Yu Inap Karim Hevi Bilong Pasin i No Stret!

PASIN i no stret i save painim yumi olgeta, a? Sampela taim yumi ting olsem pasin i no stret i painim yumi, tasol tru tru sampela taim pasin i no stret i save painim yumi.

Yumi save bel hevi taim narapela i save mekim pasin i no stret long yumi, na dispela inap bagarapim pasin bilong yumi long pas gut wantaim God. Ating yumi gat strongpela laik long stretim dispela hevi. Bilong wanem? Wanpela as i olsem: Man Bilong Wokim yumi, God Jehova, em “pasin bilong em i gutpela na stretpela tasol,” em i bin putim strongpela tingting long pasin i stret long bel bilong man. (Lo 32:4; Stat 1:​26) Tasol sampela samting inap kamap na yumi pilim olsem pasin i stret i no kamap. Wanpela saveman i bin tok: “Mi tingting gen long olkain pasin i no stret, ol manmeri bilong graun i save mekim. Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol. Na gavman tu i no helpim ol. Long wanem, strong bilong gavman i helpim ol man nogut tasol.” (Saveman 4:1) Yumi ken mekim wanem taim pasin i no stret i painim yumi?

Pasin i No Stret Em Wanem Samting?

Pasin i no stret em pasin bilong sakim ol lo bilong stretpela pasin. Wanem lo em i stret long ol man i mas bihainim? Man Bilong Wokim yumi i gat stretpela pasin na i no save senis, em i gat rait long makim wanem samting i stret na wanem samting i no stret. Long tingting bilong em, bilong “bihainim gut olgeta lo” yumi no ken “mekim sin [“pasin i no stret,” NW] moa.” (Esekiel 33:15) Olsem na taim Jehova i wokim namba wan man, Jehova i givim em maus bilong bel bilong helpim em long skelim wanem pasin i stret na wanem pasin i no stret. (Rom 2:​14, 15) Na tu, long Tok bilong em, long Baibel, Jehova i kamapim ol tok long ol samting i stret na ol samting i no stret.

Olsem wanem sapos yumi pilim olsem narapela i mekim pasin i no stret long yumi? I gutpela long yumi skelim gut dispela samting bilong save olsem tru tru narapela i mekim pasin i no stret long yumi o nogat. Tingim samting i bin painim profet Hibru Jona. Jehova i bin tokim em long tokaut long ol Ninive olsem bagarap bai painim ol. Pastaim Jona i ranawe na i no mekim wok em i mas mekim. Tasol bihain em i go long Ninive na toksave long ol manmeri olsem ol bai bagarap. Ol i harim tok bilong Jona, olsem na Jehova i no bagarapim dispela taun na lukautim ol manmeri bilong en. Jona i ting olsem wanem long dispela? Baibel i tok: “Jona i bel nogut long dispela pasin bilong Bikpela na em i belhat.” (Jona 4:1) Em i ting olsem pasin bilong Jehova i no stret liklik.

Em i klia tru olsem, Jehova i mekim stretpela pasin, long wanem, em i save long tingting i stap long bel bilong ol man na em i “laikim olgeta gutpela pasin na olgeta samting i stret.” (Song 33:5) Jona i mas lain olsem samting Jehova i bin makim bilong mekim i stret wantaim stretpela pasin bilong Em. Sapos yumi ting narapela i mekim pasin i no stret long yumi, yumi inap askim yumi yet olsem, ‘Ating Jehova i gat narapela tingting long dispela?’

Karim Hevi Bilong Ol Pasin i No Stret

Baibel i kamapim planti stori long ol man em ol i karim hevi bilong pasin i no stret. Yumi ken lainim planti samting taim yumi skelim pasin bilong ol long karim ol dispela hevi. Tingim Josep, em ol brata i jeles long em na ol i bin salim em olsem wokboi nating i go long Isip. Long Isip, meri bilong bos bilong em i laik pulim Josep long slip wantaim em, na taim Josep i sakim em, em i sutim tok giaman long Josep olsem em i laik mekim pasin pamuk wantaim em. Olsem na ol i kalabusim Josep. Tasol bilip bilong em i strong moa winim ol sen ain ol i pasim em long en. Em i no larim dispela pasin i no stret i bagarapim pasin bilong em long pas gut wantaim Jehova na daunim strongpela bilip bilong em.​​—Stat 37:​18-​28; 39:​4-​20; Song 105:​17-​19.

Nabot em narapela man ol i bin mekim pasin i no stret long em. Jesebel, em meri bilong King Ahap bilong Israel, i mekim pasin nogut tru long em. King i laikim tumas hap graun Nabot i bin kisim long ol tumbuna bilong em. Dispela graun i stap klostu long haus bilong king. Ol Israel i no inap salim graun ol i bin kisim long ol tumbuna, olsem na Nabot i no laik givim dispela hap graun long king. (Wok Pris 25:23) Olsem na meri nogut bilong Ahap i kamapim ol witnes giaman i sutim tok long Nabot olsem em i tok nogut long God na long king. Long dispela as ol i kilim i dai Nabot na ol pikinini man bilong em. Man, tingim! Nabot i pilim olsem wanem taim ol man i kisim ol ston bilong kilim em i dai!​​—1 King 21:​1-​14; 2 King 9:​26.

Tasol ol dispela pasin i no stret ol i liklik samting sapos yumi skelim wantaim ol pasin i no stret ol i bin mekim long Krais Jisas. Ol man i giaman na ol i mekim kot i no stret bilong kilim em i dai. Gavena bilong Rom husat i skelim em long kot i save olsem Jisas i no gat asua, tasol em i no strong long mekim stretpela pasin. (Jon 18:​38-​40) Tru tumas, Satan i mekim pasin i no stret tru long Krais Jisas, winim olgeta pasin i no stret i bin kamap long wanpela man!

Olsem wanem? Ol dispela samting i kamapim olsem Jehova i no tingim ol pasin i no stret? Nogat! Jehova i no tingim ol dispela samting olsem yumi man i save tingim. (Aisaia 55:​8, 9) Ol i bin salim Josep olsem wokboi nating, olsem na em inap long lukautim famili bilong em na ol i no kisim bagarap. Paslain long bikpela hangre i bagarapim famili bilong em, em i bin kamap man bilong lukautim kaikai long Isip. Tingim, sapos Jehova i no larim dispela pasin i no stret i painim Josep, Josep i no inap i go long kalabus. Em long dispela hap Josep i bin kamapim insait bilong ol driman bilong tupela wankalabus, na bihain wanpela bilong ol i bin tokim King Fero long Josep, na long dispela rot Josep i kamap man bilong lukautim kaikai long Isip.​​—Stat 40:1; 41:​9-​14; 45:​4-8.

Olsem wanem long Nabot? Long dispela tu, tingim ol samting olsem Jehova i bin tingim. Long tingting bilong Jehova, em Man i ken kirapim bek ol man i dai pinis, Nabot i stap laip, maski em i dai pinis na bodi bilong em i stap long graun. (1 King 21:19; Luk 20:​37, 38) Nabot i mas wet inap long taim Jehova bai kirapim em bek long indai, tasol hap taim em i mas wet i stap em liklik taim tasol, long wanem, ol man i dai pinis ol i no save long wanpela samting. (Saveman 9:5) Na tu, long rot bilong mekim kot long Ahap na lain bilong em, Jehova i bekim rong ol i bin mekim long Nabot.​​—2 King 9:​21, 24, 26, 35, 36; 10:​1-​11; Jon 5:​28, 29.

Orait, olsem wanem long Jisas? Ol i kilim em i dai. Tasol God i kirapim em bek na litimapim em “i stap antap tru long olgeta kain strongpela spirit, na long olgeta hetman na long olgeta gavman, na long olgeta samting i gat strong. Em i stap antap long olgeta man i gat nem nau long dispela taim, na long taim bihain tu.” (Efesus 1:​20, 21) Pasin i no stret em Satan i mekim long Krais Jisas i no bin pasim Jehova long givim ol gutpela samting long Pikinini bilong em. Ol i holim Jisas na sanapim em long kot, tasol Jisas i save tru olsem sapos Jehova i laik, wantu Em inap stretim dispela pasin i no stret. Tasol Krais i save tu olsem Jehova i makim taim bilong truim ol tok bilong Baibel, na long stretim olgeta pasin i no stret.

Tru, Satan na ol lain bilong em i bin mekim pasin i no stret long ol stretpela man, tasol bihain Jehova i bin stretim dispela samting na em i bin rausim pasin i no stret, o em bai rausim inap olgeta taim bihain. Olsem na bilong stretim ol pasin i no stret, yumi mas wet long God.​​—Lo 25:16; Rom 12:​17-​19.

As na Jehova i Larim Pasin i No Stret i Stap

Ating i gat as na Jehova i no stretim kwik sampela samting. Bilong skulim yumi long pasin Kristen, em inap larim pasin i no stret i painim yumi. Tru, “God i no save pulim man long mekim sin.” (Jems 1:13) Tasol em inap larim sampela samting i kamap na em i no pasim, na em inap helpim ol man i karim dispela hevi. Baibel i tok: “God em i as bilong olgeta marimari . . . olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim.”​​—1 Pita 5:10.

Na tu, pasin bilong Jehova long larim pasin i no stret i stap em inap opim rot long ol man i mekim dispela pasin long tanim bel. Sampela wik bihain long ol i kilim Jisas i dai, sampela Juda i bin harim tok bilong Pita na dispela “i sutim tru bel bilong ol.” Ol i amamas long kisim tok bilong God na ol i baptais.​​—Aposel 2:​36-​42.

Tru, i no olgeta man bilong mekim pasin i no stret bai tanim bel. Sampela bai strong long mekim ol pasin i no stret i nogut moa. Tasol Sindaun 29:1 i tok: “Sapos ol i stretim wanpela man planti taim, tasol em i wok long kamap bikhet moa, orait wantu em bai i bagarap na i no gat rot bilong ol i helpim em.” Tru tumas, bihain Jehova bai pinisim olgeta man i strong long mekim pasin i no stret.​​—Saveman 8:​11-​13.

Maski longpela hap taim i mas lus bambai yumi ken kamap orait gen long pasin i no stret i painim yumi, yumi ken bilip tru olsem Jehova i save long pasin bilong helpim yumi long kamap orait gen. Na em bai stretim tru olgeta pasin i no stret i bin painim yumi long dispela taim nogut bilong nau. Na tu, em i bin tok promis long givim laip oltaim long yumi long nupela taim we “stretpela pasin tasol bai i stap long en.”​​—2 Pita 3:​13.

[Piksa long pes 16, 17]

Nabot i pilim olsem wanem taim ol i mekim pasin i no stret long em?