Taim Jisas i Kam Wantaim Bikpela Lait Bilong Kingdom
“Sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.”—MATYU 16:28.
BIHAIN liklik long Pentikos bilong yia 32 C.E., tripela aposel bilong Krais Jisas ol i lukim wanpela samting olsem driman em ol bai no inap lusim tingting long en. Olsem Baibel i tok, “Jisas i kisim Pita na Jems wantaim brata bilong en Jon, na em i bringim ol i go long wanpela maunten i antap moa. Na ol tasol i stap. Na taim ol i lukluk i stap, bodi bilong Jisas i senis na i kamap narakain.”—Matyu 17:1, 2.
2 Dispela samting ol i lukim, em i kamap long wanpela bikpela taim. Jisas i bin kirap tokim ol disaipel olsem em bai karim pen na dai long Jerusalem, tasol ol i no kisim gut dispela tok. (Matyu 16:21-23) Orait dispela samting olsem driman i strongim bilip bilong tripela aposel bilong Jisas na bai ol i ken redi long i dai bilong em na bilong ol bikpela wok na traim bai painim lain Kristen inap planti yia. Olsem wanem? Dispela samting olsem driman inap givim sampela save long yumi ol manmeri bilong nau? Em inap, long wanem, samting dispela driman i makim em i wok long kamap nau long taim bilong yumi.
3 Sikspela de paslain long taim bodi bilong Jisas i kamap narapela kain, em i tokim ol disaipel bilong em: “Pikinini Bilong Man bai i stap long bikpela lait bilong Papa bilong en, na em bai i kam wantaim ol ensel bilong en. Long dispela taim em bai i givim pe long olgeta manmeri inap long pasin ol i bin mekim.” Truim bilong dispela tok bai kamap long pinis bilong dispela pasin bilong nau. Jisas i tok moa olsem: “Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:27, 28; 24:3; 25:31-34, 41; Daniel 12:4) Taim bodi bilong Jisas i kamap narapela kain, dispela hap tok bilong em i kamap tru.
4 Orait, tripela aposel hia i bin lukim wanem samting? Luk i stori long dispela samting i kamap, olsem: “[Jisas] i beten i stap, na pes bilong en i kamap narakain, na klos bilong en i kamap waitpela tru, na i lait moa yet. Na tupela man i toktok wantaim em i stap, em Moses na Elaija. Tupela i kamap wantaim lait bilong God, na tupela i toktok long ol samting Jisas bai i mekim long Jerusalem, na em bai i lusim dispela graun na i go.” Orait nau “wanpela klaut i kamap na i karamapim ol [aposel] na ol i pret. Na wanpela maus insait long dispela klaut i tok olsem, ‘Dispela em i Pikinini bilong mi. Mi makim em pinis bilong mekim wok bilong mi. Yupela harim tok bilong em.’ ”—Luk 9:29-31, 34, 35.
Em i Strongim Bilip Bilong Yumi
5 Aposel Pita i bin tokaut pinis olsem Jisas em i “dispela man God i bin makim bilong kisim bek ol manmeri bilong en. [Em i] Pikinini Bilong God i gat laip.” (Matyu 16:16) Tok bilong Jehova i kam long heven i strongim dispela tok Pita i bin mekim, na taim bodi bilong Jisas i kamap narapela kain, dispela i makim Krais bai kam wantaim bikpela strong na lait bilong Kingdom, na bihain em bai skelim olgeta manmeri long kot. Inap 30 yia samting bihain long taim bodi bilong Jisas i kamap narapela kain, Pita i tok: “Mipela i tokim yupela pinis long strong bilong Bikpela bilong yumi Jisas Krais, na long em bai i kam bek gen. Tasol taim mipela i tokim yupela long dispela tok bilong Krais, mipela i no bihainim ol stori nating i bin kamap long tingting bilong ol man. Nogat. Long ai bilong mipela yet, mipela i bin lukim lait na strong bilong God i kamap long em, olsem na mipela i tok. God Papa i bin givim biknem long em, na i mekim dispela gutpela lait i kamap long em. Na God yet i stap long dispela nambawan lait bilong heven na em i mekim tok long Jisas olsem, ‘Dispela em i Pikinini bilong mi, mi laikim em tumas, na mi amamas long em.’ Mipela i bin i stap wantaim em long dispela maunten God i bin i stap long en, na mipela i harim dispela tok i kam long heven.”—2 Pita 1:16-18; 1 Pita 4:17.
6 Dispela samting em tripela aposel i bin lukim, em i strongim bilip bilong yumi tu long nau. Planti samting i bin wok long kamap bihain long yia 32 C.E. Wanpela yia bihain long en, Jisas i dai na kirap bek na em i go antap na i stap long han sut bilong Papa bilong em. (Aposel 2:29-36) Long Pentikos bilong dispela yia, nupela lain “Israel tru bilong God” i kamap, na wanpela wok bilong autim tok i kirap long Jerusalem na bihain em i go kamap long olgeta hap bilong graun. (Galesia 6:16; Aposel 1:8) Kwiktaim tasol, hevi i kamap na i traim bilip bilong ol disaipel bilong Jisas. Ol i holim ol aposel na paitim ol nogut, long wanem, ol i no laik lusim wok bilong autim tok. Bihain liklik ol i kilim i dai Stiven. Bihain ol i kilim i dai Jems, em wanpela aposel i bin lukim bodi bilong Jisas i kamap narapela kain. (Aposel 5:17-40; 6:8–7:60; 12:1, 2) Tasol Pita na Jon i abrusim bagarap na ol i stap na mekim wok bilong Jehova inap planti yia moa. Klostu long yia 100 C.E., Jon i raitim stori bilong sampela driman moa em i kisim, olsem em i lukim Jisas i stap long bikpela lait bilong heven.—KTH 1:12-20; 14:14; 19:11-16.
7 Long kirap bilong “de bilong Bikpela” long 1914 na i kam inap nau, planti samting olsem driman em Jon i bin lukim ol i kamap tru. (KTH 1:10) Orait, olsem wanem long taim Jisas ‘i stap long bikpela lait bilong Papa bilong en na em i kam,’ olsem dispela driman i makim taim bodi bilong Jisas i kamap narapela kain? Truim bilong dispela samting olsem driman i kirap long taim Kingdom bilong God long heven i kamap long 1914. Taim Jisas i kamap King, olsem wanpela sta bilong moningtaim i kamap, dispela i kain olsem wanpela nupela de i kamap. (2 Pita 1:19; KTH 11:15; 22:16) Yumi laik save, long dispela taim em i givim pe long sampela manmeri inap long pasin ol i bin mekim? Yes, em i bin mekim olsem. I gat sampela samting i makim klia olsem bihain liklik long dispela, em i kirap mekim wok bilong kirapim bek long matmat ol Kristen God i bin makim na ol i go antap long heven.—2 Timoti 4:8; KTH 14:13.
8 Tasol klostu nau Jisas bai kam “olsem king wantaim olgeta ensel,” bilong skelim olgeta manmeri long kot. (Matyu 25:31) Long dispela taim em bai kamap ples klia wantaim gutpela lait tru na biknem bilong em, bilong givim pe long “olgeta manmeri” wan wan inap long pasin ol i bin mekim. Ol manmeri i olsem sipsip ol bai kisim laip i stap oltaim oltaim aninit long Kingdom em Papa i bin redim bilong ol, na ol manmeri i olsem meme ol bai i go bilong “kisim pe nogut,” olsem ol bai bagarap olgeta, inap oltaim oltaim. Em gutpela samting tru bai kamap long pinis bilong truim bilong dispela driman samting bilong taim bodi bilong Jisas i kamap narapela kain.—Matyu 25:34, 41, 46; Mak 8:38; 2 Tesalonaika 1:6-10.
Ol Poroman Bilong Jisas i Kisim Pinis Biknem
9 Taim bodi bilong Jisas i kamap narapela kain, i no em wanpela tasol i insait long dispela samting olsem driman. Ol aposel i lukim Moses na Elaija i stap wantaim em. (Matyu 17:2, 3) Tupela i stap tru wantaim em o olsem wanem? Nogat, long wanem, tupela i bin i dai long bipo yet na ol i slip long graun na wetim taim bilong kirap bek. (Saveman 9:5, 10; Hibru 11:35) Orait olsem wanem? Ol bai i kamap wantaim Jisas taim em i kam wantaim bikpela lait bilong heven? Nogat, long wanem, Moses na Elaija i bin i stap paslain long taim rot i op bilong ol man i ken i go long heven. Tupela bai insait long dispela lain “God bai i kirapim bek ol . . . em ol stretpela man na ol man nogut wantaim,” em ol bai i stap long graun. (Aposel 24:15) Olsem na taim ol i kamap wantaim Jisas long taim bodi bilong em i kamap narapela kain, dispela i olsem piksa na i makim wanpela samting. Em i makim wanem samting?
10 Long sampela samting moa i bin kamap, Moses na Elaija i olsem piksa bilong makim ol samting bilong bihain. Moses em i namelman bilong kontrak bilong Lo na em i makim Jisas, em i Namelman bilong nupela kontrak. (Lo 18:18; Galesia 3:19; Hibru 8:6) Elaija i makim Jon Bilong Baptais, em man i go pas long Mesaia. (Matyu 17:11-13) Na tu, long stori i stap long Kamapim Tok Hait sapta 11, Moses na Elaija i makim liklik hap lain God i bin makim, olsem remnan, na ol i stap long taim bilong las de. Olsem wanem yumi save long dispela?
11 Orait yumi ken lukim Kamapim Tok Hait 11:1-6. Ves 3 i tok: “Mi bai salim dispela tupela man bilong autim tok bilong mi. Tupela bai i pasim klos bilong sori, na tupela bai i autim tok bilong mi i go inap long 1,260 de.” Long taim bilong Namba Wan Pait dispela tok profet i kamap tru long lain remnan bilong ol Kristen God i bin makim.a Tasol bilong wanem dispela ves i tok long tupela man bilong autim tok? Long wanem, long ol samting bilong spirit, lain remnan ol i mekim wanpela wok i kain olsem wok bilong Moses na Elaija. Ves 5 na 6 i tok: “Sapos ol man i laik mekim nogut long tupela, orait paia bai i kamap long maus bilong tupela na kukim tru ol birua bilong tupela. Olsem na wanem man i laik mekim nogut long tupela, em bai i dai long dispela pasin tasol. Tupela i gat strong bilong pasim skai, bai ren i no ken pundaun long olgeta taim tupela i wok long autim tok profet bilong God. Na tupela i gat strong bilong mekim olgeta wara i kamap blut, na bilong mekim ol kain kain samting nogut i kamap bilong bagarapim ol manmeri bilong graun. Tupela i ken mekim ol dispela kain samting i kamap long laik bilong tupela.” Em nau, dispela i kirapim yumi long tingim ol mirakel em Elaija na Moses i bin wokim.—Namba 16:31-34; 1 King 17:1; 2 King 1:9-12.
12 Orait, Moses na Elaija i makim husat long dispela driman samting long bodi bilong Jisas i kamap narapela kain? Luk i tok, tupela wantaim Jisas ol i kamap “wantaim lait bilong God.” (Luk 9:31) Em nau, ol i olsem piksa na i makim ol Kristen God i bin makim long spirit holi bilong “kisim ol gutpela samting” Krais i kisim pinis, na ol inap wet long “kisim biknem” wantaim em. (Rom 8:17) Ol Kristen God i bin makim na ol i kirap bek pinis, ol bai stap wantaim Jisas taim em i kam long bikpela pait bilong Papa bilong en bilong “givim pe long olgeta manmeri inap long pasin ol i bin mekim.”—Matyu 16:27.
Ol Witnes Kain Olsem Moses na Elaija
13 I gat sampela bikpela samting i makim olsem Moses na Elaija ol inap tru long i stap olsem piksa bilong ol manmeri God i bin makim na ol i bilong kisim biknem wantaim Jisas. Moses na Elaija tupela wantaim i stap olsem mausman bilong Jehova inap planti yia. Belhat bilong king i painim tupela wantaim. Long taim ol i sot long ol samting, tupela i kisim helpim long ol famili i bilong narapela lain. Tupela wantaim i no pret long autim tok profet long ol king na ol i sanap strong na i no larim ol profet giaman i daunim ol. Moses na Elaija wantaim ol i lukim strong bilong Jehova long maunten Sainai (narapela nem bilong en, em Horep). Tupela wantaim i givim namba long ol man bilong kisim wok bilong ol long hap is bilong wara Jordan. Na long taim bilong Moses (wantaim Josua) na Elaija (wantaim Elisa) i gat planti mirakel tru i bin kamap, winim ol narapela taim. Long taim bilong Jisas tasol i gat planti mirakel moa yet i bin kamap.b
14 Olgeta dispela samting i kirapim yumi long tingim Israel bilong God, a? Tru tumas. Jisas i tokim ol gutpela disaipel bilong em: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” (Matyu 28:19, 20) Ol Kristen God i bin makim ol i bihainim dispela tok na ol i mekim wok olsem mausman bilong Jehova, kirap long Pentikos 33 C.E. na i kam inap long nau. Olsem Moses na Elaija, belhat bilong ol king na gavman i bin painim ol tu, na ol i bin autim tok long ol dispela king na gavman. Jisas i tokim 12-pela aposel bilong em: “Ol bai i ting long daunim mi, na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu.” (Matyu 10:18) Taim lain Kristen i kamap nupela na i kam inap nau, dispela tok bilong Jisas i bin kamap tru planti taim.—Aposel 25:6, 11, 12, 24-27; 26:3.
15 Na tu, ol dispela Kristen i bihainim pasin bilong Moses na Elaija na ol i no pret long sambai long tok i tru na tokaut long ol bilip giaman. Tingim Pol, em i bin mekim strongpela tok long wanpela profet giaman bilong lain Juda, em Barjisas, na long gutpela pasin em i kamapim long ples klia olsem ol god bilong ol Atens ol i god giaman tasol. (Aposel 13:6-12; 17:16, 22-31) Na tingim tu olsem long taim bilong yumi, ol remnan em God i bin makim ol i no pret long kamapim rong bilong ol lotu i holim nating nem Kristen, na wok bilong autim tok i givim bikpela hevi long ol dispela lotu.—KTH 8:7-12.c
16 Taim king bilong Isip i belhat long Moses na Moses i ranawe, em i painim ples hait long haus bilong wanpela man i no bilong lain Israel, nem bilong em Jetro. Long narapela taim bihain, Moses i kisim sampela gutpela tok long Jetro long pasin bilong stretim gut wok bilong em long lukautim lain Israel. Pikinini bilong Jetro, em Hobap, em i soim rot long ol Israel taim ol i wokabaut long ples drai nating.d (Kisim Bek 2:15-22; 18:5-27; Namba 10:29) Orait, olsem wanem long ol Israel bilong God? Ol i bin kisim helpim long ol manmeri i no insait long lain Israel bilong God? Yes, ol i bin kisim helpim long ol “planti manmeri tru” bilong “ol arapela sipsip,” em ol i bin kamap long dispela taim bilong las de. (KTH 7:9; Jon 10:16; Aisaia 61:5) Jisas i tok profet long gutpela helpim ol dispela “sipsip” bai givim long ol brata bilong em, em ol bai mekim gutpela pasin na pasin sori long ol. Jisas i tokim ol olsem: “Bipo mi stap hangre, na yupela i bin givim kaikai long mi. Mi dai long wara, na yupela i givim wara long mi. Mi man bilong narapela ples na yupela i bringim mi i go long haus bilong yupela. Mi no gat laplap, na yupela i givim laplap long mi. Mi gat sik na yupela i lukautim mi. Mi stap long kalabus, na yupela i kam lukim mi. . . . Mi tok tru long yupela, olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.”—Matyu 25:35-40.
17 Na tu, ol samting i painim ol Israel bilong God i wankain olsem i bin painim Elaija long maunten Horep.e Elaija i bin ranawe long Kwin Jesebel, na olsem tasol ol remnan i pret na ol i ting wok bilong ol i pinis long taim Namba Wan Pait i pinis. Na Jehova i kamap long ol olsem em i bin mekim long Elaija—em i kam bilong skelim long kot ol lain i tok ol i ‘lain bilong God.’ (1 Pita 4:17; Malakai 3:1-3) Ol lotu i holim nating nem Kristen ol i no inapim mak, tasol Jehova i luksave olsem, lain remnan em i bin makim, em dispela “wokboi i gat gutpela tingting, na i save mekim gutpela wok oltaim,” na dispela lain i kisim wok bilong bosim olgeta samting bilong Jisas hia long graun. (Matyu 24:45-47) Long Horep, Elaija i harim wanpela “nois olsem man i toktok isi tru,” em nek bilong Jehova, em i laik givim sampela wok moa long Elaija. Bihain long taim bilong pait, taim ol samting i stap isi tasol, ol gutpela wokman bilong Jehova em i bin makim ol, ol i harim nek bilong em long rot bilong Baibel. Ol tu i kisim tingting olsem ol i gat wanpela wok ol i mas mekim.—1 King 19:4, 9-18; KTH 11:7-13.
18 Orait, laspela samting yumi ken skelim i olsem: Long rot bilong ol Israel bilong God, Jehova i bin mekim sampela bikpela samting tru bilong kamapim strong bilong em? Bihain long taim Jisas i dai, ol aposel i bin wokim planti mirakel, tasol isi isi ol mirakel i pinis. (1 Korin 13:8-13) Long nau yumi no save lukim ol mirakel tru tru. Tasol Jisas i bin tokim ol disaipel bilong em: “Tru tumas mi tokim yupela, man i bilip long mi, bai em tu i mekim olkain wok mi save mekim. Na bai em i mekim ol bikpela wok i winim wok mi bin mekim.” (Jon 14:12) Namba wan truim bilong dispela tok i kamap taim ol disaipel bilong Jisas i autim gutnius long ol kantri i stap aninit long Rom long taim bilong ol Kristen bilong pastaim. (Rom 10:18) Na bikpela wok moa i bin kamap long nau, taim ol remnan God i bin makim ol i go pas long wok bilong autim gutnius “long olgeta hap bilong graun, bai olgeta lain manmeri i ken harim.” (Matyu 24:14) Orait wanem samting i kamap long dispela wok? Long taim bilong yumi ol i bin bungim bikpela lain tru, winim olgeta taim bipo, em ol i dediket pinis na ol i mekim wok bilong Jehova. (KTH 5:9, 10; 7:9, 10) Em gutpela samting tru i kamapim klia strong bilong Jehova!—Aisaia 60:22.
Ol Brata Bilong Jisas i Kam Wantaim Bikpela Lait
19 Taim liklik hap lain brata bilong Jisas i pinisim wok bilong ol long graun na ol i dai, ol i go antap long heven na kisim biknem wantaim em. (Rom 2:6, 7; 1 Korin 15:53; 1 Tesalonaika 4:14, 17) Long dispela rot ol i kamap king na pris long Kingdom bilong heven, na ol i no inap i dai moa. Ol bai wok wantaim Jisas na “bosim ol [manmeri] strong tru na brukim ol liklik liklik, olsem man i brukim wanpela sospen graun.” (KTH 2:27; 20:4-6; Song 110:2, 5, 6) Na ol bai i sindaun long ol sia king wantaim Jisas na bosim “ol 12-pela lain bilong Israel.” (Matyu 19:28) Ol manmeri bilong graun i krai na bel hevi i stap, ol i wetim ol dispela samting em ol bai kamap long taim bilong ‘kamapim ples klia ol pikinini bilong God.’—Rom 8:19-21; 2 Tesalonaika 1:6-8.
20 Pol i bin toktok long Jisas bai kamap ples klia long taim bilong “bikpela hevi tru,” na em i tok: “Long dispela De God i makim, Bikpela bai i kam na mekim save long ol, tasol olgeta manmeri bilong God, em olgeta manmeri i bin bilip long em, ol bai i litimapim nem bilong em na amamas tru long em.” (Matyu 24:21; 2 Tesalonaika 1:10) Em gutpela samting tru Pita, Jems, Jon, na olgeta narapela Kristen God i bin makim ol inap wet long en! Taim Pita i lukim bodi bilong Jisas i kamap narapela kain, dispela i strongim bilip bilong Pita. Na taim yumi kaunim stori bilong en, dispela i strongim bilip bilong yumi tu na yumi bilip strong olsem klostu nau na Jisas bai “givim pe long olgeta manmeri inap long pasin ol i bin mekim.” Ol gutpela Kristen God i bin makim na ol i stap yet, ol inap tingim taim bodi bilong Jisas i kamap narapela kain na dispela bai strongim bilip bilong ol olsem ol bai kisim biknem wantaim Jisas. Na ol arapela sipsip inap save, Jisas bai lukautim ol long pinis bilong dispela pasin nogut bilong nau, na ol inap abrusim bagarap na stap long gutpela nupela taim, na dispela save i strongim bilip bilong ol. (KTH 7:14) Dispela i strongim tru bel bilong yumi long sanap strong i go inap long pinis bilong dispela taim! Na dispela samting olsem driman inap skulim yumi long sampela samting moa, olsem yumi bai lukim long stori i kamap bihain long dispela.
[Ol Futnot]
a Lukim buk “Let Your Name Be Sanctified,” pes 313, 314, na Kamapim Tok Hait—Bikpela Samting Bilong En i Laik Kamap!, pes 164, 165, em Sosaiti Wastaua bilong Nu Yok i wokim.
b Kisim Bek 2:15-22; 3:1-6; 5:2; 7:8-13; 8:18; 19:16-19; Lo 31:23; 1 King 17:8-16; 18:21-40; 19:1, 2, 8-18; 2 King 2:1-14.
c Lukim pes 133-141 long buk Kamapim Tok Hait—Bikpela Samting Tru i Laik Kamap!
d Lukim buk Rot Bilong Abrusim Bagarap na i Stap Long Nupela Graun, em Sosaiti Wastaua bilong Nu Yok i wokim, pes 281-283.
e Lukim buk “Let Your Name Be Sanctified,” pes 317-320.
Yu Inap Tingim?
◻ Taim bodi bilong Jisas i kamap narapela kain, husat i stap wantaim em insait long dispela driman samting?
◻ Olsem wanem dispela samting olsem driman i strongim bilip bilong ol aposel?
◻ Taim Moses na Elaija i “kamap wantaim lait bilong God” na ol i sanap wantaim Jisas taim bodi bilong em i kamap narapela kain, ol i makim husat?
◻ Moses na Elaija i wankain long ol Israel bilong God long wanem ol samting?
[Askim Bilong Stadi]
1, 2. Wanem samting i bin kamap bihain liklik long Pentikos bilong yia 32 C.E.? I gat wanem as na dispela samting i kamap?
3, 4. (a) Sikspela de paslain long taim bodi bilong Jisas i kamap narapela kain, em i tok wanem? (b) Stori long ol samting i bin kamap taim bodi bilong Jisas i kamap narapela kain.
5. Taim bodi bilong Jisas i kamap narapela kain, dispela i mekim wanem long aposel Pita?
6. Wanem ol samting i kamap bihain long taim bodi bilong Jisas i kamap narapela kain?
7. (a) Dispela driman samting long bodi bilong Jisas i kamap narapela kain, truim bilong en i kirap long wanem taim? (b) Wanem taim Jisas i bin givim pe long sampela inap long pasin ol i bin mekim?
8. Wanem ol samting bai kamap na i makim pinis bilong truim bilong dispela driman samting long bodi bilong Jisas i bin kamap narapela kain?
9. Yumi ken ting Moses na Elaija bai stap wantaim Jisas long truim bilong dispela driman samting long bodi bilong Jisas i bin kamap narapela kain? Stori long dispela samting.
10, 11. Long ol narapela narapela samting, Moses na Elaija i makim husat?
12. Long dispela driman samting long bodi bilong Jisas i kamap narapela kain, Moses na Elaija i makim husat?
13. Wanem ol samting i makim olsem Moses na Elaija ol inap tru long i stap olsem piksa bilong ol manmeri God i bin makim na ol i bilong kisim biknem wantaim Jisas?
14. Ol manmeri God i bin makim, olsem wanem ol i bin mekim wok olsem mausman bilong Jehova, kain olsem Moses na Elaija?
15, 16. Olsem wanem ol manmeri God i bin makim ol i wankain olsem Moses na Elaija long (a) pasin bilong sambai long tok i tru na i no pret? (b) kisim helpim long ol manmeri i no bilong lain Israel?
17. Wanem samting i bin painim ol manmeri God i bin makim na i wankain long samting i bin painim Elaija long maunten Horep?
18. Long rot bilong ol Israel bilong God, olsem wanem Jehova i bin mekim sampela bikpela samting tru bilong kamapim strong bilong em?
19. Long samting olsem driman, wanem taim ol brata bilong Jisas i stap wantaim em na ol i kisim biknem?
20. (a) Taim bodi bilong Jisas i kamap narapela kain, dispela i strongim bilip bilong Pita long wanem samting? (b) Dispela samting i bin kamap em i strongim ol Kristen bilong nau olsem wanem?
[Piksa long pes 10]
Dispela driman samting long bodi bilong Jisas i kamap narapela kain, em i bin strongim bilip bilong ol Kristen bilong bipo na bilong nau tu