Part 2—Hatpela Gavman Asiria—Namba Tu Bikpela Gavman Long Graun
Insait long graun ol i painim pinis ol pipia bilong ol bikpela haus bilong ol king bilong Asiria, na dispela i ken helpim yu long bilipim tok bilong Baibel, olsem Baibel i stori stret long ol samting na ol man na ol ples bilong bipo. Ol dispela samting ol i painim pinis, em i strongim tok bilong Baibel olsem wanem? Na yumi mas ting olsem wanem long en?
OL ASIRIA i man bilong pait. As ples bilong ol em wanpela stretpela graun long hap bilong Mesopotamia, tasol ol i kisim planti ol narapela hap na ol i kamap planti. Planti taim Baibel i stori long ol; ol i stap birua bilong lain Juda na Isrel.
Sapos yumi save gut long dispela lain bilong bipo bai yumi save gut long sampela hap tok bilong Baibel. Ol stori bilong ol Asiria yet em i strongim tok bilong Baibel. Tasol lain Asiria i kirap we?
Ol Asiria i strongpela man. Ol i gat bikpela gras antap long ai bilong ol na long wasket. Tumbuna bilong ol em Asur, em bubu pikinini bilong Noa. “Asur” na “Asiria” i wankain tok long tok Hibru. Nimrot i laik winim Jehova, na em i kirapim taun Niniva na Kala. Bihain ol Asiria i bosim dispela tupela taun, na taun Asur na Kosabat tu.−Jenesis 10:8-12, 22.
Namba wan tok bilong hap bilong Neam long Baibel em i tok: “Tok Jehova i givim long Niniva.” Niniva i namba wan taun bilong Asiria. Bilong wanem Jehova i mekim tok long Niniva? Long wanem, Niniva em i “taun bilong kapsaitim blut. Pasin bilong giaman na bilong stil i pulap long en. Long olgeta taim ol i bagarapim man!” (Neam 1:1, NW; 3:1, NW ) Neam i tok tru? Em i tok tru.
Ol Asiria i man bilong givim pen long ol man na bagarapim ol. I gat sampela piksa i stap na i makim ol Asiria i stilim ol samting na kukim ol haus na bagarapim ol man long ol kantri ol i pait long en. King bilong ol (Asenasipal) i hambak na i tok, em i bin tekewe skin bilong ol birua na karamapim long wanpela pos. Em i tok: “Mi kisim planti birua na kukim ol long paia . . . Sampela mi rausim nus na yau na pinga bilong ol na kamautim ai bilong ol. Mi wokim olsem tupela bikpela hip i go antap, em wanpela mi wokim long skin bilong ol man i stap laip yet na wanpela mi wokim long het bilong ol man.”
Ol i Man Bilong Lotu
Tasol ol Asiria i man bilong lotu. Wanpela nius i tok: “Pait em namba wan wok bilong ol, na oltaim ol pris i wok long kirapim pait. Taim ol i winim pait ol i save kisim olgeta samting bilong dispela lain ol i daunim, na ol pris i kisim hap bilong dispela . . . Taim ol i pait ol i gat bikpela tingting long kisim ol kago samting bilong ol birua, na dispela wok em i bikpela hap wok bilong lotu bilong ol.”−Ancient Cities, W. B. Wright, pes 25.
Ol Asiria i kisim dispela lotu bilong ol long Babilon. Wanpela buk (The Illustrated Bible Dictionary) i tok: “Lotu bilong ol Asiria na Babilon i wankain. Babilon i as bilong en.” Wanpela piksa bilong ol Asiria em i stap long haus tumbuna long London, em piksa bilong god Asur na em i gat 3-pela het. Ol i bin lotuim god triwan. Ol i man bilong kros pait, olsem na Neam i tok, God tru, em Jehova, em i “bekim nogut” na “kros” long ol Asiria.−Neam 1:2, NW.
Taim ol i daunim taun Niniva ol i bagarapim tru, na bihain ol man i no tingim moa hap em i bin stap long en, olsem na sampela man i tok, Baibel i giaman taim em i tok taun Niniva i bin stap. Tasol em i bin stap! Ol i painim pinis ol pipia bilong en, na taim ol man i lukim ol dispela samting ol i kirap nogut!
Ol i Painim Pinis Ol Bikpela Haus Bilong Ol King
Long 1843 Émile Botta bilong Frans i digim graun long hap bilong Kosabat, em i laik painim taun Niniva, tasol em i painim gutpela haus bilong Sagon, em king bilong Asiria, na Baibel i kolim nem bilong em long Aisaia 20:1. Baibel tasol i stori long Sagon, olsem na sampela man i tok Baibel i stori nating tasol long dispela king i no bin stap tru long bipo. Tasol nau ol man i painim pinis bikpela haus bilong em, em i gat 200 rum long en, na ol i painim planti samting i gat ol rait i stap long en, na planti samting moa. Ol i painim ol stori bilong Sagon, na sampela i wankain olsem ol tok long Baibel. Sagon em wanpela bikpela king bilong ol Asiria.
Na long 1847 Austin Henry Layard i painim pinis haus king bilong Senakerip long Niniva, em i stap 19 kilomita lusim Kosabat. Senakerip i bin biruaim Jerusalem na Baibel i kolim nem bilong em inap 13 taim. Layard i lukim gut 71 rum bilong dispela haus, na i gat ol piksa bilong pait na piksa bilong ol man i mekim ol samting bilong lotu.
Na ol man i painim pinis ol stori bilong Senakerip ol i bin raitim long ol strongpela graun olsem brik. Nau wanpela i stap long Yunivesiti bilong Sikago, na narapela i stap long haus tumbuna long Englan.
Ol dispela samting ol i painim pinis em i truim ol tok bilong Baibel. Baibel i stori long ol Asiria na ol samting ol i bin mekim, na Baibel i kolim nem bilong ol king bilong ol, na i stret wantaim ol samting ol man i painim pinis!
Ol King Bilong Asiria
Nem bilong ol dispela king bilong bipo em i narapela kain, tasol gutpela sapos yumi stori long 7-pela long wanem, ol i insait long sampela samting Baibel i stori long em.
Salmanisa Namba 3 i kamap king bihain long papa bilong em, (Asenasipal). I gat wanpela blakpela ston ol i putim long haus tumbuna long Englan, em ol i bin painim long Kala, na i gat piksa bilong King Jihu bilong Isrel i brukim skru na i daun long Salmanisa.−Lukim 2 King 10:31-33.
Long 844 B.C.E. samting Jehova i salim profet Jona i go toksave long Niniva olsem bagarap bai painim Niniva. Ol Niniva i tanim bel olsem na ol i no kisim bagarap. Yumi no save husat i bin stap king bilong Niniva long dispela taim, tasol yumi save, long dispela taim strong bilong Asiria i wok long i go daun.
Tiglat-pilesa Namba 3 em i namba wan king bilong Asiria em Baibel i kolim nem bilong ol. Em i laik pait wantaim kingdom bilong Isrel bilong not, em long taim Menahem i stap king (791-780 B.C.E.). Baibel i tok, Menahem i baim Tiglat-pilesa inap 1 tausen mani silva na bai Tiglat-pilesa i no ken pait wantaim lain bilong Menahem.−2 King 15:19, 20.
Ol i painim long Kala ol rait bilong Tiglat-pilesa na dispela i truim tok bilong Baibel. Tiglat-pilesa i bin rait olsem: “Menahem i givim sampela mani long mi long Sameria.”
Sameria i Pundaun
Ol Asiria i putim hevi long biktaun Sameria wantaim ol 10-pela lain Isrel bilong hap bilong not, na God Jehova tu, em Man bilong wokim heven na graun em i kros long ol dispela 10-pela lain Isrel. Ol dispela lain Isrel i bin lusim lotu bilong Jehova na ol i kirap kros pait na dring longlong na lotuim Bal. (Hosea 2:13) Jehova i salim ol profet i go toksave long ol, tasol ol i no tanim bel. Olsem na profet Hosea i tok: “Jehova bai sarapim ol Sameria wantaim king bilong ol, na ol bai stap olsem wanpela liklik hap han bilong diwai ol man i bin brukim na tromoi long wara na i drip i stap.” (Hosea 10:7, NW; 2 King 17:7, 12-18) Baibel i stori long dispela, na ol rait bilong ol Asiria yet i stori olsem.
Salmanisa Namba 5 i kam bihain long Tiglat-pilesa, na em i go pait wantaim lain Isrel long hap bilong not, na em i banisim taun Sameria bilong ol. Tripela yia bihain Sameria i pundaun (long 740 B.C.E.) olsem ol profet bilong Jehova i bin tok.−Maika 1:1, 6; 2 King 17:5.
Sagon Namba 2 i kam bihain long Salmanisa na ating em i mekim laspela pait bilong winim Sameria; ol i tok, Sameria i pundaun long taim Sagon i kamap king. Baibel i tok, taim Sameria i pundaun pinis, king bilong Asiria i kisim ol Isrel i go kalabus long Asiria. (2 King 17:6) Long Kosabat ol man i painim pinis wanpela rait bilong ol Asiria, em Sagon i bin raitim, na i tok: “Mi winim pinis Sameria, na mi kalabusim 27,290 lain bilong ol.”
Baibel i tok, taim ol Isrel i lusim Sameria, king bilong Asiria i kisim ol man nabaut “na em i bringim ol i kam sindaun long ol taun bilong Sameria, em senis bilong ol Isrel, na ol i kam kisim Sameria na ol i sindaun long ol taun bilong en.”−2 King 17:24, NW.
Ol rait bilong Sagon i gat wankain tok. Em i tok: “Mi stretim bek taun Sameria . . . Mi kisim ol lain bilong ol narapela hap, em mi yet mi bin pait wantaim ol na winim ol, na mi sindaunim ol long Sameria.”−Illustrations of the Old Testament History, R. D. Barnett, pes 52.
Jehova i Helpim Jerusalem
Senakerip em pikinini bilong Sagon na em i kamap king bihain long papa bilong em. Em i man bilong pait, na long 732 B.C.E. em i kisim bikpela lain ami i kam bilong pait wantaim kingdom bilong Juda.
Baibel i tok “Senakerip, em king bilong Asiria, em i kam kirapim pait long olgeta strongpela taun long hap bilong Juda na em i kisim ol dispela taun.” King bilong Jerusalem, em Hesekaia, em i pret na em i salim tok long Senakerip long Lekis. Em i tok em i ken baim Senakerip bambai Senakerip i no ken pait wantaim em.−2 King 18:13, 14, NW.
Olsem wanem? Senakerip i bin stap long Lekis? Em i bin stap! Senakerip i bin wokim ol piksa na em i putim long bikpela haus bilong em long Niniva, na nau ol man i painim pinis na ol i putim long haus tumbuna long Englan. Ol piksa hia i makim Senakerip i pait wantaim taun Lekis na em i win na ol man i lusim taun na i kam ausait, na Senakerip i kalabusim ol, na em i hangamapim sampela long pos, na sampela i wok long litimapim nem bilong em. Ol man i painim wanpela rait em i tok, “Senakerip em king bilong olgeta hap, na em i king bilong Asiria; em i sindaun long sia king na em i lukim ol kago em lain bilong em i bin kisim long Lekis.” Ol dispela tok i wankain olsem tok bilong Baibel.
Baibel i tok, Hesekaia i salim bikpela mani silva na mani gol i go long Senakerip. (2 King 18:14, 15) Ol rait bilong Senakerip i tok em i kisim pinis dispela mani.
Tasol maski Hesekaia i baim Senakerip na bai Senakerip i no ken kam pait wantaim Hesekaia, Senakerip i salim lain bilong em i kam sanap ausait long banis bilong Jerusalem na ol i singaut na tok bilas long Jehova na ol i tok ol i laik bagarapim dispela taun holi bilong Jehova. Aisaia i stap insait long Jerusalem na em i kolim tok bilong Jehova na i tok: “Jehova i tok long king bilong Asiria olsem: ‘Em i no ken kam insait long dispela taun, na em i no ken sutim wanpela spia i kam o holim plang o hipim graun klostu long banis bilong taun bai ol i ken pait long taun. Em bai go bek long rot em i bin kam long en, na em i no ken kam insait long dispela taun.’ ”−2 King 18:17–19:8, 32, 33, NW.
Olsem wanem? Jehova i truim tok promis em i bin mekim bilong pasim Senakerip? Em i mekim. Long dispela nait stret ensel bilong God i kilim i dai 185,000 Asiria! Senakerip i ranawe i go bek long Niniva, na wanpela taim long bihain em i brukim skru na lotuim god giaman bilong em, Nisrok, na tupela pikinini man bilong em i kilim em i dai pinis.−2 King 19:35-37.
Tasol taim em i raitim ol stori bilong em em i haitim dispela hap stori olsem ol ami bilong em i kisim bagarap. Em i stori olsem: “Dispela Judaman, Hesekaia, em i no bin daun long mi. Mi bin pait wantaim 46 strongpela taun bilong em na planti ol liklik ples bilong em na mi winim ol . . . Mi kalabusim em insait long Jerusalem, em ples em i sindaun long en, na em i stap olsem pisin insait long banis.” Na em i tok, Hesekaia i pret long ol bilas na biknem bilong Senakerip. Tasol Senakerip i no tok em i kisim Hesekaia o winim Jerusalem. Bilong wanem? Olsem Baibel i tok, ol dispela nambawan lain ami em i bin salim ol long pait wantaim Hesekaia em Jehova i kilim ol i dai pinis!
Esa-hadon em pikinini bilong Senakerip, na Baibel i kolim nem bilong em 3-pela taim−long 2 King, na Esra, na Aisaia. Baibel i tok, ol Asiria i winim pait long king bilong Juda, em Manasa. Ol man i painim pinis wanpela lista bilong ol Asiria, na i gat nem bilong ol man i bin daun long Esa-hadon na i gat wanpela nem olsem “Manasa, king bilong Juda.”−2 Kronikel 33:11.
Asubanipal em i pikinini man bilong Esa-hadon, na ol man i ting em dispela man Esra 4:10 (NW ) i kolim na i tok, “em bikman Asenapa, em i gat bikpela nem.” Em i bin mekim kantri Asiria i go bikpela.
Bikpela Gavman i Pinis
Ol Asiria i bin mekim pasin nogut, olsem na Jehova i makim ol bilong kisim bagarap. Profet Neam i tok, namba wan taun bilong ol, em Niniva, bai painim bagarap, na em i tok: “Ol dua bilong wara bai op, na haus bilong king bai pinis.” Baibel i tok, ol man bai kam na kisim ol silva na gol insait long taun Niniva na bagarapim em, na bihain ol man bai tok: “Niniva i kisim bagarap! Husat bai sori long en?”−Neam 2:6-10, NW; 3:7, NW.
Olsem wanem? Dispela i bin kamap, o nogat? Em i bin kamap. Long 632 B.C.E. ol Babilon na Midia i bagarapim Niniva, namba wan taun bilong ol Asiria. Wanpela rait bilong ol Babilon i tok: “Ol i kisim bikpela mani kago bilong dispela taun na haus lotu bilong en na karim i go, na ol i bagarapim taun na i kamap olsem wanpela maunten pipia.
Long nau i gat tupela maunten i stap, em mak bilong taun Niniva i bin stap long en. Taim yumi lukim dispela tupela maunten yumi ken save, i no gat wanpela gavman o lain man inap pasim Jehova long truim tok promis em i bin mekim, na ol Asiria tu, maski ol i gat pasin antap na ol i strong na i man bilong kros pait.
[Mep long pes 27]
(Bilong save ol dispela rait i stap we long pes, lukim buk o magasin)
OLGETA HAP ASIRIA I BOSIM
Niniva
Babilon
Damaskas
Sameria
Lekis
Jerusalem
AREBIA
ISIP
Bikpela Solwara
[Kredit Lain]
Based on a map copyrighted by Pictorial Archive (Near Eastern History) Est. and Survey of Israel
[Piksa long pes 28]
King Asubanipal i kapsaitim wain ofa antap long ol laion ol i kilim i dai. Yumi tingim Nimrot, a?
[Kredit Lain]
Courtesy of the British Museum, London
[Ol Piksa long pes 29]
Piksa bilong ol Asiria, ol i mekim wok long wanpela masin bilong pait na ol i pait long winim taun Lekis bilong ol Judia
[Kredit Lain]
Courtesy of the British Museum, London
Tel Lekis. Long hap bilong saut na wes long kantri bilong ol Juda em ples maunten, na taun Lekis i gat wok long was long ol dispela hap, nogut birua i kam insait, tasol ol Asiria i kisim
[Kredit Lain]
Picture Archive (Near Eastern History) Est
[Piksa long pes 30]
Piksa bilong Sagon Namba 2 (long han kais) em i toktok wantaim wanpela bikman bilong Asiria, ating em pikinini bilong em, Senakerip
[Kredit Lain]
Courtesy of the British Museum, London