Kilim Pikinini Olsem Ofa​—⁠Bilong Wanem Em Nogut Tru?

“Long ples daun bilong pikinini man bilong Hinom ol i wokim ol alta long Tofet bilong kukim ol pikinini man na pikinini meri bilong ol long paia, tasol mi no bin tokim ol long mekim olsem, na mi no bin tingting long mekim kain pasin olsem.”−Jeremaia 7:​31, NW.

LONG taim bilong tupela king bilong Juda, em Ehas na Manasa, lain Isrel i kirap bihainim lotu nogut bilong ol narapela lain i stap klostu long ol. Wanpela pasin nogut tru ol i bihainim, em olsem: Ol i save kukim ol pikinini bilong ol long paia olsem ofa bilong god giaman Molek. (2 Kronikel 28:​3, NW; 33:​6, 9) Bihain King Josaia i pinisim planti bilong ol dispela “pasin nogut tru,” tasol “belhat bilong Jehova i no pinis, em i belhat na birua tru long Juda long olgeta pasin nogut tru Manasa i kirapim ol long bihainim.” (2 King 23:​10, 26, NW ) Bilong wanem belhat bilong Jehova i no pinis? Dispela pasin ol i mekim, bilong wanem Jehova i no laik tru long en na em i no ken lusim tingting long en?

Wanpela bikpela buk i stori long ol Juda (em Jewish Encyclopedia bilong Funk na Wagnall) na dispela buk i tok, “Pasin bilong kilim ol pikinini olsem ofa em bikpela samting long lotu bilong god giaman bilong ol Fonisia ol i kolim Molek o Bal o Kronos.” Pastaim ol Fonisia i sindaun long hap bilong not long kantri Kenan, tasol ol i man bilong solwara na sampela lain bilong ol ol i go sindaun long planti hap bilong Solwara Mediterenian, na long olgeta hap ol i go sindaun long en ol i bihainim dispela pasin nogut tru bilong lotu bilong ol, olsem ol i kilim ol pikinini bilong mekim ofa long god bilong ol. Long dispela taim ol man i painim pinis wanpela samting long olpela taun bilong ol Fonisia bilong bipo, nem bilong en Kates (Carthage), em i stap long hap bilong Tunis, long Tunisia, Not Afrika. Dispela samting ol i painim long dispela olpela taun i kamapim long ples klia dispela pasin bilong ol Fonisia, em pasin nogut tru.

Ol i painim pinis dispela olpela taun long yia 1921, tasol pastaim ol i no skelim gut. Tasol long yia 1970 samting biktaun Tunis i wok long kamap bikpela na i laik kisim dispela hap graun olpela taun i stap long en, olsem na ol man i kirap skelim gut ol samting bilong en. Ol i digim graun i go daun na ol i kisim save olsem: Dispela hap graun em i olsem wanpela draipela ples matmat−ol i painim pinis bun bilong planti planti pikinini bipo ol i bin kilim ol i dai olsem ofa. Wanpela nius (Biblical Archaeology Review) i ripot olsem:

‘Kirap long namba 8 senseri paslain long Krais i kam inap long namba 2 senseri paslain long Krais, ol mama na papa long biktaun Kates i bin planim bun bilong pikinini bilong ol long dispela hap graun. Ol i bin givim ol dispela pikinini long god Bal Hamon na long god meri Tanit olsem ofa. Long namba 4 senseri, dispela hap ol i planim ol bun long en, ol i kolim Tofet [long Baibel], em i kamap bikpela inap olsem 6,000 skwea mita, na ol i bin planim ol dispela bun narapela antap long narapela inap 9-pela taim insait long dispela hap graun.’

Ol i painim ol kain ples matmat olsem long Sisili tu, na long Sadinia, na long sampela hap moa long Tunisia. Bipo ol Fonisia i bin i go sindaun long ol dispela hap. Long dispela ples matmat long Kates, ol i painim pinis sampela ston ol i bin sanapim olsem mak na i gat piksa bilong god meri Tanit i stap long en. Sampela man i tok, dispela god meri Tanit em i wankain olsem god meri bilong ol Kenan ol i kolim Astoret o Astate, em meri bilong god Bal. Aninit long ol dispela ston i gat sospen graun i stap, sampela ol i penim long kain kain kala, na bun bilong ol pikinini ol i bin kukim long paia olsem ofa i pulap long ol dispela sospen graun.

Ol i kilim i dai planti pikinini tru olsem ofa. Wanpela ripot i tok: “Mipela skelim hamas sospen graun mipela i painim pinis long hap mipela i digim na mipela i ting olsem ol i bin putim 20,000 samting sospen insait long graun kirap long yia 400 paslain long Krais na i kam inap long yia 200 paslain long Krais.” Yumi kirap nogut long dispela pasin nogut bilong ol, em ol i bin kilim i dai planti pikinini tru. Na yumi kirap nogut moa yet taim yumi tingim lain bilong dispela biktaun−taim em i stap biktaun tru i no gat bikpela lain tumas i stap long en, inap olsem 250,000 tasol.

Ol rait i stap long ol dispela ston i makim olsem ol i bin kilim ol dispela pikinini bilong truim tok tru antap papamama bilong ol i bin mekim long Bal o Tanit bambai dispela tupela god i ken helpim ol. Ol i raitim nem na namba bilong ol man long ol dispela ston, na dispela i makim olsem planti hetman bilong ples na man i gat nem ol i bin bihainim dispela pasin bilong kilim pikinini olsem ofa. Ol i mekim bambai ol god bilong ol i ken blesim ol na ol i ken holimpas mani kago na bikpela nem na namba bilong ol. Bun bilong tupela o tripela pikinini i pulap long sampela bilong ol dispela sospen graun na ating ol dispela pikinini i bilong wanpela famili tasol, long wanem ol i gat narapela narapela krismas.

Yumi no laik tru long dispela pasin bilong ol Fonisia, a? Em pasin nogut tru. Orait, tingim dispela samting: Baibel i tok: “Manasa i pulim ol Juda na ol man i stap long Jerusalem na ol i mekim pasin i nogut moa yet na i winim pasin nogut bilong ol arapela lain Jehova i bin pinisim ol long han bilong ol Isrel.” (2 Kronikel 33:​9, NW ) Olsem na i stret Jehova i tok: “Ol i bin kilim i dai ol man i no gat asua na blut bilong ol i pulap long dispela ples.” (Jeremaia 19:​4, NW ) Olsem na dispela nius (Review) i tok: ‘Ol samting na ol rait ol man i painim pinis, em bilong ol Kates yet, ol dispela samting i kamapim long ples klia olsem ol man bilong raitim ol buk bilong bipo na ol man bilong raitim Baibel i stori stret long ol.’

Jehova i “pinisim” ol lain bilong Kenan em ol i lotuim ol god giaman, na olsem tasol em i givim strafe long ol dispela Isrel i bin lusim em. Long yia 607 paslain long Krais, long han bilong ol Babilon, ol dispela Isrel i kisim pe nogut bilong pasin nogut ol i bin mekim. Long nau tu ol man i bin kilim i dai planti milion milion man long rot bilong ol bikpela pait o biruaim man o rausim pikinini long bel. Jehova bai bekim pe nogut long olgeta man em ol yet i bin kilim man i dai, o ol i gat hap asua long blut bilong ol dispela planti milion milion man i dai pinis.−Revelesen 19:​11-15.