Elisa i Lukim Ol Karis i Gat Paia Long En​—Yu Inap Lukim?

King bilong Siria i wok long painim Elisa, em profet bilong God. Em i harim olsem Elisa i stap long taun Dotan, em wanpela taun i gat banis i raunim. Long nait, king i salim lain ami bilong em wantaim ol hos na ol karis bilong pait i go long Dotan. Taim tulait i no bruk yet, ol i banisim pinis taun.—2 Kin. 6:13, 14.

Taim wokman bilong Elisa i go ausait, em i lukim ami bilong lain birua na em i pret. Em i singaut olsem: “Bikman, ol Siria i banisim yumi pinis. Nau bai yumi mekim wanem?” Elisa i tok: “Maski pret. I tru ol i gat planti soldia, tasol yumi gat bikpela lain moa bilong helpim yumi.” Orait profet Elisa i beten olsem: “Bikpela, yu ken opim ai bilong dispela man bai em i ken lukim dispela lain mi tok long en.” Baibel i stori moa olsem: “Bikpela i opim ai bilong dispela wokman na wokman i lukim ol hos na karis i inapim dispela maunten Elisa i stap long en. Ol dispela hos na karis i wankain olsem paia stret.” (2 Kin. 6:15-17) Yumi inap kisim wanem skul long dispela stori?

Maski lain ami bilong Siria i banisim taun we Elisa i stap long en, bel bilong em i stap isi na em i no pret. Em i trastim Jehova na em i lukim olsem Jehova i lukautim em. Yumi save olsem Jehova i no inap wokim ol mirakel long nau, tasol em i lukautim ol manmeri bilong em olsem wanpela lain olgeta. I olsem ol hos na ol karis i gat paia long en i raunim yumi. Sapos yumi bilip olsem Jehova i lukautim lain bilong em, na oltaim yumi trastim em, yumi bai pilim olsem yumi stap gut na em i mekim gut long yumi. (Sng. 4:8) Orait, nau yumi ken stori long olsem wanem yumi inap kisim helpim long rot bilong ol narapela samting i bin kamap long laip bilong Elisa.

Wanpela taim, Elisa i wok gaden i stap na profet Elaija i kam na putim klos bilong em antap long Elisa. Taim Elaija i mekim olsem, em i soim olsem em i laik bai Elisa i kamap wokman bilong em. Elisa i wokim bikpela kaikai na singautim ol pren bilong em i kam, em i tok gutbai long papa na mama, na em i lusim ples na i go bihainim Elaija. (1 Kin. 19:16, 19-21) Elisa i redi long mekim olgeta kain wok God i laik bai em i mekim, olsem na Jehova i yusim em long mekim planti narapela wok, na bihain Jehova i makim em long kisim ples bilong Elaija na mekim wok profet.

Elisa i stap wokman bilong Elaija inap olsem 6-pela yia. Baibel i tok, insait long dispela haptaim Elisa i stap olsem “man husat i kapsaitim wara long han bilong Elaija.” (2 Kin. 3:11, NW) Wanem mining bilong dispela tok? Long dispela taim bipo, ol man i save yusim han long kaikai. Bihain long kaikai, wokboi i mas wasim han bilong bosman, na bilong mekim olsem em i mas kapsaitim wara long han bilong bosman. Olsem na Elisa i mekim sampela liklik wok i no gat nem. Tasol em i pilim olsem taim em i stap wokman bilong Elaija, dispela em wanpela gutpela blesing.

Olsem tasol, long nau tu, planti Kristen i redi long mekim kain kain wok long fultaim sevis. Bilong wanem? Long wanem, ol i bilip long Jehova na ol i laik givim bel tru long mekim wok bilong em. Olsem: Sampela Kristen i lusim ples na famili na ol i go wok long Betel o konstraksen. Ol inap mekim ol wok em long tingting bilong planti man em ol liklik wok i no gat nem. Tasol yumi no ken holim kain tingting olsem. Jehova i tingim tru olgeta kain wok ol wokman bilong em i mekim.—Hib. 6:10.

Paslain long God i “kisim Elaija i go long heven long wanpela raunwin,” em i salim Elaija i go long wanpela hap. Elaija i tokim Elisa olsem em i no ken i go wantaim em, tasol Elisa i tok: “Mi mas i go wantaim yu.” Taim ol i wokabaut i go, inap 2-pela taim moa Elaija i tokim Elisa long stap bek, tasol Elisa i no laik. (2 Kin. 2:1-6) Elisa i stap gut long Elaija na i no lusim em, wankain olsem Rut i bin stap gut long Naomi na i no lusim em. (Rut 1:8, 16, 17) Elisa i pilim olsem em gutpela samting tru long em inap stap wokman bilong Elaija, long wanem, God yet i bin givim dispela wok long Elisa.

Elisa i soim gutpela pasin tru yumi ken bihainim. Sapos oltaim yumi tingim olsem yumi mekim wok bilong Jehova, orait dispela bai helpim yumi long laikim tru olgeta kain wok insait long oganaisesen bilong God. Wok bilong Jehova tasol i nambawan wok tru i winim olgeta narapela wok.—Sng. 65:4; 84:10.

Taim tupela i wokabaut i go, Elaija i tokim Elisa olsem: “Klostu nau bai Bikpela i kisim mi na bai mi lusim yu. Olsem na yu laik bai mi mekim wanem samting bilong helpim yu pastaim?” Orait Elisa i tok: “Yu bin kisim strong bilong God . . . na mi laik yu givim dispela strong long mi.” Olsem Solomon i bin mekim planti yia paslain, Elisa i askim long kisim samting we bai helpim em long mekim gut wok bilong Jehova. (1 Kin. 3:5, 9; 2 Kin. 2:9) Elisa i bin askim long wanem samting? Long Israel, papa i mas skelim olgeta kago bilong em na givim 2-pela hap long fesbon pikinini man bilong em. (Lo 21:15-17) Olsem na Elisa i bin askim long kisim ples bilong Elaija na mekim wok profet. Na tu, em i askim long kisim strong, o pasin, bilong Elaija, long wanem, em i laik kisim wankain pasin bilong strongim bel na givim bel tru long bihainim lotu i tru olsem Elaija i bin mekim.—1 Kin. 19:13, 14.

Elaija i bekim askim bilong wokman olsem wanem? Em i tok: “Dispela samting yu askim mi long en, em i no isi long mi mekim. Tasol sapos yu lukim mi taim Bikpela i kisim mi i go, orait bai yu kisim dispela strong. Na sapos yu no lukim mi long taim mi go, orait yu no inap kisim.” (2 Kin. 2:10) Bekim bilong Elaija i makim 2-pela samting. Namba 1, God tasol bai makim olsem Elisa bai kisim samting em i askim long en, o nogat. Namba 2, sapos Elisa i laik kisim samting em i askim long en, orait em i mas stap wantaim Elaija maski wanem samting i kamap.

Olsem wanem? God i givim samting Elisa i askim long en? Baibel i tok: “Tupela i wok long toktok na wokabaut i go, na wantu wanpela paia i kamap namel long tupela. Insait long dispela paia, tupela i lukim ol hos i pulim wanpela karis. Orait na wanpela raunwin i kisim Elaija i go long heven. Elisa i lukim Elaija i go.”a Dispela em bekim Jehova i givim long Elisa. Elisa i lukluk i stap taim God i kisim Elaija, em i kisim 2-pela hap bilong strong bilong Elaija, na em i kisim ples bilong Elaija na mekim wok profet.—2 Kin. 2:11-14.

Taim Elaija i go, klos bilong em i pundaun, olsem na Elisa i kisim na werim. Taim ol manmeri i lukim Elisa i werim dispela klos, ol i save olsem nau em i kamap profet bilong God. Bihain, em i brukim wara Jordan i kamap 2-pela hap na long dispela rot em i soim klia olsem em i profet bilong God.

Ating Elisa i no lusim tingting long samting em i bin lukim taim God i kisim Elaija long rot bilong wanpela raunwin. Sapos wanpela man i lukim karis bilong pait na ol hos i gat paia long en, ating em bai kirap nogut stret! Ol dispela samting i kamapim klia long Elisa olsem Jehova i bin givim em ol samting em i bin askim long en. Taim God i bekim ol beten bilong yumi, yumi no save lukim visen we i gat ol hos na karis bilong pait i gat paia long en, nogat. Tasol i gat ol samting i kamapim klia tru olsem God i save yusim bikpela strong bilong em long helpim yumi na kamapim laik bilong em. Taim yumi lukim olsem Jehova i blesim oganaisesen bilong em long graun, dispela i kain olsem yumi lukim karis bilong em i wok long ron i go.—Ese. 10:9-13.

Elisa i gat planti ekspiriens we i helpim em long bilip tru long bikpela strong bilong Jehova. Holi spirit bilong God i bin helpim em long mekim 16 mirakel. Em i mekim planti mirakel moa winim Elaija.b Namba 2 taim Elisa i lukim ol hos na ol karis bilong pait i gat paia long en, em long taun Dotan, taim lain ami bilong Siria i kam banisim em.

Taim ol birua i banisim Elisa long taun Dotan, bel bilong em i stap isi na em i no pret. Bilong wanem? Long wanem, em i gat strongpela bilip long Jehova. Yumi tu i mas i gat strongpela bilip. Yumi mas beten askim God long givim holi spirit na bai yumi inap soim pasin bilong bilip na ol arapela gutpela pasin em holi spirit i save kamapim.—Luk 11:13; Gal. 5:22, 23.

Ating samting i kamap long taun Dotan i helpim Elisa long trastim Jehova na lain ami bilong em, ol ensel. God i salim ol ensel i go banisim taun na bai Elisa i no ken kisim hevi long han bilong ol birua. Bihain God i seivim Elisa na wokman bilong em taim em i pasim ai bilong ol birua. (2 Kin. 6:17-23) Long dispela taim bilong hevi, na long ol narapela taim tu, Elisa i soim olsem em i bilip na trastim tru Jehova.

Olsem Elisa i bin mekim, yumi tu i mas trastim God Jehova. (Snd. 3:5, 6) Sapos yumi mekim olsem, God bai ‘marimari long yumi na mekim gut long yumi.’ (Sng. 67:1) Em tru olsem long nau lain bilong Jehova i no lukim long ai tru bilong ol olsem ol karis na ol hos i gat paia long en i stap raunim ol, tasol Jehova i lukautim ol. Long bihain, Jehova bai lukautim lain bilong em long taim bilong “traipela hevi tru.” (Mat. 24:21; Rev. 7:9, 14) Olsem na kirap long nau na i go, oltaim yumi mas tingim God olsem man “yumi ken i go long em na i stap gut.”—Sng. 62:8.