‘Mi Stap Olsem Wanpela Mama Bilong Lukautim Israel’

DEBORA i sanap wantaim ol soldia antap long maunten Tabor. Em i amamas tru long lukim olsem ol dispela soldia i bilip na strongim bel. Long moningtaim, em i tingim tingim pasin bilong ol soldia long strongim bel, na pasin bilong komanda bilong ol Barak long bilip. Maski i gat 10,000 soldia, ol samting i kamap long dispela de bai traim pasin bilong ol long bilip na strongim bel. Namba bilong dispela lain ami ol bai pait wantaim i winim tru namba bilong ol, na tu, ol i no gat planti samting bilong pait. Tasol Debora i givim tok bilong strongim ol, olsem na ol i strongim bel na ol i redi long go pait.

Yu inap piksaim long tingting olsem win i wok long sakim klos bilong Debora taim em i sanap wantaim Barak, na tupela i lukluk i go daun long bikpela lain ami. Maunten Tabor em wanpela bikpela maunten i go antap tru, tasol long het bilong en i gat ples stret. Longpela bilong dispela maunten em klostu 400 mita, na taim yu sanap antap long ples stret bilong en, yu inap lukim ples daun bilong Esdrelon i go inap long hap saut-wes. Wara Kison i ran namel long ol ples kunai na i go kamap long solwara Mediterenian klostu long maunten Karmel. Ating long dispela moning wara i drai pinis, tasol ol i lukim sampela samting i lait i stap longwe. Lain ami bilong Sisera i kam klostu nau na yu inap lukim lait bilong ol hap ain. Ol nambawan soldia bilong Sisera i ron long klostu 900 karis, na long wil bilong ol dispela karis i gat ol longpela naip long en. Sisera i tingting strong long kilim i dai ol Israel na pinisim ol insait long sotpela haptaim tasol!

Debora i save olsem Barak na lain soldia bilong en i wet long em bai tokim ol long samting ol bai mekim. Yu ting Debora em wanpela meri tasol i stap long dispela taim? Em i pilim olsem wanem long mekim bikpela wok long kain taim olsem? Yu ting em i tingting planti long as na ol i makim em long go long dispela pait? Nogat tru! Long wanem, God bilong em Jehova i bin tokim em long go na kirapim dispela pait, na tu, God i tok wanpela meri bai pinisim dispela pait. (Hetman 4:9) Yumi inap kisim wanem skul long pasin bilong Debora na dispela lain soldia long bilip na sanap strong?

Long namba wan taim Baibel i stori long Debora, em i kolim em olsem “wanpela profet meri.” Dispela nem i givim biknem long Debora, tasol Baibel i kamapim klia olsem em i wankain long ol narapela manmeri em Baibel i stori long en.a Na tu, Debora i gat narapela wok long mekim. Em i save harim hevi bilong ol manmeri na tokim ol long rot Jehova i makim bilong stretim dispela hevi.—Hetman 4:4, 5.

Debora i stap long ples maunten bilong Efraim, em ples i stap namel long taun Betel na taun Rama. Jehova i makim em long helpim ol manmeri, olsem na em i save sindaun aninit long diwai pam na bai ol man i ken go lukim em long kisim helpim. Ating sampela taim Debora i pilim olsem wok bilong em i hatwok, tasol em i no larim dispela i daunim em. Long wanem, em i save ol manmeri i nidim helpim bilong em. Bihain em i insait long raitim wanpela song, na long dispela song em i stori long lain Israel i givim baksait long God. Em i tok: “Ol Israel i bihainim ol nupela god, pait i kamap long ol.” (Hetman 5:8) Lain Israel i lusim Jehova na lotuim ol arapela god, olsem na Jehova i larim ol birua i daunim ol. Strongpela komanda Sisera i helpim King Jabin bilong Kenan long daunim lain Israel.

Lain Israel i pret tru taim ol i harim nem bilong Sisera. Pasin na bilip bilong lain Kenan i nogut tru, long wanem, ol i save ofaim ol pikinini na mekim pasin pamuk long tempel. Ol man bilong lain Israel i gat wanem kain sindaun taim Sisera i stap komanda na lain ami bilong en i bosim ol? Song bilong Debora i kamapim olsem ol manmeri i stap tasol na ol i no raun long ol narapela ples, na tu, ol man i no sindaun long graun bilong ol. (Hetman 5:6, 7) Ating ol manmeri i pret long wokabaut long ol bus na ples maunten, long wokim gaden, stap long ol viles i nogat banis, na long wokabaut long ol rot samting, long wanem, ol i pret long ol birua i mekim nogut long ol, stilim ol pikinini bilong ol, na reipim ol meri.b

Ol manmeri i stap wantaim pret inap 20 yia, na nau Jehova i lukim olsem ol i redi long senisim tingting na pasin bilong ol. Olsem song bilong Barak na Debora i kamapim, ol Israel i stap nating inap long taim ‘Debora i kamap olsem wanpela mama bilong lukautim Israel.’ Yumi no save sapos Debora, meri bilong Lapidot i gat ol pikinini, tasol dispela hap tok i olsem wanpela tok piksa. Jehova i makim Debora long givim ol tok bilong helpim lain Israel, wankain olsem mama i save lukautim ol pikinini bilong em. God i givim wok long Debora long tokim Hetman Barak, em man i gat strongpela bilip long i go pait long Sisera.—Hetman 4:3, 6, 7; 5:7.

Long rot bilong Debora, Jehova i tokim Barak long kisim 10,000 man long tupela traib bilong Israel na go “bungim ol long maunten Tabor.” Debora i tokim Barak olsem God i tok promis long helpim ol long daunim strongpela komanda Sisera wantaim 900 karis bilong en! Barak i kirap nogut taim em i harim dispela tok promis. Lain Israel i no gat lain ami, na tu, ol i no gat ol samting bilong pait. Maski i olsem, Barak i redi long go pait, tasol em i tok Debora i mas go wantaim ol long maunten Tabor.—Hetman 4:6-8; 5:6-8.

Sampela man i ting Barak i no gat strongpela bilip taim em i askim Debora long go wantaim em, tasol yumi save dispela tok i no tru. Barak i no askim God long givim em planti samting bilong pait. Olsem wanpela bilipman, Barak i tingim olsem em i bikpela samting long kisim wanpela man em Jehova i makim bilong strongim em na ol soldia bilong en. (Hibru 11:32, 33) Jehova i wanbel long tingting bilong Barak na em i larim Debora i go wantaim ol. Na tu, Jehova i kirapim Debora long tokaut olsem wanpela meri bai kisim biknem long winim dispela pait. (Hetman 4:9) God i tokaut pinis olsem wanpela meri bai kilim i dai man nogut Sisera!

Long nau, ol man i save paitim ol meri na mekim nogut tru long ol. Na ol i no save givim biknem long ol meri olsem God i laik ol i mas mekim. Tasol God i save mekim wankain pasin long ol man na meri wantaim. (Rom 2:11; Galesia 3:28) Stori bilong Debora i helpim yumi long luksave olsem God i save givim wok long ol meri, long wanem, Em i trastim na laikim ol. Olsem na em i bikpela samting long yumi abrusim pasin bilong tingim ol meri i olsem samting nating.

Barak i go bilong bungim lain ami bilong em. Em i bungim 10,000 man long lain ami bilong en na ol i redi long i go pait long strongpela lain ami bilong Sisera. Taim Barak i kisim lain ami bilong em i go antap long maunten Tabor, em i amamas olsem samting em i mekim i strongim bel bilong ol. Baibel i tok: “Debora tu i go wantaim ol.” (Hetman 4:10) Tingim, ating ol soldia i amamas long lukim olsem Debora i strongim bel na i go wantaim ol long maunten Tabor bilong pait. Ol i luksave tu olsem em i redi long lusim laip bilong em, long wanem, em i bilip long God Jehova!

Taim Sisera i harim olsem lain Israel i bungim lain ami bilong kam pait long em, kwiktaim em i go bilong bungim ol. Sampela king bilong lain Kenan i salim lain ami bilong ol i kam bung wantaim lain ami bilong King Jabin. Ating King Jabin i bin gat bikpela strong winim ol dispela narapela king. Bihain, lain ami bilong Sisera i ron long ol karis bilong ol namel long ples nating na dispela i kamapim bikpela nois tru. Ami bilong Kenan i ting olsem ol i gat bikpela strong na ol inap long daunim lain ami bilong Israel insait long sotpela haptaim tasol.—Hetman 4:12, 13; 5:19.

Barak na Debora bai mekim wanem taim ol birua i kam bungim ol? Sapos ol i stap long ples maunten bilong Tabor, ol bai inap long pait na daunim lain ami bilong Kenan, long wanem, ol karis i mas ron long ples stret na bai ol i ken pait. Tasol Barak i wetim Debora long tokim em long ol samting Jehova i laik em i mas mekim long dispela pait. Nau dispela taim i kamap. Debora i tok: “Goan, yumi go. Bikpela i go pas long yu. Olsem na long dispela de bai Bikpela i helpim yu na bai yu winim Sisera.” Na Baibel i tok moa olsem: “Barak i kisim dispela 10,000 man na ol i lusim maunten Tabor na i go daun.”—Hetman 4:14.c

Lain ami bilong Israel i lusim maunten na ron i go long ples stret bilong pait long strongpela lain ami bilong Sisera. Olsem wanem? Yu ting Jehova i go pas long ol bilong mekim pait olsem Debora i bin tok? Baibel i tok: “Graun i guria na ren i kam daun.” Dispela i mekim na lain ami bilong Sisera i paul nabaut. Ren i pundaun bikpela tru, olsem na wara i pulap long graun. Na ol wil bilong karis i pas long graun malumalum na ol karis i hatwok long ron.

Tasol Barak na ol soldia bilong em i no tingting planti taim ol i lukim bikpela win na ren i kamap, long wanem, ol i save olsem God i mekim ol dispela samting i kamap. Ol i ran i go bilong bungim lain ami bilong ol Kenan. Lain Israel i stap olsem ol man God i makim bilong kilim ol birua bilong em, olsem na ol i kilim i dai olgeta lain soldia bilong Sisera. Wara Kison i tait na i karim bodi bilong ol soldia bilong Sisera i go daun long solwara Mediterenian.—Hetman 4:16; 5:21.

Long nau, Jehova i no save salim ol wokman bilong em long mekim pait olsem long bipo. Tasol em i laik bai lain manmeri bilong en i mekim pait long lukautim bilip bilong ol. (Matyu 26:52; 2 Korin 10:4) Sapos yumi wok strong long bihainim tok bilong God, orait dispela i makim olsem yumi sambai long bilip bilong yumi. Ol manmeri husat i laik stap long sait bilong God i mas i gat strongpela bilip, long wanem, planti man bai birua long ol. Tasol Jehova i no senisim tingting bilong em. Em i save lukautim yet ol gutpela wokman bilong em husat i bilip na trastim em, wankain olsem em i bin mekim long Debora, Barak, na ol strongpela soldia bilong Israel long bipo.

Sisera dispela nambawan birua bilong lain Israel i lusim ples bilong pait na ranawe! Em i ranawe lusim ol soldia bilong em na tingim olsem ol i ken dai long dispela ples pait. Em i hait long lain Israel na ranawe i go long ples drai bilong kisim helpim long ol man i stap klostu long dispela hap. Sisera i pret, nogut ol soldia bilong Israel i painim em, olsem na em i abrusim ol ples maunten na ranawe i go long haus sel bilong Heber, em man bilong lain Kin. Lain bilong Heber em ol tripman, tasol Heber i lusim ol na i go sindaun long hap saut, na em i stap pren bilong King Jabin.—Hetman 4:11, 17.

Sisera i taiet tru taim em i kamap long haus sel bilong Heber. Na em i luksave olsem Jael, em meri bilong Heber i stap long haus sel, tasol Heber i no stap. Sisera i ting Jael bai onarim pasin pren i stap namel long Heber na King Jabin, em i ting dispela meri bai lukautim em. Tasol Sisera i no save gut long Jael! Jael i luksave olsem lain Kenan i gat pasin nogut na ol i givim hevi long lain Israel, olsem na em i mas mekim bikpela disisen. Em inap helpim dispela man nogut o em bai bihainim laik bilong Jehova na kilim dispela birua bilong lain manmeri bilong God. Tasol em i mas mekim wanem? Hau bai dispela meri i daunim na kilim i dai wanpela strongpela man bilong pait?

Jael i mas wokim disisen kwiktaim. Em i stretim ples bilong Sisera long malolo. Sisera i tokim Jael olsem sapos ol man i kam painim em, orait Jael i no ken tokaut olsem em i stap. Taim em i slip i stap Jael i karamapim em long laplap, na taim em i askim long wara Jael i givim em milk long dring. I no longtaim na Sisera i slip indai. Nau Jael i kisim wanpela hama na bikpela nil; long bipo ol meri i stap long ol haus sel i save gut long yusim ol dispela tul. Jael i nildaun klostu long het bilong Sisera, na tingting planti long wok Jehova i givim em long kilim i dai dispela man nogut. Sapos long dispela taim em i gat tupela tingting o em i no laik mekim dispela wok God i givim long em, ating hevi inap kamap. Olsem wanem? Em i tingim samting nogut dispela man i bin mekim long lain manmeri bilong God inap planti yia? O em i tingim gutpela blesing em inap kisim sapos em i stap gut long Jehova? Baibel i no stori long dispela, tasol yumi save olsem Jael i bin kilim i dai Sisera!—Hetman 4:18-21; 5:24-27.

Bihain, Barak i kam na painim dispela birua bilong em. Jael i kisim Barak bilong i go lukim bodi bilong Sisera, na taim em i lukim nil long het bilong Sisera, em i luksave olsem tok profet bilong Debora i kamap tru. Wanpela meri i kilim i dai strongpela soldia Sisera! Long nau, ol saveman i givim kain kain nem nogut long Jael, tasol Barak na Debora i mekim ol tok bilong givim biknem long em. Long song bilong tupela ol i tok long Jael olsem, “amamas bilong en i ken winim amamas bilong ol arapela meri,” long wanem, em i gat pasin bilong bilip na strongim bel. (Hetman 4:22; 5:24) Debora i gat pasin bilong tingim ol narapela. Em i no tingting nogut long Jael, nogat. Em i tingim olsem ol samting Jehova i tingting long mekim i bin kamap tru.

Taim Sisera i dai, lain Israel i no pret moa long King Jabin. Lain Kenan i no gat strong moa long bosim ol man. Olsem na insait long 40 yia, lain Israel i stap bel isi. (Hetman 4:24; 5:31) Debora, Barak na Jael i kisim blesing, long wanem, ol i bilip long God Jehova! Sapos yumi bihainim pasin bilong Debora long sanap strong na bilip long Jehova, yumi inap long helpim ol narapela long mekim wankain samting. Na bai Jehova i ken givim ol blesing long yumi na bai yumi stap bel isi inap oltaim oltaim.