Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Long Ol Skripsa Grik, ol i yusim dispela tok sios [“kongrigesen,” NW] bilong makim wanem fopela samting?

Namba wan em lain Kristen God i bin makim (long sampela skripsa Krais tu i insait long en). Long sampela narapela skripsa, ‘kongrigesen bilong God’ i makim olgeta Kristen i stap long wanpela haptaim. Namba tri rot Baibel i yusim dispela tok i makim olgeta Kristen long wanpela hap. Na namba foa rot i makim ol Kristen long wanpela kongrigesen.​—4/15, pes 21-3.

• Wanem taim God bai pinis long singautim ol wan wan Kristen long kisim laip long heven?

Baibel i no kamapim bekim stret bilong dispela askim. Dispela singaut i bin kirap long 33 C.E. na i kam inap long taim bilong yumi. Bihain long 1935, bikpela wok bilong kamapim ol disaipel em bilong bungim lain planti manmeri tru. Sampela Kristen em ol i bin kisim baptais bihain long 1935, holi spirit i givim save long ol olsem ol i bilong i go long heven, olsem na yumi no inap makim wanpela taim stret em God i pinis long singautim ol man. Ol Kristen God i bin makim tru tru, ol i no gat holi spirit moa yet winim lain narapela sipsip, na ol i no ting ol man i mas mekim gut long ol olsem ol i samting tru. Maski ol Kristen i bilong lain God i bin makim o bilong lain narapela sipsip, ol i mas stap gut long God na mekim yet laik bilong em.​—5/1, pes 30-1.

• Taim Jepta i mekim tok promis bilong em, yu ting em i redi long givim pikinini meri bilong em long God olsem ofa tru bilong paia i kukim olgeta?

Nogat. Jepta i laik tok olsem, husat man i kam bungim em, bai em i makim dispela man bilong mekim wok bilong God olsem Lo Bilong Moses i makim. (1 Samuel 2:22) Bilong truim dispela promis, pikinini meri bilong Jepta i mekim wok long haus bilong Jehova, em i wanpela bikpela ofa tru, long wanem, dispela i makim olsem em bai i no inap marit.​—5/15, pes 9-​10.

• Lotu Kristen bilong pastaim i bin mekim wanem wok long kodeks?

I luk olsem i go inap long klostu yia 100 C.E. samting, ol Kristen i bin mekim wok long ol skrol. Insait long 100 yia bihain long dispela, i gat resis namel long ol man i laikim skrol na ol man i laikim kodeks. Ol saveman i ting pasin bilong ol Kristen long yusim kodeks i mekim na planti man moa i orait long mekim wok long kodeks.​—6/1, pes 14-​15.

• Kalenda Bilong Geser em wanem samting?

Em wanpela liklik plet ston ol i bin painim long taun Geser long yia 1908. Planti i ting dispela em i homwok bilong wanpela skulmangi. Ol tok i stap long dispela plet ston i stori long taim bilong planim na kisim kaikai long gaden. Em i stori pastaim long wok bilong kisim kaikai long gaden long mun Septemba na Oktoba bilong yumi, na em i kolim nem bilong sampela kaikai bilong gaden na ol bung ol i save mekim.​—6/15, pes 8.

• Mekim sin long holi spirit i makim wanem samting?

Man i mekim sin long holi spirit bilong Jehova, em wanpela sin God i no inap fogivim. (Matyu 12:31) God yet bai makim em inap fogivim sin bilong yumi o nogat, na em inap rausim spirit bilong em long yumi. (Song 51:11) Sapos yumi bel hevi tru long sin yumi mekim, ating dispela i makim olsem yumi tanim bel tru na yumi no mekim sin long holi spirit.​—7/15, pes 16-​17.

• Bilong wanem King Sol i bin askim Devit long em i pikinini bilong husat, maski em i bin bungim Devit long bipo? (1 Samuel 16:22; 17:58)

Sol i no laik save tasol long nem bilong papa bilong Devit, nogat. Sol i lukim olsem Devit i gat strongpela bilip na strongpela bel na em i winim Goliat, olsem na Sol i laik save long wanem kain man i bin mekim bikpela long kain mangi olsem. Ating Sol i gat tingting long kisim Jesi o ol brata bilong em, bilong kamap soldia bilong ami bilong em.​—8/1, pes 31.