim ol man na long kirapim ol long tingim ol yet tasol na mekim pasin giaman na pasin pamuk.—1 Timoti 4:1.
Yu ken mekim wanem bilong helpim ol pikinini bilong yu na bai ol narapela i no ken giamanim ol? Yu ken mekim wanem bilong skulim ol long bihainim ol pasin i tru na ol pasin i gutpela? Wanpela bikpela samting, em yu mas skelim yu yet. Yu mas stap olsem gutpela piksa. Na tu, yu mas mekim dispela wok bilong yu bilong lainim ol pikinini na yu mas lusim bikpela hap taim liklik long mekim olsem. Tasol paslain long yumi stori long ol dispela samting, yumi mas save long wanem samting i as bilong nambawan gutpela skul.
As Bilong Gutpela Skul
Pasin bilong King Solomon bilong Israel inap lainim yumi. Baibel i tok: “God i givim planti gutpela tingting na save long Solomon. Em i gat planti save tumas olsem wesan long nambis na man i no inap kaunim. Gutpela tingting na save bilong en i winim save bilong ol saveman bilong hap sankamap na bilong ol saveman bilong Isip.” Solomon “i bin raitim 3,000 gutpela sotpela tok i gat gutpela tingting, na 1,005 song.” Em i gat planti save long ol diwai na animal samting. (1 King 4:29-34) King Solomon i bin bosim tu wok bilong sanapim ol kain kain haus long Israel, na naispela tempel bilong Jehova long Jerusalem.
Ol tok Solomon i bin raitim, olsem i stap long Buk Saveman, i kamapim klia olsem em i gat save tru long pasin bilong yumi ol man. God i kirapim em long stori long wanem samting i as bilong gutpela skul. Solomon i tok: “Sapos yu laik kisim gutpela save, orait pastaim yu mas aninit long Bikpela.” Dispela king i gat gutpela tingting na save, i tok moa olsem: “Sapos yu laik kisim gutpela tingting, orait pastaim yu mas aninit long Bikpela. God em i gutpela na stretpela olgeta. Na sapos yu laik kisim gutpela save, orait pastaim yu mas save gut long em.”—Sindaun 1:7; 9:10.
Sapos yumi aninit long God, olsem pret long em, yumi save rispek long em na yumi no mekim sampela samting em i no laikim. Yumi luksave olsem em i Nambawan Bikpela na yumi gat wok long aninit long em. Ol man husat i sakim dispela Man i bin givim laip long yumi, ating ol narapela i tingim ol olsem man i gat gutpela save, tasol kain save olsem em “longlong pasin tasol long ai bilong God.” (1 Korin 3:19) Ol pikinini bilong yu i mas kisim skul em “gutpela tingting na save i kam long God” i as bilong en.—Jems 3:15, 17.
Pasin bilong pret long mekim samting Jehova i no laikim, dispela i insait long pasin bilong laikim em. Jehova i laik bai ol wokboi bilong em i mas pret long em na laikim em. Moses i tok: “Nau yupela ol Israel, harim gut wanem ol samting God, Bikpela bilong yumi, i tok yupela i mas mekim. Yupela i mas aninit long God, na bihainim olgeta tok bilong em. Yupela i mas laikim em tru, na amamas tru wantaim bel na tingting bilong yupela long mekim wok bilong em. Na yupela i mas bihainim olgeta lo bilong em, nau mi givim long yupela. Sapos yupela i bihainim, bai yupela i ken stap gut.”—Lo 10:12, 13.
Sapos yumi lainim ol pikinini long pret na daun long Jehova, dispela bai stap olsem as bilong gutpela skul bilong givim gutpela tingting na save long ol. Taim ol i wok long pret na daun long Jehova, ol bai amamas moa yet long dispela Man Bilong Wokim ol, em i As bilong olgeta trupela save. Dispela bai helpim ol pikinini bilong yumi long kisim stretpela tingting long ol samting ol i lainim, na ol i no kisim tingting kranki. Ol bai kisim pasin bilong “skelim wanem ol pasin i gutpela na wanem ol pasin i nogut.” (Hibru 5:14) Dispela bai helpim ol long bihainim pasin daun na abrusim pasin nogut.—Sindaun 8:13; 16:6.
Ol Pikinini i Lukluk Long Yu!
Tasol olsem wanem yumi inap helpim ol pikinini bilong yumi long laikim Jehova na pret long em? Bekim bilong dispela askim i stap long Lo Jehova i bin givim long ol Israel long maus bilong profet Moses. Em i tokim ol papamama Israel: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela. Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.”—Lo 6:5-7.
Dispela skripsa i lainim ol papamama long sampela bikpela samting. Wanpela i olsem: Ol papamama i mas i stap olsem gutpela piksa. Bilong yu ken lainim ol pikinini long laikim tru Jehova, yu yet i mas laikim tru God, na ol tok bilong em i mas i stap long bel bilong yu. Bilong wanem dispela em i bikpela samting? Long wanem, yu nambawan tisa bilong ol pikinini bilong yu. Ol samting ol i lainim long yu em bai mekim bikpela samting long ol. Bikpela samting tru i stiaim ol pikinini, em pasin bilong papamama yet.
Ol mak yu laik winim na ol samting yu ting i bikpela samting ol i save kamap ples klia long ol samting yu mekim, na i no long ol tok tasol bilong yu. (Rom 2:21, 22) Taim ol i yangpela yet, ol pikinini i save lain na kisim save long ol samting ol i lukim long pasin bilong papamama. Ol pikinini i luksave long wanem samting i bikpela samting long papamama bilong ol, na ol dispela samting i save kamap bikpela samting long ol yet. Sapos yu laikim tru Jehova, ol pikinini bilong yu bai luksave long dispela samting. Olsem: Ol bai lukim olsem pasin bilong ritim na stadi long Baibel i bikpela samting long yu. Ol bai luksave olsem yu putim ol samting bilong Kingdom i go pas long ol narapela samting long i stap bilong yu. (Matyu 6:33) Pasin bilong yu long go long olgeta miting Kristen na autim tok bilong Kingdom bai soim ol olsem pasin bilong mekim wok bilong Jehova em i bikpela samting tru long yu.—Matyu 28:19, 20; Hibru 10:24, 25.
Mekim Wok Bilong Yu
Narapela skul ol papamama inap lainim long Lo 6:5-7 i olsem: Em wok bilong yu long skulim ol pikinini bilong yu. Long lain bilong Jehova long bipo, ol papamama yet i save skulim ol pikinini bilong ol. Na long lain Kristen bilong pastaim, ol papamama i mekim yet wok bilong skulim ol pikinini bilong ol. (2 Timoti 1:5; 3:14, 15) Long pas aposel Pol i salim long ol wanlain Kristen, em i tok ol papa i mas go pas long “stretim gut ol pikinini bilong [ol] na skulim ol long tok bilong Bikpela.”—Efesus 6:4.
Ol papamama long nau ol i save bisi long kain kain wok na dispela i save pulim bikpela hap taim na strong bilong ol. Ating ol i laik bai ol tisa tasol i ken givim skul long ol pikinini. Tasol i no gat wanpela inap kisim ples bilong gutpela papa o mama. No ken ting yu no inap mekim gutpela wok. Sapos yu laik bai narapela i ken helpim yu, orait tingting gut na makim dispela samting, tasol no ken lusim dispela wok God i bin givim long yu.
Lusim Hap Taim Long Skulim Pikinini Bilong Yu
Tasol i gat narapela skul moa papamama inap lain long en long Lo 6:5-7 i olsem: Bilong skulim ol pikinini bilong yu, yu mas lusim bikpela hap taim na strong bilong yu. Ol papamama Israel i mas “lainim” ol pikinini bilong ol long tok i tru. Long tok Hibru bilong bipo, dispela tok “lainim” i olsem “kolim gen,” “kolim kolim planti taim ol tok.” Ol i save mekim long san—kirap long taim san i kam antap na i go inap san i go daun—na “long haus” na “long rot.” Yu mas lusim bikpela hap taim na strong bilong lainim ol pikinini, na stiaim tingting na pasin bilong ol na bai God i ken orait long ol.
Orait, yu ken mekim wanem bilong helpim ol pikinini bilong yu long kisim gutpela skul? I gat planti samting yu ken mekim. Lainim ol long laikim tru Jehova na pret na daun long em. Stap gutpela piksa ol i ken bihainim. Mekim wok bilong yu long lainim ol pikinini bilong yu, na lusim hap taim long skulim ol. Yu no nambawan olgeta, olsem na taim yu wok long skulim ol, yu bai mekim sampela popaia. Tasol sapos yu gat laik tru long bihainim laik bilong God, ol wok yu mekim bai helpim ol pikinini na ol bai pilim tru. Sindaun 22:6 i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” Dispela stiatok i stret long ol pikinini man na pikinini meri wantaim.
Wok bilong kisim gutpela skul em i olsem wanpela raun i no gat pinis bilong en. Sapos yu na ol pikinini bilong yu i laikim tru God, bai yu amamas long mekim dispela raun i go inap oltaim oltaim. Dispela i olsem, long wanem, oltaim bai i gat planti samting moa bilong Jehova bilong lain long en na olsem wanem yumi ken mekim ol samting i stret wantaim laik bilong em.—Saveman 3:10, 11.
[Piksa long pes 15]
Yu save ritim Baibel long ol pikinini bilong yu?
[Piksa long pes 16]
Lusim hap taim long skulim ol pikinini bilong yu long Man Bilong Wokim yumi