Tok Bilong Jehova i Gat Laip
Sampela Bikpela Tok Bilong Buk Esta
DISPELA samting bai kamap. Ol bai kilim i dai lain Juda olgeta. Long wanpela de em i makim pinis, olgeta Juda i stap long hap i kirap long India i go inap long Itiopia, ol bai pinis olgeta. Em tingting bilong man i stretim rot bilong mekim dispela samting. Tasol em i no tingim wanpela bikpela samting. God bilong heven inap kisim bek lain bilong em long olgeta kain bikpela hevi. Buk Esta i kamapim dispela stori long God i kisim bek lain bilong em.
Wanpela lapun man Juda, nem bilong em Mordekai, i raitim Buk Esta. Buk Esta i stori long ol samting i bin kamap insait long 18 yia taim King Serksis bilong Persia i stap king. Dispela stori i soim olsem wanem Jehova i save kisim bek lain bilong em long ol samting nogut ol birua bilong ol i laik mekim, maski ol wokman bilong em i stap nabaut long wanpela bikpela hap. Dispela save i strongim tru lain bilong Jehova long nau, em ol i save mekim wok bilong em long 235 kantri. Na tu, Buk Esta i stori long ol man em yumi ken bihainim pasin bilong ol na ol man em yumi no laik bihainim pasin bilong ol. Tru tumas, “tok bilong God em i gat laip, na em i wok strong i stap.”—Hibru 4:12.
KWIN I GAT WOK
Long namba 3 yia (493 B.C.E.) bilong King Serksis i stap king, em i wokim wanpela bikpela kaikai. King i no orait long Kwin Vasti husat i luk naispela tru, na king i rausim namba bilong em olsem kwin. Namel long ol naispela yangpela meri, ol i makim Hadasa, em meri Juda, long kisim ples bilong kwin. Kasen bilong em Mordekai, i tokim em long em i no ken kamapim olsem em i meri Juda na em i mas yusim nem Esta, em nem Persia bilong em.
Bihain, wanpela man i gat pasin antap, Haman, em i kisim namba olsem praim minista. Haman i belhat long Mordekai i no laik “brukim skru long Haman na givim biknem long em,” olsem na em i tingting long wokim rot bilong bagarapim olgeta Juda long hap Persia i bosim. (Esta 3:2) Haman i kirapim Serksis long wanbel wantaim em na em i kirapim king long givim tok orait long kilim i dai olgeta Juda. Mordekai i “pasim olpela laplap i bruk nabaut, na em i putim sit bilong paia long het bilong en.” (Esta 4:1) Nau Esta i mas mekim sampela samting. Em i singautim king na praim minista long wanpela bikpela kaikai. Taim ol i stap long dispela kaikai, Esta i singautim ol long kam long narapela kaikai long de bihain. Haman i amamas tru. Tasol em i belhat tru long Mordekai i no laik givim biknem long em. Haman i tingting long kilim i dai Mordekai paslain long dispela kaikai.
Bekim Bilong Ol Askim Bilong Baibel:
1:3-5—Ol i kaikai i stap inap 6-pela mun? Baibel bilong pastaim i no tok ol i kaikai i stap longpela taim olsem, tasol inap 6-pela mun king i soim long ol bikman olgeta mani na bilas bilong haus bilong em. Ating king i laik yusim dispela haptaim bilong hambak na soim ol gutpela samting bilong gavman bilong em bambai ol bikman i ken save olsem em inap mekim ol samting em i tingting long mekim. Sapos olsem, ating ves 3 na 5 i stori long bikpela kaikai i bin stap inap wanpela wik na i kamap long pinis bilong dispela 6-pela mun.
1:8—Olsem wanem yumi ken tok “i no gat mak long hamas wain ol i ken dring”? Long dispela taim, King Serksis i no bihainim kastam bilong ol Persia, olsem narapela i kirapim narapela long dring inap long wanpela mak long ol kain bung olsem. Wanpela buk i tok, “ol i ken dring liklik o planti, laik bilong wan wan.”
1:10-12—Bilong wanem Kwin Vasti i no laik kam long king? Sampela saveman i tok, kwin i no laik harim tok, long wanem, em i no laik rabisim biknem bilong em long ai bilong ol man i spak em king i bin singautim ol i kam. O ating dispela kwin i gat naispela skin tru i no gat pasin daun. Baibel i no stori i gat wanem as na em i mekim olsem, tasol ol saveman bilong dispela taim i gat tok long Vasti i no bihainim tok bilong man bilong em, na dispela pasin bilong Vasti inap stiaim olgeta meri marit long ol provins bilong Persia.
2:14-17—Esta i bin mekim pasin pamuk wantaim king o nogat? Nogat, em i no bin mekim olsem. Baibel i tok, long moningtaim ol arapela meri em ol i bringim i kam long king, ol i go bek long narapela haus i stap aninit long lukaut bilong “wanpela man i save bosim ol namba 2 lain meri bilong King.” Olsem na ol meri husat i bin stap wantaim king long nait i kamap namba 2 lain meri bilong em. Tasol ol i no bringim Esta long haus bilong ol dispela meri bihain long em i bin lukim king. Taim ol i bringim Esta i go long Serksis, “king i no laikim ol arapela meri olsem em i laikim Esta. Em i lukim Esta i winim ol arapela meri, na em i gutpela meri tru.” (Esta 2:17) I gat wanem as na Serksis i laikim em tru? Em wankain as i bin kirapim ol narapela tu long laikim em. “Hegai i lukim Esta i gutpela meri, na i laikim em.” (Esta 2:8, 9) Ol samting Hegai i lukim—naispela skin na ol gutpela pasin bilong Esta—i kirapim em long laikim Esta. Em nau, ‘olgeta man i lukim Esta ol i laikim em tru.’ (Esta 2:15) Na olsem tasol, king i amamas long ol gutpela pasin bilong Esta, olsem na em i kirap laikim em tru.
3:2; 5:9—Bilong wanem Mordekai i no laik brukim skru long Haman? I no gat rong long ol Israel i soim rispek long ol man i gat namba long gavman na brukim skru long ol. Tasol i no stret long mekim olsem long Haman. Haman em i man Agak, ating bilong lain Amalek, na Jehova i bin tok olsem olgeta Amalek i mas i dai. (Lo 25:19) Sapos Mordekai i brukim skru long Haman, i olsem em i no stap gut long Jehova. Em i tok em i wanpela Juda, olsem na em i no laik tru long brukim skru long Haman.—Esta 3:3, 4.
Skul Yumi Kisim:
2:10, 20; 4:12-16. Esta i kisim tok bilong stiaim em long wanpela strongpela wokman bilong Jehova. Em i gutpela long yumi “bihainim tok bilong ol [man i go pas] na i stap aninit long ol.”—Hibru 13:17.
2:11; 4:5. Yumi no ken ‘lukautim ol samting bilong yumi tasol. Nogat. Yumi wan wan i mas lukautim ol samting bilong ol arapela.’—Filipai 2:4.
2:15. Esta i gat pasin daun na em i bosim gut bel bilong em, olsem na em i no askim ol long givim sampela bilas moa o gutpela klos moa long em. Em i werim ol samting Hegai i givim em. Esta i ‘bilasim insait bilong em long olkain bilas i no inap long bagarap, dispela kain bilas em pasin bilong i stap belgut na i stap bel isi.’ Long dispela as tasol king i laikim Esta.—1 Pita 3:4.
2:21-23. Esta na Mordekai i stap gutpela piksa long pasin bilong “stap aninit long ol gavman.”—Rom 13:1.
3:4. Ating long sampela taim i gutpela moa long yumi no tokim ol man long yumi husat, olsem Esta i bin mekim. Tasol taim yumi mas sanap strong long ol bikpela samting, olsem stap gut long Jehova na daun long em olsem King bilong yumi, yumi no ken pret long tokaut olsem yumi Witnes Bilong Jehova.
4:3. Taim ol traim i painim yumi, yumi mas beten askim Jehova long givim strong na savetingting long yumi.
4:6-8. Mordekai i askim ol bikman bilong gavman long mekim ol samting na bai Haman i no inap mekim wok nogut bilong em.—Aposel 25:11.
4:14. Mordekai i stap gutpela piksa tru long pasin bilong bilip long Jehova.
4:16. Esta i bilip tru long Jehova, na em i no pret long mekim ol samting ol man inap kilim em i dai long en. Em i bikpela samting long yumi bilip long Jehova na yumi no ken bilip long yumi yet tasol.
5:6-8. Esta i singautim Serksis i kam long narapela kaikai bambai Serksis i ken amamas long em. Em i bihainim savepasin, na yumi tu i mas mekim olsem.—Sindaun 14:15.
OL SAMTING I SENIS
Taim ol samting i wok long kamap, sampela senis tu i kamap. Ol i hangamapim Haman long diwai pos em i bin wokim bilong Mordekai, na Mordekai i kamap praim minista! Na olsem wanem long dispela tingting long kilim i dai olgeta Juda? Dispela samting tu i senis.
Gutpela meri Esta i toktok gen. Em i kamap long ai bilong king—maski ol inap kilim em i dai long dispela—bilong askim king long em i no ken larim ol man i kilim i dai ol Juda. Serksis i save long samting em i mas mekim. Olsem na taim de bilong kilim i dai ol Juda i kamap, ol i no dai, nogat, ol man i laik bagarapim ol, ol yet i dai. Mordekai i tok ol i mas kamapim Ol Bikpela De Bilong Purim bilong tingim long olgeta yia dispela bikpela de God i bin kisim bek ol. Mordekai em i stap namba 2 bilong King Serksis, na Mordekai “i mekim wok bilong helpim ol Juda i sindaun gut, olsem na ol lain bilong ol i kamap bihain bai ol i no ken pret long wanpela samting.”—Esta 10:3.
Bekim Bilong Ol Askim Bilong Baibel:
7:4—Olsem wanem wok bilong kilim i dai ol Juda bai ‘givim hevi long king’? Esta i tok ol inap salim ol Juda olsem wokboi nating na long dispela rot em i kamapim klia olsem hevi bai painim king sapos ol i kilim i dai ol Juda. Haman i bin tok promis long putim 50 milion kina long haus mani bilong king, tasol sapos Haman i bin salim ol Juda olsem wokboi nating, king bai kisim bikpela mani moa. Na sapos laik bilong Haman long kilim i dai ol Juda i bin kamap, dispela i makim olsem kwin tu i mas i dai.
7:8—Bilong wanem ol wokman i karamapim pes bilong Haman? Ating dispela i makim olsem pasin man i mekim em samting bilong sem long en o bagarap bai painim em. Wanpela buk i tok, “sampela taim ol lain bilong bipo i karamapim het bilong ol man ol i laik kilim ol i dai.”
8:17—Olsem wanem yumi ken tok “planti arapela man i pret long ol Juda, na ol i joinim lain bilong ol”? Planti Persia i kirap bihainim lotu Juda, ol i ting dispela senis olsem ol man bai no kilim i dai ol Juda i makim olsem God i helpim ol. Wankain samting i wok long kamap bilong truim tok profet i stap long Buk Sekaraia. Em i tok: “Long dispela taim 10-pela man bilong ol longwe ples bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ”—Sekaraia 8:23.
9:7-10, 15, 16—Maski ol Juda inap kisim ol gutpela samting bilong ol birua, bilong wanem ol i no kisim? Pasin bilong ol i kamapim klia olsem ol i laik mekim ol samting bambai ol i no ken bagarap, ol i no tingting long kisim mani kago.
Skul Yumi Kisim:
6:6-10. “Pasin bilong hambak na litimapim nem bilong yu yet bai i mekim yu i pundaun na bagarap.”—Sindaun 16:18.
7:3, 4. Olsem wanem? Yumi no pret long kamapim klia olsem yumi Witnes Bilong Jehova, maski dispela inap mekim na ol man i birua long yumi?
8:3-6. Yumi inap na yumi mas askim ol bikman bilong gavman na ol lain bilong kot long lukautim yumi long ol birua.
8:5. Esta i bihainim gutpela tingting na em i no tok olsem king i bin givim tok orait long kilim i dai lain bilong Esta. Na olsem tasol, yumi mas bihainim gutpela tingting taim yumi autim tok long ol man i gat bikpela namba.
9:22. Yumi no ken lusim tingting long ol rabisman i stap namel long yumi.—Galesia 2:10.
Jehova Bai Helpim Ol
Mordekai i tok em laik bilong God na Esta i kamap kwin. Taim bagarap i laik painim ol Juda, ol i stap tambu long kaikai na ol i beten askim God long helpim ol. Kwin i go long ai bilong king, maski king i no bin singautim em long kam, na king i amamas long lukim em. King i no ken slip long dispela nait em bikpela samting i laik kamap long en. Tru tumas, Buk Esta i stori long olsem wanem Jehova i stiaim ol samting bilong helpim lain bilong em.
Stori bilong Esta i strongim yumi husat i stap long “taim bilong las de.” (Daniel 12:4) “Long las de,” olsem laspela hap bilong taim bilong pinis, Gok bilong Magok—Satan—em bai birua tru long lain bilong Jehova. Em i laik pinisim tru olgeta wokman bilong God. Tasol olsem long taim bilong Esta, Jehova bai helpim na kisim bek ol man i lotuim em.—Esekiel 38:16-23; Esta 4:14.
[Piksa long pes 10]
Esta na Mordekai i sanap long ai bilong Serksis