Ol i Pas Gut Wantaim Long Pasin Sori

“Yupela i mas holim strong pasin bilong sori long ol brata.”−1 PITA 4:⁠8.

 1. I gat wanem kain pasin bilong sori i stap namel long ol manmeri bilong God long nau? Kirap long yia 1922 lain remnan i bin autim wanem tok?

OLSEM WANEM? Lain bilong God long nau ol i holim strong pasin bilong sori long ol brata? Tru tumas ol i laikim tru ol brata! As bilong dispela kain pasin bilong sori, em olsem: Ol i save daun long Jehova em i Nambawan Bikpela, na ol i litimapim wok king bilong em olsem Devit i bin mekim long bipo. Krais Jisas em i “Pikinini Bilong Devit” na kirap long yia 1922 ol brata bilong em, em lain remnan, ol i bin mekim bikpela wok bilong autim tok long olgeta hap bilong graun. Ol i tokim ol man, Kingdom bilong God i klostu pinis na Krais Jisas, em Jas God i bin makim, bai bagarapim ol man i helpim wok bos bilong Seten, em dispela wok i bin daunim ol man na putim hevi long ol.−Matyu 21:​15, 42-44; Revelesen 19:​11, 19-21.

₂ Baibel i tok, ‘Bel bilong Jehova i laikim Devit.’ Bilong wanem Jehova i laikim Devit? Long wanem Devit i laikim tumas Jehova na stretpela pasin bilong Em. King Sol tu em i pilim ol dispela gutpela pasin bilong Devit, na em i tokaut olsem Devit em i gutpela man. Sol em i man bilong pret, tasol Devit i no save pret, na em i givim bel olgeta long Jehova, na em i man bilong i go pas, na em i daun long God na bihainim ol lo bilong em.−1 Samuel 13:14; 16:​7, 11-13; 17:​33-36; 24:​9, 10, 17.

₃ Devit i pait long Goliat na winim pait na bihain em i go bek lukim Sol. Long dispela taim narapela man bilong laikim tumas stretpela pasin em i kamap ples klia, em Jonatan, em i namba wan pikinini man bilong King Sol. “Sol wantaim Devit i toktok pinis, orait bihain Jonatan, pikinini man bilong Sol, i givim bel bilong en moa yet long Devit na em i laikim Devit tru olsem em i laikim em yet.” (1 Samuel 18:⁠1) Jonatan i no tingim strong bilong Devit long mekim pait o save bilong em long mekim wok long katapel na em i laikim tumas Devit. Nogat. Em i tingim gutpela pasin bilong Devit long givim bel tru long litimapim nem bilong Jehova, na em i no tingim skin bilong em yet, na em i bilip tru long Jehova.−Lukim Sam 8:​1, 9; 9:​1, 2.

₄ Jonatan i gat bikpela krismas, winim Devit inap 30 yia samting. Tasol em i kamap pren tru bilong dispela yangpela man bilong pait na tupela i pas tru wantaim. “Jonatan i laikim Devit tumas, olsem na em i mekim wanpela strongpela promis long Devit bai em i laikim Devit oltaim. Na Devit tu i promis long Jonatan. Na Jonatan i rausim longpela klos bilong en na ol klos pait bilong en tu. Na em i kisim dispela samting wantaim bainat na banara na let bilong en na i givim long Devit.” (1 Samuel 18:​3, 4) Jonatan i daun tru long Devit! Jonatan em i pikinini man bilong King Sol na taim Sol i dai, Jonatan i mas kamap king. Tasol em i laikim tumas Devit na daun long em, em i man God i bin makim bilong kamap king na em i man i gat bikpela tingting long litimapim nem bilong Jehova na wok king bilong Em.−2 Samuel 7:​18-24; 1 Kronikel 29:​10-13.

₅ Jonatan tu em i strong long kamapim stretpela pasin. Em i bin tok, “Bikpela i no save wari long kisim planti man bilong pait na winim ol birua. Nogat. Liklik lain tasol inap.” Bilong wanem em i tok olsem? Long wanem Jonatan i save, yumi mas wetim God i helpim yumi na soim rot long yumi bambai yumi inap sanap strong na winim ol birua bilong Em. Wanpela taim Sol i putim wanpela tambu long ol ami bilong em, tasol Jonatan i no bin harim Sol i mekim dispela tok, olsem na em i brukim dispela tambu na Sol i tok, ‘Yu mas i dai.’ Jonatan i bihainim pasin daun na em i tok, ‘Mi ken i dai.’ Tasol gutpela tru, ol manmeri i helpim Jonatan na em i no i dai.−1 Samuel 14:​6, 9, 10, 24, 27, 43-45.

Em i Kamapim long Ples Klia Olsem Em i Laikim Em Tumas

₆ Devit i kisim biknem olsem strongpela man bilong pait, olsem na Sol i bel nogut long em na i laik kilim em i dai, tasol Jonatan i laikim Devit tumas na dispela samting i helpim Devit! Baibel i stori olsem: “Jonatan i laikim Devit tumas, olsem na em i go lukim Devit na tokim em olsem, ‘Papa bilong mi i laik kilim yu i dai. Olsem na tumora long moningtaim yu mas lukaut gut long yu yet. Yu mas i go hait.’ ” Long dispela taim Jonatan i mekim gut bel bilong Sol na Sol i no kilim i dai Devit. Tasol bihain Devit i winim planti pait moa. “Ol Filistia na ol Isrel i pait gen. Orait Devit wantaim ol soldia i go pait strong moa long Filistia na winim ol tru.” Dispela samting i mekim na Sol i belhat gen long Devit, na em i tingting gen long kilim Devit i dai. olsem na Devit i ranawe.−1 Samuel 19:​1-10.

₇ Devit i ranawe, tasol bihain em i bungim gen Jonatan na Jonatan i tok: “Yu laik mi mekim wanem samting bilong helpim yu? Maski wanem samting, mi inap mekim.” Nau long ai bilong Jehova, Jonatan i mekim strongpela tok promis gen long Devit, na Devit i tok promis long mekim gut long ol lain pikinini bilong Jonatan oltaim−na bihain Devit i bin truim dispela tok promis. “Jonatan i tokim Devit gen long Devit i mas mekim strongpela promis long laikim em oltaim. Long wanem, Jonatan i laikim tru Devit, olsem em i save laikim em yet.”−1 Samuel 20:​4-17; 2 Samuel 21:⁠7.

₈ King Sol i tingting strong long kilim i dai Devit. Taim Jonatan i mekim sampela tok bilong helpim Devit, Sol i belhat na tromoi spia na i laik kilim i dai pikinini bilong em yet! Olsem na Jonatan tupela Devit i hait na bung long gaden. “Devit i kirap . . . na i kam brukim skru klostu long Jonatan na daunim het bilong en tripela taim long graun. Na em i sanap na tupela i kis na krai. Na belsori bilong Devit i winim belsori bilong Jonatan. Orait Jonatan i tokim Devit, ‘Yu ken i go wantaim bel isi. Yumi promis pinis long nem bilong Bikpela bai yumi mekim gut long yumi yet oltaim, na ol lain bilong yu na lain bilong mi i kamap bihain, ol tu i mas mekim wankain pasin.’ ” Nau Jonatan i lusim Devit na i go bek na Devit i ranawe i go i stap long bus long hap bilong Sif.−1 Samuel 20:​41, 42.

₉ Tasol Jonatan i mekim gutpela pasin sori na em i wok yet long strongim Devit. Baibel i tok: “Devit i go i stap long ples Hores klostu long Sif. Na Jonatan i go lukim em na mekim gutpela tok long em bai Devit i bilip strong long God. Jonatan i tokim em olsem, ‘Yu no ken pret. Papa bilong mi i no inap bagarapim yu. Bihain bai yu kamap king bilong Isrel, na mi bai stap namba tu bilong yu. Na papa bilong mi tu i save pinis long dispela samting.’ Na long ai bilong Bikpela, tupela i mekim strongpela promis gen long i stap pren tru oltaim.”−1 Samuel 23:​15-18.

₁₀ Ating em i laspela taim Devit wantaim gutpela pren bilong em Jonatan i bung wantaim. Bihain ol Filistia na ol Isrel i pait gen na ol Filistia i kilim i dai Jonatan na Sol, na Devit i mekim wanpela singsing sori. Nem bilong dispela singsing em olsem: “Singsing Banara.” Long dispela singsing Devit i litimapim nem bilong Sol, long wanem Jehova yet i makim em i kamap king, tasol long pinis bilong dispela singsing, Devit i tok: “Jonatan tu i dai, na bodi bilong em i stap long ples maunten. Mi sori tru long yu, Jonatan, brata bilong mi. Mi bin laikim yu tumas na yu bin laikim mi tu. Laik bilong yu i strong moa na i winim laik bilong meri long man. Ol strongpela soldia i dai pinis long pait na ol samting bilong pait i bagarap pinis.” (2 Samuel 1:​18, 21, 25-27) Nau long namba tu taim ol i makim Devit bilong kamap king bilong ol Juda.

Dispela i Makim Wanem Samting long Nau?

₁₁ “Spirit bilong God yet em i bin kamapim olgeta tok bilong Baibel. Na dispela tok em i gutpela bilong givim save long yumi.” Orait, stori bilong Devit na Jonatan i givim wanem save long yumi? (2 Timoti 3:16) Yumi kisim save olsem i gat wanpela pasin bilong laikim tumas narapela man em “i winim laik bilong meri long man.” Tru, sapos meri i laikim wanpela man na tupela i bihainim lo bilong Jehova na tupela i marit stret, dispela “laik bilong meri long man” em i gutpela samting. (Matyu 19:​6, 9; Hibru 13:⁠4) Tasol strongpela laik na sori i stap namel long Devit tupela Jonatan i kamapim long ples klia wanpela gutpela samting moa i insait long pasin bilong laikim tru narapela man na dispela i stret wantaim lo bilong God i tok, “Yupela ol Isrel, yupela harim! Jehova, em God bilong yumi, em wanpela tasol em i Jehova. Na yu mas laikim tru Jehova, em God bilong yu, long bel bilong yu olgeta, na long tingting bilong yu olgeta, na long strong bilong yu olgeta.”−Diuteronomi 6:​4, 5, NW.

₁₂ Devit tupela Jonatan i givim bel olgeta long Jehova na tupela i wanbel long kamapim dispela strongpela laik bilong bel bilong tupela−taim ol birua i bagarapim nem bilong Jehova, tupela i pait long ol dispela birua na stretim bek nem bilong Em. Taim tupela i mekim olsem, narapela i lain long laikim tru narapela. (1 Pita 4:⁠8) Lo bilong God long Levitikas 19:18 (NW ) i tok: “Yu mas laikim ol arapela man olsem yu laikim yu yet,” tasol Devit tupela Jonatan i winim dispela kain laik em Levitikas i kolim; tupela i kamap pren tru na narapela i laikim moa yet narapela. Dispela gutpela pasin sori i stap namel long tupela i makim pasin sori bilong “nupela lo” Jisas i givim long ol disaipel, em i tok: “Yupela i mas laikim tru ol brata. Mi bin laikim yupela tru. Olsem tasol yupela i mas laikim tru ol brata.” Pasin sori bilong Jisas i olsem: Em i no tingim skin o laik bilong em yet−em i daun olgeta long Jehova na bihainim laik bilong Em, na tu, em i redi long “lusim laip bilong em yet bilong helpim ol pren bilong em.”−Jon 13:34; 15:⁠13.

“Wanpela Lain Sipsip Tasol” Ol i Pas Gut Wantaim

₁₃ Ol Kristen em God i bin makim ol, em “liklik lain,” ol i bin mekim bikpela wok long pait long “Goliat” bilong nau. Tasol kirap long yia 1935 narapela lain bilong autim tok bilong Kingdom ol i kam wok wantaim ol, ol i bikpela lain na ol i bilong narapela “banis.” Ol dispela “arapela sipsip” i pas gut wantaim hap lain “sipsip” em God i bin makim ol na ol i stap yet long graun, na ol i kamap “wanpela lain sipsip tasol” aninit long “wanpela wasman,” em “Pikinini Bilong Devit.” Narapela i laikim tru narapela na ol i stap wanbel na pas tru wantaim, wankain olsem Jonatan tupela Devit long bipo.−Luk 12:32; Jon 10:16; Esikiel 37:⁠24.

₁₄ Dispela lain kain olsem Jonatan i wok long kamap planti na kamap bikpela lain na wantu Namba Tu Pait Bilong Olgeta Hap i kirap. Nau bikpela traim i painim ol Kristen God i bin makim wantaim dispela bikpela lain poroman bilong ol. Long dispela taim ol man i kirap mekim nogut tru long ol, na planti taim ol pris pasto i kirapim ol long mekim olsem. Dispela pasin ol i mekim i kain olsem pasin Sol i bin mekim, em Sol i laik kilim i dai Devit, em man God i bin makim, na bihain em i laik kilim i dai Jonatan taim Jonatan i laik helpim Devit. Long taim bilong Namba Tu Pait, lain ol i olsem Devit na lain ol i olsem Jonatan i holim strong pasin bilong laikim tru ol brata! Ol samting i kamap tru olsem Jisas i bin tok piksa long en long Matyu 25:​35-40.a

₁₅ Ol Witnes Bilong Jehova i holimpas ol lo bilong God na ol i narapela kain tru long dispela lain bilong nau em King Sol bilong bipo i makim! Ol Witnes, em ol “i no man bilong dispela graun,” ol i bin bihainim lo bilong Jisas na long olgeta hap bilong graun ol i “laikim tru ol brata.” (Jon 15:​17-19) Tasol long taim bilong Namba Wan na Namba Tu Pait Bilong Olgeta Hap ol pris pasto bilong ol misin ol i kolim Kristen ol i bin beten askim “god” bilong ol long blesim ami bilong kantri bilong ol bai ol i winim pait, na planti milion soldia i go long pait na ol wanlotu bilong ol long narapela kantri i kilim ol i dai. Bipo Jehova i salim “spirit nogut” long Sol na Sol i pret nogut tru. Ating dispela i makim ol samting i kamap taim ol ensel i kamapim ol hevi olsem Revelesen sapta 8 i kolim. Ol pris pasto bilong ol misin bilong dispela graun ol i kolim Kristen ol i no gat spirit holi bilong Jehova i stap long ol na dispela samting i kamap ples klia pinis.−1 Samuel 16:14; 18:​10-12; 19:10; 20:​32-34.

₁₆ Long 1918 bikpela pait i stap na ol pris pasto i mekim wok long dispela samting bilong kirapim gavman bilong Amerika long mekim kot long ol man i gat wok long bosim Sosaiti Wastaua na bihain ol i go kalabus. (Bihain gen kot i tokaut olsem ol dispela sumatin bilong Baibel i no gat rong liklik.) Long taim bilong namba tu pait bilong olgeta hap, ol i tambuim wok bilong ol Witnes Bilong Jehova long hap bilong Jemani na Itali na Japan na long planti kantri Englan i bosim (Komonwel). Planti taim ol pris pasto i as bilong dispela samting. Lukim dispela pas em piksa bilong en i stap long pes 25, em Asbisop bilong Sidni (bihain em i kamap kadinel) i bin raitim paslain liklik long taim gavman i tambuim ol Witnes Bilong Jehova long Australia. Ol Witnes i save ol i no gat rong, olsem na ol i apil long bikpela kot bilong Australia na jas i skelim dispela samting, em Mista Jastis Starke, em i tok, gavman i kirap nating na putim dispela tambu na i mekim hatpela pasin. Olsem na ol i pinisim dispela tambu long Jun 14, long yia 1943, na gavman i baim kot. Na long dispela taim nau, ol pris pasto i mekim na sampela gavman long Afrika na Esia i kirap mekim nogut tru long ol Witnes Bilong Jehova. Em nau, Sol bilong nau−em ol pris pasto bilong ol misin ol i kolim Kristen−ol i wok yet long mekim nogut long lain bilong God.

₁₇ Ol gavman na misin i wok yet long mekim nogut long ol Witnes Bilong Jehova na namel long yia 1980 na 1988 samting ol Witnes i bin mekim wanem long dispela hevi? Ol i bin mekim wankain pasin olsem Devit i mekim long Goliat, na Devit na Jonatan i bin mekim long King Sol! Ol i no pret; ol i tingting strong long holimpas lo bilong God na litimapim nem bilong Jehova, em Nambawan Bikpela, long wanem ol i save Kingdom bilong God bai daunim ol birua na winim pait. (Danyel 2:44) Ol man i mekim nogut long ol, tasol ol i stap wanbel na sanap strong. Narapela i strongim narapela na ol i pas tru wantaim long olgeta hap bilong graun−ol i laikim tru ol brata maski ol i bilong wanem wanem lain. Long bipo na long nau tu ol man bilong graun i no bin lukim kain strongpela pasin bilong sori olsem. Ol Witnes i no save insait long pait, olsem na ol i no save kilim i dai ol wanlotu bilong ol bilong ol narapela kantri. (Maika 4:​3, 5) Long dispela rot ol i kamapim long ples klia olsem ol i disaipel tru bilong Jisas, long wanem Jisas i bin tok, “Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:35) Ol Witnes Bilong Jehova i stap olsem brata brata tru long olgeta hap bilong graun. Ol i holim strong dispela ‘pasin bilong sori i save inapim olgeta gutpela pasin na pasim olgeta wantaim.’ Ol i save laikim tru ol brata bilong olgeta lain na olgeta kain skin.−Kolosi 3:⁠14.

Holim Strong Pasin Bilong “Laikim Tru Ol Brata”

₁₈ Baibel i tok, “Jonatan, pikinini man bilong Sol, i givim bel bilong en moa yet long Devit na em i laikim Devit tru olsem em i laikim em yet.” Wankain pasin tru i kamap nau long “las taim”! (2 Timoti 3:​1, 14) Ol man bilong dispela taim nau i longlong nabaut na mekim pasin pait na bagarapim man, tasol i gat wanpela lain i stap, olsem ol Witnes Bilong Jehova, em ol i stap wanbel long olgeta hap bilong graun na narapela i laikim tru narapela. Ol i bihainim pasin Kristen na ol i no save insait long ol pait, olsem na ol i bin litimapim nem bilong Man bilong wokim ol, em Nambawan Bikpela bilong olgeta manmeri. (Sam 100:⁠3) Ol wanlain politik bilong “Goliat”−em ol Refaim bilong nau−ol i wok yet long mekim ol tok bilas long ol Isrel bilong spirit. (2 Samuel 21:​21, 22) Na “Sol” bilong nau−em ol pris pasto bilong ol misin ol i kolim Kristen−ating bai ol i wok yet long mekim nogut long dispela tupela lain i olsem Devit na Jonatan. (1 Samuel 20:​32, 33) Tasol “[Jehova] yet bai i winim dispela pait.” Em i Nambawan Bikpela na em bai helpim ol gutpela wokboi bilong em; em bai daunim ol birua na winim laspela pait. Dispela lain ol i olsem Devit ol i sanap strong na ol i no lusim lo bilong God liklik. Planti milion manmeri long olgeta hap bilong graun, em ol i olsem Jonatan, na sampela bipo ol i bin mekim nogut long ol Witnes, ol i lukim strongpela pasin bilong dispela lain na ol i kam wok wantaim ol. Ol i pas gut wantaim ol long pasin sori bilong Krais.b−1 Samuel 17:47; Song Bilong Solomon 2:⁠4.

₁₉ Sapos yu lukim sat i stap long pes 28-31 bilong dispela nius yu ken save long wok ol dispela milion milion Witnes i mekim, em dispela wok i go bikpela bikpela. Insait long 10-pela yia i go pinis (1979-1988), lain bilong autim gutpela tok bilong Kingdom i go bikpela inap 64.3 pesen. Long 1979 i gat 2,186,075 manmeri i save autim tok, tasol long 1988 i gat 3,592,654 ol i autim tok. Long olgeta hap bilong graun ol dispela manmeri i stap wanbel tru long bilip na long wok bilong God ol i mekim na long pasin bilong ol long givim bel long bihainim ol stretpela lo bilong Baibel. Ol i bilong narapela narapela lain na skin, tasol ol i pas tru wantaim na tok bilong Jisas i stret long ol, em i tok: “Sapos yupela i bihainim gut lo bilong mi, orait bai yupela i stap insait long sori bilong mi. Olsem tasol mi bin bihainim gut lo bilong Papa bilong mi, na mi stap insait long sori bilong em.”−Jon 15:10; lukim tu 1 Korin 1:⁠10.

₂₀ Ol dispela witnes bilong Jehova i autim tok long 200 samting tok ples, tasol olgeta ol i mekim dispela “gutpela tok ples,” em tok i tru na ol i “wok gut wantaim” long mekim wok bilong God. Long dispela rot ol i bihainim gutpela pasin bilong Devit na Jonatan, em narapela i laikim tru narapela. (Sefanaia 3:​9, NW; 1 Samuel 20:17; Provep 18:24) Sapos yu no pas yet wantaim ol manmeri bilong God, olsem wanem? Yu laik insait long dispela lain bilong nau ol i olsem Jonatan? Yu ken putim dispela i stap olsem wanpela mak yu laik winim, na ol Witnes Bilong Jehova i laik tru long helpim yu bai yu winim dispela mak.

[Ol Futnot]

Sampela Askim Bilong Kamapim Gen Ol Bikpela Tok

◻ Jonatan i mekim wanem na em i kamapim bel bilong em; em i laikim tu mas Devit?

◻ Pasin sori i stap namel long Devit tupela Jonatan i makim wanem kain pasin bilong sori?

◻ Ol pris pasto bilong ol misin ol i kolim Kristen ol i bin mekim wanem na ol i mekim pasin kain olsem King Sol i mekim taim em i ranim Devit?

◻ Jonatan i laikim tumas Devit na dispela i makim wanem samting long nau?

◻ Ol Witnes long olgeta hap bilong graun i pas gut wantaim na i stap wanbel na dispela i kamapim long ples klia wanem samting?

 2. Bilong wanem ‘bel bilong Jehova i laikim Devit’?

 3. Jonatan i gat wanem tingting long Devit? Wanem as bilong dispela tingting bilong em?

 4. Jonatan i mekim wanem na dispela i makim olsem em i daun long Devit, em man God i bin makim bilong kamap king?

 5. Jonatan i save yumi mas mekim wanem bambai yumi inap sanap strong na winim ol birua bilong God?

 6. Jonatan i laikim tumas Devit na olsem wanem dispela i bin helpim Devit?

 7. Taim Jonatan i bungim gen Devit, tupela i mekim gen wanem strongpela tok promis?

 8. Bilong wanem Jonatan tupela Devit i hait na bung long gaden? Taim tupela i bung, wanem samting i bin kamap?

 9, 10. (a) Bihain tupela i bung gen, na ating em laspela taim tupela i bung, na Jonatan i mekim wanem gutpela tok long Devit bilong strongim em? (b) Taim ol Filistia i kilim i dai Jonatan na Sol, Devit i raitim wanem singsing sori? Wanem laspela tok bilong dispela singsing?

 11, 12. (a) I gat wanem kain bikpela pasin sori i stap namel long Devit tupela Jonatan? (b) Devit tupela Jonatan i pas tru wantaim na dispela gutpela pasin sori i stap namel long tupela i makim wanem samting?

 13. Wanem lain bilong autim tok bilong Kingdom i kamap ples klia kirap long yia 1935? Ol Kristen bilong lain bilong heven i wanbel wantaim ol olsem wanem?

 14. Sol i laik kilim i dai Devit na wanem wankain pasin i bin kamap long taim bilong yumi? Jonatan i laikim tumas Devit na em i wok long helpim em na dispela i makim wanem samting long nau?

 15. (a) Ol Witnes i mekim wanem na dispela i narapela kain tru long pasin bilong dispela lain long nau em Sol i makim? (b) Bipo Jehova i salim “spirit nogut” long Sol na Sol i pret nogut tru na ating dispela i makim wanem samting long taim bilong yumi?

 16. (a) Olsem wanem ol pris pasto i bin mekim wok long tupela bikpela pait bilong mekim nogut long ol Witnes? (b) Long dispela taim nau bilong wanem yumi ken tok “Sol” bilong nau i wok yet long mekim nogut long lain bilong God?

 17. (a) Ol gavman na ol misin i wok yet long mekim nogut long ol Witnes Bilong Jehova na ol Witnes i mekim wanem? (b) Ol Witnes i stap wanbel long olgeta hap bilong graun na dispela i kamapim long ples klia wanem samting?

 18. (a) Jonatan i laikim tumas Devit na dispela i makim wanem samting long nau? Olsem wanem dispela samting i kamap ples klia? (b) Dispela lain ol i olsem Devit ol i sanap strong na wanem samting i bin kamap long olgeta hap bilong graun?

 19, 20. (a) Lukim ripot bilong wok bilong ol Witnes long pes 28-31 na kolim sampela bikpela wok ol i bin mekim. (b) Namel long 1979 na 1988 lain Witnes i go bikpela inap hamas? (c) Bilong wanem yumi ken tok ol Witnes long olgeta hap ol i stap wanbel tru? Olsem na i gat wanem askim yu mas tingim?

[Blok long pes 25]

St. Mary’s Cathedral

Sydney

August 20, 1940.

The Rt. Hon. W. M. Hughes, M.H.R., K.C.,

Attorney General,

CANBERRA.

Dear Mr. Hughes:

Ol TOK BILONG DISPELA PAS OL I TANIM PINIS LONG TOK PISIN

Mi laik tok tenkyu long yu long pas bilong yumi kisim long de 9, em i kamapim ol tok Mista Jennings, em wanpela memba bilong palamen i bin mekim.

Ating yu save yu mas tingting gut na skelim gut dispela samting em i tokim yu long en, nogut sampela man i kros.

Tasol sapos yu gat tupela tingting long ol samting yu mas mekim, long wanem dispela lain i tok ol i save autim ol tok Kristen, orait mi laik tok, gutpela sapos yu no tingim dispela tok ol i mekim, yu mas tingim ol samting tru ol i bin mekim. Mi laik bai yu lukim ol buk bilong ol na ol tok ol yet i mekim na yu mas skelim pasin Polis bilong Nu Saut Wels i tok ol i mekim. Ol tok na pasin bilong ol i no wankain liklik long lotu Kristen tru. Nogat tru.

Komisina bilong Polis long Nu Saut Wels i tokaut pinis olsem em i laik bai gavman i mas tambuim dispela lain na bai Polis inap mekim gut ol samting ol i laik mekim long dispela lain.

With every good wish, I remain,

Yours faithfully,

ARCHBISHOP OF SYDNEY.